1. Kiristtoosa hayquwa Hassayiyo Baalaa gallassay layttaa giddon keehi dumma gallassa gidiyoy aybissee? (Luqaasa 22:19, 20)

 YIHOOWA asawu Kiristtoosa hayquwa Hassayiyo Baalaa gallassay layttaa giddon keehi dumma gallassa. Yesuusi bana kaalliyageeti bonchchanaadan azazido baalay hagaa xaalaala. (Luqaasa 22:19, 20 nabbaba.) Nuuni Hassayuwa Baalaa yeemuwan naagiyo daro gaasoy deˈees. Hegaappe amaridaagaa ane beˈoos.

2. Hassayuwa Baalaa nuuni yeemuwan naagiyo amarida gaasoti aybee?

² Hassayuwa Baalay wozoy ay keena alˈˈokko nuuni wotti dentti qoppanaadan maaddees. Hegee nuuni Yesuusa yarshshuwa nashshiyogaa bessana danddayiyo ogiya nuna hassayissees. (2 Qor. 5:14, 15) Qassi hegee ishanttinne michchontti issoy issuwa ‘minttettanaadan’ oottees. (Roo. 1:12) Ayyaanaaban shuggida daroti layttan layttan he baalawu shiiqoosona. Hassayuwa Baalaa wode ishantti siiquwa bessido gishshawu, etappe amaridaageeti Yihoowakko simmanawu murttidosona. Qassi shoobetti yiida daroti beˈidobaaninne siyidoban maalaalettidi Geeshsha Maxaafaa xannaˈanawu koyidosona. Ha ubbabay Hassayuwa Baalay nuussi dumma gidanaadan oottees.

3. Hassayuwa Baalay kumetta saˈan deˈiya ishanttu maabaraa issuwa oottiyoy aybiinee? (Misiliyakka xeella.)

³ Hassayuwa Baalay kumetta saˈan deˈiya ishanttu maabaray issuwa gidanaadan oottiyogaakka qoppa. Yihoowa Markkati away wulliyo wode Hassayuwa Baalawu kumetta saˈan shiiqoosona. Wozoy keehi koshshiyogaa qonccissiya haasayaa nuuni ubbay siyoos. Nuuni naaˈˈu saba mazamureta yexxoos; oyttaynne woynee yuuyees; qassi oyddutoo woosettiyo wode wozanappe “aminˈˈi” goos. Ubba galchchati 24 saate giddon issi  malabaa oottoosona. Yihoowaynne Yesuusi, kumetta saˈan deˈiya nuuni ubbay hegaadan eta bonchchiyogaa beˈiyo wode eti ay keena ufayttanaakko qoppana danddayay?

4. Nuuni ha huuphe yohuwan ay beˈanee?

⁴ Ha huuphe yohuwan nuuni ha oyshata pilggana: Hassayuwa Baalawu nu wozanaa waati giigissana danddayiyoo? Harati he baalaappe goˈettanaadan waati maaddana danddayiyoo? Qassi ayyaanaaban shuggidaageeta waati maaddana danddayiyoo? Ha oyshatu zaaroy ha keehi koshshiya baalawu nuuni giigettanaadan maaddees.

HASSAYUWA BAALAWU NU WOZANAA WAATI GIIGISSANA DANDDAYIYOO?

5. (a) Wozoy ay keena goˈˈiyakko nuuni wotti dentti qoppana koshshiyoy aybissee? (Mazamure 49:7, 8) (b) Yesuusi Hayqqidoy Aybissee? giya biiduwappe neeni ay tamaaradii?

⁵ Hassayuwa Baalawu nu wozanaa giigissana danddayiyo keehi koshshiya ogetuppe issoy Yesuusi Kiristtoosa wozuwa yarshshoy ay keena goˈˈiyakko wotti dentti qoppiyogaa. Nuuni nuna nagaraappenne hayquwappe laˈa kessana danddayokko. (Mazamure 49:7, 8 nabbaba; Yesuusi Hayqqidoy Aybissee? giya biiduwakka beˈa.) a Hegaa gishshawu Yihooway nuna ashshanawu Yesuusi ba deˈuwa immanaadan oottiis. Yihoowaynne Yesuusi gita waagaa qanxxidosona. (Roo. 6:23) Yihoowaynne Yesuusi nuussi oottidobaa nuuni loytti qoppiyo wode, wozuwa loytti nashshana. Yihoowaynne Yesuusi bantta dosan nuuyyo oottido, gitabatuppe amaridaageeta beˈana. Shin, koyruwan wozoy aybee?

6. Wozoy aybee?

⁶ Wozoy issibaa zaarettidi ekkanawu qanxxiyo waagaa. Koyro bitanee Addaame merettiyo wode wottiyobi baynna asa. I nagaraa oottido wode A xalaalaappe gidennan, A naatuppekka merinaa deˈuwa hidootay haliis. Addaameppe halidabaa zaaranawu Yesuusi wottiyobi baynna ba deˈuwa aatti immiis. Yesuusi saˈan deˈiyo wode “nagara . . . oottibeenna; ba doonankka worddo haasayibeenna.” (1 PHe. 2:22) Yesuusi hayqqido wode wottiyobi baynna A deˈoy Addaameppe halida deˈuwawu bixe.—1 Qor. 15:45; 1 Xim. 2:6.

7. Yesuusi saˈan deˈiyo wode A gakkida amarida paaceti awugeetee?

⁷ Yesuusi saˈan deˈiyo wode, wayssiya wodiyankka ubbaban Yihoowawu ammanettiis. Yesuusi wottiyobi baynna naˈa, qassi A yelidaageeti nagaranchcha gidikkonne, I etawu azazettiis. (Luq. 2:51) I yelagatettan deˈiyo wode, bana yelidaageetussi azazettennaadan woy Yihoowawu ammanettennaadan oottana danddayiya paaciya eqettana koshshiis. Qassi Yesuusi gasttido wode Seexaanaa Dabloosa eqettana koshshiis; Seexaanay Yesuusi nagaraa oottanaadan paacciisinne ammanettiyogaa agganaadan yootiis. (Mat. 4:1-11) Seexaanay Yesuusa nagaran yegganawu murttiis; gaasoykka Yesuusi nagaraa oottikko wozuwa qanxxana danddayenna.

8. Yesuusi genccido hara paaceti awugeetee?

⁸ Yesuusi saˈan haggaaziyo wode hara paaciyakka gencciis. A morkketi A bolli yedetaa gattidosonanne woranawu malidosona. (Luq. 4:28, 29; 13:31) I bana kaalliyageetu balaakka danddayana koshshiis. (Mar. 9:33, 34) Yesuusi shilootan eqqido wode harati A barchcheyidosonanne boridosona. Hegaappe simmin eti A keehi tuggayidinne kawushshidi woridosona. (Ibr. 12:1-3) I bana gakkida wurssetta waayiya Yihoowa naagoy baynnan genccana koshshiis. b—Mat. 27:46.

9. Yesuusa yarshshuwa xeelliyagan nuuyyo aybi siyettii? (1 PHeexiroosa 1:8)

 ⁹ Yesuusi bana wozo oottidi immanawu keehi waayettidoogee tuma. I ba dosan nuussi oottido ubbabaa nuuni qoppiyo wode A wozanappe siiqoos.—1 PHeexiroosa 1:8 nabbaba.

10. Yihooway wozuwawu qanxxido waagay aybee?

¹⁰ Yesuusi wozuwa qanxxana mala Yihooway ba dosan waatidee? Issi aawaynne naˈay keehi siiqettiyogaadan, Yihoowaynne Yesuusi keehi siiqettoosona. (Lee. 8:30) Yesuusi saˈan deˈiyo wode keehi daro metuwa gencciyogaa Yihooway beˈidi ay keena azzanidaakko qoppa. Yihooway harati ba Naˈaa naaqqidoogaa, ixxidoogaanne wayssidoogaa beˈidi keehi seelettidoogee qoncce.

11. Asay Yesuusa worido wode Yihooway ay keena azzanidaakko bessiya leemisuwa yoota.

¹¹ Naˈi hayqqido yelidaageeti hegee eti keehi kayyottanaadan oottiyogaa eroosona. Nuuni dendduwan mintti ammanikkonne, hegee nu siiqiyo uri hayqqiyo wode azzaniyogaa muleera agganaadan oottenna. Yihooway I siiqiyo Naˈay 33 M.Ln keehi waayettidi hayqqiyo wode beˈidi ay keena azzanidaakko akeekanaadan ha leemisoy nuna maaddees. c—Mat. 3:17.

12. Hassayuwa Baalaa gakkanaashin deˈiya wodiyan nuuni ay oottana danddayiyoo?

¹² Hassayuwa Baalay gakkanaashin buzo xinaatiyan woy so asaa goynuwan wozuwara gayttidabaa loytta pilgganawu baaxeta. Wozuwabaa loytta xannaˈanawu, Yihoowa Markkati Geeshsha Maxaafaa Xannaˈanawu Maaddiya Xuufiya (Amaarattuwa) woy hara xuufeta goˈetta. d Qassi Kiristtaanetu Deˈuwanne Haggaazuwa​—Xannaˈiyo Xuufiyan kiyida, Godaa Kahuwa wode Geeshsha Maxaafaa nabbabiyo prograamiya kaalla. Hegaa bollikka, Hassayuwa Baalaa gallassan Maallado Goynuwa dumma prograamiya beˈiyogaa dogoppa. Nuuni Hassayuwa Baalawu nu wozanaa giigissiyo wode, haratikka hegaappe goˈettanaadan maaddana danddayoos.—Izi. 7:10.

HARATI GOˈETTANAADAN MAADDA

13. Hassayuwa Baalaappe harati goˈettanaadan nuuni oottana danddayiyo koyrobay aybee?

¹³ Hassayuwa Baalaappe harati goˈettanaadan waati maaddana danddayiyoo? Nuuni oottana danddayiyo koyrobay harata shoobbiyogaa. Baalaa yaanaadan shoobbanawu  nuuni ubbatoo haggaazuwan demmiyo asaa haasayissiyogaa gujjin, nu eriyo asaa xaafi oyqqana danddayoos. Nu dabbota, nunaara oottiyageeta, nunaara tamaariyageetanne nu eriyo hara asata xaafi oyqqana danddayoos. Attamettida shoobiya woraqatay gidiyagaa keenay xayikkokka, nuuni linkkiya kiittana danddayoos. Daro asay yaanawu kuuyidoogan nuuni maalaalettana danddayoos.—Era. 11:6.

14. Shoobe woraqataa immidi shoobbiyogee issi uri yaanaadan denttettana danddayiyogaa bessiya leemisuwa yoota.

¹⁴ Neeni issi urawu shoobbiyo woraqataa immada Hassayuwa Baalawu shoobbiyogee I yaanaadan denttettana danddayees. Issi michchiya Yihoowa Markka gidenna I azinay Hassayuwa Baalaa iira baanaagaa iyyo yootido wode maalaalettaasu. A maalaalettidoy aybissee? Baalaa baanaadan kase A darotoo shoobbikkonne I bi erenna gishshataassa. Yaatin, I haˈˈi baanawu kuuyanaadan oottidabay aybee? “Issi uri tawu shoobe woraqataa immiis” yaagiis; aara erettiya issi cimay A shoobbiis. He azinay he layttaaninne hegaappe simmin daro layttawu baalaa bonchchiis.

15. Hassayuwa Baalawu nuuni asaa shoobbiyo wode qoppana koshshiyabay aybee?

¹⁵ Nuuni shoobbiyogeeti, ubba nu shiiqota mule shiiqi erennaageeta gidikko, Hassayuwa Baalaa xeelliyagan nuna oychchana danddayiyogaa hassaya. Hegaa gishshawu, eti oychchana danddayiyo oyshata qoppidi hegaa zaaruwa giigettana danddayoos. (Qol. 4:6) Leemisuwawu, amaridaageeti hagaadan oychchana danddayoosona: ‘He baalan oosettiyabay aybee?’ ‘Hegee ay keena saatiyan wurii?’ ‘Taani ay maayana koshshii?’ ‘Shiiqanawu miishsha qanxxissii?’ ‘Muxuwatay shiiqii?’ Hassayuwa Baalawu issi uraa nuuni shoobbiyo wode hagaadan oychchana danddayoos, “Neeni oychchana koyiyobay deˈii?” yaatidi, I oychchikko zaarana danddayoos. Issi uri nu shiiquwan haniyabaa akeekanaadan maaddanawu, Yesuusa Hayquwaa Hassaya, qassi SHiiquwaa Addaraashan Oosettiyaabay Aybee? giya biidotakka goˈettana danddayoos. Qassi nuuni yootana  danddayiyo loˈˈo qofati Merinawu Ufayttada Deˈa! giyo maxaafan timirtte 28n deˈoosona.

16. Hassayuwa Baalaa yiidaageeti harabaa ay oychchana danddayiyonaa?

¹⁶ Shoobettidi yiida imattati Hassayuwa Baalaappe simmin hara oyshata oychchana danddayoosona. Ooninne oyttaa mibeennay qassi woyniya uyibeennay woykko amaridaageetu xallay hegaadan oottidoy aybissakko oychchana danddayoosona. Qassi Hassayuwa Baalaa nuuni aapputoo bonchchiyakkonne oychchana danddayoosona. Yihoowa Markkatu shiiqotu ubbay hegaa malakkonne eranawu koyana danddayoosona. Ha qofatuppe daroti Hassayuwa Baalaa haasayan qonccikkokka, shoobettidi yiidaageeti hegaabaa loytti eranawu koyana danddayoosona. “Yihoowa Markkati Godaa Kahuwaa Bonchchiyo Ogee Hara Haymaanootetuugaappe Dummatiyoy Aybissee?” giya jw.org saytiyan deˈiya huuphe yohoy eta oyshatuppe amaridaageeta zaaranawu maaddana danddayees. “Suure wozanaa koshshay deˈiyo asati” Hassayuwa Baalaappe goˈettanaadan maaddanawu nuuni he baalaappe kase, he baalaa wodiyaninne baalaappe simmin nuussi danddayettida ubbabaa oottanawu koyoos.—Oos. 13:48, NW.

AYYAANAABAN SHUGGIDAAGEETA MAADDA

17. Ayyaanaaban shuggidaageeta cimati waati maaddana danddayiyonaa? (Hizqqeela 34:12, 16)

¹⁷ Hassayuwa Baalaa wode cimati ayyaanaaban shuggidaageeta waati maaddana danddayiyonaa? Neeni etassi qoppiyogaa bessa. (Hizqqeela 34:12, 16 nabbaba.) Hassayuwa Baalaappe kase, neessi danddayettida keenan etappe darota oychcha. Neeni etassi qoppiyogaanne neessi danddayettida ubbaban eta maaddana koyiyogaa yoota. Hassayuwa Baalaa yaanaadan eta shoobba. Eti baalaa bonchchanawu yiikko eta ufayssan mokka. Hassayuwa Baalaappe simmin he alˈˈo ishanttanne michchontta baada oychchiyogaa woy etawu dawaliyogaa aggoppa; qassi eti Yihoowakko simmanaadan koshshiya ubbaban eta maadda.—1 PHe. 2:25.

18. Ayyaanaaban shuggidaageeta maaddanawu nuuni ubbay waatana danddayiyoo? (Roome 12:10)

 ¹⁸ Galchchan deˈiya ubbay Hassayuwa Baalaa yiida ayyaanaaban shuggidaageeta maaddana danddayoos. Waatidi? Siiquwa, kehatettaanne bonchchuwa etawu bessiyogan yaatana danddayoos. (Roome 12:10 nabbaba.) Ha alˈˈo dorssati zaarettidi shiiquwa yaanawu mammottana danddayiyogaa hassaya. Geella eti galchchan deˈiyageeti banttana ufayssan mokkennan agganeeshsha giidi yayyana danddayoosona. e Eta yeellayana danddayiya oyshata oychchoppa woy eta qohana danddayiyabaa haasayoppa. (1 Tas. 5:11) Ha ishanttinne michchontti nu mala Kiristtaane. Zaarettidi etaara goynniyogan nu ufayttoos!—Maz. 119:176; Oos. 20:35.

19. Yesuusa hayquwa hassayiyogee demissiyo goˈˈay aybee?

¹⁹ Yesuusi nuuni layttan layttan Hassayuwa Baalaa bonchchanaadan azazidoogee garamissiyaba gidenna. Nuuni Hassayuwa Baalaa bochchiyogee daro ogetun nunakka haratakka goˈˈees. (Isi. 48:17, 18) Nuuni Yihoowanne Yesuusa kaseegaappe aaruwan siiqoos. Eti nuussi oottidobaa keehi nashshiyogaa bessoos. Nuuni nu mala Kiristtaanetuura dabbotaa minttoos. Qassi haratikka wozoy ehiyo anjjota demmanawu waatanaakko eranaadan nu eta maaddana danddayoos. Simi yaakko, layttaa giddon keehi dumma gallassa gidida Hassayuwa Baalawu giigettanawu nuussi danddayettida ubbabaa oottiyageeta gidoos!