1. Kay ano nga an Memoryal an pinakaimportante nga adlaw han tuig? (Lucas 22:​19, 20)

 PARA ha katawohan ni Jehova, an Memoryal han kamatayon han Kristo an pinakaimportante nga adlaw han tuig. Ito la nga panhitabo an espisipiko nga ginsugo ni Jesus ha iya mga sumurunod nga buhaton. (Basaha an Lucas 22:​19, 20.) Eksayted kita para ha Memoryal tungod ha damu nga rason. Hisgotan ta an pipira hito.

2. Ano an pipira nga rason kon kay ano nga eksayted kita para ha Memoryal?

² An Memoryal nabulig ha aton nga mapamalandong an pagkaimportante han lukat ngan an mga bendisyon tungod hito. Napapahinumdoman kita parte han mga paagi nga maipapakita naton an aton apresasyon ha halad ni Jesus. (2 Cor. 5:​14, 15) Naghahatag liwat ito ha aton hin oportunidad nga “magdinasigay” ha aton kabugtoan. (Roma 1:12) Kada tuig, damu an naatender nga diri aktibo. An iba napagios pa ngani pagbalik kan Jehova tungod han mahigugmaon nga pag-abiabi ha ira. Ngan damu nga interesado nga tawo an napapagios pagpa-Bible study tungod han ira nakita ngan nabatian. Tungod hito, espesyal gud ha aton an Memoryal!

3. Paonan-o gin-uurosa han Memoryal an aton internasyonal nga pagminagburugto? (Kitaa liwat an piktyur.)

³ Hunahunaa liwat kon paonan-o gin-uurosa han Memoryal an aton internasyonal nga pagminagburugto. An mga Saksi ni Jehova ha bug-os nga kalibotan nagkakatirok samtang hinay-hinay nga natutunod an adlaw. Kita ngatanan nakakapamati hin pahayag nga nagpapabug-at han pagkaimportante han lukat. Ginkakanta naton an duha nga kanta han pagdayaw, ginpapasa an  mga emblema, ngan kinasingkasing nga nasiring “amen” ha upat nga pag-ampo. Ha sulod hin 24 ka oras, bubuhaton han ngatanan nga kongregasyon an pariho nga surubdan. Naiimadyin mo ba an kalipay ni Jehova ngan ni Jesus kon nakikita nira nga urosa kita nga nagpapasidungog ha ira hini nga paagi?

4. Ano an aton hihisgotan hini nga artikulo?

⁴ Hini nga artikulo, hihisgotan naton ini nga mga pakiana: Paonan-o naton maiaandam an aton kasingkasing para ha Memoryal? Paonan-o naton mabubuligan an iba basi makapahimulos? Ngan paonan-o naton mabubuligan adton mga diri aktibo? An mga baton hini nga mga pakiana mabulig ha aton nga magin andam para hini nga sagrado nga okasyon.

PAONAN-O NATON MAIAANDAM AN ATON KASINGKASING PARA HA MEMORYAL?

5. (a) Kay ano nga dapat naton pamalandungon an pagkaimportante han lukat? (Salmo 49:​7, 8) (b) Ano an imo nahibaroan ha video nga Kay Ano nga Namatay hi Jesus?

⁵ An usa han pinakaimportante nga paagi nga maiaandam naton an aton kasingkasing para ha Memoryal amo an pagpamalandong han pagkaimportante han halad lukat ni Jesu-Kristo. Kon kita la, diri gud naton matatalwas an aton kalugaringon tikang ha sala ngan kamatayon. (Basaha an Salmo 49:​7, 8; kitaa liwat an video nga Kay Ano nga Namatay hi Jesus?) a Salit naghikay hi Jehova nga ihatag ni Jesus an iya kinabuhi basi talwason kita, hi Jehova ngan hi Jesus naghimo hin daku nga sakripisyo. (Roma 6:23) Samtang mas namamalandong ka ha sakripisyo ni Jehova ngan ni Jesus para ha aton, mas aapresyaron mo an lukat. Hihisgotan naton an pipira la han mga butang nga iginsakripisyo ni Jehova ngan ni Jesus para ha aton. Pero siyahan, ano an iginpapasabot han lukat?

6. Ano an iginpapasabot han lukat?

⁶ An lukat usa nga kantidad nga iginbabayad basi maibalik an usa nga butang. An siyahan nga tawo nga hi Adan perpekto han ginlarang hiya. Han nakasala hiya, nawara niya an paglaom nga kinabuhi nga waray kataposan diri la para ha iya kondi pati liwat ha ngatanan niya nga anak. Basi maibalik an nawara ni Adan, iginhatag ni Jesus an iya kalugaringon nga perpekto nga kinabuhi sugad nga halad. Ha bug-os nga kinabuhi ni Jesus ha tuna “waray hiya nabuhat nga sala, waray liwat panlimbong nga nabilngan dida ha iya baba.” (1 Ped. 2:22) Han namatay hi Jesus, an iya perpekto nga kinabuhi katugbang gud ha kinabuhi nga nawara ni Adan.—1 Cor. 15:45; 1 Tim. 2:6.

7. Ano an pipira nga pagsari nga gin-atubang ni Jesus han nakanhi hiya ha tuna?

⁷ Nagpabilin hi Jesus nga bug-os nga masinugtanon ha iya langitnon nga Amay bisan pa han damu nga pagsari nga iya gin-atubang han nakanhi hiya ha tuna. Han bata pa hi Jesus, kinahanglan niya magpasakop ha awtoridad han iya diri perpekto nga tawhanon nga mga kag-anak bisan pa kon natawo hiya nga perpekto. (Luc. 2:51) Sugad nga tin-edyer, kinahanglan niya atohan an bisan ano nga presyur nga bangin mag-aghat ha iya nga diri sugton an iya mga kag-anak o diri magin matinumanon kan Jehova. Ngan sugad nga adulto, kinahanglan ni Jesus tumindog hin marig-on ha mga pagsulay ni Satanas nga Yawa, pati na han direkta nga mga pag-atake ha iya pagkamaunungon ha Dios. (Mat. 4:​1-11) Determinado gud hi Satanas nga makasala hi Jesus basi diri niya maibayad ito nga lukat.

8. Ano nga iba pa nga mga pagsari an gin-ilob ni Jesus?

⁸ Ha panahon han ministeryo ni Jesus ha tuna, gin-ilob niya an iba pa nga mga pagsari. Naeksperyensyahan niya an mga pagtimaraot ngan mga tarhog ha iya kinabuhi. (Luc. 4:​28, 29; 13:31) Kinahanglan niya ilubon an pagin  diri perpekto han iya mga sumurunod. (Mar. 9:​33, 34) Han ginbibista hiya, gin-torture hiya ngan gintamay. Ginpatay hiya ha masakit gud ngan makaaralo nga paagi. (Heb. 12:​1-3) Kinahanglan niya ilubon an ultimo nga bahin han pagsari ha iya nga hiya la, nga waray han proteksyon ni Jehova. b—Mat. 27:46.

9. Ano an aton inaabat mahitungod han halad ni Jesus? (1 Pedro 1:8)

⁹ Klaro nga daku gud an ginsakripisyo ni Jesus basi maihatag an lukat. Diri ba kita naabat hin hilarom nga gugma kon aton ginpapamalandong an iya kinaburut-on nga pagsakripisyo para ha aton?—Basaha an 1 Pedro 1:8.

10. Ano an iginsakripisyo ni Jehova basi maibayad an lukat?

¹⁰ Ano nga kinaburut-on nga pagsakripisyo an ginhimo ni Jehova basi maibayad ni Jesus an lukat? Hi Jehova ngan hi Jesus an may pinakaduok nga relasyon sugad nga mag-amay. (Prob. 8:30) Salit hunahunaa la kon ano kakuri kan Jehova nga makita hi Jesus nga nag-aantos ha damu nga kakurian han nakanhi hiya ha tuna. Sigurado nga nasakit gud hi Jehova han nakita niya an iya Anak nga ginmaltrato, ginsalikway, ngan ginpaantos.

11. Paghatag hin ehemplo nga nagpapakita kon ano an sigurado nga gin-abat ni Jehova han ginpatay hi Jesus.

¹¹ An bisan hin-o nga kag-anak nga namatyan hin anak, maaram gud kon ano kasakit ito. May daku nga pagtoo kita ha pagkabanhaw, pero diri ito nakakawara han kasakit nga aton inaabat kon namamatayan kita hin hinigugma. Ini nga ehemplo nabulig ha aton nga masabtan kon ano an sigurado nga gin-abat ni Jehova han nakita niya an iya hinigugma nga Anak nga nag-antos ngan namatay hito nga adlaw han katsaringsing han 33 C.E. c—Mat. 3:17.

12. Ano an puydi naton buhaton ha mga semana antes han Memoryal?

¹² Yana tubtob ha Memoryal, paningkamuti nga pag-adman pa an mahitungod han lukat ha imo personal nga pag-aram o Pagsingba han Pamilya. Gamita an Research Guide for Jehovah’s Witnesses (kon may-ada ito ha iyo linggwahe) o an iba nga mga publikasyon nga nagsasaysay hin mas detalyado mahitungod han lukat. d Siguroha liwat nga masundan an nakaeskedyol nga pagbasa han Biblia ha Memoryal nga makikita ha An Aton Kristiano nga Pagkinabuhi Ngan Ministeryo—Workbook Para ha Katirok. Ngan ha  adlaw han Memoryal, ayaw kalimti an pagkita han espesyal nga programa han Morning Worship. Kon igin-aandam naton an aton kasingkasing para ha Memoryal, mabubuligan liwat naton an iba nga magpahimulos tikang hito.—Ezra 7:10.

BULIGI AN IBA NGA MAGPAHIMULOS

13. Ano an siyahan nga bubuhaton basi buligan an iba nga magpahimulos ha Memoryal?

¹³ Paonan-o kita makakabulig ha iba basi magpahimulos ha Memoryal? Syempre, an aton siyahan nga bubuhaton amo an pag-imbitar ha ira. Labot pa ha pagkontak hadton mga nasangyawan naton, puydi kita maghimo hin lista han mga tawo nga aton iimbitaron. Upod na hito an aton mga paryente, katrabaho, kaeskwela, ngan iba pa. Bisan kon waray kita igo nga nakaimprinta nga mga kopya han imbitasyon, mahimo naton i-share an link ha elektroniko nga pormat. Bangin man la damu an tumambong!—Ecles. 11:6.

14. Isaysay an kaya mahimo han personal nga imbitasyon.

¹⁴ Ayaw gud minosa an kaya mahimo han personal nga imbitasyon. Usa nga sister nga may bana nga diri saksi an nahipausa han ginsidngan hiya han iya bana nga maupod hiya ha Memoryal. Kay ano nga nahipausa hiya? Kay ha naglabay, makadamu na nga gin-iimbitar niya hiya pero nadiri gud hiya pag-atender. Kay ano nga naruruyag naman hiya yana? Siring niya, “nakakarawat ako hin imbitasyon,” ngan iginsaysay niya nga usa nga tigurang nga kakilala niya an nag-imbitar ha iya. Inatender an bana hito nga tuig ngan ha damu pa nga katuigan.

15. Ano an dapat naton hinumdoman kon nag-iimbitar kita para ha Memoryal?

¹⁵ Hinumdumi nga adton mga gin-imbitar naton bangin may mga pakiana—labi na kon waray pa gud hira makaatender ha aton mga katirok. Salit puydi naton hunahunaon an posible nira ipakiana ngan mag-andam hin mga baton. (Col. 4:6) Pananglitan, an iba bangin maghunahuna: ‘Ano an ginhihimo hito nga okasyon?’ ‘Maiha ba ito?’ ‘Ano an dapat igsul-ot?’ ‘May bayad ba an pag-atender?’ ‘May pangulekta ba didto hin kwarta?’ Kon nag-iimbitar kita ha usa ngadto ha Memoryal, puydi kita magpakiana, “May-ada ka  ba mga pakiana?” katapos, batona an bisan ano nga bangin ipakiana niya. Puydi liwat naton gamiton an mga video nga Hinumdumi an Kamatayon ni Jesus ngan Ano an Ginbubuhat ha Kingdom Hall? basi mabuligan an usa nga mahibaroan kon ano an ginhihimo ha aton mga katirok. Ngan an leksyon 28 han Mabuhi hin Malipayon ha Waray Kataposan! nga libro naghahatag ha aton hin damu nga mag-opay nga punto nga maisusumat naton.

16. Ano an bangin igpakiana pa hadton mga inatender ha Memoryal?

¹⁶ Katapos nira umatender ha Memoryal, bangin may mga pakiana pa an bag-o nga mga interesado. Bangin hira magpakiana kon kay ano gutiay la (kon may-ada man) an kinaon ngan ininom han mga emblema. Bangin magpakiana liwat hira kon ano kaagsob naton ginsasaurog an Memoryal. Ngan bangin karuyag nira mahibaroan kon an ngatanan ba nga katirok han mga Saksi ni Jehova ginhihimo ha pariho nga paagi. Bisan kon damu hini nga mga punto an ginhisgotan ha pahayag han Memoryal, an bag-o nga mga nag-atender bangin manginahanglan hin mas detalyado nga pagsaysay. An artikulo ha jw.org nga “Kay Ano nga an Pagsaurog han mga Saksi ni Jehova ha Panihapon han Ginoo Iba ha Ginhihimo han Iba nga mga Relihiyon?” makakabulig ha aton ha pagbaton han iba nira nga mga pakiana. Karuyag naton buhaton an bisan ano nga aton mahihimo—antes, durante, ngan katapos han Memoryal—basi buligan adton “may husto nga disposisyon” nga magpahimulos hini nga pagsaurog.—Buh. 13:48.

BULIGI AN MGA DIRI AKTIBO

17. Paonan-o an mga tigurang makakabulig ha mga diri aktibo? (Ezekiel 34:​12, 16)

¹⁷ Ha panahon han Memoryal, paonan-o makakabulig an mga tigurang ha mga diri aktibo? Ipakita nga hinigugma niyo hira. (Basaha an Ezekiel 34:​12, 16.) Antes han Memoryal, siguroha nga makontak an damu ha ira tubtob nga posible. Pasariga hira han iyo gugma ngan han iyo hingyap nga buligan hira ha bisan ano nga paagi nga iyo mahihimo. Imbitara hira nga umatender ha Memoryal. Kon umatender hira, malipayon nga abiabiha hira. Katapos han Memoryal, pirme bisitaha o tawagi ini nga hinigugma  nga kabugtoan, ngan ihatag ha ira an bisan ano nga espirituwal nga bulig nga kinahanglan nira basi makabalik kan Jehova.—1 Ped. 2:25.

18. Paonan-o kita ngatanan makakabulig ha mga diri aktibo? (Roma 12:10)

¹⁸ An ngatanan ha kongregasyon makakabulig ha mga diri aktibo nga naatender ha Memoryal. Paonan-o? Pinaagi ha pagtratar ha ira nga may gugma, pagkabuotan, ngan respeto. (Basaha an Roma 12:10.) Hinumdumi nga ini nga hinigugma nga mga karnero bangin mag-alang pagbalik ha pagtambong ha katirok. Bangin nahahadlok hira nga diri hira karawaton hin maopay. e Salit likyi an pagpakiana nga makakapaawod ha ira o pagyakan hin makakasakit. (1 Tes. 5:11) Aton mga igkasi-tumuroo ini nga kabugtoan. Nalilipay kita nga makaupod naton hira utro ha pagsingba!—Sal. 119:176; Buh. 20:35.

19. Ano an mga kapulsanan ha paghinumdom han kamatayon ni Jesus?

¹⁹ Diri ba makalilipay nga ginsugo kita ni Jesus nga igsaurog an Memoryal han iya kamatayon kada tuig? Kon naatender kita han Memoryal, nagpapahimulos kita ngan an iba ha damu nga paagi. (Isa. 48:​17, 18) Naghihilarom an aton gugma kan Jehova ngan kan Jesus. Iginpapakita naton an aton daku nga apresasyon ha ira ginbuhat para ha aton. Ginpaparig-on ta an aton relasyon ha aton mga igkasi-tumuroo. Ngan mahimo naton buligan an iba nga mahibaro nga hira liwat mahimo magpahimulos ha mga bendisyon nga nagin posible tungod han lukat. Salit buhaton naton an tanan nga aton mahihimo, basi magin andam para ha Memoryal hini nga tuig—an pinakaimportante nga adlaw han tuig!