1. Why Memorial be the day wey dey important pass for the year? (Luke 22:​19, 20)

 SERVANTS of Jehovah love Memorial because na the day wey dey important pass for the year. Na the only celebration wey Jesus open im mouth tell us say make we de do. (Read Luke 22:​19, 20.) We get plenty reason wey de make-am hungry us to de attend Memorial. Make we see some of them.

2. Wetin be some reason why Memorial dey special to us?

² Memorial de help us think about why Jesus sacrifice dey important and all the blessing wey we go enjoy because of this sacrifice. E de help us remember different-different way wey we fit show say we value Jesus sacrifice. (2 Cor. 5:​14, 15) E de give us the chance to “encourage each other.” (Rom. 1:12) Every year, many brothers and sisters wey be inactive, de attend Memorial. Because of the way brothers and sisters welcome them, many of them de decide to come back to Jehovah. And many people wey come for the first time, de happy for wetin them see and hear, so e de move them to start to study Bible. Na all this one make Memorial dey special to us!

3. How Memorial de make us worship Jehovah together as one for the whole world? (Still check the picture.)

³ Another reason why e de hungry us to attend Memorial, na because e de make us worship Jehovah together as one with our brothers and sisters for the whole world. As sun de go down for different-different part of the world, Jehovah  people de gather for their area to do Memorial. All of us de listen to Bible talk wey explain why Jesus sacrifice dey important. We go sing two songs to praise Jehovah, them go pass the bread and wine round and we go pray four times. All congregation for the whole world go do like that when them de do Memorial. Just think about how Jehovah and Jesus go happy when them see all of us, no matter where we dey, de honor them for this special way.

4. Which questions we go answer for this article?

⁴ For this article, we go answer this questions: How we fit prepare our heart and mind to fit gain from Memorial? How we fit help other people to fit gain from Memorial? And how we fit help our brothers and sisters wey be inactive to fit gain from Memorial? The answer to this questions go help us fit ready for Memorial this year.

HOW WE FIT PREPARE OUR HEART AND MIND TO FIT GAIN FROM MEMORIAL?

5. (a) Why e good make we think deep about why Jesus sacrifice dey important? (Psalm 49:​7, 8) (b) Wetin you learn from the video, Why Jesus Die?

⁵ One of the best way wey we fit prepare for Memorial na to think deep about why Jesus sacrifice dey important. If to say Jesus no die for us, we for no fit do anything to free ourself from sin and death. (Read Psalm 49:​7, 8; still watch the video Why Jesus Die?) a So, Jehovah arrange make Jesus give im life to save us. This one na really big sacrifice for Jehovah and Jesus. (Rom. 6:23) The more we de think deep about wetin Jehovah and Jesus do for us, the more we go value the sacrifice. We go talk about some things wey really hard, wey Jehovah and Jesus ready do, to save us from sin and death. But make we first talk about wetin this sacrifice be.

6. Wetin Jesus sacrifice be?

⁶ Jesus sacrifice na wetin Jehovah pay, to buy back the life wey Adam lost. Adam dey perfect when Jehovah make-am. So when e sin, e troway the chance wey e and im children get to live forever. To buy back the life wey Adam lost, Jesus sacrifice im own perfect life. For all the years wey Jesus dey this earth, “e no sin at all, and them no hear any lie-lie for im mouth.” (1 Pet. 2:22) When Jesus die, e dey perfect just like Adam, before Adam sin. So, as Jesus sacrifice im life, e buy back wetin Adam lost.—1 Cor. 15:45; 1 Tim. 2:6.

7. Wetin be some temptation wey Jesus face when e dey this earth?

⁷ Jesus obey Jehovah reach ground even with all the temptation wey e face, when e dey this earth. Even though say Jesus dey perfect when e be small pikin, e obey im papa and mama wey no dey perfect. (Luke 2:51) When e still dey young, e no do wetin im mate de do wey go make-am no obey im papa and mama, and wey no go make Jehovah happy. When e don become mature man, e no do wetin Satan want when Satan tempt-am. (Matt. 4:​1-11) Satan do everything wey e fit do to make sure say Jesus no fit sacrifice im life.

8. Which other temptation Jesus face?

⁸ For the three and half years wey Jesus take preach, e face plenty other temptation. Im enemy them suffer-am and try to kill-am. (Luke 4:​28, 29; 13:31) E endure the mistakes wey im disciples make. (Mark 9:​33, 34) When im enemy them carry-am go court, them beat-am well-well and laugh-am. Then, them kill-am like thief and e suffer well-well before e die. (Heb. 12:​1-3) Jehovah remove im  protection from Jesus so that e go endure the last part of the problem wey e face, by imself. b—Matt. 27:46.

9. When you think deep about Jesus sacrifice, wetin e go move you to do?

⁹ True-true, Jesus suffer well-well to fit sacrifice im life. When you think deep about all the things wey Jesus face to fit save us, e no de make you love-am more-more?—Read 1 Peter 1:8.

10. How all the things wey Jesus face as e come die for us, affect Jehovah?

¹⁰ What about Jehovah? How all the things wey Jesus face as e come die for us, affect Jehovah? The love wey Jehovah and Jesus get for each other, strong pass the love between any papa and im son. (Prov. 8:30) So, just think how e go don affect Jehovah when e see as Jesus de endure the problems wey e face when e dey this earth. E go don pain Jehovah well-well to see the bad way wey them treat Jesus, how people reject-am and the temptations wey e face.

11. Use example explain how Jehovah go don feel when e see Jesus de suffer.

¹¹ Any papa or mama wey im pikin wey e love well-well don die, understand the kind pain wey person de feel when this kind thing happen to-am. We get hope say God go bring our people wey don die back to life, but that one no mean say e no de pain us when person wey we love die. This example fit help us understand how Jehovah go don feel when e de see as im special Son de suffer and die for the year 33 C.E. c—Matt. 3:17.

12. Wetin we fit do some weeks before Memorial, go reach the Memorial day?

¹² From now go reach Memorial day, try study more about Jesus sacrifice for your personal study or Family Worship. Use the Research Guide for Jehovah’s Witnesses (if e dey for your language) or any of our book them wey talk more about Jesus sacrifice. d Another thing wey you fit do na to follow the Memorial Bible reading program wey dey Our Christian Life and Preaching—Meeting Workbook. And make you no forget to watch the special Morning Worship program, for Memorial day. All this one go help us prepare our heart and mind to gain from the Memorial.  And e go dey easy for us to fit help other people to gain from Memorial.—Ezra 7:10.

HELP OTHER PEOPLE GAIN FROM MEMORIAL

13. Wetin be the first thing to do to help other people gain from Memorial?

¹³ How we fit help other people to gain from Memorial? The first thing na to invite them. No be only people wey we meet for preaching we go invite, we fit still write name of other people wey we go like invite. Them fit be our family members, workmate, schoolmate, and other people. Even if you no get enough invitation wey you go give people, you fit use your phone send them the link for the invitation. The number of people wey fit attend, fit surprise you.—Eccl. 11:6.

14. Give example wey show why e good to give invitation or send the link to person wey you know.

¹⁴ When you give Memorial invitation wey them print to person wey you know or send the link to-am, e fit move-am to attend the Memorial. One day, one sister surprise when im husband wey no be Jehovah Witness tell-am say e go follow-am go Memorial. Why the sister surprise? Because e don tell-am plenty times before say make e follow-am go Memorial, but e no gree. Wetin make the man change im mind this time? The man talk say: “Them give me invitation.” Na one elder wey know the husband well-well, give-am invitation wey them print. The sister husband attend that Memorial and still attend other ones for plenty years.

15. Wetin we need to remember when we de invite people for Memorial?

¹⁵ Remember say the people wey we invite fit get question, especially if them never attend our meeting before. We fit try think about some question wey them fit ask, and prepare how we go take answer them. (Col. 4:6) For example, them fit ask say: ‘How the Memorial go be?’ ‘How many hours e go be?’ ‘Special way dey wey I suppose dress?’ ‘Them de pay money to enter?’ ‘Them de collect offering for there?’ So, when you de invite person to Memorial, you fit ask-am say, “You get  any question?” And then, answer the question wey e fit ask. You fit use the video, Remember Jesus as E Die for Everybody and Wetin De Happen for Kingdom Hall? to help the person understand how our meeting de be. You fit still see other point wey fit help you explain well to-am, for lesson 28 of Enjoy Life Now and Forever! book.

16. Which other questions people wey attend Memorial fit get?

¹⁶ After the Memorial, people wey attend for the first time fit still get questions. Them fit ask say why nobody chop the bread and drink the wine or why them no plenty wey chop the bread and drink the wine. Them fit ask how many times we de do Memorial every year. Them fit still want know if na so we de do all our meeting. Even though say the brother wey give the Memorial talk, don talk about all this things, people wey attend for their first time fit want make we explain-am again. The article for jw.org wey the title na, “Why the Way Jehovah Witness People De Do Memorial Dey Different From the Way Other Religions De Do-am?” go fit help you answer some of their questions. We want do everything wey we fit do, before Memorial, when we dey Memorial, and after Memorial, to fit help “all the people wey show say them want get life wey no go end,” gain from this special occasion.—Acts 13:48.

HELP INACTIVE BROTHERS AND SISTERS

17. How elders fit help brothers and sisters wey be inactive?

¹⁷ As we de prepare for Memorial, how elders fit help people wey never attend meeting and preach for long time? One way na to show them love. (Read Ezekiel 34:​12, 16.) Before Memorial day, try call them plenty times. Tell them say you love them and say you really like to help any way wey you fit. Invite them for Memorial. And if them attend, welcome them well. Still continue to call this brothers and sisters and help them see how them fit make their love for Jehovah strong again and come back to-am.—1 Pet. 2:25.

18. How all of us fit help brothers and sisters wey be inactive?

 ¹⁸ All of us for congregation fit help brothers and sisters wey be inactive, when them attend Memorial. How? We fit do this one when we show them love, treat them well, and respect them. (Read Romans 12:10.) Remember say e no easy for this brothers and sisters to attend Memorial. Them fit don fear because of wetin brothers and sisters for congregation fit tell them or talk about them. e So abeg, no ask them question wey fit make them shame or vex. (1 Thess. 5:11) No forget say them still be our brothers and sisters. And we happy say them join us again to worship Jehovah!—Ps. 119:176; Acts 20:35.

19. Wetin we de gain when we obey Jesus command to remember im death?

¹⁹ We really happy say Jesus command us say make we de remember im death every year, and we understand why e dey important. When we obey im command, we and other people de gain for many ways. (Isa. 48:​17, 18) Our love for Jehovah and Jesus go continue to grow. E de show say we really value wetin them do for us. E de help us near our brothers and sisters more-more. And e go help us to fit teach other people how them fit enjoy the blessing wey we go get as Jesus die for us. Make we do everything wey we fit do, to ready for the day wey dey important pass this year, wey be the Memorial day!