1. Kutheni usuku lweSikhumbuzo lulolona lubalulekileyo? (Luka 22:19, 20)

 USUKU lweSikhumbuzo sokufa kukaKristu lolona lubalulekileyo kubantu bakaYehova. Lulo lodwa uYesu awayalela abalandeli bakhe ukuba balukhumbule. (Funda uLuka 22:19, 20.) Zininzi izinto ezisenza sifune ukubakho eSikhumbuzweni. Makhe sithethe ngezinye zazo.

2. Ziintoni ezisenza sifune ukubakho eSikhumbuzweni?

² ISikhumbuzo sisinceda sicinge ngendlela elibaluleke ngayo idini likaYesu, nangezinto ezintle eziza kwenzeka ngenxa yalo. Sisikhumbuza ngeendlela esinokubonisa ngazo ukuba siyakubulela ukuzincama kukaYesu. (2 Kor. 5:14, 15) Sisinika nethuba ‘lokukhuthazana’ nabazalwana noodade. (Roma 1:12) Qho ngonyaka, abazalwana noodade abaninzi abapholileyo bayaya eSikhumbuzweni. Abanye baye bafune nokubuyela kuYehova ngenxa yokuba beye bamkelwa ngobubele. Abantu abaninzi abanomdla baye bazithande izinto abazivayo nabazibonayo eSikhumbuzweni, kangangokuba bade bafune ukufundelwa iBhayibhile. Zezo zinto ke ezisenza sibaluleke kangaka iSikhumbuzo kuthi!

3. ISikhumbuzo sisimanyanisa njani nabazalwana noodade emhlabeni wonke? (Jonga nomfanekiso.)

³ Cinga nangendlela iSikhumbuzo esisimanyanisa ngayo nabazalwana noodade emhlabeni wonke. Emhlabeni wonke amaNgqina KaYehova aye adibane xa kutshona ilanga. Sonke siye simamele intetho ebonisa indlela elibaluleke ngayo idini likaYesu. Siye sicule iingoma ezimbini zokudumisa uYehova,  sidlulise isonka newayini size sithi “amen” kwimithandazo emine eye yenziwe. Kwiiyure ezimalunga neziyi-24, onke amabandla aye enze into efanayo. Khawube nombono wendlela avuya ngayo uYehova noYesu xa besibona sibathobela ngale ndlela?

4. Siza kuthetha ngantoni kweli nqaku?

⁴ Kweli nqaku, siza kuphendula le mibuzo: Sinokwenza ntoni ukuze iintliziyo zethu zisilungele iSikhumbuzo? Sinokubanceda njani abanye bazuze kuso? Sinokubanceda njani abazalwana noodade abapholileyo? Iimpendulo zale mibuzo ziza kusinceda silulungele olu suku lubaluleke kakhulu.

SINOKUZILUNGISA NJANI IINTLIZIYO ZETHU?

5. (a) Kutheni sifanele sicinge ngendlela elibaluleke ngayo idini likaYesu? (INdumiso 49:7, 8) (b) Ufunde ntoni kwividiyo ethi Kwakutheni Ukuze UYesu Afe?

⁵ Enye yezona ndlela zibalulekileyo zokulungisa iintliziyo zethu kukucinga ngendlela elibaluleke ngayo idini likaYesu. Besingasoze sikwazi ukuzikhulula esonweni nasekufeni. (Funda iNdumiso 49:7, 8; bukela ividiyo ethi Kwakutheni Ukuze UYesu Afe?) a Nangona kwakunzima nyhani kuye nakuNyana wakhe amthandayo, uYehova walungiselela ukuba uYesu ancame ubomi bakhe ngenxa yethu. (Roma 6:23) Xa sicingisisa ngezinto awazincamayo uYehova noYesu ngenxa yethu, siye silixabise kakhulu idini likaKristu. Siza kuthetha ngezinto ezimbalwa ezazinzima, uYehova noYesu ababekulungele ukusenzela zona. Kodwa masiqale ngalo mbuzo: Yintoni eyayifuneka ukuze sihlawulelwe?

6. Yintoni eyayifuneka ukuze sihlawulelwe?

⁶ Ukuhlawula kukukhupha ixabiso lokuthenga into ebikade iyeyakho. Umntu wokuqala, uAdam, wadalwa engenasono. Wathi akungathobeli, yena nabo bonke abantwana bakhe balahlekelwa lithemba lokuphila ngonaphakade. Ukuze abantu baphinde babe nalo elo themba, uYesu owayengenasono, wancama ubomi bakhe ukuze asihlawulele. Kubo bonke ubomi bakhe basemhlabeni “akazange one, engazange aqhathe mntu.” (1 Pet. 2:22) Wafa engenasono, laze ixabiso lobomi bakhe lalingana twatse nelobomi obalahlwa nguAdam.​—1 Kor. 15:45; 1 Tim. 2:6.

7. Xa wayesemhlabeni, zeziphi iingxaki ekwafuneka amelane nazo uYesu?

⁷ UYesu wamthobela kuyo yonke into uTata wakhe osezulwini nangona kwakukho izinto ezazisenza kube nzima ukumthobela. Xa wayengumntwana, kwafuneka athobele abazali bakhe ababenesono, nangona yena wayengenaso. (Luka 2:51) Akuba ngumfana, kwafuneka amelane nabantu ekusenokwenzeka ukuba babefuna angathobeli abazali bakhe okanye angathembeki kuYehova. Akuba mdala, kwafuneka ame eqinile xa uSathana wayemlinga, naxa wayemxelela ukuba makayeke ukuthembeka kuYehova. (Mat. 4:1-11) USathana wayezimisele ukwenza uYesu one, ukuze angakwazi ukusihlawulela ngobomi bakhe.

8. Zeziphi ezinye iingxaki uYesu awazinyamezelayo?

⁸ Xa wayesenza umsebenzi awayewuthunywe emhlabeni, uYesu wanyamezela nezinye iingxaki. Iintshaba zakhe zamphatha kakubi, zifuna nokumbulala. (Luka 4:28, 29; 13:31) Kwakufuneka anyamezele neempazamo zabalandeli bakhe. (Marko 9:33, 34) Xa kwakuxoxwa ityala lakhe, wangcungcuthekiswa kwaza kwahlekiswa ngaye. Emva koko, wabulawa kabuhlungu kakhulu nangendlela elihlazo. (Heb. 12:1-3) Le nto kwafuneka ayinyamezele  ngokwakhe, engancediswa nguYehova. b​—Mat. 27:46.

9. Ukuzinikela kukaYesu kusenza sizive njani? (1 Petros 1:8)

⁹ Kucacile ukuba zininzi izinto ekwafuneka azinyamezele uYesu ukuze asihlawulele. Xa sicinga ngendlela awazincama ngayo ngenxa yethu, ngaba loo nto ayisenzi simthande kakhulu?​—Funda u-1 Petros 1:8.

10. Wancama ntoni uYehova ukuze uYesu abe lidini?

¹⁰ Yena uYehova, wancama ntoni ukuze uYesu akwazi ukuba lidini? UYehova noYesu bavana ngaphezu kwakhe nowuphi na utata nonyana wakhe. (IMize. 8:30) Khawucinge nje into yokuba inoba kwakunjani kuYehova xa wayebukele uYesu enyamezele iingxaki ezininzi emhlabeni. Ngokuqinisekileyo wayebuhlungu nyhani uYehova xa wayebona uNyana wakhe etsala nzima, ephethwe kakubi futhi engafunwa.

11. Yenza umzekelo obonisa indlela uYehova amele ukuba waziva ngayo xa wayebona uYesu ebulawa.

¹¹ Umzali okhe waswelekelwa ngumntwana uyazi kakuhle intlungu ebangelwa yiloo nto. Sikholelwa nyhani ukuba kuza kubakho uvuko, kodwa loo nto ayisenzi singabi buhlungu xa siswelekelwa ngumntu esimthandayo. Lo mzekelo, usinceda siyiqonde indlela uYehova amele ukuba waziva ngayo xa wayebukele uNyana wakhe amthandayo esifa kabuhlungu, ngentwasahlobo ka-33 C.E. c​—Mat. 3:17.

12. Yintoni esinokuyenza xa lungekafiki usuku lweSikhumbuzo?

¹² Ukuqala ngoku ukuya kutsho kusuku lweSikhumbuzo, xa ufundisisa okanye nisenza unqulo lwentsapho, kutheni ningaphandi ngedini likaYesu? Sebenzisa iSikhokelo Sokuphanda SamaNgqina KaYehova okanye ezinye iimpapasho, ukuze ufunde nezinye izinto ngedini likaYesu. d Qiniseka nokuba uhambisana nocwangciso lofundo lweBhayibhile lweSikhumbuzo olukwiNcwadi Yentlanganiso Yobomi BamaKristu Nomsebenzi Wokushumayela. Kanti ngosuku lweSikhumbuzo, ungalibali ukubukela ividiyo yeTekisi Yosuku YeSikhumbuzo. Xa sizilungisa iintliziyo zethu, siza kutsho sikwazi ukunceda nabanye bazuze kuso.​—Ezra 7:10.

NCEDA NABANYE BAZUZE KUSO

13. Yeyiphi into yokuqala esinokuyenza ukuze sincede abanye bazuze kwiSikhumbuzo?

¹³ Sinokubanceda njani abanye bazuze eSikhumbuzweni? Into yokuqala esinokuyenza  kukubamema. Sinokumema abantu esidibana nabo xa sishumayela, size sibhale namagama abanye abantu esifuna ukubamema. Basenokuba ngabantu esisebenza nabo, esifunda nabo esikolweni nabanye. Nokuba azanelanga izimemo eziprintiweyo esinazo, sinokubathumelela ilinki. Kwazi bani? Kungenzeka babe baninzi abaza kuya.​—INtshu. 11:6.

14. Yenza umzekelo wendlela ekubaluleke ngayo ukunika umntu isimemo.

¹⁴ Ungaze uyidele indlela okunamandla ngayo ukunika umntu isimemo. Ngenye imini, udade owayenomyeni ongeloNgqina wothuka xa umyeni wakhe wayemxelela ukuba ufuna ukuya naye eSikhumbuzweni. Wayesothuswa yintoni? Kaloku wayemcele kaninzi ukuba aye eSikhumbuzweni, kodwa engade aye. Yintoni eyayitshintshile ngoku? Umyeni wakhe wathi: “Ndinikwe isimemo.” Wayesinikwe ngomnye umdala awayeqhelene naye. Ukususela ngoko, umyeni walo dade waya kaninzi eSikhumbuzweni.

15. Yintoni esingafuni kuyilibala xa simemela abantu eSikhumbuzweni?

¹⁵ Ungalibali nokuba abanye abantu esibamemayo basenokuba nemibuzo, ngokukodwa abo bangazange bakhe baya kwiintlanganiso. Ngoko sinokucinga ngemibuzo abasenokuyibuza size silungiselele indlela esiza kubaphendula ngayo. (Kol. 4:6) Ngokomzekelo, abanye basenokubuza: ‘Kuza kwenziwa ntoni eSikhumbuzweni?’ ‘Siza kuthatha ixesha elingakanani?’ ‘Kunxitywa njani?’ ‘Kungenwa ngemali?’ ‘Iza kuqokelelwa inkongozelo?’ Xa simemela umntu eSikhumbuzweni, sinokumbuza, “Ikhona into ofuna ukuyibuza?” Ukuba ikhona into ayibuzayo, simphendule. Ukuze sincede loo mntu ayiqonde into eyenziwayo kwiintlanganiso, sinokusebenzisa ividiyo ethi Khumbula Ukufa KukaYesu nethi Yintoni Eyenzekayo EHolweni YoBukumkani? Nesifundo 28 sencwadi ethi Phila Ubomi Obumnandi Ngonaphakade! sinezinto ezininzi ezibalulekileyo esinokuncokola naye ngazo.

16. Yeyiphi eminye imibuzo abasenokuba nayo abantu abaye eSikhumbuzweni?

 ¹⁶ Abantu abanomdla basenokuba nayo neminye imibuzo emva kweSikhumbuzo. Basenokubuza ukuba kutheni bembalwa kangaka okanye bengekho abantu abaye batya isonka, basela newayini. Basenokufuna ukwazi nokuba sisenza kangaphi iSikhumbuzo ngonyaka. Enye into abasenokufuna ukuyazi kukuba zonke iintlanganiso zamaNgqina KaYehova ziqhutywa ngendlela efanayo na. Nangona kuthethwa ngezinye zezi zinto kwintetho yeSikhumbuzo, abantu abaqalayo ukuya basenokufuna ukuzicaciselwa kakuhle. Into enokusinceda siphendule eminye imibuzo abanayo linqaku eliku-jw.org/xh elithi, “Kutheni AmaNgqina KaYehova Esenza Isidlo SeNkosi Sangokuhlwa Ngokwahlukileyo Kwezinye Iinkonzo?” Sifuna ukwenza yonke into esinokukwazi ukuyenza ngaphambi kweSikhumbuzo, xa siqhubeka nasemva kwaso, ukuze sincede abantu ‘abazimiseleyo’ bazuze kuso.​—IZe. 13:48.

NCEDA ABAPHOLILEYO

17. Abadala banokubanceda njani abantu abapholileyo? (Hezekile 34:12, 16)

¹⁷ Ngexesha leSikhumbuzo, abadala banokubanceda njani abantu abapholileyo? Baboniseni ukuba niyabathanda futhi nibakhathalele. (Funda uHezekile 34:12, 16.) Ngaphambi kweSikhumbuzo, qinisekani ukuba nithetha nabaninzi kangangoko kunokwenzeka. Benzeni baqiniseke ukuba nibakhathalele futhi nikufuna nyhani ukubanceda. Bamemeleni kwiSikhumbuzo. Ukuba bayile, yibani nobubele xa nibamkela. Emva kweSikhumbuzo, ningayeki ukuya kubabona okanye ukubafowunela aba bazalwana noodade, nize nenze nantoni na enokubanceda babuyele kuYehova.​—1 Pet. 2:25.

18. Xa sisonke, sinokubanceda njani abapholileyo? (Roma 12:10)

¹⁸ Bonke abazalwana noodade banokubanceda abantu abapholileyo abaye eSikhumbuzweni. Njani? Ngokuba nothando, ububele nokubahlonipha. (Funda  amaRoma 12:10.) Khumbula kaloku, kusenokwenzeka ukuba bekunzima ukuba baye eSikhumbuzweni. Mhlawumbi bebesokiya izinto ezinokuthethwa ngabazalwana noodade kubo okanye ngabo. e Ngoko kulumkele ukubabizela amehlo ngokubabuza imibuzo esenokubenza babe neentloni okanye ngokuthetha izinto ezisenokubakhathaza. (1 Tes. 5:11) Kaloku aba ngabazalwana noodadewethu. Kusivuyisa nyhani ukuphinda sikhonze nabo!​—INdu. 119:176; IZe. 20:35.

19. Kusinceda ngantoni ukukhumbula ukufa kukaYesu?

¹⁹ Ngoku siyasiqonda isizathu sokuba uYesu alungiselele ukuba sikhumbule ukufa kwakhe qho ngonyaka. Ukuya eSikhumbuzweni kunceda thina nabanye ngeendlela ezininzi. (Isa. 48:17, 18) Siya simthanda kakhulu uYehova noYesu. Sibonisa indlela esiyibulela ngayo into abasenzele yona. Siya sibathanda kakhulu abazalwana noodade. Sinokunceda nabanye bazi ukuba banokwenza ntoni ukuze bazivuyele iintsikelelo eziza kubakho ngenxa yedini likaYesu. Ngoko masenze yonke into esinokukwazi ukuyenza ukuze sisilungele iSikhumbuzo, esilolona suku lubalulekileyo lonyaka.