1. Nan̈ino Fahatsiarovan̈a io andra faran’ny maventy an̈atin’ny taon̈o? (Lioka 22:19, 20)

 AMY vahoakan’i Jehovah, Fahatsiarovan̈a ny nifatesan’i Kristy io andra farany maventy an̈atin’ny taon̈o. Io fo fotoan̈a nirahin’i Jesosy hankalazain’ny pan̈ara-dia izy. (Vakia Lioka 22:19, 20.) Maro antony mahavy atsika man̈iry mare han̈aton̈o Fahatsiarovan̈a io. Alô atsika handiniky sasany.

2. Ino aby antony sasany mahavy atsika tihan̈aton̈o Fahatsiarovan̈a?

² Fahatsiarovan̈a io man̈ampy atsika handiniky valeran’ny vidim-pan̈avotan̈a. Izio mampatsiaro atsika irô fomba mety an̈aboahantsika fankasitrahan̈a soron̈o nataon’i Jesosy. (2 Kor. 5:14, 15) Amin’io koa atsika afaka ‘mifankahery’ tsarabe amindrô rahalahy ndreky ranabavintsika. (Rom. 1:12) Maro olo efa tsy mitory eky avy man̈aton̈o izio isaka taon̈o. Sasany tapakevitry himpody amy Jehovah, fôtony irô niraisin̈y tsara. Maro amin’olo vaovao koa gaga amy raha hitandrô ndreky ren̈indrô an̈y, ke man̈iry han̈araka lalan̈a mengo amy fiain̈ana. Zen̈y mahavy Fahatsiarovan̈a io ten̈a fotoan̈a miavaka amintsika!

3. Nan̈ino Fahatsiarovan̈a mampiray sain̈y rahalahy ndreky ranabavy jiaby erantany? (Zahava koa sary.)

³ Aleva on̈ono koa fa Fahatsiarovan̈a io mampiray sain̈y atsika amindrô rahalahy ndreky ranabavintsika eran-tany. Arakaraka hitsiforan’ny masoandra amy tany tsiaraikiaraiky, izio manomboko. Amin’io, atsika jiaby mitandren̈y kabaro araiky man̈azava nan̈ino ten̈a maventy vidim-pan̈avotan̈a. Man̈ano hira aroe atsika, mampandalo môfo ndreky divain, aviô misy vavaka efatra an̈anaovantsika “ameny.” An̈atin’ny kadirin’ny  24 lera, man̈ano zen̈y aby fiangonan̈a jiaby. Diniha hely baka haravoan̈an’i Jehovah ndreky Jesosy, koa fa mahita atsika jiaby miaraka man̈amia voninahitry irô ambaka zen̈y!

4. Ino raha handeha hidinihintsika amy lahatsoratra ty?

⁴ Ty fan̈ontanian̈a hidinihintsika ato: Akôry han̈oman̈antsika fôntsika amy Fahatsiarovan̈a? Akôry mety han̈ampiantsika olo hahazo hatsaran̈a amizio? Baka iô, akôry mety han̈ampiantsika irô olo efa tsy mitory eky na tsy mivory eky? Valin’ny fan̈ontanian̈a aby zen̈y han̈ampy atsika ho von̈ono ho avy amy fotoan̈a masin̈y io.

AKÔRY HAN̈OMAN̈ANTSIKA FONTSIKA?

5. a) Nan̈ino ma atsika tôkony hisaintsain̈y valerany vidim-pan̈avotan̈a io? (Salamo 49:7, 8) b) Ino raha nianaranao baka tamy video Nan̈ino ma Jesosy Naty?

⁵ Ino an̈isan’ny fomba maventy mety han̈oman̈antsika fôntsika ho vôn̈ono amy Fahatsiarovan̈a? Atsika mila mieritreritry valeran’ny vidim-pan̈avotan̈a nataon’i Jesosy Kristy. Tsisy amintsika mahavotro ain̈intsika amin’ny fahotan̈a ndreky fahafatesan̈a. (Vakia Salamo 49:7, 8; zahava koa video Nan̈ino ma Jesosy Naty?) a Zen̈y nahavy Jehovah nan̈iraka Jesosy nan̈amia ain̈inany han̈avotro atsika. (Rom. 6:23) Na Jehovah na Jesosy, samy nahafoe raha maventy tamintsika. Ke arakaraka handinihantsika raha zen̈y, hahavy atsika hahaihankasitraka vidim-pan̈avotan̈a fo. Atsika io handiniky raha sasany nataondrô, baka han̈avotan̈a atsika. Fa hizahavantsika antsendriky, ino ma dikan’ny vidim-pan̈avotan̈a zen̈y?

6. Ino ma vidim-pan̈avotan̈a zen̈y?

⁶ Vidim-pan̈avotan̈a io mira vola hivangan̈a raha efa nintsika taloha. Lavorary Adama olombelon̈o voanalohany, tamin’izy vo niasain’ny Zan̈ahary. Fa izikoa izy fa nanota, izy nanjary efa tsy afaka niain̈y tsisy farany eky. Tsy izy fo karaha zen̈y fa firaka amy taranakanany jiaby koa. Ke baka hazahoan̈a ndraiky raha narian’i Adama io, Jesosy nan̈amia ain̈inany lavorary natao sôron̈o. Tamy Jesosy tambony tany teto, izy ‘tsy nanota, salakady tsisy fitaka foeky tamy vavanany.’ (1 Pet. 2:22) Ain̈y lavorary ninany tamin’izy nivonen̈a in̈y, mira nin’i Adama talohan’ izy nanota. Ke Jesosy koa fa nan̈amia ain̈inany in̈y, izy nahavita nan̈efa ain̈y narian’i Adama.​—1 Kor. 15:45; 1 Tim. 2:6.

7. Ino aby raha sarotro sasany tôjy Jesosy tamin’izy tambony tany teto?

⁷ Ndray maro raha sarotro tôjy Jesosy tamin’izy tambony tany tatỳ, izy tsy nivadiky tamy Jehovah foeky. Akôry fomba nan̈aboahany zen̈y? Izy lavorary rango vo teraka, kanefa izy nan̈aja ry olobeny fo tamin’izy mbala hely, nata irô io tsy lavorary. (Lioka 2:51) Lera izy nahaibe, Jesosy nila nifen̈y mare baka tsy ho voataon̈onolo hierin̈y volan̈a raimandreniny na hivadiky amy Jehovah. Baka iô izikoa izy fa nanjary olobe, izy tsy maintsy niady tamy fakam-pan̈ahy nataon’i Satana Devoly taminany, an̈isan’izen̈y fakam-pan̈ahy hivadiky tamy Zan̈ahary. (Mat. 4:1-11) Satana baka efa tapakevitry han̈ano raha hahavy Jesosy hanota, amy zen̈y izy tsy ho afaka han̈amia vidim-pan̈avotan̈a.

8. Ino koa raha sarotro hafa niaretan’i Jesosy?

⁸ Nisy raha sarotro hafa koa tôjy Jesosy tamin’izy tambony tany tatỳ. Fahavalonany nan̈enjiky izy sady nitady fomba hamonoan̈a izy. (Lioka 4:28, 29; 13:31) Izy koa tsy maintsy niaritry toetry ratsindrô mpan̈ara-dia izy aby io. (Mar. 9:33, 34) Tamin’izy nindesin̈y hitsarain̈y, izy nampijalin̈y aviô nitihitihin̈y. Baka iô, nangala baraka mare fomba namonoan̈a izy salakady nijaly mare koa izy. (Heb. 12:1-3) Tamy  tapany farany tamy fitsapan̈a navoa izy koa Jehovah tsy niaro izy, ke izy tsy maintsy niady manokan̈a. b​—Mat. 27:46.

9. Ino raha tsapantsika momba soron̈o nataon’i Jesosy in̈y? (1 Petera 1:8)

⁹ Ten̈a niaritry raha sarotro maro Jesosy koa fa nan̈amia vidim-pan̈avotan̈a. Ke tsy mahailôso tia izy fo ma anao, izikoa fa mangala onon̈o raha jiaby niaretan’i Jesosy, baka han̈avotan̈a atsika zen̈y?​—Vakia 1 Petera 1:8.

10. Ino ma raha tsy maintsy nafoeny Jehovah tamin’izy nan̈amia vidim-pan̈avotan̈a?

¹⁰ Karakôry koa momba Jehovah? Ino raha nafoeny baka Jesosy hahavita han̈amia vidim-pan̈avotan̈a? Aleva onon̈o fa ten̈a nifandray marikitry Jehovah ndreky Jesosy. Izikoa mbala fifandraisan’ny baba ndreky zanaka fo, tsisy mahoesa nindrô. (Ohab. 8:30) Ke diniha baka amy zen̈y, mety akôry tsapan’i Jehovah tamin’izy nahita Jesosy niaritry raha sarotro isan-karazany tambony tany teto. Hay be fa misaora nangotsoko mare fôn’i Jehovah nahita Zanany navoa raha tsy rariny, halan’olo, aviô nampijalin̈y.

11. Mety ho karakôry raha tsapan’i Jehovah izikoa fa nivonen̈a Jesosy? Hazavà amin’ny ohatra.

¹¹ Lan̈iany raimandreny efa naty zanaka, mahay tsarabe hirifirin’ny maty zanaka zen̈y. Baka iô, nata atsika matoky tsarabe fa olo maty mbala hivilomin̈y, atsika mbala malahelo fo lera misy havantsika maty. Raha zen̈y man̈ampy atsika hahay raha tsapan’i Jehovah, tamin’izy nahita Zanany tiany be in̈y nijaly ndreky naty, tamy taon̈o 33. c​—Mat. 3:17.

12. Ino raha mety hataontsika manomboko ziôty firaka amy Fahatsiarovan̈a?

¹² Nan̈ino izikoa mianatra momba vidim-pan̈avotan̈a, manomboko ziôty firaka amy Fahatsiarovan̈a, lera fa mianatra manokan̈a na man̈ano Fotoam-pivavahan’ny Fianakavian̈a? Ampiasà Fitaovan̈a Fikarohan̈an’ny Vavolombelon̈on’i Jehovah (izikoa misy amy volan̈anarô) na boky hafa fianaran̈a Baiboly, baka ahitanao fan̈azavan̈a maro momba vidim-pan̈avotan̈a. d Baka iô, areha tsarabe prôgramon’ny vaky Baiboly amy Fahatsiarovan̈a amy Fomba Fiain̈ana Kristianin̈y Ndreky Fanompoan̈a: Boky Fianaran̈a. Amin’ny andran’ny Fahatsiarovan̈a koa, aza adin̈a mizaha Fotoam-pivavahan̈a Maraindrain̈y manokan̈a in̈y. Izikoa atsika man̈oman̈a fôntsika amy Fahatsiarovan̈a io, ho vitantsika  koa han̈ampy olo hafa hahazo hatsaran̈a baka amizio.​—Ezra 7:10.

AMPIA OLO HAHAZO HATSARAN̈A AMIZIO

13. Ino raha voanalohany mila ataontsika baka, han̈ampian̈a olo hahazo hatsaran̈a amy Fahatsiarovan̈a?

¹³ Akôry mety han̈ampiantsika olo baka hahazo hatsaran̈a amy Fahatsiarovan̈a? Raha voanalohany mila atao, mikaiky irô han̈aton̈o izio. Fan̈ampin’izen̈y koa, atsika mila man̈ano listinolo haintsika, amy zen̈y atsika afaka hikaiky irô. Mety ho havantsika izio, olo fiasan̈a araiky amintsika, olo lekoly araiky amintsika na koa olo hafa. Aviô nata efa lany invitasion amintsika, atsika mbala mety mandefa liens momba izio baka amy fitaovan̈a elektroniky. Tsy haintsika aby fa mety ho maro olo ho avy amizio.​—Mpito. 11:6.

14. Ino ohatra man̈aboaka fa ten̈a misy vokany izikoa anao lastio mikaiky olo hainao?

¹⁴ Aza adin̈a fa ten̈a misy vokany maventy izikoa anao lastiô mandeha man̈amia invitasion olo hainao. Ohatra, tsy Vavolombelon̈on’i Jehovah vadin’ny ranabavy araiky ty. Gaga mare izy, vadiny koa fa nivolan̈a taminany fa hiaraka aminany han̈aton̈o Fahatsiarovan̈a. Nan̈ino ma izy gaga? Fôtony izy efa matetiky nitaon̈o vadiny han̈aton̈o Fahatsiarovan̈a, fa vadiny io tsiary nandeha. Ino fo nahavy izy nandeha tamin’io? Karaha ty ho lelahy io: “Nisy olo haiko nan̈amia zaho invitasion.” Izio anti-pan̈ahy araiky efa fankazatra izy. Ke nanomboko tamy taon̈o io ndreky taon̈o maro tafaran’izen̈y, vadin’ny ranabavy io nan̈aton̈o Fahatsiarovan̈a fo.

15. Ino raha tsy mila hadin̈antsika izikoa atsika fa mikaiky olo han̈aton̈o Fahatsiarovan̈a?

¹⁵ Tsarova fa mety ho hisy fan̈ontanian̈a irô olo aby kahiantsika io, intsaka eky irô koa mbala tsiary nan̈aton̈o fivorian̈antsika foeky. Ke tsara izikoa atsika efa mieritreritry tsialohaloha fan̈ontanian̈a mety hapetrakandrô ndreky efa mioman̈a amy valiny. (Kol. 4:6) Sasany amindrô io mety han̈ontany: ‘Ino aby ma raha hatao an̈y?’ ‘Firy lera ma zio?’ ‘Karakôry lamba mety hatao?’ ‘Man̈efa ma miditry ao?’ ‘Misy tanty rakitry ma an̈y?’ Izikoa atsika fa mikaiky  olo han̈aton̈o Fahatsiarovan̈a, atsika mety man̈ontany irô karaha ty: “Tsao anao misy fan̈ontanian̈a?” Ke izikoa izy misy fan̈ontanian̈a, valiantsika. Atsika koa mety mampiasa video Tsarova Ny Nifatesan’i Jesosy ndreky Ino ma Raha Atao amy Tran̈o Fivorian̈a An̈y? baka irô hahay raha atao amy fivorian̈antsika an̈y. Misy hevitry maro tsara mety koran̈intsika amindrô koa, amy leson 28 amy boky Mankafiza Fiain̈ana Tsisy Farany!

16. Ino koa fan̈ontanian̈a mety hapetrakan’olo nan̈aton̈o Fahatsiarovan̈a?

¹⁶ Mety mbala ho hisy fan̈ontanian̈a hafa koa olo nan̈aton̈o Fahatsiarovan̈a. Ohatra, nan̈ino olo vitsy fo na tsisy foeky nihina môfo ndreky divain? Impiry atsika mankalaza Fahatsiarovan̈a? Mitovy fo ma raha atao amy fivorian̈a jiaby ataon’ny Vavolombelon̈o Jehovah? Nata efa nazavain̈a tamy kabaron’ny Fahatsiarovan̈a io raha aby zen̈y, mety mbala ilaindrô olo vaovao aby io fo fan̈azavan̈a tsiaraikiaraiky momba izio. Mety han̈ampy atsika hamaly sasany amindrô fan̈ontanian̈a aby zen̈y lahatsoratra amy jw.org, mitondra titra: “Nahoana no Tsy Mitovy Amin’ny An’ny Fivavahana Hafa ny Fomba Ankalazan’ny Vavolombelon’i Jehovah ny Sakafo Harivan’ny Tompo?” Tiantsika han̈ano erakan’ny vitantsika, han̈ampy olo “manan̈a toetsain̈y tsara” hahazo hatsaran̈a baka amy fankalazan̈a io, na alohan’ny Fahatsiarovan̈a, na amy fotoan̈an’izio, na afaran’izio.​—Asa. 13:48.

AMPIA OLO EFA TSY MITORY NA TSY MIVORY EKY

17. Ino raha mety hataon’ny antipan̈ahy han̈ampian̈a olo efa tsy mitory na tsy mivory eky? (Ezekiela 34:12, 16)

¹⁷ Akôry mety han̈ampian’ny anti-pan̈ahy olo efa tsy mitory na tsy mivory eky, amy vanim-potoan̈an’ny Fahatsiarovan̈a? Aboaha irô fa anarô ten̈a mikarakara irô. (Vakia Ezekiela 34:12, 16.) Alohan’ny Fahatsiarovan̈a, ataova hevitry hitsidihan̈a olo maro efa tsy mitory na tsy mivory eky. Volàn̈a amindrô fa anarô von̈ono hikarakara irô ndreky tihan̈ano raha han̈ampian̈a irô. Tahaoma han̈aton̈o Fahatsiarovan̈a irô. Raisa tsarabe irô izikoa avy. Ndray efa vita Fahatsiarovan̈a, mifen̈a fo hamangy  irô, aviô ampia irô baka himpody amy Jehovah.​—1 Pet. 2:25.

18. Ino raha mety hataontsika jiaby baka han̈ampian̈a olo efa tsy mitory na tsy mivory eky? (Romanina 12:10)

¹⁸ Olo jiaby amy fiangonan̈a samy mety man̈ampy olo efa tsy mitory na tsy mivory eky han̈aton̈o Fahatsiarovan̈a. Amy fomba akôry? Aboaha fa anarô tia irô ke mifen̈a ho tsara fan̈ahy ndreky han̈aja irô. (Vakia Romanina 12:10.) Aleva onon̈o fa mety ho sarotro amindrô rahalahy ndreky ranabavintsika aby io himpody hivory. Irô mety havozo tsao tsy hiraisin̈y tsara. e Ke aza man̈ontany raha mety hampamen̈atra irô na mivolan̈a raha mety hampalahelo irô. (1 Tes. 5:11) Mbala rahalahy ndreky ranabavintsika fo baka irô io. Ravoravo atsika himpody hiaraka hanompo amindrô.​—Sal. 119:176; Asa. 20:35.

19. Ino hatsaran̈a azontsika izikoa atsika mahatsiaro ny nifatesan’i Jesosy?

¹⁹ Ravoravo atsika fôtony Jesosy nan̈iraka atsika hahatsiaro andra nifatesany, isaka taon̈o. Hitantsika fa raha zen̈y ten̈a raha maventy. Izikoa atsika man̈aton̈o Fahatsiarovan̈a, na atsika na olo hafa samy mahazo hatsaran̈a baka amy zen̈y. (Isaia 48:17, 18) Mahaimitombo fo fitiavantsika Jehovah ndreky Jesosy. Aboakantsika fa atsika ten̈a mankasitraka raha nataondrô tamintsika. Loso mahaimifandray amindrô rahalahy ndreky ranabavy aby io fo koa atsika. Atsika koa mety hahavita han̈ampy olo hafa hahay akôry mety hazahoandrô hatsaran̈a baka amy vidim-pan̈avotan̈a. Ke alô atsika han̈ano erakan’ny vitantsika, baka ho vôn̈ono han̈aton̈o Fahatsiarovan̈a amy taon̈o ty, fôtony izio andra faran’ny maventy an̈atin’ny taon̈o!