1. Mang fan ni rofen ni Puguran e aram e bin th’abi ga’ fan e rran u reb e duw? (Luke 22:​19, 20)

 ROFEN ni Puguran ko yam’ ni tay Kristus e aram e bin th’abi ga’ fan e rran u wan’ e girdi’ rok Jehovah u reb e duw. Kemus e re madnom ni yog Jesus ngak pi gachalpen ni ngaur ted. (Mu beeg e Luke 22:​19, 20.) Boor fan ni gad ma athapeg ni ngad uned ko Puguran. Ngad weliyed boch riy.

2. Mang boch i fan ni gad ma athapeg ni ngad uned ko Puguran?

² Fare Puguran ni gad ma tay e ma ayuwegdad ni ngad lemnaged feni ga’ fan fare biyul. Ma puguran ngodad boch e kanawo’ nrayog ni ngad daged riy nib ga’ fan u wan’dad e maligach ni pi’ Jesus. (2 Kor. 5:​14, 15) Ku aram reb e kanawo’ nrayog ni nge ‘fel’ rogodad ko michan’ rok pi walagdad miki fel’ rogon pi walagdad ko michan’ rodad.’ (Rom. 1:12) Gubin e duw ni boor e walag ni kar talgad ko muulung nge machib ni yad ma un ko Puguran. Bay boch i yad ni ma adag ni nge sul ngak Jehovah ni bochan e t’ufeg ni kan dag ngorad e rofen nem. Ku boor e girdi’ ni yad baadag e machib ni yad ma adag ni ngar filed e Bible ni bochan e n’en kar guyed ma kar rung’aged e rofen nem. Aram fan nrib ga’ fan u wan’dad e Puguran ni gad ma tay!

3. Uw rogon ni ma taareban’ e pi walag u ga’ngin yang e fayleng u daken e Puguran ni yima tay? (Kum guy e sasing.)

³ Kum lemnag rogon ni ma taareban’ e pi walag u ga’ngin yang e fayleng u daken e Puguran ni yima tay. Ma muulung e Pi Mich Rok Jehovah u ga’ngin yang e fayleng nga taabang u nap’an ni ke aw e yal’. Gad ma motoyil nga reb e welthin ni be tamilangnag feni ga’ fan fare biyul. Gad ma yon’ l’agruw e tang, min pi’ e flowa nge wain, ma gad yog e “amen” u tungun aningeg e meybil. Ere ra gaman 24 e awa ma gubin e ulung ni kar rin’ed e re n’ey. Am lemnag gelngin e felfelan’ ni ma tay Jehovah nge Jesus u nap’an ni yow ra guy ni gad be tay farow u ga’ngin yang e fayleng ko biney e kanawo’.

4. Mang e gad ra weliy ko re article ney?

 ⁴ Gad ra weliy e pi deer ni baaray ko re article ney ni aram e: Uw rogon ni ngad fal’eged rogodad ni fan ko Puguran? Uw rogon nrayog ni ngad ayuweged yugu boch e girdi’ ni nge yib angin ngorad? Ma uw rogon nrayog ni ngad ayuweged e pi walag ni kar talgad ko muulung nge machib? Fulweg ko pi deer ney e ra ayuwegdad ni ngad fal’eged rogodad ni fan ko re madnom ney nrib ga’ fan.

UW ROGON NI NGAD FAL’EGED ROGODAD NI FAN KO PUGURAN?

5. (a) Mang fan nsusun e ngad lemnaged feni ga’ fan fare biyul? (Psalm 49:​7-9) (b) Mang e kam fil ko fare video ni Why Did Jesus Die?

⁵ Reb e kanawo’ nrib ga’ fan nrayog ni ngad fal’eged rogodad riy ni fan ko fare Puguran e aram e ngad lemnaged feni ga’ fan fare biyul ni maligach ni pi’ Jesus Kristus. Dabiyog ni ngad chuwgad u tan gelngin e denen nge yam’ ni gadad rodad. (Mu beeg e Psalm 49:​7-9; kum guy fare video ni Why Did Jesus Die?) a Ere yarmiy Jehovah ni nge pi’ Jesus e yafos rok ni nge ayuwegdad, ma boor ban’en nra pagew Jesus fan ya nge yag nrin’ew e re n’ey. (Rom. 6:23) Faanra ud pared ni gad be fal’eg i lemnag e n’en ni pag Jehovah nge Jesus fan ni fan ngodad, ma aram e rra ga’ fan u wan’dad fare biyul. Gad ra weliy in ko pi n’ey ni pag Jehovah nge Jesus fan ya nge yag nra piew fare biyul. Machane som’on e mang e be yip’ fan e biyul, ma mang fan nib t’uf ni nge biyuliydad Jesus?

6. Mang e be yip’ fan e biyul, ma mang fan nib t’uf ni nge biyuliydad Jesus?

⁶ Biyul e puluwon ban’en ni ngan chuw’iy ngan sulweg. Bin som’on e pumoon ni aram Adam e nni sunmiy nib flont. Ere nap’an ni denen ma gathi kemus ni yigoo ir e mul e athap ko yafos ni manemus u pa’, ya kub muun gubin pi fak ngay. I ognag Jesus e yafos rok nib flont nib maligach ya nge yag ni chuw’iy nge sulweg e n’en ke mul u pa’ Adam. Ma n’umngin nap’an e yafos rok Jesus u fayleng ‘ndariy e denen ni ngongliy; ma dariy be’ ni rung’ag taab bug i thin nde riyul’ ni yib u l’ugun nga but’.’ (1 Pet. 2:22) Ere nap’an ni yim’ Jesus ma yafos rok nib flont e ri taareb rogon ko yafos rok Adam nib flont ni mul u pa’.​—1 Kor. 15:45; 1 Tim. 2:6.

7. Mang boch e skeng ni i mada’nag Jesus u nap’an ni immoy u fayleng?

⁷ Ri fol Jesus rok e Chitamangin ni bay u tharmiy u gubin ban’en ni yugu aram rogon ni boor e skeng ni i mada’nag u nap’an ni immoy u fayleng. Nap’an ni kab bitir Jesus ma i fol ko gallabthir rok ndawor ra flontgow ni yugu aram rogon ni ir e ni gargeleg nib flont. (Luke 2:51) Nap’an ni fel’ yangaren mab t’uf ni nge siyeg e towasar ni i tay boch e girdi’ ngak ni yad baadag ni nge dabki fol ko gallabthir rok ara dabki yul’yul’ ngak Jehovah. Ma nap’an ni ilal mab t’uf ni nge siyeg e lumel ni fek Satan ni Moonyan’ i yib ngak nib muun ngay e n’en ni yog ngak ni aram e dabki yul’yul’ ngak Got. (Matt. 4:​1-11) I dugliy Satan u wan’ ni nge k’aring Jesus ni nge denen ya nge dabki pi’ fare biyul.

8. Ku mang boch e skeng ni mada’nag Jesus?

⁸ Nap’an ni i machib Jesus u fayleng maku bay boch e skeng ni i mada’nag. Un gafgownag ma kun guy rogon ni ngan thang e fan rok. (Luke 4:​28, 29; 13:31) Kub t’uf ni nge k’adan’ ko oloboch ni i rin’ pi gachalpen. (Mark 9:​33, 34) Nap’an ni yibe pufthinnag, ma aram mu un gafgownag ma yibe moningnag. Ngemu’ min li’ nge yim’ nrib gel e amith nge tamra’ ko yam’ ni tay. (Heb. 12:​1-3) Ma thingar ki athamgiliy e gin tomur ko skeng ni yan u fithik’ ni ir rok nde yororiy Jehovah. b​—Matt. 27:46.

9. Uw rogon u wan’dad fare biyul ni pi’ Jesus? (1 Peter 1:8)

 ⁹ Ba tamilang nrib gel e gafgow ni yan Jesus u fithik’ ya nge yag ni pi’ fare biyul. Ere nap’an ni gad ra lemnag urngin ban’en ni pag Jesus fan ni fan ngodad, ma ri ma gel feni t’uf rodad.​—Mu beeg e 1 Peter 1:8.

10. Mang e pag Jehovah fan ya nge yag nni pi’ fare biyul?

¹⁰ Ma uw rogon Jehovah? Mang e m’agan’ ngay ni nge pag fan ya nge yag ni pi’ Jesus fare biyul? Tha’ u thilin Jehovah nge Jesus e aram e bin th’abi chugur e tha’ nrayog ni nge sum u thilin reb e matam nge ba pagel ni fak. (Prov. 8:30) Ere am lemnag gelngin e amith ni tay laniyan’ Jehovah u nap’an ni i guy Jesus ni be yan u fithik’ boor e skeng u nap’an ni bay u fayleng. Dariy e maruwar riy nri amith laniyan’ ni guy Fak ni yibe gafgownag, ma yibe togopuluw ngak, ma yibe skengnag.

11. Mu weliy ban’en ni nge tamilangnag gelngin e amith ndabisiy ni tay laniyan’ Jehovah u nap’an nni thang e fan rok Jesus.

¹¹ Gubin e gallabthir ni ke yim’ reb i fakrad e yad manang gelngin e kireban’ ni ma tay be’ ni ke yim’ fak. Yugu aram rogon nib mich u wan’dad e fos ko yam’, machane ku ma kireban’dad u nap’an nra yim’ be’ nib t’uf rodad. Re n’ey e be ayuwegdad ni ngad nanged gelngin e amith ndabisiy ni tay laniyan’ Jehovah u nap’an ni be yaliy Fak ni be gafgow e rofen nem ko duw ni 33 C.E. c​—Matt. 3:17.

12. Mang e rayog ni ngad rin’ed ko pi wik u m’on ko Puguran?

¹² Thilin e chiney nge rofen ni Puguran e ngam guy rogon ni ngkum fil boch ban’en u murung’agen fare biyul u nap’an e fol Bible ni ga ma tay ni yigoo gur ara Fol Bible ni Tabinaw. Mu fanay fare Research Guide for Jehovah’s Witnesses (ni faanra bay ko thin rom) ara yugu boch e babyor ni yima fanay ko fol Bible ni ngam fal’eg i fil murung’agen e re n’ey. d Kum guy rogon ni ngam fol ko schedule ko thin nu Bible ni ngan beeg ni fan ko Puguran ni bay ko fare babyor ni Tin Gad Ma Rin’ nge Machib Rodad​—Babyor ko Muulung. Ma rofen ni yira tay e Puguran e dab mu pagtalin ni ngam yaliy fare Morning Worship program ni kan ngongliy ni fan ko rofen nem. Faan gad ra fal’eg rogodad ni fan ko Puguran, ma aram e rayog ni ngad ayuweged yugu boch e girdi’ ni ngki yib angin ngorad.​—Ezra 7:10.

MU AYUWEG YUGU BOCH E GIRDI’ NI NGE YIB ANGIN NGORAD

13. Ra ngad ayuweged yugu boch e girdi’ ni nge yib angin e Puguran ngorad, ma mang e som’on ni ngad rin’ed?

¹³ Uw rogon nrayog ni ngad ayuweged yugu boch e girdi’ ni nge yib angin e Puguran ngorad? Bin som’on e aram e ngan piningrad ko  Puguran. Gathi kemus ni ngad pininged e piin gad be mada’nagrad u nap’an e machib, ya ku rayog ni ngad yoloyed fithingan boch e girdi’ ni gad manang nga but’ ni ngkud pininged yad ko Puguran. Pi cha’ney e rayog nib muun ngay e girdi’ rodad, nge piin gad nga maruwel, nge skul, nge yugu boch e girdi’. Mus ni faanra de gaman e invitation rodad ni kan printnag, ma rayog ni ngad pied e link riy ko girdi’ u online. Sana gad ra gin nga urngin e girdi’ ni yad ra dugliy ni ngar bad ko Puguran.​—Ekl. 11:6.

14. Mu tamilangnag angin nra yib ni faan gad ra pining be’ ni nge un ko Puguran.

¹⁴ Faanra kam man mu pining be’ ni nge un ko Puguran, ma sana rra adag ni nge un. Bay reb e walag nib pin ni figirngin e gathi ir reb e Pi Mich ni gin u nap’an ni yog figirngin nra un ngak ko Puguran. Mang fan ni gin ko re n’ey? Ya boor yay ni i pining ni nge un ko Puguran kafram, ma de un. Ere mang fan ni dugliy ni nge un e yaney? I yog figirngin ni gaar, “Ke pi’ be’ bang e invitation ngog.” I yog ni bay reb e piilal ni yow manangew yow ni ke pining ni nge un ko Puguran. Ere un figirngin fare walag ko Puguran e re duw nem nge boor e duw nga tomuren.

15. Mang e dab da paged talin u nap’an ni gad be pining e girdi’ ko Puguran?

¹⁵ Dab mu pagtalin ni piin gad ra piningrad ko Puguran e rayog ni bay e deer rorad, nib ga’ ni faanra dariy bayay ni kar uned ko muulung. Ere rayog ni ngad lemnaged u m’on riy boch e deer nrayog ni ngar fithed ma gad fal’eged rogodad ni ngad pied e fulweg riy. (Kol. 4:6) Bod nrayog ni nge gaar boch e girdi’ u wan’rad: ‘Mang e ra buch u nap’an e re madnom ney?’ ‘Uw n’umngin nap’an ni yira tay?’ ‘Bay rogon e mad ni ngan chuw ngay, fa?’ ‘Bay puluwon ni ngan un ngay fa dariy?’ ‘Yira mokun salpiy riy, fa?’ Nap’an ni gad be pining be’ ko Puguran, ma rayog ni ngad fithed ni nge lungudad, “Bay ban’en ni ga baadag ni ngam fith?,” ma faanra bay ma aram ma gad pi’ e fulweg ko deer rok. Ku rayog ni ngad fanayed fa gal video ni kenggin e Ngaum Lemnag e Yam’ ni Tay Jesus nge Mang e Yima Rin’ ko Pi Tagil’ e Liyor Romad? ni ngad ayuweged ni nge nang rogon ni gad ma tay e pi muulung rodad. Ku boor ban’en nib manigil ko guruy ni 28 ko fare ke babyor ni Mu Par Ndariy N’umngin Nap’an ni Gab Felfelan’! nrayog ni ngad weliyed ngak.

16. Ku mang boch e deer nrayog ni nge fith e piin kar uned ko Puguran?

 ¹⁶ Piin ka fin ra uned ko Puguran e rayog ni ka bay boch e deer rorad u tomuren ni kar uned ko Puguran. Rayog ni ngar lemnaged ko mang fan ni kemus nri in e girdi’ ni ke kay e flowa ma ke unum e wain (ni faanra bay). Ku rayog ni ngar lemnaged ko uw urngin yay ni gad ma madnomnag fare Puguran. Ku rayog ni yad baadag ni ngar nanged ko aray rogon ni yima tay gubin e muulung ko Pi Mich Rok Jehovah fa danga’. Yugu aram rogon ni boor e pi n’ey ni yira weliy u lan fare welthin ni yira pi’ u nap’an e Puguran, machane rayog ni kab t’uf ni ngan tamilangnag boch ban’en ngorad. Rayog ni nge ayuwegdad fare article ni bay ko jw.org ni kenggin e “Why Do Jehovah’s Witnesses Observe the Lord’s Supper Differently From the Way Other Religions Do?” ni ngad pied e fulweg u boch e deer rorad. Gad baadag ni ngad rin’ed urngin e tin nrayog rodad u m’on, ngu nap’an, ngu tomuren e Puguran ni ngad ayuweged e piin nib “munguy lanin’rad ma kub m’agan’rad ngay ni ngar filed e tin riyul’” ni nge yib angin fare Puguran ngorad.​—Acts 13:​48, NW.

NGAN AYUWEG E PIIN KAR TALGAD KO MUULUNG NGE MACHIB

17. Uw rogon nrayog ni nge ayuweg e piin piilal e piin kar talgad ko muulung nge machib? (Ezekiel 34:​11, 12, 16)

¹⁷ Uw rogon nrayog ni nge ayuweg e piin piilal e piin kar talgad ko muulung nge machib u m’on ngu tomuren e Puguran? Mu daged ngorad ni gimed be lemnagrad. (Mu beeg e Ezekiel 34:​11, 12, 16.) Mu guyed rogon ni ngam nonad ngak urngin e piin kar talgad ko muulung nge machib nrayog u m’on ko Puguran. Mogned ngorad ni gimed be lemnagrad ma gimed baadag ni ngam ayuweged yad u rogon nrayog romed. Mu pininged yad ko Puguran. Ma faanra kar bad, mi gimed dag ngorad ni gimed ba felfelan’ ni kar uned ko muulung. Tomuren e Puguran mi gimed ulul ni ngaum marod mu guyed ara mu callnaged e pi walag ney mi gimed ayuwegrad ya nge yag nra sulod ngak Jehovah.​—1 Pet. 2:25.

18. Uw rogon nrayog ni ngad ayuweged e piin kar talgad ko muulung nge machib ni gad gubin? (Roma 12:10)

¹⁸ Gubin e girdi’ u lan e ulung nrayog ni ngar ayuweged e piin kar talgad ko muulung nge machib ni kar uned ko Puguran. Ni uw rogon? Aram e ngar daged e t’ufeg, nge sumunguy, nge  tayfan ngorad. (Mu beeg e Roma 12:10.) Dab mu pagtalin nrayog ni ka i mo’maw’ ngorad ni ngar bad ko muulung u m’on riy. Rayog ni yad be magar ko n’en nri yog e girdi’ u lan e ulung ngorad ara u murung’agrad. e Ere dab mu fith boch e deer ngorad nrayog ni nge k’aring e tamra’ ngorad ara mog boch e thin nrayog ni nge kirebnag lanin’rad. (1 Thess. 5:11) Pi cha’ney e yad boch i walagdad. Ere gad ba felfelan’ ni kar sulod ni ngkud liyorgad bayay u taabang!​—Ps. 119:176; Acts 20:35.

19. Mang angin nra yib ngodad ni faanra ud lemnaged e yam’ ni tay Jesus?

¹⁹ Gad ba felfelan’ ni ke yarmiy Jesus ni ngaud madnomnaged e Puguran ko yam’ ni tay ni gubin e duw. Faan gad ra rin’ e re n’ey, ma boor e kanawo’ nra yib angin ngodad nge yugu boch e girdi’. (Isa. 48:​17, 18) Ra gel feni t’uf Jehovah nge Jesus rodad. Ku gad ra dag rogon feni ga’ fan u wan’dad e n’en kar rin’ew ni fan ngodad. Ku ra gel e chugur ko tha’ u thildad e pi walag, maku rayog ni ngad ayuweged boch e girdi’ ni ngar nanged rogon nrayog ni nge yag e pi tow’ath ngorad nra yag ko girdi’ ni bochan fare biyul. Ere ngad rin’ed urngin e tin nrayog rodad ni ngad fal’eged rogodad ni fan ko Puguran ni yira tay e biney e duw, ni aram e bin th’abi ga’ fan e rran u lan e re duw ney!