1. Bila mbi lumbu ki Mbambukulu kididi lumbu kimosi kilutidi mfunu mu mvu? (Luka 22:19, 20)

 KUIDI dikanda di Yehova, lumbu ki Mbambukulu moyo ki lufua lu Kristu, kidi lumbu kilutidi mfunu. Mu mvu nduka nduka wawu kuandi yengo Yesu kakamba balonguki bandi batulanga. (Tanga Luka 22:19, 20.) Mu bibila biwombo tueta vingidila mu phuila yiwombo Mbambukulu moyo. Tutadila mua ndambu bibila beni.

2. Bibila mbi bieta tula ti tuvingila mu phuila yoso lumbu ki Mbambukulu moyo?

² Mbambukulu moyo yeta tusadisa tuyindula luvalu lu khudulu. Yeta tubambula moyo phila yoyi tulenda bela phutudulu matondo mu nkayilu wu Yesu. (2 Ko. 5:14, 15) Yeta bue tuvana diaka diluaku “disoludila ayi dikindasana” ayi bakhomba zieto ba babakala ayi ba baketo. (Loma 1:12) Kadika mvu, bakhomba bawombo bobo bavola mu kipheve beta kuiza kutakana. Bankaka beta kikinina vutukila Yehova, mu bila ki phila yoyi beta kuba yambila mu mayangi. Batu bawombo bankaka beta yangalala landakana nzila yi luzingu mu momo beta kuiza mona ayi beta wa. Diedi tuyitukisa ko mu zaba ti Mbambukulu moyo yeta kuiza baka buangu kilutidi mfunu mu mintima mieto!

3. Bue Mbambukulu moyo yeta tutudila mu bumosi ayi bakhomba zieto badi mu nza yimvimba? (Tala phe foto.)

³ Yindula diaka phila yoyi Mbambukulu moyo yeta buedila bumosi bu dikanda dieto di kipheve mu nza yimvimba. Bambangi zi Yehova beta kutakana mu lumbu beni mu thangu yoyi thangu yeta kotila mu nza yimvimba. Beto boso tueta wa diskur yoyi yeta monisa mfunu wu khudulu. Tueta yimbila minkunga miodi mi nkembo, vinyu ayi dipha bieta vioka ayi mu ntim’eto woso  tueta tuba “ameni” mu zindombolo ziya. Mu lumbu beni kina, bimvuka bioso bidi mu nza yimvimba bieta butudila. Wulenda yindula khini zio Yehova ayi Yesu beta mona mu phila yoyi bumosi beni bueta kubazitisila?

4. Mbi tueka ntadila mu diso diadi?

⁴ Mu disolo diadi tueka ntadila biuvu biabi: Bue tulenda kubikila mintima mieto mu diambu di Mbambukulu moyo? Bue tulenda sadisila batu bankaka bayibakila mamboti? Ayi bue tulenda sadisila batu bo bavola mu kipheve bakutakana mu Mbambukulu moyo? Mimvutu mi biuvu beni biobi mami sadisa wuba wukubama mu diluaku beni diodi di busantu.

BUE TULENDA KUBIKILA MINTIMA MIETO MU DIAMBU DI MBAMBUKULU MOYO?

5. a) Bila mbi tufueti yindudilanga luvalu lu khudulu? (Minkunga 49:7, 8) b) Dilongi mbi beki mu video Mpo na nini Yesu akufaki?

⁵ Yimosi mu ziphila zikubikila mintima mieto mu diambu di Mbambukulu moyo yidi mu yindudila luvalu lu khudulu wu nkayilu wu Yesu Kristu. Beto veka, tulendi ko kukikula mu disumu ayi lufua. (Tanga Minkunga 49:7, 8; tala diaka video Mpo na nini Yesu akufaki?) a Diawu kadiambu ko diba diambu dimosi diphasi mu diambu di niandi veka ayi muan’andi wuluzolo, Yehova wubongisa mambu mu diambu di Yesu kavana luzingu luandi mu diambu di beto. (Loma 6:23) Bo buawu tunluta yindudila mu buphinda mambu mo Yehova ayi Yesu bavanga mu diambu di beto, buawu matu luta yangalala mu khudulu. Tutadila mua ndambu mambu momo khudulu yitomba kuidi Yehova ayi Yesu. Vayi ditheti theti, khudulu muna mbi?

6. Khudulu muna mbi?

⁶ Khudulu yidi thalu yo yeta futu mu kula kima. Adamu mutu wutheti mu thangu bamvanga wuba wuduka. Mu thangu kasumuka wuzimbisa diluaku dio kaba dizinga mvu ka mvu bika niandi veka kaka vayi ayi bana bandi boso. Mu bue sumba diaka luzingu lo Adamu kazimbisa, Yesu wuvana luzingu luandi luduka banga nkayilu. Mu luzingu luandi loso va mbata ntoto, Yesu “kasie vola masumu ko ayi kasie tuba luvunu ko.” (1 Pi. 2:22) Mu thangu kabe fua, luzingu lu Yesu luduka ludedakana ayi lo Adamu kazimbisa.​—1 Ko. 15:45; 1 Tim. 2:6.

7. Zinzomono mbi Yesu kadengana bo kaba va mbata ntoto?

⁷ Yesu wutatamana tumukina mu buduka boso Dise diandi di mazulu ka diambu ko zinzomono zio kadengana mu thangu kaba va mbata ntoto. Buba wubutuka muana wuduka, Yesu wutumukina kipfumu ki bambuta ziandi ba kinsuni bo ka basi ba ko baduka. (Luka 2:51) Bo kaba ntueni, wuba phe na phuila yi siama mu zithotolo voti zinzomono zio nginu zitula ti kabika ba tumamana voti kabika ba wukuikama. Ayi bo kayiza ba nkulutu, Yesu wununga zinzomono zio ziba kuidi Satana Diabulu ayi wununga mambu mo mantula mu nzomono mu diambu ditedi kuikama kuandi kuidi Nzambi. (Mat. 4:1-11) Satana wubaka nzengolo yingolo yi vukumuna Yesu kasumuka muingi kabika ba wufuana mu futa khudulu.

8. Mambu mbi diaka maphasi Yesu kanungina?

⁸ Mu kisalu kiandi ki tsamununu va mbata ntoto, Yesu wununga zinzomono ziwombo. Wudengana zithatukusu ayi ban’dila zikhaka muingi bamvonda. (Luka 4:28, 29; 13:31) Wumonisa diaka mvibudulu mu kambu kulunga ku balonguki bandi. (Mlk. 9:33, 34) Mu thangu beba kunsambisa mu luzingu luandi, bammonisa phasi ayi bamvueza. Kumanima, bayiza kumvonda mu lufua lumosi luphasi ayi lutsoni. (Ebe. 12:1-3) Wumonisa kibakala mu zinzomono ziandi zitsuka ayi ziphasi mu kambu baka lutanunu lu Yehova. b​—Mat. 27:46.

9. Bue tueta muena nkayilu wu Yesu? (1 Piela 1:8)

 ⁹ Dimonikini bukiedika ti khudulu, thalu yiwombo yitombana kuidi Yesu. Tumonanga ko luzolo luphinda lo Yesu kamonisa mu thangu tueta yindula phila yoyi kakiyiminina mambu mawombo mu bila kieto?​—Tanga 1 Piela 1:8.

10. Mambu mbi matombana kuidi Yehova muingi kavana khudulu?

¹⁰ Buabu nia Yehova? Diambu mbi kakiyimina mu luzolo loso muingi Yesu kafuta khudulu? Yehova ayi Yesu nguizani yingolo badi yo yilenda ba va khati tsika disa ayi muana. (Zin. 8:30) Yindula theti, bue Yehova kamuena mu thangu kamona muan’andi Yesu wulembo moni ziphasi zingolo va mbata ntoto. Mu kambu finda phaka wumona phasi ziwombo mu mona muan’andi balembo mmonisa ziphasi, kunloza ayi kun’zoma.

11. Sadila kifuani kio kimmonisa phila yoyi Yehova kamuena mu thangu bavonda Yesu.

¹¹ Mbuta nioso nio wufuilu muana mu kondo finda phaka zebi ziphasi zio kadengana mu thangu beni yoyi kafuilu muana. Minu kingolo tukala mu diambu di tedi pfulukulu, vayi kiawu ko kieta botula ziphasi zio tueta mona beto fuilu mutu nio tueta zola. Kifuani beni kioki kieta tusadisa tusudika phila yo Yehova kamuena mu thangu kamona muan’andi wuluzolo wulembo moni ziphasi ayi bo kafua mu lumbu ki pantekoti ki mvu wu 33 T.E. c​—Mat. 3:17.

12. Mambu mbi tulenda vanga mu thangu yi Mbambukulu moyo?

¹² Bila mbi kawulendi kitudila ko lukanu tona thangu yayi wutula ndongokolo yi ngeyo veka voti yi dikanda muingi wulonguka nduka nduka diambu ditadidi khudulu? Sadila Buku ya bolukiluki mpo na Batatoli ya Yehova (enati yidi mu mbembo’aku) voti sadila minkanda minkaka mio mieta sudikisa Bibila mu buphinda. d Ayi ba wukubama mu landakana lutangulu lu Bibila lu Mbambukulu moyo lo lueta vanu mu programi mu Nkanda wu Luzingu lu bakristu ayi kisalu​—Nkanda Wulukutukunu. Ayi mu lumbu ki Mbambukulu moyo, kadi zimbakana landakana programi yi mfunu yi lusambulu lunsuka. Wumosi mosi mu beto niandi kubika ntim’andi mu diambu di Mbambukulu moyo, tuela ba bafuana mu sadisa bankaka babaka phe mamboti!​—Esa. 7:10.

SADISA BANKAKA BABAKA MAMBOTI

13. Diambu mbi ditheti tufueti vanga muingi tusadisa batu bankaka babaka mamboti mu Mbambukulu moyo?

¹³ Bue tulenda sadisila batu bankaka babaka mamboti mu diambu di Mbambukulu moyo?  Diambu ditheti didi, kubatedisa. Yisi ko kaka ti batu bobo tueta kue dengana mu kisalu ki tsamununu kadika ngondi bawu kaka tufueti tedisa, vayi tulenda kueto sonika listi yi batu bobo tulenda tedisa. Yilenda ba bakhomba zieto ba dikanda, bakundi beto ba kisalu ayi batu bankaka. Buba ti tubeki ko invitasio yi phapi, tulenda kueto tindila batu lien yi versio electroniki muingi bayi tadila mu telefoni. Zebi batu bakua bela kuiza?​—Mpo. 11:6.

14. Sudikisa ngolo zio zikala tedisa mutu niandi veka mu Mbambukulu moyo.

¹⁴ Kadi ba ziduti bo wuntedisa mutu ku Mbambukulu moyo. Khomba mosi wunketo nio nnuni’andi kasi ba ko Mbangi Yehova, wuyituka lumbu kimosi kio nnuniandi kayiza kum’bata mu kunkamba mu zanti yoso ti tidi kuenda yandi mu Mbambukulu moyo. Bila mbi kayitukila? Bila Khumbu ziwombo keba kuntedisanga muingi kakutakana, vayi kadi khumbu kabutudila. Vayi mu khumbu yayi mbi bitula kakikinina kutakana? “Katuba invitasio bapheni kuidi nkulutu mosi, nio wuzabana yama.” Bakala beni wukutakana mu mvu beni ayi wuyiza tona bue kutakana mu mimvu mio milandakana kuntuala.

15. Diambu mbi katulendi zimbakana ko mu thangu tulembo tedisa batu mu Mbambukulu moyo?

¹⁵ Tutulanga mayindu meto ti batu bo tuntedisa balenda ba na biuvu​—nduka nduka enati bakutikini ko mu mosi mu zikhutukunu zieto. Matuvanga diambu dimboti beto kiyindudilanga mboti mboti biuvu biobi balenda tuyuvula ayi kukikubika muingi tubavutudila mimvutu. (Kol. 4:6) Mu kifuani, bankaka balenda yuvula: ‘Mambu mbi makuiza vioki mu nyengo beni?’ ‘Thangu kua nyengo beni mawu tula?’ ‘Bue buvuatila?’ ‘Mu kota zimbongo?’ ‘Beta kongula makaba?’ Mu thangu tuntedisa mutu ku Mbambukulu moyo tulenda kunyuvula, “Kiuvu widi kiyuvula?” ayi kumanima kumvana mimvutu mu biuvu biobi kalenda yuvula. Wulenda sadila phe zivideo ziazi Kanisà liwa ya Yesu ayi video Mambu bue meta viokila mu nzo yi Kipfumu? muingi wusadisa mutu beni kazaba bue zikhutukunu beni zieta viokila. Ayi dilongi 28 yi nkanda Zinga mu mayangi mvu ka mvu! dituveni mambu mamfunu momo tulenda tubila.

16. Biuvu mbi binkaka bilenda yuvula batu bobo biza kutakana mu Mbambukulu moyo?

 ¹⁶ Kumanima ma lukutukunu lu Mbambukulu moyo, batu bamona bobo bayangididi mu kiedika balenda ba phe na biuvu binkaka. Batu bankaka balenda yuvula bila mbi bio mua ndambu batu (enati badi), badidi dipha ayi banuini vinyu. Bankaka phe balenda yuvula, khumbu zikua tueta viokisila Mbambukulu moyo mu mvu. Ayi balenda tomba zaba enati zikhutukunu zioso zi Bambangi zi Yehova buna kuandi zieta viokila. Buba ti kuidi na mambu mawombo mamfunu momo matubulu mu diskur yi Mbambukulu moyo, batu bamona bobo bizidi balenda luta tomba diaka babasudikisa mu phila yimboti mambu beni. Disolo mu jw.org dio ditubidi “Mpo na nini Batatoli ya Yehova basalaka elambo ya Nkolo ndenge moko te na mangomba mosusu?” dilenda kutusadisa tuvana mimvutu mu biuvu biawu. Tutula mamoso mo tulenda tula​—tuamina lukutukunu lutona, muna lukutukunu, ayi kumbusa Mbambukulu moyo—​muingi tusadisa batu bobo badi ‘mintima mifuana’ mu baka mamboti mu nyengo beni.​—Mav. 13:48.

SADISA BATU BOBO BAVOLA MU KIPHEVE

17. Bue bakulutu balenda sadisila batu bobo bavola mu kipheve? (Yehezekieli 34:12, 16)

¹⁷ Mu tsungi Mbambukulu moyo, bue bakulutu balenda sadisila batu bobo bavola mu kipheve? Bafueti kubatudila thalu mu luzolo loso. (Tanga Yehezekieli 34:12, 16.) Tuamina Mbambukulu moyo yiba, ba sikididi ki tedisa batu beni enati diluaku didi. Wubamonisa ti weta kubazola buwombo ayi widi na phuila yi kubasadisa mu phila yo wulenda nungina. Wubatedisa biza mu Mbambukulu moyo. Enati bizidi muingi bakutakana wubayambila mu zanti yoso. Kumanima ma Mbambukulu moyo, tutatamana solula ayi bakhomba beni bana mu luzolo loso ayi kubavana lusadusu lolo lufueni muingi bavutukila Yehova.​—1 Pi. 2:25.

18. Bue wumosi mosi mu beto kalenda sadisila batu bobo bavola mu kipheve? (Loma 12:10)

¹⁸ Beto boso mu kimvuka tulenda sadisa batu bobo bavola mu kipheve bakutakana mu Mbambukulu moyo. Mu phila mbi? Mu kubamonisina luzolo, zanti, ayi luzitu. (Tanga Loma 12:10.) Lubambuka moyo ti mamemi  beni mana malenda mona tsoni mu kuiza kulukutukunu. Nanga balenda mona tsisi mu yindula ti bedi kubayamba ko bumboti. e Tukeba kubafuisa tsoni mu kubayuvula biuvu biobi bilenda kubatula keti keti voti mu vana mimvutu voti biuvu biobi bilenda kubalueka. (1 Tes. 5:11) Babakala ayi baketo beni badi bakhomba zieto bakristu. Tuidi mu mayangi mu bue kutakana yawu va kimosi!​—Nku. 119:176; Mav. 20:35.

19. Mamboti mbi makala mu bambukilanga lufua lu Yesu moyo?

¹⁹ Wulenda yituka mu zaba ti Yesu wubaka zikhubukulu mu diambu di tutulanga Mbambukulu moyo yi lufua luandi kadika mvu? Mu thangu tueta butudila, mu ziphila ziwombo tueta kububakila mamboti beto veka ayi batu bankaka. (Yes. 48:17, 18) Tueta yonzula luzolo lueto lolo tuidi kuidi Yehova ayi Yesu. Tueta monisa phutudulu matondo mu mo batuvangila. Tueta yonzula nguizani ayi bakhomba zieto bakristu. Ayi tulenda sadisa batu bankaka bazaba bue bawu phe balenda bakila mamboti mu khudulu. Ayi tuvanga mamoso momo tulenda vanga muingi tuba bakubama mu lumbu ki Mbambukulu moyo​—kio kilutidi bilumbu bioso bimvu!