1. ¿Baʼaxten le Kʼaʼajsajiloʼ junpʼéel kʼiin jach especial? (Lucas 22:​19, 20).

 LE Kʼaʼajsajiloʼ letiʼe kʼiin maas kʼaʼanaʼan utiaʼal le máaxoʼob meyajtik Jéeobaoʼ tumen Jesús aʼalmil ka k-beete (xok Lucas 22:​19, 20). Yaʼab baʼax oʼolal k-tsʼíiboltik ka kʼuchuk le kʼiin jeʼeloʼ. Koʼoneʼex ilik jujunpʼéeliʼ.

2. ¿Baʼaxten jach k-tsʼíiboltik ka kʼuchuk u kʼiinil le Kʼaʼajsajiloʼ?

² Le Kʼaʼajsajiloʼ ku yáantkoʼon tuukul tiʼ le u tojol u kuxtal tu kʼubaj Jesúsoʼ. Ku kʼaʼajsik xan toʼon bix jeʼel u páajtal k-agradecertik le sacrificio tu beetoʼ (2 Cor. 5:​14, 15). Teʼ kʼiin xan jeʼeloʼ ku páajtal k-antal yéetel le sukuʼunoʼob «utiaʼal k-paklan líiʼsik k-óol[oʼ]» (Rom. 1:12). Tsʼoʼoleʼ cada añoeʼ yaʼab tiʼ le inactivoʼob wa náachchajaʼanoʼob tiʼ Jéeobaoʼ kéen u yiloʼob bix u yeʼesaʼal yaabilaj tiʼobeʼ ku chʼaʼtuklikoʼob u kaʼa adorarkoʼob Jéeobaoʼ. Yaʼab xan tiʼ le máaxoʼob túumbenoʼoboʼ jach jatsʼuts u yilkoʼob baʼax ku yúuchul teʼ Kʼaʼajsajiloʼ bey xan le baʼax ku tsoʼololoʼ. Yoʼolal leloʼ ku káajal u xokikoʼob le Bibliaoʼ. Tuláakal le baʼaloʼobaʼ ku beetik k-ilik jach importante le Kʼaʼajsajiloʼ.

3. Le Kʼaʼajsajiloʼ, ¿bix u yáantkoʼon k-il bix u múul meyaj u kaajal Jéeoba? (Ilawil xan le fotooʼ).

³ Jach k-tsʼíiboltik ka kʼuchuk xan le kʼiin jeʼelaʼ tumen ku muchʼtal u kaajal Jéeoba. Tiʼ tuláakal yóokʼol kaabeʼ u  testigoʼob Jéeobaeʼ ku muchʼkubaʼob le kéen chíinik kʼiin teʼ tuʼux kajaʼanoʼoboʼ. Tuláakloʼoneʼ k-uʼuyik junpʼéel discurso tuʼux ku tsoʼolol u kʼaʼanaʼanil le baʼax tu beetaj Jesúsoʼ. K-kʼayik kaʼapʼéel kʼaayoʼob, ku máansaʼal le waaj yéetel le vinooʼ yéetel k-aʼalik xan «amén» tiʼ le kanpʼéel oraciónoʼob ku beetaʼaloʼ. Tiʼ 24 horaseʼ tuláakal le múuchʼuliloʼob ku beetkoʼob lelaʼ. Chéen máans ta tuukul bix u yuʼubikuba Jéeoba yéetel Jesús le kéen u yiloʼob bix u alabartaʼaloʼob tiʼ tuláakal yóokʼol kaab.

4. ¿Baʼax ken k-il teʼ xookaʼ?

⁴ Teʼ xookaʼ yaan k-núukik le preguntaʼobaʼ: ¿Bix jeʼel k-preparartik k-puksiʼikʼal utiaʼal le Kʼaʼajsajiloʼ? ¿Bix jeʼel k-áantik u maasil utiaʼal ka u jóoʼsoʼob u yutsileʼ? ¿Bix jeʼel k-áantik le inactivoʼoboʼ? U núukil le preguntaʼobaʼ yaan u yáantkoʼon utiaʼal k-preparartikba utiaʼal le kʼiin jach kʼaʼanaʼanaʼ.

¿BIX JEʼEL K-PREPARARTIK K-PUKSIʼIKʼAL UTIAʼAL LE KʼAʼAJSAJILOʼ?

5. 1) ¿Baʼaxten kʼaʼabéet k-tuukul tiʼ le u kuxtal tu kʼubaj Jesúsoʼ? (Salmo 49:​7, 8). 2) Aʼal baʼax ta kanaj teʼ video ¿Baʼaxten kíim Jesús?

⁵ Junpʼéel bix jeʼel k-preparartik k-puksiʼikʼal utiaʼal le Kʼaʼajsajiloʼ letiʼe kéen tuukulnakoʼon tiʼ le u tojol u kuxtal tu kʼubaj Jesúsoʼ. Kʼaʼajaktoʼoneʼ chéen t-juunaleʼ maʼ tu páajtal k-boʼotik le bukaʼaj kʼaʼabéet utiaʼal k-salvartikba tiʼ le kʼeban yéetel tiʼ le kíimiloʼ (xok Salmo 49:​7, 8; ilawil xan le video ¿Baʼaxten kíim Jesús?). a Yoʼolal leloʼ Jéeobaeʼ tu chʼaʼtuklaj u túuxtik u Hijo utiaʼal u kíimil t-oʼolal (Rom. 6:23). Jach maʼ chéen chʼaʼabil le baʼax tu beetoʼoboʼ. Kéen tuukulnakoʼon tiʼ le baʼax tu beetaj Jéeoba yéetel Jesúsoʼ jach k-apreciartik le sacrificio tu beetoʼoboʼ. Beoraaʼ koʼoneʼex ilik jujunpʼéel tiʼ le baʼaxoʼob tu beetaj Jéeoba yéetel Jesús t-oʼolaloʼ. Pero yáaxeʼ yaan k-ilik baʼax táakaʼan ichil le boʼol beetaʼaboʼ.

6. ¿Baʼax ku béeytal úuchik u kʼubik u kuxtal Jesús?

⁶ Le u kuxtal Jesús tu kʼuboʼ letiʼe boʼol meyajnaj tiʼ Jéeoba utiaʼal u kaʼa manik le baʼax tu perdertaj Adánoʼ. Kʼaʼajaktoʼoneʼ Adáneʼ perfecto kaʼachi, pero le ka kʼebanchajeʼ tu perdertaj le kuxtal minaʼan u xuuloʼ yéetel tu luʼsaj xan tiʼ u paalal le jatsʼuts páajtalil jeʼelaʼ. Utiaʼal túun u kaʼa maʼanal le baʼax tu perdertaj Adánoʼ tu kʼubaj u kuxtal Jesús. Tiʼ tuláakal le tiempo kuxlaj Jesús way Luʼumeʼ «letiʼeʼ maʼ kʼebanchajiʼ yéetel mix junpʼéel tuus jóokʼ tu chiʼ» (1 Ped. 2:22). Como perfecto Jesús le ka kíimoʼ u kuxtaleʼ igual u tojol yéetel le kuxtal tu perdertaj Adánoʼ (1 Cor. 15:45; 1 Tim. 2:6).

7. Aʼal jujunpʼéel baʼaloʼob tu aktáantaj Jesús.

⁷ Le tiaʼan Jesús way Luʼumeʼ kex tu aktáantaj yaʼab baʼaloʼobeʼ mantatsʼ tu yuʼubaj u tʼaan Jéeoba, le u Taata yaan teʼ kaʼanoʼ. Tu paalileʼ tu yuʼubaj xan u tʼaan u papáʼob yaan way Luʼumeʼ, kex letiʼeʼ perfecto, chéen baʼaleʼ u papáʼobeʼ kʼeban máakoʼob (Luc. 2:51). Maʼ xaaneʼ tu táankelmileʼ sen aʼalaʼabtiʼ maʼ u yuʼubik u tʼaan u papáʼob yéetel ka u xúumpʼat Jéeoba. Le ka nojoch máakchajeʼ Satanás xaneʼ tu tsʼáaj a pruebail utiaʼal maʼ u chúukpajal u yóol tiʼ Jéeoba (Mat. 4:​1-11). Satanáseʼ jach u kʼáat kaʼach ka kʼebanchajak Jesús utiaʼal maʼ u boʼotik le baʼax tu perdertaj Adánoʼ.

8. ¿Baʼax uláakʼ baʼaloʼob tu muʼyajtaj Jesús?

⁸ Jesúseʼ yaan uláakʼ baʼax tu muʼyajtaj teʼ kʼiinoʼob táan u kʼaʼaytaj way Luʼumeʼ. Por ejemploeʼ chʼaʼpachtaʼab tumen u enemigoʼob yéetel aʼalaʼab yaan u kíimsaʼal (Luc. 4:​28, 29; 13:31). Tsʼoʼoleʼ Jesús xaneʼ tu aguantartaj le baʼaloʼob maʼ maʼalobtak ku beetik u discípuloʼoboʼ (Mar. 9:​33, 34). Teʼ juicio tuʼux aʼalaʼab yaan u kíimsaʼaloʼ loobiltaʼab yéetel  burlartaʼabi. Ka tsʼoʼokeʼ ka kíimsaʼab bey juntúul kʼasaʼan máakeʼ (Heb. 12:​1-3). Le jach taʼaytak xan u kíimsaʼaloʼ Jéeobaeʼ tu pʼataj Jesús utiaʼal u yeʼesik jeʼel u chúukpajal u yóol tak tu xuuleʼ (Mat. 27:46). b

9. ¿Baʼax k-uʼuyik yoʼolal Jesús le kéen tuukulnakoʼon tiʼ le sacrificio tu beetoʼ? (1 Pedro 1:8).

⁹ Jach koʼoj tu boʼotil Jesús le úuchik u salvarkoʼonoʼ. Le kéen tuukulnakoʼon tiʼ tuláakal le baʼax tu beetaj t-oʼolaloʼ ku kʼuchul k-yaabilte (xok 1 Pedro 1:8).

10. ¿Baʼax sacrificioil tu beetaj Jéeoba utiaʼal u salvarkoʼon tiʼ le kʼebanoʼ?

¹⁰ ¿Baʼax sacrificioil tu beetaj Jéeoba utiaʼal u salvarkoʼon tiʼ le kʼebanoʼ? Jeʼex k-ojliloʼ Jéeobaeʼ jach u yaabiltmaj Jesús u Hijo (Pro. 8:30). Le oʼolaleʼ máans ta tuukul bix wal tu yuʼubiluba le ka tu yilaj le baʼaxoʼob tu sen muʼyajtaj Jesúsoʼ. Maʼ xaaneʼ jach yaachaj u yóol le ka tu yilaj u maltratartaʼal, u yaʼalaʼaltiʼ baʼal yéetel u sufrir u Hijo.

11. ¿Baʼax ejemploil áantkoʼon k-naʼat bix tu yuʼubiluba Jéeoba le ka kíim u Hijooʼ?

¹¹ Le máaxoʼob tsʼoʼok u kíimil juntúul u hijoʼoboʼ u yojloʼob bix u yuʼubikuba le taatatsiloʼob kéen u aktáantoʼob junpʼéel baʼal beyaʼ. Kex k-ojel yaan u kaʼa kuxtal le kimenoʼoboʼ, leloʼ maʼ u kʼáat u yaʼal wa maʼ tu yaatal k-óol le kéen kíimik juntúul máax k-yaabiltmiʼ. Le ejemploaʼ ku yeʼesiktoʼon xan bix tu yuʼubiluba Jéeoba le ka tu yilaj u muʼyaj yéetel u kíimil u Hijo teʼ año 33 (Mat. 3:17). c

12. ¿Baʼax jeʼel u páajtal k-beetik antes tiʼ u kʼuchul u kʼiinil le Kʼaʼajsajiloʼ?

¹² Desde beoraaʼ, ¿baʼaxten maʼ ta jóoʼsik tiempo utiaʼal a xakʼaltik chéen ta juunal wa teʼ adoración ich familia le baʼax tu beetaj Jéeoba yéetel Jesús utiaʼal u boʼotkoʼob k-kʼebanoʼoboʼ? Utiaʼal leloʼ meyajnaktech Áantaj utiaʼal u xakʼalxook u testigoʼob Jéeoba wa uláakʼ publicaciónoʼob jeʼel u tsolkoʼobtech u maasileʼ. d Tsʼoʼoleʼ jeʼel u páajtal xan a xokik le programa beetaʼan utiaʼal a xokik le Biblia utiaʼal le Kʼaʼajsajil ku chíikpajal teʼ Kuxtal yéetel Meyaj jeʼex Cristoeʼ | U juʼunil xook utiaʼal le muchʼtáambaloʼ. Tsʼoʼoleʼ maʼ u tuʼubultech xan a wilik le adoración de jaʼatskab beetaʼan utiaʼal u kʼiinil le Kʼaʼajsajiloʼ. Wa k-preparartik k-puksiʼikʼal utiaʼal le kʼiin jach especialaʼ jeʼel u páajtal k-áantik u maasil utiaʼal k-jóoʼsik u yutsileʼ (Esd. 7:10).

 ÁANT U MAASIL UTIAʼAL KA U JÓOʼSOʼOB U YUTSIL

13. ¿Baʼaxoʼob jeʼel u páajtal k-beetik utiaʼal k-áantik u maasil u jóoʼsoʼob u yutsil le Kʼaʼajsajiloʼ?

¹³ ¿Bix jeʼel k-áantik u maasil utiaʼal ka u jóoʼsoʼob u yutsil le Kʼaʼajsajiloʼ? Yáaxeʼ kʼaʼabéet k-invitarkoʼob. Utiaʼal leloʼ kʼaʼabéet k-tʼoxik le invitaciónoʼob kéen jóokʼkoʼon kʼaʼaytajoʼ yéetel maʼalob xan ka k-beet u listail u kʼaabaʼ le máaxoʼob taak k-invitarkoʼoboʼ. Jeʼel u páajtal k-invitartik k-láakʼtsiloʼob, k-éet meyajoʼob, k-éet xookoʼob yéetel le uláakʼ máakoʼob k-kʼaj óoloʼoboʼ. Wa ku xuʼupul le invitaciónoʼob tsʼaʼantoʼonoʼ jeʼel u páajtal k-túuxtik le electrónicooʼ. Maʼ xaaneʼ yaʼab tiʼ le máaxoʼob ta invitartaj kun binoʼoboʼ (Ecl. 11:6).

14. ¿Baʼax ejemploil eʼesik maʼ chéen kunel k-invitartik u maasiliʼ?

¹⁴ Maʼ unaj k-tuklik wa chéen kunel k-invitartik u maasiliʼ. Juntúul kiikeʼ jaʼakʼ u yóol le ka aʼalaʼabtiʼ tumen u yíicham yaan u bin teʼ Kʼaʼajsajiloʼ (u yíichameʼ maʼ Testigoiʼ). ¿Baʼaxten jaʼakʼ u yóol le kiikoʼ? Tumen letiʼeʼ tsʼokaʼaniliʼ u invitartik u yíicham yaʼab u téeneleʼ, pero mix juntéen u yóot bin. ¿Baʼax beet u kʼexik u tuukul? U yíicham le kiikoʼ tu yaʼaleʼ invitartaʼab tumen juntúul anciano u kʼaj óol. Desde teʼ año jeʼeloʼ u yíicham le kiikoʼ ku bin teʼ Kʼaʼajsajiloʼ.

15. ¿Baʼax unaj k-chʼaʼik en cuenta le kéen k-invitart wa máax teʼ Kʼaʼajsajiloʼ?

¹⁵ Maʼ xaaneʼ yaan invitadoʼobeʼ yaan baʼaxoʼob taak u yojéeltikoʼob, maases wa mix juntéen xiʼikoʼob tiʼ junpʼéel reunión. Le oʼolaleʼ maʼalob ka k-tukult bey baʼaxoʼob jeʼel u páajtal k-núukiktiʼobeʼ (Col. 4:6). Maʼ xaaneʼ jeʼel u kʼáatkoʼobeʼ: «¿Baʼax ku beetaʼaliʼ? ¿Bukaʼaj tiempo ku xáantal le reuniónoʼ? ¿Baʼax nookʼil kʼaʼabéet in búukintik? ¿Ku boʼotik wa u yokol máakiʼ? ¿Ku kʼáatal wa taakʼiniʼ?». Jeʼel u páajtal k-kʼáatik tiʼ le máaxoʼob k-invitarmoʼob wa yaan baʼax taak u yojéeltikoʼoboʼ yéetel ka k-núuktiʼob. Jeʼel u páajtal xan k-eʼesiktiʼob le videoʼob Kʼaʼajs úuchik u kíimil Cristo yéetel ¿Bix le muchʼtáambaloʼob ku beetaʼal teʼ Najil Reinooʼ? Jeʼel u páajtal xan k-xakʼaltik tu yéeteloʼob le xook 28 yaan teʼ libro ¡Disfrutart le Kuxtaloʼ!

16. ¿Baʼaxoʼob jeʼel u taaktal u yojéeltik le máaxoʼob yáax u binoʼob teʼ Kʼaʼajsajiloʼ?

 ¹⁶ Le kéen tsʼoʼokok le Kʼaʼajsajiloʼ maʼ xaaneʼ yaan tiʼ le máaxoʼob yáax u binoʼoboʼ yaan baʼal ku taaktal u yojéeltikoʼob. Maʼ xaaneʼ jeʼel u kʼáatkoʼobtech baʼaxten mix máak (wa baʼaxten óoliʼ mix máak) jaant le waaj wa ukʼ le vinooʼ. Maʼ xaaneʼ jeʼel xan u kʼáatkoʼobeʼ cada baʼax kʼiin tu beetaʼal le Kʼaʼajsajiloʼ. Jeʼel xan u taaktal u yojéeltikoʼobeʼ wa igual baʼax ku beetaʼal tiʼ tuláakal le muchʼtáambaloʼoboʼ. Kex teʼ discurso ku tsoʼolol yaʼab tiʼ le baʼaloʼobaʼ maʼ xaaneʼ le máaxoʼob yáax u binoʼoboʼ yaan u kʼaʼabéettal a tsoliktiʼob u maasil. Utiaʼal a núukik jujunpʼéel tiʼ le preguntaʼob ku beetkoʼoboʼ jeʼel u páajtal u meyajtech le xook «¿Baʼaxten u testigoʼob Jéeobaeʼ jelaʼan bix u beetkoʼob u Cena Yuumtsil tiʼ u maasil religiónoʼoboʼ?», lelaʼ tiaʼan teʼ jw.org. Kéen tsʼoʼokok le Kʼaʼajsajiloʼ toʼoneʼ taak k-beetik tuláakal le ku páajtal utiaʼal k-áantik «le máaxoʼob jach tu jaajil u yóol» taak u jóoʼskoʼob u yutsil le kʼiin jach especialaʼ (Hech. 13:48).

ÁANT LE INACTIVOʼOBOʼ

17. ¿Bix jeʼel u yáantaʼal le inactivoʼob tumen le ancianoʼoboʼ? (Ezequiel 34:​12, 16).

¹⁷ Tu kʼiiniloʼob le Kʼaʼajsajiloʼ, ¿bix jeʼel u yáantik le ancianoʼob le inactivoʼoboʼ? Letiʼe ken u yeʼesoʼob jach tu jaajil taak u yáantkoʼoboʼ (xok Ezequiel 34:​12, 16). Ancianoʼex, antes tiʼ le Kʼaʼajsajiloʼ ilawil a tʼankeʼex wa a xíimbaltikeʼex tuláakal le inactivoʼob a kʼaj óoleʼexoʼ. Aʼaleʼextiʼobeʼ ka preocuparkabaʼex tu yoʼolaloʼob yéetel jach tu jaajil taak a wáantkeʼexoʼob. Invitarteʼexoʼob utiaʼal le Kʼaʼajsajiloʼ, yéetel wa ku binoʼobeʼ kʼameʼexoʼob yéetel yaabilaj. Kéen tsʼoʼokok le Kʼaʼajsajiloʼ ilawil u seguer a xíimbaltikeʼexoʼob yéetel a tʼankeʼexoʼob. Tsʼáaʼex le áantaj kʼaʼabéettiʼob utiaʼal u suutoʼob tu yiknal Jéeobaoʼ (1 Ped. 2:25).

18. Le sukuʼunoʼob yanoʼob teʼ múuchʼuliloʼ, ¿bix jeʼel u yáantkoʼob le inactivoʼoboʼ? (Romanos 12:10).

¹⁸ Tuláakal le sukuʼunoʼob yanoʼob teʼ múuchʼuliloʼ jeʼel u páajtal u yáantkoʼob le inactivoʼob ku binoʼob teʼ Kʼaʼajsajiloʼ. ¿Bix jeʼel u beetkoʼobeʼ? Letiʼe kéen u yeʼesoʼob yaabilaj,  utsil yéetel respeto tiʼoboʼ (xok Romanos 12:10). Kʼaʼajaktoʼoneʼ u mejen tamanoʼob Jéeoba saatloʼoboʼ maʼ chéen chʼaʼabil u yilik u binoʼob reunióniʼ. Maʼ xaaneʼ letiʼobeʼ ku tuklikoʼob bix wal kun kʼambiloʼob tumen le sukuʼunoʼoboʼ. e Le oʼolaleʼ maʼ unaj k-kʼáatiktiʼob baʼaloʼob jeʼel u beetik u suʼlaktaloʼobeʼ mix unaj k-beetik baʼaloʼob jeʼel beetik u yaatal u yóoloʼobeʼ (1 Tes. 5:11). Letiʼobeʼ láayliʼ k-sukuʼunoʼobeʼ yéetel jach kiʼimak k-óol k-adorartik Jéeoba tu yéeteloʼob (Sal. 119:176; Hech. 20:35).

19. ¿Baʼax utsiloʼob ku taasik le Kʼaʼajsajiloʼ?

¹⁹ K-tsʼáaik u graciasil tiʼ Jesús úuchik u yaʼaliktoʼon ka k-kʼaʼajs le kʼiin ka tu tsʼáaj u kuxtal t-oʼolaloʼ. Lelaʼ jach ku taasik yaʼab utsiloʼob tiʼ toʼon bey xan tiʼ uláakʼ máakoʼob (Isa. 48:​17, 18). Ku yáantkoʼon xan utiaʼal ka k-maas yaabilt Jéeoba bey xan Jesús. Tsʼoʼoleʼ yoʼolal lelaʼ ku páajtal xan k-tsʼáaik u graciasil tiʼ Jéeoba yéetel tiʼ Jesús yoʼolal le baʼaxoʼob ku beetkoʼob t-oʼolaloʼ. Ku beetik k-muchʼikba yéetel le sukuʼunoʼoboʼ yéetel ku tsʼáaik tuʼux k-áantik uláakʼ máakoʼob utiaʼal u kankoʼob baʼax jeʼel u beetkoʼob utiaʼal u disfrutarkoʼob le bendiciónoʼob ku taasik le u kuxtal tu kʼubaj Jesúsoʼ. Le oʼolaleʼ unaj k-beetik tuláakal le ku páajtal utiaʼal k-preparartikba utiaʼal le Kʼaʼajsajiloʼ, le kʼiin maas especial tiʼ le añooʼ.