1. ¿Xigony Memorial nac dzú ni más rasac? (Lucas 22:19, 20).

 PAR xpiin Jehová, Memorial xtuny xcalgoity Cristo nacni toib dzú ni más rasac. Ndeʼ nac toibguielot lanii ni Jesús buny mandary ñonyno (bíil Lucas 22:19, 20). ¡Ma raniiny lóono guidxin dzúcu ni rasacgoluʼ! ¿Xigony? Guibiʼno tipnés razón.

2. ¿Xí tipnés razón noʼ por ni ma nainy lóono guidxin Memorial?

² Memorial racnéni lóono par gonyno pensary balaati rasac ni goity Jesús por lóono. Ronyni que guisetnaladxno tipnés mod ni labúu guislooyno balaati radudyno guixquix por xcalgoity Jesús (2 Cor. 5:14, 15). Láaca radudyni lagary lóono guiguaʼno né xhermanno né gony animarno saʼno (Rom. 1:12). Guirá íz, xidal inactivos riee Memorial, né tipnésyibu rioʼ gan xcalnabanyibu par guibiguetyibu ronoʼ Jehová, por galrronladx ni raslooy herman layibu cu. Láaca, xidal buñ radziguiaʼ por ni rabiʼyibu né racadiagyibu ló Memorial, né ragoʼyibu guicyibu salóyibu guisuidyibu la Biblia. Por guirá ndeʼ, nigolú rasac Memorial par lóono.

3. ¿Ximod nac Memorial toib oportunida par guibiʼno ximod xcudx Jehová raguaʼ toibsi? (Láaca bibiʼ retrat).

³ Láaca racladxno guidxin dzúcu, portín nacni toib oportunida par guibiʼno ximod xcudx Jehová raguaʼ toibsi. Ló guidopynac Gudxlio, testigos xtuny Jehová radop conforma cayaʼisy govitz tigaaga lagary. Guiráno racadiagno toib discurs ni rabeʼ loguiaʼ balaati rasac xcalgoity Jesús, rony cantarno chop canción, ratudyno páa né vino, né ranino né xcalnabanyno «amén» ló tap oración ni rac. Órni guisaʼ 24 ór, guirá congregación ma buny  ngúca. ¿Ronyno pensary balaati rioʼ nakit Jehová né Jesús órni rabiʼyibu que guiráno cayony xiroʼno layibu ló guidopynac Gudxlio ja?

4. ¿Xí guisuidyno ló artículo reʼ?

⁴ Ló artículo reʼ sacapyno guirá galrranabdiitz reʼ: ¿ximod labúu coʼno puext xcalnabanyno par Memorial?, ¿ximod labúu gacnéno stipnés buñ par láaca gacné Memorial layibu? né ¿ximod labúu gacnéno inactivos? Ni guisuidyno mod rabexa guirá galrranabdiitz reʼ, sacnéni lóono tzoʼno puext par dzúcu ni nigolú rasac.

¿XIMOD LABÚU COʼNO PUEXT XCALNABANYNO PAR MEMORIAL?

5. a) ¿Xigony non gonyno pensary balaati rasac xcalgoity Jesús? (Salmo 49:7, 8). b) Bisetlaa xi bisuidylo ló video ni laa ¿Xigony goity Jesús?

⁵ Toibtica mod ni más rasac ni labúu coʼno puext xcalnabanyno par Memorial, láani ngú gonyno pensary balaati rasac xcalgoity Jesucristo. Por stiplóocano dipa labúu nalaano de galkié né galgoity (bíil Salmo 49:7, 8; láaca bibiʼ video ni laa ¿Xigony goity Jesús?). a Por ngú, Jehová goniʼ que Xiimbu ni ronladxgoluʼbu ñaity por lóono, né guiropcayibu nigolú car godixyibu (Rom. 6:23). Laʼga más gonyno pensary ló ni buny Jehová né Jesús por lóono, más sasac xcalgoity Jesús par lóono. Nigoreʼ, guibiʼno tipnés cós ni Jehová né Jesús goyoʼ puext ñony por lóono. Per, nír guinino xi guirá godiña xcalgoity Cristo.

6. ¿Xí guirá godiña xcalgoity Cristo?

⁶ Rescate radudyni diitz ni raguiix buñ par siʼ toib cós o par guicaʼbu cós ni bisnitbu. Primer buñguieeu, Adán, diti gopbu galkié órni bisaʼ Jehová láabu. Per, órni bichébu, bisnitbu oportunida ni nabanybu tipzó né láaca goleʼbu oportunida cu a guirá xiimbu. Par labúu nasiʼ Jehová ni bisnit Adán stoib, Jesús bunycuentbu xcalnabanybu ni diti nap galkié. Ló guirá íz ni bibanybu ló Gudxlio, Jesús «diti bunybu galkié nili biscúbu» (1 Ped. 2:22). Órni goitybu diti gopbu galkié, por ngú xcalnabanybu gosacni midid ni gosac galnabany ni bisnit Adán (1 Cor. 15:45; 1 Tim. 2:6).

7. Bisetlaa tipnés prueby ni cualó Jesús.

⁷ Laʼga goyoʼbu ló Gudxlio, bisobbu Bixiosbu ló guirá cós ná cualóbu xidal prueby. Dzú gócbu mbiox, bisobbu bixiosbu né xinaʼbu ni góc buñ galkié, ná láabu diti gopbu galkié (Luc. 2:51). Dzú gócbu mbioxhlasien, pentzi bikíil buñ láabu par diti nasobbu bixiosbu né xinaʼbu o nasiambu Jehová, per buny guantarybu prueby cu. Né dzú ma nigoxbu Buñdzab biyopy mod par nachébu né nasiambu Jehová, per Jesús cualó láabu (Mat. 4:1-11). Buñdzab goloʼ guic ñony que naché Jesús par diti labúu ñax ni bisnit Adán.

8. ¿Xí stipnés prueby buny guantary Jesús?

⁸ Laʼga bunybu Xchiin Jehová, Jesús buny guantary stipnés prueby. Por ejemplo, xi enemigbu cuanal né goniiny nagaity láabu (Luc. 4:28, 29; 13:31). Láaca cualóbu tipnés galnagan né xpiimbu portín gocyibu buñ galkié (Mar. 9:33, 34). Ro góc juzgarbu, né ro goniʼ buñcu que non gaitybu, buñ nigolú bunynaa, né bixiichyibu Jesús. Después bigaityibu Jesús xomod toib buñ mal né godudybu ló  galrrioʼob rodann (Heb. 12:1-3). Né, órni ma yaca gaitybu, Jehová ma diti gocné láabu, por ngú ro ma guilox prueby ni cualóbu ma por stipláacabu buny guantarybu láani (Mat. 27:46). b

9. ¿Xí rasacno órni ronyno pensary ló guirá ni buny Jesús por lóono? (1 Pedro 1:8).

⁹ Riendxichni que Jesús nigolú car godixbu par nalaabu lóono. Órni ronyno pensary ló guirá ni Jesús goyoʼ puext ñony por lóono, xcalnabanyno nigolú nadxiʼ láabu (bíil 1 Pedro 1:8).

10. ¿Xí láani goyoʼ puext Jehová ñonycuent par labúu nalaabu lóono?

¹⁰ ¿Xí láani goyoʼ puext Jehová ñonycuent par labúu nalaa Jesús lóono? Mod ma nanno, diti noʼ chú radzak saʼ xomod radzak Jehová Xiin (Prov. 8:30). Por ngú gonyno pensary ximod gosac Jehová órni bibiʼbu Jesús cadudy por xidal prueby reʼ ló Gudxlio. Nigolú bioʼobni Jehová ni bibiʼbu ximod bunynaa, bibixladx né bitudy buñ Xiimbu ló galrrioʼob.

11. ¿Xí ejemplo racné lóono par guientzaayno ximod gosac Jehová órni bibiʼbu buñ bigaity Jesús?

¹¹ Buñ ni ma bisnit xiin ló galgoity nanyibu balaati rioʼobni. Ná napno fe que siás buñ ni ma goity, ngú diti rabeʼ galrrioʼob ni rasacno órni raity buñ ni nadxiʼno. Ejemplo reʼ racnéni lóono guientzaayno ximod gosac Jehová dzúcu ló íz 33, órni bibiʼbu Xiingaʼnbu godudy ló galrrioʼob né goity (Mat. 3:17). c

12. ¿Ximod labúu guiquintzayno tiemp ni cayatz par guidxin Memorial?

¹² ¿Xigony diti raquintzaylo tiemp ni cayatz par guidxin Memorial par guisuidylo más de xcalgoity Jesús órni guisuidylo xquiichlo toiblo o né xfamilo? Biquiin Ni gacné a testigos xtuny Jehová guisuidyibu la Biblia o tipnés publicaciones par ganlo más de tema reʼ. d Láaca, bíil textos ni non goʼol buñ par Memorial ni rarecaa ló Ni non gonyno ló reunión Mod nabanyno né mod ronyno Xchiin Dios. Né diti guialadxlo guibiʼlo adoración matutina ni guireʼ par xtzú Memorial. Pal ragoʼno puext xcalnabanyno par lanii reʼ, labúu sacnéno stipnés buñ par gacné Memorial layibu (Esd. 7:10).

 GACNÉNO STIPNÉS PAR LABÚU GACNÉ MEMORIAL LAYIBU

13. ¿Xí primer non gonyno par gacnéno buñ gacné Memorial layibu?

¹³ ¿Ximod labúu gacnéno stipnés par labúu gacné Memorial layibu? Primer ni non gonyno láani ngú, guiruʼno layibu. Diti nosi guidudyno invitación buñ órni tzoʼno yoʼ por yoʼ, láaca labúu gonyno toib lista ro guicaʼno laa buñ ni nainy guiruʼno, xomod xfamilno, buñ ni ronynéno dxiin, buñ ni rinéno scuel né stipnés buñ ni rimbuno. Pal raraa invitación ni bireʼ ló guiich, labúu guixelno toib enlace ronoʼ buñ par guibiʼbu láani ló internet. ¡Chú nan balaati buñ guisaguel guidxin! (Ecl. 11:6).

14. ¿Xí experiencia raslooy que nigolú rasac guidudyno invitación buñ?

¹⁴ Dipa gonylo pensary que diti noʼ pu raquiin guidudylo invitación buñ. Toibtica dzú, toib hermana nigolú bidziguiaʼbu órni tzeelbu ni diti nac Testigo, góoch láabu que sieebu Memorial. ¿Xigony bidziguiaʼbu? Portín hermana reʼ ma xidal buelt gonabbu tzeelbu ñee né láabu Memorial, per tzeelbu diti gosaguel. ¿Xigony bitzaʼbu mod bunybu pensary? Tzeelbu góoch láabu que toib anciano ni rimbubu bidudy toib invitación láabu. Tzeʼel hermana reʼ goyee Memorial ízcu né xidal íz más.

15. ¿Xí non guisetnaladxno órni raruʼno buñ par tzee Memorial?

¹⁵ Guisetnaladxno que, órni raruʼno buñ par tzee Memorial, labúu gapbu xidal galrranabdiitz, né máspa la, pal ni toib buelt ma goyeebu reunión. Por ngú galán láani gonyno pensary xi galrranabdiitz labúu gapbu né ximod guicapyno láani (Col. 4:6). Por ejemplo, pentzi guinabdiitzbu láacabu: «¿Xí rac ló Memorial? ¿Balac ór raclani? ¿Xí clas lairy guaca? ¿Raguiix buñ par tzoʼ la? ¿Ranabyibu bidxiich la?». Por ngú labúu guinabdiitzno buñ ni guiruʼno pal napbu  toib galrranabdiitz né cuéxano ni nainy ganbu. Láaca labúu guiquiinno videos ni laa Guisetnaladxno xcalgoity Jesús né ¿Ximod rac xireuniondo? Láaca, lesiony 28 de libro Bibany goxtiguie napni tipnés cós ni labúu gaibyno buñcu.

16. ¿Xí stipnés galrranabdiitz labúu gap toib buñ ni riee Memorial?

¹⁶ Después ni tzeebu Memorial, sigory sapbu más galrranabdiitz. Pentzi guinabdiitzbu xigony ni toib (o chop tzónsi) buñ godó páa né goʼ vino. Láaca labúu guinabdiitzbu láacabu balac tiemp radudy par tzoʼ Memorial stoib. Né pentzi guiniiny ganbu pal ló guirá reunión rac ngúca. Ná ló discurs ni radudy ló Memorial rasetlani xidal cós, pentzi saquiin cuéxano láani más. Par guicapyno tipnés galrranabdiitz ni gapbu, labúu guiquiinno artículo ni noʼ ló jw.org, «¿Xigony testigos xtuny Jehová diti ronyibu xilanii xcalgoity Jesús xomodpa rony stipnés religión láani?». Raniiny gonyno rutirigaʼlni lóono, antes, ló Memorial né después, par gacnéno buñ ni guisaguel par labúu gacné Memorial layibu (Hech. 13:48).

GACNÉNO INACTIVOS

17. ¿Ximod labúu gacné ancianos a guirá inactivos? (Ezequiel 34:12, 16).

¹⁷ ¿Ximod labúu gacné ancianos a guirá inactivos órni gac Memorial? Guislooyibu que rioʼyibu galrrasaʼ por layibu né guislooyibu galrronladx (bíil Ezequiel 34:12, 16). Ancianos, antes de guidxin Memorial, colguininé a guirá inactivos. Colgaiby layibu que rioʼto xcalrrasaʼyibu né que nainy gonyto rutirigaʼlni lóoto par gacnéto layibu. Colguiruʼ layibu par tzeeyibu Memorial, né pal radxinyibu, colguicacuent layibu né galnadxiʼ. Órni ma godudy Memorial, colguininé xhermanno ni nac inactivo, né colgacné layibu ló sentido espiritual par guibiguetyibu ronoʼ Jehová (1 Ped. 2:25).

18. ¿Ximod labúu gacnéno inactivos? (Romanos 12:10).

 ¹⁸ Guidopy congregación láaca labúu gacnéno xhermanno ni nac inactivo ni tzee Memorial. ¿Ximod? Cobiono layibu né galnadxiʼ, galnatzaay né respet (bíil Romanos 12:10). Guisetnaladxno que guirá xilieencu ni Jehová ronladx, pentzi gosac naganyibu ñeeyibu reunión stoib. Pentzi goyoʼyibu galrrasaʼ por mod nagobioo herman layibu. e Por ngú, diti guinabdiitzno ni guinino xitcal ni labúu gony que guisacyibu mal (1 Tes. 5:11). Layibu nacsayibu xhermanno ni ronladxno, né rabaladxno portín rony adorarno Jehová né layibu stoib (Sal. 119:176; Hech. 20:35).

19. ¿Xí tipnés galnasác racaʼno por ni rasetnaladxno xcalgoity Jesús?

¹⁹ Por ni ma bisuidyno guirá ndeʼ, diti radziguiaʼno que Jesús buny mandary nasetnaladxno xcalgoitybu guirá íz. Ni ronyno láani racnéni lóono né stipnés buñ de xidal mod (Is. 48:17, 18). Racnéni lóono gandxiʼno más Jehová né Jesús. Radudyni oportunida lóono par guislooyno balaati radudyno guixquix por ni bunyibu por lóono. Ronyni que guiguaʼno toibsi né xhermanno né racnéno stipnés buñ par ganyibu xi raquiin gonyibu par guicaʼyibu guirá galnasác ni radudy xcalgoity Jesús. Por ngú, gonyno rutirigaʼlni lóono por tzoʼno puext par Memorial, toib dzú ni más rasac.