O roma kalomahadan a serangawan, misakaretengay to faˈinayan, misakahmaway to fafahiyan. Ci Hans i Polifia mala kasakilac kantok, sanay cingra: “Itiniay i sakakaay ko faˈinayan sanay a kalomahadan, ikor mararawayto ko pinengneng to fafahiyan.” b Ci Sengsiyen, i Taiwanay a malohemay malitengay, sanay cingra: “I kalomahadan ako, o fafahiyan cowa ka ngaˈay micapid to demak no faˈinayan, anca ano malalengo ko faˈinayan to demak i, cowa ka ngaˈay pahadaken ko fafahi to sapaini. Ano mihadak ko faˈinayan to harateng no fafahiyan i, misakahmawan no tao cingra.” O roma faˈinayan paihkalay to misakahmaw to fafahiyan, tinakoen tano mipelesay to fafahiyan a sasowalen pakatawa to tao.

O kahemekan i, ano masamaanayto a serangawan molahad ko tamdaw i, oha ngangaˈay cingra misalof to misakahmaway to fafahiyan a harateng. (Ifiso 4:​22-​24) Sapihaenaw to demak i, oha mamitodong to taˈarawan ni Yihofa. Oniya lalakaw wa milengo to samaanay ci Yihofa minengneng to fafahiyan, o faˈinayan salikaka sasamaan mitodong ci Yihofaan micada to fafahiyan, ato malohemay malitengay sasamaan talaˈayaw a misakareteng mikangodo to fafahiyan salikaka.

SAMAANAY CI YIHOFA MINENGNENG TO FAFAHIYAN?

Sidaˈitay ci Yihofa a micada to fafahiyan, patirengay to malefotay a taˈarawan no mita. O sidaˈitay Wama Cingra, ciharatengay maolah to polong a wawa Ningra. (Yohani 3:​16) Madimadiay a fafahiyan salikaka, sahto o misaodoˈan ni Yihofa a wawa. Dotoc mamilengo kita, samaanay ci Yihofa itini pina pakayraan patalahkal to misakaretengay to fafahiyan.

 Masadafdafay ko pinengneng Ningra to fafahiyan. Palecadan ni Yihofa to Niyah a misangaˈ ko faˈinayan ato fafahiyan. (Satapangan 1:​27) Cowa ka pikiriwiˈ a citaneng ko faˈinayan a masangaˈ Ningra a misakakinih to fafahiyan. (2 Rayray 19:⁠7) Pafelian Ningra ko faˈinayan ato fafahiyan to mahecaday a inaneng misimsim, ho cipinang cangra to Kimad no Fangcalay Cudad, halo mitodong to makapahay a capeling Ningra. Ano faˈinayanto, fafahiyanto, o pakasoˈlinayho ci Yihofaan, misalimlaan ni Yihofa maemin. O roma sa i, ano faˈinayanto, fafahiyanto pairaan ni Yihofa ko hatokel nangra midaˈoc maˈorip i lakoing, atoya tatayra i kakarayan mamala hongti ato saysi. (2 Pitiro 1:⁠1) Itiniay mahapinang ita, cowa ka pisakahmaw ci Yihofa to fafahiyan.

Mitengilan Ningra ko sowal nangra. Ciharatengay ci Yihofa to nafalocoˈan no fafahiyan ato malifaay nangra a pasangar. Tinakoen, mitengilan ni Yihofa ko satolon ni Rakil aci Hana, hanaca pacaˈofay cangranan. (Satapangan 30:22; 1 Samuil 1:​10, 11, 19, 20) Mikayatan Ningra ko tamdaw miˈoning i Fangcalay Cudad to mitengilay ko faˈinayan to sapaini no fafahiyan. Tinakoen, palimoˈotan ni Yihofa ci Apraham, papidoedo a mitengil to sowal no fafahi ci Sara. (Satapangan 21:​12-​14) Hongti ci Tafiti mitengilay to sowal ni Apikail, hato o miocoran ni Yihofa ci Apikail a mirikec cingranan saan miharateng. (1 Samuil 25:​32-​35) O malefotay ko pitodong to kakarayan Wama a Yisan, mitengilay to harateng no wina ningra ci Mariya. (Yohani 2:​3-​10) Itini mahapinangay ita, mikangodoay ci Yihofa to fafahiyan, makahi a mitengil to sowal nangra.

Pakasoˈlinay Cingra to fafahiyan. Tinakoen, pakasoˈlinay ci Yihofa ci Ifaan, papikalacafay cingranan to faˈinay ci Ataman a midimokos to cikiw. (Satapangan 1:​28) Onini paihkalay to iraay ko inaneng ni Ifa toha ngangaˈay padama to faˈinay, sanay ko pinengneng ni Yihofa. Pakasoˈlinay ci Yihofa to fafahiyan a pairasolay ci Tipora aci Hulta, mihayi cangranan mikayat to finawlan no Kawas, mahawpay ko hongti ato saysi. (Kakitaan 4:​4-9; 2 Hongti 22:​14-​20) Anini, patorodan ni Yihofa ko fafahiyan a Krisciyang milahci to tayal Ningra. Onini a madimadiay fafahiyan salikaka misaˈicelay a mitosil, malo miceriday misakafahay ato mikiriwiˈay manilnil a mitosilay. O roma fafahiyan salikaka mirienangay to misafacoay, patirengay ato mitomadaw to Kasaˈopoan, ato romaroma katayalan no fenpo. O roma fafahiyan salikaka itiniay i Pitil ato RTO a matayal. Oniya fafahiyan salikaka mahecaday to taˈangayay ˈopo a sofitay, misaka dademakan ni Yihofa a palaˈosi to araaw Ningra. (ˈOlic 68:11) Paihkalay koni, citanengay a inaneng ko fafahiyan sanay ko pinengneng ni Yihofa.

SASAMAAN MINANAM CI YIHOFAAN A MICADA TO FAFAHIYAN

Faˈinayan salikaka, sapihapinangaw to mitodongay ko niyah ci Yihofaan micada to fafahiyan a Krisciyang, songilaˈen a mikinsa ko harateng ato waywayan no niyah. Toniya pakayraan misaaliay kita to sapadama. Mahecad to tayra i ising a palintoking, ho mafanaˈ to adadaay ko falocoˈ hokira, o ngaˈayay widang ato Kimad no Kawas papadama kitanan a mihapinang, i kemoday a falocoˈ no niyah iraay ko misakakinihay minengneng to fafahiyan hokira. Samaanen ita ko demak hani?

Licayen ko ngaˈayay widang. (Taneng 18:17) O pakasoˈlinan ita a widang, ano cisidaˈitay iraay ko masadafdafay a pihapinang to demak, ngaˈayay licayen cingra: “Samaanay ko pinengneng iso to picada ako to fafahiyan salikaka? O harateng nangra mikangodoay kako cangranan han? Iraayho ko sasalofen ako a pakayraan micada to fafahiyan salikaka han?” Ano iraayho ko hasasalofen iso ano saan ko widang i, aka a maketer a sapicoliaw, ao mamakalim a misalof.

Mikingkiw to Kimad no Kawas. Sakafanaˈaw to mikangodoay kita to fafahiyan salikaka hokira, sangaˈayay a pakayraan i, misalalangi to Kimad no Kawas a mikinsa to waywayan no niyah. (Hipray 4:​12) Ano mikingkiw to Fangcalay Cudad i, wa mafanaˈ kita o roma faˈinayan mikangodoay to fafahiyan, o roma cowa pikangodo. Ikor, palalinien ita ko waywayan no niyah. Mikingkiw i, palalinien ita ko masasiromaay a sinael, eca ka tano niyah sa a harateng tano sinael a midama to mararaway harateng no niyah. Tinakoen, itini 1 Pitiro 3:7 somowalay to fafahi i, ‘o malonayay ko tireng’ nangra. c O sowal no sinael i, cowa ka citaneng awaay ko kafanaˈan no fafahi han? Cowa. Mikitini Kalatiya 3:​26-​29 mahapinang  ita, mipiliˈan ni Yihofa tayra i kakarayan kalacafay ci Yisan a mikowan i, cowa ko faˈinayan aca, iraayho ko fafahiyan. Ano malalok kita a mikingkiw to Kimad no Kawas i, licayenho ko ngaˈayay widang a pasowal to samaanay kita micada to fafahiyan, wa mafanaˈto kita mikangodo to fafahiyan salikaka.

CISIDAˈITAY MALOHEMAY MALITENGAY SAMAANAY MIKANGODO TO FAFAHIYAN SALIKAKA?

Faˈinayan salikaka wa ngaˈay mikitini ciolahay a malohemay malitengay minanam to sasamaan mikangodo to fafahiyan salikaka. Ano mahaenay i, samaanay ko demak no malohemay malitengay hani? Nengnengen ita ko pina pakayraan.

Pakahemekay cangra to fafahiyan salikaka. Tarokos ci Pawlo patirengay to makapahay a taˈarawan i malohemay malitengay. Sapatikami ningra to kasakopang no Loma i, mitilidan ningra ko ngangan a pakahemek to pina a fafahiyan salikaka. (Loma 16:12) Haratengen hena, matengil noniya fafahiyan salikaka itini kasakopang maˈosi ko tikami ni Pawlo i, wa hakowa ko lipahak nangra! Anini, mahaenay ko demak no cisidaˈitay a malohemay malitengay. Maˈaraw nangra ko makapahay capeling no fafahiyan salikaka, malalok a matayal ci Yihofaan i, maceriday pakahemek cangranan. Mafanaˈay ko fafahiyan salikaka, misakaretengan a mapakahemek no tao ko niyah. Mikifalocoˈ ko malohemay malitengay a pakahemek, o saali no fafahiyan salikaka koni, oha ngangaˈayho pakalalok cangranan padadotoc madimadi matayal ci Yihofaan.​​—⁠Taneng 15:⁠23.

Mikifalocoˈay a makahi ko malohemay malitengay pakahemek to fafahiyan salikaka. Misamaanay hani? Fafahiyan salikaka ci Cisika sanay: “‘Makapahay ko pidemak iso’ ano saan ko faˈinayan salikaka to fafahiyan salikaka i, tada kahemekanto koni. Ano ihkal ko sapakahemek no faˈinayan salikaka i, mamikiriwiˈ a mapakalalok ko fafahiyan salikaka, tinakoen pakahemek kitanan ano masaˈopo i, misaˈicel pakafanaˈ to wawa misongilaˈ a mitengil, anca pakahemek kitanan malalok pakalic to pakingkiwan mirienang to saˈopo.” Ihkal ko pipakahemek no malohemay malitengay to fafahiyan salikaka i, o ciepocay ko niyah wa saan ko harateng no fafahiyan  salikaka, hanaca misaaliay ko kasakopang cangranan.

Mitengilay cangra to sapaini no fafahiyan salikaka. O misapoeneray a malohemay malitengay coko niyah a harateng ko sangaˈayay, papihadaken nangra ko fafahiyan salikaka to sapaini, hanaca misongilaˈ a mitengil to sowal no fafahiyan salikaka. Mihaen ko demak nangra cowa ko pakalalokay aca to fafahiyan salikaka, wa ciepoc ko niyah. Misamaanay? Matayalay i Pitil a malohemay malitengay ci Cilato sanay: “Papihadaken ko fafahiyan salikaka to harateng nangra, wa ngaˈay pacakat to tayal ako. Soˈlinayto, ˈalomanay a fafahiyan salikaka tada cinalifetan ikakaay to faˈinayan salikaka.” Itini kasakopang, ˈalomanay fafahiyan salikaka malo misakafahay, cipinangayto i kilacay a tamdaw. Malohemay malitengay ci Polayen sanay cingra: “Adihayay ko sadama no fafahiyan salikaka to likakawa, sasalimlaen ita ko nalifetan nangra!”

Citanengay a malohemay malitengay cowa ka misakahmaw to sapaini no fafahiyan salikaka. Misamaanay? Malohemay malitengay ci Ayitehowa, sanay cingra: “O pinengneng no fafahiyan salikaka ato nalifetan nangra ngangaˈay padama to faˈinayan salikaka masongilaˈ ko pihapinang to demak, wa ngaˈay padama to faˈinayan salikaka mihapinang to harateng no tao.” (Taneng 1:⁠5) Soˈlin o harateng no malohemay malitengay cowa ko tatooren ko sapaini no fafahiyan salikaka, aakoˈiden ko sapaini nangra, hanaca pakahemek to kacipinang nangra to demak.

Pahatatanamay cangra to fafahiyan salikaka. Citanengay a malohemay malitengay wa milimasmas to toki pahatatanam to fafahiyan salikaka. Tinakoen, pasifanaˈ cangra to fafahiyan salikaka sasamaan misikay to ˈayaw no mitosilay saˈopo. Ano awaay ko mipaputisemay a faˈinayan salikaka i, mafanaˈayto ko fafahiyan salikaka sasamaan a misikay. Wa ngaˈayho pahatatanam to fafahiyan salikaka misaka dademak to lalosidan ato kikay, mihaenay i, wa ngaˈayto cangra mirienang to patirengay ato mitomadaway to Kasaˈopoan a tayal. Itini i Pitil, o kapot no kantok mipahatatanamay to fafahiyan salikaka minanam to masasiromaromaay a tayal, tinakoen sasamaan mitomadaw, miˈaca, pakayni i payci, ato tingnaw a tayal. Pahatatanamay ko malohemay malitengay to fafahiyan salikaka, paihkalay to pakasoˈlinay cangra to fafahiyan salikaka o citanengay ngaˈayay tiˈeren.

ˈAlomanay fafahiyan salikaka tahacadaayto to sapahatatanam no malohemay malitengay ikor, ngaˈayay sakadademaken ko mananamay no niyah padama to tao. Tinakoen, macada ko sapahatatanam no patirengay a tayal i, ano mafekad ko pades, wa ngaˈay cangra padama to tahapadesay a salikaka patireng to lomaˈ. O roma fafahiyan salikaka mafanaˈay to mitosil i kaˈalomanan a kitiraan, ikor wa ngaˈay cangra pahatatanam to roma fafahiyan salikaka. Makahiay ko malohemay malitengay pahatatanam to fafahiyan salikaka, samaanay ko harateng nangra hani? Fafahiyan salikaka ci Cinifo sanay: “Mirienang kako to patirengay to Kasaˈopoan a tayal i, halafinayto ko cecay kantok pahatatanam takowanan. Misinanotan ningra ko midemakan ako, pakahemek takowanan. O harateng ako i, o ngaˈayay pakasoˈlin tiˈeren a tamdaw, hato wa ngaˈay padama toniya tayal kako, mansa maolahay kako malacafay cingranan matayal.”

MICADA TO FAFAHIYAN SALIKAKA MALECADAY O PARO NO LOMAˈ, PAIRAAY TO SAPALEMED

Tangongolay ko olah ni Yihofa to madimadiay fafahiyan salikaka, tada maolahay kita cangranan, hato paro no lomaˈ no niyah. (1 Timoti 5:​1, 2) Malikoay kita malacafay cangranan matayal saki ci Yihofaan, matinakoay nangra ko olah ato sadama ita tada lipahakayto. Fafahiyan salikaka ci Wanisa sanay: “Itini i likakawa no Kawas macadaayto ko taˈangayay a sapakalalok no faˈinayan salikaka, miakoˈiday kako ci Yihofaan mitahidang takowanan masalalomaˈ no likakawa Ningra.” Itini i Taiwanay fafahiyan salikaka sanay: “Tada miakoˈiday kako ci Yihofaan ato likakawa Ningra tada misakaretengay to nafalocoˈan no fafahiyan. Onini mapaˈicelay ko pakasoˈlinay falocoˈ ako, matongalay ko pisalimla ako to lipahak ilalomaˈ no likakawa no Kawas!”

Madimadiay midoko ci Yihofaan a faˈinayan ano tano pinengneng ni Yihofa micada to fafahiyan i, wa mahemek ci Yihofa! (Taneng 27:11) Itiniay i Sukolan a malohemay malitengay ci Pencimin sanay: “Itini toniya hekal, cowa pikangodo ko ˈalomanay to fafahiyan. Nanay ano tayniay ko fafahiyan salikaka i Kasaˈopoan i, wa ira ko cowa ka lecad a nafalocoˈan.” Nanay kita maemin misaˈicel mitodong ci Yihofaan, tano olah micada to kanonoˈan a fafahiyan salikaka, hanaca sakaretengen a mikangodo cangra!​​—⁠Loma 12:⁠10.