Pu huentru che troquiquelafuingün pu domo cheu ñi choyüngeel quiñeque taiñ pu peñi. Quiñe huitran-ngepaquechi loncolelu Hans pingelu, Bolivia mapu mülelu, feipi: “Quiñeque mapu mu pu che raquiduamquei pu huentru ñi doicülen ta domo mu. Pu huentru femngechi quimeltungelu yamquelafingün pu domo”. Quiñe loncolelu Shengxian pingelu, Taiwán mapu mülelu, feipi: “Cheu tañi mülen iñche, pu domo ngelai ñi dunguconal pu huentru ñi dungu mu feipingequei. Quiñe huentru feipile quiñe domo ñi raquiduam, caquelu pu huentru yamniehuelayafeyu”. Ca quiñeque huentru ayentufingün pu domo, femngechi pengelqueingün tañi yamnienofiel pu domo.

Huelu quiñe huentru tremümngelu cheu ñi yamngequenon pu domo, cüme elcünutuafui ñi raquiduam (Efes. 4:22-24). ¿Chumngechi femafui tüfa? Mülei ñi inayentuafiel ta Jehová. Tüfachi chillcatun mu, ngüneduamaiñ chumngechi Jehová ñi troquiniequefiel pu domo, ca peaiñ chumngechi pu peñi yamnierpuafui pu domo, doyelchi mai pu loncolelu.

CHAU JEHOVÁ, ¿CHUMNGECHI TROQUINIEQUEFI PU DOMO?

Chau Jehová inayentufali chumngechi ñi troquiniequefiel pu domo. Jehová quiñe cüme Chau ngei, ca rume piuqueyeniefi com tañi pu che (Juan 3:16). Pu domo tañi serfiniequeteu, tañi poyen ñahue reque troquiniefi engün. ¿Chumngechi pengeli Jehová tañi piuqueyefiel ca yamniefiel? Peaiñ.

Cüme troquiniequefi pu domo. Chau Jehová quisu tañi ad mu deumacünufi pu huentru ca  domo (Gén. 1:27). Doi quimün ca doi adümuhun elulafi pu huentru. Pu domo ca quimüñmayafuingün Biblia tañi rüf dungu, ca inayentuafuingün ta Jehová tañi cüme piuquengen. Chau Jehová doyümquelafi pu huentru (2 Crón. 19:7). Jehová falintuquefi pu huentru ca pu domo tañi maneluhun fei mu. Ca elufi pu huentru ca pu domo ñi rumel mongen nieal mapu mu cam ñi ngünenieal huenu mu (2 Ped. 1:1). Quimfali llemai Chau Jehová falintuquefi pu domo, doicülelu troquiquelafi pu huentru.

Allcütuquefi pu domo. Falintuquefi ñi allcütual ñi chum duamcülen ca tati huesaque dungu ñi rupan pu domo. Fei allcütufi Raquel ca Ana tañi llellipun engu (Gén. 30:22; 1 Sam. 1:10, 11, 19, 20). Cafei Chau Jehová adcünui ñi huirintucungeal tañi Biblia meu quiñeque huentru yamfilu ca allcütufilu pu domo. Quiñe tüfa ta Abrahán. Jehová feipieyu tañi allcütuafiel ñi domo Sara, fei Abrahán ta femi (Gén. 21:12-14). Tati lonco ülmen David allcütufi ta Abigaíl, ca feipi Chau Jehová tañi huercüfiel (1 Sam. 25:32-35). Jesús ca inayentufi ta Jehová, fei allcütufi tañi ñuque María (Juan 2:3-10). Felei llemai, Jehová allcütuquefi pu domo, femngechi pengeli ñi yamquefiel engün.

Maneluuquei pu domo mu. Chau Jehová elfalcünufi ta Eva ñi quelluconal tañi cuidangeal ta mapu (Gén. 1:28). Chau Jehová doicülelu troquilafi ta Adán, doi mai falintufi ta Eva tañi quellufiel mu ñi füta. Chau Jehová ca elfalcünufi tañi pu huerquen domo Débora ca Huldá tañi ngülamtuafiel ñi troquiñche, quiñe juez ca quiñe lonco ülmen (Juec. 4:4-9; 2 Rey. 22:14-20). Fantepu meu, Jehová ca maneluuquei pu lamngen mu, ca elfalcünulelfi falinque cüdau. Quiñeque taiñ pu lamngen amuldungufengeingün, precursorangeingün ca misionerangeingün. Caquelu quelluqueingün ti deumarucan cüdau mu. Quiñeque cüdauqueingün Betel mu ca cheu ñi rulpadungungequen fentren quehun dungun mu. Pu lamngen quiñe fütra troquiñ hueichafe reque felei, Jehová tañi adnieteu ñi enturpual tañi ayünieel (Sal. 68:11). Pu domo nehuen-ngelai ca adümuhun-ngelai piquelai ta Chau Jehová.

PU PEÑI, ¿CHUMNGECHI YAMÜRPUAFUINGÜN PU DOMO JEHOVÁ REQUE?

Taiñ quimal ñi yamquepefiel mai pu domo Jehová reque, mülei taiñ quisutu ngüneduamuhual taiñ raquiduamquen ca taiñ femquen. Duamnieiñ ta quellu. Raquiduamnge tüfa: quiñe cüme doctor quelluafeiñmu taiñ quimal taiñ cutrancülen. Ca femngechi quiñe cüme hueni ca Chau Dios tañi Dungu quelluafeiñmu taiñ quimal taiñ yamquenofiel pu domo cam taiñ yamniefiel. Peafiyiñ chumngechi.

Quelluafen feipiafiyiñ quiñe cüme hueni (Prov. 18:17). Nütramcayafiyiñ quiñe quim cüme hueni ca ramtuafiyiñ: “¿Chem pimi? ¿Yamquepefiñ mai pu domo? ¿Raquiduamqueingün iñche tañi yamquefiel? ¿Cüme elcünutuafun quiñeque dungu?”. Taiñ hueni quiñe cüme ngülam elueliyiñmeu, quisutu incañpeulayaiñ. Doi mai eluhuaiñ taiñ cüme elcünutuafiel taiñ raquiduam.

Papeltuafiyiñ Chau Dios tañi Dungu. Taiñ quimal taiñ cüme troquituniepefiel mai tati pu lamngen, mülei taiñ ngüneduamuhual Biblia tañi feipin mu. ¿Inaquepefiñ mai tañi raquiduam ca tañi femün meu? ramtuhuaiñ (Heb. 4:12). Papeltun mu ta Biblia, quimafuiñ quiñeque huentru cuifi mu yamniefingün pu domo, caquelu femlaingün. Fei ramtuhuafuiñ: “¿Inei engün am trürümuhuafun iñche?”. Quiñe huentru recüluhuafui quiñe texto mu müten, femngechi cümelu troquihuafui quisu ñi raquiduam. Huelu femngechi femlayaiñ. Taiñ quimürpual chem raquiduamquei Chau Jehová pu domo mu, fillque texto Biblia mu ngüneduamaiñ. Quiñe tüfa 1 Pedro 3:7, feipi: “Falintuqueafimün tamün domo chumngechi cuñiutucuquefimün quiñe yafüngenochi metahue”. b Tüfa, ¿cüpa feipipei mai pu huentru ñi doicülen pu domo mu? Tati pu domo müte quimlaingün ca adümuulai ¿piafuiñ? Femlai llemai. Taiñ huesa pünenoafiel ñi chem pin Pedro, raquiduamaiñ chem feipi Gálatas 3:26-29. Tüfa mu feipi Jehová ñi dullifiel  quiñeque pu huentru ca quiñeque pu domo ñi quiñentrür ngünenieal Jesús engu huenu meu. Papeltufiliyiñ ta Biblia ca ngülamtuafen feipifiliyiñ quiñe cüme hueni, quimürpuaiñ chumngechi taiñ yamnieafiel pu domo.

PU LONCOLELU, ¿CHUMNGECHI YAMNIEFINGÜN PU LAMNGEN?

Pu peñi inayentuafingün pu loncolelu ñi respetaniefiel pu lamngen. Peafiyiñ pu loncolelu chumngechi respetaniefingün ca piuqueyeniefi ñi pu lamngen.

Saquiniefingün. Pu loncolelu inayentuafuingün apostol Pablo. Ti carta ñi huirintuculelfiel Pablo ti troquiñche Roma mu, saquifi quiñeque domo (Rom. 16:12). Ñi papeltungen ti carta troquiñche mu, ¿rume ayüupelaingün ti pu domo allcütulu engün? Ca femngechi pu loncolelu huimtuleingün ñi saquiquefiel tañi pu lamngen ñi cüme chengen engün, ca com cüdau ñi femquen engün ñi serfinieafiel ta Jehová. Pu loncolelu ñi femün mu tüfa, pu lamngen rume respetaniengelu ca falintuniengelu troquiuqueingün. Ñi yafültucueteu pu loncolelu eluquefi nehuen pu lamngen ñi serfinieafiel ta Jehová (Prov. 15:23).

Piuque mu pu loncolelu mülei ñi saquiafiel tañi pu lamngen, ca mülei ñi feipiafiel chumngelu ñi saquiquefiel. ¿Chumngelu? Peafiyiñ ñi feipin quiñe lamngen Jessica pingelu, fei feipi: “Iñchiñ taiñ pu domongen, ayüqueiñ taiñ saquingeal, huelu doi ayüqueiñ taiñ feipingeal chumngelu taiñ saquingen. Taiñ saquingeal chumngechi taiñ quimeltuquen taiñ pichiqueche ñi cüme portayal trahun mu, ca taiñ cüpalün quiñeque estudiante taiñ trahun mu” pi taiñ lamngen. Pu loncolelu mülei tañi feipiafiel pu lamngen chumngelu tañi saquifiel, femngechi pu lamngen rume falintuniengelu troquihuaingün trahunche mu.

Allcütuquefingün pu lamngen. Pu loncolelu ñom piuquengelu iñche müten cüme  raquiduamquen pilayaingün. Feimu ramtuquefingün quiñeque lamngen chumngechi ñi nentual quiñeque cüdau, ca cüme allcütuñmaquefingün tañi chem pieteu. Femngechi pu lamngen rume ayüucülequeingün. Ca pu loncolelu cümelcalequei, ¿chumngechi? Quiñe loncolelu cüdauquelu Betel mu Gerardo pingelu, feipi: “Tañi quelluntucueteu mu pu lamngen, doi cüme nentuquen tañi cüdau. Quiñeque lamngen doi alün tiempo yeniei ñi femquen quiñeque cüdau” pi tati peñi. Trahunche mu, fentrenque lamngen hunelequei amuldungun mu, ca cüme quimniefingün ti lof cheu ñi amuldunguquen ti trahunche. Quiñe loncolelu, Bryan pingelu, feipi: “Pu lamngen ñi cüme chengen mu ca adümuhun mu, rume cüme quelluntucuqueingün Jehová ñi troquiñche mu. Quimeltungeaiñ tañi femqueel mu engün”.

Pu loncolelu mülei ñi allcütuafiel pu lamngen tañi feipieteu. ¿Chumngelu quimün-ngei ñi allcütual engün? Quiñe loncolelu Edward pingelu feipi: “Quiñeque lamngen tañi feipin, tañi quimün engün, quelluafui pu loncolelu ñi doi cüme adümafiel quiñe dungu. Ca ñi doi cüme adümafiel caquelu pu che ñi chum duamcülen engün” pi tati peñi (Prov. 1:5). Quiñeque mu, pu loncolelu pepi femlayafuingün ñi feipieteu quiñeque lamngen. Femngelu rume, mañumfingün tañi feipieteu engün.

Pepicaquefingün. Tati pu loncolelu chumqueingün rume ñi pepicayafiel pu lamngen, femngechi pengelqueingün tañi quimün-ngen. Ca pepicaquefingün chumngechi ñi femal quiñe pichi trahun amuldungun mu, ngenole quiñe huentru fautizaulu. Ca pepicayafuingün chumngechi ñi pünengeal quiñe herramienta ca maquina ñi quelluntucual ti deumarucan mu. Cafei Betel mu, pu loncolelu pepicaquefingün pu lamngen ñi cümelcaleal ti Betel ruca, ñi ngillacayal, ca ñi pünengeal ti computador. Pu loncolelu pepicafilu ta pu lamngen, maneluuqueingün pu lamngen ñi adümuhun mu.

Alünque lamngen pünequefi chem ñi quimeltueteu pu loncolelu ñi quelluafiel caquelu. Rupalu quiñe fütra dungu, quelluntucuingün ñi cüme elcünungetual ruca. Caquelu lamngen pepicangeingün ñi amuldungual cheu ñi rupaquen alünque che. Fei quellufingün caquelu ñi ca femngechi femal. ¿Chem piquei pu lamngen pu loncolelu ñi quellueteu engün? Jennifer feipi: “Cüdaulu iñche deumarucan mu, quiñe loncolelu elcünui tiempo tañi pepicaeteu. Tüfachi loncolelu leliniequefeneu chem tañi femal, fei saquiquefeneu, rume ayüquefun ñi cüdahual fei iñchiu. Fei maneluuquefui iñche mu, fei falintuniengelu troquiuquefun”.

TAMI FAMILIA TROQUINIEFILMI PU LAMNGEN, CÜMELCANGEAI TI TRAHUNCHE

Jehová reque, rume piuqueyeniequefiyiñ taiñ pu lamngen trahunche mu. Taiñ familia reque troquiniefiyiñ engün (1 Tim. 5:1, 2). Rume falintuquefiyiñ taiñ serfiafiel ta Jehová taiñ pu lamngen iñchiñ. Taiñ pu lamngen piuqueyeniengelu ca falintuniengelu troquiuqueingün, tüfa rume ayühuelqueiñmu. Vanessa feipi: “Jehová ñi troquiñche mu com pu huentru falintuquefingün pu domo. Rume mañumcülen ñi coneltulen tüfachi troquiñche mu” pi tati lamngen. Quiñe lamngen Taiwán mu mülelu feipi: “Rume mañumcülen Jehová ca tañi troquiñche ñi falintuniequefiel pu domo, ca ñi duamtuniequefiel tañi chum duamcülen engün. Fei doi maneluucülen ca doi falintuquefiñ ñi müleal Jehová tañi troquiñche mu”.

Jehová rume ayüucülei com pu huentru coneltulelu tañi troquiñche mu tañi cüme troquituniefiel mu pu domo fei reque (Prov. 27:11). Quiñe loncolelu Escocia mapu mu mülelu feipi: “Tüfachi mapu mu, fentrenque pu huentru respetaquelafingün ta pu domo. Feimu ayüqueiñ ñi quimal engün tañi respetangen ca piuqueyengen Trahunhue Ruca mu” pi tati peñi. Feimu yafüluhuaiñ taiñ inayentuafiel ta Jehová chumngechi ñi piuqueyeniefiel ca ñi respetaniefiel pu lamngen (Rom. 12:10).