Yaqhep chachanakajj warminakar jiskʼachir lugaranakanwa jilsuwayapjje. Bolivia markan circuitot servir Hans sat jilatajj akham siwa: “Yaqhep chachanakajja, kawkjantï chachanakar jachʼa jachʼa tukupjjañapatak chʼamañchapki uka taypinwa jilsuwayapjje. Jupanakajj warminakat jilankapkaspas ukham amuyasipjje, jilapartejj warminakar jiskʼachapjjarakiwa” sasa. Taiwán markankir Shengxian sat mä ancianojj akham sarakiwa: “Jakaskta uka lugarankir walja chachanakajja, warminakajj janis chachanakar kunans mitisipjjañapäkaspa ukhamwa amuyapjje. Mä chachatï mä warmin amuyup arsuspa ukhajja, uka chacharojj janiw respetjjapjjaspati” sasa. Yaqhep chachanakajj jan amuykañakiw warminakar yaqhachapjje, jiskʼachir arunakampiw warminakat parlasajj chansasipjje.

Ukhamäkchisa, ukhaman jilsur mä chachajj cambiaspawa, janirakiw warminakat jilankkaspas ukham amuyasjjaspati (Efes. 4:22-24). Ukatakejj Jehová Diosat yateqasiñapawa. Aka yatichäwinjja, kunjamsa Jehová Diosajj warminakar uñji, kunjamsa jilatanakajj Jehová Diosjam warminakar uñjañ yateqapjjaspa, kunjamsa ancianonakajj uka toqen yateqaskañäpjjaspa ukwa yatjjataskañäni.

¿KUNJAMSA DIOSAJJ WARMINAKAR UÑJI?

Kunjamsa warminakar sum uñjsna uk Jehová Diosat yateqasiñasawa. Jupajj khuyaptʼayasir Awkiwa, munasiñampiw taqpach familiapar uñji (Juan 3:16). Jupar servir warminakarojj wali munat wawanakaparjamaw uñji. Qhawqsa jupanakar munasi respetaraki uk jichhajj uñjañäni.

Janiw yaqhachkiti. Jehová Diosajj warminakarus chachanakarus jupar uñtasitwa lurawayi (Gén. 1:27). Janiw chachanakarojj warminakat sipans jukʼamp sum amuytʼasir lurkiti, janirakiw warminakat  sipans jukʼamp sum lurapjjañapatak lurkiti. Chachanakas warminakas igualak Biblian cheqa yatichäwinakap amuyapjjaspa, Diosjam suma chuymanïpjjarakispa. Diosajj chacharus warmirus igualak uñji (2 Crón. 19:7). Chachanakana warminakan jupar confiyapjjatap mä igualak valoranit uñji, taqeniruw wiñay jakañ suytʼäw churaraki, ukhamat aka oraqen jakapjjañapataki jan ukajj alajjpachan reyinakjam sacerdotenakjam servipjjañapataki (2 Ped. 1:1). Jehová Diosajj janipuniw warminakar yaqhachkiti.

Jupanakarojj istʼiwa. Jehová Diosajj kunjamas warminakajj jikjjatasipjje, kuna llakinakanïpjjesa ukanak sum amuyi. Raquel ukat Ana warminakan oracionanakap istʼänwa, jaysarakïnwa (Gén. 30:22; 1 Sam. 1:10, 11, 19, 20). Kunjamsa chachanakajj warminakar istʼapjjäna ukanaksa, Bibliaruw qellqayawayi. Jupanakat maynejj Abrahanawa, jupajj kunjamtï Jehová Diosajj siskäna ukarjamaw Sara warmipar istʼäna (Gén. 21:12-14). David reyejj ukhamarakiw Abigaíl warmir istʼäna. Jehová Diosaw “nayampi jikisiñamatak jichhürun khitantamjja” sasaw Abigailar sarakïna (1 Sam. 25:32-35). Niyakejjay Jesusajj alajjpachankir Awkipat yateqaschejja, María mamaparojj istʼänwa (Juan 2:3-10). Kunjamtï uñjktanjja, Jehová Diosajj warminakar istʼasaw jupanakar respetatap uñachtʼayaraki.

Jupanakarojj confiyiwa. Jehová Diosajj oraqpach cuidañapatakiw Eva warmir confiyäna (Gén. 1:28). Diosajj janiw Evarojj Adán esposopat minusäkaspas ukham uñjkänti, jan ukasti wali valorani yanapirit uñjäna. Débora ukat Huldá profetisa warminakarojja, Diosajj markaparu, mä juezaru, mä reyir ewjjtʼapjjañapatakiw mayïna (Juec. 4:4-9; 2 Rey. 22:14-20). Jichhürunakan ukhamarakiw Jehová Diosajj jupar servir warminakarojj confiyi, lurañanak churaraki. Diosat jan jitheqtir uka kullakanakajj publicadoranakäpjjewa, precursoranakäpjjewa jan ukajj misioneranakäpjjewa. Jupanakaw Salonanaka sucursalanak diseñasiñapatakisa, lurasiñapatakisa, askichasiñapatakis yanaptʼapjje. Jupanakat yaqhepajja, Betelana jan ukajj Oficinas Remotas de Traducción ukanwa servipjje. Taqe jupanakajj mä jachʼa ejercitor uñtasitäpjjewa, Diosan voluntadap lurapjjaraki (Sal. 68:11). Kunjamtï uñjaniwayktanjja, Jehová Diosajj janiw warminakar debilatsa jan ukajj mä kuns jan sum luririt uñjkiti.

¿KUNJAMSA JILATANAKAJJ WARMINAKAR SUM UÑJAÑ JEHOVÁ DIOSAT YATEQAPJJASPA?

Jilatanaka, Jehová Diosjamat kullakanakar uñjasktan janicha uk yatiñatakejja, amuyunakassa luratanakassa sum amuykiptʼasiñasawa. Ukatakejj yanaptʼaw wakisi. Kunjamtï mä rayos X apsur maquinajj maynin chuymapajj kunjamäskisa uk uñachtʼaykejja, ukhamarakiw mä suma amigosa Diosan Arupas kunjamsa kullakanakar uñjasktan uk amuyasiñatak yanaptʼistaspa. Ukatakejj ¿kunsa lursna?

Mä suma amigosar yanaptʼa mayiñäni (Prov. 18:17). Sum amuytʼasiri munasiri amigosampi jan ukajj amigasampiw parlsna, akham sasaw jisktʼaraksna: “¿Kunjams kullakanakar uñjasktjja? ¿Kullakanakajj jupanakar respetataj amuyapjjeti? ¿Mä kunan mejorañajas wakisiti?” sasa. Amigosatï jan ukajj amigasatï “akan mejorañamawa” sistani ukhajja, janiw colerasiñasäkiti. Antisas jankʼakiw mejorañatak chʼamachasiñasa.

Diosan Arupat yatjjatañäni. Kullakanakarojj sumti uñjasktan janicha uk yatiñatakejja, Bibliampiw amuyunakassa luratanakassa uñakiptʼasiñasa (Heb. 4:12). Bibliat yatjjatasajja, warminakar jan sum uñjiri sum uñjir chachanakampit yateqtanjja. Ukhamajj kawkïr chachanakjamätansa ukwa jisktʼassna. Maysa toqetjja, textonak yaqha textonakampiw igualtʼayañasa, ukhamatwa warminakat jan wal amuyktan ukar apoyañatakejj yaqhep versiculonak munañasaruk jan entiendkañäniti. 1 Pedro 3:7 textonjja, esposarojj “jukʼamp pʼakisir vasor” uñtat uñjapjjam sasaw qhanañchi. b Ukajj chachanakat minusäkaspasa, mä arun minus yatiñanïkaspasa jan ukajj janis mä kuns lurañ puedkaspa ¿ukhamti sañ muni? ¡Janiw ukhamäkiti! Pedron arunakap amuyusarjamak jan entiendiñatakejj kuntï Gálatas 3:26-29 textojj siski uk amuytʼañäni.  Uka textonjja, Jehová Diosajj chachanakarus warminakarus alajjpachan Jesusamp chik apnaqapjjañapatak ajllitapwa uñachtʼayi. Jiwasatï Bibliat yatjjatañäni, mä suma amigosarus jan ukajj amigasarus mä ewjjtʼa mayiñäni ukhajja, kunjamtï kullakanakasar respetañasäki ukham respetañwa yateqañäni.

¿KUNJAMSA ANCIANONAKAJJ KULLAKANAKAR RESPETAPJJATAP UÑACHTʼAYAPJJE?

Congregacionankir jilatanakajja, kunjamsa ancianonakajj kullakanakar respetapjje uk uñjasaw yateqasipjjarakispa. ¿Kunjamsa ancianonakajj uka toqen yateqaskañäpjjaspa? Kunjamsa ancianonakajj kullakanakar respetapjjatapsa munasiñamp uñjapjjataps uñachtʼayapjje uk mä qhawq uñjañäni.

Felicittʼapjjewa. Ancianonakajj apóstol Pablot yateqasipjjaspa. Jupajj Romankir congregacionar qellqkäna uka cartapan walja kullakanakaruw qhan felicittʼäna (Rom. 16:12). Uka cartajj congregacionan liytʼaskäna ukhajj ¿qhawqsa kullakanakajj kusisipjjpachäna uk amuyasmati? Ancianonakajj ukhamarakiw kullakanakarojj suma chuymanïpjjatapatsa Diosar serviñan kunaymaninak lurapjjatapats felicittʼapjje. Ukhamatwa kullakanakajj respetata wali valoranit uñjat amuyasipjje. Jehová Diosar jan jitheqtas serviskakiñatakejja, kullakanakajj mä ancianon chʼamañchtʼkir arunakapwa uka horasan necesitasipkaspa (Prov. 15:23).

Ancianonakajj taqe chuymaw kullakanakar felicittʼapjje, kunatsa felicittʼapjje uks qhan sapjjaraki. Kunatsa ukham lurapjjañapa uk amuytʼañäni. Jessica kullakajj akham siwa: “‘Walik ukham lurtajja’ sapkitu ukhajj wal kusisipjjta. Ukampis kunatsa ukham sapjjetu uk yatiñajj jukʼampiw chʼamañchtʼapjjetu. Inas wawanakajar tantachäwinakan sum portasiñ yatichapjjatajata jan ukajj Bibliat mä yateqerir Salonar jutañapatak irptir sarapjjatajat felicittʼapjjchistaspa” sasa. Ancianonakajj kunatsa  felicittʼapjje uk kullakanakar qhan sapjje ukhajja, kullakanakajj congregacionar wal yanaptʼasipkatapa wali valoranit uñjatäsipkatapwa amuyasipjje.

Istʼapjjewa. Humilde ancianonakajja, janiw jupanakakis suma amuytʼirïpkaspa ukham amuyasipkiti. Ukatwa kullakanakan ewjjtʼap mayipjje, atencionampiw istʼapjjaraki. Ukhamatwa taqeni yanaptʼasipjje. Kullakanakajj chʼamañchtʼataw jikjjatasipjje. ¿Kunjamsa ancianonakar yanaptʼaraki? Betelan servir Gerardo sat mä ancianojj akham siwa: “Kullakanakar kunanaks jisktʼta ukhajj jukʼamp sum trabajoj lurta. Jilapartejj jilatanakat sipans jukʼamp horanakaw kullakanakajj mä trabaj lurapjje” sasa. Congregacionanakan walja precursora kullakanakaw utji, ukhamajj sum territorionak uñtʼapjje. Bryan sat mä ancianojj akham sarakiwa: “Kullakanakajj suma chuymanïpjjewa mä kuns sum lurtʼañ yatipjje, ukanakampiw Diosan markapan yanaptʼapjjaspa. ¡Jupanakan experienciapat yateqasipjjañäni!” sasa.

Ancianonakajj kullakanakan arunakap istʼapjjapuniwa. ¿Kunatsa istʼapjje? Edward sat mä ancianojj akham siwa: “Mä kullakan experienciapasa amuyupasa, mä jilatarojj mä kun sum amuyañataki mayninakan lugarapar uchasiñatakiw wal yanaptʼaspa” sasa (Prov. 1:5). Janis mä kullakan arunakaparjam luraskchinejja, ancianonakajj uka kullakan amuyunakap arstʼatapatsa amuytʼatapats yuspärapjjapuniwa.

Capacitapjjewa. Kullakanakar capacitañatak chʼamachasipki uka ancianonakajj yatiñanïpjjatapwa uñachtʼayapjje. Predikir mistuñatak tantachäwi sarayañapatakiw kullakanakar yatichapjjaspa, ukhamatwa bautisat mä jilatajj jan utjkani ukhajj uka tantachäw sarayapjjani. Kunjamas yaqhep herramientanakas maquinanakas apnaqasi uk yatichapjjarakispawa, ukhamatwa construccionansa mantenimiento lurañans yanaptʼapjjaspa. Betelankir superintendentenakajj kunaymanin yanaptʼapjjañapatakiw kullakanakar capacitapjje, ukhamatwa mantenimiento lurañansa, alañanakansa, contabilidadansa, computacionans yanaptʼapjje. Kullakanakar capacitir ancianonakajja, kullakanakaru mä kuns sum lurtʼirïpjjatapar confiyapjjatapwa uñachtʼayapjje.

Walja kullakanakaw kunanaktï ancianonakat yateqapki ukanakampejj mayninakar yanaptʼapjje. Construccionan capacitación katoqer yaqhep kullakanakajja, mä desastre natural utjatapat utanak wasitat lurañanwa yanaptʼapjje. Yaqhep kullakanakajja, kuntï carritomp predicañan yateqapki ukanakwa walja kullakanakar yatichapjje, ukhamat uka kikpa yatiyir sarapjjañapataki. Capacitación churir ancianonakat ¿kamsapjjes kullakanakajja? Jennifer kullakajj akham siwa: “Mä Salón lurasiñapatak construccionan yanaptʼkayäta ukhajja, ukan sarayir mä jilatajj nayar yatichañatakiw tiemp apstʼasïna. Kunsa luraskayäta uk jilatajj uñjapuniriwa, felicittʼarakirïtuwa. Nayar confiyänwa, wali valoranits uñjkitaspa ukham amuyasiyäta, jupamp trabajiñajj wal gustitäna” sasa.

KULLAKANAKAR FAMILIASARJAM UÑJAÑAJJ WALI ASKIWA

Jiwasajj Jehová Diosjamarakiw jupat jan jitheqtir kullakanakasar munastanjja, familiasarjamaw uñjaraktanjja (1 Tim. 5:1, 2). Jupanakamp chik Jehová Diosar adorañajj mä jachʼa bendicionawa, kusiskañarakiwa. Jupanakar munasitasatsa yanaptʼatasatsa, kullakanakajj wal kusisipjje. Vanessa kullakajj akham siwa: “Markapankatajatsa sum uñjasir jilatanak taypinkatajats walpun Jehová Diosar yuspärta” sasa. Taiwán markankir mä kullakajj akham sarakiwa: “Wali valoranit uñjatäpjjatajatsa, kunjam chuymanïpjjtsa ukar respetapjjatapatsa, walpun Jehová Diosarus markaparus yuspärta. Ukanakajj Diosar jukʼamp confiyañataki, Jehová Diosan markapankataj wali valoranit uñjañatakiw yanaptʼitu” sasa.

Kunjamsa cristiano jilatanakajj warminakar jupjam uñjañatak chʼamachasipjje uk uñjasajja, Jehová Diosajj walpun kusispacha (Prov. 27:11). Escocia markankir Benjamin sat mä ancianojj akham siwa: “Mundonkir walja chachanakajj janiw warminakar respetapkiti. Ukatwa Salonar jutapki uka kullakanakatakejj jupanakar wal respetatasasa munasiñamp uñjatasas qhanäñapa” sasa. Ukhamajj Jehová Diosat yateqasiñatakisa, kullakanakar munasiñampi respetompi uñjañatakis wal chʼamachasipjjañäni (Rom. 12:10).