Онларын чохунун бөјүдүјү мәдәнијјәтдә гадынлара јухарыдан ашағы бахылыр. Мәсәлән, Боливијада рајон нәзарәтчиси кими хидмәт едән Һанс гардаш дејир: «Бәзи кишиләрә ҝөзләрини ачандан тәлгин олунуб ки, киши сәрт олмалыдыр. Буна ҝөрә дә бу ҹүр мүһитдә бөјүјән киши гадынлардан үстүн олдуғуну дүшүнүр вә онлара сајмазјана јанашыр». Тајванда јашајан Шинкшјен адлы ағсаггал исә белә дејир: «Јашадығым әразидә кишиләр елә дүшүнүр ки, гадын киши ишинә гарышмамалыдыр. Киши башгаларынын јанында һансыса мәсәлә илә бағлы гадынын фикрини дејәндә һөрмәтдән дүшә биләр». Бәзи кишиләрин исә гадынлара гәрәзли јанашдығы башга шејләрдән ҝөрүнүр. Мәсәлән, ола билсин, онлар гадынлары алчалдан зарафатлар едирләр.

Хошбәхтликдән, киши бөјүдүјү мәдәнијјәтдән асылы олмајараг, дәјишә биләр. О өјрәнә биләр ки, киши вә гадын бәрабәрдир (Ефес. 4:22—24). Бунун үчүн Јеһовадан өрнәк ҝөтүрмәк лазымдыр. Бу мәгаләдә үч саһәјә нәзәр салаҹағыг. Ҝөрәҹәјик ки, Јеһова гадынлара неҹә јанашыр, гардашлар Јеһовадан өрнәк алараг гадынлара неҹә јанашмалыдыр вә ағсаггаллар баҹылара һөрмәт гојмагда башгаларына неҹә нүмунә ола биләр.

ЈЕҺОВА ГАДЫНЛАРА НЕҸӘ ЈАНАШЫР?

Јеһованын гадынларла рәфтары һамымыз үчүн ҝөзәл нүмунәдир. О, рәһмли Ата кими өвладларынын һамысыны севир (Јәһ. 3:16). Јеһова сәдагәтли баҹыларымыза әзиз гызлары кими јанашыр. О, гадынлара дәјәр вердијини һансы јолларла ҝөстәрир?

Јеһова гадынлара гаршы ајры-сечкилик етмир. О, кишини дә, гадыны да өз бәнзәриндә јарадыб (Јар. 1:27). Јеһова кишини гадындан даһа ағыллы, даһа истедадлы јаратмајыб, нә дә кишини гадындан даһа  дәјәрли сајмыр (2 Салн. 19:7). О, һәр икисини дә елә јарадыб ки, онлар ејни дәрәҹәдә Мүгәддәс Китаб һәгигәтләрини баша дүшүб Онун ҝөзәл кејфијјәтләрини әкс етдирә билсинләр. Һәмчинин Јеһованын ҝөзүндә кишинин дә, гадынын да иманынын дәјәри бәрабәрдир. О, јердә әбәди јашамаг үмидини вә ја ҝөјдә падшаһ вә каһин кими хидмәт етмәк үмидини кишијә дә вериб, гадына да (2 Бут. 1:1). Јеһованын гадынлара гәрәзли јанашмадығы ҝүн кими ајдындыр.

Јеһова гадынлары динләјир. Јеһова онларын һиссләринә, нараһатчылыгларына биҝанә дејил. Мәсәлән, Јеһова Рәһиләнин вә Һәннәнин дуаларына гулаг асыб ҹаваб вермишди (Јар. 30:22; 1 Ишм. 1:10, 11, 19, 20). Һәмчинин О, Мүгәддәс Китаба кишиләрин гадынын сөзүнә гулаг асдығы һадисәләри јаздырыб. Мәсәлән, Ибраһим пејғәмбәр Јеһованын ҝөстәриши илә арвады Саранын дедијини етмишди (Јар. 21:12—14). Давуд падшаһ Абигајилин сөзүнә гулаг асмышды. Давуд һесаб едирди ки, Абигајили онун јанына Јеһова ҝөндәриб (1 Ишм. 25:32—35). Јеһованын хүсусијјәтләрини мүкәммәл сурәтдә әкс етдирән Иса Мәсиһ исә анасы Мәрјәмин сөзүнә гулаг асмышды (Јәһ. 2:3—10). Бу нүмунәләрдән ајдын олур ки, Јеһованын гадынлары динләмәси онлара һөрмәт етдијинин бир ҝөстәриҹисидир.

Јеһова гадынлара етибар едир. Мәсәлән, Јеһова Һәвваја бүтүн Јер күрәсинин гајғысына галмағы етибар етмишди (Јар. 1:28). О бунунла ҝөстәрмишди ки, Һәвваја Адәмдән ашағы сәвијјәли бири кими јох, ону тамамлајан бир көмәкчи кими јанашыр. Һәмчинин Јеһова Дәбурә вә Һүлда адлы гадын пејғәмбәрләрә бүтүн халга, о ҹүмләдән бир һакимә вә падшаһа мәсләһәт вермәји һәвалә етмишди (Һак. 4:4—9; 2 Пад. 22:14—20). Бу ҝүн Јеһова мәсиһи баҹыларымыза да Өз ишини етибар едиб. Бу садиг баҹыларымыз тәблиғчи, өнҹүл, хүсуси тәјинатлы мүждәчи кими хидмәт едирләр. Онлар ибадәт евләринин вә филиалларын дизајнына, тикинтисинә вә тәмиринә көмәк едирләр. Онлардан бәзиләри Бејтелдә, бәзиләри исә тәрҹүмә офисләриндә хидмәт едир. Бу гадынлар Јеһованын ирадәсини јеринә јетирмәк үчүн јығдығы бир ордудур (Зәб. 68:11). Бәли, Јеһова гадынлары зәиф, баҹарыгсыз һесаб етмир.

ГАРДАШЛАР ЈЕҺОВАДАН ӨРНӘК АЛАРАГ ГАДЫНЛАРА НЕҸӘ ЈАНАШМАЛЫДЫР?

Әзиз гардашлар, мәсиһи гадынлара Јеһова кими јанашыб-јанашмадығынызы неҹә өјрәнә биләрсиниз? Бунун үчүн дүшүнҹә вә давранышларынызы дүрүстҹәсинә јохламалысыныз. Буну киминсә көмәји илә етмәк олар. Рентҝен апараты инсанын үрәјинин сағламлығыны јохладығы кими, јахшы бир достунуз вә Аллаһын Кәламы да сизә гадынларла бағлы мәнфи дүшүнҹәнизин олуб олмадығыны үзә чыхармаға көмәк едәҹәк. Бәс бу көмәкдән неҹә јарарлана биләрсиниз?

Достунузун фикрини өјрәнин (Мәс. 18:17). Етибар етдијиниз меһрибан вә дәрракәли бир баҹыја вә ја гардаша бу суаллары верә биләрсиниз: «Сәнҹә, мән баҹыларла неҹә рәфтар едирәм? Баҹыларын фикринҹә, онлара һөрмәт едирәм? Онларла рәфтарымда нәләрисә јахшылашдырмағыма еһтијаҹ вар?» Достунуз дүзәлтмәли олдуғунуз һансыса саһәләри вурғуласа, өзүнүзә һагг газандырмаға чалышмајын. Әксинә, дәрһал лазым олан дәјишикликләри един.

Аллаһын Кәламыны мүталиә един. Баҹыларла неҹә рәфтар етдијинизи билмәјин ән јахшы јолу Мүгәддәс Китаб васитәсилә дүшүнҹә вә давранышларынызы јохламагдыр (Ибр. 4:12). Орада гадынларла һәм јахшы, һәм дә пис рәфтар едән кишиләр һагда јазылыб. Онларын һәрәкәтләрини өз һәрәкәтләринизлә мүгајисә един. Һәмчинин еһтијатлы олун ки, Мүгәддәс Китабдан бир ајәни ҝөрүб онун гадынлар һагда јанлыш фикри дәстәкләдијини дүшүнмәјәсиниз. Әксинә, контекстә вә диҝәр ајәләрә нәзәр салыб кишинин гадынла неҹә рәфтар етмәли олдуғуна бахын. Мәсәлән, 1 Бутрус 3:7 ајәсиндә дејилир ки, «гадын даһа зәиф варлыг олдуғу үчүн» әри она һөрмәт гојмалыдыр b. Бәс бу о демәкдир ки, гадын кишидән даһа ашағыдыр, авамдыр, баҹарыгсыздыр? Бу, гәтијјән белә дејил. Бутрусун сөзләрини Галатијалылара 3:26—29 ајәләри илә тутушдурун. Орада ҝөрүрүк ки, Јеһова Иса илә бирҝә ҝөјдә һакимијјәт сүрмәк  үчүн кишиләрлә јанашы, гадынлары да сечиб. Бәли, Аллаһын Кәламыны мүталиә едәндә, достунуздан гадынлара неҹә јанашдығынызла бағлы фикрини сорушанда баҹыларымыза лазымынҹа һөрмәт етмәјин јолларыны өјрәнәҹәксиниз.

АҒСАГГАЛЛАР БАҸЫЛАРА ҺӨРМӘТ ГОЈМАГДА БАШГАЛАРЫНА НЕҸӘ НҮМУНӘ ОЛА БИЛӘР?

Јығынҹагдакы гардашлар баҹылара һөрмәт гојмағы ағсаггалларын нүмунәсиндән дә өјрәнә биләрләр. Ағсаггаллар бу мәсәләдә онлара һансы нүмунәни гојур? Ҝәлин конкрет саһәләрә бахаг.

Ағсаггаллар баҹылары тәрифләјир. Һәвари Булус ағсаггаллара ҝөзәл нүмунә гојуб. О, Ромадакы јығынҹаға јаздығы мәктубунда бир нечә баҹыны тәрифләмишди (Ром. 16:12). Тәсәввүр едирсиниз, бу мәктуб јығынҹагда охунанда һәмин баҹылар нә гәдәр севинмишди?! Ејнилә ағсаггаллар да баҹылары ҝөзәл хүсусијјәтләринә вә Јеһованын јолунда ҝөрдүјү ишләрә ҝөрә үрәкдән тәрифләјирләр. Бунунла баҹылара нә гәдәр һөрмәт етдикләрини, дәјәр вердикләрини ҝөстәрирләр. Ағсаггалларын руһландырыҹы сөзләри баҹылара Јеһоваја хидмәтләрини сәдагәтлә давам етдирмәјә көмәк едә биләр. Һәмин баҹыларын ән чох еһтијаҹ дујдуглары шеј елә бу ола биләр (Мәс. 15:23).

Ағсаггаллар баҹылары конкрет шејә ҝөрә тәрифләјирләр вә буну сәмими-гәлбдән едирләр. Ҹесика баҹы дејир: «Гардашлардан “афәрин” сөзүнү ешитмәк хошдур. Амма гардаш адамы конкрет шејә ҝөрә тәрифләјәндә бу лап хош олур. Мәсәлән, ушағымыза јығынҹагда сакит отурмағы өјрәтдијимизә ҝөрә, ја да Мүгәддәс Китаб шаҝирдимизи јығынҹаға ҝәтирмәјә вахт ајырдығымыза ҝөрә тәрифләјәндә». Ағсаггалларын конкрет тәриф сөзләри баҹылара өзләрини јығынҹагда лазымлы вә дәјәрли һисс етдирир.

Ағсаггаллар баҹылара гулаг асыр. Тәвазөкар ағсаггаллар баша дүшүр ки, јахшы фикирләр тәкҹә  онларын ағлына ҝәлмир. Буна ҝөрә дә онлар баҹыларын да фикрини сорушурлар вә баҹылар данышанда диггәтлә гулаг асырлар. Бу һәм баҹылары үрәкләндирир, һәм дә ағсаггалларын өзләринә хејир ҝәтирир. Нәјә ҝөрә белә демәк олар? Бејтелдә хидмәт едән Һерардо адлы ағсаггал дејир: «Баҹыларын фикрини өјрәнмәк мәнә ишими даһа кејфијјәтли ҝөрмәјә көмәк едир. Чүнки баҹылар һансыса иши әксәр гардашлардан даһа узун мүддәтдир ки ҝөрүрләр». Јығынҹагда чох баҹы өнҹүл кими хидмәт едир. Буна ҝөрә дә онлар јерли әразинин инсанлары барәдә чох шеј билирләр. Брајн адлы ағсаггал дејир: «Баҹыларымызын тәшкилата лазым олан баҹарыглары, ҝөзәл хүсусијјәтләри о гәдәр чохдур ки! Буна ҝөрә дә онларын тәҹрүбәсиндән јарарланын».

Һикмәтли ағсаггаллар баҹыларын тәклифләрини рәдд етмәјә тәләсмир. Едвард адлы ағсаггал белә сөзләр дејир: «Баҹыларын фикирләри вә тәҹрүбәләри гардаша мәсәләни даһа әтрафлы ҝөрмәјә вә башгаларына гаршы даһа анлајышлы олмаға көмәк едә биләр» (Мәс. 1:5). Һәтта ағсаггал баҹынын тәклиф етдији кими давранмаса да, јенә дә она тәклифинә вә дәрракәсинә ҝөрә миннәтдарлығыны билдирә биләр.

Ағсаггаллар баҹылара тәлим верир. Һикмәтли ағсаггаллар фүрсәт јарананда баҹылара нәсә өјрәтмәјә чалышыр. Мәсәлән, онлар баҹылара, вәфтиз олунмуш гардаш олмајанда тәблиғ ҝөрүшүнү неҹә апараҹагларыны өјрәдирләр. Һәмчинин баҹыларымыза тәшкилатымызын тәмир вә тикинти лајиһәләриндә көмәк едә билмәләри үчүн лазыми аваданлыгларла ишләмәји өјрәдә биләрләр. Јахуд да Бејтелдә нәзарәтчиләр баҹылара тәмир, алыш-вериш, мүһасибатлыг, компүтер програмлашдырмасы вә диҝәр саһәләрлә бағлы тәлим кечирләр. Ағсаггаллар баҹылара тәлим вермәклә ҝөстәрирләр ки, онларын баҹарыглы, етибара лајиг олдуғуна әминдирләр.

Әксәр баҹылар ағсаггаллардан алдыглары тәлими башгаларынын хејри үчүн истифадә едирләр. Мәсәлән, бәзи баҹылар тикинтидә газандыглары тәҹрүбә сајәсиндә тәбии фәлакәтдән зәрәрчәкәнләрә евләрини бәрпа етмәјә көмәк едирләр. Башга баҹылар исә иҹтимаи шаһидликлә бағлы өјрәндикләрини диҝәр баҹыларла бөлүшүрләр вә онлар да бу хидмәт нөвүндә иштирак едә билирләр. Баҹыларымыз онлара тәлим верән ағсаггаллара неҹә јанашыр? Ҹенифер баҹы дејир: «Бир ибадәт евинин тикинтисиндә ишләјәндә нәзарәтчи вахт ајырыб мәнә тәлим вермишди. О, ҝөрдүјүм ишә фикир вериб мәни тәрифләјирди. Һәмин гардашла ишләмәк мәнә чох хош иди. Чүнки онун мәнә дәјәр вердијини, етибар етдијини һисс едирдим».

ЈЫҒЫНҸАГДАКЫ БАҸЫЛАРА ДОҒМАНЫЗ КИМИ ЈАНАШЫН

Јеһова кими биз дә сәдагәтли баҹыларымызы чох севирик! Буна ҝөрә дә онлара өз аилә үзвүмүз кими јанашырыг (1 Тим. 5:1, 2). Онларла чијин-чијинә әмәкдашлыг етмәк бизим үчүн шәрәфдир вә бунунла гүрур дујуруг. Баҹыларын севҝимизи, дәстәјимизи һисс етдијини билмәк бизи чох севиндирир. Ванесса баҹы дејир: «Јеһованын тәшкилатында чох гардаш вар. Онлар мәни о гәдәр руһландырыб ки! Белә бир тәшкилатда мәнә јер вердији үчүн Јеһоваја һәдсиз миннәтдарам». Тајванда јашајан бир баҹы исә белә дејир: «Јеһова вә тәшкилаты гадынлара, онларын һиссләринә бөјүк дәјәр верир. Бунлара ҝөрә Аллаһыма шүкүр олсун. Бу мәним иманымы мөһкәмләндирир вә Јеһованын тәшкилатында олмағын гәдрини даһа да чох билирәм».

Јеһова мәсиһи гардашларын гадынлара Онун кими дәјәр вердијини, һөрмәт етдијини ҝөрәндә гүрур дујур! (Мәс. 27:11). Шотландијада ағсаггал кими хидмәт едән Бенҹамин гардаш дејир: «Бу дүнјада гадынлара һөрмәт гојулмур. Буна ҝөрә дә истәјирик ки, баҹыларымыз ибадәт евинә ҝәләндә тамамилә фәргли мүнасибәт ҝөрсүнләр». Одур ки, ҝәлин һәр биримиз Јеһовадан өрнәк алараг баҹыларымыза лајиг олдуглары севҝини вә һөрмәти ҝөстәрәк (Ром. 12:10).