May mga nagdakula sa kultura kun sain ibinibilang kan dakul na lalaki na mas hababa an mga babayi. Halimbawa, si Hans, na sarong paraataman nin sirkito sa Bolivia, nagsabi: “May mga lalaki na pinadakula sa sarong kultura na halangkawon na marhay an paghiling sa mga lalaki, kaya naitatadom sa isip ninda na mas nakakalabi an mga lalaki kisa sa mga babayi.” Si Shengxian, na sarong elder sa Taiwan, nagsabi: “Sa lugar mi, iniisip kan dakul na lalaki na dai dapat magtao sainda nin opinyon an mga babayi. Kun an sarong lalaki magsambit nin opinyon hali sa sarong babayi manungod sa sarong bagay, puwede siyang menuson kan mga kapwa niya lalaki.” Ipinapahiling man kan ibang mga lalaki an pagdiskriminar ninda sa mga babayi sa bakong risang mga paagi. Halimbawa, puwede sindang magsambit nin mapangmenos na mga suba manungod sa mga babayi.

Maray na sana ta puwedeng magbago an sarong lalaki ano man na kultura an dinakulaan niya. Puwede niyang mahali an pagmati na mas nakakalabi an mga lalaki kisa sa mga babayi. (Efe. 4:​22-24) Magigibo ini paagi sa pag-arog sa halimbawa ni Jehova. Sa artikulong ini, pag-uulayan ta kun paano ni Jehova tinatratar an mga babayi, kun paano manunudan kan mga brother na maarog si Jehova sa pagtratar sa mga babayi, asin kun paano manginginot an mga elder sa pagpahiling nin paggalang sa mga sister.

PAANO NI JEHOVA TINATRATAR AN MGA BABAYI?

Nagpahiling si Jehova nin perpektong halimbawa kun paano tatrataron an mga babayi. Bilang sarong mapagmalasakit na Ama, namumutan niya an saiyang pamilya nin mga tawo. (Juan 3:16) Asin an maimbod na mga sister garo mga aking babayi na namumutan niyang marhay. Pag-isipan an nagkapirang halimbawa kun paano tinawan ni Jehova nin dignidad an mga babayi.

Tinatratar niya sinda nin daing pagpapalain-lain. Linalang ni Jehova an mga lalaki saka babayi uyon sa saiyang ladawan. (Gen. 1:27) Dai niya ginibo an mga lalaki na mas madunong o mas may talento kisa sa  mga babayi; ni mas pinapaburan an mga lalaki kisa sa mga babayi. (2 Cron. 19:7) Linalang niya an mga lalaki saka mga babayi na may parehong mental na kapasidad para masabutan an mga katotoohan sa Bibliya asin hurop-hurupon an saiyang magagayon na kuwalidad. Pantay man an pagpapahalaga ni Jehova sa pagtubod kan mga lalaki saka mga babayi—sinda man may paglaom na mabuhay nin daing katapusan sa paraisong daga o maglingkod bilang mga hadi asin saserdote sa langit. (2 Ped. 1:​1, nota sa ibaba) Malinaw, mayong pagpapalain-lain si Jehova sa mga babayi.

Dinadangog niya sinda. Interesado si Jehova sa namamatian asin ikinakahadit kan mga babayi. Halimbawa, dinangog niya asin sinimbag an mga pamibi ni Raquel asin ni Hana. (Gen. 30:22; 1 Sam. 1:​10, 11, 19, 20) Pinasabngan man ni Jehova an mga kagsurat kan Bibliya na iiba an mga istorya kan mga lalaki na nagdangog sa mga babayi. Halimbawa, sinunod ni Abraham an instruksiyon ni Jehova na magdangog sa agom niyang si Sara. (Gen. 21:​12-14) Si Hading David nagdangog ki Abigail. Sa katunayan, inisip niya na isinugo ini ni Jehova para makipag-ulay saiya. (1 Sam. 25:​32-35) Si Jesus, na perpektong ipinahiling an mga kuwalidad kan saiyang Ama, nagdangog sa saiyang ina, si Maria. (Juan 2:​3-10) Idinuduon kan mga halimbawang ini na an sarong paagi na ipinapahiling ni Jehova an paggalang sa mga babayi iyo an pagdangog sa sainda.

Nagtitiwala siya sa sainda. Halimbawa, pinagkatiwalaan ni Jehova si Eva na tumabang sa pag-ataman sa bilog na daga. (Gen. 1:28) Sa paggibo kaiyan, ipinahiling niya na dai niya ibinilang si Eva na mas hababa kisa sa agom niyang si Adan, kundi sarong kakomplemento. Pinagkatiwalaan man ni Jehova an mga propetisang si Debora asin Hulda na magtao nin sadol sa saiyang banwaan, kaiba na an sarong hukom asin sarong hadi. (Huk. 4:​4-9; 2 Ha. 22:​14-20) Sa ngunyan, pinagkakatiwalaan ni Jehova an mga Kristiyana sa pagsagibo kan saiyang gibuhon. An maimbod na mga sister na ini naglilingkod bilang mga parahayag, payunir, asin mga misyonera. Nagtatabang sinda sa pagdisenyo, pagtugdok, asin pagmentenar nin mga Kingdom Hall asin mga pasilidad nin sangang opisina. An pira sainda naglilingkod sa Bethel; an iba naglilingkod sa mga remote translation office. An mga sister na ini garo sarong dakulang hukbo na ginagamit ni Jehova para magibo an saiyang kabutan. (Sal. 68:11) Malinaw na dai ibinibilang ni Jehova an mga babayi na maluya o daing kakayahan.

PAANO MANUNUDAN KAN MGA BROTHER NA MAAROG SI JEHOVA SA PAGTRATAR SA MGA BABAYI?

Mga brother, para maaraman kun baga an pagtratar ta sa Kristiyanang mga sister kapareho kan ki Jehova, kaipuhan niyatong onestong ebalwaron an satong kaisipan asin paggawi. Para magibo iyan, kaipuhan ta nin tabang. Kun paanong puwedeng mahiling sa sarong X-ray machine an medikal na kondisyon kan literal na puso nin sarong tawo, an sarong marahay na amigo asin an Tataramon nin Diyos makakatabang sa sato na mahiling an ano man na negatibong sabuot manungod sa mga babayi na tibaad nasa panglaog na pagkatawo ta. Ano an magigibo ta para mag-ako nin siring na tabang?

Maghapot sa sarong amigo. (Tal. 18:17) Marahay kun madulok kita sa sarong pinagtitiwalaan na amigo, na midbid sa pagigin mabuot asin rasonable, asin haputon siya nin arog kaining mga hapot: “Ano an masasabi mo sa pagtratar ko sa mga sister? Namamati daw ninda na iginagalang ko sinda? May magigibo daw ako para mas magin marahay an pagtratar ko sainda?” Kun may sinabi an amigo mo na mga dapat mong pauswagon, likayan na ipangatanusan an sadiri. Imbes, magin andam na gumibo nin kinakaipuhan na mga pagbabago.

Pag-adalan an Tataramon nin Diyos. An pinakamarahay na paagi para maaraman kun marahay an pagtratar ta sa mga sister iyo an pagsiyasat kan satong sabuot asin paggawi gamit an Tataramon nin Diyos. (Heb. 4:12) Mantang pinag-aadalan ta an Bibliya, maaaraman ta an manungod sa mga lalaki na marahay saka idtong bakong marahay an pagtratar sa mga babayi. Dangan, puwede tang ikumparar an saindang mga paggawi sa satong paggawi. Dugang pa, an pagkumparar sa mga bersikulo sa Bibliya makakatabang sa sato na malikayan an dai tuyong pag-interpretar kan kasuratan sa salang paagi para suportaran an salang pagmansay na igwa kita manungod sa mga babayi. Halimbawa, sinasabi sa 1 Pedro 3:7 na an sarong agom na babayi dapat na tawan nin “onra na arog kan sa mas mapapasaon na lalagan.” a Buot sabihon daw kaiyan mas hababa siya—bakong gayong madunong o kulang an kakayahan—kun  ikukumparar sa sarong lalaki? Bako nanggad! Ikumparar an mga sinabi ni Pedro sa sinasabi kan Galacia 3:​26-29, na diyan sinambit na si Jehova nagpili nin mga babayi saka mga lalaki na magin kaiba ni Jesus na tagapamahala sa langit. Kun pag-aadalan ta an Tataramon nin Diyos asin hahaputon an sarong amigo kun ano an masasabi niya sa kun paano ta tinatratar an mga babayi, makakanuod kita kun paano ipapahiling an paggalang sa satong mga sister sa tamang paagi.

PAANO IPINAPAHILING KAN MGA ELDER AN PAGGALANG SA MGA SISTER?

Makakanuod man an mga brother sa kongregasyon kun paano tatrataron nin may paggalang an mga sister paagi sa pag-arog kan halimbawa kan mamumuton na mga elder. Paano nanginginot an mga elder sa pagpahiling nin paggalang sa mga sister? Pag-isipan an nagkapirang espesipikong mga paagi.

Kinokomendaran ninda an mga sister. Nagtao si apostol Pablo nin marahay na halimbawa na puwedeng arugon kan mga elder. Sa surat niya sa kongregasyon sa Roma, kinomendaran niya an nagkapirang sister. (Roma 16:12) Naiimahinar mo daw an kaugmahan kan mga sister na idto kan basahon sa kongregasyon an surat ni Pablo? Pirmi man na kinokomendaran kan mga elder an mga sister huli sa marahay nindang mga kuwalidad asin sa mga ginigibo ninda para ki Jehova. Paagi kaini, namamati kan mga sister na iginagalang asin pinapahalagahan sindang marhay. An nakakapakusog na mga tataramon kan sarong elder puwedeng iyo mismo an kaipuhan kan mga sister na ini mantang padagos sindang maimbod na naglilingkod ki Jehova.​—Tal. 15:23.

Pag kinokomendaran an mga sister, hinihinguwa kan mga elder na magin sinsero asin espesipiko. Taano? An sister na si Jessica nagsabi: “Nakakaugma pag an mga brother nagsasabi sa sarong sister nin ‘mahusay.’ Pero mas napapahalagahan mi pag an mga brother kinokomendaran kami para sa sarong espesipikong bagay, arog kan pagtukdo sa samong mga aki na dai magpararibok pag nasa mga pagtiripon o an pagtao mi nin panahon para sunduon an  sarong tinutukduan sa Bibliya pasiring sa pagtiripon.” Pag kinokomendaran kan mga elder an mga sister para sa sarong espesipikong bagay, naipapamati ninda sa mga sister na kaipuhan sinda asin mahalaga sa kongregasyon.

Nagdadangog sinda sa mga sister. Aram kan mapakumbabang mga elder na bako sana sinda an may magagayon na ideya. An siring na mga elder naghahagad nin suhestiyon sa mga sister, asin nagdadangog sindang marhay pag nagtataram an mga sister. Sa paggibo kaiyan, napapakusog ninda an mga sister asin nakikinabang an mga elder. Paano? An elder na si Gerardo, na naglilingkod sa Bethel, nagsabi: “Nahiling ko na an paghagad nin opinyon sa mga sister nakakatabang sa sako na mas mapakarhay an trabaho ko. Sa parati, mas haloy na nindang ginigibo an sarong trabaho kisa sa kadaklan na brother.” Sa kongregasyon, dakul na sister an naglilingkod bilang regular payunir, kaya mas kabisado ninda an mga nakaistar sa teritoryo. An elder na si Bryan nagsabi: “Dakul nin maitatabang sa organisasyon an satong mga sister. Kaya makinabang sa eksperyensiya ninda!”

An madunong na mga elder dai binabaliwala an suhestiyon kan mga sister. Taano? “An opinyon asin eksperyensiya nin sarong sister puwedeng makatabang sa sarong brother na mas masabutan an sarong bagay, asin makakatabang iyan saiya na mas masabutan an pagmati kan iba,” an sabi kan elder na si Edward. (Tal. 1:5) Asin dawa ngani dai man magagamit kan elder an suhestiyon kan sarong sister, puwede niya man giraray ining pasalamatan sa suhestiyon asin obserbasyon kaini.

Sinasanay ninda an mga sister. An mapagmansay na mga elder naghahanap nin mga oportunidad para sanayon an mga sister. Halimbawa, puwede nindang tukduan an mga sister kun paano manginginot sa mga pagtiripon bago maglingkod sa langtad enkaso mayong mag-abot na bawtisadong brother. Puwede nindang sanayon an mga sister na maggamit nin mga tools o makinarya tanganing makatabang sinda sa teokratikong mga proyekto nin pagtugdok asin pagmentenar. Sa Bethel, sinasanay kan mga overseer an mga sister para gibuhon an manlain-lain na asignasyon, arog kan sa maintenance, purchasing, accounting, computer programming, asin iba pa. Pag sinasanay kan mga elder an mga sister, ipinapahiling ninda na an mga sister igwa nin kakayahan saka mapagtitiwalaan.

Ginagamit kan dakul na sister an pagsasanay na inako ninda hali sa mga elder para tabangan an iba. Halimbawa, may mga sister na ginagamit an pagsasanay sainda sa mga proyekto nin pagtugdok para tumabang sa iba na hirahayon an saindang mga harong pagkatapos nin sarong kalamidad. Ginagamit man kan iba an mga kasanayan na nanudan ninda sa pagpapatotoo sa publiko para tumabang sa pagsanay sa dakul pang mga sister sa arog kaiyan na paagi nin ministeryo. Ano an masasabi kan mga sister sa mga elder na nagsanay sainda? An sister na si Jennifer nagsabi: “Kan magboluntaryo ako sa pagtugdok nin Kingdom Hall, sarong overseer an nagtao nin panahon para sanayon ako. Narisa niya an trabaho ko, asin kinomendaran niya ako huli kaiyan. Nauugma akong makatrabaho siya ta pagmati ko pinapahalagahan ako saka pinagtitiwalaan.”

MGA PAKINABANG KAN PAGTRATAR SA MGA SISTER BILANG KAPAMILYA

Namumutan ta an satong maimbod na mga sister arog kan pagkamuot sa sainda ni Jehova! Kaya tinatrato ta sinda bilang kapamilya. (1 Tim. 5:​1, 2) Nakakaugma asin sarong onra na makaibanan ta sinda sa paglilingkod. Asin nauugma kitang marhay pag namamati ninda an satong pagkamuot saka suporta. An sister na si Vanessa nagsabi: “Nagpapasalamat akong marhay ki Jehova na parte ako kan saiyang organisasyon, kaibanan an dakul na brother na nagpapakusog na marhay sa sako.” Sarong sister sa Taiwan an nagsabi: “Nagpapasalamat talaga ako na pinapahalagahan na marhay ni Jehova saka kan saiyang organisasyon an mga babayi asin an samong namamatian. Pinapakusog kaini an sakong pagtubod asin mas lalo kong naaapresyar an pribilehiyo ko na magin parte kan organisasyon ni Jehova.”

Siguradong proud na marhay si Jehova pag nahihiling niya an maimbod na mga Kristiyanong lalaki na naghihinguwang mansayon asin trataron an mga babayi arog kan pagtratar niya! (Tal. 27:11) “Hababang marhay an paghiling kan kinaban sa mga babayi,” an sabi kan elder sa Scotland na si Benjamin. “Kaya pag naglalaog sa Kingdom Hall an mga babayi, sinisigurado ming mamati ninda an samong paggalang asin pagkamuot sa sainda.” Lugod na gibuhon ta an satong pinakamakakaya na arugon si Jehova paagi sa pagtratar sa satong namumutan na mga sister nin may pagkamuot saka paggalang na maninigo nanggad para sa sainda.​—Roma 12:10.