Piga-piga kalak ipebelin bas budaya si teremen dilaki la ngergai diberu. Contohna, Hans, sekalak pertua keliling i Bolivia, ngataken, “Piga-piga dilaki ipebelin bas budaya si nganggap dilaki ergan asangken diberu. Emaka rusur la mehuli perbahanen kalak e man diberu.” Shengxian, sekalak pertua i Taiwan, ngataken, “Bas inganku tading, melala dilaki si erpengakap maka diberu la banci ikut campur bas urusen kalak e. Adi sekalak dilaki nuriken pendapat diberu, lemah iakap teman-temanna ia.” Lit ka dilaki-dilaki si ngerendahken diberu alu cara si lebih halus. Contohna, ban kalak e pertawan si ngerendahken diberu.

Untungna, sekalak dilaki si ipebelin bas budaya si bage banci ngubah perukurenna kerna diberu alu ngusih Jahwe. (Ep. 4:​22-24) Bas artikel enda, sibahas kari uga perbahanen Jahwe man diberu, uga turang senina si dilaki banci ngusih perbahanen Jahwe man diberu, ras uga pertua-pertua banci jadi usihen bas ngergai diberu.

UGA PERBAHANEN JAHWE MAN DIBERU?

Enggo iban Jahwe usihen si sempurna kerna uga cara Jahwe erurusen ras diberu. Selaku Bapak si perkuah, keleng ateNa kerina anak-anakNa manusia. (Joh. 3:16) Diberu-diberu si setia bali bagi anak diberu si meherga man baNa. Cuba ukuri uga cara Jahwe mbuktiken maka keleng ateNa diberu-diberu ras ergaiNa kalak e.

Perbahanen Jahwe la erpilihen man diberu. Iciptaken Jahwe dilaki ras diberu mirip ras Ia. (Kej. 1:27) Labo banNa beluhen dilaki asangken diberu. Labo ka kelengen ateNa dilaki asangken  diberu. (2 Kro. 19:7) Iciptaken Jahwe dilaki ras diberu alu kengasupen si seri guna ngangkai kebenaren Pustaka bage pe ngusih sipat-sipatNa si mehuli. Ergai Jahwe dilaki ras diberu si erkiniteken man baNa. Janah iberekenNa arapen si seri man dilaki ras diberu, eme nggeluh rasa lalap i doni ntah pe jadi raja-raja ras imam-imam i surga. (2 Pet. 1:1) Jelas me, meherga akap Jahwe diberu.

Begiken Jahwe diberu. Ermediate Jahwe nandangi perasan diberu ras masalah si adapi kalak e. Contohna, ibegikenNa ras ijawapNa toto Rahel ras Hanna. (Kej. 30:22; 1 Sam. 1:​10, 11, 19, 20) Arak-arak Jahwe ka penulis Pustaka guna ncatat kerna dilaki si nggit megiken diberu. Contohna, Abraham, ngikutken petunjuk Jahwe guna megiken diberuna, Sara. (Kej. 21:​12-14) Ibegiken Raja Daud Abigail. Ikataken Daud ka maka Jahwe me si ngutus Abigail guna ngerana ras ia. (1 Sam. 25:​32-35) Selain si e, Jesus, si ngusih sipat-sipat Bapakna alu sempurna megiken mamakna, Maria. (Joh. 2:​3-10) Contoh-contoh enda mbuktiken maka salah sada cara Jahwe ngergai diberu eme megiken kalak e.

Tek Jahwe man diberu. Contohna, tek Jahwe man Adam ras Hawa guna ngurus doni. (Kej. 1:28) Si e mbuktiken maka labo rendahen akap Jahwe Hawa asangken dilakina, Adam. Iban Jahwe Hawa jadi teman erdahin man Adam. Jahwe pe tek man Nabiah Debora ras Hulda guna mereken nasehat man umatNa, termasuk man hakim ras raja. (Hak. 4:​4-9; 2 Raj. 22:​14-20) Gundari, tek Jahwe man diberu Kristen guna ngelakoken tugas-tugas bas organisasiNa. Diberu-diberu si setia e ngelayani jadi perberita, perintis, bage pe utusen injil. Ikut ka kalak e nampati ngerancang, mbangun, bage pe ngurus Bale Kerajan ras fasilitas kantor cabang si debanna. Selain si e, lit ka si ngelayani bas Betel ras kantor penerjemahen. Turang senina si diberu e bali bagi pasuken si mbelin si igunaken Jahwe bas ngelakoken peratenNa. (Ms. 68:11) Jelas me, tek Jahwe man diberu-diberu janah labo anggapNa kalak e lemah janah la banci ngelakoken kai pe.

UGA DILAKI-DILAKI NGUSIH JAHWE SANGA ERURUSEN RAS DIBERU?

Kena turang senina si dilaki, gelah teh kena enggo nge usih kena perbahanen Jahwe sanga erurusen ras diberu, perlu pereksa kena perukuren ras perbahanen kena. Guna ngelakoken si e, perlu kena penampat. Bali bagi mesin X-ray banci cidahkenna penakit jantung sekalak jelma, teman si mehuli ras Kata Dibata pe banci nampati kita meteh perukuren negatip kerna diberu. Kai si perlu silakoken guna ndatken penampat e?

Sungkunlah temanndu si terteki. (Kua. 18:17) Banci sisungkun temanta si mehuli ras si seimbang carana rukur. Banci sisungkun bagenda, “Enggo nge mehuli perbahanenku man turang senina si diberu? Enggo nge gejapken kalak e maka kuergai kalak e, ntah lit nge si perlu kupehuli?” Adi ikataken temanndu e lit si perlu ipehulindu, ula belandu dirindu. Tapi nggitlah kam erban perubahen si iperluken.

Pelajarilah Kata Dibata. E me cara si mehulina guna meteh enggo nge mehuli perbahanenta man turang seninata si diberu. (Heb. 4:12) Bas Pustaka, mbue contoh kerna dilaki-dilaki si ngergai diberu ras si lang. Banci sibandingken perbahanen kalak e ras perbahanenta. Selain si e, gelah la siban ayat tertentu ndukung perukuren si salah kerna diberu, perlu sibandingken sada ayat ras ayat si debanna. Contohna, menurut 1 Petrus 3:​7, cataten i teruh, sekalak ndehara arus ihamati “sebap kalak e bagi benda si lebih lemah.” b Lebih rendah nge diberu asangken dilaki perban kurang beluhna ntah pe kurang gegehna? Lang. Cuba bandingken ayat e ras Galati 3:​26-29. I je, itulis Petrus maka enggo ipilih Jahwe diberu ras dilaki guna jadi penguasa radu ras Jesus i surga. Jelas me, alu mpelajari Kata Dibata ras nungkun temanta si terteki kerna uga perbahanenta man diberu, banci kita erlajar ngergai turang seninata si diberu.

 UGA PERTUA-PERTUA NGERGAI TURANG SENINA SI DIBERU?

Turang senina si dilaki si lit bas runggun banci erlajar ngergai turang senina si diberu alu ngikutken usihen pertua-pertua si perkeleng. Uga pertua-pertua jadi usihen bas si e? Mari siperdiateken piga-piga carana.

Ipuji pertua-pertua turang senina si diberu. Rasul Paulus eme usihen si mehuli man pertua-pertua. Ipujina piga-piga turang senina si diberu bas suratna man runggun i Roma. (Rom. 16:12) Pasti meriah kel akap turang senina si diberu e sanga surat Paulus ibacaken man kerina kalak bas runggun. Gundari pe, pertua-pertua nggit muji turang senina si diberu perban sipat-sipatna si mehuli ras pendahin si ilakokenna bas ngelayani Jahwe. Hasilna, banci igejapken turang senina si diberu maka kalak e tuhu-tuhu iergai. Kata-kata arah sekalak pertua banci mbelin pengaruhna man kalak e. Mon-mon, e me si iperluken turang senina si diberu gelah banci terus ngelayani Jahwe alu setia.—Kua. 15:23.

Sanga ipuji pertua-pertua turang senina si diberu, arah ukur nari min pujin e janah jelas ntah pe spesifik. Engkai? Sekalak turang senina si diberu si gelarna Jessica ngataken, “Meriah ukur kami adi ngata bujur turang senina si dilaki nandangi kerja keras kami. Tapi riahen ukur kami adi turang senina si muji kami e pujinna jelas. Misalna, perban ajari kami anak-anak kami gelah tenang kundul sanga perpulungen, ntah perban atur kami waktu kami guna ngelegi kalak si erlajar Pustaka reh ku perpulungen.” Adi jelas pujin si ibereken pertua-pertua man turang senina si diberu, banci gejapken kalak e maka kalak e iperluken ras iergai bas runggun.

Begiken pertua-pertua turang senina si diberu. Pertua-pertua si meteruk ukur tehna maka labo pendapatna ngenca si mehuli. Pertua-pertua si meteruk ukur nggit mindo penampat turang senina si diberu janah begikenna kalak e  alu tutus sanga kalak e ngerana. Alu bage, pertua-pertua mpegegehi turang senina si diberu janah kalak e pe ndatken manpaat. Engkai? Sekalak pertua si gelarna Gerardo, si ngelayani i Betel ngataken, “Perban kusungkun pendapat turang senina si diberu, banci reh sikapna kulakoken dahinku. Mon-mon, banci buen pengalamen kalak e asangken turang senina si dilaki.” Bas runggun, enterem turang senina si ngelayani jadi perintis, emaka mbue si iteh kalak e kerna kalak si tading bas daerah runggunna. Sekalak pertua si gelarna Bryan ngataken, “Turang seninata si diberu banci mbelin kel gunana man organisasi. Emaka simanpaatkenlah pengalamen kalak e.”

Labo mis isimpulken pertua-pertua maka pendapat arah turang senina si diberu e la cocok. Engkai? Sekalak pertua si gelarna Edward, ngataken, “Pendapat ras pengalamen arah turang senina si diberu banci nampati turang senina si dilaki guna ngangkai terdauhen kerna sada masalah janah si e pe banci nampati ia gelah reh ulina bas ncidahken sipat sepenggejapen.” (Kua. 1:5) Amin pe pendapat arah turang senina si diberu la banci ipakeken sekalak pertua, banci tetap ikatakenna bujur man bana perban enggo nggit ia ngukuri kerna si e ras mbagiken kai si itehna.

Ilatih pertua-pertua turang senina si diberu. Pertua-pertua si pentar daramina kesempaten guna ngelatih turang senina si diberu. Contohna, banci ajari kalak e turang senina si diberu uga carana mandu perjumpan guna erberita paksa la lit turang senina si dilaki si enggo iperidiken i je. Banci ka latih kalak e turang senina si diberu guna make alat-alat ntah pe mesin. Alu bage, banci sampati kalak e pembangunen ras perawaten proyek bas organisasi. Bas Betel, pengawas-pengawas banci ngelatih turang senina si diberu bas erbage-bage penugasen. Contohna, ngerawat bangunen ras si debanna, bas bagin pembelian, bagin keuangen, program komputer, ras si debanna. Adi ilatih pertua-pertua turang senina si diberu, ibuktiken kalak e maka ianggap kalak e turang senina si diberu banci iandalken ras terteki.

Enterem turang senina si diberu nggunaken pelatihen si idatna arah pertua-pertua guna nampati kalak si deban. Contohna, piga-piga turang senina si diberu nggunaken pelatihen si alokenna bas proyek pembangunen guna nampati mbangun mulihi rumah turang senina si enggo hancur perban kena bencana alam. Lit ka si ilatih mereken kesaksin bas ingan si enterem jelma guna nampati terbuen turang senina si diberu gelah ikut bas pelayanen si bage. Uga perasan turang senina si diberu e kerna pertua-pertua si ngelatih kalak e? Sekalak turang senina si diberu si gelarna Jennifer ngataken, “Sanga aku erdahin bas salah sada proyek pembangunen Bale Kerajan, lit sekalak pengawas si nggit mereken waktuna guna ngelatih aku. Iperdiatekenna pendahin si kulakoken janah pujina aku. Meriah kuakap kerja sama ras ia perban tek ia man bangku janah ergaina aku.”

KAI GUNANA ADI BAGI KELUARGATA SIBAN TURANG SENINA SI DIBERU?

Keleng ateta turang seninata si diberu si setia bali bagi Jahwe engkelengi kalak e. Emaka, bagi keluargatalah siban kalak e. (1 Tim. 5:​1, 2) Siergai kalak e janah bangga kita banci ngelayani radu ras kalak e. Sekalak turang senina si gelarna Vanessa ngataken, “Ngata bujur kel aku man Jahwe perban banci aku jadi bagin organisasiNa. Sebap i je mbue turang senina si dilaki situhu-tuhu mpegegehi aku.” Sekalak turang senina i Taiwan ngataken, “Ngata bujur kel aku perban Jahwe ras organisasiNa ngergai kami si diberu bage pe perasan kami. Si e mpegegehi kinitekenku janah reh bagesna pengerganku nandangi hak istimewaku banci jadi bagin arah organisasi Jahwe.”

Pasti bangga kel Jahwe sanga idahNa turang senina si dilaki ngusih Ia bas ngergai diberu. (Kua. 27:11) Bagenda nina sekalak pertua si gelarna Benjamin, “Enterem dilaki bas doni enda gundari sitik pe la ngergai diberu. Emaka sanga turang seninata si diberu reh ku Bale Kerajan, ateta min igejapkenna maka ia iergai ras ikelengi.” Mbera-mbera kerina kita asa ngasupta ngusih Jahwe alu engkelengi ras ngergai turang senina si diberu sebap si e patut ialoken kalak e.—Rom. 12:10.