Añahein wügüriña agüriarútiña lidan aban échuni le ñein lubéi hanügǘwa würiña kei ni kata. Kei hénpulu, abahüdaguati aban óunigiruti sirkuitu Boliwiana le gíribei Hans: “Añahein wügüriña agüriarútiña le ñein lubéi würiña lan adügübalin sun katei houn, ligíati, chouru habalin íñutima hamá hawéi würiña”. Ariñagati Shengxian, aban wéiyaali lidan afiñeni Taiwána: “Saminatiña wügüriña ha ñein lubéi nawinwanda, moun lumuti lan hádaragun würiña houngua lidoun le lunbei ladügüni aban wügüri. Anhein lariñaga aban wügüri le tasaminarubei aban würi, másiñati leferidiruni inebesei le asandirúbei luagu”. Amu wügüriña arufuda hamuti lábugiñegua mineben hamá würiña houn, kéiburi lau habahüdahan somu katei hawagu würiña lun héherahan amu lau.

Aban wügüri le aweiridubei lidan aban échuni ítarati, gayaraati lasansirun luma lun masaminarun lan íñutima hamá wügüriña hawéi würiña (Efe. 4:​22-24). Ida luba libihini? Lau láyeihani lani Heowá hénpulu. Warihiba lidan ariñahani le, ida liña lan lóuseruniña Heowá würiña lúmati ida luba lan hafurendeirun íbirigu wügüriña óuseraña würiña kei ladügüni Heowá, luma giñe ida luba lan híchugun wéiyaaña lidan afiñeni aban hénpulu buiti.

IDA LIÑA LÓUSERUNIÑA HEOWÁ WÜRIÑA?

Heowá ligía hénpulu le buídutimabei lidan houserúniwa würiña. Ligía aban Úguchili hínsiñehabuti ani hínsiñetiña sun lisaanigu lun (Huan 3:16). Würiña ha eseriwidubaña lun Heowá, ítara haña kei isaanigu ha hínsiñebaña lun saragu. Ariha wamá fiu hénpulu le arufudubalin hínsiñe hamá lun ani inebe hagía lun.   

Úati himei lániña hawéi amu. Adüga lumutiña Heowá dandu wügüriña kei würiña lenege guánarügü  (Agu. 1:27). Madügün lumutiña wügüriña lúntima chútima lan hau hawéi würiña ani míchuti giñe saragu iarani houn hawéi. Ru lumuti ligiaméme iarani houn biángubei lun gunfuranda hamani inarüni le tídanbei Bíbülia luma lun harufuduni lubuidun ligaburi. Úati himei lániña Heowá wügüriña hawéi würiña (2 Kro. 19:7). Gebegiti hafiñen würiña lun Heowá ítara kei gebegi lan hafiñen wügüriña ani rúhali houn súngubei emenigini lun hawinwandun lun súnwandan ya lan yebe ubouagu o sielu lan yebe kei urúeigu luma kei fádirigu (2 Fe. 1:1). Furanguti luagu úa lan himei lániña Heowá wügüriña hawéi würiña.

Aganba lumutiña. Bereseti Heowá lau le hasandirubei würiña luma luagu haturobulin. Kei hénpulu, aganba lumuti ani óunabalei tafurieidun Rakeli luma tafurieidun Ana (Agu. 30:22; 1 Sam. 1:​10, 11, 19, 20). Adügati giñe Heowá lun labürüdǘn tidan Lererun hiri wügüriña ha aganbubaliña würiña. Abüraámü aban hádangiñe, le gaganbadibei lun Heowá dan le lariñagubei lun lun ladügün gasu tau Sara to lani weiriou (Agu. 21:​12-14). Aganba lumutu giñe urúei Dawidi Awigaili. Lanwoun lira, ariñagati Dawidi Heowá lan óunahabarun lun tayanuha luma (1 Sam. 25:​32-35). Áyeiha lumuti giñe Hesusu ligaburi Lúguchi sin lachararun, ani aganba lumutu giñe Hesusu María to lúguchu (Huan 2:​3-10). Kei le aubei warihei lidan hénpulu burí le, arufudati aganba lániña Heowá würiña ani inebe hagía lun.

Afiñeti giñe hawagu. Kei hénpulu, ru lumuti Heowá dasi tun Ewa lun tídehan lidan lounigirún Ubóu (Agu. 1:28). Marihin lumutu kei aban würi ǘnabutu luéi Adán le tani weiriei, ariha lumutu kei louba o kei aban ídemuei. Ruti giñe dasi tun profeta Débora luma tun Huldá lun hadügüni dasi lun hadundehaniña lumutuniña, íbini alidihatiña hama urúeigu (Ali. 4:​4-9; 2 Uru. 22:​14-20). Uguñe weyu, afiñeti giñe Heowá hawagu lubúeingu ha würiña ani ruti giñe dasi houn. Íbirigu úaraguatiña ha heseriwiduña kei apurichihatiña, prekursorugu o misionerágu. Ídehatiña lidan adibuhani, ábunaguni luma lun tounigirún Luban Adamuridaguni tuma burí sukursáli. Añahein hádangiñe heseriwiduña Betelirugu luma tidan burí Áfisi lánina ásügüragüdüni lidoun amu iñeñein. Súngubei hagía layusuruñanu Heowá lun hadügüni dasi le lun hagunfulirun lau lugundan (Sal. 68:11). Furanguti marihin lániña Heowá würiña kamá hamuga débilitiña, marihin lumutiña giñe kei ni kata.

IDA LUBA HAFURENDEIRUN ÍBIRIGU WÜGÜRIÑA ÓUSERAÑA WÜRIÑA KEI LÓUSERUNIÑA HEOWÁ?

Íbirigu wügüriña, lun wasubudiruni luagu wóuseruñanu lan íbirigu würiña kei lóuseruniña Heowá, lunti wakutihani buidu ligaburi wasaminan luma ligaburi wadügüni katei. Lun lira, mégeitiwa ídemuei. Ítara kei gayara lan lasubudiruni máhina le gíribei rayos X titurobulin anigi, gayaraabei giñe líderaguniwa aban umadaü tuma Lererun Bungiu hasubudirei anhein wóuseruñanu lubéi würiña keisi lubudubu. Ariha waméi ida luba lan wóuseruniña.

Amuriaha wamá ídemuei luma aban umadaü le buiti (Ari. 18:17). Ayanuha wamá luma aban umadaü o tuma aban wamada, gürigia ha gayaraati lafiñerúniwa hawagu ha hínsiñehabutiña ani ariha hamutiña würiña keisi lubudubu, ani álügüdagua wamaña: “Ida liña barihini nóuseruniña würiña? Arihúati san inebe hamá nun? Gayaraati san nabuiduragüdüni nigaburi?”. Ánhaña íchiga somu adundehani woun masigenera wamaña. Le lunbei wadügüni, lun aranseñu wamá lun wadügüni asansiruni le mégeiwabei.

Aturiaha wamóun Lererun Bungiu. Aban igaburi le buiti lun wasubudiruni anhein wóuseruñanu lubéi íbirigu würiña buidu lau wagoubaguagüdüni wasaminan luma le wadügübei lumoun le tariñagunbei Bíbülia (Ebü. 4:12). Lau waturiahanu, wafurendeiruba hawagu wügüriña ha óuserubaliña würiña buidu hámati ha móuserubaliña buidu. Luagu aban oubaü, buídubei lun wagoubaguagüdün aban bérusu luma amu lun méiguadun wamá lidoun saminaü charati lánina wayusurun ítaga bérusu bóugudin luéi le ariñawagúbei hawagu würiña. Kei hénpulu, ariñagati 1 Féduru 3:7 lunti lan hínsiñe tan lani wügüri weiriou lun “mámarügü luéigiñe méretima hamá würiña”. b Mini lan san lira ǘnabutima tan würi luéi wügüri? Mini lan san giñe le lougua lan tisubudin o le tiyaraabei adüga? Úa, mítaranti! Lun masaminarun wamá wuriba luagu dimurei le lariñagubei Féduru, samina wamá luagu le lariñagubei Galasiana 3:​26-29. Afuranguagüdawati lidan bérusu le anúadira laaña lan Heowá dandu wügüriña kei würiña lun harúeiha luma Hesusu sielu. Ánhawa aturiahoun Bíbülia ani amuriaha wagíame adundehani luma aban umadaü le buiti o tuma aban umadaü  to buitu wafurendeiruba lun inebe hamá íbirigu würiña woun kei hadüna.

IDA LIÑA HARUFUDUNI WÉIYAAÑA LIDAN AFIÑENI INEBE HAMÁ IBIRIGU WÜRIÑA HOUN?

Gayaraati giñe hafurendeirun íbirigu wügüriña óuseraña íbirigu würiña lau inebesei lau harihini ida liña lan hadügüni wéiyaaña lidan afiñeni. Ida luba híchugun wéiyaaña lidan afiñeni aban buiti hénpulu? Warihaali fiu lídangiñe igaburi le ñein lubéi harufuda inebe hamá íbirigu würiña houn ani hínsiñe hagía houn.

Ariñagatiña houn buidu lan hadüga. Aban hénpulu buiti apostolu Pábulu houn wéiyaaña lidan afiñeni. Ladüga ariñagati houn saragu íbirigu würiña hagibugiñe amu buidu lan hadüga dan le labürühabarun gárada lun damuriguaü le Rómabei (Rom. 16:12). Saminatün san luagu ugundani le hasandirubei dan le taliihóunbei gárada to lidan damuriguaü? Ligiaméme giñe hagaburibei wéiyaaña lidan afiñeni, héchutiña ariñaga houn íbirigu würiña buidu lan hadüga luagu burí lubuidun igaburi le harufudubei luma luagu sun le hadügübei lidan heseriwidun lun Heowá. Adügati lira, lun hasandiragun houngua inebewa hamá ani gebegi hagía. Dimurei ruti dǘgüdaguaü le lariñagubei aban wéiyaali lidan afiñeni háfuga ligía lan habusenrubei íbirigu ha haganbun lun gayara lan hasigirun eseriwida lun Heowá lau úaraguni (Ari. 15:23).

Dan le hariñagun wéiyaaña lidan afiñeni houn íbirigu würiña luagu buidu lan hadüga, lunti hariñaguni tídangiñe sun hanigi luma lun hariñaguni giñe ka lan buiti le hadügübei. Ka uagu? Ariha waméi le tariñagubei Jessica: “Inarüni hínsiñe lan woun wagía le hiñaruñu lun lariñawagún woun ‘buidu lan wadüga’. Ruti saragu dǘgüdaguaü woun dan le hariñaguni woun buidu lan wadüga lidan ítaga burí katei, kéiburi, dan warufudahan houn wasaanigu lun buidu lan hóuserun lidan adamuridaguni o dan burí le woudin áluaha aban aturiahatu tídangiñeti Bíbülia lun wanügünu adamuridagua”. Dan le hariñagun wéiyaaña lidan afiñeni houn íbirigu würiña buidu lan hadüga lidan somu katei, adügati lun hasandiragun houngua mégeiwa hamá lidan damuriguaü luma lun hasandiragun houngua gebegi hamá.

 Aganba hamutiña. Subudi hamuti wéiyaaña lidan afiñeni ha ǘnabugubaña mámarügüñanu lan hagía lun buidu lan hasaminan. Ligía burí hálügüdübaliña íbirigu würiña ka lan hasaminarubei ani aganba hamuti le lunbei hariñaguni. Ítarati, súngubei hagía buiti lidin houn. Sandiguatiña íbirigu würiña houngua buidu. Ka buiti hasagarubei wéiyaaña lidan afiñeni? Ariñagati aban wéiyaali lidan afiñeni le eseriwidubei Betelirugu gíriti Gerardo: “Rútina fe, adundehani lan le híchugubei íbirigu würiña nun íderagua láadina lun buídutima lan nuadigimari. Lidan saragu kesi, barühaña íbirigu ha saragu dan adügei wadagimanu le hadügübei sügǘ hau íbirigu wügüriña”. Lidan damuriguaü añahein saragu íbirigu ha eseriwidubaña kei prekursora, ligíati subudi hamuti buidu fulasu le ñein lubéi burí wapurichihan. Ariñagati aban wéiyaali lidan afiñeni gíriti Bryan: “Gíbeti lunti híchuguni íbirigu würiña tun lóundarun Heowá. Furendei wamá lídangiñe hasubudin!”.

Manügün hamuti wéiyaaña lidan afiñeni le hariñagubei íbirigu würiña kei ni kata. Ka uagu buidu lubéi katei le? Afuranguagüda lumuti aban wéiyaaña lidan afiñeni gíriti Edward: “Le tariñagubei luma le winwan táalibei aban íbiri würi, gayaraati líderaguni aban íbiri wügüri lun gunfuranda lani aban katei buidu, ani le tariñagubei gayaraati giñe líderaguni lun gunfurandatima lani le hasandirubei amu” (Ari. 1:5). Anhein siñá lubéi ladügǘniwa le buga tasaminarubei aban íbiri, seremei habóun wéiyaaña lidan afiñeni luagu le tariñagubei luma luagu ligaburi tarihini katei.

Arufudahatiña houn. Arufudahatiña wéiyaaña lidan afiñeni lichú aau dan le háluahan chansi lun harufudahan houn íbirigu würiña. Gayaraati harufudahan houn lun hadügüni adamuridaguni lubá apurichihani ánheindügü úa aban íbiri wügüri le badiseihali ñein. Gayaraati giñe hafuranguagüdüni houn ida liña lan layusurún ítaga tulu luma máhina lun gayaraabei lan hídehan lidan bunaguaü o lidan laransehóuniwa somu katei tidan muna to ñein lubéi wáhuduragua lun Heowá. Tidan Beteli, íbirigu ha arihibaña luagu ítaga burí dasi arufudaaña houn íbirigu würiña lun gayaraabei lan híderaguniña lidan ámuñegueinarügü wadagimanu kéiburi, lidan laransehóun burí katei, agañeihani, kontabilidad luma burí lidan programa tani konputadora. Wéiyaaña lidan afiñeni ha arufudahabaña houn íbirigu würiña, arufuda hamuti luagu afiñe hamá hawagu luma iyaraani le hawagubei.

Saragu íbirigu würiña yusu hamuti sun le hafurendeirubei hámagiñe wéiyaaña lidan afiñeni lun gayaraabei lan híderaguniña amu. Añahein hádangiñe ha arufudahóuaalibei houn lidan bunaguaü ídehatiña lidan tábunawagun muna to burí agadeiruboun lárigiñe somu liñawan dan. Ha híbiri yusu hamuti le arufudahóubei houn lun hapurichihan lidan guririguaü lun gayaraabei lan harufudahan houn amu burí íbirigu würiña lun gayaraabei lan giñe hapurichihan lidan burí apurichihani libe le. Ka hasaminarubei íbirigu würiña hawagu wéiyaaña lidan afiñeni ha arufudahabaña houn? Abahüdahatu Jennifer: “Dan le nawadigimaridunbei lidan tábunawagun aban Luban Adamuridaguni, aban hádangiñe íbirigu ha arihibaña lau wadagimanu sagati dan lun gayaraabei lan larufudahan nun. Aríagu liña meha íbiri le lun sun le nadügübei ani aba burí lariñagun nun buidu lan nadüga. Hínsiñeti meha nun nawadigimaridun úara luma ladüga ariha nani afiñe lan nuagu ani sandiguatina nungua gebegi nan”.

BUITI LE ASAGARÚBEI LAU WÓUSERUNIÑA IBIRIGU WÜRIÑA KAMÁ LE WADUHEÑU

Ítara kei Heowá, hínsiñetiña wábirigu würiña woun. Óusera wamutiña kamá hamuga le waduheñu (1 Tim. 5:​1, 2). Gúndaatiwa saragu lau wáhuduragun lun Heowá úara hama. Gúndaatiwa saragu lau warihini luagu sandigua hamá houngua hínsiñewa hamá ani wíderaguñanu lan. Ariñagatu Vanessa: “Seremei numuti Heowá lau lígirun aban nan hádangiñe tílana lóundarun to buinboun hau eyeriñu ha adügübaña lun darangilu lan nasandiragun nungua”. Ariñagatu aban íbiri Taiwána: “Seremei numuti Heowá tau sun lóundarun saragu lau gebegi nan houn ani inebe ligía le nasandirubei dandu lun kei tun lóundarun. Derebugüda lumuti katei le nafiñen ani adügati le lun hínsiñetima lan lubuidun chansi le númabei nun hádangiñe nan lumutuniña Heowá”.

Chóuruti panta lan Heowá hau wügüriña kristiánugu ha áfaagubaña lun harihiniña ani óusera hamaña íbirigu würiña kei lóuseruniña (Ari. 27:11). Ariñagati aban wéiyaali lidan afiñeni Esükósiana gíriti Benjamin: “Saragu wügüriña lidan ubóu le minebentiña würiña houn. Ligíati, busentiwa danme lan le houdin würiña tidan Luban Wadamuridagun lun hasandiruni amu wamá hawéi gürigia ha ubouagubaña”. Áfaagua wamá lun wáyeihani Heowá luma lun wóuseruniña wábirigu würiña lau ínsiñeni luma lau inebesei le hadünabei (Rom. 12:10).