Alobwana ena onuwile mmuruddani muli elemelelo yowaweddiha ayana ninga attu ahina ttima. Motagiha, Hans nameddelela mulogo wo Bolívia, ohiloga: “Alobwana ena onuwile mmuruddani muli elemelelo enattukulela alobwana ovittukulela venjene, alobwana abo anorumela wi awene ahikana ttima wapitta ayana, ottiya ejo anowaweddiha nekalelo wohifwanyelela vina se nriho.” Shengxian, munddimuwa dhahi wa mulogo wo Taiwan, ohiloga: “Mmuruddani munkalimi alobwana enjene anubuwela wi kanfwanyela ologa makani a ayana. Akala mulobwana onologa makani avahaga monelo wa ayana, akwaye anompwaza.” Alobwana ena anolagiha watanya wawa ayana na mukalelo wottiyana. Motagiha, awene anokosa mavego alogaga mazu anaveyiha ayana.

Mohagalaliha-mwene, kawo mulobwana ohinwodha ottiya elemelelo ya mmuruddani munuwiliye. Nona enowodheya muttu ottiya yubuwelo yawi alobwana ahikana ttima wapitta ayana. (Ef. 4:​22-24) Ejo enwodheya akala ninofwara yotagiha ya Yehova. Mwari mwa nsunzo ntti ninele osunza mukalelo onaweddiha Yehova ayana, mukalelo onfwanyela abali osunza waweddiha ayana dhahene ninga munkosela Yehova, vina anddimuwa a mmulogoni anavahe dhavi yotagiha ya waweddiha ayana na nriho.

YEHOVA ONAWEDDIHA DHAVI AYANA?

Yehova onovaha yotagiha yapama ya waweddiha ayana. Ninga Babi wattagaraga, iyene onowakwela anaye. (Jo. 3:16) Arogora ororomeleya ali ninga ana a Yehova. Katanalela ttarho dhinfwarela dhinoniha mukalelo onaweddiha Yehova ayana.

Iyene onowaweddiha ayana se nsakulano. Yehova wattanddile alobwana na ayana oladdana na iyene. (Wita 1:27) Iyene kàvahile alobwana eziwelo  vina ttotto ya okosa dhilobo wapitta ayana, vina kanasakula alobwana àttiyaga ayana. (2 Map. 19:7) Yehova ohattandda alobwana na ayana na ewodhelo yakakene ya ononelamo ebaribari ya mBibiliani vina olagiha mikalelo dhaye dhapama. Yehova vina onoriha nroromelo na alobwana vamodha wa ayanaya—ahitanalaga akala njedhelo nawa ttokala velaboni ya vati obe ttolamulela wirimu ninga amwene vina anamakutta. (2 Ped. 1:1) Txibarene Yehova kana nsakulano na ayana.

Iyene onowavuruwana ayana. Yehova onozuzumela dhubuwelo na esile dhinazuzumiha ayana. Motagiha, iyene ohiwa vina ohitanala nlobelo na Rakeli vina Ana. (Wita 30:22; 1 Sam. 1:​10, 11, 19, 20) Yehova vina ohavudhelela alobwana wikamo mapadduwo anoniha wi alobwana annavuruwana ayana. Motagiha, Abrahamu ohifwara nlago naloga wi wanfwanyela onvuruwana mwadhiye, Sara. (Wita 21:​12-14) Mwene Davidi wahinvuruwana Abigail. Txibarene Davidi wahifiyedha wona wi ddi Yehova wamurumile Abigail wi aloge na iyene. (1 Sam. 25:​32-35) Yezu, ontagiha mowakwana-mwene mikalelo dha Babe ohinvuruwana maye, Maria. (Jo. 2:​3-10) Dhotagiha esi dhinowoniha mukalelo onariha Yehova ayana mwa wavuruwana.

Iyene onowakuluvela. Motagiha, Yehova wahimukuluveliha Eva wi agahiwodha okoya elabo ya vati. (Wita 1:28) Mwa okosa ejuwene, iyene ohoniha wi wannimonana ttima dhahene ninga mamunaye Adamu, masiki bali mukamihedhi waye. Yehova vina ohakuluvela anamavuhulela a ayana Debora na Hulda wila avahe malago nlogo naye, otaganyiha na amwene vina anamakutta. (Anam. 4:​4-9; 2 Amwe. 22:​14-20) Masaka abano Yehova onowakuluvela ayana a Akristu ankosa mabasa aye. Arogora abo ororomeleya anolaba ninga anamalaleya, apionera vina amisionária. Awene anokamihedha mabasa a omaga na ovenyihedha Nyumba dha Omwene, vina anolaba mmafiliali. Ena mwa aboya anokamihedha o Beteli; enagu ankamihedha mmakambirinyani otapulela. Arogora abo ali ninga nikuru ninalabihedha Yehova wi akwanihedhe efunelo yaye. (Masal. 68:11) Mohaganyedha, Yehova kanawona ayana ninga attu awobana obe ahinwodha elo.

ABALI ANAWODHE DHAVI WAWEDDIHA AYANA DHAHENE NINGA MUNKOSELA YEHOVA?

Abali, wila none mukalelo ofwanyelihu waweddiha arogora ali Akristu dhahene ninga munkosela Yehova, ninofwanyela ovipepesa nanya nonaga dhubuwelo na merelo ehu. Wi ejo ewodheye, enofuneya nikamihedho. Dhahene ninga makina a raio-X anwodha ozinddiyela akala murima wa muttu okana makattamiho, marho wapama obe Nzu na Mulugu dhinowodha onikamihedha wona akala mmurimani mwehu muhikala dhubuwelo dhohifwanyelela mwaha wa mukalelo onawona iyo ayana. Kito txini enfwanyelihu okosa wi nakele nikamihedhona ntto?

Kanvuze marho wofiyedheya. (Gano 18:17) Enokala yamalago ologa na marho wofiyedheya vina onloga ebaribari nimukosaga mavuzo aba: “Ninga munonela weyo miyo ddinaweddiha dhavi ayana? Awene anowona wi miyo ddinowariha? Akala vanfwanyelimi otxinja na mukalelo onaweddihemi?” Akala mukwawo onowuwaddela wi onofwanyela okosa matxinjo, kutamele ovibarela. Ottiya ejo, katamela marhe wa okosa matxinjo anfuneya.

Kasunza Nzu na Mulugu. Mukalelo wapama wa woona akala ninowaweddiha arogora pama bwa opepesa merelo ehu mowiwanana na Nzu na Mulugu. (Aheb. 4:12) Nigamusunzaga Bibilia ninowona dhotagiha dha alobwana aweddihile ayana na mukalelo wofwanyelela vina ena aweddihile na mukalelo wohifwanyelela. Venevo enowodheya oladdaniha merelo awa na meddelo ehu. Ottiya ejo, enowodheya olabihedha malebo a mBibiliani wila akamihedhe yubuwelo yehu yohifwanyelela mwaha wa mukalelo onaweddiha iyo ayana. Motagiha, 1 Pedro 3:​7, onloga wi muteliwi onofwanyela orihiwa sabwani “mukalelo wawa bofewa.” b Eji entapulela wi iyene ddofewa—obe kanetxa zelu—ompitta mulobwana? Kahiye mwenemo! Kaladdaniha mazu a Pedro anfwanyeya va Galásia 3:​26-29, anoniha wi Yehova onowasakula  alobwana vina ayana wila alamulele vamodha na Yezu wirimu. Nigasunza Nzu na mulugu vina nigamukumbirha marho wokuluveleya wi aloge mukalelo onaweddiha iyo ayana, ninele osunza wariha ayana ali arogorihu.

ANDDIMUWA A MMULOGONI ANAWODHE DHAVI OLAGIHA WI ANOWARIHA AYANA?

Abali a mmulogoni anowodha vina waweddiha ayana agafwara yotagiha ya anddimuwa a mmulogoni. Anddimuwa a mmulogoni anavahe dhavi yotagiha ya wariha arogora? Karoma otanalela ttarho dhinfwarela.

Awene anowatamalela arogora. Murumiwi Paulo ohittiya yotagiha yapama enfwanyela ofwara anddimuwa a mmulogoni. Mukartani nilebeliye mulogo w’o Roma iyene ohatamalelamo arogora enjene. (Rom. 16:12) Onowodha wubuwela wagalala okanile arogora aba mwiwalani karta nttile nengesiwaga mmulogoni? Na mukalelo wakakene, anddimuwa a mmulogoni anowatamalela arogora mwaha wa mikalelo dhawa dhapama vina mabasa animukoselani Yehova. Ejo enowattukulela arogoraya ononelamo wila anokweliwa venjene vina anorihiwa. Mazu olibiha anloga munddimuwa wa mmulogoni anodhaga okala abuwene anfuna arogora wiwa wila adhowegevi amulabelaga Yehova nororomeleya.—Gano 15:23.

Anddimuwa a mmulogoni agatamalelaga arogora, anofwanyela ologa mazu ebaribari vina ologa mwahaya onatamalelani. Sabwaya jani? Murogora onkuweliwa Jessica ohiloga: “Japama wawiwa abali alogaga ‘ddinoutamalela sabwa ya mabasa awo.’ Mbwenyi enokala yamakamaka akala abali anologa mwahaya ontamalelani, ninga motagiha, otamalela sabwa ya owodha wawang’anela ayima wi akalege omalene o matugumanoni obe omutamalela murogora onivilibihedha omudhowela namasunza waye wa Bibilia wi adhowe o matugumanoni.” Anddimuwa a mmulogoni agaatamalela arogora mwaha wa elobo enkosani, ejo  enowattukulela arogoraya woona wila anokweliwa, anorihiwa vina anokosa epaddi ya mulogo.

Awene anowavuruwana arogora. Anddimuwa a mmulogoni oviyeviha anoziwa wi kahiye awene bahi anwodha ovaha monelo wapama. Anddimuwa abo anowakumbirha arogora wi avahe malago awa, arogoraya agalogaga anowavuruwana na ofwaseya. Mwa okosa ejuwene, anddimuwa aba anowalibiha arogora vina anopurelamo. Dhavi? Munddimuwa wa mmulogoni mmodha onkuweliwa Gerardo, onkamihedha o Beteli, ohiloga: “Ddinononelamo wi malago anvaha arogora anoddikamihedha okosa pama mabasa aga. Dila dhina, arogora anowodha okosa pama mabasaya wapitta abali.” Mmulogoni, arogora enjene anolaba ninga apionera, dhahene awene anowaziwa pama attu a mmuruddani munlaleyani. Munddimuwa mwina wa mmulogoni onkuweliwa Bryan ohiloga: “Arogora ehu akana ttotto dhinjidhene, dhinwodha okamihedha nikuru na Yehova. Nona iyo ninopurelamo dhotagiha dhawa!”

Anddimuwa a mmulogoni a eziwelo kanmaguvela opwaza malago anvaha arogora. Sabwaya jani? Munddimuwa mmodha wa mulogo onkuweliwa Edward ohiloga: “Dhologa na malago anvaha murogora anowodha omukamihedha mbali ononelamo mowakwana-mwene makaniya vina anomuwodhiha watanala attu ena.” (Gano 1:5) Masiki akala munddimuwa wa mmulogoni kanalabihedhe malago avahile murogora, iyene onele omutamalela mwaha wa monelo waye vina ologa ejile enubuweliye sabwa ya makaniya.

Awene anowashagiha arogora. Anddimuwa a mmulogoni a eziwelo anotamela mudhidhi wa washagiha arogora. Motagiha, enowodheya awene washagiha owodha osogorhela mabasa a olaleya akala kavo mbali wobatiziwa. Anowodha vina oshagihiwa wi awodhe olaba na makina anlabiwana mmabasani a omaga vina a ovenyihedha nyumba dha munikuruni mwehu. O Beteli, anddimuwa ali asogorheli anowashagiha arogora wi awodhege ottidda mabasa menjene, otaganyiha na ovenyihedha, ogula dhilobo, kontabilidade, olaba na komputadori na mabasa mena. Anddimuwa a mmulogoni agàshagiha arogora anolagiha wi anokuluvela wi awene bororomeleya vina wi anele owodha wakwaniha mabasaya.

Arogora enjene anolabihedha mashagiho akelelilani na anddimuwa a mmululogoni wila apurihena attu ena. Motagiha, arogora ena ashagihiwe mabasa a omaga anolabihedha eziwelo yawa wila akamihedhena abali ovenyihedha nyumba dhawa agapattiwa efoyo. Arogora ena anolabihedha ewodhelo yawa ya ovaha onamoona wa vattaddo wila ashagihe arogora enjene okosa mabasa akakene. Kito arogora aba anviwamo dhavi mwaha wa mashagiho anakelani na anddimuwa a mmulogoni? Murogora mmodha onkuweliwa Jennifer ohiloga: “Mulabilemi mabasa a omaga Nyumba ya Omwene munddimuwa mmodha wahitamela mudhidhi wa oddishagiha. Iyene wannona mabasa akosimi vina wandditamalela. Miyo ddanziveliwa venjene olaba na iyene sabwani ddannona wi ddihikana ttima vina ddinokuluveliwa.”

DHOPURELAMO DHOWAWEDDIHA AYANA NINGA ANAMUDHI

Iyo ninowakwela venjene arogora a mmulogoni dhahene ninga munkosela Yehova! Nona jofuneya waweddihaga ninga anamudhi. (1 Tim. 5:​1, 2) Nihikana gari enddimuwa ya olaba vamodha na arogora aba. Vina ninowagalala oziwa wi awene anowona wi iyo ninowariha vina ninowakwela. Murogora mmodha onkuweliwa Vanessa ohiloga: “Ddinomutamalela venjene Yehova sabwa ya okosa epaddi ya nikuru naye, muli abali enjene annipangarhaza.” Murogora mwina o Taiwan ohiloga dhahi: “Ninomutamalela venjene Yehova vamodha na nikuru naye sabwa ya warihaga venjene ayana vina orihaga dhubuwelo dhehu. Ejo enolibiha nroromelo naga vina enoddittukulela ovaha ttima gari enimina ya okosa epaddi ya nikuru na Yehova.”

Mohaganyedha Yehova onowagalala vaddiddi agawonaga abali avilibihedhaga waweddiha arogora na nriho dhahene ninga munkoseliye! (Gano 27:11) Munddimuwa dhahi wa mmulogoni wo Escócia onkuweliwa Benjamin ohiloga dhahi: “Attu a mwilaboni kanariha ayana. Nona ninfuna wi ayana agafiya o Nyumbani ya Omwene onege wi anoweddihiwa na nriho, mottiyana na mwilaboni.” Iyo notene nivilibihedhe omutagiha Yehova mwa waweddiha arogorihu na okwela vina nriho ninafwanyelela.—Rom. 12:10.