I annan serten frer ki’n grandi dan bann kiltir kot en kantite zonm i tret bann madanm konman enferyer. Par egzanp, en sirveyan rezyonal ki apel Hans, ki reste Bolivi, i dir: “Serten zonm in grandi dan bann kiltir ki ankouraz zot pour azir dan en fason arogan. Sa bann zonm i krwar ki zot pli siperyer ki bann madanm e souvandfwa zot pa tret bann madanm avek respe.” En ansyen ki apel Shengxian, ki reste Taywann, i dir: “Kot mon reste, en kantite zonm i krwar ki bann madanm pa devret mel dan zafer bann zonm. Si en zonm i koz konsernan lopinyon en madanm lo en keksoz, sa i kapab fer bann lezot zonm perdi respe pour li.” I annan lezot zonm ki demontre prezidis anver bann madanm dan bann fason ki pa sitan evidan. Par egzanp, zot kapab dir bann dyok ki mank respe pour bann madanm.

Me en zonm i kapab sanz son latitid malgre nenport kiltir ki in grandi ladan. I kapab aret santi ki zonm i pli siperyer ki madanm. (Efe. 4:​22-24) I kapab fer sa par swiv legzanp Zeova. Dan sa lartik, nou pou vwar ki mannyer Zeova i tret bann madanm, ki mannyer bann frer i kapab tret bann madanm parey Zeova i tret bann madanm e ki mannyer bann ansyen i kapab vin en legzanp par lafason ki zot demontre respe pour bann ser.

KI MANNYER ZEOVA I TRET BANN MADANM?

Zeova in donn en legzanp parfe lo ki mannyer pour tret bann madanm. Konman en Papa ki annan konpasyon, Zeova i kontan tou son bann zanfan. (Zan 3:16) Bann ser fidel i parey bann fiy ki presye pour Zeova. Annou vwar bann fason ki Zeova i montre ki i kontan e annan respe pour bann madanm.

 Zeova pa fer lapreferans. Zeova in kree zonm ek fanm dan son resanblans. (Zen. 1:27) I pa’n kree zonm pli entelizan oubyen pli talante ki bann madanm. Osi i pa fer lapreferans pour bann zonm. (2 Kron. 19:7) I ti kree zonm ek fanm avek menm nivo lentelizans pour ki zot kapab konpran bann laverite ki dan Labib e pour demontre bann zoli kalite ki Zeova i annan. Zeova i osi apresye bann msye ek madanm ki annan lafwa ki swa zot annan lespwar pour viv pour touzour dan paradi lo later ouswa pour servi konman bann lerwa ek pret dan lesyel. (2 Pyer 1:​1, not.) I kler ki Zeova napa okenn lapreferans kont bann madanm.

Zeova i ekout zot. Zeova i enterese avek santiman bann madanm e bann problenm ki zot fer fas avek. Par egzanp, i ti ekout e reponn lapriyer Rasel ek Ana. (Zen. 30:22; 1 Sam. 1:​10, 11, 19, 20) Zeova in osi enspir bann ekriven Labib pour ekri lo bann zonm ki ti ekout zot madanm. Par egzanp, Abraam ti swiv lenstriksyon Zeova pour ekout son madanm Sara. (Zen. 21:​12-14) Lerwa David ti ekout Abigel. Anfet i ti santi ki Zeova ti’n anvoy Abigel pour koz avek li. (1 Sam. 25:​32-35) Zezi ki reflekte bann kalite Zeova dan en fason parfe, ti ekout son manman Mari. (Zan 2:​3-10) Sa bann legzanp i montre ki en fason ki Zeova i demontre respe pour bann madanm i par ekout zot.

Zeova i annan konfyans dan zot. Par egzanp, Zeova ti annan konfyans dan Ev pour pran swen avek later antye. (Zen. 1:28) Par fer sa, i ti montre ki i pa ti vwar Ev konman pli enferyer ki son msye Adan me konman en led pour Adan. Zeova ti osi annan konfyans dan profet Debora ek Oulda pour konsey son pep enkli en ziz ek en lerwa. (Ziz 4:​4-9; 2 Rwa. 22:​14-20) Ozordi Zeova i met konfyans dan bann madanm Kretyen pour fer son travay. Sa bann ser fidel i servi konman proklanmater, pionye ek misyonner. Zot ede design, konstri e fer mentenans lo bann Lasal Rwayonm ek lezot batiman ki tonm anba biro brans. Serten parmi zot i servi kot Betel e osi dan bann biro tradiksyon. Sa bann ser i parey en gran larme ki Zeova i servi pour akonpli son plan. (Ps. 68:11) I kler alor ki Zeova pa konsider bann madanm konman bann dimoun ki feb e ki pa kapab fer nanryen.

KI MANNYER BANN FRER I KAPAB APRANN POUR TRET BANN MADANM PAREY ZEOVA I FER?

Bann frer, pour nou konnen si nou pe tret bann ser parey Zeova i fer, nou bezwen analiz byen nou fason panse ek lafason ki nou azir. Pour fer sa nou bezwen led. Zis parey en masin X-ray i kapab detekte si leker en dimoun i annan problenm, en bon zanmi ek Parol Bondye i kapab ed nou pour konnen si lafason ki nou vwar bann madanm i fer plezir Zeova oubyen non. Ki nou kapab fer pour ganny sa led?

Demann en bon zanmi. (Prov. 18:17) Nou kapab demann en bon zanmi ki nou annan konfyans ladan e ki rezonnab, sa bann kestyon swivan: “Ki ou panse lo lafason ki mon tret mon bann ser? Eski zot santi ki mon annan respe pour zot? Eski i annan en keksoz ki mon kapab fer pour tret zot pli byen?” Si ou zanmi i dir ou serten keksoz ki ou kapab fer pour amelyore, pa bezwen ankoler. O kontrer, pa ezite pour fer bann sanzman neseser.

Etidye Parol Bondye. Sa pli bon fason pour nou konnen si nou pe tret byen bann ser i par servi Parol Bondye pour ed nou egzamin nou fason panse ek aksyon. (Ebr. 4:12) Anmezir ki nou etidye Labib, nou aprann konsernan bann zonm ki ti tret bann madanm byen ek bann zonm ki pa ti tret byen bann madanm. Apre nou kapab konpar zot fason fer avek sa ki pour nou. An plis ki sa, ler nou konpar diferan verse Labib sa i kapab ed nou pour pa konsantre lo zis en verse Labib zis pour siport en move pwennvi ki nou annan lo bann madanm. Par egzanp, dapre 1 Pyer 3:​7, bann msye i devret “onor zot madanm parey zot ti pou pran swen avek en resipyan ki pli frazil.” b Eski sa i vedir ki en madanm i enferyer setadir i pa entelizan oubyen napa abilite parey en zonm? Pa ditou! Konpar sa ki Pyer i dir avek sa ki ganny dir  dan Galat 3:​26-29. Nou vwar ki Zeova in swazir bann madanm osi byen ki bann zonm pour dirize ansanm avek Zezi dan lesyel. Ler nou etidye Parol Bondye e nou demann en bon zanmi lo sa ki i panse konsernan lafason ki nou tret bann madanm, nou kapab aprann pour demontre respe pour nou bann ser.

KI MANNYER BANN ANSYEN I DEMONTRE RESPE POUR BANN SER?

Bann frer dan kongregasyon i osi kapab aprann pour tret bann ser avek respe par swiv legzanp bann ansyen. Ki mannyer bann ansyen i montre legzanp dan lafason ki zot demontre respe anver bann ser? Annou vwar serten fason spesifik.

Bann ansyen i felisit bann ser. Zapot Pol i kit en bon legzanp pour bann ansyen swiv. I ti felisit serten ser an piblik dan en let ki i ti ekri pour kongregasyon Ronm. (Rom. 16:12) Eski ou kapab imazinen ki mannyer sa bann ser ti kontan ler sa let ki Pol ti ekri ti ganny lir avek kongregasyon? Pareyman, bann ansyen i felisit bann ser pour zot bann zoli kalite e pour sa ki zot fer pour Zeova. Sa i ed bann ser pour konnen ki kongregasyon i annan respe pour zot e ki nou kontan zot. Ler en ansyen i dir en ser bann parol ankourazan, i kapab ki sa i egzakteman sa ki sa ser i bezwen anmezir i kontinyen reste fidel avek Zeova.—Prov. 15:23.

Ler bann ansyen i felisit bann ser, zot bezwen senser e dir bann keksoz spesifik. Akoz? En ser ki apel Jessica i dir: “I byen ler bann frer i dir avek en ser ‘ou’n fer en bon travay.’ Me sa ki nou pli apresye i ler bann frer i felisit nou pour en keksoz ki nou’n fer. Par egzanp, ler nou ansenny nou zanfan pour asiz trankil pandan renyon oubyen ler nou pran letan pour al zwenn en etidyan Labib e anmenn li renyon.” Ler bann ansyen i felisit bann ser pour bann keksoz spesifik, zot fer bann  ser santi ki zot annan zot plas dan kongregasyon e ki zot ganny apresye.

Bann ansyen i ekout bann ser. Bann ansyen ki annan limilite i rekonnet ki i pa zis zot ki annan bann bon nide. Bann ansyen koumsa i demann bann ser pour donn zot sizesyon e zot ekout byen ler bann ser i koze. Par fer sa, sa bann ansyen i ankouraz bann ser e zot menm zot ganny bann byenfe. Ki mannyer? En ansyen ki apel Gerardo, ki pe servi dan Betel, i dir: “Mon’n remarke ki ler mon demann bann ser zot sizesyon, sa in ed mwan fer mon travay pli byen. Souvandfwa, zot in fer sa travay pli lontan ki laplipar frer.” Dan bann kongregasyon, en kantite ser i servi konman pionye alor zot konn en kantite keksoz lo bann dimoun ki reste dan teritwar. En ansyen ki apel Bryan, i dir: “Nou bann ser i annan en kantite bon kalite ek abilite ki lorganizasyon i bezwen. Alor annou benefisye atraver zot leksperyans!”

Bann ansyen ki saz pa devret inyor sizesyon bann ser. Akoz? En ansyen ki apel Edward i dir: “Lopinyon ek leksperyans en ser i kapab ed en frer pour konpran en keksoz pli byen e son lopinyon i kapab ed li pli byen konpran santiman lezot.” (Prov. 1:5) Menm si en ansyen pa kapab servi sa sizesyon ki en ser in donnen, sa ansyen i kapab toudmenm remersye sa ser pour son sizesyon e pour partaz sa ki i konnen.

Bann ansyen i donn bann ser formasyon. Bann ansyen ki saz i rod loportinite pour donn bann ser formasyon. Par egzanp, zot kapab ansenny bann ser ki mannyer pour fer bann renyon predikasyon an ka i napa en frer ki’n batize pour pran sa group. Zot kapab montre bann ser ki mannyer pour servi bann zouti ek masin pour sa bann ser kapab ede lo bann proze mentenans ek konstriksyon ki pour lorganizasyon Temwen Zeova. Dan Betel, bann sirveyan dan bann departman in donn bann ser formasyon dan plizyer domenn. Sa i enkli dan mentenans, pour aste bann keksoz, kontabilite, pour fer bann progranm konpiter e lezot ankor. Ler bann ansyen i donn bann ser formasyon, zot montre ki zot krwar ki bann ser i konpetan e diny konfyans.

En kantite ser i servi sa formasyon ki zot in gannyen avek bann ansyen pour ed lezot. Par egzanp, serten ser i servi sa formasyon ki zot in gannyen dan domenn konstriksyon pour ed lezot rekonstri zot lakaz apre ki in annan en dezas. Lezot ser i servi sa formasyon ki zot in gannyen konsernan temwannyaz an piblik pour donn lezot ser formasyon pour zot osi kapab fer sa kalite form predikasyon. Ki mannyer bann ser i santi anver bann frer ki’n donn zot formasyon? En ser ki apel Jennifer i dir: “Ler mon ti travay lo en proze pour konstri en Lasal Rwayonm, en ansyen ti pran letan pour donn mwan formasyon. I ti remark sa travay ki mon ti fer e i ti felisit mwan. Mon ti kontan travay avek li parski mon ti santi ki i ti apresye mon zefor e ki i ti annan konfyans dan mwan.”

BYENFE KI NOU GANNYEN LER NOU TRET BANN SER PAREY NOU FANMIR

Nou kontan nou bann ser fidel zis parey Zeova i kontan zot! Alor nou tret zot parey nou prop fanmir. (1 Tim. 5:​1, 2) I en loner e nou fyer pour travay ansanm avek zot. Nou vreman kontan ler zot konnen ki nou kontan e siport zot. En ser ki apel Vanessa i dir: “Mon vreman rekonesan anver Zeova parski mon form parti son lorganizasyon ki annan bann frer ki’n ankouraz mwan en kantite.” En ser ki reste Taywann i dir: “Mon vreman rekonesan ki Zeova ek son lorganizasyon i apresye bann madanm e zot respekte santiman bann madanm. Sa i fer mwan annan plis lafwa e i fer mwan pli apresye sa privilez ki mon annan pour form parti lorganizasyon Zeova.”

Zeova i vreman fyer ler i vwar bann frer fidel ki apresye e annan respe pour bann madanm, parey Li i annan. (Prov. 27:11) En ansyen ki apel Benjamin, ki reste Scotland, i dir: “Bann zonm dan lemonn napa ditou respe pour bann madanm. Alor ler en madanm i vin kot Lasal Rwayonm, nou anvi fer zot santi ki nou annan respe pour zot e ki nou kontan zot.” Annou fer nou mye pour swiv legzanp Zeova par donn nou bann ser sa lanmour ek respe ki zot merite.—Rom. 12:10.