Ʉ̃kʉrʉ kulturadera yuwẽrãrãra yumakẽrãne edabʉta jarapanʉ. Kongregasionʼra akʉbari zõrãrã Boliviadebema yi trʉ̃ Hansba jarasi: «Ʉ̃kʉrʉ yumakẽrãrãra ãyi kulturade jaradiapanʉ yigayora audre yi zromata wẽrãraira». b Shengxian, zõrãrã Taiwánʼnebemaba jarabʉ: «Ʉ̃kʉrʉ drʉadera yumakẽrã mejãchaʉba krĩchapanʉ yuwẽrãbara jarabe ẽãta iya kʼãrẽ krĩchabʉra akʉza yumakẽrã abaʉba yuwẽrãba jarada kĩrãkʼa obʉbʉrʉ, naʉ̃ yumakẽrãra wuabemabara wawia ũdubida ẽ». Ʉ̃kʉrʉ yumakẽrãrabara kĩrãbita jara ẽ yuwẽrãra ãyira zeri ẽãta, mamina ãya i jaramia obʉdeba wawia ũdubida ẽ wẽrãrata.

Baribʉrʉ yumakẽrãba yuwẽrã ʉ̃rʉ aña krĩchabʉra awuara krĩchaseabʉ akʉza wua krĩcha ẽ bayi iyira audre ʉ̃tabʉta wẽrãraira (Efes. 4:​22-24). Ãyara maʉ̃ta oseapanʉ Jeowade kĩrãkʼa abarika krĩchapanʉbʉrʉ. Naʉ̃ artikulode kʼawuadayi bedʼea ũbea, Jeowaba sãwũã akʉbʉta mebẽrã wẽrãrata akʉza mebẽrã yumakẽrãrabara sãwũã Jeowade kĩrãkʼa akʉibarata wẽrãrãra, adewara zõrãrã kongregasionebemaba sãwũã wawia ũdubibarata mebẽrã wẽrãra.

¿SÃWŨÃ AKɄBɄ JEOWABA WẼRÃRÃRA?

Jeowara yiza bia wẽrãra sãwũã akʉibara ʉ̃rʉra, iyira zeze bia baera iyara kãga jõma iyi mebẽrãra (Juan 3:16). Akʉza mebẽrã wẽrãra kʼẽrẽpapanʉrãra iyitara iyi kau kĩrãkʼapanʉ. Akʉdaya Jeowaba sãwũã kãgata akʉza wawiata ũdubibʉta wẽrãra.

 Jeowabara wẽrãrãra daucha akʉbʉ. Jeowabara yumakẽrãta yuwẽrãʉ̃mera iyi kĩrãkʼa parãsi (Gén. 1:27). Jeowaba yumakẽrã parãsidera yuwẽrãira audre buru biabara parã ẽ basi akʉza iyara audre kãga ũdubi ẽ yumakẽrãbʉrʉ (2 Crón. 19:7). Iyara yumakẽrãta yuwẽrãʉ̃mera abarika parãsi, ãyi ũmeʼa buru biata diasi Daizeze Bedʼeata biʼia ũrĩnamarẽã akʉza iyide kĩrãkʼa nebiata ũdubidamarẽã. Jeowabara yumakẽrãra akʉza yuwẽrã kʼẽrẽpabʉra biʼia akʉbʉ, adewara yuwẽrã akʉza yumakẽrã nebiata jʉ̃ãbibʉ nama egorode, mawũã ẽ bʉrʉ ʉ̃tʉ (2 Ped. 1:​1, nota). Maʉ̃ba ũdubibʉ Jeowabara yuwẽrãrãra biʼia akʉbʉta.

Jeowabara ũrĩbʉ yuwẽrãra bedʼeara. Jeowabara ũrĩbʉ yuwẽrãra bedʼeara. Bari jaraita, Raquel akʉza Ana bedʼeara iyara ũrĩsi, mõbe panʉsi ãyi bedʼeata (Gén. 30:22; 1 Sam. 1:​10, 11, 19, 20). Akʉza Jeowaba iyi Bedʼeade bʉbisi yiza ʉ̃kʉrʉ yumakẽrãba sãwũã ũrĩsidata yuwẽrãra bedʼeata. Bari jaraita, Jeowaba Abrahánʼa jarasi ũrĩmarẽã yi kima Sara bedʼeata (Gén. 21:​12-14). Nokʼo Davidbida ũrĩsi Abigaíl bedʼeata, iya krĩchasi Jeowaba zokʼasita naʉ̃ yuwẽrãta iya kayirua oẽ marẽã (1 Sam. 25:​32-35). Jesura yi Zeze kĩrãkʼa abarikabʉ baera ũrĩsi yi papa María bedʼeata (Juan 2:​3-10). Naʉ̃ra yizaraba ũdubibʉ Jeowabara wẽrãra wawia ũdubibʉta ãyi bedʼea ũrĩbʉdeba.

Jeowabara ĩjãbʉ yuwẽrãra ʉ̃rʉ. Bari jaraita, Jeowaba iduaribisi Evaba nekʼãrẽ naʉ̃ drʉadebʉta akʉmarẽã (Gén. 1:28). Naʉ̃ kʼãwũã odadeba Jeowaba ũdubisi iyara Evara Adánʼira audre edabʉta akʉ ba ẽ basita, awuarabʉrʉ iyimara Evara Adán kʼarebabari kĩrãkʼabasi. Jeowabara ũdubisi Débora akʉza Huldá ʉ̃rʉ ĩjãbʉta, iya iduaribiside naʉ̃ra wẽrãraba ũrãgʼa diamarẽã pʉwʉrʉʼa, nokʼora akʉza juezʼra (Juec. 4:​4-9; 2 Rey. 22:​14-20). Idi ewadebida Jeowabara ĩjãbʉ yuwẽrãra ʉ̃rʉ. Ʉ̃kʉrʉ yuwẽrãrãra nejaradiabarira, yi nãã edebarira akʉza misionerãra, adewara ʉ̃kʉrʉra trajabʉ Daizeze de parãbʉde, kʼareba ara obʉde, mawũã ẽ bʉrʉ Betelde, adewara opisina tradusibari jĩgabʉta. Maʉ̃ra mebẽrã wẽrãrãra Jeowaba zokʼabʉ iya kãgabʉ oita (Sal. 68:11). Naʉ̃ba ũdubibʉ Jeowamara wẽrãrãra yibiata nekʼãrẽ mejãcha oita.

¿KʼÃRẼTA OIBARA MEBẼRÃ YUMAKẼRÃBARA WẼRÃRA BIA EDAITA JEOWABA OBɄ KĨRÃKʼA?

Mebẽrã yumakẽrãra, dayirãba kʼawuaita wẽrãra Jeowade kĩrãkʼa akʉpanʉ kʼawuaita, nesidapanʉ dayirã krĩcha biʼia akʉita akʉza daya kʼãrẽta obʉta. Maʉ̃itara dayirãbara kʼarebata nesida, medikoba iya ẽbẽra abaʉ sota akʉibʉrʉ nesida makinarata, abarika Daizeze Bedʼeaba akʉza neũdukʼawua biaraba kʼarebayi bʉa kʼawuamarẽã, bʉ sãwũã krĩchabʉra Daizezeba kãgabʉde bʉ kʼawuaita. ¿Ãyara sãwũã kʼarebaseabʉ?

Neũdukʼawua bia widira (Prov. 18:17). Neũdukʼawua bʉa audre ĩjãbʉa naʉ̃ta widira: «Bʉa ũdubʉdera, ¿mʉ̃ara sãwũã akʉbʉ mebẽrã wẽrãrãra? ¿Wawia ũdubibʉka? ¿Mʉ̃a ãyi sãwũã akʉbʉra audre bia oseabʉka?». Bʉ neũdukʼawuaba jarara bʉara nei ara oibarata erbʉta, maʉ̃ kʼarea bʉyiare bedʼearãra, awuarabʉrʉ ara ora maʉ̃ta.

Akʉra Daizeze Bedʼeata. Dayirãba Daizeze Bedʼeata akʉpanʉbʉrʉ naʉ̃neba kʼawuaseabʉ sãwũã akʉpanʉta mebẽrã wẽrãrata (Heb. 4:12). Bʉa Daizeze Bedʼea akʉbʉrʉde ũduyi nama edabʉta nebʉrara ʉ̃kʉrʉ yumakẽrãraba sãwũã yuwẽrãra bia edadata akʉza ʉ̃kʉrʉba sãwũã bia edada ẽ badata. Mõbe bʉyikʉza widira kʼaide kĩrãkʼa obʉta. Akʉra testora yuwẽrãra sãwũã akʉibara ʉ̃rʉ bedʼeabʉta, mamina bʉma bigabʉtrʉ akʉrãra, adewara yuwẽrãra ʉ̃rʉ aña krĩchapanʉbʉrʉ testo abapaide akʉibara ẽ awuarabʉrʉ maʉ̃ ʉ̃rʉ bia kʼawuaita Daizeze Bedʼeade testora biobʉrata akʉdaibara. Bari jaraita 1 Pedro 3:7​ba jarabʉ kĩrãkʼa yumakẽrãbara yuwẽrãra «akʉibara kʉgʉrʉ bogozoayawabʉ kĩrãkʼa». c  ¿Naʉ̃ba jarakĩrãbʉka yuwẽrãra kʼãrẽ obe ẽãta, buru bia ẽãta yumakẽrãira? Mawũã ẽ, Pedroba jarada awuara akʉdaya kʼãrẽta jarabʉta Gálatas 3:​26-29 bayeda. Mama jarabʉ Jeowaba jidasita yuwẽrãta akʉza yumakẽrãta Jesuʉ̃meba ʉ̃tʉ zokʼadamarẽã. Daizeze Bedʼea kʼawuabʉrʉde adewara mebẽã abaʉʼa widibʉrʉde wẽrãra sãwũã wawia ũdubibarata, maʉ̃ba kʼarebayi kʼawuaita sãwũã wawia ũdubibarata mebẽrã wẽrãra.

¿ZÕRÃRÃBARA SÃWŨÃ WAWIA ŨDUBISEAPANɄ MEBẼRÃ WẼRÃRÃRA?

Mebẽrã kongregasionebemabara mebẽrã wẽrãra wawiata ũdubiseapanʉ zõrãrã yizadeba, akʉdaya zõrãrãba sãwũã wawia ũdubiseapanʉta mebẽrã wẽrãra.

Zõrãrãbara biga diapanʉ mebẽrã wẽrãra. Zõrãrãbara apostol Pablo yizade kĩrãkʼa oseapanʉ. Iya karta mebẽrã Romanebemaita bʉside mebẽrã wẽrãrabida biga diasi (Rom. 16:12). Krĩchaidua naʉ̃ra wẽrãra kʼãrẽaba sobiasita Pabloba karta bʉdata kongregasion nãã lesidade. Abarika zõrãrãbida mebẽrã wẽrãra biga diapanʉ ãya nebia erbʉ kʼarea akʉza Jeowaita mejãcha zarea trajapanʉ baera. Naʉ̃ba kʼawuabibʉ mebẽrã wẽrãra kongregasionebemabara wawia ũdubipanʉta akʉza kãgadeta. Zõrãrãba ãya biga diabʉba, so zarea diaseabʉ mebẽrã wẽrãra ãyi Jeowa ode kʼẽrẽpa takeraita (Prov. 15:23).

Zõrãrãra zarea opanʉ wẽrãra soiduba biga diaita ãya nekʼãrẽ bia aba oda kʼarea, ¿kʼãrẽa opanʉ? Mebẽã Jessicaba jarabʉ: «Biga mebẽrãba daya bia osi jaraira, mamina mʉ̃itara audre yibia mebẽãba jarabʉrʉde daya nekʼãrẽ bia aba oda ʉ̃rʉ, biga diapanʉ daya dayi wũãwũãra jaradiabʉ baera ãba yi jʉrebarimae pikiadamarẽã, adewara biga diapanʉ dayi ewari jʉrʉbʉde nekʼawuabarira ãba yi  jʉrebarieda weita». Zõrãrãba biga diapanʉne wẽrãra, ãya nekʼãrẽ aba bia oda kʼarea, maʉ̃ba sentibipanʉ ãyira kãgadeta akʉza ãya nekʼãrẽ obʉra yibiata.

Zõrãrãbara ũrĩpanʉ mebẽrã wẽrãra bedʼeara. Zõrãrã eda krĩchapanʉbara jara ẽ ãya krĩchapanʉtrʉ jõma yibiata. Naʉ̃ra zõrãrãbara mebẽã wẽrãra jarapanʉ ãya krĩchabʉsida jaradamarẽã, maʉ̃ba kʼarebabʉ zõrãrãta akʉza mebẽrã wẽrãrasida, ¿sãwũã kʼarebabʉ? Zõrãrã aba yi trʉ̃ Gerardo Betelde trajabʉba jarabʉ: «Mʉ̃a kʼawuasi mebẽrã wẽrãra widiba ãya kʼãrẽ krĩchabʉta, maʉ̃ba mʉ̃ trajora audre bia obibʉta, mebẽrã wẽrãra poaga bio ba baera maʉ̃ne trajapanʉta, mebẽrã yumakẽrãraira». Kongregasionera mejãchabʉ mebẽrã wẽrãra yi nãã edebarirata maʉ̃ba biʼia ũdukʼawuapanʉ ẽbẽrarã komunidadebemata. Zõrãrã yi trʉ̃ Bryanba jarabʉ: «Mebẽrã wẽrãrabara nekʼãrẽ bia mejãcha erbʉ kongregasionba nesidabʉde kʼarebaita, maʉ̃ kʼarea ãyi yiza biata zokʼadaibara».

Zõrãrãbara ũrĩpanʉ mebẽã wẽrãraba kʼãrẽ jarapanʉra, ¿kʼãrẽa? Zõrãrã yi trʉ̃ Edwardba jarabʉ: «Mebẽã wẽrã kʼãrẽ berabarida kʼawuaiba, kʼarebaseabʉ mebẽã zõrãrãta akʉza iya jarabʉba kʼarebaseabʉ kʼawuaita wuabemara sãwũã sentibʉta» (Prov. 1:5). Mamina zõrãrãba zokʼa ẽ bʉrʉ iya jaradata biga diaseabʉ iyaʼa, iya jarada bari.

Zõrãrãbara mebẽrã wẽrãra jaradiapanʉ. Ãya jaradiapanʉ sãwũã oita ãba yi jʉrebʉrʉde Daizeze Bedʼea jaradia wãita mebẽã yumakẽrã buru kʼoebʉta neẽãne, adewara jaradiaseapanʉ zokʼa kʼawuadamarẽã erramientarata, mawũã Daizeze de ara oita akʉza parãita. Beteldera zõrãrãbara jaradiapanʉ mebẽã wẽrãra nekʼãrẽ bio odamarẽã. Bari jaraita, jaradiapanʉ nekʼãrẽ ara oita, ne eda wãita, plata Beteldebema bia zokʼaita akʉza komputador bia zokʼaita, adewara nekʼãrẽ awuruta jaradiapanʉ. Zõrãrãba mebẽrã wẽrãra jaradiapanʉne ũdubibʉ mebẽrã wẽrãra ʉ̃rʉ ĩjãpanʉta akʉza ãya oseabʉ ʉ̃rʉ.

Mebẽrã wẽrãra mejãchaʉba zõrãrãba ãyaʼa jaradiadata zokʼapanʉ wuabemara kʼarebaita, bari jaraita mejãchaʉba zokʼapanʉ ãya kʼawuadata de parãi ʉ̃rʉ wuabemara mebẽrã kʼarebaita ãyi naʉ̃ drʉade neida berabaribʉrʉde, ãyi de jẽda ara oita. Ʉ̃kʉrʉ mebẽrã wẽrãrabara jaradiapanʉ sãwũã jaradiaita ẽbẽra mejãchabʉmae, wuabemara mebẽrã wẽrãra, ãyabida mawũã jaradiadamarẽã, ¿kʼãrẽta krĩchapanʉ mebẽrã wẽrãraba zõrãrãba ãya jaradiapanʉ ʉ̃rʉra? Mebẽã Jenniferba jarabʉ: «Mʉ̃ de parãine traja jʉ̃drʉside, zõrãrã abaʉba ewari jʉrʉsi mʉ̃aʼa jaradiaita, iyara akʉbasi mʉ̃a obʉra akʉza iya mʉ̃a biga diabasi mʉ̃a obada kʼarea, maʉ̃ba mʉ̃ra trajakĩrãbasi iyiʉ̃me».

¿KʼÃRẼ NEBIATA ŨDUPANɄ MEBẼRÃ WẼRÃRATA DAYIRÃ MEBẼÃʼARA KĨRÃKʼA AKɄPANɄNE?

Mebẽã wẽrãrãra kãgapanʉ Jeowaba kãgabʉ kĩrãkʼa (1 Tim. 5:​1, 2). Maʉ̃ba bia edapanʉ dayirã mebẽãʼara kĩrãkʼa akʉza sobiapanʉ ãyibawara trajapanʉ baera. Daira sobiapanʉ kʼawuabʉdade mebẽrã wẽrãrata bia sentipanʉta. Mebẽã Vanessaba jarabʉ: «Mʉ̃ara biga diabʉ Jeowaʼa mʉ̃ra iyi pʉwʉrʉde bʉ baera akʉza mama bʉ mebẽrã mejãcha mʉ̃aʼa so zarea diapanʉta». Mebẽã wẽrã Taiwánʼnebemaba jarabʉ: «Jeowade kĩrãkʼa odadrʉ, dayirã mebẽã wẽrãra wawia ũdubipanʉne akʉza kãgata».

Kʼãrẽaba sobia sentibʉ Jeowara ũdubʉrʉde yumakẽrãraba wẽrãrãra bia akʉbʉta iya akʉbʉ kĩrãkʼa (Prov. 27:11). Zõrãrã Escociadebema yi trʉ̃ Benjaminba jarabʉ: «Yumakẽrãra naʉ̃ drʉadebemabara bia akʉ ẽ yuwẽrãra, maʉ̃ba wẽrãra ãba yi jʉrebarima jʉ̃ẽbʉrʉdera kãgapanʉ ũdudamarẽã dayirãra awuarapanʉta». Dayirã jõmaʉ̃ta zarea oibara mebẽrã yuwẽrãra kãga ũdubita akʉza wawia ũdubita Jeowaba obʉ kĩrãkʼa (Rom. 12:10).