Ame la itre xan, hna hetru angatr ngöne la qenenöj ka thaipiëne la itre föe. Öni Hans, atre thupë sirkoskripsio e Bolivie ka hape: “Ame la itre xaa trahmany, hna hetru angatr ngöne la qenenöj laka, ka sisitria kö la trahmany hune la föe. Nge jole koi angatr troa nuetrije lai.” Öni Shengxian, ketre qatre thup ne Taiwan ka hape: “Ame ngöne la nöjeng, trahmany la ka mus, nge tha tro kö la föe a hane qeje mekun. Maine tro la ketre trahmany a thele ixatua thene la ketre föe, ke tro ha xele ma wai angeic hnene la itre xaa trahmany.” Ame la ketre aqane thaipiëne la itre föe, ke ene la itre iqenehnyima.

Ngo ijije hi tro la itre trahmany a saze qa ngöne la qenenöj i angatr. Eje hi hnei angatr hna inine laka, tha ka sisitria kö la itre trahmany hune la itre föe. (Efe. 4:​22-​24) Tulu i Iehova la ka troa xatua angatr. Ame ngöne la tane mekune celë, tro sa ce wange la aqane ujë i Iehova kowe la itre föe, me aqane tro la itre trejin trahmany a ujë kowe la itre föe tui Iehova, me aqane tro la itre qatre thup a metrötrëne la itre trejine föe.

TUNE KAA LA AQANE UJË I IEHOVA KOWE LA ITRE FÖE?

Iehova hi la tulu göi aqane troa metrötrëne la itre föe. Nyidrëti la Kem ka tru trenge utipin nge ka hnim asë hi la itre nekö i Nyidrë. (Ioane 3:​16) Ame la itre trejin föe ka mele nyipici, ke kösë itre nekö i Nyidrë, matre ka tru catre angatr koi Nyidrë. Hane hi la itre aqane atrunyi angatr hnei Nyidrë.

Nyidrëti a hnime ceitu angatr. Hnei Iehova hna xup la trahmany me föe hnaiji Nyidrë.  (Gen. 1:​27) Tha hnei Nyidrëti kö hna xup la trahmany troa inamacane catre kö hune la föe. Ketre Nyidrëti a hnim ceitunë nyidro. (2 A. l. ite jo. 19:7) Hnei Nyidrëti hna hamë nyidroti asë la atreine troa trotrohnine la Tusi Hmitrötr me huliwane la itre thiina i Nyidrë. Ceitune hi la aqane wangatrune Iehova la lapaune la trahmany me föe, ngacama ka tro ju hë mele epine palua e celë fen maine ka troa joxu me atre huuj e hnengödrai. (2 Pet. 1:1) Eje hi, ka ceitu hi koi Iehova la trahmany me föe.

Nyidrëti a drei angatr. Ka tru koi Iehova la itre aliene hni ne la itre föe me itre jole ka ej thei angatr. Hnei Nyidrëti hna drenge me sa la itre thithi Rakela me Hana. (Gen. 30:22; 1 Sam. 1:​10, 11, 19, 20) Hnei Iehova fe hna up la itre ka cinyianyine la Tusi Hmitrötr, troa qaja la itre hna melën hnene la itre trahmany ka drenge la itre föe. Tune la Aberahama a drengethenge Iehova, lo Nyidrëti a upi angeic troa drei Sara föi angeic. (Gen. 21:​12-​14) Hnei Dravita joxu hna drei Abigaila. Ame koi Dravita, Iehova la ka upi Abigaila troa ithanata koi angeic. (1 Sam. 25:​32-​35) Iesu hi la ka melëne hnyawa la itre thiina i Iehova. Eje hi, hnei Iesu hna drei Maria thine i nyidrë. (Ioane 2:​3-​10) Itre ceitune lai ka amamane laka, Iehova a metrötrëne la itre föe, ngöne la Nyidrëti a drei angatr.

Nyidrëti a mejiune koi angatr. Mejiune hi Iehova koi Eva troa thupëne la ihnadro. (Gen. 1:​28) Nyidrëti a amaman e cili laka, tha ka sisitria kö Adramu hui Eva, ngo angeic pe la ixatua ka ihmeku koi Adramu. Hnei Nyidrëti fe hna upi Debora me Huleda lue perofeta föe, troa hajine me hmekëne la nöje i Nyidrë, ene fe la itre joxu me itre atre amokötin. (A. ame. 4:​4-9; 2 Ite jo. 22:​14-​20) Ame fe enehila, Iehova a upe la itre trejine föe troa eatrëne la aja i Nyidrë. Angatr a catre cainöj, pionie maine mesinare. Angatre fe a ixatua göi troa kuca la itre plan ne Uma Ne Baselaia me Bethela, me xup me nyihnyawane itre ej. Itre xan a huliwa ngöne la itre Bethela me antennes de traduction. Angatre hi la trongene isi ka alanyim hnei Iehova hna up, matre eatrëne la aja i Nyidrë. (Sal. 68:11) Kolo hi lai a amamane ka hape, tha ka kucakuca kö me pë hnënyöngöne la itre föe.

TUNE KAA LA AQANE TRO LA ITRE TREJIN TRAHMANY A UJË KOWE LA ITRE FÖE TUI IEHOVA?

Loi e tro la ketre trejin trahmany a waipengöne hnyawa la aqane mekun me ujë i angeic göne la aqane troa metrötrëne la itre föe tui Iehova. Eje hi, loi e troa xatua angeic. Tune la ketre appareil ne radiologie ka qajaqaja la sine mec ngöne la wenethëhmi, ijije hi tro la ketre sinee me Tusi Hmitrötr a xatuane la trejin troa waipengöne la aqane goeëne angeic la itre föe. Nemene la nyine tro epuni a kuca, matre kapa la ixatua cili?

Hnyingëne jë la mekuna ne la ketre sinee i epun. (Ite edomë 18:17) Hnyingëne jë kowe la ketre sinee i epun hnei epun hna mejiune kow, ka loi thiina nge ka tha xou kö troa qaja la nyipici, ka hape: “Ame koi eö, tune kaa la aqane ujënge kowe la itre trejine föe? Drenge kö angatr ka hape, eni a metrötrë angatr? Hetre nyine tro kö ni a saze?” Maine tro la sinee i epun a qaja la nyine troa saze, ke the wesitre kö. Isine jë pe troa saze.

Ini Tusi Hmitrötre jë. Ame la aqane tro sa atre ka hape, easa metrötrëne la itre trejine föe, ke ene la troa waipengö së jëne la Tusi Hmitrötr. (Heb. 4:​12) Kola qaja e kuhu hnin ej la itre trahmany ka metrötrëne la itre föe, me itre ka pë metrötr koi angatr. Pane waipengöne ju la aqane ujë i epun memine la itre trahmanyi cili. The xom hmekuje kö la ca xötr, ngo xome jë la nyimu xötr wanga tro epuni a mekun ka hape, ka loi hi la aqane ujë i epun kowe la itre föe, ngo ka tria pe. Ame ngöne 1 Peteru 3:7 kola hape, loi e troa metrötrëne la itre föe, ke ceitui angatre me “ketre trengene iengen ka kaqakaqa.” b Kolo kö lai a hape, ka  sisitria kö la itre trahmany hui angatr, nge itre ka thatrein angatr me pë hnënyöngön? Waea! Kola qaja ngöne Galatia 3:​26-​29 ka hape, hnei Iehova hna iëne la itre trahmany me itre föe mina fe, troa ce mus me Iesu e hnengödrai. Haawe, tro la itre trejin trahmany a atre la aqane troa metrötrëne la itre föe, e tro angatr a inine la Tusi Hmitrötr me sipo ixatua kowe la itre sinee i angatr.

TUNE KAA LA AQANE METRÖTRËNE LA ITRE QATRE THUP LA ITRE TREJINE FÖE?

Tro la itre trejin trahmany a inin la aqane troa metrötrëne la itre trejin föe, e tro angatr a goeëne la tulu ne la itre qatre thup. Itre qatre thup a metrötrëne tune kaa la itre trejine föe? Hane hi la hnei angatr hna kuca.

Angatr a felisite la itre trejine föe. Paulo aposetolo la ketre tulu ka lolo kowe la itre qatre thup. Ame ngöne la ketre tusi Paulo kowe la ekalesia ne Roma, hnei angeic hna felisite la itre trejine föe qëmekene la ekalesia. (Rom. 16:12) Pane mekune jë la madrine ne la itre trejine föe la kola e lai tus! Ketre tun, itre qatre thup a qaja aloine la itre thiina ka lolo me huliwa hna kuca hnene la itre trejin föe koi Iehova. Öhne hi la itre trejine föe laka, kola hnim me metrötrë angatr hnene la ekalesia. Ame la kola ithuecatr hnene la ketre qatre thup, ke kola xatuane la itre trejine föe troa catre huliwa koi Iehova.​—Ite edomë 15:23.

Loi e tro la itre qatre thup a qaja la kepin, matre angatr a felisite la itre trejine föe. Pine nemen? Öni Jessica: “Kola ketri ni la itre trejin trahmany a qaja ka hape, ka lolo catre la huliwa hnenge hna kuca. Ngo the qaja palaha la angatr a qaja la kepin, matre angatr a felisite ni. Tune la aqane inine ni la itre neköng troa lapa hnyawa ngöne la itre ijine icasikeu, maine pena la eni a trotheng la ketre ka ini Tus troa sine la icasikeu.” Ame la itre qatre thup a qaja la kepin la kola felisite la itre trejine föe,  ke celë hi ka xatua angatr troa öhne ka hape, ka nyipiewekë angatr nge hetre göhnë i angatre fe e hnine la ekalesia.

Angatr a drenge la itre trejine föe. Atre hnyawa hi la itre qatre thup ka hape, tha angatre casi kö la ka trene mekune ka loi. Celë hi kepin matre angatre a sipone la mekuna ne la itre trejine föe, me drei angatre hnyawa. Tro lai a ithuecatr kowe la itre trejine föe me hetre thangane ka loi kowe la itre qatre thup. Pine nemen? Öni Gerardo, ketre qatre thup ka huliwa ngöne la Bethela ka hape: “Ame la eni a sipo ixatua thene la itre trejine föe, ke kola xatua ni troa kuca hnyawane la huliwang. Ketre, ame la itre xaa trejine föe ke, ka hekö hë angatr kuca la ketre huliwa.” Ame ngöne la ekalesia, ke tru catre la itre trejine föe ka pionie, matre atre hnyawa hi angatr la pengöne la itre teritoar. Öni Bryan ketre qatre thup: “Ka nyipiewekë catre la itre trejine föe ngöne la huliwa i Iehova. Haawe, thele ixatua jë thei angatr!”

Ame la itre qatre thup ka atreine waiewekë, ke tha angatre kö a thipetrije la mekuna ne la itre trejine föe. Pine nemen? Öni Edward, ketre qatre thup ka hape, “Tro la atreine me mekuna ne la ketre trejine föe, a xatuane la ketre trejin trahmany troa atrepengöne hnyawa la ketre jol me itrotrohni.” (Ite edomë 1:5) Ngacama ame itre xaa ijin, tha trongëne kö la ketre qatre thup la mekuna ne la ketre trejine föe, ngo loi pe tro angeic a olene kowe la mekun me ixatua hna hamëne hnene lai trejine föe.

Angatr a inine la itre trejine föe. Ame la itre qatre thup ka atreine waiewekë, ke angatr a inine la itre trejine föe. Tune la kola ini angatr la aqane troa iujin la icasikeu göi cainöj, e pëkö trejin trahmany. Angatre fe a inine la itre trejine föe troa huliwane la itre zuti göi troa nyihnyawane me xup la itre uma thatraqane la hmi Iehova. Ame ngöne la Bethela, itre trejin ka elemeken a inine la itre trejine föe troa kuca la nöjei pengöne huliwa. Tune la huliwa ne nyihnyawane la Bethela, me itö, me comptabilité, me informatique me itre xaa huliwa ju kö. Ame la itre qatre thup a inine la itre trejine föe, angatre hi lai a amamane ka hape, ijije hi troa mejiun kowe la itre trejine föe, ke atreine fe hi angatr huliwa.

Alanyimu la itre trejine föe ka trongëne la itre hnei angatr hna inine qaathene la itre qatre thup, matre xatuane la itre xan. Ka tune la itre hna inine troa xupi uma. Angatr a xupe hmaca la itre uma ne la itre trejin hna lep hnei hulö. Ame pena la itre xan, angatre a inine la itre xaa trejine föe troa maca ngöne la huliwa ne cainöj. Nemene la mekuna ne la itre trejine föe kowe la itre qatre thup ka ini angatr? Öni Jennifer: “Ame ngöne la ketre hnë xupi Uma Ne Baselaia, hnene la ketre trejin trahmany ka elemekene la huliwa, hna xomi ijine troa ini ni. Nyidrëti a wangatrune la huliwang me felisite ni. Pi tro catre ni a ce huliwa me nyidrë, ke nyidrëti a mejiune koi ni me amamane ka hape, ka nyipiewekë catre ni.”

NYIPINE JË LA ITRE TREJINE FÖE KÖSË SIPU FAMI EPUN

Tui Iehova, tru la ihnimi së kowe la itre trejine föe! Haawe, loi e tro sa nyipi angatr kösë itre atrene la fami së. (1 Tim. 5:​1, 2) Tru la madrine së troa ce nyihlue i Iehova me angatr. Nge the qaja palaha, e kola mama koi angatr laka, easa hnim me xatua angatr. Öni Vanessa: “Eni a olene koi Iehova, la hnei Nyidrëti hna aijijë ni troa sine la organizasio i Nyidrë, hna nyiatrene hnene la itre trejin trahmany ka ithuecatr.” Önine la ketre trejine föe qaa Taiwan: “Eni a olene koi Iehova göne la organizasio i Nyidrë, ke kola nyipine la itre trejine föe me itre aliene hni angatr. Celë hi ka acatrene la lapauneng, me xatua ni troa wangatrune la göhneng e hnine ej.”

Drei jë kö la madrine i Iehova, la Nyidrëti a öhne la itre trejin trahmany a metrötrëne la itre trejine föe, tui Nyidrë! (Ite edomë 27:11) Öni Benjamin, ketre qatre thup ne Écosse ka hape, “Ame enehila, alanyim la itre trahmany ka tha metrötrëne kö la itre föe. Ngo ame la aja së, ke ene la troa kapa hnyawane la ketre föe ka traqa ngöne la ketre Uma Ne Baselaia.” Haawe, isine jë së troa nyitipu Iehova, ene la troa metrötrëne me hnim la itre trejine föe.​—Rom. 12:10.