Enuanom mbarimba binom wɔ hɔ a, beebi a wonyinii anaa wɔtsetsee hɔn no, mbarimba mmbu mbaa. Dɛ nhwɛdo no, ɔmansin do hwɛfo bi wɔ Bolivia a wɔfrɛ no Hans. Ɔkaa dɛ: “Mbarimba binom wɔ hɔ a, beebi a wɔtsetsee hɔn ntsi, ɔma wonya adwen dɛ hɔnho hia kyɛn mbaa. Ntsi wɔmmfa mbaa nnyɛ hwee.” Asafo mu panyin bi a ɔwɔ Taiwan a wɔfrɛ no Shengxian so kaa dɛ: “Beebi a metse no, mbanyin pii tse nka dɛ ɔnnsɛ dɛ mbaa dze hɔn ano toto hɔn nsɛm mu. Sɛ banyin bi innyim na sɛ ɔka adwenkyerɛ bi a ɔbaa bi dze mae ho asɛm a, annhwɛ a n’anyɛnkofo mbanyimfo bobu no enyimtsia mpo.” Mbanyin afofor so wɔ hɔ a, ndzɛmba bi a wɔyɛ dze bu mbaa enyimtsia no, annhwɛ a irunnhu. Bi a wobeyi nsɛnkwaa bi a ɔkyerɛ dɛ wommbu mbaa.

Naaso, enyigyesɛm nye dɛ, ɔmmfa ho beebi a wɔtsetsee ɔbanyin bi anaa n’amambra no, obotum asesa adwen a ɔwɔ wɔ mbaa ho no ma wɔaayɛ yie. Obotum eyi adwen a ɔnye dɛ mbanyin ho hia koraa kyɛn mbaa no efi n’adwen mu. (Eph. 4:​22-24) Sɛ osuasua Jehovah a, obotum ayɛ dɛm ma wɔaayɛ yie. Hom mma yensusu mbrɛ Jehovah bu mbaa, nye kwan a enuanom mbarimba botum afa do esuasua no. Afei so, yɛbɔhwɛ ndzɛmba a asafo mu mpanyimfo botum ayɛ dze akyerɛ dɛ wobu nkyerɛbaa a wɔwɔ asafo no mu no.

JEHOVAH BU MBAA DƐN?

Jehovah ayɛ mbrɛ ɔsɛ dɛ yebu mbaa ho nhwɛdo fɛfɛɛfɛw ama hɛn. Jehovah yɛ Egya a ɔwɔ ayamuhyehye na ɔdɔ ma nyimpa nyina. (John 3:16) Afei so, Jehovah bu nkyerɛbaa anokwafo dɛ mbabaa a wɔda n’akoma do. Hom mma yɛnhwɛ dza Jehovah yɛ dze kyerɛ dɛ odzi mbaa nyi.

 Ommbu hɔn dɛ hɔn ho nnhia. Jehovah bɔɔ mbanyin na mbaa nyinara wɔ no suban do. (Gen. 1:27) Ɔammbɔ mbanyimfo dɛ ɔsɛ dɛ hɔn adwen mu bue kyɛn mbaa, anaa ɔamma mbanyimfo adomakyɛdze soronko bi a mbaa nnyi bi. Afei so, ɔmmpɛ mbanyimfo hɔn asɛm nnkyɛn mbaa. (2 Mber. 19:7) Jehovah bɔɔ mbanyin na mbaa nyina dɛ wobotum akenkan Bible no atse ase. Bio so, ɔbɔɔ mbanyin na mbaa nyina dɛ wobotum esuasua no suban ahorow a ɔyɛ fɛw no. Afei so, enyidado a Jehovah dze ama mbanyimfo no, ɔnoara bi na ɔdze ama mbaa; binom bɛtsena ase daa wɔ asaase yi do, na binom so bɛyɛ ahemfo na asɔfo wɔ sor. (2 Pet. 1:1) Iyi nyina ma yehu dɛ, Jehovah mmbu mbanyimfo dɛ hɔn ho hia kyɛn mbaa.

Otsie hɔn. Jehovah dwen mbrɛ mbaa si tse nka nye ɔhaw ahorow a wohyia no ho paa. Dɛ nhwɛdo no, aber a Rachel na Hannah bɔɔ Jehovah mpaa no, otsiee hɔn na ɔyɛɛ hɔn ebisadze maa hɔn. (Gen. 30:22; 1 Sam. 1:​10, 11, 19, 20) Afei so, mbanyimfo a wotsiee mbaa binom hɔn adwenkyerɛ no, Jehovah maa wɔkyerɛw hɔnho nsɛm wɔ Bible no mu. Dɛ nhwɛdo no, aber a Jehovah kaa kyerɛɛ Abraham dɛ ontsie ne yer Sarah no, otsiei no. (Gen. 21:​12-14) Ɔhen David so tsiee Abigail. Nokwasɛm nye dɛ, ohun mpo dɛ Jehovah na ɔasoma Abigail dɛ ɔnye no mbɛkasa. (1 Sam. 25:​32-35) Jesus suasuaa suban pa a n’Egya wɔ no pɛpɛɛpɛ, na ɔno so tsiee ne maame Mary. (John 2:​3-10) Dɛm nhwɛdo ahorow yi ma yehu kwan kor a Jehovah fa do kyerɛ dɛ obu mbaa; ɔno nye dɛ otsie hɔn.

Ɔgye hɔn dzi. Dɛ nhwɛdo no, nna Jehovah gye Eve dzi dɛ obotum aboa ma woeesiesie asaase no. (Gen. 1:28) Ɔyɛɛ dɛm dze kyerɛɛ dɛ nna ommbu Adam dɛ no ho hia sen ne yer Eve, mbom no nna obu no dɛ ɔboafo pa ma no kun. Afei so, nna Jehovah gye nkɔnhyɛnyibaa Deborah na nkɔnhyɛnyibaa Huldah dzi dɛ wobotum etu no nkorɔfo fo. Nna ɔtsɛmbuafo na ɔhen mpo ka ho. (Atsɛ. 4:​4-9; 2 Ahe. 22:​14-20) Ndɛ so, Jehovah dze edwuma ahyɛ Christianfo mbaa hɔn nsa dɛ wɔnyɛ. Dɛm nkyerɛbaa anokwafo yi, binom yɛ adawurbɔfo, akwampaafo, nye asɛmpatserɛwfo. Afei so, binom boa ma wɔdorɔw Ahendzi Asa nye Bethel adan ahorow ho plan. Afei so, wɔboa ma wosisi na wosiesie so. Binom so som wɔ Bethel, na binom so yɛ edwuma wɔ mbea ahorow a wɔkyerɛ kasa ase (RTO). Dɛm nkyerɛbaa yi yɛ dɔm kɛse a Jehovah dze hɔn reyɛ edwuma ma n’apɛdze ayɛ hɔ. (Ndw. 68:11) Iyi ma yehu dɛ, Jehovah mmbu mbaa dɛ wɔyɛ mberɛw anaa wonnyim hwee yɛ.

ENUANOM MBARIMBA BESI DƐN ESUASUA MBRƐ JEHOVAH SI BU MBAA NO?

Enuanom mbarimba, sɛ yɛpɛ dɛ yehu dɛ yebu Christianfo nkyerɛbaa dɛ mbrɛ Jehovah bu hɔn no a, ɔsɛ dɛ yɛhwehwɛ hɛnho mu hwɛ adwen a yɛwɔ wɔ hɔn ho nye mbrɛ yɛnye hɔn dzi. Sɛ yebotum ayɛ dɛm a, yebehia mboa. Dɛ nhwɛdo no, sɛ yarba bi wɔ obi n’akoma ho a, efir a wɔdze twa X-ray botum ama woeehu. Dɛmara so na sɛ adwen a yɛwɔ wɔ mbaa ho no mmfata na ɔyɛ dzen mpo dɛ afofor bohu a, hɛn nyɛnko a ɔbɛn hɛn paa anaa Nyankopɔn n’Asɛm no botum aboa hɛn ma yeehu. Ebɛnadze na yɛbɛyɛ ama yeetum enya mboa a ɔtse dɛm?

Bisa wo nyɛnko berɛbo bi. (Mbɛ. 18:17) Sɛ yɛwɔ nyɛnko bi a yɛgye no dzi, na yenyim no dɛ ɔbɛka nokwar akyerɛ hɛn a, yebotum ebisa no nsɛm a odzidzi do yi: “Kwan a mefa do nye nkyerɛbaa dzi no, ihu no dɛn? Ehwɛ a, wɔtse nka dɛ mubu hɔn anaa? Ehwɛ a, mbrɛ misi nye hɔn dzi no, ɔsɛ dɛ meyɛ ho biribi anaa?” Sɛ wo nyɛnko no ka ndzɛmba bi a ibotum ayɛ ama enye nkyerɛbaa edzi no yie ho asɛm kyerɛ wo a, mma mmfa nsɛm nnyiyi woho ano anaadɛ mma mma ɔnnhaw wo. Mbom no, fi wo pɛ mu yɛ nsesa biara a ɔsɛ dɛ eyɛ no.

Sua Nyankopɔn n’Asɛm. Kwan a oye sen biara a yebotum afa do ehu dɛ yɛnye hɛn nkyerɛbaa no dzi no yie no nye dɛ yɛdze Nyankopɔn n’Asɛm no bɛyɛ hɛnho mu nhwehwɛmu. (Heb. 4:12) Sɛ yerusua Bible no a, yebohu dɛ mbarimba binom nye mbaa dzii no yie, na binom so annyɛ dɛm. Yebotum dze dza wɔyɛe no atoto mbrɛ yesi nye mbaa dzi no ho, na yaahwɛ. Bio so, adwen a ɔmmfata a mbarimba binom wɔ wɔ mbaa ho no, ɔnnsɛ dɛ yegyina kyerɛwsɛm kor bi do dze foa adwen a ɔtse dɛm do. Mbom no, ɔsɛ dɛ yɛdze toto kyerɛwnsɛm afofor ho, na sɛ yɛyɛ dɛm a, ɔbɛma yeehu mbrɛ Jehovah si nye mbaa dzi no yie. Dɛ nhwɛdo no, 1 Peter 3:7 ka dɛ, ɔsɛ dɛ okun dzi ne yer nyi osiandɛ ɔyɛ ‘awendze a ɔyɛ mberɛw.’ b Ehwɛ a, dɛm asɛm yi kyerɛ dɛ mbaa ho nnhia  dɛ mbanyin, kyerɛ dɛ, hɔn adwen mu mmbue na wonnyim hwee anaa? Ɔnntse dɛm koraa! Sɛ yɛdze asɛm a Peter kae no toto asɛm a ɔwɔ Galatiafo 3:​26-29 ho a, ɔbɛma yeehu siantsir a yɛreka dɛm. Hɔ ma yehu dɛ Jehovah eyi mbaa na mbanyin nyina dɛ wɔnye Jesus nkedzi adze wɔ sor. Sɛ yesua Nyankopɔn n’Asɛm no anaa yebisa hɛn nyɛnko berɛbo bi ma ɔka mbrɛ yesi nye mbaa dzi no ho asɛm kyerɛ hɛn a, ɔbɔboa hɛn ma yeehu nsesa a ɔwɔ dɛ yɛyɛ ama yeetum akyerɛ dɛ yebu hɛn nkyerɛbaa no.

EBƐNADZE NA ASAFO MU MPANYIMFO BOTUM AYƐ DZE AKYERƐ DƐ WOBU ENUANOM MBAA?

Enuanom mbarimba a wɔwɔ asafo no mu no botum esuasua mbrɛ asafo mu mpanyimfo fi obu mu nye enuanom mbaa dzi no. Ebɛnadze na asafo mu mpanyimfo yɛ dze kyerɛ dɛ wobu hɛn nkyerɛbaa no? Hom mma yɛnhwɛ akwan ahorow pɔtsee bi a wɔfa do yɛ dɛm.

Wɔkamfo enuanom mbaa no. Ɔsomafo Paul yɛɛ nhwɛdo pa a asafo mu mpanyimfo botum esuasua. Krataa a ɔkyerɛwee kɛmaa Rome asafo no, ɔkamfoo nkyerɛbaa binom wɔ mu. (Rom. 16:12) Ɔwodze, hwɛ mbrɛ dɛm nkyerɛbaa no enyi besi agye aber a wɔkenkaan dɛm krataa yi wɔ asafo no mu no. Dɛmara na ndɛ so, asafo mu mpanyimfo fi hɔn akoma mu kamfo nkyerɛbaa wɔ suban pa a wɔda no edzi nye edwuma a wɔyɛ ma Jehovah no ho. Iyi ma nkyerɛbaa yi hu dɛ enuanom a wɔwɔ asafo no mu no bu hɔn na hɔn enyi sɔ mbɔdzen a wɔbɔ no. Nkuranhyɛsɛm bi a asafo mu panyin bi bɛka akyerɛ nkyerɛbaa no, obotum aba dɛ ɔno nye asɛm a nna wohia ama woeetum akɔ do dze nokwardzi asom Jehovah.—Mbɛ. 15:23.

Sɛ asafo mu mpanyimfo rekamfo enuanom mbaa a, ɔsɛ dɛ wɔka adze pɔtsee bi a ɔayɛ ho asɛm. Ebɛnadze ntsi a? Akyerɛbaa bi a wɔfrɛ no Jessica kaa dɛ: “Sɛ enuanom mbarimba ma akyerɛbaa bi ‘ayekoo’ a, ɔma n’enyi gye paa. Naaso sɛ wotum kamfo hɛn wɔ biribi pɔtsee a yɛayɛ ho a, ɔhyɛ hɛn nkuran kɛse. Bi tse dɛ aber a yɛaboa hɛn mba ma wɔatsena ase komm wɔ adzesua ase anaa yɛabɔ mbɔdzen akɛfa hɛn Bible suanyi bi aba asafo  nhyiamu no.” Sɛ asafo mu mpanyimfo kamfo enuanom mbaa wɔ biribi pɔtsee a wɔayɛ ho a, ɔma wɔtse nka dɛ wɔka asafo no ho, na wɔsom bo ma asafo no.

Wotsie enuanom mbaa no. Asafo mu mpanyimfo a wɔbrɛ hɔnho adze no gye to mu dɛ nyansa nnyi ɔbaakofo ne tsirmu. Mpanyimfo a wɔtse dɛm no bisa enuanom mbaa hɔn adwenkyerɛ wɔ ndzɛmba ho, na sɛ wɔrekasa a, wɔyɛ aso tsie hɔn. Sɛ mpanyimfo yɛ dɛm a, wɔhyɛ enuanom mbaa no nkuran na hɔnankasa so nya do mfaso. Ebɛn kwan do? Asafo mu panyin bi a wɔfrɛ no Gerardo a ɔsom wɔ Bethel kaa dɛ: “Mebohu dɛ, sɛ mibisa enuanom mbaa hɔn adwenkyerɛ a, ɔboa me ma mutum yɛ edwuma a ɔhyɛ me nsa no yie. Mpɛn pii no, ebɔhwɛ no nna wɔayɛ edwuma no akyɛr sen enuanom mbarimba beberee.” Asafo no mu so, enuanom mbaa pii yɛ akwampaafo, ntsi wonyim hɔn a wɔwɔ hɛn mpotamu no yie paa. Asafo mu panyin bi a wɔfrɛ no Bryan kaa dɛ: “Hɛn nuanom mbaa no wɔ suban pa nye nyimdzee pii a wobotum dze aboa ahyehyɛdze no. Dɛm ntsi sua biribi fi hɔn hɔ!”

Asafo mu mpanyimfo a hɔn adwen mu da hɔ no mmper hɔnho mmbɔ enuanom mbaa hɔn adwenkyerɛ nngu. Ebɛnadze ntsi a? Asafo mu panyin bi a wɔfrɛ no Edward kaa dɛ: “Akyerɛbaa bi n’adwenkyerɛ nye no suahu botum aboa onua bi ma oehu asɛm bi n’enyi do yie, na obotum aboa no ma ɔaatse afofor ase so.” (Mbɛ. 1:5) Sɛ asafo mu panyin bi remmfa akyerɛbaa bi n’adwenkyerɛ nnyɛ edwuma mpo a, obotum ada no ase dɛ ɔkyerɛɛ n’adwen na ɔammfa dza onyim no ennsie.

Wɔtsetse enuanom mbaa no. Asafo mu mpanyimfo a hɔn adwen mu da hɔ no hwehwɛ akwan ahorow a wobotum afa do atsetse enuanom mbaa. Bi nye dɛ, wobotum akyerɛ enuanom mbaa mbrɛ wobesi ahwɛ asɛnka nhyiamu do, na sɛ ɔkɛba no dɛ onua bi a woenuma nnyi hɔ a, woetum ayɛ. Bi so nye dɛ, wobotum akyerɛ hɔn mbrɛ wosi dze edwindadze ahorow bi anaa mfir bi dzi dwuma mbrɛ ɔbɛyɛ a wobotum dze aboa ma woeesisi asafo adan anaa woeesiesie. Sɛ ekɔ Bethel a, mpanyimfo a wɔdeda dwumadzibea ahorow ano no kyerɛ enuanom mbaa mbrɛ wobesi edzi dwuma ahorow bi. Bi nye dɛ wobesiesie ndzɛmba a asɛɛ, wɔbɔtotɔ ndzɛmba, wobobu sika ho akontaa, wɔbɛhyehyɛ kɔmpiwta do dwumadzi bi, nye pii a ɔkeka ho. Sɛ asafo mu mpanyimfo tsetse enuanom mbaa a, wɔkyerɛ dɛ wɔgye hɔn dzi na sɛ wɔdze biribi hyɛ hɔn nsa a, wobotum ayɛ.

Nkyerɛbaa pii dze ntsetsee a wonya fi asafo mu mpanyimfo hɔ no boa afofor. Dɛ nhwɛdo no, sɛ atoyerɛnkyɛm bi si na enuanom hɔn efie sɛɛ a, nkyerɛbaa binom dze adansi ho ntsetsee a woenya no boa enuanom ma wɔsan sisi hɔn adan. Nkyerɛbaa binom so dze bagua mu dasedzi ho ntsetsee a woenya no boa nkyerɛbaa pii ma wohu mbrɛ wobesi ayɛ bi. Enuanom mbaa bu asafo mu mpanyimfo a wɔtsetse hɔn no dɛn? Akyerɛbaa bi a wɔfrɛ no Jennifer kaa dɛ: “Aber a mokɔboaa Ahendzi Asa bi a nna worisi no, onua a nna ɔda edwuma no ano no tɔɔ no bo ara tsetsee mu. Ohun edwuma a meyɛe no, na ɔkamfoo me. Nna m’enyi gye ho dɛ menye no bɛyɛ edwuma, osiandɛ nna ɔgye me dzi na ɔmaa metsee nka dɛ mosom bo.”

SƐ YƐFA ENUANOM MBAA DƐ HƐN EBUSUAFO A, EBƐN MFASO NA YEBENYA?

Jehovah dɔ hɛn nkyerɛbaa no paa, na dɛmara na hɛn so yɛdɔ hɔn! Dɛm ntsi yɛfa hɔn dɛ hɛn ebusuafo. (1 Tim. 5:​1, 2) Wɔda hɛn akoma do paa, na ɔyɛ hɛn enyigye dɛ yeenya hokwan nye hɔn abɔ mu rosom. Afei so, sɛ wohu dɛ yɛdɔ hɔn na yɛtaa hɔn ekyir a, ɔma hɔn enyi gyee paa. Akyerɛbaa bi a wɔfrɛ no Vanessa kaa dɛ: “Meda Jehovah ase paa dɛ mowɔ n’ahyehyɛdze no mu, na enuanom mbarimba a wɔwɔ mu no ma m’ahom ka moho paa.” Akyerɛbaa bi so a ɔwɔ Taiwan kaa dɛ: “Ɔyɛ me dɛw paa dɛ Jehovah nye n’ahyehyɛdze no bu mbaa dɛ yɛsom bo na wɔdwen mbrɛ yesi tse nka no ho. Iyi hyɛ me gyedzi dzen paa, na ɔma enyisɔ a mowɔ dɛ meka Jehovah n’ahyehyɛdze no ho yɛ kɛse.”

Mbrɛ Jehovah si bu enuanom mbaa no, sɛ ohu dɛ Christianfo mbarimba anokwafo robɔ mbɔdzen dɛ wobosuasua no a, ɔma n’enyi gye paa! (Mbɛ. 27:11) Asafo mu panyin bi a ɔwɔ Scotland a wɔfrɛ no Benjamin kaa dɛ: “Ndɛ, mbarimba a wɔaba no mu pii mmbu mbaa koraa. Ntsi sɛ mbaa ba Ahendzi Asa do a, yɛpɛ dɛ yɛma wɔtse nka dɛ yɛdɔ hɔn na yebu hɔn so.” Hom mma hɛn nyina nsuasua mbrɛ Jehovah si bu mbaa no, yɛmma wonhu dɛ yɛdɔ hɔn, na yɛmfa obu a ɔsɛ fata no mma hɔn.—Rom. 12:10.