Heta ermáno okakuaa peteĩ país machístape, ojeapoʼihápe umi kuñanguérape. Por ehémplo, peteĩ superintendénte de sirkuíto oservíva Bolíviape, hérava Hans, omombeʼu: “Oĩ okakuaáva peteĩ lugár enterovéva imachistahápe ha upéicha rupi opensa voi kuimbaʼekuéra iñimportanteveha kuñágui”. b Peteĩ ansiáno oikóva Taiwánpe, hérava Shengxian, heʼi: “Che aikohápe ojeʼe voi kuñanguéra noñentremetéi vaʼerãha kuimbaʼekuéra rembiapóre, ha peteĩ kuimbaʼe omensiona haguérente peteĩ kuña heʼi vaʼekue, ikatúma umi ótro kuimbaʼe ou ndorrespetavéi chupe”. Oĩ katu kuimbaʼe omokañyvéva la opensáva kuñanguérare, péro ohechaukánteva avei nomombaʼeiha chupekuéra omombeʼúvo umi chíste oapoʼíva kuñanguérape.

Oĩramo jepe kuimbaʼe okakuaáva oĩháme heta imachístava, lomímonte ikatu okambia opensa lája, upéicha nopensamoʼãvéima kuimbaʼekuéra iñimportanteveha la kuñágui (Efes. 4:​22-24). ¿Mbaʼéichapa ikatu ojapo upéva? Osegi vaʼerã Jehová ehémplo. Ko artíkulope jahecháta mbaʼéichapa Jehová otrata kuñanguérape, mbaʼéichapa ermanokuéra ikatu oaprende otrata hag̃ua kuñanguérape Jehová ojapoháicha ha mbaʼéichapa ansianokuéra omoĩ vaʼerã ehémplo ko mbaʼépe.

¿MBAʼÉICHAPA JEHOVÁ OTRATA KUÑANGUÉRAPE?

Jehová otrata porãiterei kuñanguérape, ha péicha omoĩ ñandéve pe ehémplo iporãvéva. Haʼe ningo peteĩ túa imbaʼeporãva ha ohayhúva entéro ifamíliape (Juan 3:16). Jehová ohayhu itajýra teéicha umi ermána oservívape chupe. Jahechamína mbaʼéichapa haʼe ohechauka omombaʼetereiha chupekuéra.

 Jehová ndoapoʼíri ermanakuérape. Haʼe okrea vaʼekue kuimbaʼe ha kuñáme ijoguaháramo (Gén. 1:27). Haʼe ningo ojapo vaʼekue kuimbaʼe ha kuñáme peteĩchante, ndahaʼéi ombovaleve ni ombokatupyryvéva kuimbaʼekuérape. Mokõivévape ojapo ikatu hag̃uáicha ontende umi mbaʼe la Biblia omboʼéva ha ohaʼanga hag̃ua umi kualida porãite haʼe orekóva. Jehová ndahaʼéi hína ku ohayhuvéva kuimbaʼekuérape (2 Crón. 19:7). Haʼe omombaʼe ojeroviávape guive hese, tahaʼe kuña térã kuimbaʼe. Ha mokõivévape omeʼẽ esperánsa, tahaʼe oikove hag̃ua pára siémpre ko yvy ape ári térã oikove hag̃ua yvágape rréi ha saserdóteramo (2 Ped. 1:​1, nóta). Jahecha porã Jehová ndoapoʼiriha ni michĩmi umi kuñanguérape.

Jehová ohendu ermanakuérape. Jehová oñeinteresa la oñandúva ha oipyʼapývare kuñanguérape. Por ehémplo ohendu ha okontesta vaʼekue Raquel ha Ana oñemboʼérõ guare chupe (Gén. 30:22; 1 Sam. 1:​10, 11, 19, 20). Avei oskrivika iñeʼẽme oĩ hague kuimbaʼe orekóva enkuénta umi kuña heʼíva. Por ehémplo, Abrahán iñeʼẽrendu vaʼekue Jehovápe heʼírõ guare chupe ohendu hag̃ua hembireko Sárape (Gén. 21:​12-14). Rréi David ohendu vaʼekue Abigaílpe ha heʼi vaʼekue voi Jehová omondo hague chupe hendápe (1 Sam. 25:​32-35). Jesús ohendu vaʼekue isy Maríape ha jaikuaa ningo haʼe ojoguaitereiha Jehovápe (Juan 2:​3-10). Jahechaháicha, Jehová ohendu umi kuñanguérape ha oreko enkuénta la heʼíva hikuái, péicha ohechauka omombaʼeha chupekuéra.

Jehová ojerovia ermanakuérare. Por ehémplo, Jehová omeʼẽ avei Évape pe rresponsavilida okuida hag̃ua ko yvy tuichakuére (Gén. 1:28). Ojapóvo upéicha, Jehová ohechauka haʼe nopensaiha Adán iñimportanteveha hembirekógui. Upéva rangue, heʼi voi hese haʼeha peteĩ ajudánte ikatupyrýva. Avei onkarga vaʼekue umi profetísa Débora ha Huldápe oakonseha hag̃ua ipuévlope, umíva apytépe peteĩ huéspe ha peteĩ rréipe jepe (Juec. 4:​4-9; 2 Rey. 22:​14-20). Koʼág̃a peve Jehová ojerovia isiervakuérare okumpli hag̃ua ivolunta. Por ehémplo oĩ oservíva de puvlikadóra, prekursóra ha misionéra, oĩ avei oipytyvõva oñediseña, oñemopuʼã ha oñemantene hag̃ua umi Salón del Reino ha sukursál. Heta oĩ oservíva avei Betélpe ha umi ofisína rremóta de traduksiónpe. Koʼã ermána ningo ehérsito tuicháva Jehová oipurúva okumpli hag̃ua ivolunta (Sal. 68:11). Péicha jahecha porãiterei Jehová nopensaiha umi kuña iñarruinadaha ni ndojapokuaaiha mbaʼeve.

¿MBAʼÉICHAPA ERMANOKUÉRA IKATU OTRATA UMI KUÑAME JEHOVÁ OJAPOHÁICHA?

Ermanokuéra jaikuaa hag̃ua jatratápa hína ermanakuérape Jehová ojapoháicha, ñaanalisa vaʼerã umi mbaʼe jajapóva ha ñapensáva. Péro upearã ñaikotevẽ ajúda, por ehémplo, peteĩ doktór oikuaaséramo mbaʼéichapa oĩ ñane korasõ, ojapoka ñandéve estúdio. Péicha avei jaikuaaséramo mbaʼépa jareko hína ñane korasõme, ñaikotevẽ ajúda. Upearã ikatu ñanepytyvõ peteĩ ñane amigoite térã jahecha mbaʼépa heʼi Ñandejára Ñeʼẽ. ¿Mbaʼéichapa ñanepytyvõkuaa koʼã mokõi mbaʼe jaikuaa hag̃ua noiméipa jaapoʼi hína kuñanguérape?

Ñañeʼẽ peteĩ ñane amigoiténdi (Prov. 18:17). Ñañemongeta peteĩ ñane amígo térã ñane amigaite imbaʼeporãva ha iñakãguapývandi, ikatu ñaporandu chupe: “¿Mbaʼéichapa ndéverõ g̃uarã atrata ermanakuérape? ¿Oñandúpa haʼekuéra arrespetaha chupekuéra? ¿Ikatúpa amehora álgope atrata porãve hag̃ua umi ermánape?”. Oimérõ haʼe omeʼẽ ñandéve peteĩ konsého, ani ñañepyrũ ñañedefendese. Upéva rangue, ensegídama voi ñañehaʼã vaʼerã ñakambia.

Jastudia Ñandejára Ñeʼẽ. Jahechakuaa hag̃ua mbaʼéichapa jatrata jaikóvo ermanakuérape ikatu jaipuru Ñandejára Ñeʼẽ. La Biblia ñanepytyvõta jahecha hag̃ua oĩ porãpa la ñapensa lája ha umi mbaʼe jajapóva (Heb. 4:12). Jastudiávo la Biblia jahecháta oĩ hague kuimbaʼe otrata porãva umi kuñáme ha umi ndaupeichaietéva, upéi ikatu jajepyʼamongeta mávapepa jajoguave hína. Avei ndajajagarramoʼãi peteĩ téxto de la Biblia ha jaipuru vai umi kuñanguéra kóntrape, upéva rangue jarekóta enkuénta hetave téxto bíblico jaikuaa hag̃ua mbaʼépa Jehová opensa kuñanguérare. Por ehémplo 1 Pedro 3:7 heʼi umi ménape omombaʼe vaʼerãha hembirekópe, pórke haʼekuéra ‘ikangyve  hína ha ojogua peteĩ váso helikadovévape’. c ¿Heʼisépa upéva pe kuña iñakãʼiha, ndojapokuaaiha mbaʼeve ha pe kuimbaʼe iñimportanteveha? Ni mbaʼevéicharõ. Pono ñantende vai la Pedro heʼi vaʼekue, ikatu jareko enkuénta la heʼíva Gálatas 3:​26-29. Upépe heʼi Jehová oiporavo hague kuña ha kuimbaʼépe ogoverna hag̃ua Jesús ndive yvágape. Jastudiáramo la Biblia ha jajeruréramo konsého, katuete ñaaprendéta jatrata porãve hag̃ua umi ermánape.

¿MBAʼÉICHAPA ANSIANOKUÉRA OHECHAUKA ORRESPETAHA UMI ERMÁNAPE?

Umi ermáno kongregasionpegua ikatu otrata porãve umi ermánape osegívo pe ehémplo porã omoĩva umi ansiáno. ¿Mbaʼéichapa umi ansiáno ikatu ohechauka orrespeta ha ohayhuha umi ermánape? Jahechamína.

Ofelisita umi ermánape. Apóstol Pablo omoĩ vaʼekue peteĩ ehémplo iporãva umi ansianokuérape g̃uarã. Oskrivírõ guare peteĩ kárta pe kongregasión de Rómape, haʼe ofelisita vaʼekue unas kuánta ermánape (Rom. 16:12). Ñañeimahinamína mbaʼeichaitépa oiméne ovyʼa rakaʼe umi ermána ojeleérõ guare pe kongregasiónpe Pablo kárta. Péicha avei koʼág̃a umi ansiáno notĩri ofelisita hag̃ua umi ermánape, umi ikualida porãre ha ombaʼapo jejopy haguére Jehová servísiope. Péicha umi ermána oñandúta ojerrespeta ha ojevaloraha chupekuéra kongregasiónpe. Ikatu oime peteĩ ermána upevaite hína la oikotevẽva kuri osegi hag̃ua oservi Jehovápe fiélmente (Prov. 15:23).

Umi ansiáno ofelisita jave peteĩ ermánape, isinséro vaʼerã ha heʼi vaʼerã mbaʼérepa oguerohory chupe. ¿Mbaʼéichapa ikatu ojapo upéva? Peteĩ ermána hérava Jessica heʼi: “Igústo ningo umi  ermáno heʼírõ oréve: ‘Ndeguapaitéiko’. Péro igustovéntema heʼírõ oréve direktoite mbaʼépa la rojapo porãva. Por ehémplo orefelisitárõ romboʼe haguére ore membykuérape ojeporta porã hag̃ua rreunionhápe, térã roho haguére roheka peteĩ estudiántepe oho hag̃ua Salónpe”. Umi ansiáno heʼi porãrõ umi ermánape mbaʼérepa ofelisita chupekuéra, umi ermána oñandúta ojevaloraha chupekuéra ha oñekotevẽha hesekuéra kongregasiónpe.

Ohendu umi ermánape. Umi ansiáno iñumíldeva orrekonose ndahaʼeiha haʼekuérante la orekóva idéa porã. Upévare oporandu chupekuéra mbaʼépa opensa peteĩ témare ha ojapysaka porã hesekuéra. Ojapóvo upéicha umi ansiáno omoñeñandu porã umi ermánape ha haʼekuéra voi oñevenefisia. ¿Mbaʼérepa? Peteĩ ansiáno hérava Gerardo, oservíva Betélpe, heʼi: “Umi suherénsia omeʼẽva chéve umi ermána chepytyvõ ajapo porãve hag̃ua che traváho. Pyʼỹinte umi ermána la arevéma ombaʼapóva umi ermánogui”. Umi kongregasiónpe oĩ jepi heta prekursóra oikuaa porãva pe território. Peteĩ ermáno hérava Brian heʼi: “Umi ermána ivale heta mbaʼépe ha ikatu ideprovechoiterei Jehová organisasiónpe, ñañehaʼãkena ñaaprende chuguikuéra”.

Umi ansiáno iñarandúva ndoikói omboykéntema la peteĩ ermána heʼíva. ¿Mbaʼérepa? Edward, oservíva de ansiáno, heʼi: “Peteĩ ermána heʼíva ha oikuaáva ikatu oipytyvõ peteĩ ermánope ontende porã hag̃ua peteĩ situasión ha oñemoĩ hag̃ua umi ótro lugárpe” (Prov. 1:5). Peteĩ ansiáno ndaikatúi mbaʼéramo osegi pe suherénsia omeʼẽ vaʼekue chupe peteĩ ermána, lomímonte oagradese chupe omombeʼu haguére la opensáva ha la oikuaáva.

Ombokatupyry ermanakuérape. Umi ansiáno iñarandúva ohecha mbaʼépepa ikatu ombokatupyry umi ermánape. Por ehémplo, ikatu omboʼe chupekuéra mbaʼéichapa ojapo vaʼerã pe aty ñasẽ mboyve japredika peichahágui ndaipórirõ peteĩ ermáno vautisádo. Ikatu avei ohechauka umi ermánape mbaʼéicha ojepuru peteĩ erramiénta térã peteĩ mákina ikatu hag̃uáicha haʼekuéra oapoja umi projékto de konstruksión ha mantenimiénto. Betélpe umi superintendénte ombokatupyry umi ermánape ojapokuaa hag̃ua heta mbaʼe. Por ehémplo mantenimiénto, kómpra, kontavilida, programasión de komputadóra ha umícha. Umi ansiáno ombokatupyry jave umi ermánape ohechauka ojeroviaha hesekuéra.

Heta ermána oipuru la oñemboʼe vaʼekue chupekuéra oipytyvõ hag̃ua hetave ermánape. Por ehémplo oĩ oaprendéva heta mbaʼe konstruksiónpe, ha upéi oipytyvõ oñemopuʼã jey hag̃ua umi óga hoʼapa vaʼekue peteĩ desástre naturál káusare. Umi ermána orresivi vaʼekue entrenamiénto pe predikasión púvlikape g̃uarã upéi omboʼe avei ótra ermánape ikatu hag̃uáicha opartisipa avei. ¿Mbaʼépa heʼi umi ermána umi ansiáno ombokatupyry vaʼekuére chupekuéra? Jennifer omombeʼu: “Ambaʼapo vaʼekue oñemopuʼãrõ guare peteĩ Salón del Reino. Ha upérõ peteĩva umi ermáno odirihíva pe projékto, oñemotiémpo chembokatupyry hag̃ua. Haʼe oñatende vaʼekue la che ajapóvare ha chefelisita. Igustoiterei vaʼekue chéve amba’apo hendive, pórke ahecha vaʼekue haʼe chemombaʼeha ha ojeroviaha cherehe”.

UMI MBAʼE PORÃ IKATÚVA JAHUPYTY

Jahayhueterei ningo ñane ermanakuérape Jehová ojapoháicha. Upévare jatrata chupekuéra ñane ermána teéicha (1 Tim. 5:​1, 2). Javyʼaiterei ikatu haguére jaadora Jehovápe umi ermána ndive ha jaipota haʼekuéra oikuaa jahayhu ha jaapojaha chupekuéra. Peteĩ ermána hérava Vanessa omombeʼu: “Aagradeseterei ningo Jehovápe ikatu haguére aĩ iñorganisasiónpe oĩháme hetaite ermáno chemokyreʼỹva”. Peteĩ ermána oikóva Taiwánpe heʼi avei: “Che aagradese Jehovápe ha iñorganisasiónpe orevalora haguére ha oreko haguére enkuénta la roñandúva. Upéva omombarete che jerovia ha avyʼaiterei aĩ haguére Jehová puévlope”.

Oiméne ovyʼaite Jehová ohechávo mbaʼéichapa umi ermáno oñehaʼã otrata kuñanguérape haʼe ojapoháicha (Prov. 27:11). Peteĩ ansiáno oikóva Escóciape, hérava Benjamín, heʼi: “Ko múndope ndojerrespetaiete umi kuñáme. Upévare ermanakuéra oike jave peteĩ Salón del Réinope, roipota oñandu idiferentetereiha koʼápe”. Ñañehaʼãmbaitékena jasegi Jehová ehémplo ha jatrata porã umi ermánape, tojekuaa jahayhu ha jarrespetaha chupekuéra, haʼekuéra omereseháicha (Rom. 12:10).