Some wen grow up in cultures wea plenny guys treat wahines like dey worth less den dem. Like Hans, one braddah fo da circuit in Bolivia wen tell, “Some braddahs wen grow up in one culture dat tell men gotta ack tantaran. Dese guys believe dey moa betta den women, no treat dem wit respeck, an treat dem jalike dey notting.” Shengxian, one elda in Taiwan tell, “Wea I live, plenny guys feel wahines no moa da right fo tell guys wat dey tink. Brah, if one guy even tell how one wahine tink about someting, erybody else going tink he one scrub.” Odda guys show dey look down on women in odda kine ways. Like, maybe dey crack jokes dat no show respeck fo wahines.

Good ting no matta wat culture one guy raised in he still yet can change. He can learn fo stop tinking dat guys stay betta den wahines. (Efe 4:22-24) Dey can do dis if dey copy Jehovah. In dis lesson, we going talk about how Jehovah treat wahines, how braddahs can learn fo treat wahines jalike Jehovah, an how eldas can show how fo respeck sistahs.

HOW JEHOVAH TREAT WAHINES?

Jehovah set da perfeck exampo of how fo treat wahines. Az one loving faddah, he kea fo his kids. (John 3:16) An faithful sistahs stay jalike precious daughtahs to him. We go look some ways Jehovah show he respeck an love wahines.

He treat dem same same. Jehovah wen make guys an wahines fo be like him. (Start 1:27) He neva make guys moa smart o wen  give dem moa skills den wahines, an he no like guys moa den wahines. (2 Rec 19:7) He wen make guys an wahines same same so dat dey can undastan Bible truts an copy his beautiful qualities. Da way Jehovah see da faith of guys an wahines is same same, no matta if dea hope is fo live foeva on paradise earth o serve him az kings an prieses up in heaven. (2 Pet 1:1) Az clear fo see, Jehovah no look down on wahines.

He lissen to dem. Jehovah kea about how wahines feel an da problems dey get. He wen lissen an ansa Rachel’s an Hannah’s prayers. (Start 30:22; 1 Sam 1:10, 11, 19, 20) Jehovah even had Bible writas put down times wen guys wen lissen wahines. Like da time Jehovah wen tell Abraham fo lissen his wife, Sarah. (Start 21:12-14) King David wen lissen Abigail. He even wen feel Jehovah had send her fo talk to him. (1 Sam 25:32-35) Jesus wen copy his Faddah’s qualities perfeck, an he wen lissen to his maddah, Mary. (John 2:3-10) All dis show dat one way Jehovah show respeck fo wahines is by lissening to dem.

He trus dem. Fo exampo, Jehovah wen trus Eve fo help take kea da whole earth. (Start 1:28) Dat wen show dat He neva see Eve az less den Adam, but az one partna an helpa fo her husband. Jehovah wen trus da wahines dat wen talk fo him, Deborah and Huldah, fo tell his peopo wass good fo do, even one judge an one king. (Leadas 4:4-9; 2 Ki 22:14-20) Today, Jehovah trus Christian wahines fo do his work. Dese faithful sistahs work az preachas, pioneas, an missionaries. Dey help design, build, an take kea Meeting Places an odda branch buildings. Some of dem work at Bethel, oddas work in remote translation offices. Dese sistahs stay like one mangus army dat Jehovah send out fo do wat he like. (Songs 68:11) Az clear fo see, Jehovah no see wahines az weak an no can do notting.

HOW BRADDAHS CAN LEARN FO TREAT WAHINES SAME SAME LIKE JEHOVAH?

Braddahs, fo figga out if we treating Christian sistahs same same like Jehovah, we gotta check out real good how we tink an ack. Fo do dat, we need help. One docta can use tools fo figga out if somebody’s heart stay healthy o sick. Same same, one good fren an da Bible can help us fo figga out if da way we feel about wahines make Jehovah happy o not. Wat we can do fo get dat kine help?

Ask one good fren. (Smart Guys 18:17) If we get one fren dat we trus who stay nice an get one level head, would be good fo ask um questions like, “Eh, how you tink I treat sistahs? You tink dey can tell I get respeck fo dem, o wat? Get someting I can do fo treat dem mo betta?” If yoa fren tell you how fo get betta, try not fo make excuses. Radda, be happy fo make da changes.

Study da Bible. Da bes way fo us know if we stay treating oua sistahs good, is fo use da Bible fo help us check out how we tink an ack. (Heb 4:12) Az we study da Bible, we learn about guys who wen treat wahines good, an guys who neva. Da tings dey wen do, we can see how line up wit wat we do. Not ony dat, we gotta make shua fo no use one Bible verse da wrong way fo fit day way we tink about wahines. Fo exampo, wat tell in 1 From Peter 3:7, one husband gotta show respeck fo his wife “cuz she not as strong.” a Dis mean dat she stay worth less, not az smart, o no can do az much az one guy? No way! Tink about wat Peter wen tell an wat Fo Da Galatia Peopo 3:26-29 tell, dat Jehovah wen pick wahines an guys fo rule togedda wit Jesus in heaven. Wen we  study da Bible an ask one good fren about how he o she tink about da way we treat wahines, we can learn how fo show da right kine respeck fo oua sistahs.

HOW ELDAS SHOW RESPECK FO SISTAHS?

Braddahs in da local hui can also learn how fo treat sistahs wit respeck by copying da love dat da eldas show. How da eldas do dis? We go look some ways.

Dey give good kine words to sistahs. Da aposal Paul wen set one good exampo fo eldas copy. In da letta he wen write fo da local hui in Rome, Paul had give good kine words to some of da sistahs ova dea. (Rome 16:12) Try tink how happy dese sistahs musta felt fo hear Paul’s letta read to da local hui! Same same, eldas no hold back fo give good kine words to sistahs fo da work dey do fo Jehovah an fo dea good kine qualities. Dis help sistahs fo know dat da local hui love an respeck dem plenny. Da good kine words from one elda might be jus wat dese sistahs need fo keep working fo Jehovah.​—Smart Guys 15:23.

Wen eldas give sistahs good kine words, dey say um from da heart an tell dem exackly wat dey wen like. How come? One sistah name Jessica tell, “Is nice wen braddahs tell one sistah, “good job.” But az moa betta wen braddahs tell us exackly wat dey wen like. Can be stuff like teaching oua kids fo sit quietly at da meeting, o taking time fo go pick up one Bible learna fo bring her to da meeting.” Wen eldas tell sistahs exackly wat dey wen do good, dey make sistahs feel dey importan an worth plenny to da local hui.

 Dey lissen to sistahs. Eldas who stay humbo know dey not da ony ones wit good ideas. Eldas dat stay humbo going ask sistahs fo dea ideas an lissen good wat dey tell um. Wen dey do dat, eldas help sistahs feel good inside, an az good fo da eldas too. How? One elda who work at Bethel name Gerardo tell, “I ask sistahs wat dey tink cuz help me fo do my job moa betta. Plenny times, dey wen do da job moa longa den mos of da braddahs.” In da local hui, plenny sistahs stay pioneas, so dey really know da peopo who live in dea area. One elda name Bryan tell, “Oua sistahs get plenny good kine qualities an skills dat da hui need. So learn from wat dey wen do!”

Akamai eldas no going ignore wat sistahs tell az good fo do. How come? One elda name Edward tell, “One sistah’s experience an wat she tink can help one braddah undastan tings moa betta, an help him fo undastan how oddas feel. (Smart Guys 1:5) Even if one elda no can use wat one sistah wen tell, he still can tank her fo sharing her mana’o.

Dey train sistahs. Eldas who stay akamai look fo wateva kine chances get fo train sistahs. Like, dey can teach sistahs how fo conduck meetings fo field service jus in case one baptize braddah no stay dea. Dey can train dem fo operate tools o machines so dat dey can help wit building an maintenance projecks in oua hui. At Bethel, ovaseahs wen train sistahs fo take kea all kine stuffs, like maintenance, buying stuffs, accounting, computa programming, an odda stuffs. Wen eldas train sistahs, dey show dat dey trus sistahs an know dey can hando.

Plenny sistahs use da training dey get from eldas fo help oddas. Some sistahs use da training dey get in construcktion fo help oddas rebuild dea homes afta one natural disasta. Some sistahs use da skills dey wen learn fo preach in public, fo help train moa sistahs fo preach lidat too. How sistahs feel about da eldas dat wen train dem? One sistah name Jennifer tell, “Wen I wen work on one contrucktion projeck fo build one Meeting Place, one ovaseah wen take da time fo train me. He wen see da work I had do, an wen give me good kine words fo um. I wen love working wit him cuz I wen feel importan an dat dey had trus me.”

HOW COME IS GOOD FO TREAT SISTAHS LIKE OUA OHANA

We love oua faithful sistahs jalike Jehovah! So we treat dem like oua ohana. (1 Tim 5:1, 2) We stay proud an happy fo work togedda wit dem. An we stoked wen dey know we love an support dem. One sistah name Vanessa tell, “I stay so tankful to Jehovah dat I stay part of his hui, dat stay filled wit braddahs dat help me keep going.” One sistah in Taiwan tell, “I supa tankful dat Jehovah an his hui kea so much about wahines an respeck how dey feel. Dis make my faith moa strong an make me even moa happy dat I get fo be part of Jehovah’s hui.”

Wen Jehovah see faithful Christian braddahs do dea bes fo respeck an treat wahines like how He does, He mus be supa proud! (Smart Guys 27:11) One elda from Scotland name Benjamin tell, “Plenny guys in da world no respeck wahines at all. So wen oua sistahs come to da Meeting Place we like make shua dey feel we love an respeck dem.” So go all out fo do oua bes fo copy Jehovah an treat oua awesome sistahs wit da love an respeck dey deserve.​—Rome 12:10.