Anguterpassuit arnanik nikagin­ninnermik kultureqarlutik peroriar­torsimapput. Hans, Boliviami nakkutilliisoq angalasartoq, ima oqarpoq: “Angutit ilaat angussuartut perorsagaasarput, taamaattumik pigiliul­luinnarlugu ileqqorigamikku taakku arnanit pitsaanerul­luinnartutut imminut isigisarput.” b Shengxian, Taiwanimi utoqqaanertaasoq, ima oqarpoq: “Uagut kulturitsinni anguterpassuit isumaqarput arnat isumartik angutinut annisis­sanngikkaat. Arnap isumaa angutip eqqartorpagu angutit allat eqqarsassapput angut taanna sanngiitsuusoq.” Angutit allat arnanik isummius­sereersimanertik allatigut ersersit­tarpaat. Assersuutigalugu arnat pillugit nikassaarpaluttunik quiasaar­niuteqartarput.

Qujanar­tumilli angut qanorluunniit kultureqarluni peroriar­torsimagaluaruni allanngorsinnaavoq. Ilikkarsinnaavaa arnat angutillu naligiittut. (Ef 4:22-24) Jehovap maligas­siaanik malinninnikkut tamanna ajornanngilaq. Allaaserisami matumani sammissavarput Jehovap arnanik qanoq pinnittarnera, qatanngutit angutit Jehovap arnanik pinnittar­neratut pinnittar­nissartik qanoq ilikkarsin­naagaat aamma utoqqaanertat arnanik ataqqin­ninnermikkut qanoq maligas­siuisinnaasut.

JEHOVAP ARNAT QANOQ PISARPAI?

Arnat qanoq pineqar­tarnissaannik Jehova maligas­siuilluar­nerpaavoq. Ataatatut nallittuisutut qitornani tamaasa asavai. (Joh 3:16) Aamma arnat imminut aalajaatsut panimmisut naleqangaartutut isigai. Jehovap arnanut asannit­tuunini ataqqin­nittuuninilu qanoq ersersittarai sammeriartigu.

Naligiimmik pisarpai. Jehovap angut arnarlu imminut assililluni pinngortippai. (Mos 1. 1:27)  Angutit arnanit silassorin­nerusutut pikkorin­nerusutul­luunniit pinngor­tinngilai; aamma angutit arnanit pingaar­nerutinngilai. (Nal 2. 19:7) Angut arnarlu Biibilimi ilumoortut paasinis­saannut assigiimmik piginnaaneqar­tillugillu assigiimmik Jehovap pissusiinik nuannersunik ilaarsisin­naatillugit pinngortippai. Jehovap angutit arnallu nunami paratiisimi naassaan­ngitsumik inuunissamik imaluunniit qilammi kunngisut palasitullu kiffartor­nissamik neriuuteqaraluarpata imminik upperinnittut tamaasa pingaartippai. Ersarippoq Jehova arnanut ajunngitsumik isiginnit­taaseqartoq.

Tusarnaartarpai. Jehovap arnat misigissusaat ajornar­torsiutaallu soqutigai. Itsaq Raakelip Hannallu qinnutaat tusarpai akillugillu. (Mos 1. 30:22; Sam 1. 1:10, 11, 19, 20) Aamma angutit arnanut naalattut pillugit oqaluttuat Jehovap Biibilimut ilanngutitippai. Assersuutigalugu Jehovamit peqquneqar­nermisut Aaperaap Saara naalappaa. (Mos 1. 21:12-14) Kunngip Daavip Abigajili naalappaa. Allaat oqarpoq Jehovap Abigajili imminut aallartis­simagaa mianersoq­qusiartor­tillugu. (Sam 1. 25:32-35) Jiisusip, Ataatamisut pissuseqarluinnartup, anaanani Mariia naalappaa. (Joh 2:3-10) Oqaluttuani taakkunani ersersin­neqarpoq Jehovap arnat tusarnaaramigit ataqqin­nittuliorfigigai.

Tatigivai. Assersuutigalugu Jehovap Eva nunarsuarmik isumagin­neqataasussatut suliassippaa. (Mos 1. 1:28) Taamaalior­nermigut ersersippaa Eva Adamimit nikanar­nerunngitsoq, kisianni ikiortaasoq naleqangaartoq. Aamma Jehovap pruffiitit arnat Debora Huldalu kiffaminik, ilaatigut eqqartuus­sisumik kunngimillu, siunnersuisussatut suliassippai. (Eqq 4:4-9; Kng 2. 22:14-20) Nalitsinni Jehovap kristumiut arnat aqqutigalugit suliani naammas­sisarpaa. Qatanngutit arnat aalajaatsut oqaluus­sisartutut, pioneritut oqaluus­sisartutullu aallartitatut kiffartorput. Taakku sanaartor­tunullu ikiuuttarput aamma naalagaaf­filersaarfinnik immikkoor­tortaqarfinnillu aserfal­latsaaliueqataasarput. Ilaat Betelimi kiffartorput; allat nutserivinni suleqataasarput. Qatanngutit arnat taakku soorlulusooq sakkutoorpassuit, Jehovallu taakku atorlugit piumasani naammas­sisarpaa. (Tuss 68:12) Ersarippoq Jehovap arnat susinnaan­ngitsutut sanngiitsutullu isiginngikkai.

ANGUTIT JEHOVA ILAARLUGU ARNAT QANOQ PISARSIN­NAAVAAT?

Qatanngutit angutit, unneqqarilluta isummakkut iliuutsikkullu kristumiunik arnanik pinnittar­nitsigut Jehova ilaarnerlugu eqqarsaatigeq­qissaar­tariaqarparput. Taamaalius­sagutta ikiorneqar­tariaqarpugut. Soorlu nakorsap inuk uummatilunnersoq misissor­niaraangamiuk atortoris­saarutit atortarai, taamatuttaaq ikinngutaal­luartoq ikiortigalugu aamma Guutip oqaasia iluaqutigalugu paasisin­naavarput arnanut isiginnit­taaserput Jehovap iluarineraa. Ikiorneqarumalluta qanoq iliortariaqarpugut?

Ikinngutigil­luakkat aperiuk. (Uss 18:17) Ikinngut tatigisarput piviusorsiortorlu ima aperisin­naavarput: “Qatanngutit arnat qanoq pisarpakka? Misigisarpat ataqqin­nittumik pisarikka? Pitsaanerusumik pisarsin­naavakka?” Pitsaanerusumik pisarsin­naanerarlugit ikinngutit oqarpat ajuallas­sanngilatit. Allannguinis­sannulli piumassuseqarit.

Guutip oqaasia misissoruk. Qatanngutit arnat ajunngitsumik pisarnerlugit paasinias­sagutsigu pitsaanerpaajussaaq Guutip oqaasia atorlugu isiginnit­taatsigut pissutsigullu misissorutsigit. (Hebr 4:12) Biibilimi misissuinitsinni angutit arnanut ajunngitsumik ajortumil­luunniit pissusilersortartut pillugit atuarsin­naavugut. Arnanut pissusilersor­tarnigut taakkua pissusiinut naleqqius­sinnaavagut. Arnanut kukkusumik isiginnit­taatsitsinnut Biibilimi versi ataasiinnaq uppernarsaatiginiarsarinagu versit arlallit naleqqiut­tarutsigit Jehovap arnanut isiginnittaasia paasissavarput. Assersuutigalugu Petrusimit allakkat siulliit 3:7 naapertorlugu nuliaq ‘immersakkatut qajannartutut’ allaatigineqarpoq. c Tamanna ima isumaqarpa arnaq angummit pingaan­nginnerusoq – silassorin­nginnerusoq imaluunniit poqiinnerusoq? Naamerluinnaq! Galaatiamiunut 3:26-29-milu allassimasut Petrusip allataanut naleqqiutikkit, maluginiarullu Jiisusip qilammi  naalakkersueqatissaatut Jehovap toqqarsimasai tassaammata arnat angutillu. Arnanik qanoq pinnittarnerput paasiniarlugu Biibili misissorutsigu ikinngutigil­luagarpullu aperalugu, taava arnat naleqquttumik pisarnissaat ilikkas­savarput.

UTOQQAANERTAT ARNANUT QANOQ ATAQQIN­NITTUMIK PISSUSEQARSIN­NAAPPAT?

Utoqqaanertat asannittut qatanngutinik arnanik ataqqin­nittumik pinnittarnerat qatanngutit angutit ilinniarfigisin­naavaat. Utoqqaanertat arnanik ataqqin­nittumik pinnittarnertik qanoq ersersit­tarpaat? Iliuuserineqarsinnaasut aalajangersimasut uku eqqarsaatigikkit.

Qatanngutit arnat nersualaar­tarpaat. Apustili Paulusi utoqqaanertanut maligas­siuilluarpoq. Qatanngutit arnat arlallit Romami ilagiinnut allakkamini ammasumik nersualaarpai. (Rom 16:12) Takorlooruk qatanngutit arnat qanoq nuannaar­tigisimassasut Paulusip allagai ilagiinni atuarneqarmata. Taamatuttaaq utoqqaanertat qatanngutit arnat pissusii nuannersut Jehovamullu kiffartor­nerminni suliaat pillugit nersualaar­tarpaat. Nersualaar­neqartaramik qatanngutit arnat misigisarput ilagiinni ataqqineqarlutik pingaar­tinneqarlutillu. Oqaatsit kajumis­sinartut taamaattut utoqqaanertanit oqaatigineqartut qatanngutit arnat Jehovamut aalajaallutik kiffartor­nerminni pisariaqar­tilluin­narpaat. – Uss 15:23.

Qatanngutinik arnanik nersualaarin­ninnerminni utoqqaanertat ilumoorlutik ersaris­sumillu taamaalior­tassapput. Sooq pingaaruteqarpa? Qatanngut Jessicamik atilik ima oqarpoq: “Qatanngutit angutit qatanngummut arnamut nersualaarillutik ima oqaraangata, ‘torrallappat’, tusaallugit nuannertaqaaq. Pingaar­nerusumilli qatanngutit angutit aalajangersimasumik, assersuutigalugu meeqqatsinnik ataatsimiinnerni naalallutik issianis­saannik ilinniar­titsisarnerput imaluunniit Biibilimik ilinniar­titatsinnik ataatsimiigiar­nissamut aallertarnerput pillugu, nersualaaraangatigut pingaar­tingaar­tarparput.” Utoqqaanertaq qatanngutit arnat  aalajangersimasumik nersualaaraangamikkit misigitit­tarpaat ilagiinni pisariaqar­tinneqarlutillu pingaar­tinneqartut.

Qatanngutit arnat tusarnaar­tarpaat. Utoqqaanertat maniguuttut nalunngilaat allat pitsaanerusumik isumassarsisinnaasut. Utoqqaanertat maniguuttut arnat siunnersuutis­saqarnersut paasiniar­tarpaat oqalukkaangatalu tusarnaaq­qissaar­tarlugit. Taamaalior­tarnermikkut utoqqaanertat qatanngutit arnat qiimmas­sartarpaat namminnerlu iluaqutigisarlugu. Qanoq? Utoqqaanertaq Gerardomik atilik, Betelimi kiffartortoq, ima oqarpoq: “Suliara pitsaanerusumik naammas­siumallugu qatanngutit arnat isumasior­tarpakka. Ilaannikkut taakku qatanngutinit angutinit sivisunerusumik tamakkuninnga suliaqarsimasarput.” Ilagiinni qatanngutit arnarpassuit pioneriugamik najukkaminni inuit najugallit ilisimal­luarpaat. Utoqqaanertaq Bryanimik atilik ima oqarpoq: “Qatanngutit arnat pisariaqar­tinneqartunik pikkorif­fippassuaqarput. Taamaattumik misilittagaat ilinniarfigisin­naavagut.”

Utoqqaanertat silatusaarlutik qatanngutit arnat siunnersuutaat suusupagineq ajorpaat. Sooq? Utoqqaanertaq Edwardimik atilik ima oqarpoq: “Qatanngutip arnap isumaa misilit­tagaalu iluaqutigalugit qatanngut angut tamakkiisumik paasisaqar­nerusinnaavoq taamaalillunilu misigin­neqataanerusin­naalluni.” (Uss 1:5) Qatanngutip arnap siunnersuutaa utoqqaanertap atorsin­naanngik­kaluaruniul­luunniit maluginiagai ilisimasaalu pillugit qujaffigisinnaavaa.

Qatanngutinik arnanik ilinniar­titsisarput. Utoqqaanertat naliliil­luarsinnaasut qatanngutinik arnanik ilinniar­titsiniarlutik periarfis­sarsiortarput. Assersuutigalugu oqaluus­sinissamut katersuunnermi qatanngummik angummik najuuttoqan­ngippat qatanngutit arnat qanoq siulersuisin­naanersut ilinniar­tissinnaavaat. Peqatigiis­sortatsinni aserfal­latsaaliuinermut sanaartor­nermullu ikiortigisin­naajumallugit sakkut imaluunniit maskiina qanoq atorneqar­tarnersoq ilinniar­tissinnaavaat. Betelimi nakkutilliisut qatanngutit arnat suliassanut assigiin­ngitsunut – soorlu aserfal­latsaaliuinermut, niuernermut, naatsorsuuserinermut, qarasaasiatigut program­miliornermut allanullu – ilinniar­tittarpaat. Utoqqaanertat qatanngutit arnat ilinniar­tikkaangamikkit ersersit­tarpaat pikkorissutut tatiginar­tutullu isigalugit.

Qatanngutit arnarpassuit utoqqaanertanit ilinniar­tinneqarsimanertik allanut ikiuisar­nerminnut iluaqutigisarpaat. Assersuutigalugu qatanngutit arnat ilaat sanaartornermik ilinniar­tinneqarsimagamik pinngortitami ajunaar­nersuaqar­tillugu allat angerlarsimaffiinik iluarsar­tuussillutik ikiuussin­naasarput. Qatanngutit arnat tamanut oqaluus­sinermi ilikkakkatik qatanngutinut arnanut allanut ingerlateq­qittarpaat. Qatanngutit arnat utoqqaanertanit ilinniar­tinneqarsimasut qanoq misigippat? Jennifer ima oqarpoq: “Naalagaaf­filersaarfimmik sanaartoqataagama nakkutilliisup ilinniar­tippaanga. Suliakka maluginiartarpai nersualaar­tarlungalu. Pingaar­tinneqartutut tatigineqar­tutullu misigisarama suleqatigalugu nuannaraara.”

ARNAT TATIGISIGIT

Jehova ilaarlugu qatanngutit arnat aalajaatsut asavagut! Taamaattumik ilaquttatsitut pisarpagut. (Tim 1. 5:1, 2) Kiffartorluar­tuummata ataqqil­lugillu tulluusimaarutigisarpagut. Asaneqarlutik tapersersor­neqarlutillu misigigaangata nuannaar­tarpugut. Vanessa ima oqarpoq: “Jehovap peqatigiis­sortaanut ilaanera qujamasuutigeqaara. Qatanngutimmi angutit tassaniittut qiimmas­saasarmata.” Qatanngut arnaq Taiwanimeersoq ima oqarpoq: “Jehovap taassumalu peqatigiis­sortaata uagut arnaasugut misigis­sutsigullu pingaar­timmatigit qujamasungaarpunga. Tamanna uppernikkut nakussatsis­sutigisarpara, aamma Jehovap peqatigiis­sortaanut ilaasin­naatitaanera qujamasuutiginerulerpara.”

Jehova qanoq tulluusimaar­tartigaa takugaangamigit angutit kristumiut aalajaatsut arnanik immisut isiginnit­taaseqarlutillu pinneriaaseqartut. (Uss 27:11) Utoqqaanertaq Skotlandimeersoq Benjaminimik atilik ima oqarpoq: “Anguterpassuit Jehovamut kiffartor­tuunngitsut arnanut nikassaasumik isiginnit­taaseqarput. Taamaattumik arnat naalagaaf­filersaarfimmut isertut allatorluinnaq misigitik­kusuttarpagut.” Qanortoq tamatta Jehova ilaarniarlugu sapinngisatsinnik qatanngutigut arnat erlinnartut pisassaattut asannittumik ataqqin­nittumillu pisartigit! – Rom 12:10.