Bamw i bakasakeen ha byaab bidy baan-balum bavul biikal ni ciibidil cya kutal baan-bakaj bu baat bahweekel. Cileejel, Hans, udy mulombol a cijeng mu cibunj cya Bolivy, uleeleeb neey: “Baan-balum bakwaabw i bakasakeen ha byaab bidy kwiikal mwaan-mulum kwiikal ni buseeb buvul, kuloolong bwa baan-balum biikal biiyumvw neey baan-balum bady ni buseeb buvul kuhitok baan-bakaj.” Shengxian, mukul wa mu Taïwan, uleeleeb neey: “Cyaab cinady mushikacil, baan-balum bavul bataatal neey, baan-bakaj kabiish mwa kwaakishoh bend baan-balum meej mu bwaal kaahand. Biby biikal neey mwaan-mulum kaahand wiitaatab meej ma mwaan-mukaj habitaatal bwaal kaahand, balund nend bady mwa kulang neey i mukutakan.” Baan-balum badyaakal baleej hatook mulaalangobw biin-biin bwa baan-bakaj. Cileejel, bady mwa kwiibaleeb may ma kaheej.

Twiinufwiifwiijaayok bwa mudy muut ning waakaabumw kay mulamat bilel bya ha cyaab cidyey mukasakeen. Udy mwa kwiikashishomw bwa kulek kwiikal ni meej ma neey: baan-balum bady ni buseeb buvul menmen kuhitok baan-bakaj. (Ef. 4:22-24) Muut udy wa kulong nook hadyey wiidikij cileejel cya Yehow. Mu ciin bwaal eecy, twiiyiiy kwiisambil ha mushind udy Yehow ulongel baan-bakaj myand, mudy biin-kweet baan-balum mwa kuhetelok dilongweesh bwa kwiikalobw balongel baan-bakaj myand teng bu Yehow, ni mudy bakul byaabw mwa kulombol hakuleej biin-kweet baan-bakaj kaneemw.

I MUSHIND KAAY UDY YEHOW ULONGEL BAAN-BAJAK MYAND?

Yehow udy cileejel cilengel mu mushind udyey ulongel baan-bakaj myand. Bu mudyey Taat wiiteeteek ha cyaab cya bakwaabw, i mukat baan bindiy boos. (Jah 3:16) Biin-kweet baan-bakaj ba lulamat bady bu baan bindiy baan-bakaj bady ni buseeb ku mees kwindiy.  Tukontononaay mishind yiloolondey bwa kutal mudy Yehow wangat baan-bakaj ni buseeb.

Wiibaloolongel myand mu mushind muwaakan. Yehow uhangil baan-balum ni baan-bakaj bamufwaanok. (Kbwa. 1:27) Kahangiloh bend baan-balum biikal ni meej mavul menmen eecy biikal ni biheel bihitok menmen bya baan-bakaj; ni cikwaabw kiin mukat teng baan-balum ni mukiin bakaj. (2 Cif. 19:7) Uhangil baan-balum ni baan-bakaj biikal ni meej bwa mushind a kumvw myand ya biin-biin ya mu Bibl ni bwa kulangil ha biikadil bindiy bilengel. Yehow wangangat ni buseeb diitabij dya baan-balum ni baan-bakaj mu mushind aakaabumw​—ning bab biikal ni kutakamin kwa kwiikal ni buumy buyiil ha bulab mu paradiiz eecy bwa kukalobw mudimw bu bakaleng ni bwa kwiikal balambul ba milambw mu diiwul. (2 Pyeel. 1:1, NWT dim. kuush kwa diib.) Biin-biin, Yehow kiinoh bend uleeb bibiih habitaatal baan-bakaj.

Wiibakuukun mat. Yehow udyaakal utacil baan-bakaj ni umvw myand yidy yibatond. Cileejel, umvwiil kulomb kwa Rashel ni Aan hakulongey bwaal kaahand. (Kbwa. 30:22; 1 Sam. 1:10, 11, 19, 20) Yehow ku dyambulwiish dya spirit mujilang indiy wambiil cikwaabw bafundil Bibl bwa kuteekomw myand yilond ya baan-balum baakady bakun baan-bakaj mat. Cileejel, Abraham ukooyedyel mubel umwaakishil Yehow bwa kukuney mukaj indiy Sarah mat. (Kbwa. 21:12-14) Mukaleng Davih ukunyin Abikayil mat. Biin-biin, umvwiil neey Yehow waakady mumutum bwa kwiisambey nend. (1 Sam. 25:32-35) Yeez, waakady mufwaanok Taat indiy tok-tok ku biikadil, ukunyin maam indiy Mariy mat. (Jah 2:3-10) Bileejel eeby byumbumb kashoony ha mushind udy Yehow uleej baan-bakaj kaneemw hakwiibakun mat.

I mwiibateekel micim. Cileejel, Yehow uteekel Eev micim bwa kwambulwiishey byend mu mudimw a kulam bulab bilengel. (Kbwa. 1:28) Hakulong nook, uleejel mwaakadyey umwangat ni buseeb, kabiy neey waakady muhweekel kudy mbaayend, Adam, ki waakady kwaaj mukumban bwindiy. Yehow uteekel baprofet baan-bakaj aab micim: Deborah ni Huledah bwa kubelobw baat bindiy, ni bakaleng ni balambul ba milambw. (Zuj. 4:4-9; 2 Bak. 22:14-20) Leeloow, Yehow i muteekel baan-bakaj biin Krist micim hakwiibakish mudimw indiy bwa bamukumbaj. Biin-kweet baan-bakaj ba lulamat aab i bakajaady, baaseb’ aa njil, ni baamisiyoneer. Bambambulwiish ku midimw ya lwiibak, ni baloolongolol Nzubw ya Bukaleng ni bambambulwiish ku midimw ya mu Filiyal. Bamw ba kudyobw bakaakal mudimw ku Betel; bakwaabw bakaakal mudimw mu biro mudyobw balaabul bileebel bidy kuleeh ni Filiyal. Biin-kweet baan-bakaj aab bady bu cisumbw citam cya baasangikaj cidy Yehow ukal naacy mudimw bwa kukumbaj lukat lwindiy. (Mis. 68:11, NWT) Biin-biin, Yehow kiinoh bend utal baan-bakaj bu baat bahuuyil eecy bu bady kabay ni bukash bwa kulong bwaal kaahand.

I MUSHIND KAAY MUDY BIIN-KWEET MWA KULONGELOBW BAAN-BAKAJ MYAND TENG BU YEHOW?

A biin-kweet, bwiitut kumanyik ning tuloolongel baan-bakaj biin Krist neet myand bu mudy Yehow wiibalongel, bikaam twiikontonon biin-biin habitaatal meej miitut ni myand yituloolong. Bwa kulong nook, bikaam tulomb dyambulwiish. Teng bu mudy cyaam cya radyo cidyobw bakal naay mudimw bwa kumanyik mabenj mady naam muut mu mucim, mulund mulengel ni Diiy dya Mawej bidy mwa kwiitwambulwiish bwiitut kumanyik mushind ututaatal baan-bakaj ning usaasangej Yehow eecy kiish umusangej. I biny bitudy mwa kulong bwiitut kuhet dyambulwiish eedy?

Ihangujok mulund mulengel. (Tus. 18:17) Tuloolong bilengel bwa kwiihanguj mulund a kuteekel micim udy ni meej malengel ma majooj bu aam: “Utaatal bicy mushind unaloolongel baan-bakaj myand? Bady mwa kuleebok neey niibaneeneemek eeny? Nadyok mwa kulengej mushind a kwiibalongel myand eeny?” Mulund neeb yiy mukuleej myand yiwudy mwa kulongolol, lek kufulul mund. Ki, kat bwa kulong cidyey mukwambil.

Long diiy dya Mawej. Mushind mulengel utudy mwa kumanyik ning tuloolongel baan-bakaj myand mu mushind mulengel, i kukontonon myand yituloolong ku dyambulwiish dya Diiy dya Mawej. (Ebr. 4:12) Hatuloolong Bibl, tumamanyik baan-balum baakady balongel baan-bakaj myand bilengel ni baakady kabay biibalongel. Tudy mwa kufwanyikij biilong bya baabw ni mushind utuloolongel baan-bakaj myand leeloow. Nook, kufwanyikij verseh ya mu Bibl ni yikwaabw, kudy mwa kwiitwambulwiish bwa kaay twiikal ni meej mabiih habitaatal baan-bakaj. Cileejel, bilondeshel 1 Pyeel 3:7, bikaam mwaan-mulum ashikat ni mukaj indiy ha kumwangat ni buseeb hakwiikal mumanyik neey: ‘i muut mukooyel.’ b Byumvumvwiijok neey i muut muhweekel —udy ni meej makeeh eecy kiin mwa kulong myand​—bu mwaan-mulum eeny? Kabiin naak! Fwanyikij may ma Pyeel mady mu Kalatih 3:26-29 maleeleej neey: Yehow i munoonoh baan-bakaj ni baan-balum bwa kuyobw kakookesh haakaabumw ni Yeez mu diiwul. Hatuloolong Bibl ni hatwiihahanguj mulund mulengel bwa kumanyik mushind udyey uleeb habitaatal mushind utuloolongel baan-bakaj myand, tudy mwa kumanyik mushind mulengel utudy mwa kuneemek biin-kweet baan-bakaj.

I MUSHIND KAAY UDY BAKUL BALEEJ MUDYOBW BANEEMEK BIIN-KWEET BAAN-BAKAJ?

Biin-kweet baan-balum ba mu cisumbw bady mwa kulong byaabw mushind udyobw a kuneemek baan-bakaj teng bu bakul bady ni lukat. I mushind kaay udy bakul balombol mu mushind uleeleej neey baneeneemek biin-kweet baan-bakaj? Tukontonoonaay yimw ya ku mishind eey.

Biibafwaafwaakijok. Mupostol Pool i mushiil bakul cileejel cilengel cya kulond. Waakady weel hatook biin-kweet baan-bakaj bavul ba mu cisumbw cya mu Rom kalumbandy mu mikand yaakadyey wiibatumin. (Rom 16:12) Udy mwa kulangok bwa musangal umvwiil biin-kweet baan-bakaj aab haakadyobw biibabadil mu cisumbw mukand waakady Pool mwiibatumin eeny? Bya mushind aakaabumw, bakul beleel biin-kweet kalumbandy ni lukat bwa biikadil byaabab bilengel ni bwa mudimw a Yehow udyobw balong. Kulong nook, kuloolong bwa biin-kweet baan-bakaj bamanyik neey biibaneeneemek ni biibaanaan bikasasakan. May makaakashish ma mukul mady mwa kwiikal biin-biin cikaakaam biin-kweet aab bwa kutungunukobw ni kukadil Yehow mudimw ni lulamat.—Tus. 15:23.

Hadyobw beel biin-kweet baan-bakaj kalumbandy, bakul baleeleeb myand ya biin-biin ni yiikal yital muut. Bwabiny? Mwiin-kweet mwaan-mukaj Jessica uleeleeb neey: “Bitwaatwaal musangal hady biin-kweet baan-balum bambil mwiin-kweet mwaan-mukaj neey: ‘mudimw mulengel.’ Ki tumvumvw bilengel menmen hady biin-kweet baan-balum biitufwiijok bwa mudimw kaahand utudy balong, bu mudy kulongweesh baan biitut bwa kulek kulong mutooy mu bisangil eecy bwa kwiikal ni diib dya kuy kangat mulony a Bibl bwa kwiiy nend mu  bisangil.” Hady bakul bafwiijok biin-kweet baan-bakaj bwa bwaal kaahand, baloolong nook bwa biin-kweet aab biiyumvw neey bady ni buseeb mu cisumbw.

Bakuukun biin-kweet baan-bakaj mat. Bakul bihweehweekesh i bamanyik neey kiin teng bab bady ni ngeny yilengel. Bakul ba nook babiibikan cikwaabw baan-bakaj bwa kutwaalobw byaabw ngeny yidyobw naay, ni bakuukun mat ni meej moos hady biin-kweet baan-bakaj baleeb. Hakulong nook, bakaakashish biin-kweet baan-bakaj aab mu diitabij ni biikashish byaabw. Mushind kaay? Mukul mukwaabw dindiy Gerardo, ukaakal mudimw ku Betel, uleeleeb neey: “Nady mutal neey kujooj baan-bakaj bwa kutwaalobw ngeny yaabab, i kuuyambambulwiish bwa mim kulong bilengel mudimw aam. Misang yivul, i balong mudimw bya mushind aakaabumw ni baan-balum bavul.” Mu cisumbw, biin-kweet baan-bakaj bavul i baaseb’ aa njil, cikwaabw i bamanyik cidy baat ba ha cyaab cidyobw bashikacil. Mukul mukwaabw Bryan uleeleeb: “Biin-kweet baan-bakaj bady ni bivul bya kulong mu bulongolody. Nook long bwa kumanyik myand yivul ku dyambulwiish dyaabab!”

Bakul ba meej kabiin balekoh bend lwang-lwang ngeny yitwaatwaal baan-bakaj. Bwabiny? Mukul mukwaabw Edward uleeleeb neey: “Lungeny lwa mwiin-kweet mwaan-mukaj ni myand yidyey mumanyik bidy mwa kwambulwiish mwiin-kweet mwaan-mulum bwa kumvw bilengel bwaal, ni bwa kumvw mudy bakwaabw biiyumvw.” (Tus. 1:5) Ning mukul yiy mulek lungeny lwa mwiin-kweet mwaan-mukaj, udy mwa kutungunuk teng ni kumufwiijok bwa bidyey mutal ni kumvw lungeny lwindiy.

Baloolongweesh biin-kweet baan-bakaj. Bakul bady ni kujingunun kwa myand bakaakaam mishind kaahand bwa kulongweesh biin-kweet baan-bakaj. Cileejel, bady mwa kwiibalongweesh mwa kulombol bisangil bwa mudimw a bukajaady bwa biikal biilongolol kulombol hadyok kakuy mwiin-kweet mwaan-mulum ukaady muhet baatiisumw. Bady mwa kwiibalongweesh mwa kukal mudimw ni byaamw eecy ni mashiny kaahand bwa bab kuhet mushind a kwambulwiish ku midimw ya lwiibak ni ya kulam nzubw yitaatal myand ya Bukaleng bwa Mawej. Ku Betel, balombol badyok i balongweesh biin-kweet baan-bakaj bwa kulong midimw yishil-shilangan, ni midimw ya kulongolol biit, kusumb kwa biit, myand ya koont, kulongolol program ya mu ordinateer, ni midimw yikwaabw. Hady bakul balongweesh biin-kweet baan-bakaj, baleeleej neey i bakumban bwa kulong midimw kaahand ni i bakuteekel micim.

Baan-bakaj bavul bakaakal mudimw ni myand yidyobw biibalongweesh kudy bakul bwa kwambulwiish bakwaabw. Cileejel bakaakal mudimw ni myand yidyobw balong mu midimw ya lwiibak bwa kwambulwiish bakwaabw bwa kwiibakulul mazubw maabab. Biin-kweet bakwaabw bakaakal mudimw ni mishind ya kudiil naay baat musah mukacy mwa baat yibalongweeshelobw bwa kwambulwiish biin-kweet bakwaabw bwa kulongobw byaabw nook. Biin-kweet baan-bakaj bumvumvw bicy bwa myand yidyobw balongel kudy bakul? Mwiin-kweet mwaan-mukaj Jennifer uleeleeb neey: “Hanaakady nakal mudimw a lwiibak lwa Nzubw a Bukaleng, mulombol mukwaabw wangacil diib dya kuulongweesh. Utadil mudimw unalongel, ni yiy kuufwiijok. Nakacil kukaI nend mudimw bwaal naakady mumvw neey nady ni buseeb ni nady wa kuteetel micim.”

MABENESH MATUDY MWA KUHET HATULOOLONGEL BIIN-KWEET BAAN-BAKAJ MYAND BU BIIN BIIN-KWEET BA MU CISAK

Tudy bakat biin-kweet baan-bakaj bady ni lulamat teng bu mudy Yehow mwiibakat! Nook, twiibaloolongel myand teng bu ba mu cikak ciitut. (1 Tim. 5:1, 2) Tudy biibakat ni tudy ni musangal bwa kukal naabw mudimw haakaabumw. Tudy ni musangal muvul hadyobw batal neey tudy biibakat ni twiibambambulwiish. Mwiin-kweet Vanessa uleeleeb neey: “Nafwiifwiijok bikasakan Yehow bwa munady mu bulongolody bwindiy, mudy mwiiwul teh ni biin-kweet baan-balum bady baakashish bikasakan.” Mwiin-kweet mwaan-mukaj wa mu Taiwan uleeleeb neey: “Nady ni dyanyish divul bwa mudy Yehow ni bulongolody bwindy bakat baan-bakaj ni mudyobw biitwangat ni buseeb habitaatal muutwiiyumvumvw. Kumanyik nook kukaakashish diitabij dyaam ni kulong bwa niikal naan dyaakatook dinady naady dya kwiikal mu bulongolody bwa Yehow.”

Yehow udy ni musangal hadyey utal biin Baan-balum biin Krist ba lulamat biikashishomw bwa kutal ni kulongel baan-bakaj myand teng bu yiy! (Tus. 27:11) Mukul Benjamin wa mu Ecosse uleeleeb neey: “Baan-balum bavul mu bulongolody oobw kabiin baneemekoh bend baan-bakaj.” “Ki hady baan-bakaj biikal ku Nzubw a Bukaleng, tudy bakat bwa biiyumvw neey bady ni buseeb ni bamanyik cikwaabw neey tudy biibakat.” Tudy mwa kulong mwiitut moos bwa kwiidikij Yehow hakulongel biin-kweet baan-bakaj myand ni lukat ni hakwiibah kaneemw kady kiibakumbanyin.—Rom 12:10.