Sɔm man dɛn mɛn na kɔlchɔ usay dɛn de trit uman dɛn lɛk se dɛn nɔ gɛt wan valyu. Fɔ ɛgzampul, Ans, we na sakit ovasia na Bolivia tɔk se: “Dɛn mɛn sɔm man dɛn na kɔlchɔ usay dɛn de ɛnkɔrej dɛn fɔ mek prawd. Dɛn man dɛn de biliv se dɛn bɛtɛ pas uman dɛn, ɛn bɔku tɛm dɛn nɔ kin trit uman dɛn wit rɛspɛkt.” Shangshiɛn, we na ɛlda na Taywan, tɔk se: “Usay a de, bɔku man dɛn fil se uman dɛn nɔ fɔ tɛl dɛn man dɛn wetin dɛn tink bɔt sɔntin. If man tɛl in kɔmpin man dɛn bɔt sɔntin we uman tɔk, dɛn nɔ go rɛspɛkt am igen.” Ɔda man dɛn de sho se dɛn bɛtɛ pas uman dɛn ɔda we dɛn. Fɔ ɛgzampul, dɛn kin mek jok dɛn bɔt uman dɛn we nɔ de sho wan rɛspɛkt.

Wi gladi fɔ no se man dɛn go ebul chenj di we aw dɛn de tink bɔt uman dɛn, ilɛk usay dɛn mɛn. Dɛn go ebul stɔp fɔ biliv se man dɛn bɛtɛ pas uman dɛn. (Ɛfi. 4:​22-24) Dɛn go du dis bay we dɛn de falamakata Jiova in ɛgzampul. Insay dis atikul, wi go tɔk bɔt aw Jiova de trit uman dɛn, aw brɔda dɛn go lan fɔ trit uman dɛn di we aw Jiova de trit dɛn, ɛn aw ɛlda dɛn go de bifo fɔ sho sista dɛn rɛspɛkt.

AW JIOVA DE TRIT UMAN DƐN?

Jiova dɔn sɛt di bɛst ɛgzampul we i kam pan aw fɔ trit uman dɛn. As Papa we gɛt sɔri-at, i lɛk ɔl in pikin dɛn. (Jɔn 3:16) Ɛn sista dɛn we fetful to am tan lɛk in galpikin dɛn we rili valyu to am. Lɛ wi tɔk bɔt sɔm we dɛn we Jiova dɔn sho se i lɛk ɛn rɛspɛkt uman dɛn.

I de trit dɛn fia wan. Jiova mek man ɛn uman dɛn di we aw insɛf tan. (Jɛn. 1:27) I nɔ mek man dɛn gɛt sɛns ɔ sabi du tin dɛn mɔ  pas uman dɛn, ɛn i nɔ lɛk man dɛn pas uman dɛn. (2 Kro. 19:7) I mek man ɛn uman dɛn fɔ ebul ɔndastand di tru tin dɛn na di Baybul ɛn falamakata in fayn fayn kwaliti dɛn. Jiova de si bak di fet we man ɛn uman dɛn gɛt di sem we, ilɛk dɛn op na fɔ de sote go na Paradays na dis wɔl ɔ na fɔ sav am as kiŋ ɛn prist dɛn na ɛvin. (2 Pit. 1:​1, futnot) Fɔ tru, ɔl dɛn tin dɛn ya de sho se Jiova de si man ɛn uman dɛn di sem we.

I de lisin to dɛn. Jiova bisin bɔt di we aw uman dɛn de fil ɛn di prɔblɛm dɛn we dɛn gɛt. Fɔ ɛgzampul, i bin lisin to Rechɛl ɛn Ana dɛn prea dɛn ɛn du sɔntin fɔ ɛp dɛn. (Jɛn. 30:22; 1 Sam. 1:​10, 11, 19, 20) Jiova bin mek bak di wan dɛn we rayt di Baybul, rayt akawnt bɔt man dɛn we bin lisin to uman dɛn. Fɔ ɛgzampul, Ebraam bin fala Jiova in advays ɛn lisin to in wɛf Sera. (Jɛn. 21:​12-14) Kiŋ Devid bin lisin to Abigɛl. Infakt, i bin fil se na Jiova sɛn Abigɛl fɔ tɔk to am. (1 Sam. 25:​32-35) Jizɔs, we de falamakata in Papa in kwaliti dɛn pafɛkt wan, bin lisin to in mama we na Meri. (Jɔn 2:​3-10) Dɛn ɛgzampul dɛn ya de sho se wan we aw Jiova de sho rɛspɛkt to uman dɛn na we i de lisin to dɛn.

I biliv dɛn. Fɔ ɛgzampul, Jiova bin biliv se Iv go ebul ɛp in man fɔ kia fɔ di wan ol wɔl. (Jɛn. 1:28) We Jiova du dat, i sho se i nɔ bin de si Iv in man, we na Adam, as pɔsin we bɛtɛ pas Iv, bɔt i bin de si Iv as pɔsin we rili valyu to in man ɛn we go ɛp am. Jiova bin sho bak se i biliv uman dɛn bay we i biliv se Dɛbora ɛn Ɔlda we na prɔfɛtɛs dɛn go ebul advays in pipul dɛn, ɛn ivin advays jɔj ɛn kiŋ. (Jɔj 4:​4-9; 2 Kiŋ 22:​14-20) Tide bak, Jiova biliv Kristian uman dɛn fɔ du in wok. Dɛn fetful sista dɛn ya de wok as pɔblisha dɛn, payɔnia dɛn, ɛn mishɔnari dɛn. Dɛn de ɛp fɔ dizayn, bil, ɛn mek di say dɛn we dɔn pwɛl na Kiŋdɔm Ɔl ɛn branch ɔfis dɛn. Sɔm pan dɛn de wok na Bɛtɛl; ɔda wan dɛn de wok na rimot transleshɔn ɔfis dɛn. Ɔl dɛn sista dɛn ya tan lɛk big ami we Jiova de yuz fɔ mek wetin i want apin. (Sam 68:11) Dis sho klia wan se Jiova nɔ de si uman dɛn as pipul dɛn we wik ɔ we nɔ ebul fɔ du ɛnitin.

AW BRƆDA DƐN GO LAN FƆ TRIT UMAN DƐN DI WE AW JIOVA DE TRIT DƐN?

Brɔda dɛn, fɔ mek wi no if wi de trit wi Kristian sista dɛn di we aw Jiova de trit dɛn, i go fayn fɔ mek wi tek tɛm chɛk di we aw wi de tink ɛn du tin. Wi nid ɛp fɔ mek wi go ebul fɔ du dat. Jɔs lɛk aw dɔktɔ kin yuz X-ray mashin fɔ chɛk if pɔsin in at gɛt prɔblɛm ɔ i nɔ gɛt prɔblɛm, na so gud padi dɛn ɛn Gɔd in Wɔd go ɛp wi fɔ no if di we aw wi de si uman dɛn de mek Jiova gladi ɔ i nɔ de mek i gladi. Wetin wi go du fɔ gɛt da ɛp de?

Tɔk to yu gud padi. (Prɔv. 18:17) I go fayn fɔ mek wi tɔk wi tayt padi we nɔ de fred fɔ tɛl wi di tru ɛn we de tink di rayt we ɛn aks am dɛn kwɛstyɔn dɛn ya: “Aw yu tink se a de trit sista dɛn? Dɛn kin fil se a de rɛspɛkt dɛn? Ɛnitin de we a nid fɔ du so dat a go trit sista dɛn fayn pas aw a de trit dɛn?” If yu padi tɛl yu sɔm eria dɛn we yu nid fɔ ajɔst, nɔ mek ɛkskyuz. Bifo dat, yu fɔ rɛdi fɔ mek di ajɔstmɛnt dɛn we yu nid fɔ mek.

Stɔdi Gɔd in Wɔd. Di bɛst we fɔ no if wi de trit sista dɛn fayn, na we wi yuz Gɔd in Wɔd fɔ ɛp wi chɛk di we aw wi de tink ɛn du tin. (Ibru. 4:12) As wi de stɔdi di Baybul, wi go lan bɔt man dɛn we bin trit uman dɛn fayn ɛn man dɛn we nɔ bin trit uman dɛn fayn. Wi fɔ kɔmpia di we aw dɛn man dɛn ya bin de trit uman dɛn wit di we aw wi de trit dɛn. Dɔn bak, we wi de kɔmpia difrɛn Baybul vas dɛn, dat go mek wi nɔ yuz wan patikyula vas fɔ sɔpɔt di rɔng we aw wi de si uman dɛn. Fɔ ɛgzampul, akɔdin to 1 Pita 3:​7, di Baybul se maredman dɛn fɔ “ɔnɔ dɛn [wɛf] lɛk aw [dɛn] de tek kia ɔf kɔntena we rili izi fɔ brok.” b Fɔ se dis vas min se uman dɛn nɔ gɛt bɛtɛ valyu, dɛn nɔ gɛt bɛtɛ sɛns, ɔ dɛn nɔ ebul du tin lɛk man?  Nɔto dat i min! Kɔmpia di tin dɛn we Pita tɔk wit wetin de na Galeshians 3:​26-29 we sho se Jiova dɔn pik man ɛn uman dɛn fɔ rul wit Jizɔs na ɛvin. We wi stɔdi Gɔd in Wɔd ɛn aks wi gud padi bɔt wetin i tink bɔt aw wi de trit uman dɛn, dat go ɛp wi fɔ no aw fɔ trit wi sista dɛn wit rɛspɛkt.

AW ƐLDA DƐN DE SHO SE DƐN RƐSPƐKT SISTA DƐN?

Di fayn ɛgzampul we ɛlda dɛn we lɛk wi de sɛt kin ɛp brɔda dɛn na di kɔngrigeshɔn fɔ lan fɔ trit sista dɛn wit rɛspɛkt. Aw ɛlda dɛn de sɛt fayn ɛgzampul we i kam pan fɔ rɛspɛkt sista dɛn? Lɛ wi tɔk bɔt sɔm patikyula we dɛn.

Ɛlda dɛn kin tɛl sista dɛn tɛnki. Apɔsul Pɔl sɛt fayn ɛgzampul we ɛlda dɛn kin falamakata. I bin tɛl sɔm sista dɛn tɛnki na di lɛta dɛn we i bin rayt to di Kristian dɛn na Rom. (Rom. 16:12) Yu ebul fɔ imajin aw dɛn sista dɛn de bin gladi we dɛn yɛri we dɛn de rid Pɔl in lɛta na di kɔngrigeshɔn? Semweso, ɛlda dɛn kin tɛl sista dɛn tɛnki fɔ di fayn kwaliti dɛn we dɛn gɛt ɛn fɔ we dɛn de wok fɔ Jiova. Dis kin ɛp sista dɛn fɔ no se di pipul dɛn na di kɔngrigeshɔn rɛspɛkt ɛn valyu dɛn. Sɔntɛnde, na di fayn wɔd dɛn we ɛlda dɛn kin tɔk fɔ ɛnkɔrej sista dɛn na in dɛn kin nid as dɛn de kɔntinyu fɔ sav Jiova fetful wan.—Prɔv. 15:23.

Ɛlda dɛn fɔ tɛl sista dɛn tɛnki wit ɔl dɛn at, ɛn dɛn fɔ tɛl dɛn tɛnki fɔ di patikyula gud tin dɛn we dɛn de du. Wetin mek? Wan sista we nem Jɛsika tɔk se: “I kin rili fayn we brɔda dɛn kin tɛl sista dɛn se, ‘wɛl dɔn.’ Bɔt wi kin gladi mɔ we brɔda dɛn kin tɛl wi tɛnki fɔ di patikyula tin we wi du, lɛk fɔ tich wi pikin dɛn fɔ sidɔm saful wan na mitin, ɔ we wi kin go tek wi Baybul studɛnt ɛn go wit am na mitin pan ɔl we i nɔ kin izi.” We ɛlda dɛn tɛl sista dɛn tɛnki fɔ di patikyula tin dɛn we dɛn de du, dat de  mek dɛn fil se dɛn nid ɛn valyu dɛn na di kɔngrigeshɔn.

Ɛlda dɛn de lisin to sista dɛn. Ɛlda dɛn we de put dɛnsɛf dɔŋ no se nɔto dɛn nɔmɔ kin gɛt gud aydia dɛn. Dɛn kayn ɛlda dɛn ya kin alaw sista dɛn fɔ tɛl dɛn bɔt wetin dɛn tink bɔt sɔntin, ɛn dɛn kin tek tɛm lisin we di sista dɛn de tɔk. We dɛn de du dis, dɛn de ɛnkɔrej di sista dɛn, ɛn di ɛlda dɛnsɛf kin bɛnifit. Aw? Wan ɛlda we nem Erado, we de wok na Bɛtɛl tɔk se: “A dɔn kam fɔ si se we a aks sista dɛn bɔt wetin dɛn tink, dat kin ɛp mi fɔ du mi wok fayn fayn wan. Bɔku tɛm, i kin bi se dɛn dɔn du di wok fɔ lɔng tɛm pas bɔku brɔda dɛn.” Insay di kɔngrigeshɔn, bɔku sista dɛn kin wok as payɔnia dɛn, so dɛn no di wan dɛn we wi de prich to gud gud wan. Wan ɛlda we nem Brayan tɔk se: “Wi sista dɛn gɛt bɔku fayn kwaliti dɛn, ɛn dɛn sabi du tin dɛn we di ɔganayzeshɔn nid. So tray fɔ bɛnifit frɔm dɛn ɛkspiriɛns!”

Ɛlda dɛn we gɛt sɛns kin alaw sista dɛn fɔ tɛl dɛn wetin dɛn tink bɔt sɔntin. Wetin mek? Wan ɛlda we nem Ɛdwɔd tɔk se: “Di we aw sista dɛn de si tin kin ɛp brɔda dɛn fɔ ɔndastand sɔntin mɔ, ɛn di we aw dɛn de tink kin ɛp brɔda dɛn fɔ ɔndastand di we aw ɔda pipul dɛn de fil.” (Prɔv. 1:5) Sɔntɛm pan ɔl we di ɛlda nɔ go fala di aydia we sista dɛn go gi, i go stil tɛl dɛn tɛnki fɔ we dɛn tɔk wetin dɛn tink ɛn wetin dɛn sabi ɛn ɔndastand.

Ɛlda dɛn kin tren sista dɛn. Ɛlda dɛn we gɛt sɛns kin luk fɔ we dɛn fɔ tren sista dɛn. Fɔ ɛgzampul, dɛn kin tich sista dɛn aw fɔ kɔndɔkt mitin fɔ fil savis so dat dɛn go kɔndɔkt di tɛm we baptayz brɔda nɔ kam fil savis. Dɛn kin tren dɛn bak fɔ sabi yuz tul ɛn mashin dɛn so dat dɛn go ɛp fɔ bil ɛn kia fɔ sɔm projɛkt dɛn na di ɔganayzeshɔn. Ovasia dɛn na Bɛtɛl dɔn tren sista dɛn fɔ du difrɛn wok dɛn, lɛk fɔ wok na mɛntenans, pɔchesin (fɔ de bay tin dɛn), akawntin, fɔ wok wit kɔmpyuta, ɛn ɔda wok dɛn. We ɛlda dɛn du dat, dɛn de sho se dɛn de si sista dɛn as pipul dɛn we ebul wok ɛn dɛn kin abop pan dɛn.

Bɔku sista dɛn kin yuz di trenin we dɛn dɔn gɛt frɔm ɛlda dɛn fɔ bɛnifit ɔda pipul dɛn. Fɔ ɛgzampul, sɔm sista dɛn kin yuz di trenin we dɛn dɔn gɛt na kɔnstrɔkshɔn fɔ ɛp ɔda pipul dɛn fɔ bil dɛn os dɛn we nachɔral dizasta dɔn pwɛl. Ɔda sista dɛn kin yuz wetin dɛn dɔn lan we dɛn bin de du pɔblik witnɛsin fɔ ɛp fɔ tren mɔ sista dɛn fɔ du di prichin wok. Aw sista dɛn de fil bɔt di ɛlda dɛn we tren dɛn? Wan sista we nem Jɛnifa tɔk se: “We a bin wok pan wan Kiŋdɔm Ɔl kɔnstrɔkshɔn projɛkt, wan ovasia bin tek tɛm fɔ tren mi. I bin notis di wok we a bin de du, ɛn i bin tɛl mi tɛnki fɔ dat. A bin lɛk fɔ wok wit am bikɔs i bin mek a fil se a gɛt valyu ɛn pipul dɛn kin abop pan mi.”

DI BƐNIFIT DƐN WE WI GO GƐT WE WI TRIT DI UMAN DƐN NA WI KƆNGRIGESHƆN LƐK WI YON SISTA DƐN

Wi lɛk wi fetful sista dɛn lɛk aw Jiova lɛk dɛn! So wi de trit dɛn lɛk se dɛn de pat pan wi famili. (1 Tim. 5:​1, 2) Wi valyu dɛn, ɛn wi de ɛnjɔy fɔ wok wit dɛn. Ɛn wi kin rili gladi we dɛn no se wi lɛk dɛn ɛn wi de sɔpɔt dɛn. Wan sista we nem Vanɛsa tɔk se: “A rili gladi fɔ de pat pan Jiova in ɔganayzeshɔn usay brɔda dɛn de we dɔn rili ɛnkɔrej mi.” Wan sista we de na Taywan tɔk se: “A rili gladi fɔ di we aw Jiova ɛn in ɔganayzeshɔn valyu uman dɛn, ɛn we dɛn rɛspɛkt di we aw wi de fil. Dis de mek mi fet strɔng mɔ ɛn mɔ, ɛn i de mek a gladi mɔ fɔ di ɔnɔ we a gɛt fɔ de pat pan Jiova in ɔganayzeshɔn.”

Wan dawt nɔ de se Jiova kin rili fil fayn we i de si fetful Kristian man dɛn de du ɔl wetin dɛn ebul fɔ trit uman dɛn lɛk aw i de trit dɛn! (Prɔv. 27:11) Wan ɛlda we nem Bɛnjamin we de na Skɔtland tɔk se: “Bɔku man dɛn na di wɔl nɔ gɛt wan rɛspɛkt fɔ uman dɛn, so we wi sista dɛn kam na Kiŋdɔm Ɔl, wi want fɔ mek dɛn no se wi difrɛn frɔm dɛn man dɛn de, bikɔs wi lɛk ɛn rɛspɛkt dɛn.” So lɛ wi du ɔl wetin wi ebul fɔ falamakata Jiova bay we wi de trit wi sista dɛn wit di lɔv ɛn rɛspɛkt we dɛn fit fɔ gɛt.​—Rom. 12:10.