Vamwe kwa kulira monompo omu sinzi sovagara ava tara vakadi asi kwato mulyo. Pasihonena, mutareli gonombunga gedina Hans gomoBolivia kwa tente asi: “Vagara vamwe kwa kulira monompo omu va va korangedere va rugane yininke nelinenepeko. Vagara ava kulizuvha asi awo mulyo unene kupitakana vakadi ntani yikando yoyinzi awo kutekura vakadi monkedi zokudira efumadeko.” Mukuronambunga gedina Shengxian gomoTaiwan kwa tanta asi: “Vagara wovanzi ava vakara oku na tunga kugazara asi vakadi nokugava si magano kovagara. Nsene mugara a tumbura egano eli ka geve mukadi, mugara ogo kapi tava mu fumadeke.” Vagara vamwe kulikida elitondororo kovakadi mononkedi dimwe hena. Pasihonena, awo kuvhura va ruganese nomuteu donondona kuhamena vakadi.

Mugara kuvhura kulitjindja yi kare asi mompo musinke ga kulira. Age kuvhura yi mu tompoke kunyokera po egano eli asi vagara mulyo unene kupitakana vakadi. (Efe. 4:​22-24) Age kuvhura a yi rugane oyo pokuhonena Jehova. Mosirongwa esi tatu ka zogera omu Jehova a tekura vakadi nomu vanavazinyetu wovagara nava tekura vakadi ngwendi Jehova ntani omu vakuronambunga nava fumadeka vanavazinyetu wovakadi.

NGAPI OMU JEHOVA A TEKURA VAKADI?

Jehova kwa tura po sihonena sosiwa omu twa hepa kutekura vakadi. Age Guhya gonkenda ogu ga hara vana vendi navenye. (Joh. 3:16) Age kutara vanavazinyetu wovakadi wovalimburukwi ngwendi vana vendi wovakadona. Tutareni nonkedi edi dina ka kwama ko omu Jehova a yi likida asiga fumadeka vakadi ntani ga va hara.

Age kuvatekura monkedi zongwa. Jehova kwa sitire mugara nomukadi yipo navenye va mu fane moyikara. (Gen. 1:27) Age kapi ga ninka vagara va kare nonondunge unene kupitakana vakadi ndi a hare unene vagara kupitakana vakadi. (2 Hist. 19:7) Age kwa sita vagara novakadi nevhuliko lyokulifana lyokukwata egano Bibeli ntani nokuhonena yikara  yendi. Jehova kutara epuro eli va kara nalyo vagara novakadi asi kwa hetakana. Age hena kwa pa vagara novakadi ehuguvaro lyokukaparuka narunye paapa pevhu ndi ehuguvaro lyokukakara vahompa novapristeli meguru. (2 Pet. 1:1) Yosili, Jehova kapi ga kara nompongo kovakadi.

Age kuvapurakena. Jehova ga kara nosinka kuhamena omu vakadi ava lizuvhu ntani komaudigu gawo. Pasihonena, age kwa purakenene nokulimburura makanderero gaRakera naHana. (Gen. 30:22; 1 Sam. 1:​10, 11, 19, 20) Jehova kwa gendesere hena vatjangi woBibeli va tjange yihorokwa yovagara ava va purakenene kovakadi. Pasihonena, Abirahamu kwa kweme mavyukiso gaJehova makura yipo ga purakenene kwamukadendi Sara. (Gen. 21:​12-14) Hompa Ndafita kwa purakenene kwaAbigayili. Age kwa li zuvhire asi Jehova yige ga mu tumine a ya uyunge nendi. (1 Sam. 25:​32-35) Jesus ogu nga honene nawa-nawa yikara yoGuhwe, kwa purakenene kozina, Mariya. (Joh. 2:​3-10) Yihonena eyi kulikida asi nkedi zimwe omu Jehova a fumadeke vakadi kuna kara pokuvapurakena.

Age kwava huguvara. Pasihonena, Jehova kwa huguvarere Eva yipo a vatere kupakera mbili evhu nalinye. (Gen. 1:28) Mokuyirugana ngoso, age kwa yi likidire asi kapi ga mu tere asi age kwato mulyo mokumuhetakanesa namugara gwendi Adamu, nye kwa mu tere asi age muvateli gwamugara gwendi. Jehova kwa huguvarere hena vaporofete wovakadi, Debora naHulida yipo va gave magano kovantu vendi, kukwatera mo mupanguli ntani hompa. (Vap. 4:​4-9; 2 Vah. 22:​14-20) Neina Jehova kwa huguvara vakadi woVakriste yipo va sikise mo sirugana sendi. Vanavazinyetu ava wovakadi, awo vazuvhisi, vazuvhisi wokukarerera ntani vatumwa. Awo kutunga nokupakerambili Yinyanga yoUhompa ntani mavango gonoBeteli. Vamwe kurugana koBeteli ano vamwe kurugana konomberewa detoroko. Vanavazinyetu ava wovakadi kwa fana ngwendi vakwayita wovanzi ava a ruganesa Jehova mokusikisa mo sitambo sendi. (Epis. 68:11) Eyi kulikida asi Jehova kapi a tara vakadi asi kwato nonkondo.

NGAPI OMU VANAVAZINYETU WOVAGARA NAVA TEKURA VAKADI NGWENDI JEHOVA?

Vanavazinyetu wovagara, nsene tuna hara tu dive asi ngapi omu a tu tekura vanavazinyetu wovakadi, twa hepa kulikona kona omu a tu gazara neyi a tu rugana. Twa hepa evatero mokuyirugana oyo. Ngwendi moomu tupu ehina lyokutaresa monda zorutu ali likida nsene asi muntu kwa kuvera mutjima ndi hawe, kaume gomuwa ntani Bibeli kuvhura kutuvatera nose tu dive nsene asi ose kutara vakadi monkedi ezi azi hafesa Jehova ndi hawe. Yisinke natu rugana tu yi sikise mo oyo?

Pura kaume gomuwa. (Yis. 18:17) Kuvhura tu pure kaume gwetu gomuwa ogu twa huguvara asi: “Ngapi omu ono kugazara ani tekura vanavazinyetu wovakadi? Awo kulizuvha asi ame kuvafumadeka ndi? Koyili eyi nani rugana yipo ni va tekure monkedi zongwa ndi?” Nsene kaume goge na ku tantera nonkedi dimwe omu no wapukurura, wa ha handuka. Nye kara neharo lyokutura po malitjindjo.

Lironga Bibeli. Nkedi zongwa omu natu yi diva nsene asi ose kuna kutekura nawa vanavazinyetu wovakadi, kuna kara pokuruganesa Bibeli zi tu vatere tu konakone magazaro getu noyirugana yetu. (Heb. 4:12) Ngomu tuna kulironga Bibeli, ose kudiva vagara ava vatekwire nawa vakadi ntani vagara ava va dilire kuyirugana. Ose kuvhura tu hetakanese yihonena oyo nomu a tu tekura vakadi. Ntani kapisi tu ruganese velise zimwe zi tu ninkise tu kare nomutaro gepuko kuhamena vakadi nye twa hepa kuruganesa novelise dokulisiga-siga edi da likida omu vagara nava tekura vakadi. Pasihonena, kuliza na 1 Peturusa 3:​7, nturagumbo ga hepa kufumadeka mukadendi ngamoomu a ‘pakere mbili sipako esi asi tauka usimbu.’ a Eyi ngesi kutanta asi age kwato mulyo ntani kapi ga kara nonondunge dononzi ngwendi mugara ndi? Hawe. Hetakanesa nonkango daPeturusa neyi va uyunga moVagarata 3:​26-29, omu va likida asi Jehova kwa horowora vakadi novagara yipo ngava ka pangere naJesus meguru. Nsene tu lironga Bibeli nokupura kaume gwetu gomuwa yipo a tu tantere kuhamena omu a tu tekura vakadi, ose kuvhura tu dive omu natu fumadeka vanavazinyetu wovakadi.

 NGAPI OMU VAKURONAMBUNGA AVA FUMADEKE VANAVAZINYETU WOVAKADI?

Vanavazinyetu wovagara womombungakriste kuvhura nawo va lironge kufumadeka vanavazinyetu wovakadi pokukwama sihonena sovakuronambunga. Ngapi omu vakuronambunga ava tulire po wopeke sihonena sokufumadeka vanavazinyetu wovakadi? Koneka nonkedi dimwe edi dina ka kwama ko.

Vakuronambunga kupandadeka vanavazinyetu wovakadi. Mupositoli Paurusa kwa tura po sihonena sosiwa esi nava honena vakuronambunga. Age kwa pandadekere vanavazinyetu wovakadi wokulisiga-siga mombilive ezi ga tjangerere mbungakriste zomoRoma. (Rom. 16:12) Gazadara ko omu va hefe vanavazinyetu owo wovakadi apa mbilive zaPaurusa va zi va reserere mombungakriste. Mokulifana, vakuronambunga kupandadeka vanavazinyetu wovakadi koyikara yawo yoyiwa ntani kosirugana esi ava ruganene Jehova. Eyi kuvatera vanavazinyetu wovakadi va dive asi womombungakriste va va fumadeka ntani kuvahafera. Nonkango dekorangedo domukuronambunga kuvhura di kare nonkango edi ana hepa munazinyetu gomukadi yipo a twikire kukarera Jehova.—Yis. 15:23.

Nsene vakuronambunga kuna kukorangeda vanavazinyetu, awo va hepa kuvyukilira positwa ntani yitundilire komutjima. Morwasinke? Munazinyetu Jessica kwa tanta asi: “Aso sininke sosiwa apa vanavazinyetu wovagara ava tantere munazinyetu gomukadi asi ‘ono rugana nawa.’ Nye ose kuyihafera unene apa ava tu pandadeke pokuvyukilira positwa, pasihonena nampo kweyi atu rongo vana vetu va hingire mepongo awo va hana kuzogerera ndi kweyi atu litulire po siruwo tu ka piture murongwa goBibeli a wize kepongo.” Apa vakuronambunga ava pandadeke vanavazinyetu wovakadi kuvyukilira, awo kuninkisa vanavazinyetu wovakadi va li zuvhe asi awo mulyo mombungakriste.

Awo kupurakena kovanavazinyetu wovakadi. Vakuronambunga ava va linunupika awo va yi dimburura asi kapisi yiwo velike va kara nomagano gomawa. Vakuronambunga vangoso, kupura magano  kovanavazinyetu wovakadi ntani awo kupurakena nawa apa ava uyunga. Mokuyirugana ngoso, vakuronambunga kukorangeda vanavazinyetu wovakadi ntani nawo kugwanena mo mauwa. Monkedi musinke? Mukuronambunga Gerardo ogu a rugana koBeteli kwa tanta asi: “Ame kwa ya dimburura asi apa ani pura magano kovanavazinyetu kuvatera nge ni rugane nawa sirugana sange. Rorunzi, awo kwa rugana sirugana songandi siruwo sosire kupitakana vanavazinyetu wovagara.” Mombungakriste, vanavazinyetu wovanzi wovakadi kurugana uzuvhisi wokukarerera yipo nye, awo va diva yoyinzi kuhamena vantu ava va tunga momukunda. Mukuronambunga gedina Bryan kwa tanta asi: “Vanavazinyetu wovakadi kwa kara noyikara yoyiwa ntani nomaudivi aga zina hepa mbunga zaJehova. Yipo nye gwanenamo uwa moudivi wawo.”

Vakuronambunga wonondunge kapisi vanyoke magano govanavazinyetu wovakadi. Morwasinke? Mukuronambunga gedina Edward kwa tente asi: “Magano gamunazinyetu gomukadi ntani noudivi wendi kuvhura kuvatera munazinyetu gomugara a kwate egano ukaro momunene ntani kuvhura kumuvatera a kare nonkenda.” (Yis. 1:5) Nampili mukuronambunga a dire kutura pasirugana magano gamunazinyetu gomukadi, nye simpe ga hepa kumupandura komagano gendi.

Awo kudeura vanavazinyetu wovakadi. Vakuronambunga ava va kara nonondunge kupapara nompito yipo va deure vanavazinyetu wovakadi. Pasihonena, kuvhura va ronge vanavazinyetu wovakadi omu nava pitisira mapongo gomokuzuvhisa nsene kapi pana kara munazinyetu gomugara ogu ga gwana ekuho. Kuvhura va va deure omu nava ruganesa yiruganeso ndi nomahina yipo va tunge ndi va wapukurure mavango gomombunga zetu. KoBeteli, vanavazinyetu wovagara ava ava pitisire kwa deura vanavazinyetu wovakadi yipo va sikise mo yitumbukira ngwendi kupakera mbili yininke, kurandanga, kugendesa yimaliwa, kuruganesa malikwamo gocomputer ntani nayimwe hena. Apa vakuronambunga ava deura vanavazinyetu wovakadi, awo kuyilikida asi awo kutara vanavazinyetu wovakadi asi kuvhura va yi sikise mo.

Sinzi sovanavazinyetu wovakadi kuruganesa edeuro eli ava gwana kovakuronambunga yipo va vaterese ko vakwawo. Pasihonena, vanavazinyetu wovakadi vamwe kuruganesa edeuro eli ava gwana lyokutunga yipo va vatere sinzi sovanavazinyetu wovakadi pokutungurura mambo gawo konyima zosimpagwa. Vanavazinyetu wovakadi vamwe kuruganesa edeuro eli va gwana mokuruganesa yitoroli yipo nawo va deure vakwawo varugane yokulifana. Ngapi omu vanavazinyetu wovakadi ava lizuvhu kuhamena vakuronambunga ava ava va deura? Munazinyetu Jennifer kwa tanta asi: “Apa na rugene ketungo lyoSinyanga soUhompa, munazinyetu gomugara ogu ga pitisilire sirugana kwa ruganesere siruwo sendi yipo a deurenge. Apa ga mwene yirugana yange, age kwa pandadekere nge. Ame kwa haferere kurugana nendi morwa ame kwalizuvhire asi name mulyo ntani va huguvara nge.”

MAUWA AGA GA KARA MO NSENE TU TEKURA VANAVAZINYETU WOVAKADI NGWENDI VEMEPATA LYETU

Ose twa hara vanavazinyetu wovakadi ngwendi moomu ga va hara Jehova. Ose kuvatara ngepata. (1 Tim. 5:​1, 2) Ose kulizuvha mfumwa ntani kuhafera kurugana kumwe nawo. Ntani ose kuhafa apa ava dimburura asi twa va hara ntani kuvakwatesa ko. Munazinyetu Vanessa kwa tanta asi: “Ame kupandura sili kweyi na hamena mombunga zaJehova omu mwa kara vanavazinyetu wovagara ava ava korangeda nge unene.” Munazinyetu gomukadi gomoTaiwan kwa tanta asi: “Ame kupandura sili kweyi Jehova nombunga zendi ava tara vakadi asi mulyo ntani nokufumadeka malizuvho gawo. Eyi kunkondopeka epuro lyange ntani kuninkisa nge ni kare norupandu rorunene mokukara gumwe gomombunga zaJehova.”

Jehova kuhafa sili unene apa a mono vagara wovalimburukwi woVakriste kuna kurugana paapa va hulira va tare nokutekura vakadi ngwendi moomu a yi rugana age. (Yis. 27:11) Mukuronambunga gedina Benjamin gomoScotland kwa tanta asi: “Sinzi sovagara neina mouzuni kapi ava fumadeke vakadi, yipo nye apa vanavazinyetu wovakadi ava wiza koSinyanga, twa hara va lizuvhe asi twa va fumadeka ntani twa va hara.” Ngano natuvenye tu tokomene kuhonena Jehova pokutekura vanavazinyetu wovakadi neharo ntani nefumadeko eli lya va wapera.—Rom. 12:10.