Bamwi bakakomenena kumusena basankwa baanji nkobabona ayi banakashi tabayandiki. Kucakubonenaako, ba Hans abo basebensa mbuli mutanjilili walubasu ku Bolivia, bakaamba ayi: “Basankwa bamwi bakakomenena kumusena nkobabona ayi basankwa balayandika kwiinda banakashi, alimwi liinji banakashi nkobatabatondeshi bulemu.” Ba Shengxian abo basebensa mbuli munene ku Taiwan, bakaamba ayi: “Kumusena nkonkala, basankwa baanji balalinyumfwa ayi banakashi inga tababalwiitiwo shakucita. Na musankwa waamba muyeeyo ngwaakalwiitikwa kumwanakashi, babye bakalinga kumubona ayi takuuwo mbwaabete.” Basankwa bamwi balatondesha kasalulushi kubanakashi munshila shimwi. Kucakubonenaako, mpashi inga baamba maswi amwi asekesha pabanakashi sombi atatondeshi bulemu.

Cibotu ncakwaamba ayi, musankwa inga waaluka tacicite mulandu amusena nkwaakakomenena. Inga wacileka kunoobona ayi basankwa balayandika kwiinda banakashi. (Efe. 4:​22-24) Inga wacikonsha kucita boobo na kakonkela cakubonenaako cakwe Yehova. Mumutwi uyu, tutokwiiya Yehova mbwaabona banakashi, mbweenga bamakwesu beeya kunoobona banakashi bweenka Yehova mbwaababona, ambweenga bamanene baba panembo mukutondesha bulemu kubenankashi.

YEHOVA MBWAABONA BANAKASHI

Yehova alatondesha cakubonenaako cibotu abuumbi ca mbotweelete kunoobona banakashi. Mbuli Ishiwesu shinkuumbu, alibasuni bana bakwe boonse. (Joni 3:16) Alimwi benankashi bashomeka, bali anga mbaana banakashi bayandika kuli nguwe. Amuleke tubandike nshila shimwi Yehova mbwaatondesha ayi alibasuni alimwi ayi alabalemeka banakashi.

Taabasalululi. Yehova wakalenga basankwa abanakashi mucikoshanyo cakwe. (Mata. 1:27) Taakwe kulenga basankwa, kwaamba ayi kababa amaano na alushibo abuumbi kwiinda banakashi. Alimwi basankwa abanakashi boonse alibasuni. (2 Maka. 19:7)  Wakalenga basankwa abanakashi munshila yakwaamba ayi boonse kabacikonsha kunyumfwishisha cancine camu Baibo akutondesha mibo ibotu njaacite. Yehova alababona kuyandika basankwa abanakashi boonse bacite lushomo muli nguwe. Boonse wakabapa coolwe cakulangila kukala kwamuyayaya pacishi na kuya mukuba ba maami alimwi bapailishi kwiculu. (2 Pit. 1:1) Ncakutatoonsha kwaamba ayi, Yehova taasalululi banakashi.

Alabakutika. Yehova alabikila maano kubanakashi mbobalinyumfwa a shibapa kulisukama. Kucakubonenaako, wakakutika akukumbula mipailo yakwe Lakelo a Aana. (Mata. 30:22; 1 Samwe. 1:​10, 11, 19, 20) Alimwi Yehova wakatanjilila bakalemba Baibo, kulemba makani aamba pabasankwa abo bakakutika kubanakashi. Kucakubonenaako, Abulaamu wakanyumfwila Yehova ndyaakamulwiita ayi akutike Saala nshaakaamba. (Mata. 21:​12-14) Mwaami Defedi wakakutika Abigelo ndyaakalinga kubandikaakwe, alimwi wakalinyumfwa ayi Yehova ngowakamutuma kusa mukubandika anguwe. (1 Samwe. 25:​32-35) Yesu uyo wakalinga kukonkela cakubonenaako ca Baishi cakumaninina, wakakutika kuli Maliya banyina. (Joni 2:​3-10) Shakubonenaako ishi shilatondesha ayi nshila yomwi Yehova mbwaatondesha bulemu kubanakashi nkwiinda mukubakutika.

Alabashoma. Kucakubonenaako, Yehova wakapa Efa mukuli wakunocafwilisha ibaye kulama cishi capanshi. (Mata. 1:28) Yehova ndyaakacita boobo, wakatondesha ayi Efa wakalinga kuyandika bweenka mbuli Adamu, alimwi ayi ngumucafwi wakwe. Alimwi Yehova wakapa Debola a Ulida bashinshimi banakashi mukuli wakucafwa bantu bakwe, kwiilikaawo amoomboloshi amwaami. (Boombo. 4:​4-9; 2 Baam. 22:​14-20) Munshiku shino, Yehova wakapa banakashi Beneklistu mukuli wakusebensa ncito yakwe. Benankashi aba bashomeka balasebensa mbuli beshikushimikila, bapainiya, alimwi abamishonali. Balacafwilisha mukubamba bubaambo, kuyaka, alimwi akubamba Maanda a Bwaami amaofesi amisampi. Bamwi balasebensela pa Bethel; lyalo bamwi balasebensela kuma ofesi abasansulushi. Benankashi aba bali anga ndikoto linene lyabashilumamba Yehova ndyaatosebensesha kwaamba ayi akumanishe kuyanda kwakwe. (Kulu. 68:11) Ncakutatoonsha kwaamba ayi Yehova taaboni banakashi ayi takuuwo mbobabete na ayi takuuwo nsheenga bacita.

MBWEENGA BAMAKWESU BEEYA KUNOOBONA BANAKASHI BWEENKA YEHOVA MBWAABABONA

Nobamakwesu, kwaamba ayi tushibe na tulabona banakashi bweenka Yehova mbwaababona, tulyeelete kulilanga langa cakubikila maano pashintu nshetuyeeya anshotucita. Kwaamba ayi tucite boobo, tulayandika lucafwo. Bweenka mashini ikopa mukati ka mubili mboicafwa kushiba moyo wamuntu na uli kabotu nabi sobwe, shicibusa ngotushoma a Maswi akwe Lesa alatucafwa kushiba na nshotuyeeya anshotucita kubanakashi shilasangalasha Yehova nabi sobwe. Ino inga twacita buyani kwaamba ayi tucafwikwe?

Amwiipushe shicibusa ngomushoma. (Tus. 18:17) Inga tweepusha shicibusa ngotushoma, ucite nkuumbu alimwi ubona shintu munshila yeelete miipusho mbuli: “Sa mutobona ayi nshonjeeya anshooncita pabanakashi shilibo kabotu? Sa balalinyumfwa ayi ndabatondesha bulemu? Sa kuli shimwi nsheenga ndayandika kusebenselawo kwaamba ayi nobabona munshila yeelete?” Na shicibusa wanu wamulwiita mbasu nshomutoyandika kusebenselawo, mutataliki kulangoola mwakuleyela. Muciindi cakucita boobo, amube balibambite kwaaluka.

Amwiiye Maswi akwe Lesa. Nshila ibotu yeenga yatucafwa kushiba na tulabona banakashi munshila yeelete, nkwiiya Maswi akwe Lesa kwaamba ayi atucaafwe kulanga langa nshotuyeeya anshotucita. (Ebu. 4:12) Ndyetutokwiiya Baibo, tuleeya pashakubonenaako shabasankwa abo bakalinga kubona banakashi munshila yeelete a shabaabo batakwe kucita boobo. Lyalo inga tweelanya mbobakalinga kubona banakashi aswebo mbotubabona. Kwiilikaawo, kubona malembo apusenepusene nshaamba pa mbotweelete kubona banakashi inga kwatucafwa kuleya kunoobabona munshila itabete kabotu, ceebo cakukonkelabo lilembo lyomwi. Kucakubonenaako, kweelana a 1 Pita 3:7 mboyaamba, banakashi beebetwe balyeelete kunootondeshekwa bulemu mbuli “bantu batacite nkusu.” a Ano sa ici cilaamba ayi banakashi tabayandiki, tabacite busongo abuumbi alimwi tabacishi shiinji mbuli basankwa? Sobwe napaceyi! Amweelanye maswi Pita ngakaamba kumaswi ngotucana pa Bene Galatiya 3:26-29, apo paamba ayi Yehova wakasala banakashi  abasankwa kwaamba ayi bakeendeleshe pomwi a Yesu kwiculu. Na tweeya Maswi akwe Lesa akwiipushako shicibusa ngotushoma kwaamba ayi atulwiiteko mbotubona banakashi, inga tweeya kunotondesha bulemu kubenankashi.

BAMANENE MBOBATONDESHA BULEMU KUBENANKASHI

Bamakwesu abalo mulibungano inga beeya kunotondesha bulemu kubenankashi kwiinda mukunokonkela cakubonenaako ca bamanene batondesha lusuno. Ino nshiinshi bamanene nshebacita kwaamba ayi babe panembo mukutondesha bulemu kubenankashi? Amuleke tubandike panshila shimwi mbobacita boobo.

Bamanene balalumba benankashi. Mutumwi Paulo wakatondesha cakubonenaako cibotu bamanene nceenga bakonkela. Wakalumba benankashi baanji munkalata njaakalembela Beneklistu bamulibungano lyaku Loma. (Loma. 16:12) Amuyeeyebo benankashi abo mbobakasangalala ndyebakanyumfwa nkalata Paulo njaakalemba kaibelengwa kulibungano. Bamanene abalo balalumba benankashi kuswa panshi lyamoyo pamibo ibotu njobatondesha a pancito nshobasebensela Yehova. Ici cilacafwa benankashi kushiba ayi bamulibungano balabalemeka alimwi ayi balababona ayi balayandika. Kuyuminishikwa kuswa kubamanene mpashi ncecintu benankashi nceenga kabayandika kwaamba ayi batolelele kusebensela Yehova cakushomeka.—Tus. 15:23.

Bamanene ndyebatolumba benankashi, balabalumba kuswa panshi lyamoyo alimwi mukululama. Ino nceebonshi? Nankashi waliina lya Jessica wakaamba ayi: “Cilanyumfwisha kabotu na bamakwesu balwiita nankashi ayi ‘mwacita kabotu.’ Sombi tulalumba bunene na bamakwesu baamba mukululama pashintu nshotucita, mbuli kwiisha baana kutanopanga coongo ciindi cakubungana na kuya mukwiindula shikwiiya Baibo kwaamba ayi tuyaakwe mukubungana.” Na bamanene kabalumba benankashi mukululama pashintu nshobacita kabotu, benankashi balalinyumfwa kuyandika mulibungano.

 Bamanene balakutika benankashi ndyebatokwaamba. Bamanene baliceesha balicishi ayi teshibo beenka beenga kabacite miyeeyo yeenga yasebensa. Bamanene baliceesha baleepushako benankashi mbobatoyeeya pamakani amwi, alimwi balakutika cakubikila maano benankashi ndyebatokwaamba. Na bamanene kabacita boobo, balayuminisha benankashi alimwi abalo beene balafubilaamo. Munshila nshi? Munene waliina lya Gerardo usebensela pa Bethel, wakaamba ayi: “Ndakacana kwaamba ayi kwiipushako benankashi mbobatoyeeya, kulancafwa kusebensa kabotu ncito yangu. Liinji cilacanika ayi, benankashi bamwi bakasebensa ncito iyo kwaciindi cilaamfu kwiinda bamakwesu baanji.” Mulibungano, benankashi baanji balasebensa mbuli bapainiya, aboobo balibeshi kabotu bantu bakumusena nkobashimikila. Munene waliina lya Bryan wakaamba ayi: “Kuli shintu shiinji nsheenga benankashi bacita mulibunga. Aboobo amufubileemo mulushibo ndobacite!”

Bamanene basongo tabafwambaani kusuula miyeeyo njeenga benankashi baamba. Ino nceebonshi? Munene waliina lya Edward wakaamba ayi: “Muyeeyo ngweenga nankashi waamba inga wacafwa mukwesu kunyumfwishisha kabotu makani oonse, akumucafwa kunooyeeyelaako bamwi.” (Tus. 1:5) Nabi kwaamba ayi munene inga taakonkeli muyeeyo nankashi ngwaamba, inga wamulumba pakwaamba mbwaatoyeeya ambwaatonyumfwishisha makani ayo.

Bamanene balaiishako benankashi. Bamanene banyumfwisha shintu baleelesha kucana nshila sha mbweenga baiishako benankashi. Kucakubonenaako, inga baiisha benankashi bwakutanjilila mubandi wakuya muncito yakushimikila, na cacanika ayi mukwesu wakabombekwa taapo. Inga baiisha benankashi bwakusebensesha shisebensesho shimwi na mashini imwi kwaamba ayi banoocafwilisha muncito ya kubaamba, akuyaka misena njetusebensesha muncito yakwe Lesa. Pa Bethel, bamakwesu batanjilila balaiisha benankashi bwakusebensa ncito shipusenepusene mbuli kubotesha, kuula shintu, kusebensela ku shamaali, kubaamba mapulogilamu apa kompyuta, ancito shimwi. Na bamanene kabaiisha benankashi, balatondesha ayi balabona benankashi ayi inga bacikonsha kusebensa ncito shimwi alimwi ayi balabashoma.

Benankashi baanji balasebensesha lwiiyo ndweenga batambula kuswa kubamanene kucafwako bamwi. Kucakubonenaako, benankashi bamwi balasebensesha lwiiyo ndobakeeya kuswa kubamanene pamakani a shakuyaka, kucafwako bamwi kuyaka maanda abo na kwacitika mapensho akutengashila. Benankashi bamwi balasebensesha lwiiyo ndobakeeya pamakani akushimikila kubantu baanji, kucafwako benankashi bamwi kushiba mbweenga basebensako ncito iyi. Ino benankashi balalinyumfwa buyani pabamanene bakabeeshako ncito shimwi? Nankashi waliina lya Jennifer wakaamba ayi: “Ndyendakaabanamo lubasu muncito yakuyaka Ŋanda ya Bwaami imwi, munene umwi wakalinga kusebensa andime kwaamba ayi anjiisheko ncito. Wakalinga kubona mbondakalinga kusebensa, alimwi wakalinga kundumba. Ndakalinga kunyumfwa kabotu kusebensa anguwe, mukwiinga wakalinga kumpa kulinyumfwa ayi ndayandika alimwi wakalinga kunshoma.”

SHOOLWE NSHEENGA TWACAANA NA KATUBONA BANAKASHI MULIBUNGANO MBULI BENANKASHI SHESU

Tulibasuni benankashi bashomeka bweenka Yehova mbwaabasuni! Aboobo tulababonabo anga mbenankashi shesu. (1 Timo. 5:​1, 2) Tulababona kuyandika alimwi tulasangalala kusebensa pomwi ambabo. Kwiilikaawo, tulasangalala abuumbi na bashiba ayi tulibasuni alimwi ayi tulabacafwa. Nankashi waliina lya Vanessa wakaamba ayi: “Ndalumba Yehova abuumbi pakuba lubasu lwa libunga lyakwe, umo muli bamakwesu baanji banjuminisha abuumbi.” Nankashi umwi ukala ku Taiwan wakaamba ayi: “Ndalumba abuumbi kwaamba ayi Yehova alibunga lyakwe, balabona ayi banakashi balayandika alimwi balabikila maano ku mbotulinyumfwa. Ici cilayumya lushomo lwangu alimwi cilancafwa kunoolumba abuumbi pacoolwe ncooncite cakuba lubasu lwa libunga lyakwe Yehova.”

Ncakutatoonsha kwaamba ayi Yehova alasangalala abuumbi na wabona basankwa bashomeka kabeelesha cankusu kunoobona banakashi bweenka lakwe mbwaababona! (Tus. 27:11) Munene umwi waku Scotland waliina lya Benjamin wakaamba ayi: “Basankwa baanji mucishi cino tabatondeshi bulemu kubanakashi nabibo paniini. Aboobo na benankashi besa kumabungano ku Ŋanda ya Bwaami tulisuni ayi banoolinyumfwa ayi tulabatondesha bulemu alimwi ayi tulibasuni.” Soonse atucite nsheenga twacikonsha kunokonkela cakubonenako cakwe Yehova kwiinda mukunotondesha lusuno abulemu kubenankashi.—Loma. 12:10.