Hawˉ hkʼaˆ laiˉ gʼaˇ kʼo, yaˇ miˇ lehˬ hawˉ hkʼaˆ aꞈ kehˉ awˬ hkʼehꞈ nehˬ ve tehꞈ shawˍ ve chaw liˇ vaˇ liˇ chi hkʼe ve hkʼaw uiˍ la ve yoˬ. Tawˇ pa haˉ te kʼo, Boˬliˇviˇ˗aˇ mvuhˇ miˬ lo chehˇ ve nyi haꞈ shaˉ paˍ Han kʼoˆ ve, “awˬ tehˬ ve hawˉ hkʼaˆ hkʼaˬ hkʼe hpehꞈ cawˇ ve chaw liˇ vaˇ liˇ maˍ yaꞈ ve hkʼaw chaw teˇ hpaˍ uiˍ la ve pa taw, yawˇ hui yaˇ miˇ htaꞈ nyi cha ve, leh yaˇ miˇ htaꞈ maˇ yawˆ yan ve hkʼaw te piˇ ve yoˬ.” Tai˗wanˬ mvuhˇ miˬ lo chehˇ ve nyi haꞈ shaˉ paˍ Cheu˗che kʼoˆ ve, “ngaˬ chehˇ kuiˬ teˇ tawn lo hawˉ hkʼaˆ laiˉ gʼaˇ dawˇ ve, yaˇ miˇ lehˬ hawˉ hkʼaˆ ve awˬ lawn htaꞈ maˇ ca shoꞈ shaꞈ la cawˇ. Leh hawˉ hkʼaˇ hkʼaˬ ve teˇ gʼaˇ yaˇ miˇ ve dawˇ hkʼaˇ htaꞈ kʼoˆ ve kʼo, awˬ nu ve chaw yawˇ htaꞈ nyi cha piˇ ve yoˬ.” Yaꞈ hkʼaˇ, awˬ nu ve hawˉ hkʼaˆ teˇ hpaˍ kʼo, yawˇ hui yaˇ miˇ htaꞈ gʼuiˬ yawˬ tuˬ te leh kʼoˆ guiˇ gʼuiˬ guiˇ piˇ ve yoˬ.

Awˬ viˉ awˬ nyi hawˉ hkʼaˆ chaw liˇ vaˇ liˇ hkʼaˬ hkʼe ve hkʼaw uiˍ la ve htawˇ maˇ kʼoˆ, hawˉ hkʼaˆ yaˇ miˇ aꞈ kehˉ daꞈ ve tehꞈ dawˇ ve dawˇ hkʼaˇ htaꞈ pa gʼa ve pa taw ha lehˬ jaˇ ve yoˬ. (Eˇfeˇsuꞈ 4:22-24) Yawˇ hui htaꞈ ga piˇ gʼa ve awˬ ceuˬ lehˬ, Yaˬhoˉvaˬ htaꞈ henˇ yuˬ ve pa taw yoˬ. Yaˬhoˉvaˬ awˬ viˉ awˬ nyi yaˇ miˇ htaꞈ daꞈ ve hkʼaˬ hkʼe te piˇ ve awˬ lawn chi ve hkʼaw teˇ geh henˇ tuˬ yoˬ. Awˬ viˉ awˬ nyi hawˉ hkʼaˆ awˬ lawn chi htaꞈ caˉ daꞈ ve, Yaˬhoˉvaˬ htaꞈ hkʼaˬ hkʼe te henˇ yuˬ gʼa tuˬ le, leh nyi haꞈ shaˉ paˍ lehˬ awˬ viˉ awˬ nyi yaˇ miˇ htaꞈ hkʼaˬ hkʼe te yawˆ yan piˇ gʼa tuˬ kaꞈ teˇ geh henˇ tuˬ yoˬ.

YAˬHOˉVAˬ AWˬ VIˉ AWˬ NYI YAˇ MIˇ HTAꞈ DAꞈ VE HKʼAˬ HKʼE TE PIˇ VE LE?

Yaˬhoˉvaˬ lehˬ yaˇ miˇ htaꞈ daꞈ ve te piˇ ve daꞈ jaˇ ve henˇ yuˬ tuˬ hpehꞈ ve yoˬ. Yaˬhoˉvaˬ lehˬ haꞈ kʼaˉ puiˉ ve Awˬ pa hkʼe hpehꞈ leh miˬ guiˬ hkʼoˆ lo ve chaw yaˇ teˇ gʼaˇ le le htaꞈ yawˇ ve yaˇ hkʼa shuˍ haꞈ ve yoˬ. (Yoˇhanˬ 3:16) Ka tiꞈ yeˬ ve awˬ viˉ awˬ nyi yaˇ miˇ lehˬ, Gʼuiˬ sha ve yaˇ miˇ awˬ hpfuhˇ hkʼaˆ jaˇ ve hkʼe shawˍ ve yoˬ. Yaˬhoˉvaˬ awˬ viˉ awˬ nyi yaˇ miˇ htaꞈ hkʼaˬ hkʼe yawˆ yan piˇ ve teˇ geh nyi sheˍ.

 Yaˬhoˉvaˬ lehˬ yaˇ miˇ htaꞈ daꞈ ve te piˇ ve. Yaˬhoˉvaˬ lehˬ hawˉ hkʼaˆ leh yaˇ miˇ htaꞈ kaꞈ yawˇ hkʼa shuˍ te hpanˍ taˍ ve yoˬ. Yaˇ miˇ aꞈ kehˉ hawˉ hkʼaˆ lehˬ, cuˇ yiˍ cawˬ ve, puiˉ ve cheuˬ ve, tehꞈ maˇ gʼa te hpanˍ taˍ. (Awˬ hkuiˉ puiˍ 1:27; 2 Raˍsaˍvanˍ 19:7) Liꞈ hpu hkʼaw awˬ tehˬ ve htaꞈ na gʼa tuˬ, leh te hkʼaˇ dawˇ hkʼaˇ daꞈ ve teˇ hpaˍ te tawˆ la tuˬ, Gʼuiˬ sha lehˬ hawˉ hkʼaˆ leh yaˇ miˇ htaꞈ hkʼa shuˍ te hpanˍ taˍ ve yoˬ. Chi hkʼoˆ kaꞈ, Yaˬhoˉvaˬ lehˬ hawˉ hkʼaˆ leh yaˇ miˇ ve yonˍ hkʼaˇ hkʼa shuˍ cawˬ ve tehꞈ shawˍ ve yoˬ. Yaˬhoˉvaˬ yawˇ hui htaꞈ dawˇ law kuiˬ hkʼa shuˍ piˇ ve lehˬ, miˬ guiˬ awˬ suhˉ hkʼaw co co taiˍ taiˍ ve a shaꞈ gʼa tuˬ dawˇ law kuiˬ piˇ ve, maˇ heˆ leh mvuhˇ naw ma hkʼoˆ lo jawˇ mawˇ leh paw hkuˇ te tuˬ dawˇ law kuiˬ piˇ ve yoˬ. (2 Peˍtruˆ 1:1) Yaˬhoˉvaˬ lehˬ yaˇ miˇ htaꞈ maˇ nyi cha ve tehꞈ hkʼa tawˍ lehˆ gʼa mawˬ ve yoˬ.

Yaˬhoˉvaˬ lehˬ yaˇ miˇ hkawˇ na ve. Yaˬhoˉvaˬ lehˬ yaˇ miˇ ve te hkʼaˇ dawˇ hkʼaˇ htaꞈ a yeˇ yuˬ leh yawˇ hui aˬ htoꞈ ma htaꞈ dawˇ haˍ ve dawˇ hkiˉ ve yoˬ. Tawˇ pa haˉ te kʼo, Yaˬhoˉvaˬ lehˬ Raˍhkeˍlaˆ leh Haˍnaˆ ve bon lawˬ hkawˇ htaꞈ na leh hkʼawꞈ piˇ ve yoˬ. (Awˬ hkuiˉ puiˍ 30:22; 1 Saˍmo˗eˍlaˆ 1:10, 11, 19, 20) Chi hkʼoˆ kaꞈ, Yaˬhoˉvaˬ Liꞈ hpu bvuhꞈ paˍ htaꞈ dawˇ pawnˍ piˇ leh hawˉ hkʼaˆ yaˇ miˇ ve hkawˇ na ve chaw ve awˬ lawn kaꞈ bvuhꞈ tcuh taˍ ve yoˬ. Tawˇ pa haˉ te kʼo, Yaˬhoˉvaˬ Aˍbraˍhanˍ htaꞈ yawˇ ve awˬ miˇ ma Saˍraˇ hkawˇ na yuˬ tehꞈ kʼoˆ piˇ ve htaꞈ Aˍbraˍhanˍ gʼaꞈ te ve yoˬ. (Awˬ hkuiˉ puiˍ 21:12-14) Jawˇ mawˇ Daˍviˆ Aˍbiˆgeˍlaˆ hkawˇ na leh Yaˬhoˉvaˬ Aˍbiˆgeˍlaˆ htaꞈ peu laˇ leh kʼoˆ laˇ tcuh ve tehꞈ Daˍviˆ dawˇ ve yoˬ. (1 Saˍmo˗eˍlaˆ 25:32-35) Yeˍsuˆ Yaˬhoˉvaˬ ve te hkʼaˇ dawˇ hkʼaˇ htaꞈ hkʼa dehꞈ henˇ yuˬ gʼa ve awˬ hkʼoˆ kaꞈ, yawˇ ve awˬ e Maˍriˆ hkawˇ kaꞈ na yuˬ ve yoˬ. (Yoˇhanˬ 2:3-10) Awˬ lawn chi teˇ hpaˍ htaꞈ gʼa mawˬ htaˇ, Yaˬhoˉvaˬ yaˇ miˇ htaꞈ yawˆ yan ve tehꞈ hpeuꞈ maw laˇ ve awˬ hkʼaˇ lehˬ yawˇ hui ve hkawˇ na ve yoˬ.

Yaˬhoˉvaˬ yaˇ miˇ htaꞈ yonˍ gʼa ve. Tawˇ pa haˉ te kʼo, Yaˬhoˉvaˬ Eˇvaꞈ htaꞈ miˬ guiˬ hkʼoˆ lo cawˬ ve hkʼa peu˗eˬ htaꞈ nyi haꞈ shaˉ tcuh ve yoˬ. Chi Yaˬhoˉvaˬ Eˇvaꞈ htaꞈ yonˍ gʼa ve tehꞈ hpeuꞈ maw laˇ ve yoˬ. (Awˬ hkuiˉ puiˍ 1:28) Yaˬhoˉvaˬ chi hkʼe te ve lehˬ, yawˇ ve awˬ hpawˇ Aˍdanˍ aꞈ kehˉ awˬ hkʼehꞈ nehˬ ve tehꞈ Yaˬhoˉvaˬ maˇ dawˇ ve hpeuꞈ maw laˇ ve yoˬ. Yaꞈ hkʼaˇ, Eˇvaꞈ awˬ hpfuhˇ hkʼaˆ jaˇ ve ga piˇ shehˍ ma hpehꞈ ve yoˬ. Tcuh kaˍ ma Deˍboˇraˍ leh Huˇlaˍdaˆ htaꞈ Yaˬhoˉvaˬ yonˍ gʼa leh yawˇ ve chaw htaꞈ beˆ maˍ piˇ tuˬ awˬ vuiˬ piˇ ve yoˬ. Chaw chi teˇ moˍ hkʼaw ve teˇ gʼaˇ lehˬ suhˉ jehˬ paˍ leh, awˬ nu ve teˇ gʼaˇ lehˬ jawˇ mawˇ hpehꞈ ve yoˬ. (Suhˉ jehˬ ve 4:4-9; 2 Jawˇmawˇ 22:14-20) Chi beuꞈ teˇ co˗e Yaˬhoˉvaˬ awˬ viˉ awˬ nyi yaˇ miˇ htaꞈ yonˍ gʼa ve lehˬ, yawˇ hui htaꞈ a yeˇ uiˍ ve kanˉ laiˉ ceuˬ te tcuh ve yoˬ. Tawˇ pa haˉ te kʼo, yaˇ miˇ teˇ hpaˍ htaꞈ hto toˇ ve, gʼuˇ suhˍ peuˍ ve, leh Miˍshenˍnaˍliˍ te tcuh ve yoˬ. Leh teˇ hpaˍ kʼo, Gʼuiˬ sha ve kanˉ hkʼaˇ yehˬ te ve hpawˇ shawehˇ piˇ ve, hpawnˬ daꞈ kuiˬ yehˬ, leh awˬ tcuhˆ peuˍ teˇ hpaˍ kʼawꞈ gu te ve kaꞈ ga piˇ ve yoˬ. Leh teˇ hpaˍ kʼo, Beˍteˍlaˆ hkʼaw kanˉ te ve, maˇ heˆ leh liꞈ yuˬ tawˆ kuiˬ awˬ ti (RTO) hkʼaw kanˉ te ve yoˬ. Yaˬhoˉvaˬ ve a loˍ awˬ tehˬ hpehꞈ la tuˬ, yawˇ awˬ viˉ awˬ nyi yaˇ miˇ chi teˇ hpaˍ maꞈ moˍ lonˉ shuˍ ve htaꞈ yehˇ ve yoˬ. (Chiˇ mvuh ve 68:11) Yaˬhoˉvaˬ lehˬ yaˇ miˇ htaꞈ awˬ gʼaˇ nuˇ ve, maˇ heˆ leh teꞈ chiˉ maˇ te puiˉ ve maˇ dawˇ ve tehꞈ ngaˬ hui gʼa mawˬ ve yoˬ.

AWˬ VIˉ AWˬ NYI HAWˉ HKʼAˆ YAˬHOˉVAˬ HTAꞈ HENˇ YUˬ LEH AWˬ VIˉ AWˬ NYI YAˇ MIˇ HTAꞈ HKʼAˬ HKʼE TE DAꞈ VE TE PIˇ GʼA TUˬ LE?

Awˬ viˉ awˬ nyi hawˉ hkʼaˆ˗oˬ, Yaˬhoˉvaˬ awˬ viˉ awˬ nyi yaˇ miˇ htaꞈ daꞈ ve te piˇ ve hkʼe ngaˬ hui henˇ yuˬ chehˇ ve tehꞈ shiˍ tuˬ, ngaˬ hui ve te hkʼaˇ dawˇ hkʼaˇ htaꞈ hkʼa dehꞈ gʼa chaˬ nyi cawˇ ve yoˬ. Yaꞈ hkʼaˇ, chi ngaˬ hui hkʼaˇ ngaˬ hui te maˇ gʼa. Ngaˬ hui htaꞈ gʼa ga laˇ tcuh ve yoˬ. Chi ve hkʼa shuˍ shuˍ, ngaˬ hui ve nyi ma hkʼaw hkʼaˬ hkʼe hpehꞈ ve htaꞈ shiˍ gaˇ ve kʼo, ngaˬ hui saˍ laꞈ gʼonˍ geh kʼai leh, saˍ laꞈ gʼonˍ daˆ dawˆ nyi tuˬ awˬ hkʼeun (X˗ray) htaꞈ yehˇ leh daˆ nyi laˇ ve kʼo, ngaˬ hui hkʼaˬ hkʼe hpehꞈ ve htaꞈ shiˍ gʼa tuˬ yoˬ. Chi ve hkʼa shuˍ shuˍ, ngaˬ hui ve nyi ma hkʼaw awˬ viˉ awˬ nyi yaˇ miˇ htaꞈ hkʼaˬ hkʼe dawˇ ve shiˍ tuˬ, awˬ chawˇ leh Liꞈ hpu hkʼaw ngaˬ hui htaꞈ ga laˇ gʼa ve yoˬ. Ngaˬ hui ga laˇ ve chi htaꞈ gʼa tuˬ, hkʼaˬ hkʼe gʼa te cawˇ ve le?

Daꞈ ve awˬ chawˇ htaꞈ na piˇ ve. (Tawˇ naˉ ve 18:17) Nawˬ daꞈ ve awˬ chawˇ cawˬ ve lehˬ, yonˍ gʼa ve, ha kʼaˉ ve, leh keunˍ lawꞈ cawˇ lawꞈ ve chaw hpehꞈ˗aw laˇ? Hpehꞈ ve kʼo yawˇ htaꞈ na piˇ ve, “nawˬ dawˇ kʼo, ngaˬ awˬ viˉ awˬ nyi yaˇ miˇ htaꞈ daꞈ ve hkʼaˬ hkʼe te piˇ cawˇ ve le? Ngaˬ awˬ viˉ awˬ nyi yaˇ miˇ htaꞈ yawˆ yan piˇ ve tehꞈ yawˇ hui dawˇ˗aw laˇ? Leh ngaˬ aˬ htoꞈ ma gʼa pa cawˇ sheˍ ve le?” Awˬ chawˇ nawˬ htaꞈ teˇ ceuˬ ceuˬ beˆ maˍ laˇ ve kʼo, haˆ taˇ kʼawꞈ kʼoˆ hkʼawꞈ piˇ. Yaꞈ hkʼaˇ, nawˬ ve te hkʼaˇ dawˇ hkʼaˇ pa cawˇ ve yoˬ.

Liꞈ hpu gʼaw leh henˇ ve. Awˬ viˉ awˬ nyi yaˇ miˇ htaꞈ daꞈ ve te piˇ ve laˇ tehꞈ shiˍ tuˬ ve teˇ hkʼaˇ lehˬ, Liꞈ hpu gʼaw leh henˇ ve yoˬ. (Heˍbrehˇ 4:12) Hawˉ hkʼaˆ yaˇ miˇ htaꞈ daꞈ ve te piˇ ve leh maˇ te piˇ ve awˬ lawn htaꞈ caˉ daꞈ ve Liꞈ hpu hkʼaw ngaˬ hui gʼa gʼaw ve yoˬ. Gʼaw leh hkʼaˬ hkʼe hpehꞈ ve ngaˬ hui htaꞈ tehˆ daꞈ nyi sheˍ. Chi hkʼoˆ kaꞈ, ngaˬ hui Liꞈ hpu awˬ tawn teˇ hpaˍ htaꞈ gʼaw leh chi ve hkʼaw ve ngaˬ hui yaˇ miˇ htaꞈ maˇ daꞈ ve dawˇ hkʼaˇ maˇ cawˬ tuˬ ga laˇ gʼa ve yoˬ. Tawˇ pa haˉ te kʼo, 1 Peˍtruˆ liꞈ 3:7 hkʼaw kʼoˆ ve, awˬ miˇ ma awˬ hpawˇ aꞈ kehˉ “awˬ gʼaˇ nuˇ ve” htaꞈ yawˆ  yan ve hkʼaw gʼa te piˇ ve yoˬ. b Awˬ gʼaˇ nuˇ ve kʼoˆ gaˇ ve lehˬ, awˬ miˇ ma awˬ hpawˇ aꞈ kehˉ awˬ hkʼehꞈ nehˬ ve, cuˇ yiˍ maˇ cawˬ ve, leh puiˉ ve cheuˬ ve maˇ cawˬ ve tehꞈ kʼoˆ gaˇ ve laˇ? Maˇ heˆ. Awˬ lawn kʼo Gaˍlaˍtiˆ liꞈ 3:26-29 hkʼaw kʼoˆ ve, Yaˬhoˉvaˬ hawˉ hkaˆ leh yaˇ miˇ htaꞈ leuˆ yuˬ leh mvuhˇ naw ma hkʼoˆ Yeˍsuˆ geh teˇ geh uˉ peunˍ tcuh ve yoˬ. Chi htaꞈ pa taw, ngaˬ hui Liꞈ hpu gʼaw leh daꞈ ve awˬ chawˇ htaꞈ na nyi piˇ ve kʼo, awˬ viˉ awˬ nyi yaˇ miˇ htaꞈ keunˍ lawꞈ cawˇ lawꞈ ve hkʼaw hkʼaˬ hkʼe te yawˆ yan piˇ gʼa tuˬ kaꞈ ga laˇ ve yoˬ.

NYI HAꞈ SHAˉ PAˍ AWˬ VIˉ AWˬ NYI YAˇ MIˇ HTAꞈ HKʼAˬ HKʼE TE YAWˆ YAN PIˇ GʼA TUˬ LE?

Awˬ viˉ awˬ nyi hawˉ hkaˆ awˬ viˉ awˬ nyi yaˇ miˇ htaꞈ yawˆ yan piˇ ve awˬ hkʼaˇ shiˍ tuˬ lehˬ, Hkriꞈ yaˇ awˬ moˍ hkʼaw ve nyi haꞈ shaˉ paˍ te ve htaꞈ nyi ve yoˬ. Leh nyi haꞈ shaˉ paˍ awˬ viˉ awˬ nyi yaˇ miˇ htaꞈ yawˆ yan leh hkʼaˬ hkʼe te sheh kʼai piˇ gʼa tuˬ, nyi haꞈ shaˉ paˍ te gʼa ve awˬ ceuˬ htaꞈ teˇ geh nyi sheˍ.

Awˬ viˉ awˬ nyi yaˇ miˇ htaꞈ chiˇ mvuh piˇ ve. Awˬ lawn chi ve tcuh yaˇ Pawˇluꞈ lehˬ henˇ yuˬ tuˬ daꞈ ve yoˬ. Roˉmaꞈ venˇ lo chehˇ ve Hkriꞈ yaˇ htaꞈ Pawˇluꞈ liꞈ bvuhꞈ piˇ htaˇ, yawˇ awˬ viˉ awˬ nyi yaˇ miˇ laiˉ gʼaˇ htaꞈ chiˇ mvuh piˇ ve yoˬ. (Roˉmaꞈ 16:12) Hkriꞈ yaˇ awˬ moˍ mehˆ gʼuˇ suhˍ liꞈ oˇ ve gʼaw htaˇ, awˬ viˉ awˬ nyi yaˇ miˇ ha lehˬ jaˇ ve htaꞈ ngaˬ hui dawˇ mawˬ gʼa ve yoˬ. Chi ve hkʼa shuˍ shuˍ, awˬ viˉ awˬ nyi yaˇ miˇ Yaˬhoˉvaˬ ve kanˉ te ve leh, te hkʼaˇ dawˇ hkʼaˇ daꞈ ve htaꞈ nyi haꞈ shaˉ paˍ chiˇ mvuh piˇ ve kʼo, chi awˬ viˉ awˬ nyi yawˇ hui htaꞈ yawˆ yan laˇ ve tehꞈ dawˇ ve yoˬ. Yawˇ hui Yaˬhoˉvaˬ ve kanˉ ka tiꞈ yeˬ ve hkʼaw caˉ leh te kʼai gʼa tuˬ, teˇ pawˆ pawˆ kʼo nyi haꞈ shaˉ paˍ yawˇ hui htaꞈ chiˇ mvuh piˇ ve lehˬ loˍ htaˇ cawˇ daꞈ ve yoˬ.—Tawˇ naˉ ve 15:23.

Nyi haꞈ shaˉ paˍ awˬ viˉ awˬ nyi yaˇ miˇ htaꞈ hkʼa dehꞈ chiˇ mvuh piˇ leh yawˇ hui daꞈ ve awˬ lawn aˬ htoꞈ ma cawˬ ve htaꞈ kʼoˆ maˍ piˇ ve yoˬ. Aˬ htoꞈ ma te chi hkʼe chiˇ mvuh piˇ ve le? Awˬ viˉ awˬ nyi yaˇ miˇ Ceh˗si˗kaˇ kʼoˆ ve, “awˬ viˉ awˬ nyi hawˉ hkʼaˆ ‘nawˬ te ve daꞈ jaˇ’ tehꞈ kʼoˆ laˇ htaˇ, ngaˬ hui nyi ma sha jaˇ ve yoˬ. Yaꞈ hkʼaˇ, ngaˬ hui te ve daꞈ ve aˬ htoꞈ ma cawˬ ve htaꞈ yawˇ hui hteˇ˗ehˬ kʼoˆ maˍ laˇ htaˇ, ngaˬ hui awˬ gʼaˇ gʼa jaˇ ve yoˬ. Tawˇ pa haˉ te kʼo, hpawnˬ daꞈ htaˇ ngaˬ hui ve yaˇ htaꞈ hkʼa dehꞈ mui ve maˍ piˇ ve htaꞈ chiˇ mvuh laˇ ve, maˇ heˆ leh hpawnˬ daꞈ kuiˬ hkʼaw Liꞈ hpu ve  chaw laˬ tuˬ ca gʼawˬ˗e ve htaꞈ chiˇ mvuh laˇ ve yoˬ.” Awˬ viˉ awˬ nyi yaˇ miˇ te hkʼaˇ dawˇ hkʼaˇ daꞈ ve aˬ htoꞈ ma cawˬ ve htaꞈ nyi haꞈ shaˉ paˍ chiˇ mvuh laˇ htaˇ, yawˇ hui a yeˇ uiˍ leh Hkriꞈ yaˇ awˬ moˍ hkʼaw awˬ hpfuhˇ hkʼaˆ ve tehꞈ dawˇ ve yoˬ.

Awˬ viˉ awˬ nyi yaˇ miˇ hkawˇ na ve. Nyi haꞈ shaˉ paˍ nyi ma nuˇ nehˬ ve lehˬ, yawˇ ve dawˇ hkʼaˇ daꞈ jaˇ tehꞈ maˇ dawˇ. Nyi haꞈ shaˉ paˍ chi hkʼe te ve lehˬ, awˬ viˉ awˬ nyi yaˇ miˇ ve dawˇ hkʼaˇ htaꞈ kʼoˆ maˍ laˇ tcuh leh yawˇ hui hkʼa dehꞈ na taˍ ve yoˬ. Chi hkʼe te ve lehˬ, awˬ viˉ awˬ nyi yaˇ miˇ awˬ gʼaˇ gʼa leh nyi haꞈ shaˉ paˍ kaꞈ awˬ bon gʼa ve yoˬ. Chi hkʼaˬ hkʼe hpehꞈ gʼa ve yoˬ. Nyi haꞈ shaˉ paˍ Je˗ra˗don meh ve Beˍteˍlaˆ hkʼaw kanˉ te chehˇ ve kʼoˆ ve, “awˬ viˉ awˬ nyi yaˇ miˇ ve dawˇ hkʼaˇ htaꞈ kʼoˆ maˍ laˇ tuˬ na piˇ ve lehˬ, ngaˬ kanˉ hkʼa dehꞈ te gʼa tuˬ ga laˇ ve yoˬ. Awˬ lawn kʼo, yawˇ hui kanˉ chi htaꞈ hkʼa dehꞈ te puiˉ leh teˇ hpaˍ kʼo awˬ viˉ awˬ nyi hawˉ hkʼaˆ aꞈ kehˉ kanˉ laiˉ hkʼawꞈ te laˬ˗oˬ ve yoˬ.” Chi hkʼoˆ kaꞈ, awˬ viˉ awˬ nyi yaˇ miˇ laiˉ gʼaˇ Hkriꞈ yaˇ awˬ moˍ hkʼaw gʼuˇ suhˍ peuˍ ve te chehˇ ve pa taw, hto toˇ kuiˬ awˬ ti lo ve chaw htaꞈ yawˇ hui hkʼa dehꞈ shiˍ daꞈ ve yoˬ. Nyi haꞈ shaˉ paˍ Bai˗aˇ kʼoˆ ve, “awˬ viˉ awˬ nyi yaˇ miˇ daꞈ ve te hkʼaˇ dawˇ hkʼaˇ cawˬ leh laiˉ ceuˬ te puiˉ ve yoˬ. Chi ve lehˬ Gʼuiˬ sha ve kanˉ hkʼaˇ hkʼaw awˬ bon cawˬ jaˇ. Chi htaꞈ pa taw, yawˇ hui hpehꞈ laˬ jaw ve awˬ lawn htaꞈ henˇ yuˬ sheˍ.”

Nyi haꞈ shaˉ paˍ cuˇ yiˍ cawˬ ve lehˬ, awˬ viˉ awˬ nyi yaˇ miˇ ve dawˇ hkʼaˇ htaꞈ awˬ hpfuhˇ shiˍ ve yoˬ. Aˬ htoꞈ ma pa taw le? Nyi haꞈ shaˉ paˍ Eˉmaˆ kʼoˆ ve, awˬ viˉ awˬ nyi yaˇ miˇ ve dawˇ hkʼaˇ leh hpehꞈ laˬ jaw ve awˬ lawn lehˬ, awˬ viˉ awˬ nyi hawˉ hkʼaˆ awˬ lawn awˬ tanˇ htaꞈ hkʼa dehꞈ dawˇ mawˬ tuˬ te laˇ leh shu ve dawˇ hkʼaˇ htaꞈ awˬ viˉ awˬ nyi hawˉ hkʼaˆ na gʼa tuˬ kaꞈ ga laˇ ve yoˬ. (Tawˇ naˉ ve 1:5) Teˇ pawˆ pawˆ kʼo, nyi haꞈ shaˉ paˍ awˬ viˉ awˬ nyi yaˇ miˇ ve dawˇ hkʼaˇ htaꞈ maˇ gʼaꞈ te gʼa ve htawˇ, yawˇ hui ve dawˇ hkʼaˇ leh yawˇ hui shiˍ ve awˬ lawn kʼoˆ maˍ laˇ ve htaꞈ awˬ bon uiˍ jaˇ tehꞈ kʼoˆ piˇ gaˇ ve yoˬ.

Awˬ viˉ awˬ nyi yaˇ miˇ htaꞈ maˍ piˇ ve. Nyi haꞈ shaˉ paˍ lehˬ awˬ viˉ awˬ nyi yaˇ miˇ htaꞈ maˍ piˇ tuˬ awˬ yanˇ ca ve yoˬ. Tawˇ pa haˉ te kʼo, awˬ viˉ awˬ nyi hawˉ hkʼaˆ Baˆtiˆsaˬ haꞈ yuˬ ve maˇ cawˬ htaˇ, awˬ viˉ awˬ nyi yaˇ miˇ hto toˇ˗e tuˬ awˬ pon sheh kʼai tuˬ awˬ hkʼaˇ maˍ piˇ ve yoˬ. Yawˇ hui Gʼuiˬ sha ve kanˉ hkʼaˇ hkʼaw yehˬ te ve hpawˇ, maˇ heˆ leh hpawnˬ daꞈ kuiˬ yehˬ kʼawꞈ gu te ve hpawˇ ga piˇ gʼa tuˬ awˬ hkʼeun teˇ hpaˍ yehˇ puiˉ tuˬ awˬ hkʼaˇ kaꞈ maˍ piˇ ve yoˬ. Chi hkʼoˆ kaꞈ, Beˍteˍlaˆ hkʼaw kanˉ te htaˇ, kanˉ te ve hpawˇ nyi haꞈ shaˉ paˍ awˬ viˉ awˬ nyi yaˇ miˇ htaꞈ kanˉ laiˉ ceuˬ te gʼa tuˬ maˍ piˇ ve yoˬ. Tawˇ pa haˉ te kʼo, Beˍteˍlaˆ kʼawꞈ gu te ve, mawˇ vuiˬ ve, ceˇ leˇ te ve, hkaw˗hpe˗teuˇ yehˇ ve, leh awˬ nu ve kanˉ te ve kaꞈ maˍ piˇ ve yoˬ. Nyi haꞈ shaˉ paˍ awˬ viˉ awˬ nyi yaˇ miˇ htaꞈ maˍ piˇ ve kʼo, awˬ viˉ awˬ nyi yaˇ miˇ laiˉ ceuˬ te gʼa leh yawˇ hui yonˍ gʼa ve tehꞈ hpeuꞈ maw piˇ ve yoˬ.

Awˬ viˉ awˬ nyi yaˇ miˇ nyi haꞈ shaˉ paˍ maˍ piˇ ve htaꞈ gʼa htaˇ, yawˇ kaꞈ awˬ nu ve chaw htaꞈ ga piˇ gʼa ve yoˬ. Tawˇ pa haˉ te kʼo, Gʼuiˬ sha ve kanˉ hkʼaˇ hkʼaw yehˬ te ve hpawˇ gʼa henˇ taˍ ve awˬ viˉ awˬ nyi yaˇ miˇ teˇ hpaˍ lehˬ, mvuhˇ yeˬ mvuhˇ haw lonˉ gʼa hpuˇ ve awˬ viˉ awˬ nyi teˇ hpaˍ ve yehˬ htaꞈ kʼawꞈ gu te tuˬ, yawˇ hui te puiˉ te hpehꞈ ve htaꞈ yehˇ ve yoˬ. Chaw guiˇ kuiˬ lo hto toˇ tuˬ ve awˬ pon awˬ viˉ awˬ nyi yaˇ miˇ gʼa henˇ˗oˬ ve chaw lehˬ, kanˉ chi ve te tuˬ awˬ nu ve awˬ viˉ awˬ nyi yaˇ miˇ htaꞈ maˍ piˇ gʼa ve yoˬ. Yaˇ miˇ chi teˇ hpaˍ nyi haꞈ shaˉ paˍ maˍ piˇ ve htaꞈ yawˇ hui hkʼaˬ hkʼe dawˇ ve le? Awˬ viˉ awˬ nyi yaˇ miˇ Je˗ne˗feuˇ kʼoˆ ve, “hpawnˬ daꞈ kuiˬ yehˬ te ve hpawˇ ngaˬ ga piˇ htaˇ, nyi haꞈ shaˉ paˍ teˇ gʼaˇ awˬ yanˇ yehˇ leh ngaˬ htaꞈ maˍ laˇ ve yoˬ. Ngaˬ te ve kanˉ htaꞈ nyi leh chiˇ mvuh laˇ ve yoˬ. Ngaˬ awˬ hpfuhˇ cawˬ leh yonˍ gʼa ve chaw hpehꞈ ve tehꞈ dawˇ ve pa taw, ngaˬ yawˇ geh kanˉ te gaˇ ve yoˬ.”

AWˬ VIˉ AWˬ NYI YAˇ MIˇ HTAꞈ YEHˬ KʼA HKʼAW VE CHAW HKʼE DAꞈ VE TE PIˇ VE LEHˬ AWˬ BON HKʼAˬ HKʼE CAWˬ VE LE?

Yaˬhoˉvaˬ awˬ viˉ awˬ nyi yaˇ miˇ htaꞈ haꞈ ve hkʼe ngaˬ hui kaꞈ haꞈ ve yoˬ. Hkʼe te leh, ngaˬ hui yawˇ hui htaꞈ yehˬ kʼa hkʼaw ve chaw hkʼe te piˇ ve yoˬ. (1 Tiˆmoˉseˍ 5:1, 2) Ngaˬ hui yawˇ hui geh Gʼuiˬ sha ve kanˉ teˇ geh gʼa te ve nyi hkʼaˇ suh leh ha lehˬ jaˇ. Ngaˬ hui yawˇ hui htaꞈ haꞈ leh hkʼaˬ htaˆ kaꞈ gʼa ga piˇ chehˇ ve tehꞈ yawˇ hui shiˍ htaˇ, ngaˬ hui kaꞈ ha lehˬ jaˇ. Awˬ viˉ awˬ nyi yaˇ miˇ Va˗ne˗shaˉ kʼoˆ ve, “ngaˬ Gʼuiˬ sha ve kanˉ hkʼaˇ hkʼaw gʼa chehˇ ve yawˇ htaꞈ awˬ bon uiˍ jaˇ. Awˬ lawn kʼo, choˬ kaˬ lo awˬ viˉ awˬ nyi ngaˬ ha lehˬ tuˬ leh awˬ gʼaˇ gʼa tuˬ te laˇ ve yoˬ.” Tai˗wanˬ mvuhˇ miˬ lo chehˇ ve awˬ viˉ awˬ nyi yaˇ miˇ teˇ gʼaˇ kʼoˆ ve, “yaˇ miˇ htaꞈ awˬ hpfuhˇ shiˍ leh chi hkʼe taw taw na gʼa laˇ ve ngaˬ Yaˬhoˉvaˬ leh yawˇ ve kanˉ hkʼaˇ htaꞈ awˬ bon uiˍ jaˇ. Chi ngaˬ ve yonˍ hkʼaˇ yonˍ yeˬ tuˬ te laˇ leh Gʼuiˬ sha ve kanˉ hkʼaˇ hkʼaw gʼa chehˇ ve pa taw awˬ bon uiˍ jaˇ.”

Yaˬhoˉvaˬ hkʼa shuˍ awˬ viˉ awˬ nyi hawˉ hkʼaˆ awˬ viˉ awˬ nyi yaˇ miˇ htaꞈ haꞈ leh yawˆ yan piˇ ve pa taw, yawˇ nyi hkʼaˇ suh jaˇ tuˬ yoˬ. (Tawˇ naˉ ve 27:11) Saꞈkawˆlanˍ mvuhˇ miˬ lo chehˇ ve nyi haꞈ shaˉ paˍ Beˍyaˍmenˍ kʼoˆ ve, “miˬ guiˬ hkʼoˆ lo maˇ˗awˍ ve chaw yaˇ miˇ htaꞈ nyi cha ve yoˬ. Chi htaꞈ pa taw, awˬ viˉ awˬ nyi yaˇ miˇ hpawnˬ daꞈ kuiˬ lo laˬ htaˇ, ngaˬ hui yawˇ hui htaꞈ maˇ nyi cha ve tehꞈ shiˍ tcuh gaˇ ve yoˬ. Awˬ lawn kʼo, choˬ kaˬ lo ve chaw teˇ gʼaˇ le le yawˇ hui htaꞈ haꞈ leh yawˆ yan piˇ ve yoˬ.” Yaˬhoˉvaˬ yaˇ miˇ htaꞈ daꞈ ve te piˇ ve awˬ lawn ngaˬ hui teˇ gʼaˇ le le coˇ caˇ leh henˇ yuˬ sheˍ. Chi ve lehˬ ngaˬ hui yawˇ hui htaꞈ haꞈ leh hkʼaˬ htaˆ kaꞈ yawˆ yan piˇ ve yoˬ.—Roˉmaꞈ 12:10.