Amakwawu akulila muyisemwa mwekala amayala amavulu amonaña ambanda nawu alema wanyi. Chakutalilahu, manakwetu Hans, nkoñi wañinza kuBolivia, wahosheli nindi: “Amayala amakwawu akulila muyisemwa mwalemeshañawu nankashi antu awamayala. Chumichi chakojejaña amayala kudimona nawu alema kubadika ambanda.” Manakwetu Shengxian, mukulumpi kuTaiwan, wahosheli nindi: “Kunashakamaña, amayala amavulu atoñojokaña nawu ambanda hiyatela kudiñija munsañu jawuku. Neyi kwikala iyala wukuleja akwawu yitoñojoka yinaletiyi muntu wamumbanda, akwawu amayala akumudiwula.” Amayala amakwawu amwekeshaña nawu alemesha ambanda wanyi munjila jamboka-mboka. Chakutalilahu, anateli kuhosha mazu akusehesha munjila yikumwekesha nawu alemesha wanyi ambanda.

Kafwampi, muntu wejima weyala nateli kuhimpa hichikweti muloña nachisemwa mwakulilayiku. Nateli kuleka kwikala nayitoñojoka yakumona nindi amayala alema kubadika ambanda. (Efwe. 4:​22-24) Chuma chinateli kumukwasha hikumwimbujola Yehova. Muchinu chibaaba tukuhanjeka hadi Yehova chayimonañayi ambanda, amanakwetu chinateli kumonawu ambanda neyi chayimonañayi Yehova, kushilahu niakulumpi chinateliwu kutachikilahu kumwekeshela ahela kalemesha.

YEHOVA WAYIMONAÑA ÑAHI AMBANDA?

Yehova watwimikila chakutalilahu chachiwahi kutalisha hachitwatela kumonaña ambanda. Chineli hiTata wukweti wushona, wakeña anyanindi ejima. (Yow. 3:16) Nawa ahela ashinshika wayimonaña nindi hiyanyanindi awambanda alema. Talenu njila jinalondelihu mwalemeshelañayi Yehova ambanda.

Hayimwekeshelaña chaambuku. Yehova waleñeli amayala niambanda muchifwanisha chindi. (Kutach. 1:27) Hayinkeli amayala maana nankashi hela chawaana chakwiluka yuma yayivulu  kubadika ambandaku; nawa hakeña amayala kubadika ambandaku. (2 Kushi. 19:7) Wayileñeli ambanda niamayala nawuswa wowumu wakutiyishisha chalala chamuBayibolu nikumwekesha yilwilu yindi yayiwahi. Yehova wamonaña cheñi chikuhwelelu chawamayala niambanda nindi chesekana, chili akweti kuchiñeja kwakushakama muparadisa hanu hamaseki hela kwikala anyanta niatupristu mwiwulu. (2 Pet. 1:​1, tth.) Mwamweni, Yehova hayimwekeshelaña ambanda chaambuku.

Wayitiyililaña. Yehova wakamenaña chatiyañawu ambanda nikukala kukwetiwu. Chakutalilahu, watiyilili nikwakula kulomba kwaRacheli niHana. (Kutach. 30:22; 1 Sam. 1:​10, 11, 19, 20) Yehova cheñi woneneni ansoneki aBayibolu kusoneka nsañu yahosheleña hadi amayala atiyilileña ambanda. Chakutalilahu, Abarahama wovwahilili mwamulejeliwu kudi Yehova nawu amutiyilili ñodindi, Sara. (Kutach. 21:​12-14) Mwanta Davidi wamutiyilili Abigayili. Kafwampi, watoñojokeli nindi Yehova diyi wunamutemeshi kulonda ahanjeki nindi. (1 Sam. 25:​32-35) Yesu, wamwekeshaña chikupu yilwilu yaTata yindi, wamutiyilileña mama yindi, Mariya. (Yow. 2:​3-10) Yakutalilahu yejima yinakumwekesha nawu njila yimu mwamwekeshelañayi Yehova nindi wayakamenaña ambanda, hikuyitiyilila.

Wayikuhwelela. Chakutalilahu, Yehova wamwinkeli Eva mudimu wukukwasha kuhemba iseki dejima. (Kutach. 1:28) Cheliliyi mwenimu, Yehova hamwekesheli nindi Eva wadiña wakehelamu kudi nfumwindi Adamaku, ilaña nindi wamuteleleli. Yehova wenkeli atuprofwetu awambanda aDebora naHulida mudimu wakukwasha antu jindi, kushilahu nsompeshi nimwanta. (Anso. 4:​4-9; 2 Anya. 22:​14-20) Makonu, Yehova wayinka ambanda akaKristu mudimu windi wazatañawu. Awa ahela ashinshika azataña mudimu wakushimwina, wupayiniya niwumishonali. Akwashaña mumudimu wakutuña nikuwahisha Matala aWanta nitusanji twamutayi. Amakwawu azatilaña haBeteli, nawa amakwawu hatusanji twakubalumwina. Awa ahela adi neyi izaza deneni dazatishañayi Yehova kushikija nkeñelu yindi. (Mas. 68:11) Mwamweni, Yehova hamonaña ambanda nindi adana ñovu hela nindi hiyashikilamuku.

AMANAKWETU ANATELI KUTACHIKA ÑAHI KUMONA AMBANDA NEYI CHAYIMONAÑAYI YEHOVA?

Amanakwetu, hakwila twiluki neyi chakwila twayimonaña ahela akaKristu neyi chayimonañayi Yehova, twatela kudishinshika etu aweni muyitoñojoka nimuyilwilu. Hakwila twili mwenimu, tunakukeñeka wukwashu. Neyi chochamwekeshaña ikina daX-ray yikatu yidi mumuchima wamuntu, ibwambu wamuwahi niIzu daNzambi jinateli kutukwasha kwiluka neyi twamonaña ambanda munjila yayiwahi hela nehi. Chumanyi chitwatela kwila hakwila tutambwili iwu wukwashu?

Ihulenu ibwambu wamuwahi. (Yish. 18:17) Tukwila chiwahi neyi tukwihula ibwambu detu itwakuhwelela elukawu kudi antu nawu wekala naluwi nawa watoñojokaña mwamaana malwihu adi neyi: “Wunakutoñojoka neyi nayimonaña ñahi ahela? Komana atoñojokaña nawu nayilemesha? Kudihu yuma yinatela kwila hakwila nimwekesheña nami nayilemesha?” Neyi mukwenu nayileji yuma yimunateli kuhimpa, tondolwelenu kudihakwilaku enu aweni. Ilaña, fwilenuña chikupu kuhimpa.

Dizenuña Izu daNzambi. Njila yayiwahi mutunateli kwilukila chitwamonaña ahela, hikushinshika yilwilu yetu nichitwelaña kuzatisha chejeji Chezu daNzambi. (Heb. 4:12) Neyi tunakudiza Bayibolu, tukudiza hadi amayala amweneña ambanda munjila yayiwahi niamweneña ambanda munjila yatama. Kuhiñahu, tunateli kwesekeja yuma yelileñawu nayuma yitwelaña. Kubombelahu, kwesekeja nsañu yidi muvasi yimu yamuBayibolu namavasi amakwawu kunateli kutukwasha kubula kuzatisha nsona chatama nakuhakwilaku yitoñojoka yetu yaluwa kutalisha hachitwamonaña ambanda. Chakutalilahu, kwesekeja na 1 Petulu 3:​7, mumbanda atela kumwinka kalemesha “neyi chuma chabula kukola.” b Komana chumichi chinatalishi mukwila nawu wakehelamu, dikwila nawu wudi namaana antesha hela washikilamu wanyi  neyi chekala iyala? Inehi! Esekejenu mazu aPetulu namazu awanikaña haAÑalija 3:​26-29, amwekeshaña nawu Yehova watonda ambanda kushilahu niamayala kulonda akayuulili hamu naYesu mwiwulu. Neyi tudiza Izu daNzambi nawa twihula ibwambu detu wamuwahi nawu atuleji chitwamonaña ambanda, tukwiluka chitwatela kulemesha chiwahi ahela jetu.

AKULUMPI AMWEKESHAÑA ÑAHI NAWU AYILEMESHA AHELA?

Amanakwetu muchipompelu anateli kudiza chakulemesha ahela kuhitila mukwimbujola akulumpi akweti kukeña. Akulumpi atachikilañahu ñahi kumwekesha nawu alemesha ahela? Tuhanjekenu hayuma yimu yelañawu.

Ayihamekaña ahela. Kapostolu Pawulu welili chuma chachiwahi chatela kwimbujolawu akulumpi. Wayihamekeli ahela amavulu hatooka mumukanda wasonekeleliyi chipompelu chamuRoma. (Rom. 16:12) Munakutoñojoka nenu ana ahela atiyili ñahi chatiyiliwu mukanda wasonekeliwu kudi Pawulu anakuwutaña muchipompelu? Munjila yoyimu, akulumpi ayihamekaña ahela chakufuma hamuchima hayilwilu yawu yayiwahi nihanyidimu yamukalakelañawu Yehova. Chumichi chaleteshaña ahela kwiluka nawu ayilemesha chikupu nawa ayisakililaña. Mazu akukolesha ahoshañawu akulumpi ayikwashaña ahela kutwalekahu kumukalakela Yehova nakashinshi.—Yish. 15:23.

Neyi anakuyihameka ahela, akulumpi ahoshaña munjila yamwekeshaña nawu anakuhosha chakufuma hamuchima nawa ayilejaña chinaleteshi ayihameki. Muloñadi? Muhela wejina daJessica wahosheli nindi: “Chatiyakanaña chiwahi neyi amanakwetu amuleja muhela nawu ‘wunakuzata chachiwahi nankashi.’ Ilaña twaswejaña kusakilila neyi amanakwetu atuhameka hayuma yituneli, chidi neyi kudizisha anyanetu kumwena hampinji yitunakupompa, hela kwinza nakadizi waBayibolu kukupompa.” Neyi akulumpi ayihameka ahela  hayuma yineliwu, aleteshaña ahela kwiluka nawu ayikeña nawa ayilemesha muchipompelu.

Ayitiyililaña ahela. Akulumpi adizoza eluka nawu hidiwu hohu eluka yuma yejimaku. Awa akulumpi ayitambikaña ahela kulonda atiyi chinakutoñojokawu nawa ayitiyililaña nakanañachima hampinji yinakuhoshawu. Kwila mwenimu, kukuyikwasha akulumpi kukolesha ahela nawa kukuyikwasha awenawu kuhetelamu. Munjilanyi? Mukulumpi wejina daGerardo, wazatilaña haBeteli, wahosheli nindi: “Nenzi nakwiluka nami neyi nihula ahela kulonda anleji chinakutoñojokawu, chankwashaña kuzata chiwahi mudimu wunukweti. Kakavulu, mukuwana nawu anazati owu mudimu hadi yaaka yayivulu kubadika amanakwetu amavulu.” Muchipompelu, ahela amavulu hiyapayiniya, dichi eluka yuma yayivulu hadi antu ashakamaña mwiluña dawu. Mukulumpi wejina daBryan wahosheli nindi: “Kudi nyidimu yayivulu yazatañawu ahela mukuloñesha. Dichi dizilenuku yuma yayivulu kuyuma yelukawu!”

Akulumpi akweti maana hiyashikenaña kudiwula yitoñojoka yawahelaku. Muloñadi? Mukulumpi wejina daEdward wahosheli nindi: “Yitoñojoka yamuhela niyuma yelukayi yinateli kukwasha manakwetu kwiluka yuma yejima hanoyu nsañu nawa yinateli kumukwasha kwikala nawushona.” (Yish. 1:5) Hela chakwila mukulumpi hanateli kuzatisha yuma yinamulejiwu kudi muhelaku, watela kumusakilila hayitoñojoka yindi nihakumuleja yuma yelukayi.

Ayidizishaña ahela. Akulumpi akweti maana akeñaña njila yakuyidizishilamu ahela. Chakutalilahu, adizishaña ahela chakulombola kubulakana kwakuya mwiha neyi chakwila manakwetu wapapatishewa hosiyi. Anateli kuyidizisha chakuzatisha yozelu hela makina kulonda akwashaneña mumudimu wamukuloñesha wakuwahisha niwakutuña. HaBeteli, akulumpi adizishaña ahela chakuzata nyidimu yamboka-mboka, muniyi nyidimu munabombeli kuwahisha, kulanda, kutala kumali, maprogiramu ahakompiyuta ninyidimu yikwawu. Neyi akulumpi ayidizisha ahela, amwekeshaña nawu amonaña ahela nawu anateli kuzata nyidimu nawa ayikuhwelela.

Ahela amavulu azatishaña yuma yayidizishiliwu kudi akulumpi kukwasha akwawu. Chakutalilahu, ahela amakwawu azatishaña yuma yadiziliwu mumudimu wakutuña kukwasha akwawu kutuñulula matalawu neyi kunamwekani wubanji wadimwekenaña. Ahela amakwawu azatishaña yuma yayidizishiliwu hachakushimwina kumaluña kwawanikaña antu amavulu kulonda akwashi ahela amavulu chakushimwina. Ahela atiyaña ñahi hadi akulumpi ayidizishili nyidimu? Muhela wejina daJennifer wahosheli nindi: “Hampinji yinazatileñaku mudimu wakutuña Itala daWanta dimu, mukulumpi wumu wawanineña mpinji yakundizisha. Wamweni chinazatileña nawa wanhamekeli. Nakeñeli nankashi kuzata nindi muloña natiyileña nami wanlemesha nawa wankuhwelela.”

YUMA YAYIWAHI YAFUMAÑAMU NEYI TUMONAÑA AHELA NEYI CHISAKA CHETU

Ahela ashinshika twayikeña neyi chayikeñayi Yehova! Dichi twayimonaña neyi chisaka chetu. (1 Tim. 5:​1, 2) Twayilemesha nawa twazañalalaña kukalakela hamu nawu. Nawa twatiyaña kuwaha nankashi neyi eluka nawu twayikeña nawa twayikwashaña. Muhela wejina daVanessa wahosheli: “Namusakililaña nankashi Yehova hakwikala mukuloñesha kwindi, mwenzala amanakwetu ankoleshaña.” Muhela wumu wakuTaiwan wahosheli nindi: “Namusakililaña chikupu Yehova nikuloñesha kwindi hakutulemesha nankashi etu ambanda nikulemesha chitwatiyaña. Chumichi chakoleshaña chikuhwelelu chami, nawa chanleteshaña niswejeña kusakilila hakukooleka kunikweti kwakwikala mukuloñesha kwaYehova.”

Yehova wazañalalaña nankashi neyi amona amayala ashinshika anakuzata nañovu kumona ambanda nikuyilemesha neyi chelañayi yena! (Yish. 27:11) Manakwetu Benjamin, mukulumpi kuScotland, wahosheli nindi: “Amayala amavulu makonu mukaayi hiyalemeshaña ambanda hela hantiku. Dichi neyi ambanda eñila Mwitala daWanta, atela kumona chikupu nawu twayilemesha nawa twayikeña.” Wejima wetu tuzateña hakumina ñovu jetu kumwimbujola Yehova kuhitila mukuyimwekeshela ahela jetu kukeña nikalemesha kayitelela.—Rom. 12:10.