Ateʼ junjun xinaq moqa ichan o che jaw chʼiy kyoj tnam jatumel mintiʼ in nok qʼoʼn kyoklen xuʼj moqa qyaʼ. Jun techel, tqʼama Hans jlu, jun superintendente te circuito te Bolivia: «Ateʼ junjun xinaq o che jaw chʼiy kyoj tnam jatumel machista qe ex in kubʼ kyximen qa at mas kyoklen kywitz qe xuʼj». b Tqʼama Shengxian jlu, jun ansyan te Taiwán: «In kubʼ kyximen nim xinaq jatumel in chin anqʼine qa mintiʼ kyoklen xuʼj tiʼjju in bʼant kyuʼn. Ex qa ma txi tqʼamaʼn jun xinaq aju in kubʼ t-ximen jun xuʼj, puede que ya mlay tzʼok qʼoʼn toklen kyuʼn txqantl». Ax ikx, ateʼ xinaq in kubʼ kyyekʼin nya bʼaʼn kymod kyukʼil xuʼj aj t-xi kyqʼamaʼn yaqbʼil moqa chiste kyiʼj.

Jaku chʼexpaj tmod jun xinaq o jaw chʼiy kyxol xjal mintiʼ in nok kyqʼoʼn kyoklen xuʼj (Efes. 4:​22-24). Jaku bʼant tuʼn aj tel tkanoʼn tbʼanel techel tiʼj Jehová. Toj xnaqʼtzbʼil lu, kʼelel qnikʼ tiʼj tzeʼn tmod Jehová in kubʼ tyekʼin kyukʼil xuʼj, tzeʼn jaku tzʼel kykanoʼn ermano tiʼj Jehová ex tzeʼn jaku kubʼ kyqʼoʼn ansyan jun tbʼanel techel.

¿TZEʼN TMOD JEHOVÁ IN KUBʼ TYEKʼIN KYUKʼIL XUʼJ?

In kubʼ tqʼoʼn Jehová jun tbʼanel techel tiʼj tzeʼn qmod tuʼn tkubʼ qyekʼin kyukʼil xuʼj. At qʼaqʼbʼil tkʼuʼj ex in nok tkʼujlaʼn kykyaqil qe toj tja (Juan 3:16). Ax ikx, in nok tqʼoʼn Jehová qe ermana kukx in che ajbʼen te ik tzeʼn tmeʼjel. Qo xnaqʼtzan kyiʼj junjun techel tiʼj tzeʼn in che ok tkʼujlaʼn ex in nok tqʼoʼn kyoklen.

 In nok tqʼoʼn junx kyoklen. Kubʼ tbʼinchaʼn Jehová qe xinaq ex qe xuʼj ik tzeʼn tilbʼilal (Gén. 1:27). Mintiʼ xi tqʼoʼn Jehová mas kynabʼil xinaq kywitz xuʼj ex mintiʼ xi tqʼoʼn mas kyojtzqibʼil tuʼn tbʼant junjun tiʼ kyuʼn. Sino kykabʼil e kubʼ tbʼinchaʼn tuʼn tel kynikʼ kyiʼj xnaqʼtzbʼil ateʼ toj Biblia ex tuʼn tel kykanoʼn qe tbʼanel tmod. Mintiʼ in nok tqʼoʼn Jehová mas kyoklen xinaq (2 Crón. 19:7). Ex in nok tqʼoʼn ax toklen qʼuqbʼil kykʼuʼj xuʼj ik tzeʼn qe xinaq. Ax ikx, o txi tqʼoʼn ambʼil kye tuʼn kyanqʼin te jumajx tzalu twitz Txʼotxʼ moqa toj kyaʼj, jatumel che kʼokel te aj kawil ex te pal (2 Ped. 1:1). Tuʼn jlu, in nel qnikʼ tiʼj qa nya chʼin kyoklen xuʼj toj twitz Jehová.

In che ok tbʼiʼn. In ximen Jehová tiʼjju in kubʼ kynaʼn xuʼj ex kyiʼj kyproblem. Jun techel, tzaj tbʼiʼn ex tzaj ttzaqʼweʼn tnaʼj Dios Raquel ex Ana (Gén. 30:22; 1 Sam. 1:​10, 11, 19, 20). Ax ikx, tzaj tqʼoʼn Jehová ambʼil tuʼn kykubʼ tzʼibʼin txʼolbʼabʼil toj Biblia kyiʼj xinaq ok kyqʼoʼn kywiʼ kyiʼj xuʼj. Jun kyxol qe jlu, in yolin tiʼj Abrahán. Xi tbʼiʼn tej ttzaj tqʼamaʼn Jehová te tuʼn tok tqʼoʼn twiʼ tiʼj Sara (Gén. 21:​12-14). Atzunte David, ok tqʼoʼn twiʼ tiʼj tyol Abigaíl ex tqʼama qa a Jehová otoq tzaj samante moqa otoq tzaj chqʼonte tuʼn tyolin tukʼil (1 Sam. 25:​32-35). Tuʼnju el tkanoʼn Jesús qe tmod Jehová, ok tbʼiʼn ttxuʼ (Juan 2:​3-10). Ik tzeʼn in tzaj kyyekʼin techel lu, in nok tqʼoʼn Jehová kyoklen xuʼj aj kyok tbʼiʼn.

In nok qeʼ tkʼuʼj kyiʼj. Jun techel, xi tqʼoʼn Jehová toklen Eva tuʼn tonin tuʼn tok xqʼuqit Txʼotxʼ (Gén. 1:28). Mintiʼ kubʼ t-ximen Jehová qa mas chʼin toklen Eva twitz Adán, sino ok te jun tbʼanel onil. Ax ikx, xi tqʼamaʼn te Débora ex Huldá tuʼn t-xi kyqʼoʼn consej kye israelita, axpe ikx te jun jwes ex te jun rey (Juec. 4:​4-9; 2 Rey. 22:​14-20). Toj ambʼil jaʼlo, ax ikx in nok qeʼ tkʼuʼj Jehová kyiʼj ermana ex in xi tqʼoʼn junjun aqʼuntl kye. In che ok te pakbʼal, te precursora ex te misionera. In che onin tuʼn kybʼaj diseñarin, tuʼn kyjaw bʼinchaʼn ex tuʼn kyok xqʼuqit Ja te Chmabʼil ex qe sucursal. Ax ikx, ateʼ junjun in che ajbʼen toj Betel moqa kyoj Oficina te Traducción. In che ok ermana lu ik tzeʼn nim kyajlal soldad ex in che onin tuʼn tbʼant aju tajbʼil Jehová (Sal. 68:11). Qʼanchaʼlxix qa at nim kyipumal xuʼj toj twitz Jehová ex qa jaku bʼant nim tiʼ kyuʼn.

¿TZEʼN JAKU KUBʼ KYYEKʼIN ERMANO AX KYMOD KYUKʼIL XUʼJ IK TZEʼN TE JEHOVÁ?

Aqeye ermano, bʼaʼn tuʼn tel qnikʼ kyiʼj qximbʼetz ex qmod tuʼntzun tok qojtzqiʼn qa ax qmod in kubʼ qyekʼin kyukʼil ermana ik tzeʼn te Jehová. Ex qaj onbʼil tuʼn t-xi qbʼinchaʼn jlu. In nonin jun máquina te rayos X tuʼn tel nikʼbʼaj tiʼj qa at jun yabʼil tiʼj qanmi. Ax ikx, in nonin jun tbʼanel qamiw ex Tyol Dios tuʼn tel qnikʼ tiʼj qa nya toj tumel qximbʼetz at kyiʼj xuʼj. ¿Tiʼtzun jaku bʼant quʼn?

Qqaninx onbʼil te jun tbʼanel qamiw (Prov. 18:17). Jaku qo yolin tukʼil jun qamiw qʼuqli qkʼuʼj tiʼj, toj tumel t-ximbʼetz ex at tbʼanel tmod. Jaku txi qqanin jlu te: «Ik tzeʼn in nok tqʼoʼn twitza tiʼj, ¿tzeʼn nmode in kubʼ nyekʼine kyukʼil ermana? ¿In kubʼpe kynaʼn qa in che ok nrespetarine? ¿Atpe jun tiʼ jaku txi nbʼinchaʼne mas toj tbʼanel?». Qa ma tzaj tqʼoʼn junjun consej qe, miʼn tzaj qqʼoj tuʼn. Sino qbʼinchanku qe chʼixpubʼil.

Qo xnaqʼtzan tiʼj Tyol Dios. Tuʼn tel qnikʼ tiʼj qa toj tumel qmod in kubʼ qyekʼin kyukʼil ermana, jaku tzʼok qmojbʼan qximbʼetz ex qbʼinchbʼen tukʼilju in tzaj qʼamaʼn toj Biblia (Heb. 4:12). Ex aj qxnaqʼtzan tiʼj, kʼokel qojtzqiʼn qe xinaq kubʼ kyyekʼin tbʼanel kymod kyukʼil xuʼj ex junjuntl mintiʼ bʼant kyuʼn. Yajxitl, jaku tzʼok qmojbʼaʼn qmod tukʼil kymod. Ax ikx, nya oʼkx tuʼn tel qnikʼ tiʼj jun versículo, sino bʼaʼn tuʼn qxnaqʼtzan kyiʼj nim texto tuʼn tel qnikʼ tiʼj t-ximbʼetz Jehová at kyiʼj xuʼj. Qa ma bʼant jlu quʼn, mlay tzʼajbʼen jun texto quʼn noq tuʼn tten qximbʼetz nya toj tumel kyiʼj xuʼj. Jun techel, in tzaj tqʼamaʼn 1 Pedro 3:7 qa il tiʼj tuʼn tok qqʼoʼn kyoklen xuʼj tuʼnju «chʼin kye xuʼj kykʼuʼj». c ¿Ape t-xilen jlu qa nya list qe xuʼj ex  qa mlay txi kybʼinchaʼn junjun tiʼ ik tzeʼn kye xinaq? Miʼn. Tuʼn miʼn tten qximbʼetz nya toj tumel tiʼjju tqʼama Pedro, qo ximen tiʼjju in tzaj qʼamaʼn toj Gálatas 3:26 a 29. Toj texto lu, in tzaj qʼamaʼn qa o jaw tskʼoʼn Jehová qe xuʼj ex xinaq tuʼn kykawin junx tukʼil Jesús toj kyaʼj. Qa ma qo xnaqʼtzan tiʼj Biblia ex qa ma txi qqanin consej te jun qamiw, kʼokel qqʼoʼn kyoklen ermana toj tumel.

¿TZEʼN IN KUBʼ KYYEKʼIN ANSYAN QA IN NOK KYQʼOʼN KYOKLEN ERMANA?

Ax ikx jaku tzʼel kynikʼ ermano tiʼj tzeʼn jaku che respetarin kye ermana aj tok kyqʼoʼn kywitz tiʼjju in bʼant kyuʼn ansyan. ¿Tzeʼn jaku kubʼ kyqʼoʼn ansyan jun tbʼanel techel? Qo xnaqʼtzan tiʼj tzeʼn in kubʼ kyyekʼin.

In chex kyfelicitarin. Kubʼ tqʼoʼn apóstol Pablo jun tbʼanel techel kye ansyan. Xi tqʼamaʼn tbʼanel yol kye ermana toj carta xi ttzʼibʼin te congregación te Roma (Rom. 16:12). Kubʼlo kynaʼn ermana nim tzalajbʼil tej tjaw uʼjit carta lu toj congregación. Ax ikx kye ansyan, in xi kyfelicitarin qe ermana tuʼnju in kubʼ kyyekʼin tbʼanel kymod ex tiʼj kyajbʼebʼil te Jehová. Tuʼn jlu, in kubʼ kynaʼn qa in che ok respetarin ex qa in nok qʼoʼn kyoklen. Qa ma txi kyqʼuqbʼaʼn ansyan kykʼuʼj ermana, bʼalo aʼye yol lu kyaj tuʼn tok kybʼiʼn tuʼntzun kukx kyajbʼen te Jehová (Prov. 15:23).

Tbʼanel qa ma txi kyfelicitarin ansyan qe ermana tuʼn tkyaqil kyanmi ex tiʼj jun tiʼ otoq bʼant kyuʼn. ¿Tiquʼn? Qkeʼyink tiʼ tqʼama Jessica: «Tbʼanel in nela toj qwitze aj ttzaj qʼamaʼn qeye ‹Tbʼanel taqʼuna›. Pero mas in tzaj qʼuqbʼaʼn qkʼuʼje aj qtzaj felicitarine tiʼj jun tiʼ otoq bʼant quʼne, ik tzeʼn aj t-xi qyekʼine kye qale tuʼn miʼn kymolestarin kyoj chmabʼil moqa tuʼnju in qoʼxe qʼilte jun xjal in xnaqʼtzan tiʼj Biblia tuʼn tpon toj chmabʼil». Qa ma txi  kyfelicitarin ansyan qe ermana tiʼj jun tiʼ otoq bʼant kyuʼn, in kubʼ kynaʼn qa at kyajbʼen toj congregación ex qa in nok qʼoʼn kyoklen.

In che ok kybʼiʼn. Qa in kubʼ kyin kyibʼ ansyan, in nel kynikʼ tiʼj qa nya oʼkx kye at tbʼanel kyximbʼetz. Tuʼntzunju, in xi kyqanin junjun nabʼil kye ermana ex in che ok kybʼiʼn. Aj tbʼant jlu kyuʼn, in bʼaj kyonin kyibʼ kyxol tuʼnju in xi kyqʼuqbʼaʼn kykʼuʼj ermana. Yajtzun kye ansyan, ¿tzeʼn in nonin kyiʼj? In tzaj tqʼamaʼn Gerardo jlu, jun ansyan in najbʼen toj Betel: «O tzʼok nkeʼyine qa mas tbʼanel in xi nbʼinchaʼne waqʼune aj ttzaj kyqʼoʼn ermana junjun nabʼil. Ex chʼixmi tkyaqil maj, otoq tzikʼ mas ambʼil in xi kybʼinchaʼn ermana jun aqʼuntl ik tzeʼn kye ermano». Ateʼ nim ermana in che ajbʼen te precursora toj congregación ex ojtzqiʼnxix tembʼil te pakbʼabʼil kyuʼn. In tzaj tqʼamaʼn jun ansyan Bryan tbʼi jlu: «At nim aqʼuntl jaku bʼant kyuʼn ermana toj ttnam Jehová. ¡Qkanoʼmil kyiʼj!».

In nok kyqʼoʼn ansyan kyoklen nabʼil in xi kyqʼamaʼn ermana. ¿Tiquʼn tbʼanel tuʼn tbʼant jlu kyuʼn? In tzaj tqʼamaʼn jun ansyan Edward tbʼi jlu: «Jaku tzʼonin t-experiencia jun ermana tiʼj jun ermano tuʼn telxix tnikʼ kyiʼj qe tqanil tiʼj jun tiʼ ex tiʼjju in kubʼ kynaʼn txqantl» (Prov. 1:5). Qatzun mintiʼ sajbʼen jun nabʼil otoq tqʼama jun ermana, in xi kyqʼoʼn ansyan chjonte te ex tiʼjju ok tqʼoʼn twitz tiʼj.

In xi kyqʼoʼn xnaqʼtzbʼil kye. In kubʼ kyyekʼin ansyan qa at kynabʼil aj tok tilil kyuʼn tuʼn t-xi kyqʼoʼn xnaqʼtzbʼil kye ermana. Jaku txi kyyekʼin kye tzeʼn jaku tzʼok chmabʼil te pakbʼabʼil kyuʼn qa mintiʼ jun ermano bautisado. Ax ikx, jaku txi kyyekʼin kye tzeʼn jaku che ajbʼen junjun herramienta ex máquina kyuʼn tuʼntzun kyonin tiʼj construcción ex mantenimiento. Atzun toj Betel, o txi kyqʼoʼn erman xnaqʼtzbʼil kye ermana tiʼjju tuʼn kytzaj laqʼet junjun tiʼchaq, tiʼj mantenimiento, tiʼj contabilidad ex programación. Aj t-xi kyqʼoʼn ansyan xnaqʼtzbʼil kye ermana, in kubʼ kyyekʼin qa in nok qeʼ kykʼuʼj kyiʼj ex tiʼjju in bʼant kyuʼn.

In najbʼen kyuʼn ermana tkyaqilju o txi xnaqʼtzaʼn kye kyuʼn ansyan tuʼn kyonin kyiʼj txqantl. Ateʼ junjun tzaj qʼoʼn xnaqʼtzbʼil kye toj construcción ex jaʼlo in che onin tuʼn kybʼaj bʼinchaʼn chʼintl ja otoq che naj kyuʼn xitbʼil. Atzun junjuntl, in che ajbʼen consej tzaj qʼoʼn kye tuʼn kypakbʼan jatumel ateʼ nim xjal ex in najbʼen kyuʼn tuʼn t-xi kyxnaqʼtzaʼn mas ermana tuʼn tbʼant jlu kyuʼn. ¿Tiʼtzun kyximbʼetz ermana kyiʼj ansyan xi qʼonte xnaqʼtzbʼil kye? In tzaj tqʼamaʼn Jennifer jlu: «Tej tjaw bʼinchet jun Ja te Chmabʼil, el tpaʼn jun kyxol qeju qʼil twitz aqʼuntl ambʼil tuʼn ttzaj tqʼoʼn xnaqʼtzbʼil weye. Ok tqʼoʼn ermano kwent tiʼjju bʼant wuʼne ex tzaj tfelicitarin qine. Ngane tuʼn waqʼunane tukʼil tuʼnju ok qeʼ tkʼuʼj wiʼje ex ok tqʼoʼn woklene».

QE KʼIWLABʼIL TUʼNJU IN CHE OK QQʼOʼN ERMANA IK TZEʼN QFAMILIA

Kʼujlaʼn qe ermana quʼn ik tzeʼn te Jehová ex in che ok qqʼoʼn ik tzeʼn qe toj qja (1 Tim. 5:​1, 2). Jun tbʼanel oklenj tuʼnju junx in qo ajbʼen te Jehová kyukʼil. Ex nim in qo tzalaj tuʼnju in chex onit ermana ex tuʼnju in kubʼ kynaʼn qa kʼujlaʼn qe. Tqʼama Vanessa jlu: «In xi nqʼoʼne chjonte te Jehová tuʼnju atine toj ttnam, jatumel in kubʼ kyyekʼin ermano tbʼanel kymod wukʼile». Tqʼama jun ermana te Taiwán jlu: «In xi nqʼoʼne nim chjonte te Jehová ex te ttnam tuʼnju in nok tqʼoʼn qoklene ex aju in kubʼ qnaʼne. In chʼiy qʼuqbʼil nkʼuʼje tuʼn jlu ex in chin tzalaje tuʼnju atine toj ttnam Jehová».

Ax ikx, nim in tzalaj Jehová kyiʼj ermano in nok tilil kyuʼn tuʼn tok kyqʼoʼn kyoklen ermana ik tzeʼn te (Prov. 27:11). Tqʼama Benjamin jlu, jun ansyan te Escocia: «Mintiʼ in nok kyqʼoʼn xjal kyoklen xuʼj toj ambʼil jaʼlo. Tuʼntzunju, qaj tuʼn tkubʼ kynaʼn xuʼj tbʼanel aj kypon toj Ja te Chmabʼil». Tzʼok tilil quʼn tuʼn tel qkanoʼn tiʼj Jehová. Qkʼujlam qe ermana ex qo respetarin kye (Rom. 12:10).