Yamwi yakulila uku ncende kuno yakalola ukuti anaci yatacindama. Wakwe, umwina Hans, umwangalizi wa ciputulwa uku Bolivia walanzile ukuti, “Aonsi aingi yakulila uku ncende kuno yakakomelezya aonsi ukuya ni cilumba na cii calenga yalola ukuti yacindama ukucila anaci.” Umwina Shengxian, eluda ku Taiwan, walanzile ukuti “Kuno nkaikala aonsi aingi yakalola ukuti anaci yatanga yayapandeko mano. Ndi cakuti umonsi wanena auze pali vino umwanaci watamunena ala yamamuseka.” Aonsi yamwi nayo yakalanga kapatulula umu nzila zyuze. Wakwe insita zimwi yakalanda amazwi aipe lino yakulanda pa anaci.

Nomba asi mulandu na kuno twakuliile tungasenuka. Tungata ukwelenganya ukuti aonsi yacindama ukucila anaci. (Efes. 4:​22-24.) Cii cingacitika ndi cakuti umuntu akukolanya vino Yeova waya. Umu cipande cii tumasambilila vino Yeova akacindika anaci na vino aina yangasambililako nupya tumasambilila na pali vino ya eluda yalinzile ukulanga umucinzi kuli ya nkazi.

UZYE YEOVA AKALOLA ULI ANACI?

Yeova watulangilila ningo vino akalola anaci. Waya aisi uwaya nu kutemwa uku yana yakwe. (Yoa. 3:16) Nupya ya nkazi aya nu utailo yacindama sana kuli Yeova. Lolini ivintu vimwi ivyalondelelapo ivikalangilila ukuti Yeova wacindika anaci.

Ataya na kapatulula uku anaci. Yeova waumvile umonsi nu mwanaci umu cata cakwe. (Utan. 1:27) Atapeela aonsi amano nanti ivya upe ivingi ukucila anaci nupya atatemwa aonsi ukucila anaci. (2 Mila. 19:7) Wapanzile umonsi nu mwanaci na mano aliyamwi aakulondesya ukumanya icumi alino nu kulondesya ukukolanya imiyele yakwe. Yeova akataizya aonsi na anaci aamutaila asi  mulandu yakapaalila ukwikala pano nsi nanti ukuya aene nupya ya simapepo ukwi yulu. (2 Pet. 1:1) Ukwaula nu kutwisika, Yeova asilola anaci ukuti asile sile.

Akakutika kuli aliyo. Yeova wika mano kuli vino anaci yakayuvwa alino nu ku ntazi zino yakakwata. Wakwe, wakutiike nu kwasuka amapepo yakwe Lakeli na Hana. (Utan. 30:22; 1 Sam. 1:​10, 11, 19, 20) Nupya Yeova walenzile ya kalemba yakwe Baibo ukulemba pa onsi aakutikanga uku anaci. Wakwe, Abulahamu walondiile vino Yeova wamunenyile ukukutika uku muci wakwe, Sala. (Utan. 21:​12-14) Umwene Devedi wakutiike kuli Abigelo. Alino, Devedi waweni ukuti Yeova u watumile Abigelo ukuya landa nawe. (1 Sam. 25:​32-35) Yesu uwali umumalilike nupya uwakolanyanga sana imiyele yakwe Isi, wakutike kuli nyina, Maliya. (Yoa. 2:​3-10) Vino twalandapo vikulangilila ukuti inzila yonga ino Yeova akalangilamo ukuti wacindika anaci u kukutika kuli aliyo.

Wayataila. Wakwe, Yeova wataile Eva ukuti wali nu kulaazwilizyako ukusakamala insi. (Utan. 1:28) Vino wacisile vyalangilile ukuti Eva wali kaazwa umucindame kuli Adamu, ataali umusuulwe. Yeova wataile ya kasesema anaci, Debola na Hulida, ukuti yali nu kulapanda amano antu yakwe ukwikako sile na kapingula nu mwene. (Yakapi. 4:​4-9; 2 Yamw. 22:​14-20) Na ndakai kwene Yeova wataila anaci Aina Klistu ukuomba imilimo yakwe. Anaci yaa acisinka yakaomba nga ya kasimikila, ya painiya, nupya nga ya misyonali. Yakaazwilizyako ukupanga vino ivikuulwa vilaloleka, umu makuule, alino nu kuzifya ama Ng’anda ya Wene na maofesi ya musambo. Yamwi yakaombela pa Betele, yamwi nayo yakaombela pa maofesi yakwe ya kasenula. Ya nkazi yaa yaya wi umba ilikalamba ilikacita ukulonda kwakwe Leza. (Masa. 68:11) Yeova asilola anaci ukuti yatonta nu kuti yatanga yaombe imilimo ii.

I VYANI VINO AINA YANGASAMBILILA KULI VINO YEOVA AKALOLA ANACI?

Mwe ina, mwaiceeceta ndi cakuti mukalola anaci Aina Klistu wakwe vino Yeova akayalola. Tukalondekwa uwazwilizyo pakuti tucite vivyo. Wakwe viivi kwene vino dokota akaomvya masyini pa kulola ndi cakuti umwenzo wa muntu uli ningo nanti foo, ali vino na ya cuza asuma ni Izwi Lyakwe Leza vikatwazwa ukumanya ndi cakuti tukalola ya nkazi wakwe vino Yeova akayalola. I vyani vino tungacita pakuti ivintu vii vitwazwe?

Mwauzya ya cuza asuma. (Mapi. 18:17) Tunguzyako cuza wino twataila, uwaya ni cikuuku nupya aakapingula ningo pa vintu, amauzyo wakwe yaa: “Uzye vino nkacita vikalangilila ukuti nkalola uli ya nkazi? Uzye yangalanda ukuti nayacindika? Uzye kuliko mumwi muno nkulondekwa ukuzifya?” Ndi cakuti cuza winu walanda ukuti kuli mumwi muno mukulondekwa ukuzifya, mutalinzile ukuipokolola. Lelo mwaitemelwa ukusenuka.

Mwaisambilizya Izwi Lyakwe Leza. Ndi cakuti tukulonda ukumanya vino tukalola ya nkazi tulinzile ukuceeceta imiyele itu alino na vino tukacita ukuomvya Baibo. (Aeb. 4:12) Lino tukubelenga Baibo tukabelenga pa yonsi acindike anaci na aatayacindike. Lyene tungakolanya vino yacitanga kuli vino tukacita. Ukulunda pali cii, mwakolanya malembo ku malembo yauze pakuti mutaomvya malembo aakalanda pa anaci umu nzila iipe. Wakwe 1 Petulo 3:​7, ya iya yalinzile ukucindika aci pano yaya “wa viya ivitonte.” b Uzye cii cikupiliula ukuti umuci atacindama nanti atangaombe ivili vyonsi ukucila umonsi? Awe foo. Linganyini amazwi yakwe Petulo na mazwi akazanwa pali Galatiya 3:​26-29 aakalanda pali vino Yeova wasoolola aonsi na anaci ukuya ya kateeka yauze na Yesu ukwi iyulu. Ndi cakuti tukuisambilizya Izwi Lyakwe Leza nu kuzya ya cuza itu vino tukalola anaci, tulamanya ndi cakuti tukacindika ya nkazi nanti foo.

UZYE YA ELUDA YAKALANGA ULI UKUTI YACINDIKA YA NKAZI?

Aina umu cilongano yangasambilila ivya kulanga ukutemwa kuli ya eluda aya nu kutemwa.  Uzye ya eluda yakacita uli pakuti yacindika ya nkazi? Lolini inzila zimwi zino yakacitilamo vivyo.

Yakataizya ya nkazi. Umutumwa Paulo wacisile vimwi vino ya eluda yangakolanya. Umutumwa Paulo wataizye ya nkazi muli kalata wino walembiile icilongano icali umu Loma. (Loma 16:12) Elenganyini pali vino ya nkazi yuvwile ningo lino yabelenzile kalata wino paulo walemvile umu cilongano. Vikwene ali vino na ya eluda yakataizya ya nkazi pa milimo isuma ino yakaombela Yeova. Nupya cii cikalenga ya nkazi yalola ukuti yayacindika nupya yakayataizya. Amazwi akukomelezya ukufuma kuli ya eluda ali yano ya nkazi yakalondekwa sana pakuti yatwalilile ukuombela Yeova na ucisinka.—Mapi. 15:23.

Lino ya eluda yakutaizya ya nkazi, yakaomvya amazwi asuma nupya amukulungatika. U mulandu ci? Nkazi Jessica watiile: “Cikauvwika ningo ndi cakuti aina yakutaizya. Nomba tukakomeleziwa ndi cakuti yatutaizya umukulungatika, wakwe pali vino tukanena ana ukukanapanga icongo umu kulongana, nanti ukusenda umusambi wa Baibo umu kulongana.” Ndi cakuti ya eluda yakutaizya ya nkazi umukulungatika yakalenga ya nkazi yalola ukuti yacindama nupya yakalondekwa umu cilongano.

Yakauvwa kuli vino ya nkazi yalanda. Ya eluda aicefya yamanya ukuti asi aliyo sile amanya vyonsi. Ya eluda amusango uu yakaama ya nkazi kuti yalande vino yakwelenganya nupya yakaikako sana mano lino ya nkazi yakulanda. Cii cikalenga yakomelezya ya nkazi nu kuleka ukuti yaipakizya. Umu nzila ci? Umwina Gerardo, eluda akaombela pa Betele walanzile ukuti, “Nazana ukuti ukuzya ya nkazi pali vino nkucita kwalenga ukuti naomba ningo. Ya nkazi aingi yaomba imilimo apa myaka ingi ukucila aina.” Umu cilongano, ya nkazi aingi yakaomba upainiya fwandi yakamanya ningo antu aya umu cifulo cino yakasimikilamo. Umwina Bryan eluda watiile, “Ya nkazi yamanya  imilimo ingi sana ino yangaomba umwi iuvi. Fwandi mwasambilila kuli vino yakacita.”

Ya eluda aya na mano yasisula vino ya nkazi yalanda. U mulandu ci? Umwina Edward eluda watiile, “Vino nkazi angalanda vingazwa umwina ukuvwikisya sana vimwi nanti ukumanya vino antu yauze yakuyuvwa. (Mapi. 1:5) Nanti icakuti umwina atanga aomvye ukupanda mano kwakwe nkazi, angamutaizya pali vino atamwazwa na pa kulanga ukuti wamwikako amano.

Yakasambilizya ya nkazi imilimo. Ya eluda aakailuka yakalola inzila zino yangasambilizizyamo ya nkazi imilimo. Wakwe ukusambilizya ya nkazi ivyakutungulula ukukomana kwakuya umu mulimo ndi cakuti pasi umwina umubatiziwe. Yangayasambilizya ivya kuomvya iviombelo ivya kuomvya pa kuzifya ivikuulwa alino nu kuombela umu makuule. Pa Betele, angalizi yasambilizya ya nkazi imilimo ipusane pusane wakwe ukuzifya ivyativyononeka, kukala ivintu, ivya kuomba ni mpiya, ivya kuomba na ma kompyuta, alino ni milimo yuze. Ndi cakuti ya eluda yasambilizya ya nkazi imilimo yakalangilila ukuti yayacindika nupya yayataila .

Ya nkazi aingi yakaomvya vino ya eluda yayasambilizya uku kwazwa yauze. Wakwe, ya nkazi yamwi yakaomvya vino yasambilila umu vya makuule uku kwazwa yauze ukukuula mang’anda pa cisila ca uzanzo wa kuiponela. Ya nkazi yauze nayo yakaomvya vino yasambilile pa kusimikila ukukazanwa antu aingi uku kwazwa yauze ukumanya ivya kusimikila uku ncende zii. Uzye ya nkazi yakauvwa uli pali vino ya eluda yayasambilizye? Nkazi Jennifer walanzile ukuti: “Lino naomvileko umulimo wakukuula Ng’anda ya Wene, umwina uwangalilanga umulimo uu wansambilizye ivya kuomba. Waweni vino naombanga nupya wantaizye. Nuvwile ningo ukuombela pamwi nawe pano nayuvwile ukuti nacindama nupya natailwa.”

IVISUMA IVYAYA UMU KULOLA YA NKAZI UMU CILONGANO KWATI ALUPWA ITU

Twatemwa sana ya nkazi aya na ucisinka wakwe vino Yeova wayatemwa. Fwandi tukayalola ukuti a lupwa itu. (1 Tim. 5:​1, 2) Twatemwa ukuombela pamwi nayo nupya tukaipakizya. Nupya tukauvwa ningo ndi cakuti yakuyuvwa ukuti twayatemwa nupya tukayatungilila. Nkazi Vanessa walanzile ukuti: “Nkataizya sana Yeova pa kunjika umwi iuvi lyakwe muno mwaya aina aakankomelezya sana.” Nkazi uwa ku Taiwan walanzile ukuti: “Nkataizya sana Yeova ni iuvi lyakwe pali vino yatemwa ya nkazi nu kucindika vino tukayuvwa. Cii cikakomya utailo wane nupya cikalenga nataizya sana api syuko lino nakwata ilya kuya umwi iuvi lyakwe Yeova.”

Yeova akauvwa ningo ukulola kuno aina aya na ucisinka yakwezya na maka ukulanga ukutemwa kuli ya nkazi alino nu kuyacindika. (Mapi. 27:11) Umwina Benjamin eluda uwa ku Scotland walanzile ukuti, “Umu nsi ii aonsi aingi yasicindika anaci. Fwandi ndi cakuti ya nkazi yali pa Ng’anda ya Wene, tukalonda yayuvwa ukuti yacindikwa nupya yatemwikwa.” Fwandi lekini twaezya na maka ukukolanya Yeova lino tukulanga ukutemwa kuli ya nkazi alino nu kuyapeela umucinzi uno yalinzile ukupeelwa.—Loma 12:10.