Vamweni vakakurira kuno zvirovejeso zvokuti vanarume vanotaja vanakaji ngo njira yakaderera. Inga muezaniso, muvonereri umweni wo ndharaundha anodanijwa kuti Hans, anoshandira ku Bhorivhiya wakati: “Vanarume vamweni vakareriwa ku ndau kokuti kuno mukheto nokutizve konayo vanarume vanovangiswa kuti vajikuje maningi nokutendera kuti vanakaji vakaderera maningi kupinda ivona, ivona ndivona vakakhwirira, zvondhozvo zvinoita kuti ivona vataje vanakaji ngo njira yokutama nderemejo.” b Mukuru umweni wo ungano anogara ku Taiwani anozwi Shengxiani wakati: “Kwandinogara vanarume vanonanga kuti mwanakaji aana dikano yokunanga mavonero ake. Kudari mwanarume akambhera ngokutendera zano ro mwanakaji ari wese vanarume vangatotama kumureremeja.” Vanarume vamweni vanokhombija mukheto ku vanakaji ngo njira icizivi kujeka. Inga muezaniso, ivona vanoita gozo ngo njira yokuda kurerusa vanakaji.

Zvokadi ngozvokuti, azvinenyi no kwaakakurira mwanarume angacinja. Iyena angajija kuti vanarume no vanakaji vakafanana. Ivona vangasiya murangariro wokuti vanakaji vakaderera maningi kupinda vanarume. (Vaefeso 4:22-24) Ivona angakwanisa kuita izvi ngokutevejera muezaniso wa Jehovha. Mu cijijo ici, tinozovona kuti Jehovha anotajisa kudini vanakaji, hama jingatevejeresa kudini manera Jehovha anotaja vanakaji, cimwenizve, kuti vakuru vangatangisa kudini kukhombija nderemejo ku hambzaji.

JEHOVHA ANOTAJISA KUDINI VANAKAJI?

Jehovha wakagaja muezaniso wakakwana wokuti tingatajisa kudini vanakaji. Jehovha ndi Baba  wedu, iyena ano rudo no vashandiri vake vese. (Johani 3:16) Hambzaji jakagondeka ndi vana vanosisira maningi kuna Jehovha. Ngatende tivone manera amweni Jehovha aanotaja no kureremeja vanakaji.

Jehovha aakheti. Iyena wakaita vanarume no vanakaji ngo muezaniso wake. (Genesi 1:27) Jehovha aazivi kupa ruzivo no zvikwaniriso ku vanarume kupinda vanakaji. (2 Kronike 19:7) Jehovha wakasika mwanarume no mwanakaji no mugariro umwewo wokuzwisisa cokwadi co Bhaibheri no kutevejera mugariro jake. Jehovha anoreremeja rutendo hwo vanarume no hwo vanakaji, azvinenyi kuti vetero yavo ngo yo kurarama pasi pano kana kuti ngo yo kwenda ku matenga kuti vazove majimambo no vapiri. (2 Pedhru 1:1) Zvakajeka kuti Jehovha aana mukheto ku vanakaji.

Jehovha anopurutana vanakaji. Jehovha anoda kuzwa kuti vanakaji vari kujizwa kudini no manera avari kuneseka. Inga muezaniso, iyena wakapurutana no kudavira mukumbiro jakaizwa ndi Rakeri na Ana. (Genesi 30:22; 1 Samueli 1:10, 11, 19, 20) Jehovha wakafemera vatari vo Bhaibheri kuti vatare zviitiko zvo vanarume vakapurutana vanakaji mu nguva jokare. Inga muezaniso, Jehovha wakavhunja Abhirahama kuti apurutane zvaibhuya Sara mukaji wake. (Genesi 21:12-14) Mambo Dhavhidhi vakapurutana Abhigairi. Kunasa kunanga iyena wakazwisisa kuti wainga ari Jehovha wakamutumira kuti aviye kuzobhuya na iyena. (1 Samueli 25:32-35) Pikija Jesu uwo wainasa kutevejera mugariro ja Baba wake iyena wakapurutanavo izwi ra mai wake Mariya. (Johani 2:3-10) Muezaniso iji jinonasa kujekesa kuti Jehovha anopurutana vanakaji no kuvonesazve kuti iyena anovareremeja maningi.

Jehovha anovathemba pazvavanoita. Inga muezaniso, Jehovha waiziva kuti Evha waizokwanisa kubesera pa zvese zvaidikana. (Genesi 1:28) Kuna Jehovha Evha aacaingepi akaderera kuna Adhamu, asi wainga ari mubeseri wake. Jehovha wakakheta vaporofitakaji Dhebhora na Huridha kuti vaende kopangira vandhu vake kubatanija majimambo no vapiri. (Vatongi 4:4-9; 2 Majimambo 22:14-20) Nyamasi unovo Jehovha anothemba kuti hambzaji jinozokwanirisa basa rese rajinozogajwa. Hambzaji iji jakagondeka ijona jinoshanda inga vacumaeri, mapiyona no ma misiyonariyo. Ivona vanobeserazve pakuvaka, kunasirira-nasirira Nyumba jo Umambo no kubesera ku bheteri. Vamweni vanoshandira ku Bheteri, vamweni vanobesera pa basa ro kusanduja. Hambzaji iji, jakaezana no cikwata cikuru co masoca caanoshandisa Jehovha kuti akwanirise basa rake. (Nduyo 68:11) Zvakajeka kuti Jehovha aavoni vanakaji inga vacina simba kana kuti vacikakwanisi kuita zviri zvese.

TINGATEVEJERESA KUDINI JEHOVHA NGO MANERA ATINOTAJA VANAKAJI?

Hama, kuti tivone dangani tiri kutaja hambzaji inga manera Jehovha anovataja, tinodikana kunasa kupopora murangariro no zviito zvedu. Kuti izvi zvikwanisike imwimwi mungada besero. Inga muezaniso, Raio xixi ingabesera kuvona kuti mu mwoyo mo mundhu muno ciri cese cicizivi kugara ushoni, ngo njira yakaezana, shamwari jaushoni no Bhaibheri zvingamubesera kuvona kuti imwimwi muri kutaja vanakaji ngo njira inodakajisa Jehovha. Asi imwimwi mungaashirisa kudini besero iri?

Vhunjisanyi shamwari yenyu. (Mazwi Akangwara 18:17) Ngozvaushoni kukumbira besero ku shamwari yatinothemba inozivikana ngo kuva mundhu wakanaka mwoyo, anoitira umweni zvaushoni no wakaezanana. Tingaita zvondhozvo ngokuita muvhunjo jokuti: “Iwewe unovona kuti ndinotaja vanakaji ngo njira yapi? Ivona vanojizwa vecireremejwa ndini? Kureva kuti ndinodikana kuita zviri zvese kuti ndiitise nane pa divi iri?” Kudari shamwari yenyu ikamuvhunja kuti pano ciri cese camunodikana kuitisa nane imwimwi amudikani kujiinikira kunja kwa izvi munodikana kuita cinjo jinodikanaro.

Jijanyi Soko ra Mwari. Imwe njira yamungavona ndiyona kuti muri kutaja vanakaji ngo njira yakanaka ngo yo kushandisa Soko ra Mwari kuti muitise nane manera enyu okurangarira no okuita zviro. (Vahebheru 4:12) Patinoverenga Bahibheri, tinoverenga ngo vanarume vakataja ushoni vanakaji no vacizivi kutaja ushoni vanakaji. Soko ra Mwari rinotibesera kuti tiitise nane manera edu okurangarira no manera atinotaja vanakaji. Kusiyapo zvondhozvo. azvicaizovepi zvoungwaru kushandisa vhesi jo Bhaibheri jicikazwirani no zvinonangwaro kana kuishandisa kuitira kubesera mavonero acizivi kurungama ngo pamusoro po vanakaji. Inga muezaniso,  mukuzwirana no 1 Pedhru 3:7 inoti, majimwamuna “kujanyi vakaji inga mujiyo ucina simba.” c Kureva kuti vanakaji ndi vandhu vakaderera maningi kana vacina ruzivo inga vanarume? Zvakajeka kuti haiwa. Ezanisiranyi magama a Pedhru no zvinobhuya Bhaibheri pa bhuku ra Vagaratiya 3:26-29; vhesi iji jinonasa kujekesa kuti Jehovha wakakheta vanarume no vanakaji kuti vaende kotonga na Jesu Kristu ku matenga. Patinonga tecijija Bhaibheri tingavhunjisa shamwari yedu ngo manera atiri kutaja vanakaji. Ngokuita kudaro, tinozokwanisa kujijira kukhombija nderemejo inodikana ku hambzaji jedu.

VAKURU VANGAKHOMBIJISA KUDINI NDEREMEJO KU HAMBZAJI?

Hama jo mu ungano jingajijira kutaja hambzaji ngo njira yaushoni ngo kutevejera muezaniso wo vakuru. Vakuru vangajisa kudini muezaniso pa shwiro iyi? Ngatende tivone njira jimweni.

Ivona vanovangisa hambzaji. Mupostori Pauro wakagaja muezaniso waushoni kuti ivona vatevejere. Pa karata yaakatara kuitira ungano yo ku Roma iyena wakavangisa hambzaji jakawanda. (Varoma 16:12) Mungakwanisa kurangarira hambzaji manera ajakadara karata iyi payakaverengwa ku ungano? Ngo njira yakaezana vakuru vangavangisa hambzaji ngo mugariro javo jaushoni no basa ravanoitira Jehovha. Izvi zvinoita kuti hambzaji jijizwe jecireremejwa no kudiwa ngo ungano. Magama anovangisa o mukuru angaguma pamukuvo kwavo wokuti ijona jienderere mberi jecishandira Jehovha.—Mazwi Akangwara 15:23.

Vakuru vanodikana kupekeja vangiso yakajeka no yokadi kuno hambzaji. Ngenyi? Hambzaji imweni inodanijwa Jessika yakati: “Zvinodajisa maningi hama ikananga kudari ‘basa raushoni.’ Tinodakara maningi hama pajinotisimba ngo ciro catinongaro taita kamare, zvimweni zvakona zvakadari inga  kujijisa vana vedu kuti varambe vakagajana musongano paunonga weciithwa, kana kutisimba patinoenda kotora mujiji wo Bhaibheri kuti aviye kumusongano.” Vakuru pavanosimba hambzaji vacikasiki-siki zvinoitisa kuti hambzaji jijizwe ushoni no kuvona kuti jinosisira mu ungano.

Ivona vanopurukira hambzaji. Vakuru vanozvidodokesa vanodikana kuziva kuti andivopi basi vanokwanisa kupa mazano. Vangatokumbiravo mazano ku hambzaji no kunasa kupurukira ushoni pavanonga vecibhuya. Ngo njira iyi, vakuru vanovangisa hambzaji no kuita kuti vabesereke pacavo. Kuitisa kudini? Mukuru umweni anodanijwa Gerardhu anoshandira ku Bheteri wakati: “Inini ndakavona kuti kukumbira mazano ku hambzaji zvakandibesera kuti ndiite ushoni basa rangu. Kunasa kunanga ivona vano ruzivo maningi pa basa kupinda hama jimweni.” Mu ungano hambzaji zinji jinoshanda inga mapiyona. Ngo kudaro, ivona vanonasa kuziva ushoni vandhu vanonga vari mu ndima yavo. Mukuru umweni anodanijwa Bhraini wakati: “Hambzaji jedu jingabesera maningi sangano. Ngo kudaro, tinoda maningi kubesereka ngo mugariro javo no zvikwaniriso zvavo.”

Mukuru ano ruzivo aazorambi mazano o hambzaji. Ngenyi? Mukuru umweni anodanijwa Edhuardhu wakati: “Mazano no ruzivo hwo hambzaji angatibesera kukwanisa kuvona shwiroyo yese no kureremeja mazwiro o vamweni.” (Mazwi Akangwara 1:5) Pikija mukuru akavona kuti aadi kushandisa mazano o hambzaji angamubonga no kumuvangisa.

Ivona vanoroveja hambzaji. Mukuru ano ruzivo anoshandisa mukana jaanajo kuti aroveje hambzaji. Inga muezaniso, mukuru angaroveja hambzaji kuti ingaitisa kudini musongano wo mubasa ro kucumaera kudari apana hama yakabhabhatijwa. Ivona vangarovejazve hambzaji kuti jinase kusimira nguvo, kushandisa makina, kunasirira-nasirira no kuvaka nyumba jo sangano. Pa Bheteri mutungamiriri angaroveja hambzaji kuti jiite mabasa akasiyana-siyana akadari inga aya, kunasirira-nasirira, kutenga-tenga zviro, kuverenga mare iri kushandiswa, kushandisa komputadhori no zvimweni zvakadaro. Hama pajinoroveja hambzaji ijona jinozovona kuti hambzaji jingakwanisa kuita basa riri rese haro ravanogajwa.

Hambzaji zinji jinoshandisa rovejo yojakaashira kuti jibesere vamweni. Inga muezaniso, hambzaji jimweni jiri kushandisa rovejo yojakaashira pa basa ro kuvaka kuti jibesere hama jivakise nyumba javo panopera kuitika ngozi jinoitika jega. Hambzaji jimweni jakarovejwa pa basa rokucumaera ko pambhene jinorovejavo hambzaji jimweni kuti jiitevo zvondhozvo pa basa rokucumaera. Hambzaji jinorangarirenyi ngo pamusoro po hama jinovhisa nguva kuti jijiroveje? Hambzaji imweni inodanijwa Jenifa yakati: “Pandainga ndecishanda pa basa rokuvaka Nyumba yo Umambo mutungamiriri wakavhisa nguva kuti andiroveje. Iyena waisota basa randaiita no kundivangisa pa zvondhozvo. Inini ndaida maningi kushanda na iyena ngokuti ndakavona kuti waindithemba no kundireremeja ngo basa randaiita.”

TINOBESEREKA MANINGI NGOKUTAJA HAMBZAJI JO KU UNGANO INGA MBHURI JEDU

Itusu tinoda maningi hambzaji jedu inga Jehovha manera aanojida. Ndiyo ndava, tinodikana kuvataja inga vo pambhuri pedu. (1 Timoti 5:1, 2) Itusu tinodada maningi ngo kunamata Jehovha pamwepo na ivona. Cimwenizve, ngozvaushoni kuti ivona vajizwe vecidiwa no kungwaririhwa. Hambzaji imweni inodanijwa kuti Vhanesa yakati: “Ndinobonga maningi Jehovha ngokuita divi ro sangano rake no kuva no hama jakawanda jinondivangisa.” Hambzaji imweni yo ku Taiwani yakati: “Ndinobonga maningi Jehovha no sangano rake ngokutaja ushoni vanakaji no kuereremeja kwavanoita mazwiro edu. Zvinovangisa maningi rutendo hwangu zvinoitazve kuti ndivone kusisira kokuita divi ro sangano ra Jehovha.”

Zvakajeka kuti Jehovha anodakara maningi paanovona hama jecivangisira pakutaja vanakaji ngo njira yo ndereremejo no yo rudo. (Mazwi Akangwara 27:11) Hama imweni yo ku Skotland inodanijwa Bhejhamin yakati: “Nyika aireremeji vanakaji.” Ngo kudaro, “mwanakaji paanopinda mu Nyumba yo Umambo itusu tinoda kuti azwe kuti muno makasiyana no ndau iri yese hayo.” Tese tinodikana kuita zvese zvatinokwanisa kuti titevejere Jehovha no kutaja hambzaji jedu no rudo no nderemejo yavanofanera.—Varoma 12:10.