Sekimej tlakamej onoskaltijkej kampa xkintlakaitaj siuamej. Se tokniuj tlayekanketl ipan circuito akin itoka Hans niman chanti Bolivia kijtoua: “Sekimej onoskaltijkej kampa tlakamej melak noueyimatij, ika yejon, yejuamej kinemiliaj ika tlakamej más uejueyixtokej xijkon ken siuamej”. Shengxian, se tlayekanketl akin chanti Taiwán, kijtoua: “Kampa nichanti, miyekej tlakamej kinemiliaj ika se siuatl xnoneki nokalaktis kampa tlajtouaj tlakamej. Niman tla se tlakatl kijtoua tlen kinemilia se siuatl, hasta uelis xok kitlakaitaskej”. Oksekimej tlakamej kiteititiaj ika xkinpatiojkaitaj siuamej pampa xkuajli intech kamanalouaj.

San ika, maski tla se tlakatl ijkon okiskaltijkej, uelis nopatlas niman xok kinemilis ika yejuamej más uejueyixtokej xijkon ken siuamej (Efes. 4:​22-24). ¿Kenon uelis kichiuas yejuin? Tla kichiua ijkon ken Jehová. Ipan yejuin tlamachtijli tikitaskej kenon Jehová kimita siuamej, kenon tokniuan tlakamej uelis kintlakaitaskej siuamej ijkon ken Jehová kichiua niman kenon tlayekankej uelis kiteititiskej ika ijkin kichiuaj.

¿KENON KITEITITIA JEHOVÁ IKA KINTLAKAITA SIUAMEJ?

Jehová kuajli techititia kenon noneki tikimitaskej siuamej. ToTajtsin yeskia ken se tajtli akin melak kintlasojtla nochimej ikoneuan (Juan 3:16). Yejua kimita tokniuan siuamej kentla iichpokauan niman melak kintlasojtla pampa kitekichiuiliaj. Matikitakan seki tlen techititia ika Jehová kintlasojtla niman kintlakaita siuamej.

Jehová xkinchikoita. Yejua okinchijchiuj tlakamej niman siuamej ijkon ken yejua (Gén. 1:27). Jehová xsan tlakamej okinmakak tlamachilistli nion xokichiuj ika san tlakamej más  miyek tlemach mauelikan makichiuakan. Nochimej okinchijchiuj para mauelikan makasikamatikan Biblia niman makichiuakan tlen kuajli. Jehová xsan tlakamej kinpatiojkaita (2 Crón. 19:7). Yejua noijki kinpatiojkaita siuamej pampa noijki tlaneltokaj ijkon ken tokniuan tlakamej. Noijki nochimej yokimijli ika uelis kiseliskej nemilistli tlen xkeman tlamis nikan ipan tlaltikpaktli noso ne iluikak ken tekiuajkej niman ken teopixkej (2 Ped. 1:1). Kuajli nesi ika Jehová xkinchikoita siuamej.

Jehová kinkaki. Jehová melak kineki kimatis kenon nomachiliaj niman tlenon kixnamikij siuamej. Yejua okinkak Raquel niman Ana, niman okinnankili (Gén. 30:22; 1 Sam. 1:​10, 11, 19, 20). Noijki okijkuilo ipan iTlajtol kenon sekimej tlakamej okinkakkej siuamej. Se itech yejon tlakamej katka Abrahán, yejua okitlakamat Jehová ijkuak okijli makikaki isiuatsin, Sara (Gén. 21:​12-14). Tekiuaj David okikak Abigail niman hasta okijto ika Jehová okititlanka niman ijkon iuan matlajtoti (1 Sam. 25:​32-35). Jesús, akin kichiua ijkon ken iTaj Jehová, okikak inan, María (Juan 2:​3-10). Ijkon ken yotikonteneujkej, Jehová kiteititia ika kintlakaita siuamej ijkuak kinkaki.

Jehová intech tlaneltoka. Jehová okikauili Eva makitlajpiya tlaltikpaktli (Gén. 1:28). Yejua xkinemiliaya tla Adán más ueyixtoya, yejua okitak Eva ken yakaj akin melak tepaleuiaya. Noijki, Jehová okinkauili siuateotlajtokej Débora niman Huldá makijlikan ikalpan tlenon nonekiya kichiuas, hasta okipaleuijkej se juez niman se tekiuaj (Juec. 4:​4-9; 2 Rey. 22:​14-20). Ipan yejuin tonaltin, Jehová tlaneltoka intech tokniuan siuamej niman kinmaka tekitl. Yejuin tokniuan tenojnotsaj, sekimej nochiuaj precursoras noso misioneras. Oksekimej tepaleuiyaj manochijchiuakan niman manotlajpiyakan Kaltin kampa tosentlaliaj niman sucursales. Sekimej tlapaleuiyaj Betel noso ipan Kajli kampa Tlajtolkuepaj. Jehová kintekitiltia tokniuan siuamej niman ijkon kichiuas tlen yejua kineki (Sal. 68:11). Kuajli nesi ika Jehová xkinemilia ika siuamej xkojtikej noso ika xtepaleuijkej.

¿KENON TOKNIUAN TLAKAMEJ UELIS KINTLAKAITASKEJ SIUAMEJ IJKON KEN KICHIUA JEHOVÁ?

Nokniuan tlakamej, tla nenkinekij nenkimatiskej tla nenkintlakaitaj tokniuan siuamej ijkon ken kichiua Jehová, noneki nenkitaskej kenon nentlanemiliaj niman tlenon nenkichiuaj. Ijkon ken se máquina ueli techititia tla xtikualoj ipan toyojlo, se toamigo niman iTlajtol toTajtsin uelis techpaleuiskej matikitakan tla xkuajli titlanemiliaj intech tokniuan siuamej. ¿Kenon uelis techpaleuiskej?

Matikijlikan se toamigo matechpaleui (Prov. 18:17). Matitlajtokan iuan se toamigo noso se toamiga akin chikauak kipiya itlaneltokil. Uelis tiktlajtoltiskej yejuin: “¿Kenon nikinnotsa tokniuan siuamej? ¿Kimachiliaj ika nikintlakaita? ¿Uelis itlaj más kuajli nikchiuas?”. Tla techyektlaliaj, maka matikualanikan, yej matiknektokan topatlaskej.

Matomachtikan iTlajtol toTajtsin. Tla tiknekij tikmatiskej tla tikintlakaitaj tokniuan siuamej, noneki tikitaskej tla titlanemiliaj niman tla tikchiuaj ijkon ken kijtoua Biblia (Heb. 4:12). Ijkuak tomachtiaj Biblia, tiuelij intech tlakamej akin okintlakaitakej siuamej. San ika, noijki tiuelij intech tlakamej akin xokintlakaitakej siuamej. Noijki melak kuajli tla tikimitaj seki textos tlen sekimej xkuajli kimasikamatij, ken 1 Pedro 3:7. Ompa kijtoua ika se tlakatl noneki kitlakaitas isiuauj pampa yejuamej “más maluiltin”. a ¿Yejon kijtosneki ika se siuatl xmás tepaleui noso xmás tlamachilise? ¡Ka, xyejon kijtosneki! Tla tiknekij tikasikamatiskej tlen okijto Pedro, matontlanemilikan itech tlen kijtoua Gálatas 3:​26-29. Ompa techijlia ika Jehová yokintlapejpenij tlakamej niman siuamej para matlanauatikan iuan Jesús ne ipan cielo. Tla tomachtiaj Biblia niman tla tikijliaj se toamigo matechpaleui, tikmatiskej kenon uelis tikintlakaitaskej tokniuan siuamej ijkon ken noneki.

 ¿KENON KITEITITIAJ TLAYEKANKEJ IKA KINTLAKAITAJ TOKNIUAN SIUAMEJ?

Tokniuan tlakamej akin nemij ipan tlanechikojli uelis kintlakaitaskej tokniuan siuamej tla kitaj kenon kichiuaj tokniuan tlayekankej. ¿Niman yejuamej kenon kiteititiaj ika kintlakaitaj tokniuan siuamej? San seki matikitakan.

Kimijliaj tlen kuajli kichiuaj. Tokniuan tlayekankej miyek uelij itech apóstol Pablo, yejua miyekpa okimijli tokniuan siuamej tlen kuajli kichiuayaj. Ijkon okichiuj ipan carta tlen okijkuilo para tlanechikojli tlen onkatka Roma (Rom. 16:12). San xkonemilikan kenon melak oyolpakej tokniuan siuamej ijkuak okikakkej yejon carta. Noijki ijkon, tlayekankej nochipa kimijliaj tokniuan siuamej tlenon kualtsin kichiuaj niman kintlasojkamachiliaj pampa chikauak kitekichiuiliaj Jehová. Pampa ijkon kichiuaj, yejuamej kimachiliaj ika kintlakaitaj niman kinpatiojkaitaj. Tlen kijtoua se tlayekanketl uelis melak kipaleuis se tokniuj siuatl niman ijkon yejua ok chikauak kitekichiuilijtos Jehová (Prov. 15:23).

Ijkuak tlayekankej kimijliskej tokniuan siuamej ika kuajli tlen kichiuaj, noneki kijtoskej tlen kisa ipan inyojlo niman kimijliskej tlenon kuajli okichiujkej. ¿Tleka? Matikitakan tlen okijto Jessica, yejua kijtoua: “Akin tisiuamej tikuelitaj matechijlikan ika kuajli titekititokej, san ika, más techyolchikauaj ijkuak techijliaj tlenon kuajli otikchiujkej, ken ijkuak techijliaj ika kuajli otikinmachtijkej tokoneuan kuajli manentokan ipan totlanechikoluan noso ika kuajli pampa otikuikakej akin tikmachtiaj ipan totlanechikol”. Ijkuak tlayekankej kimijliaj tokniuan siuamej tlen kuajli okichiujkej, kichiuaj makimachilikan ika tlapaleuiyaj ipan tlanechikojli niman ika kinpatiojkaitaj.

Kuajli kinkakij. Tlayekankej akin yolyemankej kimatstokej ika kemantika tokniuan siuamej más kuajli kimatij tlen uelis nochiuas, ika yejon, kintlajtoltiaj niman kikakij tlen kijtouaj. Ijkuak ijkon  kichiuaj, san sekan nopaleuiyaj, niman yejon noijki kinyolchikaua tokniuan siuamej. Niman ¿kenon kinpaleuiya tlayekankej tla ijkin kichiuaj? Gerardo, se tlayekanketl akin tlapaleuiya Betel, kijtoua: “Nikita ika ijkuak nikintlajtoltia tokniuan siuamej tlenon kinemiliaj, melak nechpaleuiya más kuajli manikchiua notekiyo. Kemantika tokniuan siuamej más youejkaujkej kichiuaj se tekitl xijkon ken oksekimej tokniuan tlakamej”. Ipan tlanechikojli nemij miyekej tokniuan siuamej akin precursoras niman más kixmatstokej kampa notenojnotsa. Se tlayekanketl akin itoka Bryan, kijtoua: “Tokniuan siuamej melak tepaleuiyaj ipan ikalpan toTajtsin. Matiuelikan itech nochi tlen kuajli kichiuaj”.

Tlayekankej kuajli kikakij tlen kijtouaj tokniuan siuamej. ¿Tleka yejon melak tepaleui? Se tlayekanketl akin itoka Edward, kijtoua: “Tlen kijtouaj niman tlen kimatij tokniuan siuamej uelis kipaleuis se tokniuj tlakatl makasikamati nochi tlen panotika niman más mateasikamati” (Prov. 1:5). Kemantika tlayekankej xuelij kichiuaj ijkon ken okimijli se tokniuj siuatl, san ika, yejuamej kitlasojkamatij tlen tokniuj siuatl okimijli.

Kinmajmachtiaj. Tlayekankej kiteititiaj ika tlamachilisejkej ijkuak kitaj kenon kinmajmachtiskej tokniuan siuamej. Kemantika xnemi se tokniuj tlakatl akin yonoapolakti para kiyekanas tlanechikojli tlen nochiua ijkuak notenojnotsa, ika yejon, melak kuajli tla tlayekankej kinmajmachtiaj tokniuan siuamej kenon uelis kiyekanaskej yejuin tlanechikojli. Sekimej tokniuan siuamej kuelitaj tlapaleuiskej ijkuak nochijchiuaj noso ijkuak noyektlaliaj Kaltin kampa tosentlaliaj, ika yejon, melak kuajli tla tlayekankej kinmajmachtiaj kenon kintekitiltiskej seki máquinas niman okseki tlen ompa notekitiltia. Tlayekankej akin tlapaleuiyaj Betel kinmajmachtiaj tokniuan siuamej niman ijkon matlapaleuikan kampa noneki, ken kampa itlaj noyektlalia noso nochipaua, kampa noita tlenon noneki nokouas, kampa kitaj ken notekitiltia tomin niman ipan programación. Tlayekankej akin kinmajmachtiaj tokniuan siuamej kiteititiaj ika intech tlaneltokaj.

Miyekej tokniuan siuamej kichiuaj nochi tlen tlayekankej yokinmajmachtijkej niman ijkon kinpaleuiskej oksekimej. Tokniuan siuamej akin okinmajmachtijkej kenon nochijchiuaj Kaltin kampa tosentlaliaj tlapaleuiyaj ijkuak noyektlaliaj kaltin tlen oijtlakaujkej kampa otlaixpoliuj. Oksekimej akin okinmajmachtijkej kenon tenojnotsaskej kampa tojlan nojuitilo, kinmajmachtiaj oksekimej tokniuan siuamej para noijki ijkon matenojnotsakan. ¿Tlenon kinemiliaj tokniuan siuamej intech tlayekankej akin kinmajmachtiaj? Jennifer kijtoua: “Ijkuak onitlapaleui manochijchiua se Kajli kampa tikueyichiuaj Jehová, se tokniuj melak kuajli ken onechmajmachti. Yejua nochipa kitstoya tlen nikchiuaya niman nechijliaya tlenon kuajli onikchiuj, melak nikuelitaya iuan nitekitis pampa nikitaya kenon notech tlaneltokaya niman nikmachiliaya ika nechpatiojkaitaya”.

MELAK TEPALEUI TLA TIKIMITAJ TOKNIUAN SIUAMEJ KEN TOCHANEJKAUAN

Ijkon ken Jehová, tejuamej noijki melak tikintlasojtlaj nochimej tokniuan siuamej niman tikimitaj ken tochanejkauan (1 Tim. 5:​1, 2). Melak tikuelitaj imiuan tikueyichiuaskej Jehová. Niman tiyolpakij tikitaskej ika yejuamej kimatij ika tikintlasojtlaj niman tikinpatiojkaitaj. Vanessa kijtoua: “Melak niktlasojkamachilia Jehová pampa nechkauilia maninemi ipan ikalpan kampa nemij miyekej tokniuan tlakamej akin kichiuaj kuajli maninomachili”. Se tokniuj siuatl de Taiwán, kijtoua: “Niktlasojkamachilia Jehová niman ikalpan pampa techpatiojkaitaj niman pampa techasikamatij. Yejon kichikaua notlaneltok niman kichiua más manikpatiojkaita ika ninemi ipan ikalpan Jehová”.

Kuajli tikmatstokej ika Jehová melak yolpaki ijkuak kita kenon tokniuan tlakamej nokojtiliaj kintlakaitaskej siuamej ijkon ken yejua kichiua (Prov. 27:11). Benjamin, se tlayekanketl akin chanti Escocia, kijtoua: “Ipan yejuin tlaltikpaktli miyekej tlakamej xkintlakaitaj siuamej, ika yejon, ijkuak siuamej yauej ipan Kajli kampa tosentlaliaj, tiknekij makitakan ika tikintlakaitaj”. Matokojtilikan nochipa matikchiuakan ijkon ken Jehová, matikimititikan tokniuan siuamej ika tikintlasojtlaj niman ika tikintlakaitaj (Rom. 12:10).