Kodi Mumbawona Akazi Ninga Momwe Yahova Ambawawonera?
TINA mwayi wakutumikira Yahova pabodzi na akazi wakukhulupirika. Ifepano timbazifuna kwene-kwene mpfumakazi zathuzi ndipo timbakomedwambo na mabasa yakusiyana-siyana yomwe izo zimbacita! a Na tenepo, abale citani nyongo kuti mumbawone mpfumakazizo ninga momwe Yahova ambaziwonera ndipo mumbazicitire bzinthu mwakudeka mtima, mwacirungamo na mwaulemu. Tsono pakuti ndife wakuperewera, nthawe zinango bzingatinese kucita bzimwebzi. Ndipo abale winango ambagumanambo na mabvuto yakusiyana na yamweya.
Amuna winango adakulira mu cikhalidwe comwe cimbawona akazi ninga wakusaya kufunika. Mwa ciratizo, Hans, omwe ni nyakunyang’anira dera ku Bolívia, adalewa kuti: “Amuna winango adakulira ku mbuto komwe wanthu ambawona kuti amuna mbakufunika kwene-kwene kuposa akazi. Ndipo iwo adakula na nzeru zimwezi, ndipopa ambabziwona kuti mbakufunika kwene-kwene kuposa akazi.” Mkulu munango wa gwere wa ku Taiwan wakucemeredwa Shengxian, adalewa kuti: “Komwe inepano nimbakhala amuna azinji ambakumbuka kuti akazi an’funika lini kulewa nzeru yawo. Mwamuna akalewa kuti abvera nzeru ya mkazace anzace angamuseke.” Amuna winango ambalatiza kuti ambawona akazi kuti mbakusaya kufunika mu njira yakusaya kuwoneka bwino-bwino. Mwa ciratizo, iwo angalewe bzinthu bzomwe bzingapasise manyazi akazi.
Tsono bzakudekeza mpsakuti bziribe basa komwe mwamunayo adakulira, iye angakwanise kucinja nzeru zace. Iye angacinje nzeru yakuti amuna mbakufunika kwene-kwene kuposa akazi. (Aefezo 4:22-24) Bzimwebzi bzingacitike mwakutewezera Yahova. Mu nkhani ino, tiniwona momwe Yahova ambawonera akazi, momwe abale angapfunzire kumbawona akazi ninga momwe Yahova ambawawonera na momwe akulu wa gwere angakhalire patsogolo pa kulatiza ulemu kwa mpfumakazi.
KODI YAHOVA AMBAWAWONA TANI AKAZI?
Yahova ambatipasa ciratizo cabwino ca momwe tingambacitire bzinthu na akazi. Pakuti iye ni Baba wa lufoyi, ambafuna wanthu wentse. (Juwau 3:16) Ndipo mpfumakazi zakukhulupirika ziri ninga wana wace wacikazi. Onani njira zinango za momwe Yahova ambalemekezera akazi.
Iye ambawacitira bzinthu mwakusaya tsankhulo. Yahova adalenga amuna na akazi mu cifanikiso cace. (Genesesi 1:27) Iye alibe kukonza amuna kuti akhale wanzeru kwene-kwene kuposa akazi; ndipo ne iye ambafuna lini amuna kwene-kwene kuposa akazi. (2 Nkhani 19:7) Iye adalenga amuna na akazi ndipo adawapasa nzeru zakundendemera kuti akwanise kubvesesa cadidi ca m’Bibliya na kutewezerambo makhalidwe yace. Ndipo iye ambawonambo cikhulupiro ca amuna na ca akazi mu njira yakundendemerana. Ndipopa iye adasankhula amuna na akazi kuti adzakhale na moyo pano pa dziko la pantsi ndipo winango kuti akatumikire ninga amambo na antsembe kudzulu. (2 Pedru 1:1, mafala ya m’nyantsi.) Bzimwebzi bzikulatiza kuti Yahova alibe tsankhulo na akazi.
Iye ambawatetekera. Yahova ambacita thupo na makumbukidwe ya akazi. Mwa ciratizo, iye adatetekera ndipo adacita bzinthu mwakubverana na mipembo ya Rakeli na Ana. (Genesesi 30:22; 1 Samuyeli 1:10, 11, 19, 20) Yahova adacitisambo kuti anembi winango wa Bibliya anembe nkhani za amuna omwe adatetekera akazi. Mwa ciratizo, Abalahamu adabvera malango ya Yahova yakuti atetekere mkazi wace Sara. (Genesesi 21:12-14) Mambo Davide adatetekera Abigayeli. Iye akhadziwa kuti ni Yahova omwe akhadatuma Abigayeliyo kuti alewelewe naye. (1 Samuyeli 25:32-35) Jezu Kristu omwe ambatewezera bwino-bwino makhalidwe ya Baba yace, adatetekera mai wace Mariya. (Juwau 2:3-10) Nkhani zimwezi zikulatiza kuti njira ibodzi ya momwe Yahova ambalatizira ulemu kuna akazi ndiyo kuwatetekera.
Iye ambawathemba. Mwa ciratizo, Yahova adathemba Eva kuti asamalire dziko lentse la pantsi. (Genesesi 1:28) Bzomwe adacitabzi bzikulatiza kuti Yahova akhamuwona Eva sikuti ninga munthu wakusaya kufunika mwakundendemezera na Adamu, koma akhamuwona ninga mthandizi wa Adamuyo. Yahova adathembambo apolofeta Debora na Ulida kuti apase malango atumiki wace kuphatanidzambo mtongi na mambo. (Atongi 4:4-9; 2 Amambo 22:14-20) Ntsiku zino, Yahova ambapasambo mpfumakazi zacikristau mabasa yakusiyana-siyana kuti zicite. Mpfumakazi zakukhulupirika zimwezi zimbatumikira ninga apalizi, apainiya na amisiyonario. Izo zimbathandizirambo pa mabasa yakumanga na kukonza bzinthu bzomwe bzadzongeka mu Nyumba za Umambo na ku nthambi. Mpfumakazi zinango zimbatumikira pa Beteli ndipo zinango zimbatumikira mu bzipinda bzakusandulizira. Mpfumakazizi ziri ninga thimu la anyankhondo lomwe Yahova akuliphatisa basa kuti akwanisire cakulinga cace. (Salimo 68:11) Bzimwebzi bzikulatiziratu padeca kuti Yahova ambawona lini kuti akazi mbakusaya kufunika ayai ambadziwa lini bzinthu bzizinji.
KODI ABALE ANGACITE TANI KUTI AMBAWONE AKAZI NINGA MOMWE YAHOVA AMBAWAWONERA?
Abale, kuti ifepano tikwanise kudziwa penu timbawona akazi ninga momwe Yahova ambawawonera, tin’funika kubzidinga tekha kuti tiwone momwe timbakumbukira na bzomwe timbacita. Kuti tikwanise kucita bzimwebzi, ifepano tin’funikira thandizo. Ninga momwe makina ya raio-X yambakwanisira kuwona bvuto lomwe mtima wathu unalo, xamwali wabwino na Fala la Mulungu bzingatithandizembo kuzindikira nzeru zakuphonyeka zomwe tinazo pakulewa bza akazi zomwe tingakhale nazo mu mtima mwathu. Kodi tingacite ciyani kuti titambire thandizo limweri?
Bvunzani xamwali wanu wabwino. (Mimwani 18:17) Bzingakhale bwino kufenderera xamwali omwe mumbamuthemba mucimucita mibvunzo ninga iyi: “Kodi iwepo umbawona kuti nimbacita tani bzinthu na mpfumakazi? Kodi iwo angalewe kuti inepano nimbawalemekeza? Kodi ningafunikire kucinja momwe nimbalewalewera na iwo?” Xamwali wanuyo akakuuzani bzinthu bzinango bzomwe mun’funikira kucinja, imwepo mun’funika lini kubzipasa lazau. Koma citani ciri-centse kuti mucinje.
Pfunzani Fala la Mulungu. Njira yabwino yomwe ingatithandize kudziwa penu timbacitira bzinthu bzabwino mpfumakazi zathu ndiyo kuphatisa basa Fala la Mulungu kuti tibzifufudze tekha. (Ahebereu 4:12) Tikambapfunza Bibliya timbawona amuna omwe adacitira bzinthu bzabwino akazi na omwe alibe kuwacitira bzinthu bzabwino. Tikamala tingandendemezere bzomwe iwo adacita na bzomwe ifepano timbacita. Ndipo kuthumizira bzimwebzi kundendemezera mavesi ya m’Bibliya kungatithandize kuti tileke kumbaphatisa basa vesi libodzi mu njira yakuphonyeka na cakulinga cakuti tikhale na makumbukidwe yakuipa pakulewa bza akazi. Mwa ciratizo, mwakubverana na 1 Pedru 3:7, mkazi an’funika ‘kulemekezedwa ninga combo cakusaya kulimba.’ b Kodi bzimwebzi bzin’funa kulewa kuti mkaziyo ngwakusaya kufunika ayai ambadziwa lini bzinthu bzizinji mwakundendemezera na mwamuna? Ndibzo lini! Ndendemezerani mafala yomwe yali pa Pedruya na mafala yomwe yali pa Agalatiya 3:26-29 yomwe yambalatiza kuti Yahova adasankhula amuna na akazi kuti akatonge pabodzi na Jezu kudzulu. Tikambapfunza Fala la Mulungu, Bibliya, na kukumbira xamwali wathu kuti atifotokozere momwe ifepano timbacitira bzinthu na akazi, tingapfunze kulatiza ulemu kwa mpfumakazi zathu.
KODI AKULU WA GWERE AMBALATIZA TANI ULEMU KUNA MPFUMAKAZI?
Abale wa m’gwere angapfunzembo kumbacitira bzinthu mpfumakazi mwaulemu mwakutewezera ciratizo ca akulu wa lufoyi. Kodi akulu ambakhala tani patsogolo pa kulatiza ulemu kwa mpfumakazi? Onani njira zinango za momwe iwo ambacitira bzimwebzo.
Iwo ambazitenda mpfumakazizo. Mpostolo Paulo adapereka ciratizo cabwino comwe akulu angacitewezere. Iye adatenda mpfumakazi mu tsamba lomwe adanembera gwere la ku Roma. (Aroma 16:12) Kodi mukukumbuka kuti mpfumakazizo zidabva tani pomwe tsamba la Pauloyo lidawerengedwa m’gwere? Mwakundendemerana na bzimwebzi, akulu wa gwere ambatendambo kwene-kwene mpfumakazi thangwe ra makhalidwe yawo yabwino na basa lomwe mpfumakazizo zimbacita pa kutumikira Yahova. Bzimwebzi bzimbacitisa kuti mpfumakazizo zidziwe kuti zimbalemekezedwa na kufunidwa kwene-kwene. Mafala yakulimbikisa ya mkulu wa gwere yangathandize mpfumakazi kuti ipitirize kutumikira Yahova mwakukhulupirika. — Mimwani 15:23.
Mbatendani
Pakutenda mpfumakazi, akulu wa gwere ambafotokoza bwino-bwino bzinthu bzabwino bzomwe mpfumakazizo zimbacita. Thangwe ranyi iwo ambacita bzimwebzi? Mpfumakazi inango yakucemeredwa Jessica idalewa kuti: “Mpsabwino abale akambatiuza kuti ‘basalo lafamba bwino.’ Tsono timbakomedweratu kwene-kwene abale akambatitenda mwakufotokozeratu bwino-bwino cinthu comwe iwo akukomedwa naco. Mwa ciratizo, iwo angalewe bza momwe timbathandizira wana wathu kuti akhale wakuderekha pa mitsonkhano ayai bzomwe tacita pa kutenga nyakupfunza wathu wa Bibliya kuti tibwere naye ku mitsonkhano.” Akulu akambafotokoza bwino-bwino bzinthu bzomwe akutenda mpfumakazi, mpfumakazizo zimbabziwona kuti n’zakufunika kwene-kwene m’gwere.
Iwo ambazitetekera mpfumakazizo. Akulu wa gwere wakubzicepesa ambazindikira kuti wanthu winango angawapasembo nzeru. Akulu amwewo ambakumbira mpfumakazi kuti zifotokoze bzomwe zikukumbuka ndipo iwo ambatetekera bwino-bwino pomwe mpfumakazizo zikulewalewa. Akuluwo akacita bzimwebzo, mpfumakazizo zimbalimbikisidwa kwene-kwene ndipo zimbagumana phindu. Kodi bzimbacitika tani? Mkulu munango wakucemeredwa Gerardo, omwe ambatumikira pa Beteli, adalewa kuti: “Ndazindikira kuti kukumbira nzeru mpfumakazi kwandithandiza kuti basa langu lindifambire bwino. Kazinji-kazinji, iwo ambakhala acita basalo kwa nthawe itali kuposa abale.” M’gwere, mpfumakazi zizinji zimbatumikira ninga apainiya, ndipopa izo zimbadziwa bzinthu bzizinji bza wanthu wa mphimpha yomwe izo zimbakhala. Mkulu m’bodzi wa gwere wakucemeredwa Bryan adati: “Mpfumakazi zathu zina makhalidwe mazinji yabwino na luso lomwe lingathandize mu gulu la Yahova. Tenepo, phatisani basa bzomwe iwo ambadziwabzo!”
Mbatetekerani
Akulu wa nzeru ambandothamangira lini kugaza makumbukidwe ya mpfumakazi. Thangwe ranyi? Mkulu munango wa gwere wakucemeredwa Edward adalewa kuti: “Makumbukidwe na bzomwe mpfumakazi imbadziwa bzingathandize kwene-kwene m’bale kuti akwanise kubvesesa nkhani na kumuthandizambo kukhala munthu wa ntsisi.” (Mimwani 1:5) Napo kuti mkulu awona kuti bzingakwanisike lini kuphatisa basa nzeru ya mpfumakaziyo, bzingakhale bwino kuitenda mpfumakaziyo thangwe ra makumbukidwe yace na kuzindikirambo nzeru zomwe mpfumakaziyo inazo.
Iwo ambapfunzisa mpfumakazi. Akulu wakucenjera ambanyang’ana mipata kuti apfunzise mpfumakazi. Mwa ciratizo, iwo angapfunzise mpfumakazi kutsogolera mtsonkhano wa upalizi bzikakhala kuti pa mbutopo palibe m’bale wakubatizidwa. Iwo angapfunzisembo mpfumakazi kufambisa makina na kuphatambo basa na bzinthu bzakusiyana-siyana kuti akwanise kuthandizira pa mabasa ya kumanga nyumba za gulu lathu. Pa Beteli, abale omwe ambanyang’anira madepatimenti ambapfunzisa mpfumakazi kuti zicite mabasa yakusiyana-siyana ninga kukonza bzinthu bzomwe bzadzongeka, kugula bzinthu, kuphata basa na kobiri, kukonza makomputadori na bzinango. Mpfumakazi zizinji zimbaphatisa basa bzinthu bzomwe zidapfunzisidwa na akulu kuti zithandize wanthu winango.
Mbapfunzisani
Mwa ciratizo, mpfumakazi zinango zimbaphatisa basa bzomwe zidapfunzisidwa pa basa lakumanga-manga kuti zithandize wale omwe nyumba zawo zadzongeka na malengwa ya pantsi. Ndipo mpfumakazi zinango zimbaphatisa basa bzomwe zidapfunza pa kucita upalizi bwa kangolo kuti zipfunzisembo mpfumakazi zizinji kucita basa limweri. Kodi mpfumakazizi zimbawawona tani akulu omwe adawapfunzisawo? Mpfumakazi ibodzi yakucemeredwa Jennifer idalewa kuti: “Pomwe ndidaphata basa la kumanga Nyumba ya Umambo, m’bale m’bodzi omwe akhatsogolera akhambandipfunzisa. Iye adawona basa lomwe ndidalicita ndipo adanditenda kwene-kwene. Ndidakomedwa kuphata naye basa thangwe ndidabzibva kuti ndine munthu wakufunika na wakuthembeka.”
PHINDU LOMWE TIN’DZAKHALA NALO TIKAMBAWONA MPFUMAKAZI NINGA MOMWE YAHOVA AMBAZIWONERA
Ifepano timbazifuna mpfumakazi zathu zakukhulupirikazi ninga momwe Yahova ambazifunira! Ndipopa timbaziwona ninga famidya zathu. (1 Timotio 5:1, 2) Ifepano tina mwayi wakutumikira pabodzi na mpfumakazi zimwezi. Ndipo timbakomedwa kwene-kwene tikawona kuti izo zikukwanisa kuwona kuti ifepano timbazifuna na kuzithandiza. Mpfumakazi inango yakucemeredwa Vanessa idalewa kuti: “Nimbatenda kwene-kwene Yahova thangwe ra kucita mbali ya gulu lomwe lina abale azinji omwe adandilimbikisa kuti ndipitirize kutumikira Yahova.” Mpfumakazi inango ya ku Taiwan idati: “Nimbatenda kwene-kwene Yahova na gulu lace thangwe ambalemekeza akazi ndipo ambalemekezambo makumbukidwe yawo. Bzimwebzi bzimbalimbisa cikhulupiro cangu ndipo bzimbandicitisa kuti ndikomedwe kwene-kwene thangwe ra kucita mbali ya gulu la Yahova.”
Yahova ambakomedwa kwene-kwene akambawona abale wacikristau wakukhulupirika akucita nyongo yakumbawona akazi ninga momwe iye ambawawonera! (Mimwani 27:11) M’bale m’bodzi wa ku Escócia wakucemeredwa Benjamin adalewa kuti: “Mu dzikoli akazi ambalemekezedwa lini. Tsono akazi akambapita mu Nyumba ya Umambo, tin’funa kuti iwo ambawone kusiyana komwe kulipo.” Tenepo, bwerani tentse ticite bzomwe tingakwanise kuti titewezere Yahova mwakumbacitira bzinthu mpfumakazi zathu mwa lufoyi na mwaulemu. — Aroma 12:10.
a Mu nkhani ino, fala lakuti “mpfumakazi” likuthandauza mpfumakazi zathu zacikristau sikuti mpfumakazi zakubadwa nazo mimba ibodzi.
b Kuti mubvesese thandauzo la mafala yakuti “combo cakusaya kulimba,” onani nkhani yakuti “Mtengo wa ‘Chotengera Chochepa Mphamvu’” mu Ntsanza ya Mulindiri ya 15 Maio, 2006, na nkhani yakuti “Malangizo Anzeru kwa Okwatirana” mu Ntsanza ya Mulindiri ya 1 Março, 2005 (Chichewa).
