Anango adakulira ku dera yomwe wanthu achawona akazi kukhala onyozeka. Mwakulinganiza, wonyang’anira dera munango dzina yake Hans yemwe achatumikira ku Bolívia, adanena kuti: “Wanthu anango adakulira mu dera yomwe wanthu anango achawona anzawo kukhala osafunika, mudera yomwe amuna achalimbikisiwa kukhala wodzikuza na kukhulupirira kuti ni wapadzulu maninge kuposha akazi ndipo achawachitira vinthu mosowa ulemu.” b Nkulu munango wa ku Taiwan dzina yake Shengxian, adanena kuti: “Komwe ine nichakhala amuna azinji achaganiza kuti akazi alibe ufulu wofotokoza maganizo yawo. Mwamuna akafotokoza maganizo ya nkazi pa nkhani inango amuna anzake amunyoza.” Amuna anango achalemekezalini akazi mu njira yosawonekera. Mwakulinganiza nthawe zinango achachita gozo yomwe ingakhumudwise akazi.

Viribe basa va chikhalidwe cha komwe tidakulira, mwamuna aliyese angachinje maganizo. Iye angapfunzire kuti mwamuna na nkazi ni olingana. Iye angamalise maganizo yowona kuti amuna ni wapadzulu maninge kuposha akazi. (Aef. 4:22-24) Iye adzakwanise kuchita vimwevi pa kutewedza chitsanzo cha Yahova. Mu nkhani mweyi tiwone momwe Yahova achawasamalilira akazi na momwe abale angatewedzerere chitsanzo chake pa kusamalira akazi na momwe akulu angaperekere chitsanzo pa nkhani yolemekeza akazi.

MOMWE YAHOVA ACHASAMALILIRA AKAZI

Yahova adapereka chitsanzo chabwino maninge cha momwe tingasamalilire akazi. Yahova ndiye Baba wathu ndipo iye achakonda wana wake wose. (Yoh. 3:16) Alongo okhulupirika mwawa ni wana wodekana maninge pa maso pa Yahova. Manje naboni tione njira zinango zomwe Yahova achawonesera kuti achakonda na kulemekeza akazi.

 Yahova achawonalini akazi kuti ni onyozeka. Iye adalenga amuna na akazi mu chifaniziro chake (Gen. 1:27) Yahova alibe kupereka nzeru na maluso kwa amuna okha, ndipo iye achakondalini amuna okha nkumbasalula akazi. (2 Mbiri 19:7) Yahova adalenga amuna na akazi na nzeru zibodzibodzi kuti akwanise kubvesa mpfundo za m’Baibolo na kutewedza makhalidwe yake. Yahova achalemekezapomwe chikhulupiriro cha amuna na akazi, viribe basa peno chidikhiro chawo ni chodzakhala mparadaiso pano pa dziko yapasi panango kukatumikira ninge mafumu na antsembe kudzulu. (2 Pet. 1:1) Ni vobveka kuti Yahova asalulalini akazi.

Yahova achabvesera akazi. Yahova achakonda kudziwa momwe akazi ankubvera na vomwe vinkuwadesa nkhawa. Mwakulinganiza, iye adabvesera na kudawira mapemphero ya Rakele na Hana. (Gen. 30:22; 1 Sam. 1:10, 11, 19, 20) Yahova adauzirapomwe onemba Baibolo kuti anembepomwe nkhani za amuna omwe ambabvesera akazi. Mwakulinganiza, Yahova adauza Abulahamu kuti abvere vomwe Sara wanena. (Gen. 21:12-14) Mpfumu Davide adabveserambo Abigayeli. Shuwadi, iye adazindikira kuti ni Yahova yemwe adamutumiza kuti adzayankhule naye. (1 Sam. 25:32-35) Ndipo Yesu yemwe ambatewedza mosaphonyesa makhalidwe ya Ababa wake, adabvesera amayi wake, Mariya. (Yoh. 2:3-10) Vitsanzo vimwevi vinkuwonesa bwinobwino kuti, njira ibodzi yomwe Yahova achawonesera kuti achakonda akazi ni kuwabvesera.

Yahova achawathemba. Mwakulinganiza, Yahova ambadziwa kuti Hava adakakwanisa kusamalira dziko. (Gen. 1:28) Kwa Yahova Adamu wenzelini wofunika maninge kuposha Hava koma ninge womuyenerera. Yahova adasalulapomwe aneneri wachikazi ninge Debora na Hulida kuti apereke malangizo kwa wanthu wake, kuphatanidzapo oweruza na mafumu. (Ower. 4:4-9; 2 Maf. 22:14-20) Ntsiku zino Yahova ankutsimikizira kuti alongo angakwanise kukwanirisa utumiki uliwose womwe angatambire. Alongo okhulupirika mwawa ni ofalisa, apainiya komasoti amishonale. Iwo athandizapomwe pakukonza mapulano, kumanga Nyumba za Ufumu na beteli. Anango mwa alongo mwawa achatumikira pa Beteli ndipo anango achathandiza basa yotsumbudzulira ali ku muyi. Alongo mwawa ali ninge gulu ya nkhondo yomwe Yahova ankuyiphatisira basa pa kukwanirisa cholinga chake. (Sal. 68:11) Ni vobveka kuti kwa Yahova akazi ni osafoka ndipo ni wosakangira.

KO TINGATEWEDZERE TANI YAHOVA PA NKHANI YOLEMEKEZA AKAZI?

Kuti mudziwe peno munkulemekeza akazi ninge momwe Yahova ankufunira, muchadekana kudzifufudza mowona ntima momwe muchaganizira na momwe muchachitira vinthu. Kuti mukwanise kuchita vimwevi muchadekana thandizo. Mwakulinganiza, maquina ya raio-X yachawonesa mabvuto yanango ya muntima mwa munthu, nchibodzibodzimbo Baibolo na azishamwali wathu angatithandize kuona peno tinkulemekeza akazi ninge momwe Yahova ankufunira. Manje ko mungachite tani kuti mutambire thandizo mweyi?

Bvunzani azishamwali wanu. (Miy. 18:17) Tingachitebwino kukumbira thandizo kwa shamwali wathu yemwe adziwika kuti ni wokoma ntima komasoti wachikatikati. Shamwali wothembeka moyu angakhale mwamuna panango nkazi. Mbvunzeni kuti: “Ko uchawona tani momwe nichachitira vinthu na alongo? Ko iwo achawona kuti niwalemekeza? Ko ninkudekana kuchinja vinthu vinango?” Shamwali wanu muyo akakuuzani chinthu chomwe imwepo munkudekana kuchinja, ayi kudziyikhira kumbuyo pa vomwe muchachita. M’malo mochita mwevi chinjani vinthu vomwe ni vodekana.

Pfunzirani Mawu ya Mulungu. Njira yabwino yomwe mungadziwire kuti munkulemekeza alongo ni kuphatisa basa Mawu ya Mulungu kuti tichinje maganizo yathu na vomwe tichachita. (Aheb. 4:12) Pa kupfunzira Baibolo, isepano tipfunzira va amuna azinji omwe ambalemekeza akazi na omwe ambachitalini vimwevi. Tingalinganize chitsanzo chawo na momwe isepano tichalemekezera akazi. Kuyingizira mwapa vingakhale vophonyeka kuphatisa basa lemba ya m’Baibolo pakulimbikisa maganizo yophonyeka. Mwakulinganiza, mobverana na lemba ya 1 Petulo 3:7, inena kuti: Mwamuna achadekana kuwona nkazi ‘ninge chombo chosalimba.’ c Ko vimwevi vinkutanthauza kuti nkazi ni wosafunika panango alibe nzeru zizinji kulinganiza na mwamuna? Ndivolini neye. Linganizani mawu ya Petulo na vomwe Baibolo ichanena  pa lemba ya Agalatiya 3:26-29 mavesi mwaya yafotokoza kuti Yahova adasalula amuna na akazi kuti akatonge na Yesu kudzulu. Tikambapfunzira Baibolo na kumbabvunza azishamwali wathu momwe tichawonera akazi tidzapfunzire momwe tingawonesere ulemu chaiwo kwa alongo wathu.

KO AKULU ANGAWONESE TANI KUTI ACHALEMEKEZA ALONGO?

Abale mumpingu angatengere chitsanzo cha momwe angalemekezere alongo pa kuwona momwe akulu achachitira vimwevi. Ko akulu angawonese tani chitsanzo chabwino pa nkhani mweyi? Onani njira zinango izi.

Akulu achayamikira alongo. Mtumi Paulo adasiya chitsanzo chabwino chomwe akulu angachitewedzere. Mu kalata yomwe iye adanembera mpingu wa ku Roma, iye adatembeja alongo azinji. (Aro. 16:12) Ndoganizani momwe alongo mwawa adakhalira okondwa pomwe kalata ya Paulo payidawerengewa mumpingu. Molingana na vimwevi akulu angalemekeze alongo ndawa ya makhalidwe yawo yabwino na basa zomwe achachitira Yahova. Vimwevi vithandiza alongo kudziwa momwe achalemekezerewa na momwe mpingu uchawakondera. Mawu yolimbikisa ya nkulu yangakhale mawu yodekana maninge yomwe alongo ankudekana kuti apitirize kutumikira Yahova mokhulupirika.—Miy. 15:23.

Akulu achadekana kumutembeja mulongo kuchokera pasi pa ntima komasoti mosabisa mawu. Ndawa chani? Mulongo munango dzina yake Jessica adanena kuti: “Ni volimbikisa maninge m’bale akanena kuti ‘wachita bwino.’ Koma ni vabwino maninge m’bale akaneneratu chomwe ankukutembejera. Mwakulinganiza, kutembeja mulongo yemwe wakwanisa kunyamalisa wana wake pa nthawe ya misonkhano panango mulongo yemwe wachita khama kukatenga pfunziro yake kuti ayende naye kumisonkhano.” Akulu akambatembeja mulongo pakuchita kutomoleratu chomwe ankumutembejera iwo adzibva bwino komasoti adzibva kukhala ofunika mumpingu.

 Akulu achabvesera alongo. Akulu odzichepesa azindikira kuti ndiwolini okha omwe akhala na maganizo yabwino. Iwo achakumbira maganizo kwa alongo ndipo achawabvesera mwatcheru iwo akambayankhula. Mwanjira mweyi akulu akwanisa kulimbikisa alongo ndipo iwo chaiwo aphindulambo. Ndawa chani? Nkulu munango dzina yake Gerardo, yemwe atumikira pa Beteli adanena kuti: “Inepano nidazindikira kuti kukumbira nzeru na maganizo kwa alongo kudanithandiza kuti nimbaphate bwino basa yangu. Kazinjikazinji alongo analuso pa basa kuposha abale azinji.” Mumpingu, alongo azinji achatumikira ninge apainiya. Ndawa ya vimwevi iwo achadziwa bwinobwino wanthu wa mu gawo yawo. Nkulu munango dzina yake Bryan adanena kuti: “Alongo wathu angathandize maninge mu gulu yathu ndipomwapa tichadekana kuphindula na luso yawo komasoti makhalidwe yawo.”

Nkulu yemwe ni wozindikira adzanyalanyazelini malangizo yochokera kwa mulongo. Ndawa chani? Nkulu munango dzina yake Edward adanena kuti: “Malangizo na vomwe wagumana navo pa moyo wake vingathandize kuwona nkhani inango bwinobwino na kuchita vinthu moganizira wanthu anango.” (Miy. 1:5) Podiya kuti nkulu aphatiselini basa maganizo ya mulongo, koma achadekana kumutembeja ndawa ya maganizo yake.

Akulu achatherena alongo. Akulu ozindikira achafagafaga mipata kuti apfunzise alongo. Mwakulinganiza, iwo angapfunzise alongo kuchitisa makambirano ya utumiki wakumunda peno m’bale wabatizika akwaniselini kufika. Iwo angawapfunzisepomwe kuphatisa basa vipangizo panango machini kuti athandizire pa basa yomanga na kukonzapomwe malo ya gulu yathu yomwe yadadzongeka. Pa Beteli onyang’anira apfunzisa alongo kuti aphate basa zizinji maninge ninge kukonza malo yodzongeka, kugula vinthu, kusunga kobiri, kukonza mapologalama ya komputadoli na basa zinango zizinji. Akulu akambapfunzisa alongo achawonesa kuti awathemba kuti iwo angakwanise kukwanirisa utumiki uliwose womwe angapasiwe.

Alongo azinji aphatisa basa thereno yomwe adatambira kwa akulu pa kuthandiza anango. Mwakulinganiza, anango aphatisa basa thereno yomwe adatambira kuti athandize abale omwe nyumba zawo zidadzongeka ndawa ya matsoka yachilengedwe. Anango omwe adapfunzisiwa kulalikira malo yogumanika wanthu azinji, athandiza alongo anango kuti vinthu vimbawafambire bwino akambachitambo ulaliki ninge moyu. Ko alongo mwawa aganiza tani va akulu omwe apatula nthawe yawo kuwapfunzisa? Mulongo munango dzina yake Jennifer adanena kuti: “Pomwe nimbaphata basa yomanga Nyumba ya Ufumu, wonyang’anira adapatula nthawe yake kunipfunzisa. Iye ambawona basa yomwe nimbachita ndipo ambanitembeja ndawa ya vimwevi. Inepano nimbakonda maninge kuphata nawo basa ndawa yakuti ambanithemba ndipo ambalemekeza basa yangu.”

KUDEKANA KOWONA ALONGO NINGE WANTHU WA M’BANJA YATHU

Isepano tikonda maninge alongo ninge wanthu wa m’banja yathu ninge momwe Yahova achawakondera. Ndipomwapa tichadekana kuwawona ninge wanthu wa m’banja yathu. (1 Tim. 5:1, 2) Ndise okondwa maninge kutumikira Yahova pabodzi na alongo mwawa. Ndipo ni vabwino maninge iwo akambadzibva okondewa na otetezeka. Mulongo munango dzina yake Vanessa adanena kuti: “Ninkutembeja maninge Yahova ndawa yokhala mu gulu yake momwe mu na abale azinji omwe achanilimbikisa.” Mulongo munango wa ku Taiwan adanena kuti: “Nitembeja maninge Yahova na gulu yake ndawa yosamalira bwino akazi na kuwaganizira, vimwevi vilimbikisa maninge chikhulupiriro changu ndipo vinichitisa kutembeja maninge mwayi womwe ninawo wokhala mu gulu ya Yahova.”

Shuwadi, Yahova akhala wokondwa maninge akambawona abale ankuchita khama pa kulemekeza alongo na kuchita nawo vinthu mwaulemu! (Miy. 27:11) M’bale munango wa ku Scotland dzina yake Benjamin adanena kuti: “Wanthu wa kudziko uku alibe ulemu na akazi. Ndipomwapa akafika pa misonkhano yathu, isepano tinkufuna kuti ambadzibve kuti gulu yathu ni yosiyana na wanthu wa kudziko uku.” Ndipomwapa tose isepano tichadekana kuchita vose vomwe tingakwanise kuti titewedzere Yahova pa kuchita vinthu na alongo wathu mwachikondi na mwaulemu momwe Yahova ankufunira.—Aro. 12:10.