Samfala grow ap lo culture wea staka man ting daonem olketa woman. For example, Hans wanfala circuit overseer lo Bolivia, sei: “Samfala man growap lo culture wea mekem olketa man for praod tumas. And olketa ting dat olketa nao important winim olketa woman, and staka taem olketa no treatim olketa woman witim respect.” Shengxian, wanfala elder lo Taiwan sei: “Lo ples wea mi stap, staka man garem tingting hao olketa woman shud no talem tingting blo olketa taem olketa man story. If wanfala man talem idea blo wanfala woman abaotem samting, bae olketa nara man ting daonem hem.” Samfala man ting daonem olketa woman bat hem no showaot klia. For example, maet olketa talem olketa joke wea no respectim olketa woman.

Bat iumi hapi hao nomata wat kaen culture nao man grow ap insaed, man savve change. Hem savve stop for garem datfala tingting wea sei man nao important winim olketa woman. (Eph. 4:​22-24) Hem savve duim datwan taem hem followim example blo Jehovah. Lo disfala article, bae iumi discussim hao Jehovah treatim olketa woman, hao olketa brata savve lane for treatim olketa woman olsem Jehovah, and hao olketa elder savve showim example lo wei for respectim olketa sista.

HAO NAO JEHOVAH TREATIM OLKETA WOMAN?

Jehovah showimaot perfect example lo hao for treatim olketa woman. Hem Dadi wea kaen and lovem evri pikinini blo hem. (John 3:16) And olketa faithful sista olketa kamap olketa spesol dota blo hem. Bae iumi storyim olketa wei wea Jehovah lovem and respectim olketa woman.

Hem treatim olketa semsem. Jehovah creatim olketa man and woman lo image blo hem. (Gen. 1:27) Hem no mekem olketa man for kleva or garem  moa talent winim olketa woman, and hem no fevarem olketa man winim olketa woman. (2 Chron. 19:7) Hem creatim olketa man and woman for garem sem ability for understandim olketa Bible truth and for showimaot olketa nambawan wei blo hem. And tu, Jehovah tinghae lo olketa man and woman wea garem faith lo hem. Hem givim lo tufala evriwan hope for laef olowe lo paradaes earth or for rul olsem king and priest lo heven. (2 Pet. 1:1) Hem klia hao Jehovah no ting daonem olketa woman.

Hem lisin lo olketa. Jehovah kea abaotem hao olketa woman feel and problem wea olketa kasem. For example, hem lisin and ansarem prea blo Rachel and Hannah. (Gen. 30:22; 1 Sam. 1:​10, 11, 19, 20) And tu, Jehovah iusim holy spirit for helpem olketa Bible raeta for includim story blo olketa man wea lisin lo olketa woman. For example, Abraham followim instruction blo Jehovah for lisin lo waef blo hem, Sarah. (Gen. 21:​12-14) King David lisin lo Abigail. Hem luksavve, Jehovah nao sendem Abigail for story lo hem. (1 Sam. 25:​32-35) Jesus wea barava followim gud wei blo Dadi blo hem, hem lisin lo mami blo hem, Mary. (John 2:​3-10) Olketa example hia showim wanfala wei wea Jehovah respectim olketa woman, hem taem hem lisin lo olketa.

Hem trustim olketa. For example, Jehovah trustim Eve for helpem Adam for lukaftarem full earth. (Gen. 1:28) Taem Jehovah duim datwan, hem showimaot hao hem no tinghae lo hasband blo hem, Adam winim hem, bat Jehovah ting lo Eve olsem samwan wea savve helpem Adam. Jehovah trustim tu prophetess Deborah and Huldah for givim advaes lo pipol blo hem and lo wanfala Judge and king tu. (Judg. 4:​4-9; 2 Ki. 22:​14-20) Distaem, Jehovah trustim olketa woman for duim olketa waka blo hem. Olketa faithful sista hia kamap olketa pablisa, pioneer, and olketa missionary. Olketa help for designim, buildim, and maintainim olketa Kingdom Hall and olketa branch facility. Samfala lo olketa waka lo Bethel, and olketa narawan waka lo olketa remote transleison office. Olketa sista hia, olsem wanfala big army wea Jehovah iusim for duim will blo hem. (Ps. 68:11) Tru nao, Jehovah no ting lo olketa woman olsem olketa wik or no fit for duim samting.

HAO NAO OLKETA BRATA SAVVE LANE FOR TREATIM OLKETA WOMAN OLSEM JEHOVAH?

Olketa brata, for luksavve if iumi treatim olketa sista olsem Jehovah, iumi need for honest lo iumiseleva and chekim gud tingting and akson blo iumi. For duim datwan, iumi needim help. For example, wanfala doctor savve iusim X-ray machine for faendaot if heart blo samwan hem healthy or nomoa. Lo sem wei, wanfala gud fren and Bible savve helpem iumi for luksavve if hao iumi treatim olketa woman hem followim tingting blo Jehovah or nomoa. Wat nao iumi savve duim for kasem help?

Askem wanfala gud fren. (Prov. 18:17) Iumi savve askem wanfala fren wea iumi trustim and wea kaen and reasonable, olketa kwestin olsem: “Wat nao tingting blo iu abaotem hao mi treatim olketa sista? Hao, olketa sista feel savve dat mi respectim olketa? Or eni samting mi savve duim for impruv lo hao mi treatim olketa?” If fren blo iu talem samfala samting wea iu need for impruv lo hem, no mek excuse. Bat willing for mekem olketa change.

Studyim Bible. Best samting wea iumi savve duim for luksavve if iumi treatim gud olketa sista, hem for iusim Bible for chekim tingting and akson blo iumi. (Heb. 4:12) Taem iumi studyim Bible, bae iumi lane abaotem olketa man wea treatim gud olketa woman and olketa wea no duim datwan. And iumi savve comparem example blo olketa witim hao iumi treatim olketa sista. And tu, hem gud for comparem tu-thri scripture wea storyim hao man shud treatim olketa woman, incase iumi tingim wanfala scripture nomoa and iusim datwan for sapotim rong idea wea iumi garem abaotem olketa woman. For example, 1 Peter 3:7 storyim hao hasband mas respectim waef bikos “woman no strong olsem” man. a Hao, diswan minim woman  hem wik and no garem skill olsem man?’ Barava nomoa nao! Comparem toktok blo Peter lo 1 Peter 3:7 witim Galatia 3:​26-29, wea storyim hao Jehovah chusim olketa woman and man for rul witim Christ lo heven. Taem iumi studyim Bible and askem wanfala gud fren abaotem hao iumi treatim olketa woman, datwan bae helpem iumi for respectim olketa sista blo iumi.

HAO NAO OLKETA ELDER SHOWIM RESPECT FOR OLKETA SISTA?

Olketa brata lo kongregeson savve lane tu for treatim olketa sista witim respect taem olketa followim example blo olketa elder. Hao nao olketa elder savve showim example lo wei for respectim olketa sista? Bae iumi storyim samfala wei wea olketa duim datwan.

Praisem olketa sista. Aposol Paul showim gud example for olketa elder savve followim. Lo leta wea hem raetem lo olketa Christian lo Rome, hem praisem samfala sista. (Rome 16:12) Olketa sista hia mas hapi tumas taem datfala leta blo Paul olketa readim lo kongregeson. Olketa elder distaem tu savve praisem olketa sista for gudfala wei blo olketa and waka wea olketa duim for Jehovah. Datwan helpem olketa sista for luksavve hao kongregeson respectim and tinghae lo olketa. Encouraging toktok wea wanfala elder talem, hem maet wat olketa sista hia needim taem olketa gohed faithful for worshipim Jehovah.—Prov. 15:23.

Taem olketa elder praisem olketa sista, hem gud for specific. Why? Wanfala sista wea nem blo hem Jessica sei: “Hem naes for herem taem olketa brata sei ‘iu duim gud waka.’ Bat mifala appreciatim tumas taem olketa brata praisem mifala for wanfala specific samting, olsem hao mifala teachim pikinini for sidaon kwaet lo meeting or for sakrifaes wea mifala duim for pikim wanfala Bible study for kam lo meeting.” Taem olketa elder  praisem olketa sista for specific samting, datwan mekem olketa luksavve olketa important lo kongregeson.

Lisin lo olketa sista. Olketa elder wea hambol luksavve hao ino olketa nomoa garem best idea. Olketa elder olsem savve askem olketa sista for samfala idea, and lisin gud taem olketa story. Datwan savve encouragem olketa sista, and olketa elder tu bae kasem gud samting. Hao nao olsem? Gerardo, wanfala elder wea waka lo Bethel sei: “Mi faendem taem mi askem olketa sista for samfala idea, datwan helpem mi for duim gud waka blo mi. Staka taem, olketa sista nao duim datfala waka longtaem winim staka brata.” Lo kongregeson staka sista pioneer, so olketa savve lo staka samting abaotem pipol lo datfala ples. Wanfala elder wea nem blo Bryan sei: “Olketa sista blo iumi garem staka gud quality and skill wea organization needim. So kasem gud samting from experience wea olketa garem!”

Olketa wise elder bae no ignorem idea blo wanfala sista. Why? Edward wanfala elder sei: “Idea and experience blo wanfala sista savve helpem brata for barava understandim gud wanfala samting, and savve helpem hem for understandim gud feeling blo olketa narawan.” (Prov. 1:5) And nomata elder no followim idea blo wanfala sista, hem savve thankiu lo hem for sharem idea and savve blo hem.

Trainim olketa sista. Olketa wise elder lukaotem chance for trainim olketa sista. For example, elder savve trainim olketa sista lo hao for conductim meeting for field service mekem taem no eni baptaes brata kam olketa savve duim datwan. Olketa savve trainim olketa sista for iusim olketa tul or machine mekem olketa savve help lo olketa theocratic maintenance and construction project. Lo Bethel, olketa overseer savve trainim olketa sista for duim olketa difren assignment olsem maintenance, purchasing, accounting, computer programming, and olketa nara waka moa. Taem olketa elder trainim olketa sista, hem showim olketa trustim olketa sista fit for duim waka.

Staka sista iusim training wea olketa kasem from olketa elder for helpem narawan. For example, samfala sista iusim training wea olketa kasem lo construction for help for buildim haos blo narawan bihaen wanfala natural disaster. Olketa nara sista iusim training wea olketa kasem for duim pablik witnessing for trainim olketa nara sista tu for duim sem waka. Wat nao tingting blo olketa sista abaotem olketa elder wea trainim olketa? Sista Jennifer sei: “Taem mi waka lo wanfala Kingdom Hall construction project, mi kasem training from wanfala overseer. Hem lukim waka wea mi duim, and hem praisem mi. Mi hapi for waka witim hem bikos hem tinghae lo wat mi duim and hem trustim mi.”

KASEM GUD SAMTING FROM IU TREATIM OLKETA OLSEM SISTA BLO IU

Iumi lovem olketa faithful sista blo iumi olsem Jehovah tu! So treatim olketa olsem sista blo iu. (1 Tim. 5:​1, 2) Iumi tinghae lo olketa and hapi for waka tugeta witim olketa. And iumi barava hapi taem olketa feel savve iumi lovem and sapotim olketa. Sista Vanessa sei: “Mi thankiu lo Jehovah for mi part lo organization blo hem wea garem staka brata wea barava encouragem mi.” Wanfala sista lo Taiwan sei: “Mi thankiu lo Jehovah and organization blo hem for tinghae lo olketa woman and respectim feeling blo olketa. Diswan strongim faith blo mi and mekem mi appreciatim go moa privilege wea mi garem for part lo organization blo Jehovah.”

Jehovah mas hapi tumas taem hem lukim olketa faithful brata tinghae and treatim olketa woman witim respect olsem hem tu! (Prov. 27:11) Wanfala elder lo Scotland wea nem blo hem Benjamin sei: “Staka man lo world distaem no respectim olketa woman. So taem olketa sista kam lo Kingdom Hall, iumi laekem olketa for luksavve iumi lovem and respectim olketa.” Iumi evriwan laek duim best blo iumi for followim example blo Jehovah for treatim olketa sista blo iumi witim respect and love wea olketa fit for kasem.—Rome 12:10.