Wakenqa warmista may pisipaj qhawanku chay lugarespi uywakorqanku. Hermanonchej Hansmanta parlarina, payqa Boliviapi congregacionesta waturin, nintaj: “Wakin hermanosqa uywakorqanku maypichus qharista astawan valechinku chay lugarespi. Chaykunapeqa ninku ‘noqa qhari kani’, nispa. Chayrayku qharisqa yuyanku warmismanta nisqa aswan sumajpuni kasqankuta”, nispa. b Taiwanmanta Shengxian sutiyoj ancianotaj nin: “Tiyakuni chaypeqa, ashkha qharis yuyanku warmisqa qharispa ruwanasninkuman mana satʼikunankuchu kasqanta. Uj qhari, warmej nisqanta valechejtenqa pisipaj qhawachikunman”, nispa. Wakin qharistaj warmismanta burlakunankupaj chistesta ruwanku, ajinamanta mana reparayllata warmista pisipaj qhawashanku.

Ajinapi uywakoj qharisqa cambiayta atinkuman, niñataj yuyankumanchu warmismanta nisqa aswan sumaj kasqankuta (Efe. 4:22-24). ¿Imaynatá chayta ruwankuman? Jehová jina ruwaspa. Kay yachaqanapi yachakusun Jehová warmista jatunpaj qhawasqanta, imaynatachus hermanospis hermanasta Jehová jina jatunpaj qhawanankuta. Yachakullasuntaj imaynatachus ancianospis uj sumaj ejemplo kayta atinankuta.

JEHOVAQA WARMISTA JATUNPAJ QHAWAN

Jehovamanta mayta yachakusunman imaynatachus hermanasta jatunpaj qhawayta. Payqa  khuyakuyniyoj Tata, maytataj tukuynin familianta munakun (Juan 3:16). Jehovapajqa payta sirvej warmisqa may munasqa kanku. Payqa warmista munakun, respetantaj. Imajtinchus chayta nisqanchejta qhawarina.

Warmistapis qharistapis uj rejllata qhawan. Jehovaqa qharitawan warmitawan ruwarqa payman rijchʼakojta (Gén. 1:27). Payqa qharista mana warmismanta nisqa aswan yachayniyojtachu ruwarqa, nitaj aswan sumaj imasta ruwayta atinankupajchu. Qharistapis warmistapis ruwarqa cheqa yachachiykunata entiendenankupaj jina, pay jina kʼacha kaykunasniyoj kanankupaj jinataj. Jehovaqa mana qharisllatachu astawan munakun (2 Cró. 19:7). Paypajqa creeyniyoj qharispis warmispis may valorniyoj kanku. Tukuyninkumantaj wiñaypaj kausakunankupaj uj sumaj suyakuyta qon: Wakinmanqa kay jallpʼapi, wakinmantaj cielopi reyestaj sacerdotestaj kanankupaj (2 Ped. 1:1). Sutʼita reparanchej Jehovaqa manapuni warmista pisipajchu qhawasqanta.

Warmista uyarin. Jehovaqa llakikun imaynachus warmis sientekusqankumanta, ima problemasniyojchus kasqankumantapis. Payqa Raquelpa mañakusqanta, Anaj mañakusqantapis uyarerqa, kuticherqataj (Gén. 30:22; 1 Sam. 1:10, 11, 19, 20). Chantapis Palabranpi qhelqacherqa warmista uyarej qharismanta. Paykunamanta ujnintaj karqa Abrahán. Jehovaqa Abrahanta nerqa warmin Sarata uyarinanta, paytaj kasukorqa (Gén. 21:12-14). Rey Davidpis Abigailta uyarerqa, astawanpis nerqa Jehovapuni Abigailta kachamusqanta paywan parlananpaj (1 Sam. 25:32-35). Jesuspis Tatan jinapuni kasqanrayku, maman Mariata uyarerqa (Juan 2:3-10). Reparanchej jina, Jehovaqa warmista respetan paykunata uyarispa.

Warmispi confian. Jehovaqa Evata nerqa jallpʼata cuidaypi qosanta yanapananta (Gén. 1:28). Payqa Evata mana pisipajchu qhawarqa qosanmanta nisqaqa, astawanpis yanapajninta jina qhawarqa. Chantapis profetiza Deborata, Huldata ima nerqa llajtanta, uj juezta, uj reytapis yuyaycharinankuta (Jue. 4:4-9; 2 Rey. 22:14-20). Kay tiempopipis Jehovaqa hermanaspi confian, ruwaykunatataj paykunaman qon. Chay hermanasqa kanku publicadoras, precursoras, chayri misioneras. Hermanasninchejqa Tantakuna Wasista, sucursalesta ruwaypi, chaykunata allinchaypi, chaykunapaj planosta ruwaypi ima yanapakunku. Wakin hermanasninchejqa Betelpi yanapakunku, chayri traducinapaj oficinaspi. Jehovaqa hermanasmanta valekun munayninta juntʼananpaj, paykunaqa may chhika soldados jina kanku (Sal. 68:11). Sutʼita reparanchej Jehovaqa warmista mana pisi kallpasta jinachu qhawasqanta, nitaj ni imata ruwayta yachajkunata jinachu.

¿IMAYNATÁ HERMANOS WARMISTA JEHOVÁ JINA JATUNPAJ QHAWANKUMAN?

Hermanos, ¿Jehová jinachu hermanasta jatunpaj qhawashankichej? Chayta yachananchejpajqa imatachus yuyasqanchejta, imatachus ruwasqanchejta sumajta qhawarikunanchej tiyan. Chaypajqa yanapata necesitanchej. Uj doctorqa maquinapi qhawaspa yachayta atinman uj runaj corazonnin allillanchus manachus kashasqanta. Ajinallatataj sumaj amigosninchej, Diospa Palabranpis yanapawasunman imatachus warmismanta yuyasqanchej Jehovata kusichisqantachus manachus yachanapaj. Imaynatachus chayta ruwayta atisqanchejta qhawarina.

Sumaj amigowan yanapachikuna (Pro. 18:17). Parlarisunman de confianza amigonchejwan, pichus kʼachallamanta yuyaychariwanchej, maychus kajllatataj niwanchej chay amigonchejwan, qharipis warmipis kachun. Payta tapurisunman: “Reparasqaykiman jina, ¿warmista jatunpajchu qhawani? ¿Paykuna respetasqaytachu ninkuman? ¿Imapitaj astawan mejorayman?”, nispa. Imatapis yuyaychariwajtinchejqa ama chay rato phiñakunachu. Astawanpis niwasqanchejman jina cambianapaj kallpachakuna.

Diospa Palabranta estudiana. Hermanasninchejta jatunpajchus manachus qhawashasqanchejta yachanapajqa, warmismanta imatachus yuyasqanchejta, imatachus ruwasqanchejtapis Bibliaj nisqanwan kikincharinanchej tiyan (Heb. 4:12). Bibliata estudiaspaqa yachakunchej wakin qharis, warmista jatunpaj qhawasqankuta, wakintaj mana. Chayrayku tapurikusunman mayqenmanchus rijchʼakusqanchejta. Chantapis allin kanman uj versiculota waj versiculowan kikincharinanchej. Ajinamanta mana ima versiculomantapis japʼikusunchu warmismanta pantasqata yuyanapaj. Astawanpis ashkha versiculosta qhawaykurinanchej tiyan imatachus Jehová warmismanta yuyasqanta yachanapaj. 1 Pedro 3:7  versiculopi nin warmistaqa sumajpaj qhawananchejta, “imaynatachus pʼakikoj vasota allillanwan” apaykachanchej ajinata. c ¿Chay ninayanchu warmis qharismanta nisqa pisi yuyayniyoj kasqankuta, nitaj qharis jinachu imatapis ruwayta atisqankuta? Mana. Pedroj nisqanta mana qʼewinapajqa, imatachus Gálatas 3:26-29 nisqanpi piensarina. Chaypi sutʼinchan Jehovaqa warmistapis qharistapis Jesuswan khuska cielopi kamachimunankupaj ajllasqanta. Sichus Bibliata estudiasun, sumaj amigosninchejwantaj yuyaycharichikusun chayqa, yachakusun hermanasninchejta respetayta.

HERMANASTA RESPETAJ ANCIANOS, ¿IMATÁ RUWANKU?

Congregacionmanta hermanosqa, ancianosmantapis yachakunkuman imaynatachus hermanasta jatunpaj qhawayta. ¿Imaynatá ancianos uj sumaj ejemplo kankuman? Qhawarina imatachus ancianos ruwasqankuta hermanasta munakusqankurayku, respetasqankuraykutaj.

Felicitanku. Ancianosqa apóstol Pablomanta mayta yachakunkuman. Payqa Romapi congregacionman uj cartata qhelqashaspa ashkha hermanasta felicitarqa (Rom. 16:12). Chay hermanasqa may kusisqachá kasharqanku chay cartata congregacionpi leekojtin. Ajinallatataj ancianospis hermanasta kʼacha kaykunasninkumanta felicitankupuni, Jehovarayku tukuy imata ruwasqankumantapis. Chayta ruwasqankurayku hermanasqa reparanku respetasqankuta, may valorniyojpajtaj qhawasqankuta. Jehovata tukuy sonqo sirvinallankupajpuneqa, ichapis necesitankuman uj anciano kallpacharinallanta (Pro. 15:23).

Ancianosqa hermanasta sonqomantapacha felicitanku, sutʼitataj ninku imatachus allinta ruwasqankuta. ¿Imarayku? Jessica nin: “Hermanasmanqa  gustawayku ‘allinta ruwanki’ ninawayku, pero astawan kallpachawayku imapichus allinta ruwasqaykuta niwajtiyku. Ichapis felicitawaykuman wawasniykuta reunionespi allinta portakunankupaj yachachisqaykumanta, chayri estudiosniykuta reunionman jamunankupaj wasinkuman recogej risqaykumanta”, nispa. Ancianos hermanasta imatachus allinta ruwasqankuta sutʼita nejtinkoqa, hermanasqa reparanku congregacionpaj uj sumaj yanapa kasqankuta, may valorniyojtaj kasqankuta.

Nisqankuta uyarinku. Kʼumuykukoj sonqo ancianosqa reparanku mana paykunaj nisqallankuchu sumaj kasqanta. Chayrayku imatachus hermanas yuyasqankuta tapurinku, nisqankutataj sumajta uyarinku. Ajinamanta purajmanta yanapanakunku. Hermanasqa may kallpachasqa kanku. Ancianostarí, ¿imapí yanapan? Betelpi sirvej Gerardo sutiyoj anciano nin: “Reparani hermanaspa nisqankoqa, trabajoyta aswan sumajta ruwanaypaj yanapawasqanta. Ashkha hermanasqa aswan unaytaña uj trabajopi kashanku hermanosmanta nisqaqa”, nispa. Congregacionpeqa ashkha precursoras tiyan, paykunataj ima lugarestachus predicanchej chaykunata sumajta rejsinku. Bryan sutiyoj anciano nin: “Hermanasqa Diospa llajtanpi maytapuni yanapakuyta atinku. Paykunamanta yachakuna”, nispa.

Ancianosqa hermanaspa nisqankuta valechinku. ¿Imaraykutaj chayta ruway may sumaj? Edward sutiyoj anciano nin: “Uj hermana imatachus nisqan, imatachus yachasqanpis, uj hermanota yanapanman allinta tʼukurinanpaj, wajkunatapis entiendenanpaj”, nispa (Pro. 1:5). Wakin kutis mana uj hermanaj nisqanman jinachu ruwajtinkupis, ancianosqa mayta agradecekunku hermanas imatapis nejtinku, chayri yuyasqankuman jina imatapis sutʼita nejtinku.

Yachachinku. Ancianosqa sumaj yuyayniyoj kasqankuta rikuchinku hermanasta imata ruwanankupajpis yachachispa. Hermanastaqa yachachinkuman predicacionman llojsinapaj tantakuyta imaynatachus ruwanata. Ajinamanta bautizasqa hermano mana kajtin paykuna chayta ruwanankupaj. Chantapis yachachillankumantaj wakin herramientasta, maquinasta ima apaykachayta. Ajinamanta construccionpi, mantenimientopi yanapakunankupaj. Betelpeqa superintendentes, hermanasta yachachinku ashkha imaspi yanapakunankupaj: mantenimientopi, rantiypi, contabilidadpi, computadoraswan yanapakuypi ima. Hermanasta yachachej ancianosqa paykunapi, imatachus ruwasqankupipis confiasqankuta rikuchinku.

Ashkha hermanasqa imastachus ancianosmanta yachakusqankuwan wajkunata yanapanku. Construccionpi wajkunaj yanapayninwan wakin imasta yachakorqanku chay hermanasqa, uj desastre natural kajtin chaypi wasista allinchaspa yanapakunku. Waj hermanastaj ashkha runas purinku chaypi predicayta yachakusqankuta waj hermanasman yachachinku, ajinamanta paykunapis chaypi predicanankupaj. ¿Imatá hermanas ninku yachacherqanku chay ancianosmanta? Jennifer nin: “Tantakuna Wasita ruwaypi yanapakushajteyqa, uj encargado hermano yachachinawanpaj tiempota orqhokorqa. Chay hermanoqa tapuriwajpuni ruwashasqaypi imaynachus rishawasqanta, felicitawajtaj. Chay hermanowan trabajayqa may sumajpuni noqapaj karqa. Repararqanitaj pay noqapi confiasqanta, valorawasqantataj”, nispa.

HERMANASTA FAMILIANCHEJTA JINA QHAWANA

Noqanchejpis Jehová jina hermanasninchejta munakunchej, familianchejta jinataj qhawanchej (1 Tim. 5:1, 2). Paykunawan khuska Jehovata yupaychayqa may sumajpuni. Maytapuni kusikunchej paykunata munakusqanchejta, yanapasqanchejtataj reparasqankumanta. Vanessa nin: “Diospa llajtanpi hermanosqa hermanasta may munasqata sientechinku. Chayrayku llajtanpi kasqaymanta maytapuni Jehovaman agradecekuni”, nispa. Taiwanmanta uj hermanataj nin: “Mayta agradecekuni Jehovaman, llajtanmanpis warmista valorniyojpaj qhawawasqaykumanta, imaynachus sientekusqaykutapis respetasqankumanta. Chayqa creeyniyta sinchʼiyachin, Jehovaj llajtanpi kasqaymantataj astawan agradecekuni”, nispa.

Jehovaqa maytachá kusikun hermanos warmista pay jina munakunankupaj, respetanankupajtaj kallpachakusqankumanta (Pro. 27:11). Escociamanta Benjamin sutiyoj anciano nin: “Kay mundopeqa ashkha qharis nipuni warmista respetankuchu. Chayrayku munanchej warmis Tantakuna Wasiman jamojtinku, Diospa llajtanpeqa mana ajinachu kasqanta reparanankuta”, nispa. Kallpachakuna Jehová jina munasqa hermanasninchejta munakunapaj, respetanapajtaj (Rom. 12:10).