Waquin marcacunachoga olgu cajcunalatami más ali rican, y warmicunataga manacajman churan. Boliviapita congregaciunta watucamoj Hans jutiyoj cristiano cayno wilacun: “Waquin marcacunachoga olgucunata yachachin warmicunapita más ali cashganta. Paycunaga runa runa tucoj, olgoj cashganta yarpapäcun, chaymi warmicunata manacajman churan. Chayno runacunataga machista nir reguipäcun”. Shengxian jutiyoj anciano Taiwán naciunpita cayta nin: “Tiyashgä marcachoga warmicunaga runa cajpa asuntuncunacho manami jaticunchu. Juc runa warmin nishganta cäsucuptenga, waquincuna payta mana respetannachu”. Waquin runacunaga mana ali chisticunata rurar warmicunapita burlacärin.

Pero pipis chayno ashmashga captinpis jucnopana yarpar warmicunata respetuwan y igualpa ricayta puedinmanmi (Efes. 4:22-24). Chaypäga Jehová imano cashganpita yachacunman. Chaymi canan ricärishun Jehová imano warmicunata ricashganta, y olgucunapis yachacunman Jehová ricashganno warmicunata ricananpaj. Jina ricashunpis imanotaj ancianucuna chayta puntata ruranman.

¿IMANOTAJ JEHOVÁ RICAN WARMICUNATA?

Jehová yachachimanchi warmicunata imano ricanapaj. Pay cuyapäcoj car lapanchitami cuyamanchi (Juan 3:16). Payta sirvej warmicunaga, cuyashga wamrancunano caycan. Ricashun imano Jehová paycunata cuyashganta y respetashgantapis.

 Olgutapis y warmitapis igualpa camashga. Jehovaga runatapis y warmitapis pay nirajta camashga (Gén. 1:27). Payga runa cajta warmipita más yachajta ni tucuy habilidäyojta manami camashgachu. Sinoga ishcancuna yachaj y imatapis shumaj tantiacoj capäcun. Jehová ishcantami igualpa cuyan (2 Crón. 19:7). Paypäga warmi cajpa yäracuyninga olgupano alapa valuryoj caycan. Chaymi olgupis y warmipis shuyarpaycan imaycamapis o imayyajpis cawacunanpaj cay Pachacho o cieluchopis reycunano o sacerdoticunano (2 Ped. 1:1). Chaura Jehovaga runa cajta y warmi cajtapis igualpa rican.

Shumaj mayapäcun. Jehovaga altanto caycan warmicuna imano sienticushganpita y imacunapa pasaycashganpitapis. Payga Raquel y Ana mañacushganta shumaj wiyargan y contestargan (Gén. 30:22; 1 Sam. 1:10, 11, 19, 20). Jina Palabranchopis escribichimurgan waquin runacuna warmicuna nishganta cäsucushganta. Juc cuticho Jehová Abrahanta nergan warmin Sara nishganta cäsucunanpaj (Gén. 21:12-14). Davidpis rurargan Abigaíl nishganta, chaymi cayno nergan: “TAYTA DIOSMI kachamushushqanki” (1 Sam. 25:32-35). Jesuspis maman María nishganta cäsucurgan (Juan 2:3-10). Chaura ricashganchinopis Jehová warmicunata respetar shumaj mayapäcun.

Paycunaman yäracun. Jehová Evata nergan cay Pachata shumaj cuidananpaj (Gén. 1:28). Jehovapäga Adanwan Evapis igualmi cargan, manami mayganninpis más valuryoj carganchu. Chaymi Evata churargan Adanta yanapänanpaj. Jina Débora y Huldá warmicunata acrargan israelitacunata consejananpaj, juc reyta y juc jueztapis anyapargan (Juec. 4:4-9; 2 Rey. 22:14-20). Chaynolami canan wichanpis Jehová yäracun warmi caj sirvejnincunaman. Chaymi achca hermanacuna publicadoracunano, precursoracunano y misioneracunano yanapacärin. Waquincunaga Diosta aduranapaj localcunata sharcachiycho y alchachiycho yanapacun. Juccunaga Betelcho y Oficinas Remotas de Traducción nishgancho arupäcun. Lapancuna soldaducunano juc shongula arupäcun Jehovapaj (Sal. 68:11). Chaura Jehovapäga lapan warmicunami alapa valuryoj y tucuy habilidäyoj carcaycan.

¿IMANOTAJ HERMANUCUNA WARMICUNATA RICANMAN JEHOVÁ RICASHGANNO?

Hermanuläcuna, ¿imaraj yanapäshunqui warmicunata Jehová ricashganno ricanayquipaj? Chaypäga cuentata gocunanchi yarpayninchi y rurayninchicunapis imano cashganta. Imanomi rayos X maquinawanraj musyanchi shongunchi imano cashganta, chaynolami juc ali amigunchi y Diospa Palabranpis yanapämanchi cuentata gocunapaj imalachopis mejoranapaj, warmicunata respetuwan tratanapaj. Ricashun imanotaj chayta rurashwan.

Juc ali amiguwan parlapacushun (Prov. 18:17). Yäracuypaj, cuyacoj y ali tantiacoj amigunchiwan parlapacur, cayta tapupashwan: “¿Imanotaj hermanacunata trataycä? ¿Paycuna ninchuraj respetaycashgäta? ¿Imalachopis mejorämanchuraj?” nir. Imalachopis mejoranapaj nimaptinchega ama piñacushunchu. Chaypa trucanga nimashganchicunata ruranapaj calpachacushwan.

Diospa Palabranpita yachacushun. Bibliata leirga cuentata gocushun hermananchicunata imano trataycashganchita y paypita imata yarpaycashganchitapis (Heb. 4:12). Bibliacho wilacun waquin runacuna warmicunata ali tratashganta y waquincuna mana. Nircur ‘¿maygancunanoraj caycä?’ nirpis tapucushwan. Jina shumaj yarpachacushun achca textucuna ima nishganta warmicunapita, y Jehovapis imanotaj rican paycunata. Convienimashganchi textucunalapitaga ama yachacushunchu. 1 Pedro 3:7 textucho nin, warmicunaga “delicädu väsunömi kaykan”. b Chaura, ¿nishwanchuraj warmicuna habilidäniynaj y mana yachajpis cashganta? ¡Manami! Cay texto nishganta lutanpa mana  tantianapaj, yarpachacushun Gálatas 3:26-29 wilacushganman. Chaycho wilacun Jehová warmicunata y olgucunatapis acrashganta Jesuswan cielupita gobernapäcamunanpaj. Chaura Bibliapita yachacuptinchi y ali amigunchiwan parlapacuptinchega musyashunmi cuyacuywan y respetuwan hermananchicunata tratanapaj.

¿IMATA RURARTAJ ANCIANUCUNA HERMANANCHICUNATA RESPETAN?

Ancianucuna hermananchicunata ali tratashganta ricarmi, waquin hermanucunapis chaynola ruranga. Ricärishun ancianucuna imata rurartaj hermananchicunata respetanman y cuyanmanpis.

Felicitaycun. Ancianucunaga apóstol Pablo rurashganpita yachacunman. Payga Romacho caycaj cristianucunata cartacushgancho hermanacunata felicitargan (Rom. 16:12). Pablo felicitaycushganta mayar cristianacunaga alapachi cushicärergan. Chaynola canan wichan ancianucunapis hermananchicuna ali cristiana cashganpita y Jehovata ali sirviycashganpitapis cada cadala felicitaycun. Chayta ruraptin hermananchicuna respetashga y cuyashga ricacärin. Ancianucuna cada cadala hermananchicunata felicitaycuptenga paycuna shacya shacyala Jehovata sirvircaycanga (Prov. 15:23).

Hermanacuna imalatapis ali rurashganpita ancianucuna shongupita felicitarcunman. ¿Imanir? Jessica cayno nin: “Hermanunchicuna cuyamashpanchi ‘alita ruraycanqui’ nimaptinchega cushicunchimi. Pero masga cushicunchi imalatapis ali rurashganchipita felicitamaptinchi, capaz canman wamranchicunata yanapaptinchi ali comportacunanpaj o maygan estudiantilatapis reuniunman apanapaj calpachacuptinchi”. Ancianucuna chayta ruraptin hermananchicuna  congregaciuncho más cushishga arunga y valurashgapis sienticäringa.

Shumaj wiyapäcun. Ancianucuna humilde captenga, warmicuna ima yarpashgantapis cuentaman churan. Chaymi paycunawan parlapacurir shumaj wiyan hermananchicuna ima nishganta. Ancianucuna chayta ruraptenga, hermanacunaga cushicärinmi. ¿Y ancianucuna imanotaj sienticun chayta rurar? Betelcho yanapacoj Gerardo jutiyoj anciano cayno nin: “Cuentata gocurgä hermanacuna ima nimashganta cuentaman churaptë, ruranäpaj cajcunaga más aliraj yargupäman. Öraga waquin hermanacunaga más experienciayoj caycan olgucunapita imalatapis rurananpaj”. Congregaciunchoga achcami precursorano yanapacun, y paycunaga shumaj reguipäcun predicanapaj territoriucunata. Bryan jutiyoj ancianupis cayta nin: “Hermananchicunapäga imaycata rurananpaj caycan Diospa marcancho. ¡Paycunapitaga imaycata yachacunchi!”.

¿Imanirtaj ancianucunaga hermanacuna ima nishganta cuentaman churanman? Edward jutiyoj anciano cayno nin: “Juc pogushga cristianaga juc olguta ninmanmi imata cuentaman churananpaj imalatapis rurayta munaptin y waquincunawanpis más cuyacoj cananpaj” (Prov. 1:5). Öraga hermanacuna ima nishganta ancianucuna mana rurarpis, agradecicunmi consejuncunata.

Ali yachachin. Yachaj ancianucunaga calpachacunmi hermanacunata yachachinanpaj imalatapis rurananpaj. Capaz yachachinman predicaciunta pushananpaj juc bautizashga olgu mana captin. Jina shumaj tantiachinman localcunata sharcachiycho y Saluncunata cuidananpäpis maquinacunata imano manejananpaj. Betelcho caycaj hermanacunaga ali yachachishga caycan mantenimiento, compras, contabilidad, programación y mascunachopis shumaj arunanpaj. Ancianucunaga chay lapanta ruran hermananchicunapa habilidänincunaman yäracur.

Achca hermanacuna ancianucunapita ima yachacushgancunawan waquincunata yanapacun. Waquincunaga construcciuncho arunanpaj yachachishga captin, desgraciaraycur dañashga wasicunata alchachipäcun. Waquincunana predicananpaj yachacushgancunata juccunata yachachin paycunapis predicaciuncho ali yachachicoj capäcunanpaj. ¿Imataj hermanacuna nipäcun ancianucuna yachachishganpita? Jennifer nin: “Juc Salunta sharcachiycho yanapacuptë, juc anciano tiempunta camacächirgan shumaj yachachimänanpaj. Payga altanto caycargan imata ruraycashgäpita y felicitamajpis. Pay nogaman yäracuptin y ruraycashgäcunata valuraptin, cushishgala aroj cä”.

HERMANANCHICUNATAGA FAMILIANCHITANO RICASHWAN

Noganchipis Jehovanola hermananchicunata cuyayculanchi y familianchitano ricanchi (1 Tim. 5:1, 2). Cushicuyculanchimi paycunawan juntula Jehovata aduraptinchi, cuyashga y respetashga ricacäriptin. Vanessa nin: “Alapami cushicö Jehovapa marcancho cuyacoj y respetacoj hermanucunawan caycar”. Taiwanpita juc hermanapis nin: “Jehovata agradecicuyculämi marcancho warmicuna ima rurashganchipita valuramaptinchi y ima yarpashganchitapis cuentaman churaptin. Chayga yäracuynëtapis sinchiyächin y Jehovapa marcancho caycashgäpitapis masraj valuraycö”.

Jehovaga alapami cushicun olgu cristianucuna calpachacuptin hermanacunata ali y respetuwan trataptin (Prov. 27:11). Escocia naciunpita Benjamin jutiyoj anciano nin: “Diosta mana sirvej runacunaga warmicunata ni ichiclapis respetanchu. Pero noganchega munayculanchi Salunman shamoj warmicuna cuyashga ricacärinanpaj”. Chauraga imaypis calpachacushun Jehovano warmicunata cuyacuywan y respetuwan tratanapaj (Rom. 12:10).