Wakin iñiqmasinchikkunapa llaqtanpiqa warmikunatam qarikunaqa mana anchachu respetanku, manataqmi valorankuchu. Bolivia nacionpi llaqtan-llaqtan watukuq iñiqmasinchik Hansmi nin: “Achka llaqtakunapim qarikunaqa warmikunata mana kaqpaqta hina hapinku. Chaymi chayna llaqtakunapi wiñaq iñiqmasinchikkunaqa paninchikkunataqa qawarinkupaschu”, nispa. Taiwan nacionpi punta apaq iñiqmasinchik Shempas ninmi: “Yachasqay lawpi qarikunaqa ninkum: ‘Imatapas tantiana kaptinqa warmikunaqa manam tantiaysiwananchikchu’, nispa. Pi qaripas ‘warmiymi utaq mamaymi kaynata niwarqa, chayqa allinchusmi kanman’, nispa rimariptinqa qarimasinkunaqa manañam respetankuchu, hukmantañam qawanku”, nispa. Wakin qarikunañataqmi warmikunamanta asikuspa burlakunku, chaywanmi qawachinku mana ancha valorasqankuta.

Warmikunata mana ancha valorasqanku llaqtakunapi wiñaq iñiqmasinchikkunapas imayna piensasqankutaqa cambianmankum, hinaspam warmikunataqa valoranmankuña (Efes. 4:​22-24). Chaypaqqa Diostam qatipakunanku. Kay yachachikuypim yachasun warmikunata Diosninchik anchata valorasqanta. Yachasuntaqmi wawqinchikkunapas paninchikkunata valoranankumanta. Astawanraqmi punta apaqkunaqa chaypiqa qatipakunapaq hina kananku.

¿IMAYNATAQ JEHOVA DIOSQA WARMIKUNAWAN?

Jehova Diosqa warmikunataqa ancha-anchatam valoran, chaymi qarikunaqa payta qatipakunanku. Diosqa llakipayakuq taytanchik kasqanraykum warmitapas, qaritapas kuyawanchik (Juan 3:16). Serviqninkunataqa Diosqa astawanraqmi kuyan, chaymi paninchikkunatapas anchata kuyan. Qatiqninpiyá yachaykusun kuyasqanrayku paykunawan Dios imayna kasqanta.

Warmikunatapas qarikunata hinam anchata kuyan. Jehova Diosqa qaritapas, warmitapas payman rikchakuqtam unancharqa (Gen. 1:27). Diosqa manam qarikunallatachu allin piensaqtaqa chaynataq  allin ruwaqtaqa unancharqa, warmikunatapas chaynatam unancharqa. Chaymi warmikunapas bibliata allinta entiendenku chaynataq Diospa imayna kasqantapas allinta qatipakunku. Arí, Diosqa manam qarikunallatachu kuyan (2 Cron. 19:7). Warmikunatapas Diosqa anchatam kuyan, valorantaqmi paypaq tukuy ima ruwasqankutapas. Chaymi hamuq tiempopi wakinmanqa kay allpa pachapi wiñay kawsayta qunqa, wakinmanñataq hanaq pachapi. Hanaq pachapi kawsariq warmikunaqa kamachiqkunam hinaspa sacerdotekunam kanqaku (2 Ped. 1:1). Arí, Diosqa warmikunataqa manamá qarikunamanta menospaqchu qawan.

Warmikunatapas sumaqtam uyariykun. Jehova Diosqa yachaykuytam munan warmikuna imayna tarikusqankuta chaynataq ima sasachakuyniyuq kasqankuta. Chaymi Raqueltapas, Anatapas llakinkuta willakuptinku uyariykurqa hinaspam yanapaykurqa (Gen. 30:22; 1 Sam. 1:​10, 11, 19, 20). Chaymantapas, palabranpim qillqachirqa wakin yupaychaqninkunaqa warmikunata sumaqta uyariykusqanmanta. Abrahanmi warmin Sarata uyarirqa Jehova Dios kamachisqanrayku (Gen. 21:​12-14). Rey Davidpas Abigailtam uyarirqa. Nirqam Abigailtaqa Dios kachamusqanta (1 Sam. 25:​32-35). Jesuspas taytanpa imayna kasqanta qatipakusqanraykum maman Mariata uyarirqa (Juan 2:​3-10). Arí, Jehova Diosqa warmikunatapas uyariykunmi, chaywanmi yachanchik warmikunatapas anchata valorasqanta.

Warmikunapipas confianmi. Chaymi Evatapas Diosqa nirqa allpa pachanchik cuidaypi yanapakunanpaq (Gen. 1:28). Diosqa Evataqa manam qusan Adanmanta menos valorniyuqpaqchu hapirqa. Aswanqa ancha valorniyuq yanapakuqpaqmi. Paymanta willakuq Deboratapas hinaspa Huldatapas Israel runakunapa juezninta chaynataq kamachiqninta rimapayananpaqmi Diosqa kamachirqa. Chaytaqa ruwarqa chay warmikunapi confiasqanraykum (Juec. 4:​4-9; 2 Rey. 22:​14-20). Kunan tiempopas Diosqa paninchikkunatam saqin llaqtanpi yanapakunankupaq. Wakinmi yanapakuchkanku Diosmanta willakuspa, wakinñataq precursora kaspa utaq misionera kaspa. Wakinñataqmi yanapakuchkanku huñunakunanchik wasi ruwaypi utaq betel wasi allichaypi. Wakinñataqmi yanapakuchkanku betel wasinchikpi utaq huk rimayman qillqanchikkuna ruwana oficinakunapi. Paninchikkunaqa wara-waranqantinmi kanku. Paykunapiwanmá Jehova Diosqa munayninta ruwachkan (Sal. 68:11). Arí, Diosninchikqa warmikunataqa anchatamá valoran.

¿IMAYNATAM QARIKUNAQA PANINCHIKKUNATA DIOSNINCHIK HINA VALORANMANKU?

Wawqillaykuna, paninchikkunata Dios hina valorasqanchikta yachanapaqqa qawarikunanchikmi paykunamanta ima piensasqanchikta hinaspa paykunawan imayna kasqanchikta. Imaynam doctorpas aparatota servichikun runapa corazonnin allin utaq mana allin kasqanta yachananpaq, chaynam allin amistadninchikpas hinaspa Diospa palabranpas yanapawasun warmikunata Dios hina valorasqanchikta utaq mana valorasqanchikta yachanapaq. Chaymantayá yachaykusun.

Allin amistadninchikta tapukusun (Prov. 18:17). Confianzapaq hapisqanchik amistadninchikta qaritapas utaq warmitapas tapukusun, payqa kanan entiendeqmi hinaspa pimanpas mana sayapakuqmi. Kaynatam tapukuchwan: “Qawawasqaykiman hinaqa, ¿imaynataq paninchikkunawan ñuqaqa kani? ¿Yaqachu ninmanku respetasqayta? ¿Imatataq ruwayman astawan respetasqa sientekunankupaq?”, nispa. Imata ruwanapaq niwaptinchikqa chayllayá kasukusun, amayá piñakusunchu.

Diospa palabranta estudiasun. Warmikunata Dios hina valorananchikpaqqa bibliatam estudiananchik, hinaspam imayna piensasqanchikta hinaspa imapas ruwasqanchikta qawarikunanchik (Heb. 4:12). Bibliata estudiaspaqa yachasunmi warmikunata valoraq qarikunamanta chaynataq mana valoraqkunamantapas. Hinaspam qawarikunanchik pikuna hina kasqanchikta. Chaymantapas bibliapim estudiananchik warmikunamanta rimaq achka textokunata, huk textollapi hapipakuspam ichaqa warmikunataqa mana kaqpaqta hina qawachwan. 1 Pedro 3:7 nisqapim niwanchik warmikunaqa ‘chaylla pakikuruq vaso’ hina kasqankuta. a ¿Chaywanqa nichkanchu warmikunaqa qarikunamanta mana ancha yachayniyuq kasqankuta utaq imatapas mana allinta ruwasqankuta? ¡Manam! Pedropa nisqanta  allinta entiendeykunapaqmi yachaykusun Galatas 3:​26-29 nisqanmanta. Chaypim niwanchik Jehova Diosqa hanaq pachapi Jesuswan kuska kamachimunankupaq warmitapas, qaritapas akllarusqanmanta. Chaynaqa, bibliata estudiaspaqa hinaspa amistadninchikta tapuspaqa yachasunmi warmikunata Dios hina valorayta hinaspa respetaytapas.

¿IMAYNATAQ PUNTA APAQKUNAQA KANANKU PANINCHIKKUNAWAN?

Wawqinchikkunaqa paninchikkuna respetaytam yachanmanku punta apaqkuna paninchikkunawan imayna kasqanta qawaspanku. ¿Imaynam punta apaqkunaqa paninchikkunawan kananku chaynapi iñiqmasinchikkuna qawaspanku qatipakunankupaq? Qatiqninpiyá yachaykusun paninchikkunata respetaspankuqa hinaspa kuyaspankuqa imakunata ruwanankumanta.

Imapas ruwasqankumantam alabaykunanku. Punta apaqkunaqa apostol Pablotam qatipakunanku. Roma llaqtapi iñiqkunaman cartasqanpim Pabloqa achka paninchikkunata allin ruwasqankumanta alabaykurqa lliw yachanankupaq (Rom. 16:12). Chay cartata leeptinku sutinkuta uyarispaqa chaypi kaq paninchikkunaqa anchatachá kusikurqaku. Chaynam kunanpas punta apaqkunaqa paninchikkunata alabaykunku Diospa imayna kasqanta qatipakusqankurayku chaynataq llaqtanpi tukuy imapi yanapakusqankurayku. Hinaptinmi paninchikkunaqa valorasqa hinaspa kusisqa sientekunku. Kallpanchasqataqmi tarikunku imaña kaptinpas Jehova Diosta hinalla yupaychanankupaq (Prov. 15:23).

Punta apaqkunaqa sunqumantam paninchikkunata ima ruwasqankumantapas alabaykunku. ¿Imanasqam chayqa ancha allin? Chaymantam Yesica niwanchik: “Warmikunaqa kusikunikum ‘allintam ruwarunki’, nispa pipas niwaptinkuqa. Astawanraqmi kusikuniku imapas ruwasqaykumanta alabaykuwaptinkuqa. Huñunakuypi wawayku qasillalla kananpaq yachachisqaykumanta utaq pitapas huñunakuyman pusamusqaykumanta alabaykuwaptinkuqa anchatam kusikuniku”, nispa. Arí, punta apaqkuna paninchikkunata imapas ruwasqankumanta  alabaykuptinkuqa kusisqam tarikunku congregacionpi allinta yanapakusqankumanta yachaspanku.

Sumaqtam uyariykunanku. Humilde kaq punta apaqkunaqa riqsikunkum mana paykunalla allin piensaq kasqankuta. Chaymi paninchikkunata tapukunku hinaspam sumaqta uyariykunku paykunapa ima nisqantapas. ¿Imaynanpitaq paninchikkunata uyariyninkuqa ancha allin? Chaymantam betelpi yanapakuq punta apaq Gerardo nin: “Cuentatam qukuni paninchikkunata tapukuspayqa ima llamkaytapas aswan allinta ruwasqaymanta. Wakin paninchikkunaqa unayñam ima llamkaypipas kachkanku, chaymi aswan experienciayuq kanku”, nispa. Sapa congregacionpim achka paninchikkuna precursorakuna kanku, chaymi allinta riqsinku maykunapi Diosmanta willakusqanchikta. Punta apaq Brayanmi nin: “Paninchikkunaqa congregacionpiqa allintam yanapakunku. Chaymi tapukunanchik aswan experienciayuq kasqankurayku”, nispa.

Punta apaqkunaqa paninchikkunapa imapas nisqankutaqa ruwaymanmi churanku. ¿Imanasqataq chayqa allin? Punta apaq Eduardom nin: “Paninchikkunapa imapas nisqankuqa hinaspa experienciankuqa qarikunatam allinta yanapanman imamantapas aswan allinta entiendenankupaq utaq hukkunapi piensaspa aswan allinta tantianankupaq”, nispa (Prov. 1:5). Wakinpiqa manapaschá paninchikkunapa nisqanman hinapunichu punta apaqkunaqa ruwanqaku, chaywanpas agradecekunkum imapas nisqankumanta.

Imapipas yanapakunankupaqmi yachachinku. Allin yuyayniyuq punta apaqkunaqa paninchikkunatam yachachinku imatapas ruwanankupaq. Yachachinmankum Diosmanta imaynata willakunapaq huñunakuy ruwayta, chaynapi bautizasqa qarikuna mana kaptin paykuna encargakunankupaq. Yachachinmankutaqmi maquinakuna manejayta, chaynapi huñunakuna wasi ruwaypi utaq allichaypi yanapakunankupaq. Betelpi cuentallikuqkunapas paninchikkunatam yachachinku kay ruwaykunapi yanapakunankupaq: Imapas allichaypi, rantipakuypi, gastokuna anotaypi chaynataq computadorakuna allichaypi. Imatapas ruwanankupaq paninchikkunata yachachiq punta apaqkunaqa confiankum paykunaqa imapas encargasqankuta allinta ruwanankumanta.

Achka paninchikkunam kallpanchakunku punta apaqkunapa yachachisqankuman hina paykunapas hukkunata yanapanankupaq. Huñunakuna wasi ruwaypi yanapakunankupaq yachachisqa paninchikkunam iñiqmasinchikkunapa wasinta allicharqaku wayra-parawan tuñiruptin. Wakin paninchikkunañataqmi yachachisqa karqaku carretawan Diosmanta imaynata willakunankupaq. Paykunatam punta apaqkuna encarganku huk paninchikkunatapas paykunaña yachachinankupaq. ¿Imatam paninchikkunaqa ninku punta apaqkuna yachaykachisqankumanta? Yenifermi nin: “Huñunakunapaq wasi ruwaypi yanapakuptiymi hukkaqnin cuentallikuq yachaykachiwananpaq tiempochakurqa. Chay iñiqmasinchikqa imapas ruwasqay allin qispinanpaqmi sapa kuti yanapawaq hinaspam imapas allin ruwasqaymanta alabaykuwaq. Paywan llamkaspayqa kusisqam tarikuq kani yanapakuyta atisqayrayku”, nispa.

PANINCHIKKUNAWAN FAMILIANCHIKWANPAS HINA KASPAQA KUSISQAM KASUN

Jehova Dios hinam paninchikkunataqa anchata kuyanchik, chaymi familianchikwanpas hina paykunawanqa kanchik (1 Tim. 5:​1, 2). Paykunawan kuska Diosta yupaychayqa ancha kusikunapaqmi. Paykunaqa kusisqam tarikunku kuyaptinchik hinaspa yanapaptinchikqa. Paninchik Vanesam nin: “Diospa llaqtanpi turinchikkunaqa anchatam valorawan, chaymi kusisqa tarikuni llaqtanman Jehova Dios pusamuwasqanmanta”, nispa. Taiwan nacionmanta paninchikpas ninmi: “Ancha-anchatam agradecekuni Jehova Diosta hinaspa punta apaqkunata allin tarikunaykupaq tukuyta ruwasqankumanta. Chayqa anchatam kallpanchawan Jehova Diospi hinalla hapipakunaypaq”, nispa.

Jehova Diosqa ancha kusisqam tarikun wawqinchikkuna pay hina kuyakuqllaña paninchikkunawan kaptinkuqa (Prov. 27:11). Escocia nacionmanta punta apaq Benjaminmi nin: “Diosta mana riqsiq qarikunaqa yaqa llapankum warmikunataqa mana kaqpaqta hina hapinku. Chaymi huñunakuyninchikman hamuq warmikunataqa kuyakuywan chaskiykunanchik, chaynapi huk runakuna hina mana kasqanchikta qawanankupaq”, nispa. Wawqillaykuna, chaynaqa hinallayá Jehova Diosta qatipakusun chaynapi paninchikkuna kuyasqa hinaspa respetasqa sientekunankupaq (Rom. 12:10).