Kua utuutuia tetai pae i te au enua e peu mātauia na te au tane i te taakaaka i te vaine. Ei akaraanga, karanga a Hans, e akaaere kotinga i Bolivia: “Kua utuutuia te au tane ei au tumutoa ma te manako akaaka i te au vaine.” b Karanga te tangata pakari ko Shengxian i Taiwan: “I toku ngai nooanga, kare te vaine e akatikaia kia akakite mai i tona manako. Me taiku mai te tane i te manako o tetai vaine, ka akavaavaaia aia e tona au oa.” Tetai au tane, ka taakaaka ratou i te vaine na tetai au ravenga ke atu. Ei akaraanga, penei ka tuatua viivii ratou no runga i te vaine na roto i te tu kanga.

Noatu te turanga i utuutuia mai te tane, ka rauka iaia i te taui i tona manako e kia akangateitei i te au vaine. (Ephe. 4:​22-24) Na te aru anga i te akaraanga o Iehova. I teia atikara, ka uriuri tatou akapeea a Iehova i te akangateitei anga i te au vaine, akapeea te au taeake me akono i te vaine mei ia Iehova rai e akapeea te aronga pakari me akangateitei i te au tuaine.

AKAPEEA A IEHOVA ME AKANGATEITEI I TE AU VAINE?

Ko Iehova te akaraanga meitaki rava atu no te akangateitei i te au vaine. Ei Metua aroa, e akaperepere ana aia i tana tamariki. (Ioa. 3:16) E kua aiteite te au tuaine mei te au tamaine akaperepereia. Akamanako i tetai au ravenga ka akangateitei a Iehova i te vaine.

Akaari aia i te tu papakitai kore. Kua anga a Iehova i te tane e te vaine i tona tu. (Gene. 1:27) Kare aia i anga i te tane kia meitaki atu i te vaine. (2 Para. 19:7) Mari ra,  kua anga aia i te tane e te vaine kia rauka ia raua kia mārama i te tuatua mou e kia aru i tona au tu manea. Akaperepere katoa a Iehova i te tu tiratiratu o te tane e te vaine, noatu to ratou manakonakoanga kia noo i te enua parataito me kore kia tavini ei ui ariki e ei kau taunga i te rangi. (2 Pete. 1:1) Mea papu, kare a Iehova e akavaavaa i te vaine.

Akarongo aia kia ratou. Te akono maira a Iehova i te manako e te au manamanata o te vaine. Kua akarongo e kua pau aia i te pure a Rahela e Hana. (Gene. 30:22; 1 Samu. 1:​10, 11, 19, 20) Kua akakeu katoa a Iehova i te aronga tata Pipiria kia taiku i te au akaraanga no te au tane tei akarongo ki te vaine. Ei akaraanga, kua aru a Aberahama i ta Iehova aratakianga kia akarongo ki tana vaine ko Sara. (Gene. 21:​12-14) Kua akarongo te Ariki ko Davida kia Abigaila. Kua papu ia Davida e na Iehova i tono ia Abigaila kia tuatua kiaia. (1 Samu. 25:​32-35) E kua akaari tikai a Iesu i te tu o tona Metua na te akarongo anga ki tona metua vaine ko Maria. (Ioa. 2:​3-10) Te apii nei teia au akaraanga e te akangateitei ra a Iehova i te au vaine na te akarongo anga kia ratou.

Irinaki aia ia ratou. Ei akaraanga, kua irinaki a Iehova e ka tauturu a Eva i te akono i te enua. (Gene. 1:28) Akaari teia i to Iehova manako e e tauturu meitaki a Eva no tana tane ko Adamu. Kua irinaki katoa a Iehova i te nga peroveta vaine ko Debora e Hulada kia akamaroiroi i tona iti tangata, kapiti mai tetai ariki e tetai taunga. (Aka. 4:​4-9; 2 Ari. 22:​14-20) I teia rā, te irinaki ra a Iehova i te au vaine Kerititiano kia rave i tana angaanga. Te tavini nei teia au tuaine ei au papuritia, painia e ei au mitinari. Te tauturu katoa nei ratou i te parani, akatu e te akono i te au Are Uipaanga Patireia e te au opati Betela. Tetai pae, te tavini nei i Betela e i roto i te opati uri reo. E nuku vaine maata teia au tuaine ta Iehova e taangaanga nei no te akatupu i tona anoano. (Sala. 68:11) Taka meitaki, kare a Iehova e manako ana e e paruparu te vaine.

AKAPEEA TE AU TAEAKE ME AKANGATEITEI I TE AU VAINE MEI IA IEHOVA RAI?

E te au taeake, kia kite e te akangateitei ra kotou i te au tuaine Kerititiano mei ia Iehova rai, ka anoanoia kotou kia akara matatio i to kotou aerenga manako e ta kotou e rave ra. Ka anoanoia te tauturu no te rave i te reira. Mei tetai matini X-ray rai, ka akara oonu atu i te pukuatu o tetai tangata. Ka tauturu katoa tetai oa meitaki e pera te Tuatua a te Atua ia koe kia kite me te aru ra koe i to Iehova manako no te vaine. Akapeea e rauka ai teia tauturu?

Pati i te tauturu a tetai oa meitaki. (Mase. 18:17) E pati i tetai oa irinakiia kia akakite mai i tona manako no teia au uianga: “E akangateitei ana au i te au tuaine? Ka manako ainei te au tuaine e te akangateiteiia ra ratou? Eaa taku ka rave kia akameitaki i toku tu ki te au vaine?” Me akakite mai toou oa e ka anoanoia tetai au akatikatikaanga, auraka e kimi kotoeanga. Mari ra e tauta i te rave i te reira.

Apii i te Tuatua a te Atua. Tetai ravenga meitaki kia kite e te akangateitei ra tatou i te au tuaine, na te akaaite anga i to tatou tu e te aerenga manako ki ta te Pipiria e apii maira. (Ebe. 4:12) I roto i te Pipiria, ka apii mai tatou no runga i tetai au tane tei akangateitei i te vaine e te au tane tei kore i rave i te reira. Mei to ratou akaraanga, ka kite mai tatou i te mea tau no tatou kia rave. Auraka te au taeake e taangaanga e tai irava Pipiria ei turu i tetai manako tarevake no runga i te vaine. Mari ra, kia akamanako ratou i tetai au irava ke. Ei akaraanga, i roto ia 1 Petero 3:​7, ka anoanoia te tane kia “akangateitei . . . i te vaine, i te āriki paruparu ra.” c Ko te aiteanga ainei e iti ua to te vaine kite e te pakari ki to te tane? Kare  rava! Me akaaite i ta Petero i tuatua ki te irava ia Galatia 3:​26-29, te akataka ra e kua iki a Iehova i te tane e te vaine kia tutara kapiti ma Iesu i te rangi. No reira, me apii tatou i te Tuatua a te Atua e me pati i te tauturu a tetai oa meitaki, ka rauka ia tatou i te akangateitei i te au tuaine.

AKAPEEA TE ARONGA PAKARI ME AKANGATEITEI I TE AU TUAINE?

Ka apii katoa te au taeake i roto i te putuputuanga kia akangateitei i te au tuaine, na te aru anga i te akaraanga o te aronga pakari. Akapeea te aronga pakari me akangateitei i te au tuaine? Akamanako i teia au ravenga.

Akameitaki ratou i te au tuaine. E akaraanga meitaki te apotetoro ko Paulo no te aronga pakari. I roto i tana reta ki te putuputuanga i Roma, kua akameitaki aia i tetai au tuaine. (Roma 16:12) Akamanako i te mataora o teia au tuaine te tatauia anga te reta a Paulo ki te putuputuanga. Mei te reira katoa, ka akameitaki te aronga pakari i te au tuaine no to ratou tu meitaki e ta ratou angaanga e rave ra na Iehova. Ka kite mai te au tuaine te akaperepere ra e te akangateiteiia ra ratou. Ka riro te tuatua akamaroiroi a tetai tangata pakari ei tauturu i te au tuaine kia tavini tiratiratu ia Iehova.—Mase. 15:23.

Me akameitaki te aronga pakari i te au tuaine, e oronga i te reira ma te taka meitaki e te ngakau tae. Eaa ra? Karanga tetai tuaine ko Jessica: “Mea mataora me tuatua mai te au taeake ki tetai tuaine ‘E angaanga meitaki taau e rave ana.’ Inara ka meitaki atu me taka meitaki ta ratou tuatua akamaroiroi. Penei no te apii anga i te tamariki kia noo marie i ko i te uipaanga me kore te apai  mai i ta ratou aronga apii Pipiria ki te uipaanga.” Me akameitaki te aronga pakari i te au tuaine, ka kite ratou e te akaperepere ra te putuputuanga ia ratou.

Akarongo ratou ki te au tuaine. Ka akaari te aronga pakari i te tu akaaka me āriki ratou e kare no ratou ua te manako meitaki. No reira ka pati ratou i te au tuaine no to ratou manako e ka akarongo meitaki kia ratou. Ka puapinga i reira te aronga pakari e te au tuaine. Akapeea? Karanga mai tetai tangata pakari e tavini ra i Betela ko Gerardo: “Kua kite mai au e me pati au i te manako o te au tuaine, ka tauturu te reira iaku kia akameitaki i taku angaanga. Te maataanga o te taime, kua roa ratou i te angaanga i Betela.” I roto i te putuputuanga, e maata te au tuaine e tavini ra ei painia tamou, no reira kua kite meitaki ratou i te tu o te tangata i te ngai tutu aere. Karanga tetai tangata pakari ko Bryan: “E maata ta te au tuaine ka oronga mai ki te akaaerenga. No reira e apii i to ratou akaraanga!”

E mea meitaki auraka te aronga pakari e viviki i te kopae i te manako o te au tuaine. No teaa ra? Karanga tetai tangata pakari ko Edward: “Ka tauturu te manako e te akaraanga o tetai tuaine i tetai taeake kia mārama meitaki i tona turanga e kia aroa ua.” (Mase. 1:5) Noatu me kare e ārikiia te manako o te tuaine, ka tau rai te tangata pakari kia akameitaki iaia.

Tereni ratou i te au tuaine. Ka tauta te aronga pakari i te tereni i te au tuaine. Ei akaraanga, ka apii ratou i te au tuaine me rave i te uipaanga no te tutu aere me kare e taeake papetitoia i reira. Ka tereni katoa ratou i te au tuaine kia taangaanga i te au apinga e te au matini no te akaou anga e te pātu anga i te au are akamorianga. I Betela, ka tereniia ratou kia akono i te au angaanga tukeke mei te angaanga ripea, oko apinga, akono i te moni, te komupiuta e te vai atura. Me rave meitaki te aronga pakari i teia, te irinaki ra ratou i te au tuaine.

Kua taangaanga te au tuaine i te terenianga a te aronga pakari kia tauturu i tetai ke. Ei akaraanga, kua rauka i te au tuaine tei apii i te angaanga pātu i te ripea i te are o te au taeake i muri ake i te tumatetenga. E pera te au tuaine karape i te taangaanga i te pereoo puka no te tutu aere, kua tereni i tetai au tuaine ke kia rave i te reira. Eaa to ratou manako no te terenianga a te aronga pakari? Karanga a Jennifer: “Te rave anga au i te angaanga pātu i te Are Uipaanga Patireia, kua akapou tetai akaaere i tona taime i te tereni iaku. Kite mai aia i taku angaanga e kua akameitaki mai iaku. Reka tikai au i te angaanga i te pae iaia no te mea kua irinaki e kua akaperepereia au.”

AKANGATEITEI I TE AU TUAINE

Akaperepere tatou i te au tuaine tiratiratu mei ia Iehova rai! Akangateitei katoa tatou ia ratou. (1 Timo. 5:​1, 2) Ka mataora katoa tatou i te angaanga kapiti kia ratou e te kite i to ratou aroa. Karanga a Vanessa: “Akameitaki au ia Iehova no tana akaaerenga e te akamaroiroianga a te au taeake.” Akakite tetai tuaine i Taiwan: “Mareka tikai au e te akangateitei ra a Iehova e tana akaaerenga i te au vaine e to ratou manako ngakau. Kua akaketaketa teia i toku akarongo e te āriki rekareka nei au i te tikaanga ngateitei kia piri atu ki ta Iehova akaaerenga.”

Mareka a Iehova me kite aia i te au taeake Kerititiano e tauta ra i te akangateitei i te vaine mei iaia rai! (Mase. 27:11) Karanga tetai tangata pakari i Scotland ko Benjamin: “Te taakaaka ra te au tane o teianei ao i te vaine. No reira, me tomo mai tetai vaine ki roto i te Are Uipaanga Patireia, ka kite aia i te tuke.” Kia tauta pakari tatou i te aru ia Iehova na te akangateitei anga i to tatou au tuaine akaperepere mei iaia rai.—Roma 12:10.