Μερικοί μπαριλέ εκχέ κουλτουράτε σο μπουτ μουρσά συμπεριφερίντιβενα κο τζουβλιά σαρ τι αβένας πο τελέ λένταρ. Για παράδειγμας, ο Χανς, εκ επίσκοπος περιοχής κι Βολιβία, βακερέλα: «Μερικά μουρσά μπαριλέ εκχέ κουλτουράτε σο τσσίντελα-λεν τι αβέν μπαρικανέ. Ανταλά μουρσά αμντίνενα ότι ισί πο οπρέ κατά τζουβλιά, ντα μπουτ φαρ συμπεριφερίντιβενα λένγκε χωρίς σεβασμός». Ο Σενγκσιάν, εκ πρεσβύτερος κι Ταϊβάν, βακερέλα: «Οτθέ σο μπεσάβα, μπουτ μουρσά πακιάνα ότι ο τζουβλιά δεν πρέπει τι ανακατούντιβεν λένγκε μπουτιέντε. Άμα εκ μουρς βακερέλα ι άποψη εκχέ τζουβλιάκι για εκ πράγμας, ο γιαβερά μουρσά μπέκιμ τι πρασάνα-λες». Κάποια γιαβερά μουρσά τθερένα ρατσισμός ι τζουβλίνγκε αλλά σικαβένα-λες τροπόντζαρ σο να αγαντίντιβενα εύκολα. Για παράδειγμας, μπέκιμ βακερένα σακάδες σο ισί κερντέ για τι σικαβέν ότι ο τζουβλιά ισί πο τελέ.

Ευτυχώς, καλέ-ντα κουλτουράσαρ τι μπαριλό εκ μουρς, μπορίνελα τι αλλάνελ. Μπορίνελα τι σικλιόλ ότι εμ ο μουρσά εμ ο τζουβλιά τθερένα ι ίδια αξία. (Εφεσ. 4:22-24) Εκ μουρς μπορίνελα τι κερέλ-λες ανταβά καζόμ μοιάζελα κο Ιεχωβά. Ανταλέ θεμάστε, κα ντικχάς σαρ συμπεριφερίντιβελα ο Ιεχωβά κο τζουβλιά, σαρ μπορίνενα ο πφραλά τι σικλιόν τι συμπεριφερίντιβεν κο τζουβλιά σαρ ο Ιεχωβά, ντα σαρ ο πρεσβύτεροι μπορίνενα πρώτα βον τι σικαβέν σεβασμός κο πφενιά.

ΣΑΡ ΣΥΜΠΕΡΙΦΕΡΙΝΤΙΒΕΛΑ Ο ΙΕΧΩΒΑ ΚΟ ΤΖΟΥΒΛΙΑ;

Ο Ιεχωβά ισί ο τέλειος παράδειγμας κο τρόπος σο πρέπει τι συμπεριφερίντιβας κο τζουβλιά. Ισί εκ Ντατ σο πφαμπόλα σαρέ πι τσσαβένγκε. (Ιωάν. 3:16) Ο πιστά πφενιά ισί σαρ τσσαγιά λέσκε, ντα ισί λέσκε πολύτιμες. Ντικχέν ο τρόποι σο ο Ιεχωβά σικαβέλα κο τζουβλιά ότι μανγκέλα-λεν ντα σεβάνελα-λεν.

Να ξεχωρίνελα ι τζουβλίν. Ο Ιεχωβά δημιουργιντάς εμ ι μουρσέν εμ ι τζουβλίν τι μοιάζεν λέστε.  (Γέν. 1:27) Να ντινάς ι μουρσέν πο μπουτ γκοντί ή πο μπουτ ταλέντα κατά τζουβλιά. Ούτε συμπαθίνελα πο μπουτ ι μουρσέν κατά τζουβλιά. (2 Χρον. 19:7) Δημιουργιντάς ι μουρσέν ντα ι τζουβλίν με την ίδια ικανότητα τι αγαβέν ο αλήθειες ι Γραφιάκε ντα τι σικαβέν ο σουκάρ ιδιότητες λέσκε. Επίσης, ο Ιεχωβά εκτιμίνελα εμ ι μουρσέν εμ ι τζουβλίν σο πακιάνα λέστε​—είτε τθερένα ι ελπίδα τι τζουβντιόν για πάντα κο παράδεισος κι πφουβ είτε τι υπηρετίνεν σαρ βασιλιάδες ντα ιερείς κο ουρανός. (2 Πέτρ. 1:1) Σίγουρα, ο Ιεχωβά να ξεχωρίνελα ι τζουβλίν.

Ασουνέλα προσεκτικά ι τζουβλίν. Ο Ιεχωβά ενδιαφερίντιβελα για το αισθήματα ι τζουβλίνγκε ντα ι πραγματένγκε σο ανησυχίνενα-λεν. Για παράδειγμας, ασουντάς προσεκτικά ο προσευχές σο κερντάς η Ραχήλ ντα η Άννα, ντα απαντιντάς λένγκε προσευχιέντε. (Γέν. 30:22· 1 Σαμ. 1:10, 11, 19, 20) Επίσης, ο Ιεχωβά κανονιντάς τι υπαρχίντιβεν κι Γραφή ιστορίες μουρσένγκε σο ασουντέ προσεκτικά μερικέ τζουβλίν. Για παράδειγμας, ο Αβραάμ ντινάς καν κι εντολή κι Ιεχωβάσκι τι ασουνέλ πι ρομνιά, ι Σαρρά. (Γέν. 21:12-14) Ο βασιλιάς Δαβίδ ασουντάς την Αβιγαία. Ντα νιωσάλο ότι ο Ιεχωβά μπουτσσαντάας-λα τι κερέλ λέσαρ λάφι. (1 Σαμ. 25:32-35) Ο Ιησούς, σο σικαβέλα τέλεια o ιδιότητες πι Νταντέσκε, ασουντάς πι νταγιά, ι Μαριά. (Ιωάν. 2:3-10) Ανταλά παραδείγματα σικαβένα ότι εκ τρόπος σο ο Ιεχωβά σικαβέλα σεβασμός κο τζουβλιά ισί κάνα ασουνέλα-λεν προσεκτικά.

Ντέλα μπέσα κο τζουβλιά. Για παράδειγμας, ο Ιεχωβά ντινάς μπέσα κι Εύα, ντα ντινάς λάτε-ντα ι ευθύνη τι φροντίνελ σαρί ι πφουβ. (Γέν. 1:28) Κάνα κερντάς-λες ανταβά, σικαντάς ότι να ντικχέλας-λα πο τελέ λάκε ρομέσταρ, τον Αδάμ, αλλά πακιάλας ότι ισινέ πολύτιμη βοήθεια πι ρομέσκε. Ο Ιεχωβά ντινάς μπέσα εμ κο προφήτισσες Δεββώρα ντα Όλδα για τι ντεν συμβουλές λέσκε λαόστε, αλλά εμ κο βασιλιάδες ντα κο ιερείς. (Κριτ. 4:4-9· 2 Βασ. 22:14-20) Αντιβές, ο Ιεχωβά ντέλα μπέσα Χριστιανέ τζουβλίντε για τι κερέν λέσκο έργος. Οντουλά πιστά πφενιά υπηρετίνενα σαρ ευαγγελιζόμενες, σκαπάνισσες ντα ιεραπόστολοι. Βοηθίνενα κο σχεδιασμός, κο χτίσιμος ντα κο λατσσαριπέ σο αβέλα-πες κο Αίθουσες Βασιλείας ντα κο γραφεία τμήματος. Μερικές ανταλένταρ υπηρετίνενα κο Μπέθελ, ενώ γιαβερά κο απομακρυσμέ μεταφραστικά γραφεία. Ανταλά πφενιά ισί σαρ μπαρό στρατός, σο χρησιμοποιήνελα ο Ιεχωβά για τι κερέλ πο θέλημας. (Ψαλμ. 68:11) Ισί ξεκάθαρος ότι ο Ιεχωβά να πακιάλα ότι ο τζουβλιά ισί μπίζουρανε ή ανίκανες.

ΣΑΡ ΜΠΟΡΙΝΕΝΑ Ο ΠΦΡΑΛΑ ΤΙ ΣΙΚΛΙΟΝ ΤΙ ΣΥΜΠΕΡΙΦΕΡΙΝΤΙΒΕΝ ΚΟ ΤΖΟΥΒΛΙΑ ΣΑΡ Ο ΙΕΧΩΒΑ;

Πφραλάλεν, για τι αγαβάς άμα συμπεριφερίντιβασα κο πφενιά σαρ ο Ιεχωβά, χρειαζίντιβελα τι εξετάνας προσεκτικά σαρ σκεφτίνασα ντα σο κεράσα. Για τι κεράς-λες ανταβά, χρειαζίντιβασα βοήθεια. Σαρ εκ ακτινογραφία μπορίνελα τι αρακχέλ εκ πρόβλημας αμαρέ καρδιάτε, αντικάς-ντα εκ λατσσό αμάλ ντα ο Λάφι ι Ντεβλέσκο μπορίνενα τι βοηθίνεν-αμέν τι αρακχάς άμα τθεράσα ντιπ αντρ’ αμέντε μπέτι αισθήματα ι τζουβλίνγκε. Σαρ μπορίνασα τι λας ανταγιά βοήθεια;

Πουτσέν εκχέ λατσσέ αμαλές. (Παρ. 18:17) Κα μπορίναας τι τζας εκχέ μπεσαλή αμαλέστε, σο ισί εκ λατσσό ντα ισορροπημέ τζενό, ντα τι πουτσάς-λες: “Σαρ πακιάσα ότι συμπεριφερίντιβαβα κο πφενιά; Νιωθίνενα ότι σεβάναβα-λεν; Μήπως χρειαζίντιβελα τι αλλάναβ κάτι κο τρόπος σο συμπεριφερίντιβαβα λένγκε;” Άμα τουμαρό αμάλ κα βακερέλ τουμένγκε κάποια πράγματα σο κα μπορίνενας τι αλλάνεν, μα προσβαλίντιβεν. Οκιά μπάνταρ, κερέν αντράλ τουμαρέ γκίσταρ ο αλλαγές σο πρέπει τι κερέν.

Τι σικλιαρέν-τουμέν κατά Λάφι ι Ντεβλέσκο. Ο πο λατσσό τρόπος για τι αγαβάς άμα συμπεριφερίντιβασα λατσσές κο πφενιά ισί τι χρησιμοποιήνας ο Λάφι ι Ντεβλέσκο για τι εξετάνας ο τρόπος σο σκεφτίνασα ντα ο πράγματα σο κεράσα. (Εβρ. 4:12) Καζόμ σικλιαράσα-αμέν κατά Γραφή, σικλιάσα μουρσένγκε σο συμπεριφερίντιβενας λατσσές κο τζουβλιά, ντα μουρσένγκε σο να κερένας-λες ανταβά. Σοράν, μπορίνασα τι συγκρίνας ανταλά παραδείγματα ι τροπόσαρ σο συμπεριφερίντιβασα αμέν κο τζουβλιά. Επίσης, δεν πρέπει τι χρησιμοποιήνας σάντε εκ εδάφιος για τι υποστηρίνας εκ λάθος άποψη σο τθεράσα ι τζουβλίνγκε. Οκιά μπάνταρ, πρέπει τι εξετάνας μπουτ εδάφια ανταλέ θεμάσκε. Για παράδειγμας, σαρ βακερέλα ο εδάφιος 1 Πέτρου 3:7, η ρομνί αξίνελα “σεβασμός σόσκε νανέ αζόμ ζουρανί”. b Μήπως ανταβά μανγκέλα τι βακερέλ ότι ισί πο τελέ εκχέ μουρσέσταρ, δηλαδή  ότι νανέ αζόμ έξυπνη ή να τθερέλα αζόμ μπουτ ικανότητες; Σίγουρα όχι! Συγκρίνεν ο λάφια ι Πετρόσκε οντουλέσαρ σο σικαβένα ο εδάφια Γαλάτες 3:26-29, δηλαδή ότι ο Ιεχωβά τραμπιντάς εμ τζουβλίν εμ μουρσέν για τι κυβερνίνεν ι Ιησούσαρ κο ουρανός. Άμα κα σικλιαράς-αμέν κατά Λάφι ι Ντεβλέσκο ντα άμα κα πουτσάς εκχέ λατσσέ αμαλές ή εκχέ λατσσέ αμαλινά σαρ ντικχέλα ότι συμπεριφερίντιβασα κο τζουβλιά, μπορίνασα τι σικλιάς τι σικαβάς αμαρέ πφενίντε ο σεβασμός σο αξίνενα.

ΣΑΡ ΣΙΚΑΒΕΝΑ Ο ΠΡΕΣΒΥΤΕΡΟΙ ΣΕΒΑΣΜΟΣ ΚΟ ΠΦΕΝΙΑ;

Ο πφραλά κι κχανγκιρί μπορίνενα επίσης τι σικλιόν τι συμπεριφερίντιβεν με σεβασμός κο πφενιά άμα ακολουθίνενα ο παράδειγμας ι πρεσβυτερόνγκο σο σικαβένα αγάπη. Σαρ ισί ο πρεσβύτεροι λατσσό παράδειγμας οπράλ ανταλέστε; Ντικχέν μερικούς τρόπους.

Ισαρένα ι πφενίν. Ο απόστολος Παύλος ισινέ λατσσό παράδειγμας ι πρεσβυτερόνγκε. Ισαρντάς μπουτέ πφενίν κι επιστολή σο γραφιντάς κι κχανγκιρί κι Ρώμη. (Ρωμ. 16:12) Ανένα τουμαρέ γκοντιάτε καζόμ χαρά πρέπει τι νιωθίνενας ανταλά πφενιά κάνα η επιστολή ι Παυλόσκι διαβάντιλι κι κχανγκιρί; Αντικάς-ντα, ο πρεσβύτεροι ισαρένα μπουτ ι πφενίν για το λατσσέ ιδιότητες σο τθερένα ντα για το έργος σο κερένα ι Ιεχωβάσκε. Ανταλέ τροπόσαρ, ο πφενιά αγαβένα καζόμ μπουτ σεβάνενα-λεν ντα εκτιμίνενα-λεν. Ο λάφια εκχέ πρεσβυτερόσκε σο ντένα ζορ μπορεί τι αβέν ακριβώς οντουβά σο χρειαζίντιβενα οντουλά πφενιά καζόμ συνεχίνενα τι υπηρετίνεν πιστά ι Ιεχωβάς.​—Παρ. 15:23.

Κάνα ο πρεσβύτεροι ισαρένα ι πφενίν, κερένα-λες ανταβά αντράλ πουμαρέ γκίσταρ ντα συγκεκριμέ πραγματένγκε. Σόσκε; Εκ πφεν, η Τζέσικα, βακερέλα: «Ισί σουκάρ κάνα ο πφραλά βακερένα εκχέ πφενιάκε “μπράβο”. Αλλά εκτιμίνασα-λες μπουτ κάνα ο πφραλά ισαρένα-αμέν εκχέ συγκεκριμέ πραγμάσκε, για παράδειγμας επειδή σικλιαράσα αμαρέ τσσαβέν τι μπεσέν φρόνιμα κι συνάθροιση ή επειδή κεράσα προσπάθεια για τι ανάς κι συνάθροιση εκχέ τζουβλιά  σο κερέλα μελέτη». Κάνα ο πρεσβύτεροι ισαρένα ι πφενίν εκχέ συγκεκριμέ πραγμάσκε, κερένα-λεν τι νιωθίνεν χρήσιμες ντα πολύτιμες κι κχανγκιρί.

Ασουνένα προσεκτικά ι πφενίν. Ο ταπεινοί πρεσβύτεροι αγαβένα ότι να τθερένα σάντε βον λατσσέ ιδέες. Οντουλά πρεσβύτεροι μανγκένα κατά πφενιά τι βακερέν πουμαρί άποψη μπουτέ πραγματένγκε ντα ασουνένα προσεκτικά κάνα κερένα λάφι ο πφενιά. Ανταλέ τροπόσαρ, ο πρεσβύτεροι ντένα ζορ κο πφενιά, αλλά βοηθίντιβενα εμ βον. Σαρ; Εκ πρεσβύτερος, ο Χεράρντο, σο υπηρετίνελα κο Μπέθελ, βακερέλα: «Αγαντόμ ότι, κάνα μανγκάβα κατά πφενιά τι βακερέν μάνγκε πουμαρί άποψη, ανταβά βοηθίνελα-μαν τι κεράβ μο έργος πο λατσσές. Μπουτέ περιπτωσιέντε, ο πφενιά κερένα ανταγιά μπουτί πο μπουτ βακίτι μπουτέ πφραλένταρ». Κι κχανγκιρί, μπουτ πφενιά υπηρετίνενα σαρ σκαπάνισσες, οτθάρ τζανένα μπουτ πράγματα ι τζενένγκε σο τζουβντιόνα λένγκε περιοχιάτε. Εκ πρεσβύτερος, ο Μπράιαν, βακερέλα: «Αμαρέ πφενιά τθερένα μπουτ λατσσέ ιδιότητες ντα ικανότητες σο χρειαζίντιβελα η οργάνωση. Τι βοηθίντιβεν κατά εμπειρία λένγκι!»

Ο γκοντιαβέρ πρεσβύτεροι να σιγκιαρένα τι βακερέν «όχι» κο ιδέες σο βακερέλα εκ πφεν. Σόσκε; «Η γνώμη ντα η εμπειρία εκχέ πφενιάκι μπορίνελα τι βοηθίνελ εκχέ πφραλές τι αγαβέλ πο λατσσές εκ πράγμας, ντα τι αγαβέλ πο λατσσές ο αισθήματα ι γιαβερένγκε», βακερέλα εκ πρεσβύτερος, ο Έντουαρντ. (Παρ. 1:5) Ατζέ-ντα άμα εκ πρεσβύτερος να μπορίνελα τι κερέλ ι ιδέα σο βακερντάς εκ πφεν, μπορίνελα τι βακερέλ λάκε ευχαριστώ για την ιδέα ανταγιά ντα τι βακερέλ λάκε ότι τθερέλα ι ικανότητα τι αγαβέλ μπουτ πράγματα.

Σικλιαρένα ι πφενίν. Ο γκοντιαβέρ πρεσβύτεροι ρόντενα ευκαιρίες για τι σικλιαρέν ι πφενίν. Για παράδειγμας, μπορίνενα τι σικλιαρέν μερικέ πφενίν σαρ τι κερέν ξεκινήματα, για τι αβέν έτοιμες άμα να κα υπαρχίντιβελ κο ξεκίνημας καέκ μπολντό πφραλ. Μπορίνενα τι σικλιαρέν-λεν τι χρησιμοποιήνεν εργαλεία ή μηχανήματα για τι βοηθίνεν κο χτίσιμος ή κο λατσσαριπέ εκχέ τθανέσκο σο ντάσα λατρεία. Κο Μπέθελ, ο υπεύθυνα πφραλά σικλιαρένα πφενίν τι κερέν μπουτ διορισμούς, σαρ ισί τι λατσσαρέν ο κτίρια, τι ποκινέν πράγματα, τι ασχολίντιβεν με λογιστικά, με υπολογιστές ντα γιαβερέ ασακέ πραγματέντζαρ. Κάνα ο πρεσβύτεροι σικλιαρένα ι πφενίν, σικαβένα ότι ντικχένα-λεν ικανές ντα μπεσαλήδες.

Μπουτ πφενιά χρησιμοποιήνενα ο σικλιαριπέ σο λιντέ κατά πρεσβύτεροι για τι βοηθίνεν γιαβερέν. Για παράδειγμας, μερικά πφενιά χρησιμοποιήνενα ο σικλιαριπέ σο λιντέ κάνα χτίνενας αίθουσες για τι βοηθίνεν γιαβερέν τι χτίνεν πάλι πουμαρέ κχερά σοράν από εκ φυσική καταστροφή. Γιαβερά πφενιά χρησιμοποιήνενα ο πράγματα σο σικλιλέ κο έργος με το σταντ για τι βοηθίνεν πο μπουτ πφενίν τι κερέν βον-ντα ανταβά έργος. Σαρ νιωθίνενα ο πφενιά ι πρεσβυτερόνγκε σο σικλιαρντέ-λεν; Εκ πφεν, η Τζένιφερ, βακερέλα: «Κάνα βοηθίναβας τι κερντιόλ εκ Αίθουσα Βασιλείας, εκ υπεύθυνος πφραλ ντινάς πι σαατίσταρ για τι σικλιαρέλ-μαν. Ντικχέλας ι μπουτί σο κεράβας ντα ισαρέλας-μαν. Μανγκάβας μπουτ τι κεράβ μπουτί λέσαρ επειδή νιωθίναβας ότι εκτιμίνενα-μαν ντα ντένα μάνγκε μπέσα».

ΣΑΡ ΒΟΗΘΙΝΤΙΒΑΣΑ ΑΜΑ ΝΤΙΚΧΑΣΑ Ι ΠΦΕΝΙΝ ΣΑΡ ΑΜΑΡΙ ΦΑΜΙΛΙ

Μανγκάσα αμαρέ πιστέ πφενίν σαρ μανγκέλα-λεν ο Ιεχωβά! Οτθάρ, συμπεριφερίντιβασα λένγκε σαρ συμπεριφερίντιβασα αμαρέ φαμιλιάκε. (1 Τιμ. 5:1, 2) Ισί τιμή αμένγκε τι υπηρετίνας λέντζαρ ντα ισινάμ περήφανοι ανταλέσκε. Χαιρίνασα μπουτ κάνα αμαρέ πφενιά νιωθίνενα ότι μανγκάσα-λεν ντα στηρίνασα-λεν. Εκ πφεν, η Βανέσα, βακερέλα: «Νιωθίναβα μπαρί εκτίμηση ι Ιεχωβάσκε επειδή ισινόμ αντρέ κι οργάνωση λέσκι, σο ισί πφερντί πφραλέντζαρ σο ντένα-μαν μπαρί ζορ». Εκ πφεν κι Ταϊβάν βακερέλα: «Νιωθίναβα μπαρί εκτίμηση επειδή ο Ιεχωβά ντα λέσκι οργάνωση ντένα αζόμ μπαρί αξία κο τζουβλιά ντα κο αισθήματα αμαρέ. Ανταβά μπαριαρέλα μι πίστη ντα κερέλα-μαν τι νιωθίναβ ατζέ πο μπαρί εκτίμηση για το προνόμιος σο τθεράβα τι αβάβ αντρέ κι οργάνωση κι Ιεχωβάσκι».

Καζόμ περήφανος πρέπει τι αβέλ ο Ιεχωβά κάνα ντικχέλα πιστέ Χριστιανόν τι προσπαθίνεν τι συμπεριφερίντιβεν κο τζουβλιά σαρ Βοβ! (Παρ. 27:11) «Μπουτ τζενέ κο ντουνιάς να σεβάνενα ιτς ι τζουβλίν», βακερέλα εκ πρεσβύτερος κι Σκωτία, ο Μπέντζαμιν. «Οτθάρ, κάνα ο τζουβλιά τσσουβένα-πες κι Αίθουσα Βασιλείας, μανγκάσα τι νιωθίνεν ι διαφορά κατά ντουνιάς». Τι κεράς σαρέ ο πο λατσσό σο μπορίνασα για τι μοιάζας κο Ιεχωβά, καζόμ συμπεριφερίντιβασα αμαρέ πφενίνγκε με αγάπη ντα σεβασμός, σόσκε αξίνενα-λες ανταβά.​—Ρωμ. 12:10.