Ande chichiva culturi, le șiave sile sicade încă de țâne că le jiuvlea sile mai tele sar le murșa. Sar exemplo, o Hans, iech phral cai vizitil le congregații anda Bolivia, phenel: „Chichiva murșa sas-le bariarde ande iech cultura cai zuriarel-len te aven baricane. Cadala dichen-pe mai opre sar le jiuvlea hai butivar phiraven-pe nasul lența”. O Shengxian, iech phuro anda Taiwan, phenel: „Ando than cai beșav, but murșa pachian că le jiuvlea ci trebun te hamisaren-pe ande lenghe buchia. Iech murș cai del duma anda so pachial iech jiuvli silo dichlo sar iech murș covlo”. Aver murșa ci sicaven pachiv caring le jiuvlea prin aver buchia țâne. Sar exemplo, phenen pheriasa cai cheren le jiuvlean te aven tele dichle.

Si șucar că, indiferento ande savi cultura barilea iech murș vo daștil te paruvel-pe hai te na mai dichel le jiuvlean de opral. (Ef. 4:22-24) Vo daștil te cherel cadaia dacă lel-pe pala o exemplo le Iehovasco. Ande cado articolo, va avela te dichas sar phiravel-pe o Iehova le jiuvleanța, sar daștin te len-pe le phrala pala lesco exemplo hai sar daștin le phure te aven exemplea cana sicaven pachiv caring le jiuvlea.

SAR PHIRAVEL-PE O IEHOVA LE JIUVLEANȚA?

O modo ande savo phiravel-pe o Iehova le jiuvleanța si iech exemplo perfecto. Vo si iech Dad pherdo lașimos, cai iubil sea pesche șiaven pa i phuv. (Ioan 3:16) O Iehova dichel le pheian cai silen pachiamos sar niște cuci șeia. Te dichas  chichiva moduri ande save o Iehova sicavel iubirea hai pachiv le jiuvleanghe.

O Iehova ci cherel diferențea. Vi le murșa hai vi le jiuvlea sas-le cărde pala lesco chipo. (Gen. 1:27) Vo ci cărdea le murșen te jianen te cheren mai but buchia sau te aven mai goghiaver sar le jiuvlea hai nici na ciaion-les mai but le murșa sar le jiuvlea. (2 Cron. 19:7) O Iehova dea vi le murșen hai vi le jiuvlean sa codo zuralimos la goghiaco caște hachiaren le ciacimata biblico hai te len-pe pala leste. Vo dichel cuci vi le murșen tha vi le jiuvlean cai silen pachiamos ande leste. O Iehova dea le murșenghe tha vi la jiuvleanghe i speranța te traisaren anda sea o timpo pi phuv sau i speranța te aven regi sau rașaia ando cerii. (2 Pet. 1:1, n.s.) Cadea că, si claro că o Iehova ci dichel mai tele le jiuvlean.

O Iehova așunel-len. Anda leste si importanto so simțosaren hai le pharimata prin save nachen le jiuvlea. Sar exemplo, vo așundea le manglimata cai cărdea-len i Rahela hai i Ana hai ajutisardea-len. (Gen. 30:22; 1 Sam. 1:10, 11, 19, 20) Vo chiar șiutea chichiva jenen cai scriisarde i Biblia te den duma vi anda le relatări ande save le murșa așunde le jiuvleandar. Iech anda lende sas o Avraam, cai lea-pe pala o sfato le Iehovasco, hai așundea pesca rromniatar, i Sara. (Gen. 21:12-14) O rege David încărdea conto catar so phendea lesche i Abigail. Mai but, vo dichlea-la sar cana o Iehova bișaldea-la te del lesche duma. (1 Sam. 25:32-35) O Isus, cai sicavel ande iech modo perfecto le calități pesche dadesche, așundea pesca deiatar, i Maria. (Ioan 2:3-10) Cadal exemplea ajutin amen te hachiaras că o Iehova sicavel peschi pachiv caring le jiuvlea cana așunel-len.

Le Iehovas siles pachiamos ande lende. Sar exemplo, le Iehovas sas-les pachiamos andi Eva hai dea vi la i buchi te lel sama pe sea i phuv. (Gen. 1:28) Cadea, o Iehova sicadea că ci dichlea-la mai tele sar lache rromes, o Adam, tha sar iech lașio ajutorii anda leste. Le Iehovas sas-les pachiamos vi andel profetese Debora hai Hulda. Von dine sfaturi le poporosche, chiar vi ieche crisaitoresche hai ieche regesche. (Jud. 4:4-9; 2 Regi 22:14-20) Aghies, o Iehova del le jiuvlean creștino i pachiv te cheren leschi buchi. Cadala pheia pherde pachiamos, slujin sar vestitoarea, pionierea hai misionarea. Mai but, von cheren buchi ca le proiectea ande save vazden-pe hai lașiaren-pe le Săli le Regatosche hai aver clădiri catar le filiale. Chichiva anda lende slujin co Betelo sau ca le birouri catar i traducerea de durial. Cadala pheia sile sar iech bari armata, savi o Iehova folosil-la caște pherel peschi voința. (Ps. 68:11) Cadea că, si ciaces că o Iehova ci dichel le jiuvlean covle sau că ci daștin te cheren le buchia mișto.

SAR DAȘTIN LE PHRALA TE SICHION LE IEHOVASTAR SAR TE PHIRAVEN-PE LE JIUVLEANȚA?

Le phrala trebul te dichen sincero pengo modo gândimasco hai so cheren caște den penghi sama dacă phiraven-pe le pheianța cadea sar ajucărel lendar o Iehova. Tha na-i sea o timpo ușoro te dichas amen cadea sar sam ciaces. Cadea sar iech ecografia daștil te sicavel dacă si amen iech nasfalimos le ilesco, sa cadea, iech lașio amal hai o Lil le Devlesco daștin te sicaven dacă o modo ande savo dichas le jiuvlean ciaiol le Iehovas sau nici. So daisaras te cheras caște primisaras cado ajutorii?

Puș ieche lașe amales. (Prov. 18:17) Dacă si amen iech amal demno pachiamasco, cai silo lașio hai goghiaver, daisaras te pușas-les: „Sar pachias că phiravav man le pheianța? Dichiol-pe că sicavav lenghe pachiv? Pachias că trebul te cherav paruimata?”. Dacă chio amal phenel tuche că trebul te lașiares chichiva buchia, na holiar tut. Av gata te cheres le paruimata cai si tut nevoia!

Sichio anda o Lil le Devlesco. O Lil le Devlesco si sar iech oglinda cai ajutil amen te dichas dacă phiravas amen mișto le pheianța. (Evr. 4:12) Andi Biblia, daisaras te citisaras anda murșa cai phirade-pe șucar le jiuvleanța, tha vi anda chichiva murșa cai ci sicade lenghe pachiv. Pala codoia daisaras te cheras iech comparația mașcar so cărde von hai so cheras amen. Sa cadea, cana șioas iech verseto iech pașa aver hai dichas vi o contexto ci va avela te hachiaras greșime anumime versetea. Sar exemplo, ando 1 Petru 3:7 phenel-pe că o rrom trebul te del pachiv pesca rromniache  „sar ieche vasosche mai covlo”. b Hachiaras de cathar că le jiuvlea sile mai țâra goghiaver sar le murșa hai că ci jianen te cheren cadea de but buchia sar von? Nici! Dacă șioas le dumes cai phendea-len o Petru pașa codola cai phendea-len o Pavel ando Galateni 3:26-29 dichas că o Iehova alosardea vi murșa tha vi jiuvlea caște rain pașa o Isus ando cerii. Cadea că, cana sichioas anda o Lil le Devlesco hai pușas ieche lașe amales anda sar phiravas amen le jiuvleanța, hachiaras sar daisaras te sicavas mai but pachiv amare pheianghe.

SAR SICAVEN LE PHURE PACHIV LE PHEIANGHE?

Le phrala daștin te sichion catar le phure de congregație te sicaven pachiv le pheianghe. Sar sile le phure iech exemplo lașio ande cadai buchi?

Le phure de congregație așaren le pheian. O apostolo Pavel mechlea iech lașio exemplo anda le phure. Ande pesco lil caring i congregația andai Roma, vo așardea mai bute pheian. (Rom. 16:12) Gândisar tut chichi de bucurime sas-le cadala pheia cana o lil le Pavelosco sas-lo citime angla sea i congregația. Vi aghies, le phure ci încăren-pe parpale te așaren le pheian anda lenghe șucar calități hai anda sea so cheren andi buchi le Iehovaschi. Cadaia cherel le pheian te simțosaren că si lenghe sicadi pachiv hai că sile dichle cuci. Le șucar dumes ieche phuresche daștin te aven chiar so silen nevoia cadale pheian caște slujin vi mai dur le Iehovasche pherde pachiamos. (Prov. 15:23)

Cana așaren le pheian, le phure trebun te cheren cadaia anda sea o ilo hai te den duma anda iech anumime buchi cai dichle-la ca iech phei. Sostar? Iech phei po anav Jessica phenel: „Sam voime cana le phure phenen amenghe «Bravo, cărdean iech lași buchi». Tha amaro ilo pherel-pe bucuriatar vi mai but cana von așaren amen anda vareso cai cărdeam, sar exemplo, anda codoia că ajutisaras amare șiavorren te beșen șucar ca le întruniri sau cana das amari zor te anas ca i sala ieche jenes casa studiisaras”. Cana le phure așaren le pheian anda buchia cai dichen-len lende,  le pheia hachiaren că sile cuci hai că silen iech than importanto andi congregația.

Le phure așunen le pheian. Le phure cai sile umili jianen că na numai len silen idei lașe. Cadala zuriaren le pheian te phenen so pachian hai așunen-len atento cana den duma. Cana cheren cadea, savore țârden miștimata. Le pheia sile zuriarde, hai le phrala arachen idei lașe. O Gerardo, iech phuro cai slujil ando Betelo, phenel: „Dichlem că atunci cana mangav le pheian te phenen manghe sar dichen von le buchia, lenghe dumes ajutin man te avav mai lașio ande so cherav. Butivar, von cheren iech anumime buchi de mai but timpo sar but phrala”. But pheia sile pioniere, cadea că prinjianen mișto o teritorio. Iech phuro po anav Bryan phenel: „Amare pheian cheren but șucar buchia andi organizația. Cadea că, trebul te sichioas lendar”.

Le phure goghiaver ci sighiaren te nachen sigo părdal le sugestii cai den-len le pheia. Iech phuro po anav Edward phenel: „O prinjianimos hai i experiența iecha pheiachi daștil te ajutil ieche phrales te dichel iech situația cadea sar si voi ciaces hai te hachiarel mai mișto so simțosaren le coaver”. (Prov. 1:5) Chiar cana iech phuro ci va daștila te lel-pe pala o sfato iecha pheiaco, vo va mulțumila lache anda codoia că phendea so sas-la andi goghi.

Le phure sicaven le pheian. Le phure goghiaver den penghi zor te sicaven le pheian. Sar exemplo, von daștin te sicaven lenghe sar te încăren le întruniri andai predicarea cana ci silo code niciech phral boldo. Daștin te sicaven-len sar te folosin le uneltea hai le echipamentea caște cheren buchi ca le proiectea teocratico cai vazden-pe sau lașiaren-pe thana andai închinarea. Co Betelo, le phrala cai len sama pe le departamentea sicaven le pheian sar te cheren diferime buchia, sar avelas întreținerea, aprovizionarea, contabilitatea sau programarea po calculatorii. Cana le phure sicaven le pheian, si sar cana von phenen lenghe că pachian-pe ande lende hai că daștin te cheren mișto penghi buchi.

But pheia folosin o sicaimos cai sas lenghe dino catar le phure caște ajutin vi von averen. Sar exemplo, codola cai sas-le sicade andel construcții ajutin penghe phralen cai nachen prin iech dezastro naturalo te lașiaren penghe chăra. Hai le pheia cai sas-le sicade te aven mai lașe andi mărturia publico ajutin vi von avere pheian te cheren mai mișto cadai buchi. Sar dichen le pheia o fapto că le phure dine penghi zor te sicaven-len? I Jennifer phenel: „Daisardem te cherav buchi cana vazdea-pe iech sala le Regatoschi, hai o phral cai lea sama po proiecto cărdea pesche timpo te sicavel man. Vo dichlea sar cherav buchi hai așardea man. Ciailea man but te cherav buchi ande iech than lesa, anda codoia că simțosardem că pachial-pe ande mande hai că dichelas cuci sea so cărdemas”.

LE PHEIA SILE CUCI ANDA AMARI FAMILIA SPIRITUALO

Cadea sar o Iehova vi amen iubisaras amare pheian loialo. Anda codoia, phiravas amen lența sar amara familia. (1 Tim. 5:1, 2) Anda amende si iech bari pachiv te cheras buchi ande iech than lența. Sam voime cana dichas că o modo ande savo phiravas amen lența cherel-len te simțosaren-pe iubime hai cuci. Iech phei po anav Vanessa phenel: „Mulțumisarav but le Iehovasche anda codoia că cherav partea anda leschi organizația. Cadea, daisarav te cherav buchi phralența cai zuriaren man but”. Iech phei anda Taiwan phenel: „Bariol mânro ilo bucuriatar anda codoia că o Iehova hai leschi organizația dichen cadea de cuci le pheian hai încăren conto catar so simțosaren! Cadaia zuriarel mânro pachiamos hai ajutil man te na bâstrav so bari buchi si că cherav partea andai organizația le Iehovaschi”.

O Iehova del-pe baro le phralența cai den penghi zor te phiraven-pe le jiuvleanța cadea sar vo! (Prov. 27:11) O Benjamin, iech phuro de congregație anda Scoția, phenel: „Aghies, but murșa phiraven-pe nasul le jiuvleanța hai ci sicaven lenghe pachiv. Anda codoia, cana iech jiuvli avel ca i sala le Regatoschi, camas te simțosarel-pe mișto”. Si ciaces, savore camas te las amen pala o Iehova hai te phiravas amen amare cuci pheianța pherde iubirea hai pachiv, cadea sar vi meritin. (Rom. 12:10)