Mmrienzua ne biemɔ wɔ berɛ a, ɔnate nekaa bɔ bɛtetele bɛ ne b’amammerɛ ti, bebu mmrasua kyɛ bɛnzɛ hwee. Hans te manzini soneafoɛ wɔ Bolivia. Ɔhãne kyɛ: “Mmrienzua ne biemɔ wɔ berɛ a, ɔnate nekaa bɔ bɛtetele bɛ nati, benwu ye kyɛ mmrienzua nwo yɛ se tra mmrasua, yeti ɔmaa bɛmva mmrasua bɛnyɛ hwee.” Shengxian, bɔ ɔte asafo nu panyi wɔ Taiwan ne koso hãne kyɛ: “Nekaa bɔ nwɔ ne, bɛmva mmrasua bɛnyɛ hwee. Yeti sɛ brasua bie kyire ye adwene wɔ edwirɛ bie nwo na sɛ ɔte pá po a, mmrienzua mva nyɛ adwuma. Yeti sɛ ɛte brienzua na ɛfa brasua bie dwirɛ yɛ adwuma a, wɔ mangõ mɔ kora sere wɔ, na bɛkã kyɛ ɛnze nworɛ.” Mmrienzua biemɔ koso wɔ berɛ a, bɔ bɛyɛ bɛfa bekyire kyɛ bemmu mmrasua yeɛ ole kyɛ, bɛkora bɛkekã edwirɛ bie bɛfa bɛgoro bɛnwo.

Nahorɛ dwirɛ yeɛ ole kyɛ, ɔmva yenwo ne nekaa bɔ bɛtetele wɔ, ɔne w’amammerɛ ne, ɛkɔhora kɔyere wɔnwo kyɛbɔ ɔkɔyɛ a, adwene bɔ mmenia biemɔ le ye kyɛ mmrienzua nwo hia tra mmrasua ne, engonya bie ɔ. (Ɛfe. 4:​22-24) Nikyee kõ bɔ ɔkɔhora kɔboka wɔ paa maa ɛkɔyɛ sɔ yeɛ ole kyɛ, ekosuesũa Yehowa. Wɔ edwirɛ bɔ yɛbaasusu yenwo he anu ne, yɛkɔnea bɔ Yehowa ayɛ afa ahyire kyɛ obu mmrasua, ɔne bɔ aliemaa mmrienzua nemɔ kɔhora kɔyɛ kɔfa kosuesũa Yehowa ɔ.

NZU YEƐ YEHOWA AYƐ BƆ OKYIRE KYƐ OBU MMRASUA Ɔ?

Sɛ bɛ́kã ebie bɔ obu mmrasua paa a, Yehowa yeɛ olimoa ɔ. Bɔ yeti yeɛ ɔte sɔ yeɛ ole kyɛ, mmenia bɔ bɛwɔ aseɛ he aso ne, Yehowa bu bɛ mukoraati kyɛ bɛte sona kõ, yeti ole tema ma ebiala. (Yoh. 3:16) Mmrasua bɔ bedi nahorɛ bɛma Yehowa ne, bɛla ye ahõne so, na onni  bɛnwo angorɛ koraa. Yede, bɔ Yehowa ayɛ afa ahyire kyɛ obu mmrasua ne, ɛmɔma yesusu enu biemɔ nwo.

Yehowa bu mmrienzua ne mmrasua mukoraati pɛ. Subaen bɔ ɔwɔ Yehowa nwo ne, ɔfale bie bɔle mmrienzua ne mmrasua mukoraati. (Gye. 1:27) Yeti, Yehowa ammɔ mmrienzua kyɛ bedi mũ bɛtra mmrasua. Afei koso, Yehowa nguro mmrienzua dwirɛ ndra mmrasua. (2 Abe. 19:7) Atẽe bɔ Yehowa fale so bɔle mmrienzua bɔ ɔmaa bɛkora besũa yenwo nikyee, ná bɛda ye subaen ahoroɛ bɔ ɔyɛ nyemene ne bie ali ne, sɔ ala yeɛ ɔbɔle mmrasua ɔ. Yehowa kuro mmrienzua ne mmrasua bɔ bedi nahorɛ bɛma ye ne mukoraati dwirɛ, na wama bemukoraati anyelasoɛ kõ. Sɔ anyelasoɛ ne yeɛ ole kyɛ, benu biemɔ kɔhɔ anwuro bɛkɔɔyɛ ahemvo ne asɔfo, na benu biemɔ koso kɔtena aseɛ he aso daa. (2 Pet. 1:1) Ɛhe maa yenwu ye kyɛ Yehowa bu mmrienzua ne mmrasua mukoraati pɛ.

Yehowa tie mmrasua dwirɛ. Ɔhaw bɔ mmrasua fa nu wɔ b’asetena nu ne, yenwo dwirɛ hia Yehowa paa ofikyɛ ɔdwene bɛnwo. Bɔ ɔmaa yenwu ye sɔ yeɛ ole kyɛ, mmrasua biemɔ tekyɛ Rahɛl ne Hana sɔa, Yehowa tiele bɛ mbaeɛ, na ɔbokale bɛ. (Gye. 30:22; 1 Sam. 1:​10, 11, 19, 20) Afei koso, mmrienzua biemɔ bɔ bɛfale mmrasua biemɔ afutue bɛyɛle adwuma ne, Yehowa amaa bahworɔ bɛnwo dwirɛ wɔ Bible nanu bama yɛ. Ebie yeɛ ole kyɛ, mmerɛ bɔ Yehowa hãhyirele Abraham kyɛ otie ɔye Sara ne, ɔyɛle sɔ. (Gye. 21:​12-14) Ɔhene Dawide koso, otiele afutue bɔ Abigail famane ye ne, na ɔhãne po kyɛ Yehowa yeɛ wasoma Abigail maa ɔne ye baadwudwo ɔ. (1 Sam. 25:​32-35) Yesu koso, né ɔte sona bɔ bɔne nne yenwo ɔ. Nakoso, mmerɛ bɔ ye maame Maria hyirele ye adwene wɔ edwirɛ bie nwo ne, Yesu tiele. (Yoh. 2:​3-10) Sɔ dwirɛ hemɔ bɔ Yehowa maa bɛhworɔle ne kyire kyɛ, mmrasua nwo dwirɛ hia ye paa, yeti otie bɛ dwirɛ.

Yehowa le mmrasua nu gyidie. Bɔ yeti yeɛ yɛkã sɔ yeɛ ole kyɛ, mmerɛ bɔ Yehowa bɔle Adam ne Hawa ne, Yehowa hãne kyɛ Hawa boka ohũ maa besiesie aseɛ ne maa ɔyɛ Paradise. (Gye. 1:28) Sɔ nhyehyɛɛ bɔ Yehowa yɛle ne, ɔmaa yenwu kyɛ, né ole Hawa nu gyidie paa kyɛ ɔkɔhora kɔboka ohũ Adam maa bɛkɔyɛ sɔ adwuma ne. Afei koso, mmrasua biemɔ bɔ né bɛte diyifoɛ tekyɛ Debora, ɔne Hulda sɔa, Yehowa maa betuli temuafoɛ bie, ɔne ɔhene bie foɛ. (Mae. 4:​4-9; 2 Ahe. 22:​14-20) Ɛnnɛ koso, mmrasua bɔ bɛwɔ asafo nanu bɔ bedi nahorɛ ne, Yehowa afa adwuma awura benu pẽe nala sa. Ebie yeɛ ole kyɛ, benu biemɔ te adawurubɔfoɛ, atẽepakyelɛfoɛ, ɔne nzɛmbatrɛlɛfoɛ. Afei koso, benu biemɔ boka maa besisi asafo sua ahoroɛ tekyɛ Ahennie Asa, ɔne Bɛtɛl sua mɔ. Mmrasua ne biemɔ koso yɛ adwuma wɔ Bɛtɛl, ne nekaa bɔ bekyire dwudwolɛ bo ɔ. Yehowa nate sɔ aliemaa mmrasua hemɔ aso maa bɔ wabɔ yetianu kyɛ ɔkɔyɛ ne, ɔba nu. (Edw. 68:11) Ɛhe mukoraati maa yenwu ye kyɛ Yehowa bu mmrasua kyɛ bɛte mmenia bɔ mvasoɛ wɔ bɛ so ɔ.

ƐTE ALIEMAA BRIENZUA A, NZU YEƐ ƆKƆBOKA WƆ MAA EKOBU MMRASUA TEKYƐ YEHOWA Ɔ?

Sɛ ɛte aliemaa brienzua na ɛpena kyɛ enwu kyɛ ebu mmrasua kyɛbɔ Yehowa bu bɛ ne a, yede adwene bɔ ele ye wɔ bɛnwo, ɔne subaen bɔ ɛda ye ali kyire bɛ ne, sana ɛto wɔ boase susu yenwo. Sɛ yɛkɔhora yɛkɔyɛ sɔ a, sana yɛma yɛnwo atẽe maa ebiemɔ boka yɛ. Bɔ yeti yeɛ ɔte sɔ yeɛ ole kyɛ, sɛ ebie nde apɔ a, dɔktaniɛ bie kora fa ngaen yɛ sona ne nipadua nanu nhwehwɛmuɛ kyɛbɔ ɔkɔyɛ a, okonwu kyɛbɔ sona ne ahõne ne si yɛ adwuma ɔ. Sɔ ala yeɛ yɛ koso, yɛkɔhora yekobisa yɛ damvo bie maa ɔkɔhã kyɛbɔ yɛbu mmrasua nanwo dwirɛ kohyire yɛ ɔ. Afei koso, sɛ yɛkenga Bible ne a, ɔkɔhora kɔboka yɛ maa yekonwu kyɛ adwene bɔ Yehowa le ye wɔ mmrasua nwo ne, sɔ adwene ne bie yeɛ yɛkoso yele ye anaa?

Bisa wɔ damvo bie bɔ okuro wɔ dwirɛ ɔ. (Any. 18:17) Yɛkɔhora yekobisa yɛ damvo bie bɔ yele yenu gyidie bɔ ɔkã nahorɛ kyɛ: “Subaen beni yeɛ ɛnea a, meda ye ali mekyire aliemaa mmrasua nemɔ ɔ? Atẽe bɔ mefa so mene bɛ dwudwo ne, ɔmaa benwu ye kyɛ mebu bɛ hɔ? Sɛ ɛnea a, nikyeebie wɔ berɛ bɔ odikyɛ meyɛ na wamaa banwu kyɛ mebu bɛ anaa?” Sɛ wɔ damvo ne maa enwu subaen bie bɔ ɔttemayé bɔ ɛda ye ali kyire mmrasua nemɔ a, ɛyɛ a, nnɛmaa ɛne ye su aporowaa, na mmom dé to nu, na yɛ nzakrayɛɛ.

Sũa Nyameɛ Dwirɛ Ne. Sɛ yɛkenga Bible na yɛdwenedwene yenwo a, ɔkɔhora kɔboka yɛ paa maa yekohyire obuo yɛkɔma mmrasua. (Heb. 4:12) Ofikyɛ sɛ yɛnea Bible nanu a, yenwu mmrienzua biemɔ bɔ behyirele kyɛ bebu mmrasua, ɔne bɛbɔ né bemmu mmrasua nwo dwirɛ. Sɛ yɛkenga edwirɛ bɔ ɔte sɔ yeyia a, yɛkɔhora yɛkɔfa yɛkɔtoto subaen bɔ yɛda ye ali yekyire mmrasua nanwo. Afei koso, sɛ ɛte brienzua a, bɔ ɔkɔyɛ na annya adwene kyɛ Bible ne bue bie dwudwo tia mmrasua ne, bɔ mmɔden kyɛ ɛkɔfa bɔ ɛkenga ne kɔtoto Bible nu dwirɛ foforɛ nwo. Ebie yeɛ ole kyɛ, 1 Petro 3:7 ne kã kyɛ, odikyɛ mmrienzua fa ‘anidie ma bɛ yemɔ ofikyɛ bɛte mmenia bɔ bɛyɛ mmerɛ ɔ.’ b Aso sɔ dwirɛ ne kyire kyɛ mmrasua adwene te kãa bɔ  mmrienzua se nworɛ tra bɛ anaa? Daabi! Bɔ yeti yeɛ ɔte sɔ yeɛ ole kyɛ, sɛ yɛfa edwirɛ bɔ Petro hãne ne yɛtoto Galatiafoɛ 3:​26-29 nwo a, yenwu ye kyɛ Yehowa aye mmrasua biemɔ kyɛ bɛɛboka Yesu so ma beli hene wɔ anwuro. Ɛhe maa yenwu ye kyɛ Nyameɛ bu mmrasua paa. Yeti sɛ yɛkenga Bible ne, ná yesa yɛmaa yɛ damvo bie bɔ okuro yɛ dwirɛ boka yɛ a, ɔkɔmaa yekonwu adwene bɔ yele ye wɔ mmrasua nwo ɔ. Afei koso, ɛhẽne kɔboka yɛ maa yekohyire obuo yɛkɔma aliemaa mmrasua nemɔ.

NZU YEƐ SƐ ASAFO NANU MBANYI NEMƆ YƐ A, OKYIRE KYƐ BEBU MMRASUA Ɔ?

Asafo nanu mbanyi bu mmrasua bɔ bɛwɔ asafo nanu ne paa, yeti odikyɛ aliemaa mmrienzua mɔ bɔ bɛwɔ asafo nanu ne suesũa bɛ. Yede nzu yeɛ asafo nanu mbanyi nemɔ yɛ fakyire kyɛ bebu mmrasua ɔ? Ɛmɔma yesusu enu kãa nwo.

Bɛkãmvo aliemaa mmrasua nemɔ. Sɛ yɛnea somafoɛ Pɔɔlo krataa bɔ ɔhworɔ ɔɔmane asafo bɔ né ɔwɔ Rome ne a, ɔkãmvole aliemaa mmrasua pẽe. Asafo nu mbanyi kɔhora kosuesũa sɔ nikyee bɔ somafoɛ Pɔɔlo yɛle ne. (Rom. 16:12) Mmerɛ bɔ bɛkengale krataa bɔ Pɔɔlo hworɔle nanu dwirɛ behyirele asafo ne, bɔ aliemaa mmrasua nemɔ tele bɛ dumaa wɔ nu ne, wɔde nea kyɛbɔ bɛnye si gyele ɔ. Sɔ ala yeɛ ɛnnɛ koso, asafo nu mbanyi fi b’ahõne nu kãmvo aliemaa mmrasuamɔ wɔ subaen pá bɔ bɛda ye ali wɔ asafo nanu nanwo ɔ. Afei koso, mmɔden bɔ bɛbɔ ye wɔ Yehowa sõen nu ne, odikyɛ mbanyi nemɔ ma benwu kyɛ bɛnye sɔ. Sɛ aliemaa mmrasua nemɔ nwu kyɛ asafo nu mbanyi kuro bɛ dwirɛ, na bebu bɛ a, ɔmaa bɛnye gye paa. Yeti sɛ asafo nu mbanyi kã edwirɛ bɔ ɔhyɛ ngunaen kyire aliemaa mmrasua nemɔ a, ɔkɔboka bɛ paa maa bɛkɔfa nahorɛlilɛ bɛkɔsõ Yehowa.—Any. 15:23.

Sɛ asafo nu mbanyi kãmvo aliemaa mmrasua nemɔ a, odikyɛ bɛkãmvo bɛ wɔ nikyee pɔtẽe bie bɔ bayɛ nanwo. Nzuati yeɛ ɛhe anwo hia ɔ? Aliemaa brasua bie bɔ bɛfrɛ ye Jessica hãne kyɛ: “Sɛ yɛyɛ nikyeebie, na aliemaa mmrienzua nemɔ kã kyire yɛ kyɛ, ‘ayekoo’ a, ɛyɛ a, ɔte pá. Nakoso sɛ begyina nikyee pɔtẽe bie aso bɛkãmvo yɛ a, ɔmaa yɛnye nye gye paa. Ebie yeɛ ole kyɛ, sɛ yɛboka yɛ mmaamɔ maa bɛyɛ konn wɔ asafo nhyiamu bo, anaa yɛkora yafa yɛ Bible sũaniɛ bie yɛba asafo nhyiamu, na mmrienzua nemɔ kãmvo yɛ a, ɛhẽne yeɛ ɔmaa yɛnye gye ɔ.” Yeti, sɛ asafo nanu mbanyi kãmvo aliemaa mmrasua  nemɔ wɔ nikye pɔtẽe bie bɔ bayɛ nwo a, ɔmaa benwu ye kyɛ, bɛ koso bɛnwo hia wɔ asafo nanu.

Sɛ aliemaa mmrasua nemɔ kyire b’adwene a, betie. Asafo nu mbanyi bɔ bɛbrɛ bɛnwo ase ne, bedé bɛto nu kyɛ, nná mmrienzua ngome yeɛ bɛse nworɛ ɔ. Yeti sɛ bɛyɛ nikyeebie a, bɛkora bebisa aliemaa mmrasua nemɔ maa bekyire b’adwene. Sɛ asafo nanu mbanyi nemɔ yɛ sɔ a, ɔboka aliemaa mmrasua nemɔ, na ɔhyɛ bɛ ngunaen paa. Nzuati yeɛ yɛkã sɔ ɔ? Asafo nu panyi bie bɔ bɛfrɛ Gerardo bɔ ɔyɛ adwuma wɔ Bɛtɛl ne hãne kyɛ: “Manwu kyɛ sɛ meyɛ adwuma bie, na mebisa aliemaa mmrasua nemɔ adwene wɔ yenwo a, ɔboka me maa mekora meyɛ adwuma ne yé. Bɔ yeti yeɛ ɔte sɔ yeɛ ole kyɛ, adwuma ne biemɔ wɔ berɛ a, aliemaa mmrasua nemɔ ayɛ ahyɛ batra aliemaa mmrienzua nemɔ.” Aliemaa mmrasua bɔ bɛwɔ asafo nanu ne, benu pẽe nala te atẽepakyelɛfoɛ, yeti mmenia bɔ yɛkɔ bɛ berɛ asɛnga ne, bɛse bɛ paa. Asafo nu panyi bie bɔ bɛfrɛ ye Bryan hãne kyɛ: “Aliemaa mmrasua nemɔ le subaen pá pẽe bɔ bɛkɔhora bɛkɔfa bɛkɔboka ahyehyɛdeɛ ne ɔ. Yeti ɛyɛ a, sũa nikyee fi bɛ berɛ!”

Asafo nu mbanyi bɔ bɛnye la ase ne, sɛ aliemaa mmrasua nemɔ kyire b’adwene wɔ edwirɛ bie nwo a, bɛmmɔ bengua. Nzuati ɔ? Asafo nu panyi bie bɔ bɛfrɛ ye Edward hãne kyɛ: “Sɛ aliemaa mmrasua nemɔ kyire b’adwene wɔ edwirɛ bie nwo na sɛ etie a, ɔboka paa. Ofikyɛ ɔmaa enwu atẽe pá bɔ ɛkɔhora kɔfa so kɔboka aliemaamɔ ɔ.” (Any. 1:5) Sɛ aliemaa brasua bie kyire ye adwene wɔ edwirɛ bie nwo, na sɛ asafo nu panyi bie ngɔfa ngɔyɛ adwuma pó a, odikyɛ ɔda ye ase, na ɔkãmvo ye kyɛ wahyire ye adwene ɔ.

Bɛfa ndeteyɛɛ bɛma aliemaa mmrasua nemɔ. Asafo nanu mbanyi bɔ bɛbrɛ bɛnwo ase ne, bɛpena atẽe pẽe bɔ bɛkɔfa so bɛkɔtete aliemaa mmrasua nemɔ ɔ. Ebie yeɛ ole kyɛ, asafo nanu mbanyi kɔhora kohyire aliemaa mmrasua nemɔ atẽe bɔ bɛfaso bɛnea asɛnga nhyiamu so ɔ. Sɛ bɛyɛ sɔ na sɛ aliemaa brienzua bie bɔ wabɔ asu nne berɛ a, bɛkɔhora bɛkɔnea asɛnga nhyiamu naso. Afei koso, bɛkɔhora bekohyire aliemaa mmrasua nemɔ atẽe bɔ bɛfaso bɛfa ngaen ahoroɛ bɛyɛ adwuma ɔ. Ɛhẽne kɔmaa aliemaa mmrasua nemɔ konya nimdeɛ bɔ bɛkɔfa bɛkɔboka maa bekosisi asafo sua ahoroɛ, na bahora basiesie bɔ wasɛkye nemɔ koso. Sɛ ɛkɔ Bɛtɛl a, mbanyi bɔ bɛnea adwuma ahoroɛ so ne, bahyire aliemaa mmrasua nemɔ adwuma pẽe. Ebie yeɛ ole kyɛ, bahyire bɛ kyɛbɔ bekosiesie nningyein bɔ wasɛkye, kyɛbɔ bɛkɔtotɔ nningyein, ɔne kyɛbɔ bɛkɔnea esikaa so. Sɛ ɛhẽne la ahãmeɛ a, bahyire bɛ kyɛbɔ bɛkɔfa kɔmpiuta bɛkɔyɛ adwuma, ɔne nningyein pẽe. Sɛ asafo nanu mbanyi fa ndeteyɛɛ ma aliemaa mmrasua nemɔ a, okyire kyɛ bebu bɛ, na bele benu gyidie koso.

Sɛ asafo nanu mbanyi fa ndeteyɛɛ ma aliemaa mmrasua nemɔ a, bɛ koso bɛfa bɛboka mmeni foforɛ. Ebie yeɛ ole kyɛ, ndeteyɛɛ bɔ sɔ aliemaa mmrasua nemɔ konya ye ne, sɛ atorɛngyɛm bie si, na aliemaamɔ awuro sɛkye a, bɛkɔhora bɛkɔɔboka bɛ. Afei koso, aliemaa mmrasua mɔ bɔ batete bɛ wɔ kyɛbɔ bɛfa trɔg bedi adanzeɛ ne, bɛ koso bɛkora bekyire mmrasua foforɛ bɔ bɛwɔ asafo nanu ne maa bɛyɛ sɔ. Sɛ aliemaa mmrasua nemɔ nwu ye kyɛ asafo nanu mbanyi anya bɛnwo alagye bɛfa ndeteyɛɛ bɛma bɛ a, ɔkã b’ahõne paa. Aliemaa brasua bie bɔ bɛfrɛ ye Jennifer hãne kyɛ: “Mmerɛ bɔ né mekwaaboka maa besi Ahennie Asa bie ne, aliemaa bɔ ɔnea adwuma naso ne nyane menwo alagye fale ndeteyɛɛ mane me. Mmerɛ bɔ ngora nyɛle adwuma bɔ aliemaa ne fawurale mesa ne, ɔkãmvole me paa, na ɛhẽne maa menye gyele. Yeti daa né ɔyɛ me fɛ kyɛ me ne sɔ aliemaa ne kɔbɔ nu kɔyɛ adwuma, ofikyɛ nwuni kyɛ obu me paa.”

BƆ YETI YEƐ ODIKYƐ YEKYIRE OBUO YƐMA ALIEMAA MMRASUA NEMƆ Ɔ

Kyɛbɔ Yehowa kuro aliemaa mmrasuamɔ bɔ bedi nahorɛ ne dwirɛ ne, sɔ ala yeɛ yɛkoso yekuro bɛ dwirɛ, na yebu bɛ kyɛ yɛne bɛ te abusũa kõ! (1 Tim. 5:​1, 2) Ɔyɛ yɛ fɛ paa kyɛ, yɛne aliemaa mmrasua hemɔ mukoraati abɔ nu bɔ yɛsõ Yehowa ɔ. Afei koso, sɛ yɛyɛ nikyeebie maa aliemaa mmrasua nemɔ nwu ye kyɛ yekuro bɛ dwirɛ na yɛdwene bɛnwo a, ɔmaa bɛnye gye paa. Aliemaa brasua bie bɔ bɛfrɛ Vanessa hãne kyɛ: “Sɛ menwu ye paa kyɛ nwɔ Yehowa ahyehyɛdeɛ bɔ enu mmrienzua dwene menwo, na bekuro me dwirɛ sɔ nu a, ɔmaa menye gye, na m’ahõne tɔ mekunu.” Aliemaa brasua bie bɔ ɔwɔ Taiwan ne koso hãne kyɛ: “Meda Yehowa se paa kyɛ wafa me wawa ye ahyehyɛdeɛ bɔ bebu mmrasua, na bɛmaa bɔ mmrasua fanu biala nwo dwirɛ hia bɛ nanu ɔ. Ɛhe amaa me gyidie ayɛ se, na ɔyɛ me fɛ paa kyɛ manya yenwo atẽe maaboka Yehowa ahyehyedeɛ naso ɔ.”

Mmrienzua bɔ bɛwɔ asafo nanu bɔ bɛyɛ nningyein biemɔ bɛfa bekyire kyɛ bebu aliemaa mmrasua nemɔ ne, Yehowa nye gye bɛnwo paa! (Any. 27:11) Asafo nu panyi bie bɔ ɔwɔ Scotland bɔ bɛfrɛ ye Benjamin ne hãne kyɛ: “Mmenia bɔ bɛnzõ Yehowa ne, bɛmmva mmrasua bɛnyɛ húu. Yeti sɛ aliemaa mmrasua nemɔ ba Ahennie Asa so a, odikyɛ yɛmaa benwu kyɛ yekuro bɛ dwirɛ, na yebu bɛ paa.” Yede, ɛmɔma yɛyɛ bɔ yɛkɔhora biala yɛfa yesuesũa Yehowa, na yɛma aliemaa mmrasua nemɔ nwu kyɛ yekuro bɛ dwirɛ, na yebu bɛ paa.—Rom. 12:10.