Ambeni ita-koli akono na ando so akoli mingi abâ awali tongana ambumbuse zo. Na tapande, Hans, mbeni surveillant ti circonscription na Bolivie, atene: “Ambeni koli akono na ndo so a fa na ala ti sara ye na fandara. Akoli so abâ so ala yeke kota ahon awali na fani mingi ala yeke ne awali ape.” Shengxian, so ayeke ancien na Taïwan, atene: “Na ndo so mbi yeke vivre dä, akoli mingi abâ so a yeke nzoni ape ti tene awali afa bibe ti ala na akoli. Tongana mbeni koli asara tënë ti mbeni ye so mbeni wali afa na lo, amba ti lo koli ayeke bâ lo tongana dogbo zo.” Ambeni koli ayeke fa sioni bango ndo so ala yeke na ni na ndö ti awali na ambeni lege nde. Na tapande, ala peut ti tene atënë ti ngia so ane zo ape na ndö ti awali.

Merci so mbeni koli apeut ti changé atâa ndo so lo kono dä. Lo peut ti changé bibe so atene akoli ayeke kota ahon awali (aÉph. 4:​22-24). Lo peut ti sara ni tongana lo mû tapande ti Jéhovah. Na yâ ti article so, e yeke bâ tongana nyen la Jéhovah ayeke sara ye na awali, tongana nyen la aita-koli apeut ti manda ti sara ye na awali tongana ti so Jéhovah asara nga tongana nyen la a-ancien apeut ti mû li ni ti fa so ala ne aita-wali.

JÉHOVAH AYEKE SARA YE NA AWALI TONGANA NYEN?

Jéhovah azia nzoni tapande na ndö ti sarango ye na mbage ti awali. Lo yeke Babâ so abâ mawa ti zo so aye amolenge ti lo kue (Jean 3:16). Aita-wali so ayeke be-ta-zo ayeke tongana amolenge ti lo so lo ye ala mingi. Zia e bâ aye so Jéhovah asara ti fa so lo ye awali nga lo ne ala.

Lo sara ye na ala nde na akoli ape. Jéhovah asara akoli nga na awali na image ti lo (Gen. 1:27). Lo mû na akoli ndara wala kode ahon awali  ape; nga lo ye akoli ahon awali ape (2 Chron. 19:7). Lo mû na akoli na awali ngangu ti mä yâ ti atâ tënë ti Bible nga ti sara ye tongana lo. Na lê ti lo, mabe ti akoli nga na ti awali ayeke oko, atâa beku ti ala ayeke ti vivre na yâ ti Paradis na ndö ti sese wala ti duti agbia nga na aprêtre na yayu (2 Pi. 1:​1, kete tënë na gbe ni). A yeke polele so Jéhovah ayeke na sioni bibe na ndö ti awali ape.

Lo yeke mä ala. Jéhovah apensé na atënë ti bê ti awali nga na akpale so ala wara. Na tapande, lo mä lani asambela ti Rachel na Hannah, nga lo kiri tënë na ni (Gen. 30:22; 1 Sam. 1:​10, 11, 19, 20). Jéhovah apusu nga azo so asû Bible ti sû ambaï ti akoli so amä awali. Na tapande, Abraham asara lani ye alingbi na ye so Jéhovah ahunda na lo ti mä wali ti lo Sara (Gen. 21:​12-14). Gbia David amä lani Abigaïl. Ti vrai ni, lo bâ lani so Jéhovah la atokua lo ti sara tënë na lo (1 Sam. 25:​32-35). Jésus, so ayeke sara ye tâ gï tongana Babâ ti lo, amä lani mama ti lo Marie (Jean 2:​3-10). Atapande so afa so mbeni lege so Jéhovah afa so lo ne awali ayeke so lo mä ala.

Lo yeke na confiance na ala. Na tapande, Jéhovah asara lani confiance na Ève ti aidé ti bâ lege ti sese kue (Gen. 1:28). So lo sara tongaso, lo fa so lo bâ pëpe so koli ti lo Adam ayeke kota ahon lo, me lo yeke mbeni zo so alingbi ti mû maboko na lo. Jéhovah asara nga lani confiance na aprophète-wali Déborah na Huldah ti mû wango na azo ti lo, so mbeni juge nga na mbeni gbia ayeke na popo ni (aJu. 4:​4-9; 2 aGbia 22:​14-20). Laso, Jéhovah asara confiance na aita-wali ti sara kua ti lo. Aita-wali be-ta-zo so ayeke awafango tënë, apionnier nga amissionnaire. Ala yeke aidé ti leke plan ti aDa ti Royaume nga na ada ti Béthel, ala yeke leke ni nga ala yeke bâ lege ni si angbâ nzoni. Ambeni ayeke sara kua na Béthel nga ambeni ayeke sara kua na yâ ti abureau ti traduction so ayo na Béthel. Aita-wali so ayeke tongana gbâ ti aturugu so Jéhovah ayeke sara kua na ala ti sara ye so lo ye (Ps. 68:11). A yeke polele so Jéhovah abâ awali pëpe tongana azo so awoko wala so apeut ti sara mbeni ye ape.

TONGANA NYEN LA AITA-KOLI APEUT TI MANDA TI SARA YE NA AWALI TONGANA TI SO JÉHOVAH ASARA?

E aita-koli, ti tene e hinga wala e yeke sara ye na aita-wali tongana ti so Jéhovah ayeke sara, e bezoin ti gbu li nzoni na ndö ti fason so e yeke sara na ye nga e yeke pensé na ni. Ti sara ni, e bezoin mungo maboko. Legeoko tongana ti so mbeni radio ayeke aidé mbeni docteur ti hinga wala mbeni zo ayeke na kobela ti bê, mbeni nzoni kamarade nga na Bible apeut ti aidé e ti bâ wala e yeke na sioni bibe na ndö ti awali. Nyen la e peut ti sara ti wara mungo maboko so?

Hunda mbeni nzoni kamarade (aProv. 18:17). E peut ti hunda mbeni kamarade so e sara confiance na lo, so asara ye na nzoni bê nga so asara ye ahon ndö ni ape atënë so: “Mo pensé mbi yeke sara ye na aita-wali tongana nyen? Aita-wali ni abâ so mbi ne ala? Eskê mbi peut ti sara ye na ala nzoni ahon ti so mbi yeke sara ka?” Tongana kamarade ti mo ni afa na mo ambeni ye ti sara, zia si bê ti mo ason ape. Me, duti nduru ti sara achangement so mo bezoin ti sara.

Manda Bible. Nzoni lege ti bâ wala e yeke sara ye na aita-wali nzoni ayeke ti sara kua na Bible ti aidé e ti bâ yâ ti apensé ti e nga na asarango ye ti e (aHéb. 4:12). Tongana e manda Bible, e yeke hinga tënë na ndö ti akoli so asara ye na awali nzoni nga na ala so asara ye na ala nzoni ape. E peut ti haka aye so ala sara na ti e. Na ndö ni, ti haka aversê ti Bible apeut ti kanga lege na e ti luti gï na ndö ti mbeni versê oko so na bango ni ague oko na sioni bibe so e yeke na ni na ndö ti awali. Na tapande, ti gue oko na 1 Pierre 3:​7, koli adoit ti “ne [wali ti lo] tongana mbeni ta so akpengba ti lo pëpe”. a Eskê a ye ti tene so wali ayeke na gbe ti koli, so ti tene lo hinga ye ape wala lo yeke na kode ape tongana koli? Ên-ën. Haka tënë ti Pierre so na tënë so ayeke na aGalate 3:​26-29, mbilimbili so Jéhovah  asoro awali na akoli ti komande legeoko na Jésus na yayu. Tongana e manda Bible nga e hunda mbeni nzoni kamarade ti e ti fa na e pensé ti lo na ndö ti fason so e yeke sara ye na awali, e peut ti manda ti ne aita-wali.

TONGANA NYEN LA A-ANCIEN AYEKE FA SO ALA NE AITA-WALI?

Aita-koli apeut nga ti manda ti ne aita-wali tongana ala bâ tapande ti a-ancien so ayeke azo so asara ye na ndoye. Tongana nyen la a-ancien ayeke mû li ni ti fa so ala ne aita-wali? Zia e bâ ambeni fason so ala peut ti sara ni.

Ala yeke gonda aita-wali. Bazengele Paul azia pendere tapande na a-ancien. Na yâ ti lettre so lo tokua na congrégation ti Rome, lo gonda gbâ ti aita-wali polele (aRom. 16:12). Imaginé tongana nyen la terê ti aita-wali ni anzere na ngoi so a diko lettre ti Paul na congrégation. Legeoko nga, a-ancien ayeke gonda aita-wali mingi ndali ti anzoni sarango ye ti ala nga ndali ti kua so ala yeke sara na Jéhovah. A aidé aita-wali ti hinga so congrégation ane ala nga aye ala. Atënë ti kpengbango zo so mbeni ancien atene apeut ti duti tâ gï ye so aita-wali so abezoin ni na ngoi so ala ngbâ ti sara na Jéhovah be-ta-zo.—aProv. 15:23.

Na ngoi so a-ancien ayeke gonda aita-wali, ala yeke sara ni na bê ti ala kue nga ala yeke fa ye so ala gonda ala ndali ni. Ngbanga ti nyen? Ita-wali Jessica atene: “Tongana aita-koli atene na mbeni ita-wali so lo sara kua nzoni, a yeke nzere na lo. Me a yeke nzere na e mingi tongana aita-koli agonda e ndali ti ambeni mbilimbili ye so e sara, na tapande so e fa na amolenge ti duti kpô na ngoi ti abungbi wala so e gue e mû mbeni zo so ayeke manda Bible ti ga na lo na bungbi.” Tongana a-ancien agonda aita-wali ndali ti ambeni mbilimbili ye so ala sara, a yeke sara si ala bâ so a bezoin ala nga a bâ ala na nene ni.

 Ala yeke mä aita-wali. A-ancien so asara terê ti ala kete ahinga so gï atënë ti ala la ayeke nzoni ape. A-ancien tongaso ayeke hunda na aita-wali ti fa apensé ti ala, na ala yeke mä ala nzoni na ngoi so ala yeke sara tënë. Tongana ala sara tongaso, ala yeke kpengba aita-wali ni nga ala wani ayeke bâ nzoni dä. Na lege wa? Gerardo, mbeni ancien so ayeke sara kua na Béthel, atene: “Mbi yeke hunda ka na aita-wali ti fa na mbi bango ndo ti ala ndali ti so a-aidé mbi ti sara kua ti mbi nzoni mingi. Mingi ni, ala sara kua ni so teti angu mingi ahon mingi ti aita-koli.” Na yâ ti congrégation, aita-wali mingi ayeke apionnier, tongaso ala hinga ye mingi na ndö ti azo so ayeke na yâ ti territoire ti ala. Bryan, mbeni ancien, atene: “Aita-wali ayeke na anzoni sarango ye mingi nga na akode mingi so bungbi abezoin ni. Tongaso, gi ti bâ nzoni na lege ti aye so ala hinga.”

A-ancien so ayeke na ndara ayeke sara pëpe sanka ti atënë ti aita-wali. Ngbanga ti nyen? Edward, mbeni ancien, atene: “Tënë so mbeni ita-wali atene nga aye so lo vivre ni apeut ti aidé mbeni ita-koli ti comprendre mbeni tënë nzoni nga apeut ti aidé lo ti zia terê ti lo na place ti azo.” (aProv. 1:5). Même tongana mbeni ancien apeut pëpe ti sara kua na tënë so mbeni ita-wali atene, lo peut ti kiri singila na lo ndali ti atënë so lo tene nga ndali ti so lo fa na lo ye so lo hinga.

Ala yeke fa akua na aita-wali. A-ancien so asara ye na ndara ayeke gi alege ti fa akua na aita-wali. Na tapande, ala peut ti fa na aita-wali tongana nyen ti sara abungbi ti fango tënë, tongaso si ala leke terê ti ala tongana mbeni ita-koli so awara batême ayeke dä ape. Ala peut ti fa na ala ti sara kua na agbakuru wala amachine, tongaso si ala peut ti aidé ti leke ada ti bungbi ti Jéhovah nga ti bâ lege ni. Na Béthel, asurveillant ayeke fa na aita-wali akua nde nde, na tapande, kua ti maintenance, vongo ye, bango lege ti compte, bango lege ti ordinateur wala ambeni ye tongaso. Tongana a-ancien ayeke fa akua na aita-wali, ala fa so ala bâ so ala lingbi nga ala yeke azo ti confiance.

Aita-wali mingi ayeke sara kua na aye so a fa na ala ti aidé na ambeni zo. Na tapande, ambeni ita-wali so a fa na ala ti leke ada ayeke aidé aita ti kiri ti leke da ti ala na peko ti mbeni ngangu kpale. Ambeni ita-wali so a fa na ala kode ti fango tënë na ando so azo ayeke gue dä mingi ayeke fa nga ni na ambeni ita-wali. Aita-wali abâ a-ancien so afa na ala akua tongana nyen? Ita-wali Jennifer atene: “Na ngoi so mbi yeke aidé lani ti leke mbeni Da ti Royaume, mbeni surveillant amû ngoi ti fa na mbi kua ni. Lo bâ kua so mbi sara, na lo gonda mbi ndali ni. Mbi ye mingi ti tene mbi na lo e sara kua ndali ti so mbi bâ so mbi sara mbeni nzoni ye nga a sara confiance na mbi.”

ANZONI YE TI PEKO TI SARANGO YE NA AITA-WALI TONGANA AFAMI TI E

E ye aita-wali so ayeke be-ta-zo tongana ti so Jéhovah aye ala. Tongaso, e yeke sara ye na ala tongana afami ti e (1 Tim. 5:​1, 2). E ye ala nga a nzere na e ti sara kua legeoko na ala. Nga e yeke na ngia mingi tongana ala hinga so e ye ala nga e mû maboko na ala. Ita-wali Vanessa atene: “Mbi kiri singila mingi na Jéhovah so mbi yeke na yâ ti bungbi ti lo, so asi singo na aita-koli so adë bê ti mbi.” Mbeni ita-wali na Taïwan atene: “Mbi kiri singila mingi na Jéhovah nga na bungbi ti lo so aye awali nga abâ atënë ti bê ti ala na nene ni. Ye so akpengba mabe ti mbi nga asara si mbi kiri singila mingi ndali ti pasa so mbi yeke na ni ti duti na yâ ti bungbi ti Jéhovah.”

A nzere na Jéhovah mingi tongana lo bâ aita-koli be-ta-zo ayeke sara ngangu ti bâ awali nga ti sara ye na ala tongana ti lo (aProv. 27:11). Benjamin, mbeni ancien na Écosse, atene: “Laso, akoli mingi na yâ ti dunia ane awali oko ape. Tongaso, tongana aita-wali alï na Da ti Royaume, e yeke sara kue ti tene ala bâ so a ne ala nga a ye ala.” Zia e kue e sara kue ti mû tapande ti Jéhovah na lege so e sara ye na aita ti e ti wali na ndoye nga na nengo zo so ala lingbi na ni.—aRom. 12:10.