Baguma bakulire omu nkomedu balume banji babona nka baba balushire abakazi. Kwa lwiganyo, Hans, mwangalizi muguma w’omuzunguko w’omu Bolivie, adesire oku balume baguma na baguma bakulire omu nkomedu eha abalume omurhima bakacigendesa omu njira y’obucibone bwenene. Abo balume baba bayemire oku baba balushire abakazi na kanji-kanji banabajirire omu njira erhali ya bukenge. Mugula muguma w’omu Taïwan ohamagalwa Shengxian, adesire ntya: “Aha ndama, balume banji banarhanye oku abakazi barhakaha abalume entanya zabo. Erhi omulume akamanyisa ababo entanya zahânagwa n’omukazi, ababo banamugayaguze.” Abandi balume banayerekane entanya zabo mbi lugenda abakazi omu njira zirhali z’obwalagale bwenene. Kwa lwiganyo, banacalika lugenda abakazi omu njira y’okubabulira obukenge.

Eby’okushagalusa, kuli kubona oku ngasi mulume anashanja ciru akaba akuliraga omu nkomedu ehi. Anahima entanya z’okubona nk’abalume baba balushire abakazi. (Ef. 4:22-24) Abalume banajira ntyo omu kuyiga olwiganyo lwa Yehova. Mw’eci cigabi, rhwaganirira gurhi Yehova ajirira abakazi, gurhi bene wirhu bakaciyigiriza okujirira abakazi nk’oku Yehova abajirira, na gurhi abagula bakayerekana olwiganyo omu kuyeresa bali birhu obukenge.

GURHI YEHOVA AJIRIRA ABAKAZI?

Yehova anayerekane olwiganyo lwinja lw’oku abakazi bashinganine bajirirwe. Aba Ishe w’omulala w’obwonjo, oba ozigire abana bage boshi. (Yn. 3:16) Na bali birhu bazigirwa ko baba nka bali bage ba ngulo ndarhi kuli ye. Rhuganirire enjira zikulikire Yehova ayerekanamwo oku aba azigire abakazi n’okubakenga.

 Anabajirire omu njira erhali ya kabôlo. Yehova alemire abalume n’abakazi oku nshusho yage. (Murh. 1:27) Yehova arhajiraga abalume babe ba bwenge bwenene erhi ba buhashe bunji bwenene kulusha abakazi; arhanaba azigire abalume kulusha abakazi. (2 Nga. 19:7) Alemire abalume n’abakazi n’obwenge buguma bw’okuhugûkwa enyigirizo z’Ebibliya n’okurhanya bwenene oku morhere gage minja. Kandi Yehova anabone obuyemere bw’abalume n’obw’abakazi oku buyumanine, babe bagwerhe obulangalire bw’okulama omu paradizo hano igulu, erhi bw’okukola nka bami na bakuhani e mpingu. (2 Pt. 1:1) Kobinali, Yehova arhabôlola abakazi.

Anabayumvirhize. Yehova anashibirire oku abakazi baciyumva n’amazibu bajira. Kwa lwiganyo, ayumvirhizize amasala ga Raheli na Ana anagashuza. (Murh. 30:22; 1 Sam. 1:10, 11, 19, 20) Kandi Yehova alongozize abandisi b’Ebibliya kugerera iroho lyage litagatifu lyo bahiramwo emyanzi lugenda abalume bayumvirhizize abakazi. Kwa lwiganyo, Abrahamu akulikire obulongozi Yehova amuhaga oku ayumvirhize mukage, Sara. (Murh. 21:12-14) Mwami Daudi ayumvirhizize Abigaili. Kobinali, aciyumvirhe nka Yehova ye warhumaga Abigaili ly’aj’imuganiza. (1 Sam. 25:32-35) Yezu, wayerekanaga n’obwimana amorhere g’Ishe, ayumvirhizize nnina Mariya. (Yn. 2:3-10) Ezo nyiganyo ziyerekine oku enjira nguma Yehova ayeresamwo abakazi obukenge, kuba kubayumvirhiza.

Anabalangalire. Kwa lwiganyo, Yehova al’ilangalire Eva omu kumuha omukolo gw’okurhabala okushibirira igulu lyoshi. (Murh. 1:28) Omu kujira ntyo, ayerekine oku arhakag’ibona nk’iba Adamu ye mulushire, cikone akag’imubona nka murhabazi w’iba. Kandi Yehova al’ilangalire omulebi-kazi Debora na Hulda omu kubaha omukolo gw’okuhanûla abantu, kuhiramwo omwami ciru na kuhani. (Bac. 4:4-9; 2 Bam. 22:14-20) Ene, Yehova analangalire abakazi Bakristu n’okubabona oku banahikiriza omukolo gwage. Abo bali birhu Bakristu bali bakola nka bahubiri, bapainiya na bamisiyonere. Banarhabale omu kujira e plan, okuyubaka, n’okushibirira Enyumpa z’Obwami n’enyumpa z’etawi. Baguma mulibo banakolere oku Beteli; n’abandi banakolere oku biro by’okuhindula ebicapo birhu omu zindi ndimi. Abo bali birhu ko baba nka murhwe munene Yehova akolesa ly’ahikiriza obulonza bwage. (Enna. 68:11) Kobinali, Yehova arhabona abakazi nka bali bazamba erhi barhagwerhi buhashe.

GURHI BENE WIRHU BAKACIYIGIRIZA OKUJIRIRA ABAKAZI NK’OKU YEHOVA ABAJIRIRA?

Bene wirhu, lyo rhumanya erhi rhunajirire bali birhu Bakristu nk’oku Yehova abajirira, rhushinganine rhulabirize bwinjinja entanya zirhu n’ebijiro birhu. Lyo rhujira ntyo, rhulagirire oku burhabale. Nka kula amashini g’eradiyo gakarhabala okumanya obulwala omuntu agwerhe omu murhima gw’okunali, omwîra mwinja n’Akanwa ka Nnâmahanga byanarhurhabala rhumanye ngasi ntanya mbi rhwakaba rhugwerhe lugenda abakazi omu murhima gwirhu. Gurhi rhwakajira lyo rhuhâbwa obo burhabale?

Odose omwîra mwinja. (Mig. 18:17) Kwanaba kwinja rhuganize omwîra w’okulangalirwa onamanyikine oku aba wa lukogo na mwinja n’okumudosa amadoso gali nk’aga: “Gurhi orhanya njirira bali birhu? Ka banaderha oku nambakenge? Ka hali kantu kalebe nakajira lyo nkabajirira bwinja kulusha?” Erhi omwîra wawe akakuyeresa njira ndebe wakakubulamwo oku obajirira, omanye orhacihaliraga. Ahali h’okucihalira, obe mubidu okujira empindulo zihûnyirwe.

Okayiga Akanwa ka Mungu. Enjira nyinja bwenene rhwakamanyamwo erhi rhuli rhwajirira bali birhu bwinja kuli kulabiriza entanya zirhu n’ebijiro birhu kugerera Akanwa ka Mungu. (Hb. 4:12) Amango rhuli rhwayiga Ebibliya, rhunayige lugenda abalume bajirire abakazi bwinja n’abarhabajiriraga bwinja. Na ntyo rhwanashushanya ebijiro birhu n’ebyabo. Na kandi, okushushanya amandiko g’Ebibliya kwanarhurhabala rhurharhenzagya buzira kumanya amandiko omu kanga gayandikagwamwo mpu lyo rhulunga okuboko entanya z’amagosa rhugwerhe lugenda abakazi. Kwa lwiganyo, kushimbana na 1 Petro 3:7, omukazi ciba “ciremwa cizamba.” b K’oko kuli kuderha oku omulume aba amulushire, ye  oba wa bwenge bunji erhi wa buhashe bunji kulusha omukazi? Nanga ciru n’ehitya! Oshushanye enderho za Petro n’enderho ziri omu Abagalasiya 3:26-29 ziyerekine oku Yehova acishozire abakazi n’abalume lyo baba barhegesi haguma na Yezu omu mpingu. Omu kuyiga Akanwa ka Mungu n’okudosa omwîra mwinja entanya zage lugenda oku rhujirira abakazi, rhwanaciyigiriza okuyeresa bali birhu obukenge bushinganine.

GURHI ABAGULA BAYERESAMWO BALI BIRHU OBUKENGE?

Bene wirhu omu cigamba nabo banaciyigiriza okujirira bali birhu omu njira y’obukenge omu kukulikira olwiganyo lw’abagula b’obuzigire. Gurhi abagula bayerekana olwiganyo omu kuyeresa bali birhu obukenge? Rhuganirire njira ndebe bajiramwo ntyo.

Banavuge bali birhu omunkwa. Entumwa Paolo yayerekine olwiganyo lwinja abagula bakayiga. Avuzire bali birhu banji omunkwa n’obwalagale omu maruba ayandikiraga ecigamba c’e Roma. (Rm. 16:12) Ka wanarhanya omwishingo abo bali birhu bagwasirwe babe bayumvirhe erhi ago maruba ga Paolo gasomwa omu cigamba cabo? Ko n’oko, abagula banavuge bali birhu omunkwa bwenene oku morhere gabo minja n’oku mukolo bajirira Yehova. Oko kunarhume bali birhu bamanya oku ecigamba ciba cibakenzire cinaba cibashagalukire. Enderho z’omugula z’okuhâna omurhima zanaba zo abo bali birhu balagirireko amango bali bagendekera bakolera Yehova n’obwishwekerezi.—Mig. 15:23.

Erhi abagula bavuga bali birhu omunkwa, banajire enderho zabo zibe za kurhenga oku murhima bananabayerese ebintu by’obwalagale babavuzireko omunkwa. Bulya gurhi? Mwali wirhu muguma ohamagalwa Jessica adesire ntya: “Kuba kwinja erhi bene wirhu babwira mwali wirhu erhi, ‘wajijire bwinja.’ Cikone rhunashagaluke bwenene erhi bene wirhu barhuvuga omunkwa oku kantu kalebe k’obwalagale, nk’okuyigiriza abana birhu okurhajira olubi omu ntimanano erhi okugend’irhôla omwanafunzi w’Ebibliya n’okumulerha oku ntimanano.” Erhi  abagula bavuga bali birhu omunkwa oku kantu kalebe k’obwalagale, banabajire baciyumve oku ecigamba cibalagirireko banali ba ngulo ndarhi.

Banayumvirhize bali birhu. Abagula birhohye banahugûkwe oku arhali bone bakaba bagwerhe entanya nyinja. Abagula ba ntyo banahûne bali birhu entanya zabo, bananabayumvirhize bwinja amango bali baganira. Omu kujira ntyo, abagula banahe bali birhu omurhima bananacilerhere obunguke. Omu njira nci? Mugula muguma ohamagalwa Gerardo, okolera oku Beteli, adesire ntya: “Nabwine oku okuhûna bali birhu entanya zabo kunantabale njire omukolo gwani bwinja bwenene. Kanji-kanji, banabe bajijire omukolo kasanzi kanji kulusha bene wirhu banji.” Omu cigamba, bali birhu banji banakole nka bapainiya, co cirhumire baba bamanyire binji lugenda abantu balama omu eneo y’ecigamba cabo. Mugula muguma ohamagalwa Bryan adesire ntya: “Bali birhu bajira morhere manji minja n’obulenga ikubuliro lilagirireko. Co cirhumire, oyunguke n’obulenga bwabo!”

Abagula b’obwenge barhaba babidu okulahira entanya za bali birhu. Bulya gurhi? Mugula muguma ohamagalwa Edward adesire ntya: “Entanya za mwali wirhu n’obulenga bwage byanarhabala mwene wirhu amanye ebintu byoshi lugenda kanga kalebe, byananamurhabala okucihira ahali h’abandi.” (Mig. 1:5) Ciru akaba omugula arhakolesizi entanya za mwali wirhu, anamuvuga omunkwa kw’ezo ntanya n’oku burhimanya bwage.

Banakomereze bali birhu. Abagula b’oburhimanya banalonze obulyo bw’okukomereza bali birhu. Kwa lwiganyo, banayigiriza bali birhu gurhi bakalongozamwo entimanano z’amahubiri amango nta mwene wirhu mubatize oli ho. Banabakomereza okukolesa bikolanwa bilebe erhi mashini malebe lyo barhabala oku mikolo y’okuyubaka n’okushibirira enyumpa z’eciteokrasi. Oku Beteli, abayimangira emikolo bakomerezize bali birhu okujira emikolo eri lubero, ehiziremwo okushibirira emyubako, okugula ebintu, okujira ensabu, okuhira eprograme omu ordinatere, n’eyindi mikolo. Erhi abagula bakomereza bali birhu, banayerekane oku banababone oku bajira obuhashe n’oku baba ba kulangalirwa.

Bali birhu banji banakolese ebi bayigirizibagwa n’abagula lyo balerhera abandi obunguke. Kwa lwiganyo, bali birhu baguma na baguma banakolese obulenga bw’obubasi bayigirizibagwa lyo barhabala okuyubakira abandi enyumpa zabo enyuma z’obuhanya bucilerha bone. Abandi bali birhu banakolese obulenga bayigirizibagwa bw’okuhubiri ahantu h’abantu banji lyo bakomereza bali birhu banji mw’eyo njira y’okuhubiri. Gurhi bali birhu baciyumva lugenda abagula babakomerezagya? Mwali wirhu muguma ohamagalwa Jennifer adesire ntya: “Amango nakag’ikola oku mukolo gw’obubasi bwa Nyumpa nguma y’Obwami, mwene wirhu wal’iyimangire ogo mukolo aciha akasanzi k’okunkomereza. Abwine omukolo nakag’ijira anamvuga omunkwa kuli go. Nal’isimire okukola haguma naye bulya nakag’iciyumva ndi wa bulagirire na wa kulangalirwa.”

OBUNGUKE BW’OKUJIRIRA ABAKAZI OMU CIGAMBA NKA BALI BIRHU

Rhuba rhuzigire bali birhu bishwekerezi nk’oku Yehova naye aba abazigire! Co cirhumire rhunabajirire nka bali birhu b’omu mulala. (1 Tm. 5:1, 2) Rhuba rhubazigire rhunanacidinire okukola haguma nabo. Rhunanashagaluke bwenene erhi baciyumva oku rhubazigire rhunabalunzire okuboko. Mwali wirhu muguma ohamagalwa Vanessa adesire ntya: “Mvuzire Yehova omunkwa bwenene okubona mba muguma w’omw’ikubuliro lyage liyunjwiremwo bene wirhu bampire omurhima bwenene.” Mwali wirhu muguma w’omu Taïwan adesire ntya: “Mvuzire omunkwa bwenene okubona Yehova n’ikubuliro lyage banabone abakazi oku bali ba ngulo ndarhi bananashibirire oku baciyumva. Oko kunazibuhye obuyemere bwani kunanarhume nashagalukira ciru bwenene olukengwa ngwerhe lw’okuba muguma w’omw’ikubuliro lya Yehova.”

Yehova agwasirwe abe anashagaluke bwenene erhi abona abalume Bakristu bishwekerezi bali bacihangana okubona n’okujirira abakazi akage! (Mig. 27:11) Mugula muguma w’omu Ecosse ohamagalwa Benjamin adesire ntya: “Entanya z’er’igulu okubiyerekire abakazi zirhaba za kubayeresa obukenge. Co cirhumire erhi abakazi baja omu Nyumpa y’Obwami, rhulonzize baciyumve lubero n’oku igulu libabona.” Lekagi rhujire okwirhu koshi lyo rhuyiga olwiganyo lwa Yehova omu kujirira bali birhu bazigirwa omu njira y’obuzigire n’obukenge bashinganine.—Rm. 12:10.