So u de kiija a wan wosudendu ka de ta si mujëë sëmbë lagi möön womi. Wan keling-gaanwomi de kai Hans di ta dë a di köndë de kai Bolivia bi taki taa: „So womi kiija a wan wosudendu ka de bi ta da de taanga u du soni u lei taa de hei gaanfa seei möön mujëë sëmbë. Di soni dë ta mbei taa dee lö womi dë ta si mujëë sëmbë kuma de möön lagi.” Wan gaanwomi de kai Shengxian di ta libi a Taiwan bi taki taa: „A di pisiwata ka mi ta libi, sömëni womi ta si kuma mujëë sëmbë an abi di leti u taki unfa de ta si soni. Ee wan womi bi o taki u wan soni di wan mujëë bi piki ën, nöö di soni dë sa mbei dee pei fëën an abi lesipeki dëën möön.” Woto womi dë tu di ta du woto soni u lei taa mujëë sëmbë lagi. De sa ta taki lafu soni u lei taa de an abi lesipeki da de.

Aluwasi na un wosudendu wan womi kiija, tökuseei a sa ko lei u na ta si kuma womi sëmbë hei möön mujëë sëmbë (Ef. 4:22-24). De sa ko ta si soni a di soifi fasi te de ta djeesi Jehovah. A di woto aki woo luku unfa Jehovah ta libi ku mujëë sëmbë, unfa dee baaa sa libi ku mujëë sëmbë kumafa Jehovah ta libi ku de, söseei unfa dee gaanwomi sa lei taa de ta lesipeki dee sisa.

UNFA JEHOVAH TA LIBI KU MUJËË SËMBË?

Jehovah ta lei u unfa u sa libi ku mujëë sëmbë. A dë wan Tata di ta fii da dee mii fëën, nöö a lobi hii de tuu (Joh. 3:16). A ta si dee mujëë sëmbë dee ta hoi deseei nëën kuma lobi mujëë mii fëën. Buta pakisei a di fasi fa Jehovah ta hei mujëë sëmbë.

An lobi wan sëmbë möön wotowan. Jehovah mbei womi ku mujëë kumafa hënseei dë (Ken.  1:27). Jehovah an mbei womi sëmbë möön köni möön mujëë sëmbë, nasö taa de sa du soni möön bunu möön de. Söseei an lobi womi möön mujëë (2 Klon. 19:7). A mbei womi ku mujëë a sö wan fasi taa hii de tuu sa fusutan dee lei u Bëibel, sö taa de sa djeesi ën a dee fasi fëën. Jehovah ta si di biibi u womi ku mujëë tuu kuma gaan soni. A da hii de tuu di gaandi u libi u teego a goonliba aki nasö u go dini ën kuma könu ku mindima a liba ala (2 Pet. 1:1). A dë gbelingbelin u si taa Jehovah an ta si mujëë sëmbë möön lagi.

A ta haika de. Jehovah ta kë sabi unfa mujëë sëmbë ta fii, söseei ku andi de ta booko de hedi. A bi haika, söseei a bi piki di begi u Lakëli ku Hana (Ken. 30:22; 1 Sam. 1:10, 11, 19, 20). Boiti di dë, Jehovah bi mbei de sikifi woto u womi di bi haika mujëë sëmbë a Bëibel. Abahamu bi haika hën mujëë Sala kumafa Jehovah bi piki ën (Ken. 21:12-14). Könu Dafiti seei bi haika Abigaëli tu. A bi fusutan taa Jehovah hën bi mandëën ko fan ku ën (1 Sam. 25:32-35). Jesosi di ta djeesi hën Tata bumbuu a dee fasi fëën seei bi ta haika hën mama Malia (Joh. 2:3-10). Dee soni aki ta lei u limbolimbo taa wan u dee fasi fa Jehovah ta lei taa a ta lesipeki mujëë sëmbë, da te a ta haika de.

A ta futoou de. Jehovah bi futoou Eva di a bi piki ën faa sölugu hii di goonliba ku dee soni dee dë nëën (Ken. 1:28). Di soni aki ta lei taa Jehovah an bi ta si kuma Eva lagi möön Adam. Ma a bi ta si ën kuma wan heepima fëën. Jehovah bi futoou dee mujëë tjabukama de kai Debola ku Hulda u tja bosikopu go da di föluku fëën, te kisi wan mindima ku wan könu (Kuutm. 4:4-9; 2 Kön. 22:14-20). A di ten aki Jehovah ta futoou dee mujëë dee dë Keesitu sëmbë u de du di wooko fëën. Dee sisa aki dë peleikima, de ta du di pioniliwooko, söseei de ta du di sëndëlengiwooko. De ta heepi teeken, de ta heepi mbei, söseei de ta heepi seeka dee kamian ka u ta dini Gadu. So u de ta wooko a Bëtëli, nöö wotowan ta heepi puu buku ko a woto töngö. Dee sisa aki dë kuma wan gaan kulupu sodati di Jehovah ta tei u wooko dëën (Ps. 68:11). A de gbelingbelin u si taa Jehovah ta si mujëë kuma sëmbë di taanga, söseei di sa’ u du soni.

UNFA DEE BAAA SA LEI U LIBI KU MUJËË SËMBË KUMA FA JEHOVAH TA LIBI KU DE?

Dee baaa, ee un kë sabi ee un ta libi ku dee sisa fuu kumafa Jehovah ta libi ku de, nöö un musu öndösuku unuseei luku unfa un ta pakisei, söseei unfa un ta du soni. Un abi heepi fanöudu u du di soni dë. Wan data sa wooko ku masini u luku ee wan sëmbë hati dë gösöntu. Sö nöö di Wöutu u Gadu, ku wan bunu mati sa heepi unu fuun ko sabi ee di fasi fa un ta si mujëë sëmbë ta kai ku Jehovah. Andi un sa du u feni heepi?

Hakisi wan bunu mati fii (Nöng. 18:17). U sa hakisi wan mati fuu di abi bunu fasi, söseei di u ta futoou taa: „Unfa i si kuma mi ta libi ku dee sisa fuu? De ta fii taa mi ta lesipeki de u? Wan soni dë di mi sa du u libi möön bunu ku de u?” Ee di mati fii taa i musu tooka so soni, nöö na fia ku ën. Ka u hati fii boonu, nöö mbei möiti u du andi a taki.

Öndösuku di Wöutu u Gadu. Di möön bunu fasi fa u sa ko sabi ee u ta libi bunu ku dee sisa fuu, hën da te u mbei di Wöutu u Gadu heepi u fu ko sabi unfa u ta pakisei, söseei unfa u ta du soni (Heb. 4:12). Te u ta lesi Bëibel, nöö u ta lei soni u womi di bi ta libi bunu ku mujëë sëmbë, ku womi di an bi ta libi bunu ku de. U sa tei di fasi fa de bi du soni maaka ku di fasi fa useei ta libi ku mujëë sëmbë. Dee baaa musu luku bunu taa de an tei wan kodo Bëibel tëkisi, nöö de lei ku ën taa an föutu u si mujëë sëmbë wan fasi. Te u luku 1 Petuisi 3:7, nöö a ta taki taa wan womi musu ta lesipeki hën mujëë fu di di mujëë „da di möön suwaki wan”. b Di soni aki kë taki taa mujëë sëmbë an taanga, an köni, nasö an sa’ u du soni kuma womi ö? Na seei! Te u tei di soni di Petuisi bi taki maaka ku di soni di Galasia 3:26-29 ta taki, nöö a ta lei u taa Jehovah tei womi ku mujëë tuu u go tii makandi ku Jesosi a liba ala. Te u ta öndösuku di  Wöutu u Gadu, söseei te u hakisi wan bunu mati fuu faa konda da u unfa a ta si u ta libi ku mujëë sëmbë, nöö woo ko lei u lesipeki dee sisa fuu möön bunu.

UNFA DEE GAANWOMI TA LEI TAA DE TA LESIPEKI DEE SISA?

Dee baaa u di kemeente sa djeesi dee gaanwomi a di fasi fa de ta lesipeki dee sisa. Unfa dee gaanwomi ta lei taa de ta lesipeki dee sisa? Buta pakisei a dee soni aki.

De ta gafa dee sisa. Dee gaanwomi sa djeesi apösutu Paulosu. A bi gafa sömëni sisa a di biifi di a bi manda da di kemeente a Loomë (Lom. 16:12). Pakisei luku unfa dee sisa aki bi o ta fii te de bi ta lesi di biifi u Paulosu a di kemeente. Sö nöö dee gaanwomi ta gafa dee sisa da dee bunu fasi dee de abi, söseei u dee wooko di de ta du da Jehovah. Dee soni aki ta mbei dee sisa sabi taa dee baaa u di kemeente ta lesipeki de, söseei taa de ta kai de gaan soni. Di soni di wan gaanwomi sa taki u da wan sisa taanga, sa dë wan soni di sa mbei di sisa feni taanga u dini Jehovah go dou.​—Nöng. 15:23.

Te wan gaanwomi ta gafa wan sisa, nöö a ta piki ën fa soni de tuutuu, söseei a ta piki ën gbelingbelin faandi mbei a ta gafa ën. Faandi mbei? Wan sisa de kai Jessica bi taki taa: „A bunu seei te wan baaa piki wan sisa taa: ‚Di soni di i du dë bunu seei.’ Ma u ta möön tei ën u bigi te wan baaa piki u gbelingbelin faandi mbei a ta gafa u. A sa dë di fasi fa u ta lei dee mii fuu u de sindo pii te de dë a komakandi, nasö te u go tei wan sëmbë di u ta lei soni u Bëibel tja ko a komakandi.” Te dee gaanwomi ta piki dee sisa gbelingbelin faandi mbei de ta gafa de, nöö de ta fii taa dee gaanwomi ta tei ën u bigi taa de dë a di kemeente.

De ta haika dee sisa. Te wan gaanwomi abi sakafasi, nöö a ta sabi taa na hën wanwan nöö ta  sa’ u du wan soni. So gaanwomi ta hakisi so sisa u konda da de unfa de ta pakisei u wan soni, nöö de ta haika de. Te de ta du sö, nöö de ta da dee sisa taanga, ma deseei ta feni wini fëën tu. Unfa sö? Wan gaanwomi de kai Gerardo di ta wooko a Bëtëli bi taki taa: „Mi si taa te mi hakisi dee sisa unfa de ta pakisei u wan soni, nöö mi ta du di wooko u mi möön bunu. So juu a sa pasa taa de du di wooko dë longi möön sömëni u dee baaa.” Sömëni sisa ta du di pioniliwooko, nöö de ta sabi dee sëmbë u di pisiwata bumbuu. Wan gaanwomi de kai Bryan bi taki taa: „Dee sisa fuu abi bunu fasi, söseei de ta sa’ u du soni bunu, di ta tja wini ko da di ölganisaasi. Un boo mbei möiti fuu feni wini u dee soni di de sa u du!”

Te wan gaanwomi köni, nöö a ta buta pakisei a dee soni di dee sisa ta taki. Faandi mbei? Wan gaanwomi de kai Edward bi taki taa: „Di taki di wan sisa ta taki unfa a ta pakisei u wan soni, sa heepi wan baaa faa ko fusutan wan soni möön bunu. Boiti di dë, a sa heepi ën fu a abi tjalihati da wotowan” (Nöng. 1:5). Aluwasi wan baaa an o wooko ku wan soni di wan sisa piki ën, tökuseei a sa dëën tangi u di a konda dëën unfa a ta si soni.

De ta lei dee sisa u du soni. Te wan gaanwomi köni, nöö a ta suku okasi u lei dee sisa soni. De sa lei de unfa de sa hoi wan peleikiwooko komakandi ee a ko pasa taa wan dopu baaa an dë. De sa lei de u wooko ku dee masini di de ta tei u mbei dee kamian ka u ta dini Gadu, sö taa de sa ta heepi du di wooko. Dee baaa dee ta tei fesi a Bëtëli ta lei dee sisa u du sömëni wooko. De da de di gaandi u seeka kamian, u du computer wooko, u seeka möni soni, u bai so fanöudu soni, söseei u du sömëni woto soni jeti. Te dee gaanwomi ta lei dee sisa soni, nöö de ta lei taa de ta si de kuma sëmbë di sa’ u du soni, söseei taa de ta futoou de.

Sömëni sisa tei dee soni di dee baaa lei de u heepi wotowan. So u dee sisa bi heepi wotowan mbei dee wosu u de, baka di gaan wata nasö gaan ventu bi ko a di pisiwata ka de ta libi. Boiti di de, dee sisa dee bi lei u du di peleikiwooko, bi heepi woto sisa tu u du di peleikiwooko möön bunu. Unfa dee sisa ta si dee gaanwomi dee ta lei de soni? Wan sisa de kai Jennifer bi taki taa: „Di mi bi ta heepi mbei wan Könuköndë zali, hën wan baaa bi tei hën ten u lei mi soni. A bi ta buta pakisei a di wooko di mi bi ta du, nöö a bi ta gafa mi. Mi bi lobi di fasi fa u bi ta wooko makandi, u di mi bi ta fii ta a ta futoou mi, söseei taa a ta tei di wooko di mi bi ta du u bigi.”

WOO FENI WINI TE U TA LIBI KU DEE SISA FUU KUMA SËMBË FU U WOSUDENDU

U lobi dee sisa fuu kumafa Jehovah lobi de! Nöö u ta libi ku de kuma u famii (1 Tim. 5:1, 2). A dë wan piizii soni, söseei a dë wan gaandi u wooko makandi ku de. U ta wai seei te de ta si taa u lobi de, söseei taa u ta heepi de. Wan sisa de kai Vanessa bi taki taa: „Mi ta da Jehovah tangi taa mi dë a di ölganisaasi fëën ka baaa dë di ta da mi taanga seei.” Wan sisa di ta dë a Taiwan bi taki taa: „Mi dë ku tangi a hati taa Jehovah ku di ölganisaasi fëën ta buta pakisei gaanfa seei a dee mujëë sëmbë, söseei a di fasi fa de ta fii. Di soni dë ta mbei di biibi u mi ko möön taanga. Boiti di dë, a ta mbei mi ta tei di gaandi di mi abi u dë a di ölganisaasi u Jehovah u bigi.”

Jehovah o ta wai seei te a ta si fa dee baaa ta djeesi ën a di fasi fa a ta si mujëë sëmbë, söseei a di fasi fa a ta libi ku de (Nöng. 27:11). Wan gaanwomi de kai Benjamin di ta libi a Skotland bi taki taa: „Sömëni womi a di goonliba aki na ta lesipeki mujëë sëmbë. Fëën mbei te mujëë sëmbë ko dou a di Könuköndë zali, nöö u ta kë u de fii taa u lobi de, söseei taa u ta lesipeki de.” Be hii u tuu mbei möiti u djeesi Jehovah a di fasi fa a ta lesipeki mujëë sëmbë, söseei a di fasi fa a ta lei taa a lobi de. Biga de fiti fuu lobi de, söseei fuu lesipeki de.​—Lom. 12:10.