Sonwan fu den gro kon na ini kulturu pe furu man e wiswasi umasma. Fu eksempre, Hans, wan kring-owruman na ini Bolifia e taki: „Son mansma kweki na ini wan kulturu pe den man prenspari moro umasma èn nofo tron den no e lespeki den.” Shengxian, wan owruman na ini Taiwan e taki: „Pe mi e tan, furu man feni taki umasma no musu bemui na ini den tori. Efu wan man e taki fa wan uma e denki fu wan tori, dan den mati fu en kan lasi lespeki gi en.” Tra man e sori na tra fasi taki den no e lespeki umasma. Fu eksempre, kande den e ferteri lafutori di e sori taki den no abi lespeki gi umasma.

Koloku taki wan man kan kenki, awinsi na ini sortu kulturu a kweki. A kan tapu fu bribi taki mansma bun moro umasma (Ef. 4:22-24). San o yepi en fu du disi, na te a e teki na eksempre fu Yehovah. Na ini na artikel disi wi o luku fa Yehovah e sori lespeki gi umasma, fa brada kan leri fu teki na eksempre fu Yehovah, èn fa owruman kan sori lespeki gi den sisa.

FA YEHOVAH E SORI LESPEKI GI UMASMA?

Nowan sma abi moro lespeki gi umasma leki Yehovah. A de wan Papa di e firi gi den pkin fu en èn a lobi den alamala (Yoh. 3:16). Èn a e si den umasma di e bribi na ini en, leki en umapkin di a lobi srefsrefi. Kow luku na sortu fasi Yehovah e sori taki a abi lobi nanga lespeki gi umasma.

A no lobi a wan moro a trawan. Yehovah meki man nanga uma leki fa en srefi de (Gen. 1:27). A no meki den man na so wan fasi taki den koni moro umasma.  A no lobi den man moro den uma tu (2 Kron. 19:7). A meki man nanga uma na so wan fasi taki den ala tu kan frustan Bijbel tru tori èn den kan sori den moi fasi fu en. Yehovah e warderi man nanga uma di e bribi na ini en. A gi man nanga uma a howpu fu libi fu têgo na grontapu noso fu dini leki kownu nanga priester na ini hemel (2 Petr. 1:1). A de krin taki Yehovah no e desko umasma.

A e arki den. Yehovah e broko en ede nanga den problema di umasma abi èn nanga a fasi fa den e firi. Fu eksempre, a ben arki den begi fu Rakel nanga Hana èn a piki den tu (Gen. 30:22; 1 Sam. 1:10, 11, 19, 20). Yehovah ben meki Bijbel skrifiman skrifi tori na ini Bijbel fu mansma di ben e arki umasma. Fu eksempre, Abraham teki a rai di Yehovah ben gi en fu arki en wefi, Sara (Gen. 21:12-14). Kownu David ben arki Abigayil. Fu taki en leti, a ben ferstan taki na Yehovah ben seni na uma disi fu taki nanga en (1 Sam. 25:32-35). Yesus di e denki neleki en Papa, ben arki en mama Maria (Yoh. 2:3-10). Den eksempre disi e sori krin taki wán fasi fa Yehovah e sori taki a e lespeki umasma, na taki a e arki den.

A e fertrow den. Fu di Yehovah ben fertrow Eva, meki a gi en a wroko fu yepi sorgu gi heri grontapu (Gen. 1:28). Na so a sori taki a no ben si Eva leki wan sma di lagi moro en masra, Adam, ma taki a ben e si en leki wan bun patna. Yehovah ben fertrow den umaprofeiti Debora nanga Hulda tu èn dati meki a gebroiki den fu gi en pipel rai, sosrefi wan krutuman nanga wan kownu (Krut. 4:4-9; 2 Kow. 22:14-20). Na ini a ten disi, Yehovah e fertrow Kresten uma èn a e meki den du a wroko fu en. Den getrow sisa disi e dini leki preikiman, pionier, nanga zendeling. Den e yepi fu teken, fu bow, èn fu hori den Kownukondre zaal nanga den bijkantoro bun. Sonwan fu den e dini na Betel, trawan e dini na vertaal-kantoro di no de na a bijkantoro. Den sisa disi de leki wan bigi legre di Yehovah e gebroiki fu du a wani fu en (Ps. 68:11). A de krin taki Yehovah no e si umasma leki sma di swaki èn di no man du son sani.

FA BRADA KAN LERI FU SORI LESPEKI GI UMASMA NELEKI YEHOVAH?

Brada, fu man sabi efu wi e sori lespeki gi umasma neleki fa Yehovah e du dati, dan wi musu ondrosuku a fasi fa wi e denki èn fa wi e tyari wisrefi. Fu man du dati, wi abi yepi fanowdu. Neleki fa wan scan apparaat kan meki wan fowtow fu wan sma en ati fu si san e du en, na so wan bun mati èn a Wortu fu Gado kan yepi wi fu kon si efu dipi na ini wi ati wi e denki takru fu umasma. San wi kan du fu kisi a yepi dati?

Aksi wan bun mati (Odo 18:17). Efu wi abi wan bun mati di wi e fertrow, di abi switifasi, èn di no e ferwakti tumsi furu fu wi, dan wi kan aksi en den sani disi: „Yu feni taki mi e lespeki den s’sa? Den feni taki mi e lespeki den? Wan sani de di mi kan du fu sori moro lespeki gi den?” Efu a mati fu yu e taigi yu sortu sani yu kan du fu sori moro lespeki gi sisa, dan no firi wan fasi. Na presi fu dati, du ala san yu man fu tyari den kenki dati kon.

Studeri Gado Wortu. A moro bun fasi fa wi kan kon sabi efu wi e lespeki den sisa, na te wi e gebroiki Gado Wortu fu ondrosuku a fasi fa wi e denki èn fa wi e tyari wisrefi (Hebr. 4:12). Te wi e studeri Bijbel, dan wi e leri fu mansma di ben e lespeki umasma èn fu mansma di no ben e du dati. Wi kan gebroiki den eksempre disi fu luku efu wi e lespeki umasma. Boiti dati, te wi e agersi difrenti Bijbel vers nanga makandra, dan dati o yepi wi fu no gebroiki wán spesrutu tekst nomo fu horibaka gi wan fowtu denki di wi abi fu umasma. Fu eksempre, soleki fa 1 Petrus 3:7 e sori, dan wan man musu warderi en wefi fu di „umasma moro swaki èn den de leki wan prapi di kan broko makriki”. b Ma  a sani disi wani taki dati umasma lagi moro mansma èn taki den no man du den sani di mansma man du? Kwetkweti! Meki wi agersi den wortu fu Petrus nanga san Galasiasma 3:26-29 e taki. Den tekst dati e sori taki Yehovah teki mansma èn sosrefi umasma fu tiri makandra nanga Yesus na ini hemel. Te wi e studeri Gado Wortu èn te wi e aksi wan bun mati efu wi e lespeki umasma, dan na so wi kan leri fu sori lespeki gi den sisa fu wi na wan fasi di fiti.

FA OWRUMAN E SORI LESPEKI GI SISA?

Te den brada na ini a gemeente e teki na eksempre fu den owruman di lobi den skapu, dan den kan leri tu fa fu sori lespeki gi sisa. Fa owruman e sori lespeki gi den sisa? Kow luku wan tu fasi fa den e du dati.

Den e prèise den sisa. Na apostel Paulus ben de wan bun eksempre gi owruman. A ben prèise wan tu sisa na ini wan brifi di a ben skrifi gi a gemeente na ini Rome (Rom. 16:12). Yu kan ferstan fa den sisa disi ben musu prisiri di sma leisi a brifi disi gi a gemeente? Na so a de tu taki owruman lobi prèise den sisa gi den moi fasi fu den èn gi a wroko di den e du gi Yehovah. A sani disi e yepi den sisa fu si taki a gemeente lobi den èn e lespeki den. Te wan owruman e prèise den sisa di e dini Yehovah fayafaya, dan dati kan de soifri a dek’ati di den abi fanowdu na a momenti dati.​—Odo 15:23.

Te owruman e prèise den sisa, dan den e taki precies san den du bun èn den de eerlijk. Fu san ede? Wan sisa di nen Jessica e taki: „Mi lobi en te den brada e taigi wan sisa taki a e du en bun. Ma a e gi moro dek’ati te den brada e taigi wi precies san wi du bun. Fu eksempre den kan prèise wi taki wi leri den pikin fu wi fu sdon rustig na  den konmakandra, noso taki wi e meki muiti fu go teki wan Bijbelstudie tyari kon na zaal.” Te den owruman e prèise den sisa gi wan spesrutu sani, dan den sisa e firi taki den prenspari gi a gemeente èn taki a gemeente lobi den.

Den e arki den sisa. Owruman di abi sakafasi e ferstan taki a no den w’wan sabi san na a moro bun sani fu du. Den owruman dati e gi sisa okasi fu taigi den san den e denki èn den e arki bun te den sisa e taki. Na so owruman e gi den sisa dek’ati èn a sani dati e tyari wini kon gi den owruman srefi. Fa so? Gerardo, wan owruman di e dini na Betel, e taki: „Mi kon si taki te yu e aksi sisa fu yepi yu, dan a wroko e du moro bun. Nofo tron den du wan wroko moro langa leki furu brada.” Na ini a gemeente, furu sisa e dini leki pionier, sobun, den sabi den sma di e libi na ini a kontren drape heri bun. Wan owruman di nen Bryan e taki: „Den sisa fu wi man du furu gi na organisâsi. Dati meki a bun fu leri fu den.”

Koni owruman no musu de gaw fu taki dati wan sani di wan sisa taki no bun fu du. Fu san ede? Wan owruman di nen Edward e taki: „A fasi fa wan sisa e denki fu wan tori èn na ondrofeni fu en, kan yepi wan brada fu ferstan wan tori moro krin èn a kan yepi en fu ferstan moro bun fa trawan e firi” (Odo 1:5). Awinsi wan owruman no man gebroiki a sani di wan sisa taigi en, toku a bun fu taigi en tangi taki a ferteri en fa a e denki fu a tori.

Den e gi den sisa leri. Koni owruman e suku okasi fu gi sisa leri. Fu eksempre, den kan leri sisa fa fu hori wan preikiwroko konmakandra efu wan dopu brada no de fu du dati. Den kan leri den fa fu gebroiki spesrutu wrokosani so taki den o man yepi fu bow noso sorgu den presi di wi organisâsi e gebroiki. Na Betel, den opziener leri den sisa fu du difrenti sortu wroko: den leri fu sorgu taki a presi e tan bun, fu bai sani, fu du boekhouden, fu meki computer programa, èn so moro fara. Te owruman e gi sisa leri, dan den e sori taki den e fertrow den sisa èn taki den e si den leki sma di man du difrenti sortu sani.

Furu sisa e gebroiki a leri di den kisi fu den owruman fu yepi trawan. Fu eksempre, son sisa di leri fu du bow-wroko e yepi trawan fu seti den oso kon bun baka te wan rampu psa. Tra sisa di leri fu preiki na presi pe furu sma de, e leri moro sisa fa fu preiki na den presi dati. Fa den sisa e denki fu den owruman di gi den leri? Wan sisa di nen Jennifer e taki: „Di mi ben e yepi fu bow wan Kownukondre zaal, dan wan opziener teki a ten fu leri mi fa fu du a wroko. A ben si a wroko di mi du èn a prèise mi gi dati. Mi ben lobi wroko nanga en fu di mi ben e firi taki mi ben e du wan bun sani èn taki a ben e fertrow mi.”

DEN WINI DI WI E KISI TE WI E SI DEN SISA LEKI FAMIRI

Wi lobi den getrow sisa fu wi neleki fa Yehovah lobi den. Dati meki wi e si den leki famiri (1 Tim. 5:1, 2). Wi breiti nanga den èn wi e si en leki wan grani fu wroko makandra nanga den. Wi breiti te den sabi taki wi lobi den èn taki wi e horbaka gi den. Wan sisa di nen Vanessa e taki: „Mi e taki Yehovah tangi taki mi de na ini na organisâsi disi di lai nanga brada di e gi mi furu dek’ati.” Wan sisa na ini Taiwan e taki: „Mi breiti sref’srefi taki Yehovah nanga en organisâsi e warderi umasma trutru èn taki den e lespeki den firi fu den. Disi e tranga a bribi fu mi èn a e meki mi kisi moro warderi gi a grani di mi abi fu de na ini na organisâsi fu Yehovah.”

Yehovah musu fu prisiri te a e si fa getrow Kresten man e warderi umasma èn fa den e sori lespeki gi den, neleki fa en e du dati (Odo 27:11). Benjamin, wan owruman na ini Skotland, e taki: „Na ini a ten disi, furu man no abi nowan lespeki gi umasma. Sobun, te den sisa e kon na ini wan Kownukondre zaal, dan wi wani meki den firi taki wi e lespeki den èn taki wi lobi den.” Meki wi du ala san wi man fu sori den sisa fu wi taki wi lobi den èn taki wi e lespeki den neleki fa Yehovah e du dati.​—Rom. 12:10.