Van’wana va huma eka mindhavuko leyi vavanuna va tekelaka vavasati ehansi. Hi xikombiso, Hans loyi a nga mulanguteri wa muganga eBolivia, u ri: “Vavanuna van’wana hi ku ya hi mindhavuko ya vona leyi nga riki yinene, va dyondzisiwe leswaku va tlakukile eka vavasati.” Shengxian loyi a nga nkulu eTaiwan, u ri: “Laha ndzi tshamaka kona, vavanuna vo tala va tibyela leswaku vavasati a va nge va byeli nchumu. Loko wanuna a vula mavonelo lama humaka eka wansati, tintangha takwe ti nga ha n’wi tekela ehansi.” Vavanuna van’wana va ni xihlawuhlawu eka vavasati hi tindlela tin’wana leti nga tekeriwiki enhlokweni. Hi xikombiso, va nga ha endla mafenya lama tsongahataka vavasati.

Entiyisweni, wanuna a nga swi kota ku cinca swi nga ri na mhaka ndhavuko lowu a kuleleke eka wona. A nga swi kota ku tshika ku teka vavanuna va tlakukile eka vavasati. (Efe. 4:​22-24) A nga kota ku endla tano hi ku tekelela xikombiso xa Yehovha. Eka nhlokomhaka leyi, hi ta bula hi ndlela leyi Yehovha a va khomaka hayona vavasati, ndlela leyi vamakwerhu va xinuna va nga dyondzaka ku khoma vavasati ku fana na Yehovha ni ndlela leyi vakulu va nga vaka swikombiso leswinene emhakeni yo xixima vamakwerhu va xisati.

YEHOVHA U VA KHOMA NJHANI VAVASATI?

Yehovha u hi vekela xikombiso lexinene emhakeni yo khoma vavasati. Leswi a nga Tatana la nga ni ntwelavusiwana, u rhandza vana vakwe hinkwavo. (Yoh. 3:16) Hikwalaho, vamakwerhu va xisati vo tshembeka i va risima eka yena. Xiya tindlela leti landzelaka leti Yehovha a swi kombisaka ha tona leswaku u rhandza ni ku xixima vavasati.

A nga na xihlawuhlawu eka vavasati. Yehovha u vumbe wanuna ni wansati hi xifaniso xakwe. (Gen. 1:27) A nga endlanga vavanuna va bela vavasati  ekule hi vutlhari ni vuswikoti kumbe a va rhandza ngopfu ku tlula vavasati. (2 Tikr. 19:7) U vumbe wanuna ni wansati va ri ni vuswikoti lebyi fanaka bya ku twisisa ntiyiso wa le Bibeleni ni ku tekelela vumunhu byakwe lebyinene. Yehovha wa va tlangela swinene vavanuna ni vavasati lava nga ni ripfumelo naswona u va nyike ntshembo wa ku hanya hilaha ku nga heriki laha misaveni kumbe etilweni tanihi tihosi ni vaprista. (2 Pet. 1:1) Swi lo tlangandla leswaku Yehovha a nga na xihlawuhlawu eka vavasati.

Wa va yingisela. Yehovha wa khathala hi ndlela leyi vavasati va titwaka hayona ni hi swiphiqo swa vona. Hi xikombiso, u yingiserile ni ku hlamula swikhongelo swa Rahele na Hana. (Gen. 30:22; 1 Sam. 1:​10, 11, 19, 20) U tlhele a huhutela vatsari va Bibele leswaku va tsala hi ta vavanuna lava yingiseleke vavasati. Hi xikombiso, Abrahama u yingise Yehovha loko A n’wi byela leswaku a yingisela nsati wakwe Sara. (Gen. 21:​12-14) Hosi Davhida u yingisele Abigayele. Entiyisweni, a a vona onge Abigayele u rhumiwe hi Yehovha leswaku a ta vulavula na yena. (1 Sam. 25:​32-35) Yesu loyi a a n’wi tekelela kwatsaa Tata wakwe, u yingise mana wakwe Mariya. (Yoh. 2:​3-10) Swikombiso leswi swi kombisa leswaku Yehovha u xixima vavasati hi ku va yingisela.

Wa va tshemba. Hi xikombiso, Yehovha u tshembe Evha hi ku n’wi nyika xiavelo xo pfuneta ku khathalela misava hinkwayo. (Gen. 1:28) Sweswo swi kombise leswaku a a nga n’wi languteli ehansi loko a n’wi ringanisa ni nuna wakwe Adamu kambe a a n’wi teka a ri mupfuni. Yehovha u tshembe Debora na Hulida lava nga vaprofeta va xisati leswaku va tsundzuxa vanhu vakwe, ku katsa ni muavanyisi na hosi. (Vaav. 4:​4-9; 2 Tih. 22:​14-20) Namuntlha Yehovha u tshemba vavasati lava nga Vakreste hi ku va pfumelela va endla ntirho wakwe. Vamakwerhu lava vo tshembeka i vahuweleri, maphayona ni varhumiwa. Va pfuneta ku pulana, ku aka ni ku lunghisa Tiholo ta Mfumo ni marhavi. Van’wana va tirha eBethele; kasi van’wana eka tihofisi ta vuhundzuluxeri. Vavasati lava va fana ni vuthu lerikulu leri Yehovha a ri tirhisaka ku endla ku rhandza kakwe. (Ps. 68:11) Swi le rivaleni ku Yehovha u teka vavasati va nga tsananga kumbe va kala vuswikoti.

VAMAKWERHU VA XINUNA VA NGA PFUNIWA HI YINI LESWAKU VA KHOMA VAVASATI KU FANA NA YEHOVHA?

Leswaku hi kota ku vona loko hina vamakwerhu va xinuna hi khoma vamakwerhu va xisati ku fana na Yehovha, hi fanele hi kambela miehleketo ni swiendlo swa hina hi ku tshembeka. Hi lava mpfuno leswaku hi kota ku endla tano. Dokodela a nga ha tirhisa X-ray leswaku a kota ku vona loko mbilu ya munhu yi hanye kahle. Hilaha ku fanaka, munghana lonene ni Rito ra Xikwembu swi nga hi pfuna hi vona loko ndlela leyi hi va tekaka hayona vavasati yi tsakisa Yehovha. Hi nga wu kuma njhani mpfuno wolowo?

Vutisa munghana lonene. (Swiv. 18:17) Hi endla kahle ku vutisa munghana loyi a nga ni musa ni loyi a tshembekaka swivutiso swo fana ni leswi: “Ndzi va khoma njhani vamakwerhu va xisati? Xana va vona ndzi va xixima? Xana ndzi nga endla yini swin’wana ku antswisa ndlela leyi ndzi va khomaka hayona?” Loko munghana wa wena a ku byela leswi u nga swi antswisaka, u nga tiyimeleli kambe tiyimisele ku antswisa laha ku faneleke.

Dyondza Rito ra Xikwembu. Ndlela yin’wana leyi nga hi pfunaka ku vona loko hi khoma vamakwerhu va xisati kahle, i ku kambela miehleketo ni swiendlo swa hina hi ku tirhisa Rito ra Xikwembu. (Hev. 4:12) Loko hi hlaya Bibele, hi dyondza hi vavanuna lava khomeke vavasati kahle ni lava nga va khomangiki kahle. Swikombiso sweswo swi hi pfuna ku vona loko hi khoma vavasati ku fana na vona. Nakambe, vamakwerhu va xinuna va fanele va tivonela leswaku a va kambisisi ndzimana yin’we ntsena ya le Bibeleni leyi seketelaka mavonelo lama hoxeke hi vavasati. Hi xikombiso, 1 Petro 3:7 yi vula leswaku wansati u fanele a ‘xiximiwa tanihi leswi a nga xibya xo tsana.’ b Xana leswi swi vula leswaku u fanele a tekeriwa ehansi naswona a  nga tlharihanga eka wanuna? Doo! Ringanisa marito ya Petro na Vagalatiya 3:​26-29, leyi vulaka leswaku Yehovha u hlawule vavanuna ni vavasati leswaku va ya fuma na Yesu etilweni. Loko hi hlaya Rito ra Xikwembu ni ku vutisa munghana loyi a tshembekaka hi ndlela leyi hi va khomaka hayona vavasati, hi ta dyondza ku xixima vamakwerhu va xisati hi ndlela leyi faneleke.

VAKULU VA NGA SWI KOMBISA NJHANI LESWAKU VA VA XIXIMA VAMAKWERHU VA XISATI?

Vamakwerhu evandlheni va nga dyondza ku xixima vamakwerhu va xisati hi ku tekelela vakulu. Vakulu va nga va xikombiso hi ndlela yihi loko swi ta emhakeni leyi? Xiya tindlela tin’wana leti va nga swi endlaka ha tona.

Va bumabumela vamakwerhu va xisati. Muapostola Pawulo u vekele vakulu xikombiso lexi va faneleke va xi tekelela. Eka papila leri a ri tsaleleke vandlha ra le Rhoma, u bumabumele vamakwerhu va xisati vo tala. (Rhom. 16:12) Ehleketa ndlela leyi vamakwerhu volavo va tsakeke hayona loko papila ra Pawulo ri hlayiwa evandlheni. Hilaha ku fanaka, vakulu va bumabumela vamakwerhu va xisati hikwalaho ka vumunhu bya vona lebyinene ni ntirho lowu va wu endlelaka Yehovha. Leswi swi endla vamakwerhu va xisati va swi vona leswaku vandlha ra va xixima ni ku va tlangela. Marito lama khutazaka ya nkulu ku nga ha va lawa va ma lavaka leswaku va ya emahlweni va tirhela Yehovha hi ku tshembeka.—Swiv. 15:23.

Loko vakulu va bumabumela vamakwerhu va xisati, va swi boxa hi ku kongoma leswi va swi rhandzaka hi vona. Hikwalahokayini? Makwerhu wa xisati Jessica u ri: “Swa tsakisa loko vamakwerhu va xinuna va byela makwerhu wa xisati va ku, ‘u endle ntirho wa kahle.’ Kambe hi swi tlangela swinene loko va hi bumabumela hi ku kongoma eka leswi hi swi endleke, ku fana ni ku dyondzisa vana va nga bi pongo loko hi ri etidyondzweni kumbe hi leswi hi  koteke ku landza xichudeni xa Bibele xi ta etidyondzweni.” Vamakwerhu va xisati va titwa va ri va nkoka evandlheni loko vakulu va swi boxa hi ku kongoma loko va va bumabumela.

Va yingisela vamakwerhu va xisati. Vakulu va swi xiya ku a hi vona ntsena lava nga ni mavonelo lamanene. Hikwalaho, va kombela ku twa mavonelo ya vamakwerhu va xisati eka nchumu wo karhi ni ku va yingisela loko va vulavula. Loko va endla tano, vakulu va vuyeriwa naswona va khutaza vamakwerhu va xisati. Njhani? Nkulu loyi a vuriwaka Gerardo loyi a tirhaka eBethele u ri: “Ndzi xiye leswaku loko ndzi kombela ku twa mavonelo ya vamakwerhu va xisati emhakeni yo karhi, swi ndzi pfuna ndzi wu endla kahle ntirho wa mina. Hakanyingi va va va ri ni ntokoto eka xiavelo xo karhi ku tlula vamakwerhu vo tala va xinuna.” Evandlheni, vamakwerhu vo tala va xisati i maphayona kutani va tiva swo tala hi vanhu va le ndhawini leyi va phayonaka eka yona. Nkulu loyi a vuriwaka Bryan, u ri: “Vamakwerhu va xisati va ni swo tala swo swi endla enhlanganweni wa Yehovha. Hikwalaho, u nga vuyeriwa eka ntokoto wa vona!”

Vakulu a va fanelanga va swi ba hi makatla swiringanyeto swa vamakwerhu va xisati. Hikwalahokayini? Edward la nga nkulu u ri: “Mavonelo ni ntokoto wa makwerhu wa xisati swi nga pfuna makwerhu wa xinuna a yi twisisa hi vuenti mhaka yo karhi ni ku twisisa ndlela leyi van’wana va titwaka hayona.” (Swiv. 1:5) Hambiloko nkulu a nga xi tirhisi xiringanyeto xa makwerhu wa xisati, a nga n’wi khensa hikwalaho ka mavonelo yakwe ni vutlhari byakwe.

Va letela vamakwerhu va xisati. Vakulu va lava tindlela to letela vamakwerhu va xisati. Hi xikombiso, va nga va dyondzisa ku fambisa nhlengeletano ya nsimu loko makwerhu wa xinuna loyi a khuvuriweke a nga ri kona. Va nga va letela ku tirhisa mathulusi kumbe michini leswaku va ta kota ku pfuneta eka ntirho wo aka ni wo lunghisa miako ya nhlangano. Kasi eBethele, valanguteri va letele vamakwerhu va xisati leswaku va endla mitirho yo hambanahambana, leyi katsaka ku lunghisa, ku xava, tiakhawunti, ku tirhisa khompyuta ni swin’wana. Loko vakulu va letela vamakwerhu va xisati, swi kombisa leswaku va va teka va ri ni vuswikoti ni ku tshembeka.

Vamakwerhu vo tala va xisati va tirhisa leswi va dyondzisiweke swona hi vakulu ku pfuna van’wana. Hi xikombiso, van’wana va tirhisa leswi va swi dyondzeke eka ntirho wo aka leswaku va akela vamakwerhu makaya ya vona lama onhiweke hi timhangu. Kasi van’wana va tirhisa vuswikoti lebyi va byi kumeke eka ntirho wo chumayela ku letela vamakwerhu vo tala va xisati leswaku va kota ku chumayela. Xana vamakwerhu lava va titwa njhani hi vakulu lava va va dyondziseke? Makwerhu wa xisati Jennifer u ri: “Loko ndzi ri karhi ndzi pfuneta ku aka Holo yin’wana ya Mfumo, mulanguteri u tinyike nkarhi wo ndzi letela. U xiye ntirho wa mina ivi a ndzi bumabumela. A ndzi swi rhandza ku tirha na yena hikuva ndzi titwe ndzi tshembiwa ni ku va wa nkoka.”

VUYELO BYA KU KHOMA VAMAKWERHU VA XISATI KU FANA NI SWIRHO SWA NDYANGU

Ku fana na Yehovha, hi rhandza vamakwerhu va xisati vo tshembeka! Hikwalaho, hi va khoma ku fana ni swirho swa ndyangu. (1 Tim. 5:​1, 2) Ha va tlangela swinene ni ku tiphina hi ku tirha na vona. Hi tlhela hi tsaka loko va swi vona leswaku ha va rhandza ni ku va seketela. Makwerhu wa xisati Vanessa u ri: “Ndza n’wi khensa Yehovha hileswi ndzi nga xiphemu xa nhlangano wakwe lowu nga lo mphaa, hi vamakwerhu lava ndzi khutazeke swinene.” Makwerhu wa xisati wa le Taiwan u ri: “Ndza n’wi khensa swinene Yehovha hileswi a nga ni nhlangano lowu tekaka vavasati va ri va nkoka ni ku xixima mavonelo ya vona. Leswi swi tiyise ripfumelo ra mina ni ku ndzi endla ndzi ya ndzi tlangela nkateko wo va xiphemu xa nhlangano wa Yehovha.”

Yehovha wa tinyungubyisa loko a vona vamakwerhu va xinuna vo tshembeka va tikarhatela ku khoma vavasati ku fana na yena! (Swiv. 27:11) Benjamin loyi a nga nkulu eScotland u ri: “Misava yi va tekela ehansi vavasati. Hikwalaho, loko vamakwerhu va xisati va ri eHolweni ya Mfumo, hi lava ku va endla va titwa va ri ekaya.” Onge hinkwerhu hi nga tikarhatela ku tekelela Yehovha hi ku khoma vamakwerhu va xisati hi rirhandzu ni ku va xixima.—Rhom. 12:10.