Mushobo Wamunobata Anakadzi Ndiwona Waanobathwa na Djehovha Here?
ISUSU tino makomborero e kuseenzera Djehovha pamwepo no anakadzi akawanda akatendeka. Isusu tinoda maningi hanzvadzi idzi dzakatendeka, uye tinotenda maningi no basa rakanaka radzinoita! a Ndiyo ndaa, hama petai masimba kuti mubate hanzvadzi no unatsi, no rureremedzo uye no unaki. Asi ngo ndaa yekuti tiri anhu asikazi kukwana, izvona zvingakwanisa kushuphira anhu anganani. Hama dzimweni dzicino zvinetso zvimweni.
Anarume amweni akakurira mu tsika yekuti anobata anakadzi hingana asikakoshi. Ngo muezaniso, muonereri umweni we nharaunda unozwi, Hans unoseenza ku Bolívia, unoti: “Anarume amweni akarererhwa mu tsika yekuti awona anodziona hinga anokosha uye aareremedzi anakadzi.” Mukuru umweni we ku Taiwan unozwi Shengxian, unoti: “Kandinogara anarume akawanda anoti, mwanakadzi aatenderhwi kubhuyawo maonero ake. Kana mwanarume akabhuya maonero e mwanakadzi ngezve nyaya imweni anarume ese anomushora uye aacamureremedzi.” Anarume amweni anopangidza rusananguro ku anakadzi ngo mushobo usikanyasi kuoneka. Ngo muezaniso, awona angareketa masoko ekupsvinyira anakadzi.
Pasinei nokuti mwanarume iyena wakarererhwa ku mbuto yakadini, iyena unokwanisa kucinja. Iyena unokwanisa kufundira kuona kuti anakadzi no anarume akaezana. (Aef. 4:22-24) Mu fundo ino, ticaona kuti Djehovha anobata kudini anakadzi, hama dzingateedzera kudini Djehovha pakubata anakadzi uye kuti hama dzingatangisa kudini kuareremedza.
DJEHOVHA ANOBATA KUDINI ANAKADZI?
Djehovha akapangidza muezaniso wakakwana wekuti anakadzi anodikana kubathwa kudini. Djehovha ndi Baba edu uye iyena anoda ana ake ese. (Juau 3:16) Uye hanzvadzi dzakatendeka i ana anokosha kuna Djehovha. Zvino, ngatione mishobo minganani yekuti Djehovha anoda uye anoreremedza kudini anakadzi.
Iyena aasananguri anakadzi. Djehovha akasika anarume no anakadzi no mufanikiso wake. (Gen. 1:27) Djehovha aazi kupasa anarume uzii uye ungwaru wekukwanisa kuita zviro kudarika anakadzi; uyewo aanyanyi kuda anarume kupinda anakadzi. (2 Mak. 19:7) Iyena akasika anarume no anakadzi no mushobo umwewo wekukwanisa kuzwisisa zvokwadi zvo Bhaibheri uye kukwanisa kuteedzera mawara ake. Djehovha anokoshesawo kutenda ke anakadzi uye ke anarume—azvinei kuti kariro yawo ngeye kurarama pasi pano mu paraizo kana kuti yekutonga kudenga hingana apristi uye madzimambo. (2 Ped. 1:1, masoko e pasi) Zviri pamhene kuti Djehovha aasananguri anakadzi.
Iyena anopurutana anakadzi. Djehovha anopfarira kuzwa kuti anakadzi arikuzwa kudini uye zviro zviri kuanetsa. Ngo muezaniso, iyena akapurutana uye akadaira munamato wa Rakeri uye Ana. (Gen. 30:22; 1 Sam. 1:10, 11, 19, 20) Djehovha akafemerawo anhu aitara Bhaibheri kuti atarewo nge zve ngano dze anarume akapurutana anakadzi. Ngo muezaniso, Djehovha akabvunza Abrahamu kuti apurutane zvakabhuiwa no mukadzi wake Sara. (Gen. 21:12-14) Mambo Dhavhidhi wakapurutanawo Abhigairi. Zvezvirokwazvo iyena wakazwisisa kuti ainga ari Djehovha amutuma kuti abhuye naye. (1 Sam. 25:32-35) Uye Djesu aiteedzera ngo mushobo wakakwana mawara a Baba ake, akapurutana mai ake Mariya. (Juau 2:3-10) Miezaniso idzi, dzinopangidza pamhene kuti Djehovha anopurutana anakadzi zvecipangidza kuti anoareremedza maningi.
Djehovha anogonda kukwanisa kawo kuita zviro. Ngo muezaniso, Djehovha aiziya kuti Evha waikwanisa kucengeta nyika yese. (Gen. 1:28) Adhamu wainga asikakoshi kudarika Evha, asi Evha wainga ari mubetseri wake. Djehovha akasanangurawo aphorofitakadzi Dhebhora na Urdha kuti apangire anhu ake kutobatanidzawo mutongi uye na mambo. (Ato. 4:4-9; 2 Mad. 22:14-20) Nyamasi uno, Djehovha ano rugondo rekuti hanzvadzi dze Cikristu dzinokwanisa kuita basa rese raanopaswa. Anakadzi aya akatendeka i aparidzi, mapionero uye mamisionariyo. Awona anobetserawo pakuronga, pakugadziriswa, pakuwakwa ke Nyumba dze Umambo uye no Bheteri. Amweni awo ari pa Bheteri uye amweni anobetsera pa basa rekuturikira. Hanzvadzi idzona dzakaita hingana masurudado anoseenzeswa na Djehovha pakudzadzisa cido cake. (Pis. 68:11) Zviri pamhene kuti Djehovha aaoni anakadzi hingana asina simba kana kuti asikakwanisi kuita ciro.
TINGATEEDZERA KUDINI DJEHOVHA PA MUSHOBO WE KUBATA ANAKADZI?
Kuti muziye kuti muri kubata anakadzi ngo mushobo unodiwa na Djehovha, zvakanaka maningi kumbodziongorora pamushobo wenyu we kurangarira uye wekuita zviro. Asi kuti imwimwi muite izvona, mucada rubetso. Ngo muezaniso, mucini wo rayo-X ungakwanisa kupangidza cinetso cino munhu mu mwoyo. Nge mushobo umwewo, Bhaibheri uye shamwari dzedu zvingakwanisa kutibetsera kuona kuti tiri kubata anakadzi nge mushobo unodiwa na Djehovha here. Asi imwimwi mungatambira kudini rubetso irona?
Bvunzisai shamwari yenyu. (Zvie. 18:17) Tingakwanisa kukumbira rubetso ku shamwari yedu inoziikanwa nge unaki, kuzwisisa uye kugara no maonero ari pakati no pakati, shamwari iyona yatinogonda ingagara mwanarume kana kuti mwanakadzi. Mubvunzisei kuti: “Unorangarira kuti ndinobata kudini hanzvadzi? Idzona dzinozwa kuti inini ndinodzireremedza here? Kodi ciripo candinodikana kugadzirisa pa nyaya ii?” Kana shamwari yenyu ikamubvunzai pamunodikana kugadzirisa, imwimwi musarumbwe meciedza kupasa zvikonzero pa zviya zvamunoita. Pane kudaro, itai cinjo dzinodikanwa.
Fundai Soko ra Mwari. Mushobo wekuziya kuti muri kubata anakadzi zvakanaka, i kuseenzesa Soko ra Mwari zvakanaka kuti muziye marangarire enyu uye maitiro enyu. (Aheb. 4:12) Patinofunda Bhaibheri, tinoona ngezve anarume akabata anakadzi zvakanaka no akabata anakadzi zvakashata. Tingaezanisa muezaniso wawo nge mushobo watinobata anakadzi. Kusiya izvona, zvaizonga zvisikazi kunaka kuseenzesa tsamba yo Bhaibheri kuti tirekete zvakashata ngezve anakadzi. Ngo muezaniso, maererano na 1 Pedru 3:7, mwanarume unodikana kubata mwanakadzi no rureremedzo “hinga mudziyo usikazi kubamba.” b Kodi izvona zvinoda kureya kuti mwanakadzi aakoshi kupinda mwanarume kana kuti mwanakadzi aana uzii kana kuti aakwanisi kuita zviro kupinda mwanarume? Zviri pamhene kuti haiwa! Ezanisai masoko a Pedru nozvinobhuiwa no Bhaibheri pana Agaratiya 3:26-29 pa mavhersikuro aya, zvinopangidza pamhene kuti Djehovha akasanangura anarume uye anakadzi kuti atonge na Djesu kudenga. Patinofunda Bhaibheri uye tobvunzisa shamwari dzedu kuti tinobata kudini anakadzi, tinokwanisa kufundira kuti tingareremedza kudini hanzvadzi dzedu.
AKURU E UNGANO ANGAPANGIDZA KUDINI KUTI ANOREREMEDZA HANZVADZI?
Hama dze mu ungano dzingafundirawo kureremedza anakadzi, kana dzikateedzera muezaniso we akuru e ungano. Akuru e ungano angapasa kudini muezaniso pa nyaya iyona? Onai mishobo minganani.
Awona anosimba hanzvadzi. Muphostori Pauro wakasiya muezaniso wakanaka kuti akuru e ungano ateedzere. Pa tsamba yaakatarira ungano ye Roma, iyena wakasimba maningi hanzvadzi dzakawanda. (Aro. 16:12) Mungakwanisa kurangaridza kuti hanzvazi idzi dzakazwa kudini tsamba ya Pauro payakaerengwa mu ungano? Nge mushobo umwewo, akuru e ungano anosimba hanzvadzi nge mawara akanaka aanawo uye nge basa rese raanoitira Djehovha. Izvi zvinoita kuti hanzvadzi dzione kudiwa uye kureremedzwa kadzinoizwa no ungano. Masoko anobambisa e mukuru we mu ungano, angagara aya kamare anodikanwa no hanzvadzi kuti dzirumbwe dzeciseenzera Djehovha dzakagondeka.—Zvie. 15:23.
Simbai
Akuru e ungano anodikana kusimba hanzvadzi zvecibva pa mwoyo uye zvakananga. Ngei? Hanzvadzi imweni inozwi Jessica yakati: “Zvakanaka maningi kana hama ikareketa kuti ‘makorokoto.’ Asi zvakanaka maningi kana hama dzikaita izvona no mwoyo wese. Nge muezaniso, kusimba mai anoita kuti mwana wawo asaite barulha pa musangano, kana kuti hanzvadzi inopeta masimba kuti iende kootora mufundi wayo kuti aende ku musangano.” Akuru e ungano paanosimba hanzvadzi ngezve ciro cakananga, idzona dzinoona kuti dzinobetsera uye dzinokosha mu ungano.
Awona anopurutana hanzvadzi. Akuru e ungano anodzidodosa anoziya kuti andiwopi ega anopasa maonero akanaka. Awona anokumbira mazano ku hanzvadzi, uye anonyasa kupurutana paanonga ecireketa. Nge mushobo uwona, anonga ecibambisa hanzvadzi uye awona anonga ecitobetserekawo. Kuita kudini? Mukuru umweni unozwi Gerardo unoseenza ku Bheteri unoti: “Inini ndakazoona kuti kukumbira maonero uye mazano ku hanzvadzi, kakandibetsera kuti ndiite basa rangu zvakanaka. Kakawanda kakhona hanzvadzi dzino maesperiensiya e kukwanisa kuita basa kupinda hama dzakawanda.” Mu ungano hanzvadzi dzakawanda dzinoseenza hinga mapionero, hino awona anoziya zvakawanda ngezve anhu ari mu ndima. Hama imweni inozwi Bryan yakati: “Hanzvadzi dzedu dzinokwanisa kubetsera maningi sangano. Hino tinodikana kukhorovhera uzii wawo uye kukwanisa kawo kuita zviro!”
Purutanai
Mukuru uno ungwaru unoseenzesa mazano aanopaswa no hanzvadzi. Ngei? Mukuru umweni unozwi Edward wakati: “Esperiensiya uye maonero e hanzvadzi, anokwanisa kubetsera kuona ngezve nyaya yakhona yese uye kukoshesawo mazwiro e amweni.” (Zvie. 1:5) Kunyazi zvikasama kuita kuti mukuru aseenzese mazano e hanzvadzi, iyena ungakwanisa kutenda uye kusimba mazano e hanzvadzi iyona.
Awona anorowedza hanzvadzi. Akuru e ungano ano ungwaru anokhorovhera mukana waanoona kuti arowedze hanzvadzi. Nge muezaniso, awona angafundisa hanzvadzi kuti iitise musangano we kubuda mu basa rekuparidzira kana hama yakabhabhatidzwa pasina. Awona angakwanisawo kufundisa hanzvadzi pakuseenzesa maekipamento uye mucini kuti aseenzese pa kuwaka uye pakugadziriswa ke maprojeto e sangano. Ku Bheteri aonereri e dhepartamento anorowedza hanzvadzi kuti dzikwanise kuita mabasa akawanda hinga, kugadziriswa ke zviro, kootenga zviro, kontabhiridhadhe, kuseenza ke makomputadhori uye zvimweni. Akuru e ungano paanorowedza hanzvadzi, anopangidza kuti anogonda hanzvadzi uye anoziya kuti idzona dzinokwanisa kuita mabasa ese adzinopaswa.
Rowedzai
Hanzvadzi dzakawanda dzinoseenzesa rowedzo yadzakapaswa na Djehovha kuti dzifundisewo amweni. Nge muezaniso, hanzvadzi dzinoseenzesa rowedzo yadzakapaswa pa kuwaka kuti dzibetserewo amweni kuwaka nyumba dzawo paya panoitika tsaona. Hanzvadzi dzimweni dzakafundiswa kuparidzira pakawanda anhu, dzinobetserawo hanzvadzi dzimweni kuti dzibudirire pa mushobo uwona we kuparidzira. Hanzvadzi dzinorangarirei ngezve akuru anopsvaka nguwa kuti aarowedze? Hanzvadzi imweni inozwi Jennifer yakati: “Pandakaseenza pa basa re kuwaka Nyumba ye Umambo, muonereri umweni waipsvaka nguwa kuti andirowedze. Iyena waiwona basa randaiita uye waindisimba ndizvo, inini ndakapfara nge kuseenza naye ngokuti ndakaona kuti iyena waindigonda uye waikoshesa basa rangu.”
KUKOSHA KE KUBATA HANZVADZI HINGANA DZE MU MHURI YEDU
Isusu tinoda maningi hanzvadzi dzedu hingana mushobo wadzinodiwa na Djehovha! Hino, tinodikana kudzibata hingana mhuri yedu. (1 Ti. 5:1, 2) Isusu tinodada ngokunamata Djehovha pamwepo nadzo uye zvakanaka maningi idzona padzinozwa kuti dzinodiwa uye dzakadziirirhwa. Hanzvadzi imweni inozwi Vanessa inoti: “Inini ndinotenda maningi Djehovha ngekuita dii re sangano rake no hama dzakawanda dzecindibambisa.” Hanzvadzi imweni ye ku Taiwan inoti: “Inini ndinotenda maningi Djehovha no sangano rake ngekubata zvakanaka anakadzi uye ngekukoshesa mazwiro edu, izvi zvinobambisa kutenda kangu uye zvinoita kuti ndikoshese makomborero andinawo ekugara mu sangano ra Djehovha.”
Zvezvirokwazvo Djehovha anodada maningi paanoona hama dzecipeta masimba kuti dzibate anakadzi no rudo uye no rureremedzo! (Zvie. 27:11) Hama imweni ye ku Escócia inozwi Benjamin yakati: “Nyika aireremedzi anakadzi, hino mwanakadzi paanopinda mu Nyumba ye Umambo, isusu tinoda kuti azwe kuti muno makasiyana.” Hino tese tinodikana kupeta masimba kuti titeedzere Djehovha tobata hanzvadzi dzedu dzinodiwa no rudo uye no rureremedzo.—Aro. 12:10.
a Mu fundo ino, “hanzvadzi”, zvinoreya hanzvadzi dze mu ungano.
b Kuti muziye zvakawanda ngezve masoko ekuti “mudziyo usikazi kubamba,” onai fundo yakazwi: “Kukosha Kwo‘mudziyo Usina Simba’” mu Murindiri wa 15 ya Mayo wa 2006, uye pakazwi: “Mirayiridzo Yokuchenjera Kune Vakaroorana” mu Murindiri wa 1 ya Marso wa 2005, mu ciShona.
